ހުޅުމާލެ ތަރައްޤީކުރުމުގެ މަޝްރޫޢު ނިމޭއިރު، ރާއްޖޭގެ އާބާދީގެ 75% ހުޅުމާލޭގައި އާބާދު ކުރެވޭނެ ކަމުގައި ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ، ހުޅުމާލޭގެ ދެވަނަ ފިޔަވަހި ހިއްކުމުގެ މަޝްރޫޢުގެ މަސައްކަތްތައް ކުރިއަށްދާގޮތް ބައްލަވާލެއްވުމަށް، މިއަދު ހަވީރު ހުޅުމާލެއަށް ކުރެއްވި ޒިޔާރަތުގައި ޚަބަރުފަތުރާ ވަސީލަތްތަކާ ބައްދަލުކުރައްވައި ވާހަކަފުޅު ދައްކަވަމުންނެވެ.
ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ހުޅުމާލެ ދެވަނަ ފިޔަވަހި ހިއްކުމުގެ މަޝްރޫޢުގެ %95 މިހާރު ނިމިފައިވާކަން ފާހަގަކުރައްވަމުން، މިއަންނަ އަހަރުގެ މާޗްއާ ހަމައަށް، ޝޯރ ޕްރޮޓެކްޝަން ލުމާއެކު ހިއްކުމުގެ މަސައްކަތްތައް ނިންމާ، ޢިމާރާތް ކުރުމުގެ މަސައްކަތްތައް ފެށޭވަރު ވާނެކަމުގައި ވިދާޅުވިއެވެ. މިމޭރުމުން އެމަނިކުފާނުގެ ވާހަކަފުޅު ކުރިއަށް ގެންދަވަމުން، ހުޅުމާލޭ ތަރައްޤީކުރުމުގެ މަޝްރޫޢު ނިމޭއިރު، ހުޅުމާލެއަކީ ވަރަށް ހިތްގައިމު ސިޓީއަކަށް ވެގެންދާނެކަމުގައި ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، ހުޅުމާލެ ތަރައްޤީކުރުމުގެ މަޝްރޫޢު ރާއްވަވާފައިވަނީ ހުރިހާ ގިންތިއަކަށް ބޭނުންވާ ގެދޮރުވެރިކަން ތަނަވަސް ވެގެންދާނެ ގޮތަކަށް ވިސްނަވައިގެންކަމުގައި ވިދާޅުވިއެވެ. މިގޮތުން، ސޯޝަލް ހައުސިންގ ސްކީމުތަކުގެ އިތުރުން، ތަނަވަސްކަމުގެ ގޮތުން ކުރީގައި އުޅުއްވާ ބޭފުޅުންނަށް ޕްރައިވެޓް ހައުސިންގެ މަޝްރޫޢުތަކެއް ވެސް ހިންގެވުމަށް ރާއްވަވާފައިވާނެކަމުގައި އެމަނިކުފާނު ވިދާޅުވިއެވެ. މީގެއިތުރަށް، ހުޅުމާލެ ތަރައްޤީކުރާނީ އަތޮޅުތަކުން އަދި ކުދިރަށްރަށުން މާލެއަށް ހިޖުރަކުރަން ބޭނުންވާ އާއިލާތަކަށް ޖާގަ އިތުރުކުރެވޭ ވަރަށް ކަމުގައި ބަޔާންކުރެއްވިއެވެ.
"ހުރިހާ ޒުވާނުންނަށް އުންމީދު ދޭން ބޭނުންވަނީ، އިރާދަކުރެއްވިއްޔާ ސޯޝަލް ހައުސިން ސްކީމަކީ، އާމްދަނީ ހޯދަން މަސައްކަތްކުރާ ޒުވާނެއްކަމުގައި ވަންޏާ، ކޮންމެ ގިންތިއެއްގެ ޒުވާނަކަށް ވެސް، އެފޯޑް ކުރެވޭ ވަރުގެ ސްކީމަކަށް ހަދައިދެވޭތޯ ސަރުކާރުން ވަރަށް ބޮޑަށް މަސައްކަތްކުރައްވާނެކަން" ރައީސުލްޖުމްހޫރިއްޔާ ވާހަކަފުޅުގައި ވިދާޅުވިއެވެ.
ރައީސުލްޖުމްހޫރިއްޔާ ހުޅުމާލެއަށް ކުރެއްވި ޒިޔާރަތުގައި، ހުޅުމާލޭ ދެވަނަ ފިޔަވަހީގެ ދަށުން މިހާރު ހިއްކާފައިވާ ސަރަހައްދު ބައްލަވާލައްވައި، އެމަޝްރޫޢު ކުރިއަށް ދާނެގޮތުގެ މަޢުލޫމާތު އޮޅުންފިލުއްވިއެވެ. އަދި، ދެވަނަ ފިޔަވަހި ތަރައްޤީކުރުމަށްޓަކައި މިސަރުކާރުން އެކުލަވާލައްވާފައިވާ ޕްލޭނާބެހޭގޮތުން ހުޅުމާލޭ ޑިވެލޮޕްމަންޓް ކޯޕަރޭޝަންއިން ތައްޔާރުކޮށްފައިވާ ޕްރެޒެންޓޭޝަންއެއް ބައްލަވާލެއްވިއެވެ.
ރައީސުލްޖުމްހޫރިއްޔާ ހުޅުމާލެއަށް މިކުރެއްވި ޒިޔާރަތުގައި އެމަނިކުފާނުގެ އަރިހުގައި، އިކޮނޮމިކް އެންޑް ޔޫތު ޑިވެލޮޕްމަންޓް ކައުންސިލުގައި ހިމެނިވަޑައިގަންނަވާ ވަޒީރުންނާއި، ރައްޔިތުންގެ މަޖިލީހުގެ ބައެއް މެމްބަރުންގެ އިތުރުން ސަރުކާރުގެ ބައެއް މުޢައްސަސާތަކުގެ އިސްވެރިން ބައިވެރިވެވަޑައިގެންނެވިއެވެ.
