"އިންދިރާގާނދީ މެމޯރިއަލް ހޮސްޕިޓަލުގެ މެނެޖްމަންޓް ބޯޑު" އުވާލައްވައި، އިންދިރާގާނދީ މެމޯރިއަލް ހޮސްޕިޓަލުގެ ހިންގުމުގެ ހުރިހާ ކަމެއް ބެލެހެއްޓުމަށްޓަކައި، "އިންދިރާގާނދީ މެމޯރިއަލް ހޮސްޕިޓަލުގެ ގަވަރނިންގ ބޯޑު" ގެ ނަމުގައި ބޯޑެއް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް މިއަދު އެކުލަވާލައްވައިފިއެވެ. މިބޯޑުގައި ހިމަނުއްވާފައިވަނީ މިދަންނަވާ ބޭފުޅުންނެވެ.
1. ޑޮކްޓަރ ޢަބްދުއްސައްތާރު ޔޫސުފް / މ.ނޭހާ (ޗެއަރމަން)
2. ބްރިގޭޑިއަރ ޖެނެރަލް (ރޓ) ފަރުޙަތު ޝަހީރު / މ.އ. އަޅިވިލާގެ
3. ޑޮކްޓަރ ޢަބްދުލްޢަޒީޒް ޔޫސުފް / ވ.އަކީލާ
4. އަލްފާޟިލް ޔޫސުފް ރިޟާ / ހ.މީރުބަހުރުގެ
5. އަލްފާޟިލާ ޢާއިޝަތު ސާދު / މ.ކުއާތްރޯ
"އިންދިރާގާނދީ މެމޯރިއަލް ހޮސްޕިޓަލުގެ ގަވަރނިންގ ބޯޑު" އުފެއްދެވުމާއެކު، ރައީސުލްޖުމްހޫރިއްޔާ ވަނީ އިންދިރާގާނދީ މެމޯރިއަލް ހޮސްޕިޓަލް (އައި.ޖީ.އެމް.އެޗް.) އަކީ، އެ ބޯޑުގެ ދަށުން ހިނގާ، އަދި އެ ބޯޑަށް ޖަވާބުދާރީވާންޖެހޭ ހޮސްޕިޓަލެއްގެ ގޮތުގައި ހަމަޖައްސަވާފައެވެ. އަދި، އައި.ޖީ.އެމް.އެޗް. މެދުވެރިކުރައްވައި ރައްޔިތުންނަށް ފޯރުވައިދެއްވަންޖެހޭ ޞިއްޙީ ޚިދުމަތްތަކާއި، މިކަމާގުޅޭ ސަރުކާރުގެ ޞިއްޙީ ސިޔާސަތުތައް، މިނިސްޓްރީ އޮފް ހެލްތުން ކަނޑައަޅުއްވާ އުޞޫލުތަކާ އެއްގޮތަށް ތަންފީޒުކުރައްވާނީ މިދެންނެވި ބޯޑުން ކަމަށްވެސް ރައީސުލްޖުމްހޫރިއްޔާ ވަނީ ކަނޑައަޅުއްވާފައެވެ.