ކޮޅުމަޑުލު ވޭމަންޑޫ ރައްޔިތުންނާ ބައްދަލުކުރައްވައި، ރައީސުލްޖުމްހޫރިއްޔާގެ ނައިބު ޑޮކްޓަރ މުޙަންމަދު ޖަމީލު އަޙްމަދު ދެއްކެވި ވާހަކަފުޅު

 

 

އެންމެ ފުރަތަމަ އަޅުގަނޑުގެ ވާޖިބެއް ކަމުގައި ދެކެނީ، އަޅުގަނޑު މިކުރި ޒިޔާރަތާ ގުޅިގެން، މިރޭގެ މިފަދަ ވަގުތެއްގައިވެސް މިރަށުގެ ރައްޔިތުން، މިރަށުގެ ކައުންސިލް އަދި އަތޮޅު ކައުންސިލްގެ ފަރާތުންވެސް ތިޔަ ދެއްވި މެހްމާންދާރީއާއި، ބެހެއްޓެވި އޯގާތެރިކަމަށްޓަކައި އިޚްލާޞްތެރިކަމާއެކީގައި ތިޔަ ހުރިހާ ބޭފުޅުންނަށް ޝުކުރު ދެންނެވުން. ވަރަށް ބޮޑަށް ޝުކުރިއްޔާ.

 

އެއަށްފަހުގައި އަޅުގަނޑު ދަންނަވާލަން ބޭނުންވަނީ، މިއަދު ރާއްޖޭގެ އެކިކަންކޮޅުތަކަށް އަޅުގަނޑުމެން މިކުރާ ޒިޔާރަތަކީ، މިއަދުގެ ސަރުކާރު ވުޖޫދަށް އައުމަށްފަހުގައި، ރައްޔިތުންނަށް ފޯރުކޮށްދެމުންދާ ޚިދްމަތް އަދި އެ ޚިދްމަތް ލިބެމުންދާ މިންވަރާއި، އެ ޚިދްމަތް ފޯރުކޮށްދިނުމުގައި، ތިޔަބޭފުޅުންނަށް ކުރިމަތިވާ ދަތިތަކަކީ ކޮބައިތޯ ދެނެގަތުމަށްޓަކައި ކުރަމުންދާ ދަތުރެއް. އަދި އެނގިވަޑައިގަންނަވާނޭ ފަދައިން، ވަރަށް ބުރަ މަސައްކަތްޕުޅުތަކެއް، ރާއްޖޭގެ ރައްޔިތުން ދެ މަރްޙަލާއެއްގައި ކޮށްފި. އެއް މަރްޙަލާއަކީ، ނިމިގެންދިޔަ ރިޔާސީ އިންތިޚާބު. އަޅުގަނޑު ހަނދާން އެބަހުރި، މިރަށަށް އަޅުގަނޑު ޒިޔާރަތް ކުރިން، ނިމިގެންދިޔަ ރިޔާސީ އިންތިޚާބުގެ ތެރޭގައި. އަދި މިއަތޮޅަކީ އަޅުގަނޑު ދަތުރުކުރި އަތޮޅެއް. އަދި ބައެއްފަހަރު ވަރަށްބުރަ ޙާލަތުގައި، ވަރަށްދަތި ޙާލެއްގައި މިދަތުރުތެރޭގައި ދަތުރުކުރަންޖެހުނީ. އަޅުގަނޑު ހަނދާން އެބަހުރި، ދިޔަމިގިއްޔަށް ކުރި ދަތުރަކީވެސް ވަރަށްގަދަ ދުވަހެއްގައި އަޅުގަނޑު ކުރި ދަތުރެއް. އެހެންނަމަވެސް، ރާއްޖޭގެ ރައްޔިތުން ރިޔާސީ އިންތިޚާބުގެ ތެރޭގައި، ވަރަށް ބުރަކޮށް މި އިންތިޚާބުގައި ރާއްޖެއަށް ރަނގަޅު ވެރިކަމެއް ގެނެސްދިނުމަށްޓަކައި މަސައްކަތްތަކެއް ކުރެއްވި. މިތާނގައި މި ތިއްބެވީވެސް މި މަސައްކަތުގައި ވަރަށް އިސް ސަފުގައި ޙަރަކާތްތެރިވި ދެބޭފުޅުން. ރިޔާސީ އިންތިޚާބުގައި ތިޔަބޭފުޅުން ގުޅިގެންނާއި އަދި ވަކިވަކިން މިއަދު މިއޮތް ސަރުކާރު ވުޖޫދަށް ގެނައުމަށްޓަކައި ކޮށްދެއްވި މަސައްކަތް އަޅުގަނޑު ފާހަގަކޮށް، އެކަމަށްޓަކައި ރައީސް އަލްފާޟިލް ޢަބްދުﷲ ޔާމީން ޢަބްދުލްޤައްޔޫމްގެ ނަންފުޅުގަޔާއި، އަޅުގަނޑުގެ އަމިއްލަ ނަމުގައި، ތިޔަބޭފުޅުން ކުރެއްވި މަސައްކަތަށް ޝުކުރު އަދާކުރާ ހާލު. ހަމައެޔާއެކީގައި އޭގެފަހުން ނިމިގެންދިޔަ ރައްޔިތުންގެ މަޖިލީހުގެ އިންތިޚާބުގައިވެސް ވަރަށްބުރަ މަސައްކަތްޕުޅުތަކެއް، މި ދާއިރާގެ މެންބަރުން ކުރެއްވި. މުޅި އަތޮޅުގެ މެންބަރުން ކުރެއްވި. މި މަސައްކަތުގައި، އަޅުގަނޑުމެންނާ އެކީގައި މަސައްކަތް ކުރެއްވި ބޭފުޅުންނާއި އަދި ވަކިން އަޅުގަނޑުމެންނާ ޚިޔާލު ތަފާތުވެ، އެ މަސައްކަތް ކުރެއްވި ބޭފުޅުންވެސް ޙަޤީޤަތުގައި އެ މަސައްކަތްޕުޅު ކުރެއްވީ، އެބޭފުޅުންގެ ނަޒަރުގައިވެސް ހެޔޮ ގޮތްތަކެއް ހޯއްދެވުމަށްޓަކައި. އެހެންވީމާ، ތިޔަ ހުރިހާ ބޭފުޅުން ކުރެއްވި ބުރަ މަސައްކަތް ފާހަގަކޮށް، އަޅުގަނޑު ތިޔަބޭފުޅުންނަށް ވަރަށް އިޚްލާޞްތެރިކަމާއެކީގައި ޝުކުރު އަދާކުރަން.

