ފެލިވަރު މަސްވެރިންގެ މެރީނާ ހުޅުއްވައި ދެއްވުމުގެ ރަސްމިއްޔާތުގައި، ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ދެއްކެވި ވާހަކަފުޅު

ދިވެހި ލޮބުވެތި މަސްވެރިން، މަސްވެރިންގެ ޢާއިލާތައް، އަދި މަސްވެރިންގެ ބައިވެރިން ކަމުގައިވާ ޞިނާޢީ މަސައްކަތް ކުރައްވާ މިފްކޯފަދަ ޕްރޮސެސަރުން، މިތަނަށް ވަޑައިގެން ތިއްބެވި އެންމެހާ ޢިއްޒަތްތެރިން.

 

އަޅުގަނޑުގެ އުފަލެއް ކަމުގައި ދެކެނީ، މިއަހަރުގެ މަސްވެރިންގެ ދުވަހުގެ ތަހުނިޔާ، ދިވެހި ހުރިހާ މަސްވެރިންނަށާއި، މަސްވެރި ޢާއިލާތަކަށް އަދި މަސްވެރިކަމުގެ ދާއިރާގެ ޞިނާޢަތުގައި މިއުޅުއްވާ ހުރިހާ ފަރާތްތަކަށް އިޙްލާސްތެރިކަމާއެކީ ރައްދުކުރުން. އަދި ހަމައެއާއެކީ، ސުންނަތެއްގެގޮތުގައި އޮންނަކަމެއް މިކަހަލަ ޙަފްލާތައް، މިހާ ވަރުގަދައަށް ތައްޔާރުކުރާ ފަރާތްތައް، އަޅުގަނޑުގެ ހަނދާނުން ކައްސާލުމުގެ ކުރިން ޝުކުރު ދެންނެވުން. އެހެންކަމަށްޓަކައި މިއަހަރުގެ މަސްވެރިންގެ ދުވަސް މިހާ ކުލަގަދަގޮތެއްގައި ފާހަގަކުރެވޭއިރު، މީގެ އެންމެބޮޑު ޙިއްޞާއެއް އަދާކުރާ އެއްފަރާތަކީ، މިފްކޯކަން އަޅުގަނޑަށް ގަބޫލުކުރެވޭ. އެހެންކަމުން، މިފްކޯގެ މެނޭޖްމަންޓުގެ އެންމެ އިސްބޭފުޅުންނަށާއި، މިފްކޯގައި މަސައްކަތް ކުރައްވާ ހީވާގި، ހުރިހާ މުވައްޒަފުންނަށް އިޙްލާސްތެރިކަމާއެކީ ޝުކުރުދަންނަވަން.

 

އާދެ! އަޅުގަނޑު ފާދިއްޕޮޅަށް އައުމުން، ފުރަތަމަ ބަނދަރުކުރަން ޖެހުނީ މިފްކޯގައި. މިފްކޯގެ ހުރިހާ މުވައްޒަފުން، އަޅުގަނޑަށާއި އަޅުގަނޑުގެ ވަފުދުގައި މި ވަޑައިގެންނެވި ބޭފުޅުންނަށް، ތިޔަ ވިދާޅުވި ހޫނު އިސްތިޤްބާލަށް ވަރަށް އިޚްލާޞްތެރިކަމާއެކީ ޝުކުރު ދަންނަވަން.

 

