ޒުވާނުންނަށް އަމާޒުކޮށްގެން، ޒުވާން ވިޔަފާރިވެރިން އުފެއްދުމުށްޓަކައި 200 މިލިއަން ރުފިޔާގެ 'ގެޓް ސެޓް' ޕްރޮގްރާމް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް އިފްތިތާޙް ކޮށްދެއްވައިފިއެވެ. މި ޕްރޮގްރާމް އިފްތިތާޙްކޮށްދެއްވީ، މިއަހަރުގެ ޒުވާނުންގެ ޤައުމީ ދުވަހުގެ މުނާސަބަތުގައި ދަރުބާރުގޭގައި ރޭ ބޭއްވި ހާއްޞަ ރަސްމިއްޔާތުގައެވެ.
ކުދި އަދި މެދުފަންތީގެ ވިޔަފާރި ކުރިއެރުވުމަށް ހާއްސަ ކޮށްފައިވާ މި ޕްރޮގްރާމުގެ ދަށުން، ވިޔަފާރިއެއް ފަށަން ބޭނުންވާ ދެ ޒުވާނަކު ގުޅިގެން ލޯނަށް ކުރިމަތިލެވޭގޮތަށް ވަނީ ހަމަޖެހިފައެވެ. އަދި މީގެއިތުރަށް، ޕްރޮގާރާމުން ހޮވޭ ޒުވާނުންނަށް ވިޔަފާރި ފަށަން ބޭނުންވާ ލޯނުގެ އިތުރުން، ފަންނީ އެހީތެރިކަންވެސް ފޯރުކޮށްދޭނެއެވެ.
ޒުވާނުންގެ ޤައުމީ ދުވަސް ފާހަގަކުރުމަށްޓަކައި ރޭ ދަރުބާރުގޭގައި ބޭއްވި ޚާއްޞަ ޖަލްސާގައި، 2013 އަދި 2014 ވަނަ އަހަރުގެ ޒުވާނުންގެ ޤައުމީ އިނާމް ޙާޞިލްކުރި ފަރާތްތަކަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް އިނާމް ޚަވާލުކޮށްދެއްވިއެވެ. 2013 ވަނަ އަހަރުގެ ޒުވާނުންގެ ޤައުމީ އިނާމު ޙާޞިލުކުރީ ހުވަދުއަތޮޅު ދެކުނުބުރީ ގައްދޫ އަތިރީގޭ ޢަބްދުﷲ އަޒްމީނާއި، މާފަންނު ޗާލޮޓް އައިމިނަތު އިސްމާޢީލާއި، މާލެ ވިލިނގިލީ ރެޑިއަމްވޭވްސް އައިޝަތު އަފްރާ މުޙައްމަދާއި، މާޅޮސްމަޑުލު ދެކުނުބުރީ ތުޅާދޫ މަންޒިލް އަންވަރު އިބްރާހީމާއި، މާލެ ވިލިނގިލީ މާލެއުފާ އިސްމާޢީލް ޙަމީދާއި، ހުވަދުއަތޮޅު ދެކުނުބުރީ ތިނަދޫ ހިންދޫސް ޖާދުﷲ އިސްމާއިލާއި، ހެންވޭރު ވެހެލި މަރިޔަމް މިރުފަތާއި، މައްޗަންގޮޅީ ޝޭޑީކެބިން މުހައްމަދު ފަސީން ރާފިޢު އާއި މާލެހިޔާ 2-01-15 މުޙައްމަދު ޙާޝިމެވެ. ޖަމްޢިއްޔާތަކުގެ ތެރެއިން ފާހަގަކުރެވޭ ޚިދްމަތްތަކެއް ކުރި ޖަމްޢިއްޔާގެ އިނާމު ޙާޞިލުކުރީ، މާޅޮސްމަޑުލު އުތުރުބުރީ އުނގޫފާރު ޖަމްޢިއްޔަތުލް ސައިފާއި، މަސްތުވާތަކެއްޗާއި ދެކޮޅަށް މަސައްކަތްކުރާ ޖާރނީ ޖަމްޢިއްޔާއެވެ.
2014 ވަނަ އަހަރުގެ ޒުވާނުންގެ ޤައުމީ އިނާމު ޙާޞިލުކުރީ، ހުވަދުއަތޮޅު ދެކުނުބުރީ ވާދޫ ޢަލީ އަބްދުލްކަރީމާއި، މައްޗަންގޮޅި ދުނބުގޭ ޢަލީ އަޝްފާޤާއި، މާލެއަތޮޅު ގާފަރު ނިޔަމި ޙަސަން ސާޢިދާއި، ތިލަދުންމަތި ދެކުނުބުރީ މަކުނުދޫ ރޯޒަރީގޭ ޔަޝްފާ އަބްދުލް ޣަނީއެވެ. ޖަމްޢިއްޔާތަކުގެ ތެރެއިން ފާހަގަކުރެވޭ ޚިދްމަތްތަކެއް ކުރި ޖަމްޢިއްޔާގެ އިނާމު ޙާޞިލުކުރީ، މާޅޮސްމަޑުލު އުތުރުބުރީ މީދޫ އެކުވެރި ކްލަބް ޖަމިއްޔާއާއި، ސޮސައިޓީ ފޯ ހެލްތު އެޑިއުކޭޝަން (ޝީ) އަށެވެ.
ރޭގެ ޖަލްސާގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، އިނާމު ލިބިވަޑައިގެންނެވި ހުރިހާ ބޭފުޅުންނަށް ވަރަށް އިޚްލާޞްތެރިކަމާއެކު ތަހުނިޔާ ވިދާޅުވެ، ހެޔޮއެދުންތައް ފޮނުއްވިއެވެ.