 

އެއަށްފަހުގައި އެނގިވަޑައިގަންނަވާނޭ ފަދައިން، މިއަދު އަޅުގަނޑުމެންގެ ސަރުކާރު ވުޖޫދަށް އައުމަށްފަހުގައި، ރައްޔިތުންނަށް ބޭނުންވާ މުހިންމު ކަންތައްތަކެއް ހުރިކަން ދަނެ، އެ ކަންތައްތަކަށް ޙައްލު ހޯދުމަށްޓަކައި ޙަޤީޤަތުގައި ޕީ.ޕީ.އެމް.ގެ މެނިފެސްޓޯ، ރައީސް ޔާމީންގެ މެނިފެސްޓޯ، އަޅުގަނޑުމެންގެ މެނިފެސްޓޯގައި ތިޔަބޭފުޅުން ހުށަހަޅުއްވާފައިވޭ. މުހިންމު ކަންތައްތަކެއް ހުރިކަން އަޅުގަނޑަށް އެނގޭ. ވަރަށް ބޮޑެތި އިޙްސާސްތަކެއް ހުރިކަންވެސް އެނގޭ. އެހެންނަމަވެސް، ރާއްޖޭގެ ޙާލަތާއި، ރާއްޖެ ދަތުރުކުރަމުންދިޔަ ގޮތަށް ބަލާއިރުގައި، މިވޭތުވެދިޔަ ކުޑަ ދުވަސްކޮޅުގެ ތެރޭގައި، އަޅުގަނޑު ދަންނަވާނީ، ވަރަށްގިނަ ކަންތައްތަކެއް ޙާޞިލު ކުރުމަށްޓަކައި ބުރަ މަސައްކަތްތަކެއް މިވަނީ ފެށިފައޭ. ރަނގަޅު ވާހަކައެއް، ހުރިހާ ރައްޔިތުން، ހުރިހާ ފަރުދުން، އެންމެން ހިތްހަމަޖެހޭ ފެންވަރަކަށް ހުރިހާ ކަމެއް ނުވެދާނެ. އެހެންނަމަވެސް، އަޅުގަނޑުމެން ވިސްނަންޖެހެނީ ރާއްޖޭގެ ޙާލަތަށް. ލިބޭ އާމްދަނީން، އަޅުގަނޑުމެން އޮތް ޙާލަތާ އަޅާބަލާއިރުގައި، ކުރެވުނު ކަންތައްތައް ކިހިނެއްތޯ އަޅުގަނޑުމެން ވަޒަންކުރާނީ. އަޅުގަނޑުމެންގެ މެނިފެސްޓޯގައި، ޕީ.ޕީ.އެމް.ގެ މެނިފެސްޓޯގައި، ރައީސް ޔާމީންގެ ވަޢުދުގައި، އެންމެ މުހިންމު ކަންތައްތަކަކަށް މިއޮތީ، މީހުންނަށް ދިމާވާ އެންމެ މުހިންމު ކަންތަކަށް ޙައްލު ހޯދައިދިނުން،

