ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް، ތިލަދުންމަތި އުތުރުބުރީ ކުޅުދުއްފުއްޓަށް ވަޑައިގެން، އެރަށު ރައްޔިތުންނާ ރޭ ބައްދަލުކުރައްވައިފިއެވެ. ކުޅުދުއްފުށީ ރައްޔިތުންނާ ބައްދަލުކުރައްވައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ކުޅުދުއްފުއްޓަކީ އާބާދީގެ ގޮތުން ބޮޑު، އަދި ރާއްޖޭގެ ގިނަ ރަށްރަށަށް ވުރެން ތަރައްޤީގެގޮތުން ކުރިއަރަފާއިވާ ރަށެއްކަން ފާހަގަކުރެއްވިއެވެ. އަދި، އިޤްތިޞާދީ ތަރައްޤީއާއި އެހެނިހެން ގޮތްގޮތުން ބެލިކަމުގައިވީނަމަވެސް، އުތުރުގެ ތަރައްޤީގެ ނާރެހަކީ ކުޅުދުއްފުށިކަމުގައި ފާހަގަކުރައްވަމުން، އެމަނިކުފާނުގެ ސަރުކާރުން ތިލަދުންމައްޗަށް އަމާޒުކުރައްވައިގެން ހިންގެވުމަށް ހަމަޖެހިފައިވާ ތަރައްޤީގެ އެކިއެކި މަޝްރޫޢުތަކުގެ މައްޗަށް ރައީސުލްޖުމްހޫރިއްޔާގެ ވާހަކަފުޅުގައި އަލިއަޅުއްވައިލެއްވިއެވެ.
މިސަރުކާރުން ކުރައްވާ މަސައްކަތްތަކީ އިޤްތިޞާދީގޮތުން ރައްޔިތުން މިހާރު އޮތް ހަމައިން އެހެން ފައްތަރަކަށް ގެންދިއުންކަމުގައި ބަޔާންކުރައްވަމުން، ޓުއަރިޒަމް ކުރިއެރުވުމަށާއި، އަތޮޅުތަކުގެ ތަރައްޤީއަށާއި، ފަރުދުންގެ ތަނަވަސްކަން އިތުރުކުރުމަށް އިޤްތިޞާދީ އާ ވިސްނުންތަކެއް ގެނައުމުގެ މުހިންމުކަން ރައީސުލްޖުމްހޫރިއްޔާގެ ވާހަކަފުޅުގައި ފާހަގަކުރެއްވިއެވެ. މިމޭރުމުން އެމަނިކުފާނުގެ ވާހަކަފުޅު ކުރިއަށް ގެންދަވަމުން، ޤައުމުގެ އިޤްތިޞާދު އާރާސްތުކުރުމަށްޓަކައި، ސަރުކާރުން ޚާއްޞަ އިޤްތިޞާދީ ސަރަހައްދުތަކެއް ޤާއިމުކުރުމަށް ނިންމަވާފައިވާކަމުގައި ވިދާޅުވިއެވެ. މީގެއިތުރުން، ހދ. އަތޮޅުގެ ތަރައްޤީއަށް އަމާޒުކޮށްގެން އެއަތޮޅުން ފަސް ރިސޯޓު ހަދަން ސަރުކާރުން ނިންމާފައިވާކަންވެސް ރައީސުލްޖުމްހޫރިއްޔާގެ ވާހަކަފުޅުގައި އިޢުލާނު ކުރެއްވިއެވެ. ރިސޯޓު ތަރައްޤީކުރުމަށް ސަރުކާރުން އިޢުލާނުކުރެއްވި ފަސް ރަށަކީ ދިއްޕަރުފުށްޓާއި، ވައިކަރުމުރާދޫއާއި، ކަނަމަނައާއި ކުޑަފަރުގެ އިތުރުން ކޭލަކުނެވެ.
މިސަރުކާރުގެ ވައުދުތަކުގެ މައްޗަށް ބައްލަވާލައްވަމުން، ކުޅުދުއްފުށީގައި އެއަޕޯޓެއް އެޅުމުގެ މުހިންމުކަން ރައީސުލްޖުމްހޫރިއްޔާގެ ވާހަކަފުޅުގައި ފާހަގަކުރެއްވިއެވެ. އަދި، ކުޅުދުއްފުއްޓަކީ އުތުރުގެ ނާރެހަށް ވުމާއެކު، އަތޮޅަށް އިޤްތިޞާދީ ކުރިއެރުން ލިބެންއޮތީވެސް އެރަށުގައި އެއަރޕޯޓެއް އެޅިގެންކަމުގައި އެމަނިކުފާނު ވިދާޅުވިއެވެ.
ޒުވާނުންނަށް ފަހި މުޖުތަމަޢެއް ބިނާކުރުމުގެގޮތުން ސަރުކާރުން ކުރައްވަމުން ގެންދަވާ މަސައްކަތްޕުޅުތަކުގެ މައްޗަށްވެސް ރައީސުލްޖުމްހުރިއްޔާގެ ވާހަކަފުޅުގައި ބައްލަވައިލެއްވިއެވެ. މިގޮތުން ޓުއަރިޒަމް ކުރިއެރުވުމަށް ސަރުކާރުން މިކުރައްވާ މަސައްކަތްޕުޅުގެ ސަބަބުން، ޒުވާނުންނަށް ވަޒީފާތަކާއި، އިޤްތިޞާދީ ފުރުޞަތުތައް އިތުރުވެގެންދާނެކަން ބަޔާންކުރެއްވިއެވެ.
