މިއަހަރުގެ ނޮވެމްބަރުމަހު ނޭޕާލުގައި ބޭއްވުމަށް ހަމަޖެހިފައިވާ 18 ވަނަ ސާކް ސަމިޓުގައި ބައިވެރިވެވަޑައިގެން ދެއްވުން އެދިވަޑައިގެން، ނޭޕާލުގެ ބޮޑުވަޒީރު ސުޝިލް ކޮއިރަލާ، ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމަށް ދަޢުވަތު އަރުއްވައި، ސިޓީފުޅެއް ފޮނުއްވައިފިއެވެ.
މިސިޓީފުޅު، ރައީސުލްޖުމްހޫރިއްޔާއަށް އެރުއްވީ، ނޭޕާލުގެ ބޮޑުވަޒީރުގެ ޚާއްޞަ މަންދޫބެއްގެ ޙައިސިއްޔަތުން އެޤައުމުގެ މިނިސްޓަރ އޮފް ފޮރިން އެފެއާޒް މިސްޓަރ މަހެންދްރާ ބަހާދުރު ޕާންޑޭއެވެ.
މިއަދު މެންދުރު ރައީސުލްޖުމްހޫރިއްޔާގެ އޮފީހުގައި އޮތް މި ބައްދަލުކުރެއްވުމުގައި، ދިވެހިރާއްޖެއާއި ނޭޕާލާ ދެޤައުމުގެ ދެމެދުގައި އުފެދިފައިވާ ގާތް ގުޅުމުގެ މައްޗަށް ދެބޭފުޅުން ރައީސް ޔާމީނާއި ނޭޕާލުގެ ފޮރިން މިނިސްޓަރ ބައްލަވައިލެއްވިއެވެ. ވަކިން ޚާއްޞަކޮށް، ތަޢުލީމާއި، ވިޔަފާރީގެ ދާއިރާގައި ދެޤައުމުގެ ގުޅުން އިތުރަށް ބަދަހިކުރެވޭނެ ގޮތްތަކާ ބެހޭގޮތުން ދެބޭފުޅުން މަޝްވަރާކުރެއްވިއެވެ.
މިގޮތުން، ގިނަ އަދަދެއްގެ ދިވެހި ކިޔަވާކުދިން ނޭޕާލުގައި މިހާރުވެސް ތަޢުލީމު ޙާސިލުކުރަމުންދާކަން ފާހަގަކުރައްވަމުން، މެޑިސިންގެ ދާއިރާއިން ކިޔަވަން ބޭނުންވާ ދިވެހި ކުދިންނަށް ނޭޕާލުގެ ޔުނިވަރސިޓީތަކުން އިތުރު ފުރުޞަތުތައް ހޯއްދަވައިދެއްވުމަށް މަސައްކަތްކުރައްވާނެކަމުގައި ފޮރިން މިނިސްޓަރ މަހެންދްރާ ބަހާދުރު ޕާންޑޭ ވިދާޅުވިއެވެ.
މިބައްދަލުކުރެއްވުމުގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ސަރަޙައްދީ ގުޅުންތައް ބަދަހިކޮށް، ސާކުގެ ހިންގުން އިތުރަށް ހަރުދަނާކުރެއްވުމަށްޓަކައި ނޭޕާލުން އަދާކުރައްވަމުން ގެންދަވާ މުހިންމު ދައުރުގެ މައްޗަށް އަލިއަޅުއްވައިލެއްވިއެވެ. އަދި، ސާކުގެ ހިންގުން އިތުރަށް ހަރުދަނާކޮށް، ބައިނަލްއަޤްވާމީ މަޝްރަޙުގައި ސާކުގެ ރޯލު އިތުރަށް ފުޅާކުރުމަށްޓަކައި އެޅުއްވިދާނެ ފިޔަވަޅުތަކާ ބެހޭގޮތުންވެސް މިބައްދަލުކުރެއްވުމުގައި ރައީސުލްޖުމްހޫރިއްޔާއާއި ނޭޕާލުގެ ފޮރިން މިނިސްޓަރ މަޝްވަރާ ކުރެއްވިއެވެ.
ނޭޕާލުގެ ފޮރިން މިނިސްޓަރުގެ ވާހަކަފުޅުގައި، ވޭތުވެދިޔަ އަހަރު ސާކުގެ ޗެއަރގެ ޙައިސިއްޔަތުން ދިވެހިރާއްޖެއިން ކޮށްފައިވާ މަސައްކަތްތަކަށް ތަޢުރީފުކުރެއްވިއެވެ. އަދި ދިވެހިރާއްޖެއިން ބޭނުންވާ ކަންތައްތަކުގައި ނޭޕާލް ސަރުކާރުގެ އެހީތެރިކަމާއި އެއްބާރުލެއްވުން އަބަދުވެސް ދެއްވަމުން ގެންދަވާނެކަމުގެ ޔަޤީންކަންވެސް ރައީސުލްޖުމްހޫރިއްޔާއަށް ނޭޕާލުގެ ފޮރިން މިނިސްޓަރ ދެއްވިއެވެ.
މިބައްދަލުކުރެއްވުމުގައި، މިނިސްޓަރ އޮފް ފޮރިން އެފެއާޒް ދުންޔާ މައުމޫނާއި، ރައީސުލްޖުމްހޫރިއްޔާގެ އޮފީހުގެ މިނިސްޓަރ މުޙައްމަދު ޙުސައިން ޝަރީފާއި، ފޮރިން ސެކްރެޓެރީ ޑޮކްޓަރ ޢަލީ ނަޞީރު މުޙަންމަދު ބައިވެރިވެވަޑައިގެންނެވިއެވެ.