 

މީގެކުރީގައި، ހަމަ ތިޔަބޭފުޅުންނަށް، އަޅުގަނޑުމެންގެ ލޯކުރިމަތީގައި، މީހަކަށް ކަމެއް ވެއްޖެނަމަ ގޮތްހުސްވޭ. ކުރާނެ ކަމެއްނޯވޭ. ދާނެ ދިމާއެއްނޯވޭ. އަޅުގަނޑުމެންގެ ތެރެއިން ޢާންމު ރައްޔިތެއްގެ ޖީބުގައި ނުހުންނާނެ، ބޮޑުކަމެއް ދިމާވީމަ، ދިހަހާސް، ވިހިހާސް، ކުއްލިއަކަށް ފަންސާސްހާސް ޚަރަދުކުރާނެ ފައިސާ. މިމައްސަލަ މިއީ ވަރަށްބޮޑު މައްސަލައެއް އެންމެންގެ ކުރިމަތީގައި. ﷲގެ ރަޙްމަތާއެކީގައި، މި މައްސަލައަށް މިވަނީ މިއަދު ޙައްލު ފޯރުކޮށްދެވިފައި. މިއަދު ޙަޤީޤަތަކީ ކިތަންމެ ބޮޑު ބައްޔެއްވީ ކަމުގައިވީ ނަމަވެސް، ހަމަ މިއަތޮޅުން ލިބެން ނެތް ކަމުގައިވާނަމަ، އެ ޚިދްމަތް މާލެއިން ފޯރުކޮށްދިނުމަށްޓަކައި، މާލެއަށް ސަރުކާރުގެ ޚަރަދުގައި ގެންދެވޭ. ސަރުކާރުން މާލެއަށް ގެންދިޔުމަށްފަހުގައި، މާލެއިން އެ ބައްޔަށް ފަރުވާ ފޯރުކޮށްދެވެން ނެތް ކަމުގައިވާނަމަ، ރާއްޖެއިން ބޭރަށް އެމީހާއަށް ދެވޭނެގޮތް ސަރުކާރުން ހަމަޖައްސައިދޭނެ. މިއީ ޙަޤީޤަތުގައި އަޅުގަނޑުމެން ކަހަލަ ނިކަމެތި ރައްޔިތުންތަކެއް، ވަރަށް ބޮޑަށް ޝުކުރު އަދާކުރަންޖެހޭނެ ކަމެއް. މި ވޭން، މީގެކުރީގައި، މީގެ 5 އަހަރު، 10 އަހަރު ކުރީގައި މިފަދަ ކަންތައްތަކާ ކުރިމަތިލެއްވި ބޭފުޅުން ތިއްބަވާނެ މިތަނުގައިވެސް. އިޙްސާސްވާނެ، އޭރު އުޅުއްވަންޖެހޭ ޙާލު. އެހެންވީމާ، [ހުސްނުވާ އާސަންދަ]އިގެ ނަމުގައި ޕީ.ޕީ.އެމް.އިން ރައީސް ޔާމީން އިޢުލާނު ކުރެއްވި  އެ މަޝްރޫޢުގެ ދަށުން މިއަދު އަޅުގަނޑު ފާހަގަކުރަން، ﷲގެ ރަޙްމަތާއެކީގައި، ވަރަށް ފުޅާ ދާއިރާއެއްގައި އެ މަސައްކަތް އެބަދޭ. އެހެނިހެން ކަންތައްތައް ހުރެދާނެ، އަޅުގަނޑުމެން ހިތްހަމަނުޖެހޭ. އެހެން ނަމަވެސް، މިއީ ވަރަށްބޮޑު ކަމަކަށް ޙައްލު ފޯރުކޮށްދެވުނީ ﷲގެ ރަޙްމަތާއެކީގައި.

