އައްޑޫ ސިޓީގެ ރައްޔިތުންނަށް ދިމާވެފައިވާ އެންމެ ބޮޑު މައްސަލައަކީ ނަރުދަމާ ނިޒާމް ހަމަޖެއްސުން ކަމަށާއި، މުޅި އަތޮޅަށް ބޭނުންވާ ނަރުދަމާގެ ނިޒާމުގެ މަސައްކަތް މިއަހަރު ފެށިގެންދާނެ ކަމުގައި ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ، އައްޑޫސިޓީގެ ހިތަދޫ ރައްޔިތުންނާ ރޭ ބައްދަލުކުރައްވައި ވާހަކަފުޅު ދައްކަވަމުންނެވެ. މިގޮތުން، އޮޕެކް ފަންޑް ފޮރ ޑިވެލޮޕްމަންޓް (އޮފިޑް) ގެ ތެރެއިން ލިބޭ ފައިސާއިން 17 މިލިޔަން ޑޮލަރު އައްޑޫ ސިޓީގެ ނަރުދަމާގެ މަސައްކަތަށް ޚަރަދު ކުރުމަށް ނިންމަވާފައިވާކަމުގައި ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، އައްޑޫސިޓީއަކީ، ތަރައްޤީގެ ފުރުޞަތު ބޮޑު އަތޮޅެއް ކަމުގައި ފާހަގަކުރައްވަމުން، ޤައުމުގެ އިޤްތިޞާދީ މަސައްކަތްތަކާއި ކުރިއެރުމަށް ކުރާ މަސައްކަތްތަކުގައި އެއަތޮޅަށް އަބަދުވެސް ޚާއްޞަ އިސްކަމެއް ދެއްވަވާނެ ކަމުގެ ޔަޤީންކަންވެސް އައްޑޫސިޓީގެ ރައްޔިތުންނަށް ރައީސުލްޖުމްހޫރިއްޔާ ދެއްވިއެވެ.
އައްޑޫސިޓީގެ ތަރައްޤީއަށްޓަކައި ސަރުކާރުން ކުރައްވަމުން ގެންދަވާ މަސައްކަތްޕުޅުތަކުގެ މަޢުލޫމާތާއި، ކުރިއަށް ފަށްޓަވަން ހަމަޖެހިފައިވާ ތަރައްޤީގެ މަޝްރޫޢުތަކުގެ މައްޗަށްވެސް ރައީސުލްޖުމްހޫރިއްޔާގެ ވާހަކަފުޅުގައި އަލިއަޅުއްވާލެއްވިއެވެ. މިގޮތުން އަތޮޅު ހޮސްޕިޓަލުން ފޯރުކޮށްދޭ ޞިއްޙީ ޚިދުމަތާއި، ތަޢުލީމީ ނިޒާމުގެ ފެންވަރު ރަނގަޅު ކުރުމަށްޓަކައި ސަރުކާރުން އަޅުއްވަމުން ގެންދަވާ ފިޔަވަޅުތަކުގެ މައްޗަށް ބައްލަވައިލެއްވިއެވެ. މީގެއިތުރަށް، މަގުހެދުމުގެ މަޝްރޫޢާއި، ޒުވާނުންނަށް ވަޒީފާގެ ފުރުޞަތުތައް ފަހިކޮށްދެއްވުމަށްޓަކައި ސަރުކާރުން ކުރައްވާ މަސައްކަތްތައްވެސް އެމަނިކުފާނުގެ ވާހަކަފުޅުގައި ފާހަގަކުރެއްވިއްވެއެވެ.
ރައީސުލްޖުމްހޫރިއްޔާގެ ވާހަކަފުޅުގައި، ސަރުކާރުން ހިންގުމާ ޙަވާލުވެހުރީ، ފަސް އަހަރުގެ ތެރޭގައި ދިވެހިރާއްޖެއަށް ތަފާތުތަކެއް ގެނެސްދެއްވުމަށް ކަމުގައި ބަޔާންކުރައްވަމުން، ސަރުކާރުން މަސައްކަތްކުރައްވަނީ ރައްޔިތުންނަށް ބޭނުންހުރި، ނުވަތަ ރައްޔިތުންނަށް ނުފުދި ލަސްވެފައިހުރި ކަންތައްތަކެއް ފުއްދައިދެވޭތޯ ބެއްލެވުމަށް ކަމުގައި ވިދާޅުވިއެވެ. މީގެއިތުރަށް، އެމަނިކުފާނުގެ ސަރުކާރުން އިސްކަމެއް ދެއްވާނީ ސިޔާސީ ހަލަބޮލިކަމެއް އުފެއްދުމުގެ ބަދަލުގައި، ރައްޔިތުންނަށް ޚިދުމަތްކުރެއްވުމަށް ކަމުގައިވެސް ބަޔާންކުރެއްވިއެވެ.
މި ރަސްމިއްޔާތުގައި މިނިސްޓަރ އޮފް ޓޫރިޒަމް އަޙްމަދު އަދީބު ޢަބްދުލްޣަފޫރާއި، ރައްޔިތުންގެ މަޖިލީހުގެ ފޭދޫ ދާއިރާގެ މެންބަރު އިބްރާހީމް ދީދީ ބައިވެރިވެވަޑައިގެންނެވިއެވެ.
