ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމާއި އެމަނިކުފާނުގެ އަނބިކަނބަލުން ފާޠިމަތު އިބްރާހީމް، 18 ވަނަ ސާކް ސަމިޓްގައި ބައިވެރިވެވަޑައިގަތުމަށް ކުރައްވާ ދަތުރުފުޅެއްގައި މިއަދު ހެނދުނު ނޭޕާލަށް ވަޑައިގަންނަވައިފިއެވެ.
ރައީސުލްޖުމްހޫރިއްޔާގެ ދެކަނބަލުން ނޭޕާލްގެ ޓްރިބުވާން އިންޓަރނޭޝަނަލް އެއަރޕޯޓަށް ވަޑައިގަތުމުން މަރުޙަބާ ވިދާޅުވީ، ނޭޕާލުގެ ބޮޑުވަޒީރުގެ ނައިބު އަދި މިނިސްޓަރ އޮފް ހޯމް އެފެއާޒް މިސްޓަރ ބާމް ދޭވް ގުއަތުމްގެ ދެކަނބަލުންނާއި، ނޭޕާލް ސަރުކާރުގެ އިސް ބައެއް ބޭފުޅުންނެވެ. އަދި، މަރުޙަބާ ދެންނެވުމުގެ ރަސްމިއްޔާތުގައި ރައީސުލްޖުމްހޫރިއްޔާ ޑަޔަސްއަށް އަރާވަޑައިގަތުމާއެކު، ދިވެހިރާއްޖެއާއި، ނޭޕާލާ ދެޤައުމުގެ ޤައުމީ ސަލާމް ކުޅުނެވެ.
