ޒަކާތު ފަންޑުގެ އެހީގައި ބޯންމެރޯ ޓްރާންސްޕްލާންޓް ހެދުމަށްޓަކައި އިންޑިޔާ އަދި ސްރީލަންކާއަށް މިއަދު ފުރި 10 ކުއްޖަކާއި، އެކުދިންގެ އާއިލާތަކާ ރައީސުލްޖުމްހޫރިއްޔާގެ އަނބިކަނބަލުން އަލްފާޟިލާ ފާޠިމަތު އިބްރާހީމް، ބައްދަލުކުރައްވައިފިއެވެ. ރައީސުލްޖުމްހޫރިއްޔާގެ އަނބިކަނބަލުން މިކުދިންނާއި ބައްދަލުކޮށްލެއްވީ، މިއަދު ހެނދުނު އިބްރާހިމް ނާސިރު އިންޓަރނޭޝަން އެއަރޕޯޓުގައެވެ.
މި ބައްދަލުކުރެއްވުމުގައި، ނޭޝަނަލް ސޯޝަލް ޕްރޮޓެކްޝަން އެޖެންސީގެ ފަރާތުން ރައީސުލްޖުމްހޫރިއްޔާގެ އަނބިކަނބަލުންނަށް ޝުކުރު އަދާ ކުރެއްވުމުގެ ގޮތުން ހަނދާނީ ފިލައެއް އެރުވުން އޮތެވެ. މީގެއިތުރަށް މިއަދު ފުރި 10 ކުދިންނަށް ރައީސުލްޖުމްހޫރިއްޔާގެ އަނބިކަނބަލުންގެ ފަރާތުންވެސް ވަނީ ހަނދާނީ ފިލާ އަރުއްވާފައެވެ.
