މިސަރުކާރުން ޤާނޫނީ އިމެއް ހުރަހެއް ނުކުރައްވާނެ ކަމަށާއި، ޖިނާއީ އިޖުރާތުގެ ތެރެއިން ކޯޓުން އެމީހެއްގެ މައްޗަށް ދަޢުވާއެއް ސާބިތުވެއްޖެކަމަށްވަންޏާ، އެއީ ކޮންމެ މީހެއްކަމުގައި ވީނަމަވެސް، އެމީހެއްގެ މައްޗަށް އެހުކުމް ތަންފީޒުކުރަން މިސަރުކާރުން ފަހަކަށް ނުޖެހޭނެކަމުގައި ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ، ޕީޕީއެމާއި އެމްޑީއޭ ގުޅިގެން ކާނިވަލު ސަރަހައްދުގައި މިރޭ ބޭއްވެވި ޖަލްސާގައި ވާހަކަފުޅު ދައްކަވަމުންނެވެ.
މިރޭގެ ޖަލްސާގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، އެމަނިކުފާނުގެ ސަރުކާރުން ވެރިކަމާ ޙަވާލުވެވަޑައިގަތީ ރައްޔިތުންނަށް އުޖާލާ މުސްތަޤްބަލެއް ހޯއްދަވައިދެއްވަން ކަމުގައި ވިދާޅުވިއެވެ. އަދި ސަރުކާރުގެ އަމާޒަކީ އެއްވެސް މީހަކު ބާކީނުވާ، އޯގާތެރި، އިޙްސާންތެރި އަދި ކެތްތެރިކަމާއެކީ ރާއްޖޭގެ ތަރައްޤީއަށް ލޯބިކުރާ މުޖުތަމަޢެއް ބިނާކުރެއްވުންކަމުގައި ވިދާޅުވިއެވެ.
"މިސަރުކާރުން ވެރިކަމާ ޙަވާލުވީ، ރާއްޖޭގެ އެކި ހިސާބުތަކުގައި އެކި ކަންކޮޅުތަކުގައި ވީރާނާވަމުން ހަލާކުވަމުންދާ އިމާރާތްތަކުން އާބާތުރަ ފިލުވައި ދިނުމާއެކީގައި، އާ ޢިމާރާތްތައް އެޅުމާއި، ކުދިންގެ ތައުލީމަށް ހޭދަކުރުމާ އެކީގައި ޞިއްޙީ ދާއިރާއަށް ކުރިއެރުންތަކެއް ގެނެސްދޭން. ޒުވާނުންނަށް ވަޒީފާ ހޯދައިދޭން. ދިވެހިރާއްޖެއަށް ތަނަވަސްކަން އިތުރުކޮށްދޭން. އަދި ކޮންމެ ފަރުދަކީވެސް ދަޢުލަތުގެ މަޝްރޫޢުތަކުގައި ހިމެނޭ، ބާކީނުވާ ރައްޔިތަކަށް ހެދުމުގެ މަޤްސަދުގައި" ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، އަތޮޅުތެރޭގެ ޢުމްރާނީ ތަރައްޤީއަށްޓަކައި ސަރުކާރުން ކުރައްވަމުން ގެންދަވާ މަސައްކަތްޕުޅުތަކުގެ މައްޗަށް ބައްލަވައިލައްވަމުން، މިދިޔަ އަހަރުގެ ތެރޭގައި ސަރުކާރުން 7 ރަށެއްގެ ބަނދަރުގެ މަސައްކަތް ނިންމައި، މިހާރު 32 ރަށެއްގެ ބަނދަރުގެ މަސައްކަތް ކުރިއަށްގެންދަވާ ކަމުގައި ވިދާޅުވިއެވެ. މީގެއިތުރަށް، 9 ރަށެއްގެ މަގުހެދުމުގެ މަޝްރޫޢު މިހާރު ކުރިއަށް ދާއިރު، އިތުރު 8 ރަށެއްގެ މަގުހެދުމުގެ މަޝްރޫޢު މިއަހަރުގެ ބަޖެޓުގެ ތެރޭގައި ހިމަނުއްވާފައިވާނެކަމުގައި ރައީސުލްޖުމްހޫރިއްޔާ ވިދާޅުވިއެވެ. އަދި، ރާއްޖޭގެ އެކިރަށްރަށުގައި ބޯފެނުގެ ތަފާތު 17 މަޝްރޫޢަކާއި، ނަރުދަމާގެ 10 މަޝްރޫޢެއްވެސް މިހާރު އެބަކުރިއަށް ދާކަމުގައިވެސް ރައީސުލްޖުމްހޫރިއްޔާ ފާހަގަކުރެއްވިއެވެ.
މިސަރުކާރުން ޒުވާނުންނަށް ދެއްވަވާ އިސްކަމުގެ މައްޗަށް އަލިއަޅުއްވާލައްވަމުން، އެމަނިކުފާނުގެ ދަޢުރު ނިމޭއިރު ވަޒީފާގެ ބާޒާރަށް ނިކުންނަށް ބޭނުންވާ ހުރިހާ ކުދިންނަށް ވަޒީފާ ފުރުޞަތު ތަނަވަސްވެގެންދާނެކަމުގައި ވިދާޅުވިއެވެ. މިރޮނގުން އެމަނިކުފާނުގެ ވާހަކަފުޅު ކުރިއަށް ގެންދަވަމުން، މިވޭތުވެދިޔަ އަހަރުގެ ތެރޭގައިވެސް ސަރުކާރުގެ 8 ކުންފުންޏަކުން 3031 ކުއްޖަކަށް ވަޒީފާ ހަމަޖައްސަވައި ދެވިފައި ވާނެކަމުގައި ބަޔާންކުރެއްވިއެވެ. މީގެއިތުރަށް، މަސްވެރިކަމުގެ ދާއިރާގައި ދިވެހި ޒުވާނުންނަށް 1464 ވަޒީފާ މުޅިން އަލަށް އުފައްދަވާފައި ވާއިރު، ފަތުރުވެރިކަމުގެ ދާއިރާގައި 2512 ވަޒީފާ މުޅިން އަލަށް އުފައްދާފައިވާނެކަން ރައީސުލްޖުމްހޫރިއްޔާގެ ވާހަކަފުޅުގައި ފާހަގަކުރެއްވިއެވެ. އަދި، އެމަނިކުފާނުގެ ފަސްއަހަރުގެ ރާސްތާގައި، އިރާދަފުޅުކުރެއްވިއްޔާ 94000 ވަޒީފާ އަލަށް އުފައްދަވާނެކަމުގައިވެސް ވިދާޅުވިއެވެ.
