ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް، ނުކުޅެދުންތެރިކަން ހުންނަ ފަރާތްތަކުގެ ތެރެއިން ސަރުކާރު ޙިއްސާވާ ކުންފުނިތަކުން ވަޒީފާ ހަމަޖެހިފައިވާ 10 ފަރާތަކަށް، ވަޒީފާގެ ލިޔުން ޙަވާލުކޮށްދެއްވައިފިއެވެ. މިލިޔުން ޙަވާލުކޮށްދެއްވީ، ބައިނަލްއަޤްވާމީ ނުކުޅެދުންތެރިކަން ހުންނަ މީހުންގެ ދުވަސް ފާހަގަކުރުމުގެ ގޮތުން، ބުދަދުވަހުގެ ހެނދުނު ކަލާފާނު ސްކޫލުގައި ބޭއްވި ޚާއްޞަ ޖަލްސާގައެވެ.
މިޖަލްސާގައި، ނުކުޅެދުންތެރިކަން ހުންނަ މީހުންނަށް ޞިއްޙީ އަދި ދަތުރުފަތުރުގެ ޚިދުމަތް ފަސޭހައިން ލިބޭނެ ގޮތް ހަމަޖައްސައިދިނުމަށް ސަރުކާރުގެ ފަރާތުން ތަޢާރުފުކުރެއްވި ދާއިމީ ކާޑާއި، ނުކުޅެދުންތެރިކަން ހުންނަ މީހުންގެ ޚާއްޞަ ޑިސްކައުންޓް ޕްރޮގްރާމް "ދަރުމަވެރިވާށެވެ" ރައީސުލްޖުމްހޫރިއްޔާގެ އަނބިކަނބަލުން ފާޠިމަތު އިބްރާހީމް އިފްތިތާޙުކޮށްދެއްވިއެވެ. މީގެއިތުރަށް، ނުކުޅެދުންތެރިކަން ހުންނަ ފަރާތްތަކަށް އެހީތެރިކަން ފޯރުކޮށްދިނުމަށްޓަކައި މޯލްޑިވިއަންގެ ފަރާތުން ތަޢާރުފުކުރާ، "އެހީތެރިޔާ" ޕްރޮގްރާމުވެސް އެކަމަނާ ފައްޓަވައިދެއްވިއެވެ. މި ސްކީމުގެ ދަށުން، ނުކުޅެދުންތެރިކަން ހުންނަ މީހުންނަށް ގަންނަ ޓިކެޓުން 15 ޕަސެންޓް ޑިސްކައުންޓް ދޭގޮތަށް ވަނީ ހަމަޖެހިފައެވެ.
މިޖަލްސާގައި، ޑިސެބިލިޓީ އެމްބެސެޑަރުންނަށް ބެޖާއި ލިޔުން ޙަވާލުކޮށްދެއްވީ، އެޓަރނީ ޖެނެރަލް އަލްއުސްތާޛު މުޙަންމަދު އަނިލްއެވެ.