 

މިއަދު ޙަޤީޤަތަކީ މިއަހަރު އާސަންދަގެ ބަޖެޓަށް، މިއަހަރަށް އޮތީ 600 މިލިއަން ދިވެހި ރުފިޔާ. އެކަމަކު ބައްލަވާ، މިއަހަރުގެ މިހާ ހިސާބަށް އައިއިރުގައި، 550 މިލިއަން ހުރީ ހުސްވެފައި. މިއިން ދޭހަކޮށްދެނީ މިކަމަށް ހޭދަވެގެންދިޔަ މިންވަރު. މިއަހަރު އަދި ބާކީ އެބައޮތް ހަތަރު ފަސްވަރަކަށް މަސް. އެކަމަކު މިހާ ހިސާބަށް 550 މިލިއަން ރުފިޔާ ހޭދަވީ، އަތޮޅުން މާލެއަށް ދަތުރުކުރަން، މާލެއިން ރާއްޖެއިން ބޭރަށް ދަތުރުކުރުމަށްޓަކައި. ބައެއްފަހަރު އެބަހުރި، އެންމެ ފަރުދަކަށް އެކަނިވެސް ހަތަރުލައްކަ ފަސްލައްކަ ރުފިޔާ، އެމީހާ ރާއްޖެއިން ބޭރަށް ގެންދިޔުމަށްޓަކައި ދައުލަތުން ހޭދަކޮށްފައި. އެއް ފަރުދަކު އެބަހުރި، އެއްފަހަރު، ދެފަހަރު، ތިންފަހަރު ރާއްޖެއިން ބޭރަށް ދަތުރުކޮށްފައި. ހަމަ ދައުލަތުން މި ހޭދަކުރަނީ. އެހެންވީމާ، އަޅުގަނޑުމެން މިއަދު ޙަޤީޤަތުގައި، ހުރިހާ ކަންތައްތަކުގެ ޝަކުވާ ހިތްޕުޅުގައިވީ ނަމަވެސް، އަޅުގަނޑުމެންގެ ޙާލަތަށް ބަލާއިރު، އަޅުގަނޑުމެން ޝުކުރު އަދާކުރަން އެބަޖެހޭ، މިކަންތައްތައް މިގޮތަށް އިންތިޒާމުވެގެން ދިޔަކަމަށްޓަކައި. އެއީ، އަޅުގަނޑުމެން ކުރަންޖެހޭ ކަމެއް. އަޅުގަނޑުމެން، މުސްލިމުންގެ ޙައިޘިއްޔަތުން އެ ޝުކުރު އަޅުގަނޑުމެން އަދާކުރަންޖެހޭ.

 

ކީރިތި ޤުރްއާނުގައި اللّـه سبحـانـه وتعـالىވަޙީކުރައްވަނީ، لَئِن شَكَرْتُمْ لَأَزِيدَنَّكُمْ  وَلَئِن كَفَرْتُمْ إِنَّ عَذَابِي لَشَدِيدٌ މުސްލިމުން، ތިޔަބައިމީހުންނަކީ ޝުކުރު އަދާކުރާ ބައެއް ކަމުގައި ވެއްޖެނަމަ، ތިމަން ﷲ ތިޔަބައިމީހުންގެ މައްޗަށް ނިޢުމަތްތައް އިތުރުކުރައްވާހުށީމެވެ. އަދި ނިޢުމަތްތަކަށް އުރެދިއްޖެ ކަމުގައިވާނަމަ، ތިމަން ﷲގެ ޢަޛާބު އިތުރުވެގެންވެއެވެ. 

 

 

 

 

 

 

 

 