އާދެ! ޝައްކެއްވެސްނެތްގޮތުގައި މިއަހަރުގެ މަސްވެރިންގެ ދުވަސް އެއްގޮތަށްވުރެ ގިނަގޮތްގޮތުން ޚާއްޞަވެގެން އެބަދޭ. އަޅުގަނޑަށް، މަސްވެރިންގެ ދުވަސް މިފަހަރު ޚާއްޞަވެގެންމިދަނީ، މި ޒަޢާމަތުގެ ތެރޭގައި، މަސްވެރިންނަށް އާކަންތައްތަކެއް ކޮށްދިނުމަށް އަޅުގަނޑުގެ މެނިފެސްޓޯގައި، ޕީ.ޕީ.އެމްގެ މެނިފެސްޓޯގައި އެކަށައަޅާފައި އޮތުމާއި، އަދި އޭގެ ތެރެއިން ކަންތައްތަކެއް ހާސިލުވެގެންދާތަން ފެނުމުގެ އުފާ، އަޅުގަނޑަށް ޙިއްޞާކުރެވޭތީ. އެއްކަމެއްގެ ގޮތުގައި ﷲގެ ރަޙްމަތާއެކީ މިއަދު ހުޅުވިގެން މިދަނީ، ދިވެހިރާއްޖޭގައި އެންމެ ފުރަތަމަ ހުޅުވޭ މަސްވެރިންގެ މެރީނާ. ފެލިވަރުގައި މި ހުޅުވޭ މަސްވެރިންގެ މެރީނާއަކީ، ދެންމެ ވާހަކަފުޅު ދެއްކެވި ބޭފުޅުންގެ ވާހަކަފުޅުގައި ވިދާޅުވިގޮތަށް، މަސްވެރިން މިރަށަށް އައިސް ބަނދަރުކުރުމުން މަސްވެރިންނަށް އެތަކެއް ފަސޭހަތަކާއި އަދި އެމީހުންނަށް ބޭނުންވާ ތަފާތު ޚިދުމަތްތައް ލިބިގެންދާނެ ތަނެއް.

 

މިކަންކަމުގެ ބޭނުމަކީ، ޝައްކެއްވެސްނެތްގޮތުގައި މަސްވެރިކަމުގެ ޞިނާޢަތުގައި ގިނަބަޔަކު ދެމެހެއްޓުމާއި އަދި މަސްވެރިކަމުގެ ޞިނާޢަތަށް އަލަށް ގިނަ ޒުވާނުން ގެނައުމަށްޓަކައި ކުރެވޭ މަސައްކަތް. ޒުވާނުންނަށް ހަމަޖައްސަން ބޭނުންވާ ކަންތައްތައް މިތާ ހަމަޖެހިފައި ހުރިކަން އަޅުގަނޑަށް ޤަބޫލު ކުރެވޭ. އެހެންކަމުން، މުނިފޫހިފިލުވުމުގެ ޙަރަކާތުގެ އިތުރަށް، ޒުވާނުން ޝައުޤުވެރިކުރުވުމަށް މިކަހަލަ މެރީނާއެއްގައި ހުންނާނެ ކަންތައްތަކެއް މިތަނުގައި އެކުލެވިގެންވާކަމަށް އަޅުގަނޑަށް ޤަބޫލުކުރެވޭ. އެހެންވީމާ، މިއަދު މަސްވެރިންގެ ދުވަހުގެ އިޙްތިފާލުކުރަމުންދާ މި މުނާސަބަތުގައި، ދިވެހިރާއްޖޭގައި އަލަށް ނޫނީ ފުރަތަމަ ފަހަރު މިހުޅުވޭ މަސްވެރިންގެ މެރީނާ ހުޅުވިގެންދާތީ، މިކަމުގައި އެންމެ އިސްކޮށް އުޅުއްވި ފިޝަރީޒް މިނިސްޓަރ ޑޮކްޓަރ މުޙަންމަދު ޝައިނީ އަދި ހަމައެއާއެކު އެމަނިކުފާނަށް އެހީތެރިވެވަޑައިގަންނަވަން މިފްކޯގެ މެނޭޖްމަންޓް ޓީމުން އުޅުއްވި މެނެޖިންގ ޑިރެކްޓަރ އަލްފާޟިލް ޢަދުލީ އިސްމާޢީލަށާއި، މިފްކޯގެ ބޯޑުގެ އެންމެހައި ޢިއްޒަތްތެރި މެމްބަރުންނަށާއި، މިފްކޯގެ ހީވާގި މުވައްޒަފުންނަށް ވަރަށް އިޚްލާސްތެރިކަމާއެކީ ޝުކުރުދަންނަވަން.

