ދިވެހިސަރުކާރުގެ މެނިފެސްޓޯގައިވާ ގޮތުގެމަތިން ޒުވާނުން މަސްވެރިކަމަށް އަޙުލުވެރިކުރުވާ، މަސްވެރިކަމުގެ ޞިނާޢަތުގައި ބައިވެރިކުރުމަށް އަމާޒުކޮށްގެން ޒުވާން މަސްވެރިންނާއި އޮޑިވެރިން އިތުރުކުރުމަށާއި މަސްދޯނިފަހަރު ބަނުމަށާއި ދޯނިފަހަރަށް ބޭނުންވާ އިންޖީނާއި ޒަމާނީ ވަޞީލަތްތައް ހޯދުމުގައި މާލީގޮތުން އެހީތެރިވެދިނުމަށް ސަރުކާރުން ފައްޓަވާފައިވާ ލޯން ސްކީމުގެ ދަށުން، ލޯނު ލިބުނު 14 ފަރާތަކަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ލޯން ލިބުނުކަމުގެ ލިޔުން ހަވާލުކޮށްދެއްވައިފިއެވެ. ލޯން ލިބުނުކަމުގެ ލިޔުން ހަވާލުކޮށްދެއްވީ، އެކަމަށްޓަކައި ރައީސުލްޖުމްހޫރިއްޔާގެ އޮފީހުގެ މިއަދު ބޭއްވެވި ޙާއްޞަ ރަސްމިއްޔާތެއްގައެވެ.
މި ރަސްމިއްޔާތުގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، މަސްވެރިކަމުގެ ދާއިރާއަކީ ދިވެހިރާއްޖޭގައި އަބަދުވެސް ވަރަށް ބޮޑެތި ގޮންޖެހުންތަކަކާ ކުރިމަތިލާންޖެހޭ ދާއިރާއެއް ކަމުގައި ބަޔާންކުރެއްވިއެވެ. މިގޮތުން، ޒުވާން މަސްވެރިންނާއި އޮޑިވެރިންގެ ލޯން ސްކީމަކީ މަސްވެރިންނަށް ހިތްވަރު ދިނުމަށާއި، އިޤްތިޞާދު އާރާސްތު ކުރުމަށް ހިތްވަރު ދިނުމަށް ބޭނުންތެރި ރަނގަޅު މަސައްކަތަކަށް ވެގެންދާނެ ކަމުގައި އެމަނިކުފާނު ވިދާޅުވިއެވެ. މީގެއިތުރަށް، ލޯން ސްކީމްގެ 60 ޕަސެންޓް އަމާޒުކޮށްފައި ވަނީ ޒުވާން މަސްވެރިންނަށް ކަމުގައި ފާހަގަކުރައްވަމުން، މި ޕްރްގްރާމަކީ ޒުވާނުން އިޤްތިޞާދީ މަސައްކަތުގައި ބައިވެރިކުރަން އެމަނިކުފާނުގެ ސަރުކާރުން ކުރައްވާ މަސައްކަތުގައި އިތުރު ކުރިއެރުމެއް ލިބިގެންދާ ކަމެއްކަމުގައި ވިދާޅުވިއެވެ.
ދިވެހިރާއްޖޭގެ އިޤްތިޞާދު ގިނަބަޔަކަށް އޭގެ މަންފާ ލިބޭ ގޮތަކަށް، އަދި ބައިވެރިވެވޭ ގޮތަށް ހުޅުވިފައި އޮތުން އެއީ މިސަރުކާރުގެ އަމާޒު ކަމުގައި ރައީސުލްޖުމްހޫރިއްޔާ ވިދާޅުވަމުން، އިޤްތިޞާދު ކުރިއެރުވުމަށްޓަކައި ސަރުކާރުން ހިންގަވާ މިފަދަ ޕްރޮގްރާމުތަކުގައި ގިނަ ޒުވާނުން ކުރިމަތިލެއްވުމަށް ރައީސުލްޖުމްހޫރިއްޔާ އިލްތިމާސްކުރެއްވިއެވެ. މި ޒުވާން އޮޑިވެރިޔާގެ ލޯންސްކީމުގައި ބައިވެރިވާ ޒުވާނުންގެ އަދަދު އިތުރުވާނަމަ، މިމަޝްރޫޢަކީވެސް ހަމަ މިއަށްވުރެ ވަރުގަދައަށް، މިއަށްވުރެ ބޮޑެތި ޢަދަދުގެ ފައިސާ، ސަރުކާރުގެ ބަޖެޓުން ހަމަޖައްސައިދެވޭނެ ކަންކަން ކަމުގައި ރައީސުލްޖުމްހޫރިއްޔާ ވިދާޅުވިއެވެ.
މިމޭރުމުން ރައީސުލްޖުމްހޫރިއްޔާގެ ވާހަކަފުޅު ކުރިއަށް ގެންދަވަމުން، އެއްވެސް މީހަކަށް އަނެކަކު މުއްސަނދިކޮށެއް ނުދެވޭނެ ކަމަށާއި، ސަރުކާރުން ކޮށްދެއްވޭނެ ކަމަކީ ފުރްޞަތުތައް ތަނަވަސްކޮށްދެއްވުން ކަމުގައި ވިދާޅުވިއެވެ. އަދި މުއްސަނދިވުމާއި ފުރްޞަތުގެ ބޭނުން ހިފަން ކެރުމުގެ ހިތްވަރު، އެކަންކަމަށް އަމާޒުކުރެވޭ މީހުންގެ ކިބައިގައި ހުންނަން ވާނެކަމުގައި ބަޔާންކުރައްވަމުން، ގިނަ މީހުންތަކަކަށް އިޤްތިޞާދުގެ މަންފާ ލިބޭ ކަމަށްވަންޏާ، އެއިން ފައިދާ ވާނީ ހަމަ ޤައުމަށް ކަމުގައި އެމަނިކުފާނު ވިދާޅުވިއެވެ. އަދި ޤައުމުގެ ރައުސްމާލުގައި ބައިވެރިވާ މީހުންގެ ޢަދަދު، މިއަށްވުރެ އިތުރު އެބަކުރަންޖެހޭކަމުގައިވެސް އެމަނިކުފާނުގެ ވާހަކަފުޅުގައި ފާހަގަކުރެއްވިއެވެ.
މި ރަސްމިއްޔާތުގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ޒުވާނުންނަކީ އާމްދަނީ ލިބޭ، ހަމަޖެހޭ ދިރިއުޅުމެއްގައި އުޅޭ ބައެއް ކަމަށްވަންޏާ، ޤައުމަށް ހަމަޖެހުން ލިބިގެންދާނެކަމަށާއި، ހުރިހާ އެންމެންނަކީ ވިޔަފާރީގައި، ނޫނީ އާމްދަނީ ހޯދުމުގައި ރަނގަޅު މަސައްކަތްތަކެއް ކުރާ ބައެއް ކަމަށްވަންޏާ، އަޅުގަނޑުމެންގެ ތެރޭގައި ސިޔާސީ ވިސްނުމުގެ ތަފާތުވުންތަކަށްވެސް ޖާގައެއް ނުލިބޭނެ ކަމުގައި އެމަނިކުފާނު ވިދާޅުވިއެވެ.
