ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމުގެ އަރިހަށް، ރަޝިޔާގެ ޕްރޮސެކިއުޓަރ ޖެނެރަލް، ޔޫރީ ޔަކޮވްލެވިޗް ޗަކްޔާ، މިއަދު އިޙްތިރާމުގެ ޒިޔާރަތެއް ކުރައްވައިފިއެވެ.
މިއަދު ހެނދުނު ރައީސުލްޖުމްހޫރިއްޔާގެ އޮފީހުގައި އޮތް މި ބައްދަލުކުރެއްވުމުގައި، ރާއްޖެއާއި ރަޝިޔާއާ ދެމެދު ޤާއިމްވެފައިވާ ހަރުދަނާ ގުޅުމުގެ މައްޗަށް އަލިއަޅުއްވައިލައްވަމުން، ކުރިއަށް އޮތްތާނގައި މިގުޅުން އިތުރަށް ބަދަހި ކުރެއްވުމާ ބެހޭގޮތުން ދެ ބޭފުޅުން މަޝްވަރާ ކުރެއްވިއެވެ.
ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ރަޝިޔާއިން އަބަދުވެސް ރާއްޖެއަށް އެކި ދާއިރާތަކުން އެއްބާރުލުން ލިބެމުންދާ ކަމުގައި ވިދާޅުވެ، އެކަމަށްޓަކައި ޝުކުރު އަދާކުރެއްވިއެވެ. ރާއްޖޭގެ އާ ޤާނޫނު އަސާސީގެ ދަށުން، ޕްރޮސެކިއުޓަރ ޖެނެރަލަށް ވަރަށް މިނިވަން އިޚްތިޔާރެއް ލިބިފައިވާކަން ފާހަގަ ކުރައްވައި، ރާއްޖޭގެ މިނިވަން މުޢައްސަސާތައް ހަރުދަނާކުރުމުގެ މަސައްކަތުގައި، އެކި ދާއިރާތަކުން މީހުން ބިނާކުރުމަކީ ސަރުކާރުން ވަރަށް ބޮޑު އިސްކަމެއް ދެއްވާ ކަމެއް ކަމުގައި ރައީސުލްޖުމްހޫރިއްޔާ ވިދާޅުވިއެވެ. އަދި، ރަޝިޔާގެ ޕްރޮސެކިއުޓަރ ޖެނެރަލްގެ މި ދަތުރުފުޅުގެ ސަބަބުން، ރާއްޖޭގެ ދައުލަތުގެ ވަކީލުންނަށް ވަރަށް ގިނަ ފައިދާތަކެއް ލިބިގެންދާނެ ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.
މި ބައްދަލުކުރެއްވުމުގައި ރަޝިޔާގެ ޕްރޮސެކިއުޓަރ ޖެނެރަލް ދެއްކެވި ވާހަކަފުޅުގައި، ރާއްޖެއަށް އެހީތެރިކަން ބޭނުންވާ ދާއިރާތަކުން، އެޤައުމުން އަބަދުވެސް އެއްބާރުލެއްވުން ދެއްވަމުން ގެންދަވާނެ ކަމުގައި ވިދާޅުވިއެވެ. މިގޮތުން، އެހީތެރިކަން ބޭނުންވަނީ ކޮން ދާއިރާތަކުންތޯ އެމަނިކުފާނު ރައީސުލްޖުމްހޫރިއްޔާގެ އަރިހުން އޮޅުން ފިލުއްވިއެވެ. އަދި، ރަޝިޔާގެ އެކެޑެމީ އޮފް ދަ ޕްރޮސެކިއުޓަރ ޖެނެރަލްސް އޮފީސްގެ ފަރާތުން، ރާއްޖޭގެ ދައުލަތުގެ ވަކީލުންނަށް ތަމްރީންގެ ފުރުޞަތު ފަހިކޮށްދެއްވުމާ ބެހޭގޮތުން ރައީސުލްޖުމްހޫރިއްޔާއާ މަޝްވަރާ ކުރެއްވިއެވެ.
ރަޝިޔާގެ ޕްރޮސެކިއުޓަރ ޖެނެރަލް ދެއްކެވި ވާހަކަފުޅުގައި، ޖިނާޢީ ކުށްތަކުގެ ދަޢުވާ އުފުލުމުގެ އިތުރުން ރަޝިޔާގެ ޕްރޮސެކިއުޓަރ ޖެނެރަލްގެ އޮފީހުން ކުރަމުން ގެންދާ މުހިންމު އެކިއެކި މަސައްކަތްތަކާ ބެހޭ މަޢުލޫމާތު ރައީސުލްޖުމްހޫރިއްޔާއާ ހިއްސާ ކުރެއްވިއެވެ. އަދި، މި ދާއިރާއިން ރާއްޖެއަށް ބޭނުންވާ ލަފާދިނުންފަދަ، އެކިއެކި ދާއިރާތަކުން ރާއްޖެއަށް އެއްބާރުލުން ދެއްވަން ރަޝިޔާއިން ތައްޔާރަށް އޮތް ކަމުގައިވެސް ރަޝިޔާގެ ޕްރޮސެކިއުޓަރ ޖެނެރަލް ވިދާޅުވިއެވެ.
މިބައްދަލުކުރެއްވުމުގައި، ޕްރޮސެކިއުޓަރ ޖެނެރަލް އަލްއުސްތާޛު މުހުތާޒް މުޙުސިނާއި، މިނިސްޓަރ އޮފް ފޮރިން އެފެއާޒް ދުންޔާ މައުމޫނާއި، ރައީސުލްޖުމްހޫރިއްޔާގެ އޮފީހުގެ މިނިސްޓަރ މުޙައްމަދު ޙުސައިން ޝަރީފް ބައިވެރިވެވަޑައިގެންނެވިއެވެ.
