ނުކުޅެދުންތެރިކަން ހުންނަ ފަރާތްތަކަށާއި އުމުރުން ދުވަސްވީ މީހުންނަށް ބޭނުންވާ ތަކެތި ފޯރުކޮށްދެއްވުމަށްޓަކައި، ރައީސުލްޖުމްހޫރިއްޔާގެ އަނބިކަނބަލުން އަލްފާޟިލާ ފާޠިމަތު އިބްރާހީމް، މިއަދު ޚާއްޞަ ޕްރޮގްރާމެއް ފަށްޓަވައިދެއްވައިފިއެވެ. މި ޕްރޮގްރާމް ރަމްޒީގޮތުން ފަށްޓަވައި ދެއްވުމުގެ ގޮތުން، ނުކުޅެދުންތެރިކަން ހުންނަ މީހުންނަށާއި އުމުރުން ދުވަސްވީ މީހުންނަށް ބޭނުންވާ ގޮނޑިއާއި އަސާ، އެފަރާތްތަކަށް ރައްދުކޮށްދެއްވުމަށްޓަކައި، ރާއްޖޭގެ ނުކުޅެދުންތެރިކަން ހުންނަ ފަރާތްތަކާ ބެހޭ އެމްބެސެޑަރު، އަލްފާޟިލް އަޙްމަދު ޙިޝާންއާ ރައީސުލްޖުމްހޫރިއްޔާގެ އަނބިކަނބަލުން އެތަކެތި މިއަދު ޙަވާލުކޮށްދެއްވިއެވެ. މިކަން އޮތީ މިއަދު މެންދުރުކުރީގައި މުލީއާގޭގައެވެ.
މިޕްރޮގްރާމުގެ ދަށުން ނުކުޅެދުންތެރިކަން ހުންނަ ފަރާތްތަކުގެ އެމްބެސެޑަރު އަލްފާޟިލް އަޙްމަދު ޙިޝާން، އަތޮޅުތަކުގައި ތިބި ޚާއްޞަ އެހީއަށް ބޭނުންވާ ފަރާތްތަކުގެ ގޭގެއަށް ޒިޔާރަތް ކުރައްވައި، އެފަރާތްތަކާ އެތަކެތި ޙަވާލުކޮށްދެއްވުމަށް ވަނީ ހަމަޖެހިފައެވެ. މިދަތުރުގައި ފުރަތަމަ ޒިޔާރަތް ކުރެއްވުމަށް ހަމަޖެހިފައިވަނީ ނުކުޅެދުންތެރިކަން ހުންނަ ފަރާތްތަކުގެ ޝަކުވާތައް އެންމެ ގިނައިން ލިބިފައިހުރި އަތޮޅުތަކަށެވެ.