 

ހަމައެއާއެކީ އަޅުގަނޑުވެސް ދަންނަވާލަން ބޭނުންވަނީ، މަސްވެރިކަމުގެ ޞިނާޢަތަކީ، ދިވެހިރާއްޖޭގައި މި ކުރެވޭ މަސައްކަތްތަކުގެ ތެރޭގައި އެންމެ ހީވާގިކަމާއި މުރާލިކަމާއެކީ ދިވެހި ދަރިންކުރާ އެންމެ ވަރުގަދަ މަސައްކަތް. ވާރެއާއި އަވީގައި، ގަދަކަނޑުގައި، ފިންޏާއި ހޫނުގައި، މަސްވެރިން މި ކުރާ މަސައްކަތަކީ، ޝައްކެއްވެސްނެތްގޮތުގައި ދިވެހިރާއްޖޭގެ ދާއިމީ އެންމެ ވަރުގަދަ ޞިނާޢަތް ދަމަހައްޓަން ކުރާ މަސައްކަތް. މިވާހަކަ މިދަންނަވަނީ، އެއްގޮތަކަށްވެސް ޓޫރިޒަމްގެ ޞިނާޢަތުގެ މަތިން އަޅުގަނޑު ހަނދާންނެތިގެނެއް ނޫން. ޒަމާނުއްސުރެ ދިވެހިންގެ އެންމެ ގާތް، އަދި ދިވެހިންނަށް އެންމެބޮޑަށް އާމްދަނީ ލިބޭ މަސްވެރިކަމުގެ ޞިނާޢަތް، މި ޞިނާޢަތަކީ. މުޅި ރާއްޖެއަށް، އުތުރާއި ދެކުނަށް، ހުޅަނގާއި އިރަށް ފެތުރިފައި މިއޮތް ޞިނާޢަތަކީ އަދިދިވެހިންނަށް އާމްދަނީ ލިބެނީ ޒަމާނުއްސުރެ މަސްވެރިކަމުގެ ދާއިރާއިން.

 

އެހެންނަމަވެސް، މިދާއިރާއަށް އަންނަ ތަރައްޤީތައް ގެނައުމަށްޓަކައި ގިނަގުނަ މަސައްކަތްތަކެއް، ރައީސް މައުމޫނުގެ 30 އަހަރުގެ ޒަޢާމަތުގައިވަނީ ކުރައްވާފައި. ހަމަ އޭގެތެރެއިން އެއްކަމެއްގެ ގޮތުގައި އަޅުގަނޑުމެން މިފްކޯ ފާހަގަކުރަމުން މިދަނީ. އެހެންނަމަވެސް، އަޅުގަނޑުމެންގެ ޚިޔާލަށް އަންނަމުންދިޔަ ބަދަލުތަކާއި އަދި ވިސްނުމަށް އައި ބަދަލާއި އަދި އެކިއެކި ވިޔަފާރިވެރިން، ދިވެހިވިޔަފާރިވެރިން، ވިޔަފާރީގައި ޖާގަ ހޯއްދަވަން ކުރެއްވި މަސައްކަތުގެ ތެރޭގައި މީގެ 10 ވަރަކަށް އަހަރު ކުރީއްސުރެ ވަރަށް ބޮޑެތި ވާދަވެރި ކަންތައްތަކެއް މިއޮތީ އުފެދިފައި.  އޭގެ ޒާތުގައި ވިޔަފާރީގައި ވާދަވެރިން އައުމަކީ، ރަނގަޅު ކަންކަން. އެހެންނަމަވެސް، އޭގެ ޒާތުގައި ހަމަ ވިސްނާލަންޖެހެނީ، މިހެން އުފެދިފައި ހުންނަ ބޮޑެތި ކުންފުނިތަކުން ޢާންމު ފަރުދުން ވިޔަފާރީގައި އުޅޭއިރު، ކޮށްނުދެވޭ އެތައް ޚިދުމަތެއް ދިވެހި ރައްޔިތުންނަށް ފޯރުކޮށްދޭކަން. އޭގެތެރޭގައި، މަހުގެ އަގު ވަކި އަގެއްގައި ހިފެހެއްޓުމާއި އަދި ކުންފުންޏަށް ފައިދާވިޔަސް ނުވިޔަސް، މަސްވެރިންގެ ޙައްޤުގައި ކުރަންޖެހޭ ކަންތައްތަކެއް އެބަކުރޭ. އޭގެތެރޭގައި، މަހުގެ އަގު ވަކި އަގެއްގައި ބަހައްޓައިގެން މިކަންކުރުމަކީ، ކުރަންޖެހޭ އެއްކަމެއް.

