ސެޕްޓެންބަރު މަހު 1 ން 4 އަށް ސަމޮއާގައި ބޭއްވުނު ތިންވަނަ އިންޓަނޭޝަނަލް ކޮންފަރެންސް އޮން ސްމޯލް އައިލެންޑް ޑިވެލޮޕިންގ ސްޓޭޓްސްގައި ބައިވެރިވެވަޑައިގަތުމަށް، ރައީސުލްޖުމްހޫރިއްޔާގެ ޚާއްޞަ މަންދޫބެއްގެ ހައިސިއްޔަތުން، ކުރީގެ ރައީސް އަލްއުސްތާޛު މައުމޫން ޢަބްދުލްޤައްޔޫމް، ސަމޮއާއަށް ކުރެއްވި ރަސްމީ ދަތުރުފުޅު ނިންމަވާލެއްވުމަށްފަހު، ރޭ ރާއްޖެ ވަޑައިގެންފިއެވެ.
ރައީސް މައުމޫން މިދަތުރުފުޅު ނިންމަވާލެއްވުމަށްފަހު ރާއްޖެ ވަޑައިގެން، އިބްރާހީމް ނާޞިރު އިންޓަރނޭޝަނަލް އެއަރޕޯޓްގައި، ޚަބަރުފަތުރާ ވަސީލަތްތަކާ ބައްދަލުކުރައްވައި ވާހަކަފުޅު ދައްކަވަމުން، މި ދަތުރުފުޅަކީ ވަރަށް ކާމިޔާބު ދަތުރުފުޅެއްކަމުގައި ފާހަގަކުރެއްވިއެވެ.
އެމަނިކުފާނުގެ ވާހަކަފުޅުގައި، ތަރައްޤީ ވަމުން އަންނަ ކުދި ޖަޒީރާ ޤައުމުތަކަށް ދިމާވާ މައްސަލަތަކަކީ މިވަގުތު މުޅި ދުނިޔެއަށްވެސް ވަރަށް ކަންބޮޑު ވާންޖެހިފައިވާ މައްސަލަތަކެއްކަމުގައި ބަޔާންކުރައްވަމުން، މިބައްދަލުކުރެއްވުމުގައި މަޝްވަރާކުރެވުނު ކަންތައްތަކުގެ މައްޗަށް އަލިއަޅުއްވައިލެއްވިއެވެ. މިގޮތުން، އެ މައްސަލަތަކަށް ޙައްލުހޯދުމަށްޓަކައި މުޅި ދުނިޔޭގެ އެއްބާރުލުން ހޯދުމާބެހޭގޮތުންނާއި، ރާއްޖެއާއި، ރާއްޖެފަދަ ޖަޒީރާ ޤައުމުތަކަށް މޫސުމަށް އަންނަ ބަދަލުތަކުގެ ސަބަބުން ދިމާވެފައިވާ މައްސަލަތަކަށް ޙައްލެއް ހޯދުމާބެހޭގޮތުން މިބައްދަލުކުރެއްވުމުގައި މަޝްވަރާކުރެވުނު ކަމުގައި ވިދާޅުވިއެވެ.
މީގެއިތުރަށް، ވޭތުވެދިޔަ ތާނގައި ބޭއްވުނު މިފަދަ ޖަލްސާތަކުން ނިންމުނު ނިންމުންތަކާ ދޭތެރޭގައި އެކަށީގެންވާ ވަރަށް ޢަމަލުކުރެވިފައި ނެތްކަން ފާހަގަކުރައްވަމުން، މިއަހަރުގެ ބައްދަލުވުމުގެ ނިންމުންތައް ތަންފީޒުކުރުމަށްޓަކައި ބައިނަލްޢަޤްވާމީ މެކެނިޒަމެއް އުފެއްދުމަށް ފާސްކުރެވުނުކަން ފާހަގަކުރެއްވިއެވެ.
