ޒުވާން ވިޔަފާރިވެރިން އުފެއްދުމަށާއި، ކުދި އަދި މެދުފަންތީގެ ވިޔަފާރިތަކަށް ޒުވާނުން އަހުލުވެރިކުރުމަށްޓަކައި ސަރުކާރުން ލޯންޗްކޮށްފައިވާ ގެޓްސެޓް ޕްރޮގްރާމުގެ ދަށުން، ލޯނަށް އެޕްލައި ކުރުމުގެ ފުރުޞަތު އަންނަ އަހަރު ޖެނުއަރީ މަހުގެ 1 ވަނަ ދުވަހު ހުޅުއްވާލައްވާނެކަމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ. ރައީސުލްޖުމްހޫރިއްޔާ މިކަން ޢިއުލާނުކުރެއްވީ، ޒުވާނުންގެ ދުވަހާއި ގުޅިގެން ބޭއްވި ޚާއްސަ ހަފްލާއެއްގައި ވާހަކަފުޅު ދައްކަވަމުންނެވެ.
މި ހަފްލާގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، 5 އަހަރުގެ ރާސްތާއަކަށް ދެމިގެންދާނެ މި ލޯން ސްކީމުގެ ދަށުން، 200 މިލިޔަން ރުފިޔާގެ ލޯން ޒުވާން ވިޔަފާރިވެރިންނަށް ދޫކުރުމަށް ބަޖެޓުކުރެވިފައިވާކަމުގައި ވިދާޅުވިއެވެ. އަދި، ހަމައެކަނި މިއަންނަ އަހަރު 40 މިލިޔަން ރުފިޔާގެ ޢަދަދެއް ބަޖެޓުކުރެވިފައިވާކަމުގައިވެސް ރައީސުލްޖުމްހޫރިއްޔާ ފާހަގަކުރެއްވިއެވެ.
މިމޭރުން ރައީސުލްޖުމްހޫރިއްޔާ ދެއްކެވި ވާހަކަފުޅުގައި، މިފަދަ ލޯން ސްކީމަކުން ލިބިގެންދާނެ ފައިދާތަކުގެ މައްޗަށްވެސް އަލިއަޅުއްވައިލެއްވިއެވެ. މިގޮތުން، ލޯނު ނެގުމުގައި އެއްވެސް ފަރާތަކުން ރަހުނެއް ބަހައްޓަން ނުޖެހޭނެކަމަށާއި، ލޯނު ނަގައިގެން ފަށާ ވިޔަފާރިއެއް ނާކާމިޔާބު ވެއްޖެނަމަ، އިތުރަށް އެކުދިން ދަރަނިވެރިވާކަށްވެސް ނުޖެހޭނެކަމުގައި އެމަނިކުފާނު ވިދާޅުވިއެވެ.
މީގެއިތުރަށް، ލޯނު ދޫކުރެވޭ ޒުވާނުންނަށް އިންކިއުބޭޝަން ސަރވިސް ނުވަތަ ފަންނީ އެހީތެރިކަން ފޯރުކޮށްދެވޭނެކަމުގައިވެސް ރައީސުލްޖުމްހޫރިއްޔާގެ ވާހަކަފުޅުގައި ފާހަގަކުރެއްވިއެވެ. މިދެންނެވި އިންކިއުބޭޝަން ސަރވިސްގެ ތެރެއިން، ވިޔަފާރި ހިންގުމަށްޓަކައި ބޭނުންވާ އިދާރީ ހުރިހާ ފަސޭހަތަކެއް، ނުވަ މަސްދުވަސް ވަންދެން ފޯރުކޮށްދިނުމަށް ހަމަޖެހިފައިވާކަމުގައި އެމަނިކުފާނު ބަޔާންކުރެއްވިއެވެ. މިގޮތުން، ވިޔަފާރީގެ ޚިޔާލު ހިފައިގެން އަންނަ ޒުވާނުންނަށް ފީސިބިލިޓީ ހެދުމަށާއި، ކޮންސަލްޓަންސީ ދިނުމުގެ އިތުރުން، މަސައްކަތަށް ބޭނުންވާނެ ކޮންސަލްޓަންޓުން ހޯދުމަށާއި، ވިޔަފާރިއަށް މީހުން ޢައްޔަނު ކުރުމުގައިވެސް އެހީތެރިވެދެއްވާނެކަމުގައި ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، ސަރުކާރުން މިކުރައްވާ މަސައްކަތްތަކަކީ ދިވެހި ޒުވާނުންނަކީ ފަންނުވެރި ހުނަރުވެރި ވިޔަފާރިއަށް ނުކުންނަން ކެރޭ އަދި މުޖުތަމަޢުގައި ހިމެނޭ ނުބައި ކަންތައްތަކުން ދުރުވެ ތިބި ބަޔަކަށް ހެދޭތޯ ކުރާ މަސައްކަތްކަމުގައި ފާހަގަކުރެއްވިއެވެ. އަދި ޒުވާނުން ބާރުވެރިކުރެވޭނެ އެންމެ ރަނގަޅު ގޮތެއްކަމަށް ސަރުކާރުން ޤަބޫލުފުޅުކުރައްވަނީ، ވިޔަފާރީގެ ޚިޔާލު ހުރި ފަންނުވެރި ކުދިންތަކެއް އެކުދިންގެ މަސައްކަތުން ވިޔަފާރިއަށް ނުކުމެވޭނެ ގޮތްތަކެއް ތަނަވަސްކޮށްދެއްވުން ކަމުގައިވެސް އެކަމަނިކުފާނު ބަޔާންކުރެއްވިއެވެ. މީގެއިތުރަށް، "ހިތްވަރާއެކީ މަސައްކަތް ކުރަން ބޭނުންވާ ކޮންމެ ކުއްޖަކަށް، ކޮންމެ ޒުވާނަކަށް އެކުއްޖާ އުދުހެން ބޭނުންވަނީ މެދު އުޑުގައި ކަމުގައި ވަންޏާ ފިޔަފަތް އެހިސާބަށް ފަތުރާލެވޭ ހިސާބަށް ދެވޭ ވަރުގެ ޖާގައެއް މިދެންނެވި ލޯނު ސްކީމުގެ ދަށުން، ގެޓް ސެޓް ޕްރޮގްރާމްގެ ދަށުން ހަދައިދޭނަން" ކަމުގައި ރައީސުލްޖުމްހޫރިއްޔާ ވިދާޅުވިއެވެ.