 

ހަމައެގޮތަށް މިތަނުގައި މިއަދު ޤާއިމްވެގެން މިދާ މަސްވެރިންގެ މެރީނާއަކީވެސް، މަސްވެރިންނަށް ފަސޭހަކޮށްދިނުމަށްޓަކައި ސަރުކާރުގެ މެނިފެސްޓޯގައި ހިމަނާފައި އޮތްކަމެއް. ފުއްދައިދިނުމަށްޓަކައި ކުރެވޭކަމެއް. އެހެންވީމާ، މިއައި ޚިޔާލުތަފާތުވުންތަކާއެކީ މިދިޔަ 10 ވަރަކަށް އަހަރުގެ ތެރޭގައި، މަސްވެރިކަމުގެ ޞިނާޢަތަށް އިތުރު ދިވެހި ވިޔަފާރިވެރިންތަކެއް ކުރިމަތިލެއްވިކަމީ، ޝައްކެއްވެސްނެތް ގޮތުގައި އީޖާބީކަމެއް، އެކަމަށް މަރްޙަބާ ކިޔާކަމެއް. އެހެންނަމަވެސް، އެއާއެކީ ދައުލަތުން މި ހިންގާ މަސްވެރިކަމުގެ ކުންފުނިތަކަށް އެއިން ލިބުނީ އާރޯކަމެއް ނޫން. އެއިން ލިބިފައިވަނީ އަނަރޫފަކަން. އެހެންވީމާ، މި ސަރުކާރުގައި މިކުރެވޭ މަސައްކަތަކީ މަސްވެރިންގެ ޞިނާޢަތު، ދާއިމީ ޞިނާޢަތެއްގެ ގޮތުގައި ދަމަހައްޓައި މި މަންފާ ޢާންމުވެގެން މުޅި ރާއްޖެއަށް، މަސްވެރިންނަށް ފަތުރާލުމަށްޓަކައި ކުރާ މަސައްކަތް. އިންޓަރގްރޭޓް ކުރުމުގެ މަސައްކަތް މިކުރެވެނީ.

 

 

 

 

ހަމަ އުފަލާއެކީ ދަންނަވާލަން ބޭނުންވޭ، ދެންމެ އިޢުލާންކުރެވިގެންދިޔަ ގޮތަށް މިހާރު މިތަނަށް ބޮޑުކަންނެލި ގަތުމުގެ މަސައްކަތްވެސް މިއޮތީ ފެށިފައި. އެހެންވީމާ، ތަފާތު މަސައްކަތްތަކެއް މިދަނީ ކުރެވެމުން. މިއަހަރުގެ މަސްވެރިންގެ ދުވަހާ ގުޅިގެން މިކުރެވޭ މަސައްކަތްތައް. މީގެ ނަތީޖާއަކަށް ވެގެންދާނީ، ޞިނާޢަތު އިތުރަށް ފުރިހަމަކުރުމާއެކީ، މަސްވެރިކަމުގެ ޞިނާޢަތުގެ ތެރެއިން އާ ވަޒީފާތަކެއް އުފެދިގެން ދިޔުން. މިތަނުގައި މި ޤާއިމުކުރެވޭ، ތަމްރީނުދޭ މަރުކަޒުވެސް އުފައްދަން މި އުޅެނީ ޒުވާން ކެޔޮޅުން އުފެއްދުމަށް. ޒުވާން ކެޔޮޅުން އުފެއްދުމުގެ ބޭނުމަކީ، މިހާރު ދިވެހިރާއްޖޭގެ އާބާދީގެ އެންމެ ބޮޑު ބަޔަކީ ޒުވާނުން ކަމުގައިވާތީ. މިއީ ޒުވާނުން ޝައުޤުވެރިކުރުވުމަށް ކުރާ މަސައްކަތް.