ދެކުނު އޭޝިޔާ ސަރަޙައްދުގެ ކުރިއެރުމަށްޓަކައި، ސާކް ޤައުމުތަކުން ދުނިޔޭގެ އެހެން ޤައުމުތަކާއެކު، ވަކިވަކިން މަސައްކަތްކުރުމުގެ ބަދަލުގައި، އެއްޖަމާޢަތެއްގެ ގޮތުގައި މަސައްކަތްކުރުމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ގޮވާލައްވައިފިއެވެ. އެމަނިކުފާނު މިކަމަށް ގޮވައިލެއްވީ، ބުދަދުވަހު ނޭޕާލްގެ ކަތުމަންޑޫގައި ފެށުނު، ސާކުގެ އެންމެ އިސްވެރިންގެ 18 ވަނަ ބައްދަލުވުން އިފްތިތާޙުކުރުމުގެ ޖަލްސާގައި ވާހަކަފުޅު ދައްކަވަމުންނެވެ. އެމަނިކުފާނުގެ ވާހަކަފުޅުގައި، ދުނިޔޭގެ އެހެން ސަރަޙައްދުތަކާ އެކު ސާކުން ޤާއިމްކޮށްފައިވާ ގުޅުން ހަރުދަނާވަމުންދާކަން ފާހަގަ ކުރައްވައި، ކުރިއަށް އޮތްތާނގައި މި ގުޅުން އިތުރަށް ވަރުގަދަ ވެގެންދާނެކަން ޔަޤީން ކުރައްވާ ކަމުގައި ވިދާޅުވިއެވެ.
ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ސާކުގެ ބާނީންގެ ތަޞައްވުރުގެ މައްޗަށް އަލިއަޅުއްވައިލައްވަމުން، ސާކުގެ މެންބަރު ޤައުމުތަކުގެ މެދުގައި އޮތް ދޭދޭ ގުޅުން ހަރުދަނާވުމުން މުޅި ސަރަޙައްދަށް އޭގެ ފައިދާ ކުރާނެ ކަމުގައި ވިދާޅުވިއެވެ. އަދި، ސާކަށް މިއަދު ކުރިމަތިވެފައިވާ އެންމެ ބޮޑު ގޮންޖެހުމަކީ، ސާކް ޤައުމުތަކުގެ އަމަން އަމާންކަމާއި، ސަލާމަތާއި، އިޤްތިޞާދު ދެމެހެއްޓެނިވި ގޮތެއްގައި ކުރިއަށް ގެންދިއުމާއި، ސާކުގެ ހުރިހާ ޤައުމެއްގެ ހުރިހާ ރައްޔިތުންނަށްވެސް ފާގަތިކަން ކަށަވަރު ކޮށްދިނުމާއި، ސާކަކީ ތަޞައްވުރުތަކެއްގެ މައްޗަށް ބިނާވެފައިވާ ޖަމްޢިއްޔާއެއްގެ ބަދަލުގައި ނަތީޖާ ނެރޭ، ބައިނަލްއަޤްވާމީ ދުނިޔޭގެ އިތުބާރު ލިބިފައިވާ ޖަމްޢިއްޔާއަކަށްވުން ކަމުގައި ރައީސުލްޖުމްހޫރިއްޔާ ވިދާޅުވިއެވެ.
ދެކުނު އޭޝިޔާގެ ތަރައްޤީއަށްޓަކައި ކުރެވޭ މަސައްކަތުގައި، ސާކުގެ ކޮންމެ މެންބަރު ޤައުމަކުންވެސް ވަރަށް މުހިންމު ދައުރެއް އަދާކުރަމުން ގެންދާކަމުގައި ވިދާޅުވެ، ޖަމްޢިއްޔާއެއްގެ ގޮތުން ސާކް އިތުރަށް ހަރުދަނާ ކުރުމަށްޓަކައި ރާއްޖެއިން ކޮށްފައިވާ މަސައްކަތްތައް ރައީސުލްޖުމްހޫރިއްޔާ ފާހަގަ ކުރެއްވިއެވެ. އަދި، ވިޔަފާރިއާއި އިޤްތިޞާދަކީ، ރައްޔިތުންނަށް ފާގަތި މުސްތަޤްބަލަކާއި، ސަރަޙައްދުގެ އަމަން އަމާންކަން ކަށަވަރު ކުރުމުގެ ތަޅުދަނޑިކަމުގައި ވިދާޅުވެ، މިގޮތުން ލިބޭ ފުރުޞަތުތަކުގެ ފުރިހަމަ ބޭނުން ހިފުމަށް ސާކުގެ ހުރިހާ މެންބަރު ޤައުމުތަކަށް ރައީސުލްޖުމްހޫރިއްޔާ ގޮވައިލެއްވިއެވެ.
ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ކާމިޔާބު ޖަމްޢިއްޔާއަކަށް ސާކް ހެދުމަށްޓަކައި އިންޑިޔާގެ ބޮޑުވަޒީރު ނަރެންދްރަ މޯދީގެ ވާހަކަފުޅުގައި ފާހަގަ ކުރެއްވި ކަންކަމަށް ތަޢުރީފު ކުރައްވައި މަރުޙަބާ ވިދާޅުވިއެވެ.
