އެއްވެސް ސިޔާސީ މީހަކު އަދި އެއްވެސް ސިޔާސީ ލީޑަރަކު ނުވަތަ ސިޔާސީ ޕާޓީއަކުން ބުނާ ކަމެއް ކުރުމުގައި، މުސްތަޤްބަލް ގެއްލޭ ކަހަލަ ކަންތަކުން ދުރުވެ ތިބުމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ދިވެހި ޒުވާނުންނަށް އިލްތިމާސް ކުރައްވައިފިއެވެ. ރައީސުލްޖުމްހޫރިއްޔާ މިކަން އިލްތިމާސް ކުރެއްވީ، ޔޫތު ލީޑަރސް ނެޓްވަރކް ރަސްމީކޮށް އިފްތިތާޙު ކުރުމަށްޓަކައި މިއަދު މެންދުރު ރައީސުލްޖުމްހޫރިއްޔާގެ އޮފީހުގައި ބޭއްވެވި ރަސްމިއްޔާތެއްގައި ވާހަކަފުޅު ދައްކަވަމުންނެވެ.
ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ސިޔާސީ މީހުން އެކިކަހަލަ ކުށްތަކަށް އަރައިގަތުމަށް ހިތްވަރުދީގެން، މިހާރުވެސް އެތަކެއް ޒުވާނުންނެއް ހަލާކުވެގެން ގޮސްފައިވާކަމުގައި ފާހަގަކުރެއްވިއެވެ. މިގޮތުން، ޒުވާނުންނަށް އަންނަ ހަމަޖެހުމެއް އަންނަން ޖެހޭނީ، އަދި ޒުވާނުންނަށް ބޭނުންވާ ކަހަލަ ކަންތައްތައް ހަމަޖެހިގެން ދާންވާނީ، ސަރުކާރުން އެމީހުންނަށް ޤާއިމުކޮށްދޭ އުޞޫލުތަކުގެ ތެރެއިން ކަމުގައި އެމަނިކުފާނު ވިދާޅުވިއެވެ. އަދި ސިޔާސީ ޕާޓީތަކުގެ ލީޑަރުންވެސް މިއަދުގެ ޒުވާނުންނަށް ނަޞޭޙަތްދީ، ޒުވާނުންނަށް މިޞްރާބު ޖަހައިދީގެން، އަދި ޒުވާނުންނަށް ލީޑަރޝިޕް ދައްކައިގެން މަސައްކަތް ކުރާ ކަމަށްވަންޏާ، މަސައްކަތް ކުރަންވާނީ ދިވެހިރާއްޖޭގެ ނިޒާމުތަކަށް އިޙްތިރާމްކޮށްގެން ކަމުގައި ވިދާޅުވިއެވެ. މީގެއިތުރަށް، ޒުވާނުން ބޭނުންކުރަންވީ، ޒުވާނުންގެ 'ޕޮޒިޓިވް އެނަރޖީ' ޤައުމު ބިނާކުރުމުގައި އަދި ރަނގަޅު ކަންތައްތައް ހޯދައިދިނުމަށް ކަމުގައި ވިދާޅުވަމުން، މި އުފެދިގެންދާ ޔޫތު ނެޓްވޯކަކީ، މި ދެންނެވި ގޮތަށް ޒުވާނުންގެ ހަކަތަ ހެޔޮގޮތުގައި ބޭނުންކުރުމަށް ސަރުކާރުން ކުރެވޭ މަސައްކަތުގެ ބައެއްކަމުގައި އެމަނިކުފާނު ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، ދިވެހިރާއްޖޭގެ އިސްތިޤްލާލަށް އެއްވެސް ކަހަލަ އުނިކަމެއް އަންނަ ކަމަކަށް ބޭރު ބަޔަކަށް ދަޢުވަތު ދޭކަށް މިސަރުކާރުން ޖާގައެއް ނުދެއްވާނެ ކަމުގައި ވިދާޅުވަމުން، ދިވެހިންގެ ދާޚިލީ ކަންކަން ނިންމުމަކީ، ދިވެހިންގެ އަތްމަތީގައި އޮންނަންޖެހޭ ކަމެއް ކަމުގައި ވިދާޅުވިއެވެ. އަދި، ޤައުމުގެ ދާޚިލީ ކަންކަމުގެ ތެރެއަށް ވަނުމަށް ބޭރު ފަރާތްތަކަށް ޖާގަދީގެން، ދާޚިލީ ކަންތައްތައް ނިންމަން ބޭރު ފަރާތްތަކުގެ ބަސް ހޯދަން އުޅޭ އުޅުމަކީ ސިޔާސީ މީހުން ކޮށްގެންވާނެ ކަމެއް ނޫންކަމުގައި ރައީސުލްޖުމްހޫރިއްޔާ ފާހަގަކުރެއްވިއެވެ. މިގޮތުން، ދުނިޔޭގެ އެކި ހިސާބުތަކުން ދިވެހި ޒުވާނުންނަށް މަތީ ތަޢުލީމު އުނގަންނައިދިނުމުގެ ބޭނުމަކީ ދިވެހިންގެ ދާޙީލީ ކަންކަން ނިންމުމުގެ ޤާބިލުކަން ހޯއްދަވައިދެއްވުން ކަމުގައި އެމަނިކުފާނު ވިދާޅުވިއެވެ.
ޔޫތު ލީޑަރސް ނެޓްވޯކް އިފްތިތާޙުކޮށްދެއްވުމަށް ބޭއްވެވި ރަސްމިއްޔާތުގައި، މި ނެޓްވޯކުގެ މެމްބަރުންނަށް، މެމްބަރެއްކަން އަންގައިދޭ ލިޔުން ރައީސުލްޖުމްހުރިއްޔާ ހަވާލުކޮށްދެއްވިއެވެ.
"ޔޫތު ލީޑަރސް ނެޓްވޯކް" އަކީ ސަރުކާރުގެ ފުރަތަމަ 100 ދުވަހުގެ މުއްދައްގައި، ޤައުމިއްޔަތު ދިރުވާ އަދި ޒިންމާދާރު ރައްޔިތެއް ބިނާކުރުމުގެ މޭންޑޭޓާ ގުޅިގެން، ޔުނިވަރސިޓީ އަދި ކޮލެޖްތަކުން ދަރިވަރުން އެކުލެވޭ ގޮތަށް، މިނިސްޓްރީ އޮފް ހޯމްއެފެއާޒުން އުފެއްދާފައިވާ ނެޓްވޯކްއެކެވެ. މި ނެޓްވޯކުގެ މަޤްޞަދަކީ ދިވެހި ރައްޔިތުންނަކީ ޒިންމާދާރު ބަޔަކަށް ހަދައި، މަދަނީ ގޮތުން ޙަރަކާތްތެރިވެ އުޅުމަށް މަގުފަހި ކޮށްދިނުމުގެ އިތުރުން، ޒިންމާދާރު ގޮތެއްގައި ޙަރަކާތެރިވެ އުޅުމުން މަޙްރޫމުކުރާ ފަދަ އިޖްތިމާޢީ ބޮޑެތި މައްސަލަތަކުން، ޚާއްޞަކޮށް މަސްތުވާ ތަކެތި ބޭނުންކޮށް އެއަށް ދެވިހިފުމުން، ކުދިންނާއި ޒުވާނުން ދުރުހެލި ކުރުމަށް ހޭލުންތެރިކަން އިތުރުކުރުމެވެ.
