ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމާއި، އެމަނިކުފާނުގެ އަނބިކަނބަލުން ފާޠިމަތު އިބްރާހީމް، ސަޢޫދީ ޢަރަބިއްޔާއަށް ކުރައްވާ ފުރަމާނަ ދަތުރުފުޅުގައި، ސަޢޫދީ ޢަރަބިއްޔާގެ ވެރިރަށް ރިޔާޟަށް މިއަދު މެންދުރުފަހު ވަޑައިގެންފިއެވެ.
ކިންގް ޚާލިދް އިންޓަރނޭޝަނަލް އެއާޕޯޓުން، ރައީސުލްޖުމްހޫރިއްޔާގެ ދެކަނބަލުންނަށް މަރްޙަބާ ވިދާޅުވީ، ސަޢޫދީ ޢަރަބިއްޔާގެ ރަސްގެފާނު ސަލްމާން ބިން ޢަބްދުލްޢަޒީޒް އާލްސަޢުދެވެ. މީގެއިތުރަށް، ސަޢޫދީ ޢަރަބިއްޔާގެ ޑެޕިއުޓީ ޕްރިމިއަރ، ވަލީޢަހުދު މުކްރިން ބިން ޢަބްދުލްޢަޒީޒް އާލްސަޢުދާއި، ރިޔާޟް ރީޖަނުގެ ގަވަރނަރު، ވަލީޢަހުދު ފައިސަލް ބިން ބަންދަރ ބިން ޢަބްދުﷲ ޢަބްދުލްޢަޒީޒާއި، މިނިސްޓަރ އޮފް ނޭޝަނަލް ގާޑް، ވަލީޢަހުދު މިތެބް ބިން ޢަބްދުލްޢަޒީޒާއި، ސަޢޫދީ ކޮމިޝަން ފޮރ ޓުއަރިޒަމް އެންޑް އެންޓިކުއިޓީސްގެ ރައީސް، ސުލްތާން ބިން ސަލްމާން ބިން ޢަބްދުލްޢަޒީޒުގެ އިތުރުން ސަޢޫދީ ސަރުކާރުގެ ބައެއް އިސްބޭފުޅުންވެސް މަރްޚަބާ ދެންނެވުމުގެ ރަސްމިއްޔާތުގައި ބައިވެރިވެވަޑައިގަތެވެ.
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމާއި، އެމަނިކުފާނުގެ އަނބިކަނބަލުން ފާޠިމަތު އިބްރާހީމް، ސަޢޫދީ ޢަރަބިއްޔާއަށް ކުރައްވާ މި ދަތުރުފުޅަކީ، ސަޢޫދީ ޢަރަބިއްޔާގެ ރަސްގެފާނު ސަލްމާން ބިން ޢަބްދުލްޢަޒީޒް އާލްސަޢުދުގެ ދަޢުވަތަކަށް ކުރައްވާ ދަތުރުފުޅެކެވެ. މިދަތުރުފުޅުގައި ރައީސުލްޖުމްހޫރިއްޔާގެ އަރިހުގައި، ރައްޔިތުންގެ މަޖިލީހުގެ މެންބަރު އަދި މޯލްޑިވްސް ޑިވެލޮޕްމަންޓް އެލަޔަންސްގެ ލީޑަރު، އަޙްމަދު ސިޔާމް މުޙަންމަދާއި، މިނިސްޓަރ އޮފް ފިޝަރީޒް އެންޑް އެގްރިކަލްޗަރ، ޑޮކްޓަރ މުޙަންމަދު ޝައިނީއާއި، މިނިސްޓަރ އޮފް އިސްލާމިކް އެފެއާޒް، ޑޮކްޓަރ މުޙަންމަދު ޝަހީމް ޢަލީ ސަޢީދު، މި ދަތުރުފުޅުގައި ބައިވެރިވެވަޑައިގަންނަވައެވެ.
