ރައީސުލްޖުމްހޫރިއްޔާގެ އަނބިކަނބަލުން ފާޠިމަތު އިބްރާހީމް، ޗައިނާ ރައީސްގެ އަނބިކަނބަލުން މެޑަމް ޕެންގ ލިއުއާންއާ ބައްދަލުކުރައްވައިފިއެވެ.
މިއަދު ހެނދުނު މުލީއާގޭގައި އޮތް މިބައްދަލުކުރެއްވުމުގައި، ދެޤައުމުގެ އިޖްތިމާޢީ ތަރައްޤީއާ ގުޅޭ އެކި ދާއިރާތަކާ ބެހޭގޮތުން ވަރަށް ފުޅާ ދާއިރާއެއްގައި މަޝްވަރާ ކުރެއްވިއެވެ. މިގޮތުން، ޚާއްޞަ އެހީއަށް ބޭނުންވާ ކުދިންގެ ޙައްޤުތައް ހޯއްދަވައިދެއްވުމަށްޓަކައި ކުރެވޭ މަސައްކަތްތަކާއި، އަންހެނުންގެ ތަރައްޤީއަށް ދިމާވެފައިވާ ގޮންޖެހުންތަކާ ބެހޭގޮތުން ދެބޭފުޅުން މަޝްވަރާ ކުރެއްވިއެވެ.
މިބައްދަލުކުރެއްވުމުގައި، މިނިސްޓަރ އޮފް ފޮރިން އެފެއާޒުގެ ނައިބު އަލްފާޟިލާ ފާޠިމަތު ޢިނާޔާއާއި މިނިސްޓްރީ އޮފް ހެލްތުގެ ޑެޕިއުޓީ ޑިރެކްޓަރ ޖެނެރަލް އަލްފާޟިލާ ފާޠިމަތު ސާމިޔާ ބައިވެރިވެވަޑައިގެންނެވިއެވެ.