އެކަމަކު ބައްލަވާ، މިވާހަކަ އަޅުގަނޑު މިހެން މިދަންނަވާއިރު، ދުނިޔޭގެ އެހެން ތަންތަނުގައި، ހަމަ ތިބީ އަޅުގަނޑުމެން ކަހަލަ މުސްލިމުންނޭ. ހަމަ ޝަހާދަތް ކިޔައި، ފަސްވަގުތު ނަމާދު ކުރަމުންދާ މުސްލިމުން. ﷲ އަށް އީމާންވެ، ރަސޫލާ ގަބޫލުކޮށްގެން ތިބި މުސްލިމުން. ކޮބައިތޯ އެމީހުންގެ ޙާލަތު މިއަދު. އަޅުގަނޑުމެންނަށްވުރެ މާ ހަށިގަނޑުން ބިޔަ ބޮޑު، މާގިނަ ވަސީލަތްތައް اللّـه سبحـانـه وتعـالىއެ ބިންތަކަށް މިންވަރު ކުރައްވާފައި ތިބި މުސްލިމުން އެ ތިއްބެވީ. ދުނިޔޭގެ އެތަންތަނުން، މެދުއިރުމަތީގައި، ފަލަސްޠީނުގައި، ޢިރާޤުގައި، ލީބިޔާގައި، ސީރިޔާގައި. ކޮންފަދަ ބޮޑެތި ޤައުމު. ކޮންފަދަ ގިނަ ވަސީލަތްތައް. އެތައް ރަސޫލު ބޭކަލުންނެއް އެ ފަސްގަނޑަށް ފޮނުއްވި. ޤުރްއާނުންނާއި ކީރިތި ރަސޫލާގެ ޙަދީޘްފުޅުން އެމީހުންނަށް އެތަކެއް ނިޢުމަތެއް މިންވަރު ކުރައްވާނެ ކަމަށް ވަޢުދު ލިބިފައިތިބި މީސްމީހުން އެއީ. އެކަމަކު ބައްލަވާ، މިއަދު އެމީސްމީހުން އުޅޭ ނިކަމެތި ޙާލު. އެ މުސްލިމުން ތަޙައްމަލު ކުރަމުންދާ ހިތްދަތިކަން. ފަލަސްޠީނަށް ބެލި ކަމުގައިވީނަމަވެސް، މިއީ މިއަދު މިވަގުތުކޮޅުގައި އަޅުގަނޑު ބޭނުންވީ، ތިޔަބޭފުޅުން މިކަންތައްތަކުގެ މަތިން ހަނދާންކޮށްލަން. މި ވާދަވެރިކަން އޮވެދާނެ. އެކަމަކު މިއަށްވުރެ ބޮޑު ނިޢުމަތެއް اللّـه سبحـانـه وتعـالىއަޅުގަނޑުމެންނަށް މިންވަރުކޮށްދެއްވާފައިވޭ. އެއީ މިނިވަންކަމާއެކީގައި އުޅުމުގެ ނިޢުމަތް. އަޅުގަނޑުމެންނަށް އަމިއްލަ ފަސްގަނޑެއް ލިބުމުގެ ނިޢުމަތް. އަޅުގަނޑުމެން އެއްދީނަކަށް ތަބަޢަވާ، އެއް ނަސްލަކަށް ނިސްބަތްވާ، އެއްބަހަކުން ވާހަކަ ދައްކާ ބަޔަކަށްވުމުގެ މަތިވެރި ނިޢުމަތް. އެއްވެސް އެހެން ބަޔަކު މި ފަސްގަނޑުގައި ނެތްކަން، މުސްލިމުން، ދިވެހިން ފިޔަވައި. އެކަމުގެ މަތިވެރި ނިޢުމަތް. އެ ނިޢުމަތް ލިބުނީމާ އަޅުގަނޑުމެން ފަހަތުން ޖެހިގެން އަންނަ ސިޔާސީ ވާދަވެރި ކަމެއްގައި، ޤައުމުގެ އިންތިޚާބެއްގައި، ޕާލަމެންޓްގެ އިންތިޚާބެއްގައި، މަޖިލީހުގެ އިންތިޚާބެއްގައި ހީހީފައި، އެކަކު އަނެކަކަށް މަލާމާތްކޮށް ފުރައްސާރަކޮށް، ވާދަވެރިކަން ބޮޑުވެގެން ގޮސް، އަޅުގަނޑުމެން އެކަކު އަނެކަކާ މޫނު ދިމާނުވާ ހިސާބަށް ދިޔައީމަ، އެއީ އަޅުގަނޑުމެން ހިތާމަކުރަންޖެހޭ ކަމެއް. އެކަމުގެ ހިތްދަތިކަން ތަޙައްމަލް ކުރާނީ އެހެން ބައެއް ނޫން. އަޅުގަނޑުމެން އެކަމުގެ ހިތްދަތިކަން ތަޙައްމަލް ކުރާނީ.

 

ކީރިތި ރަސޫލާ ޙަދީޘްފުޅު ކުރައްވަނީ، اِنَّ الْحَسَدَ يَأْكُلُ الْحَسَنَاتِ كَمَا تَأْكُلُ النَّارُ الْحَطَبَ އަލިފާނަށް ދަރުތަކެއްލީމަ، އެ ދަރުތައް އަނދައިގެންދާ ފަދައިން، އެންމެ ނުރައްކާތެރި އެއްޗަކީ، މުސްލިމުންގެ ހިތުގައި އޮންނަ ޙަސަދަވެރިކަން. އެ ޙަސަދަ އޮތީވިއްޔާ ހުރިހާ ހެޔޮކަމެއް، ނަމާދު ކުރިޔަސް، ރޯދަ ހިފިޔަސް، ޙައްޖުވިޔަސް، ޞަދަޤާތް ދިނަސް، އެ ހެޔޮ ކަންތައްތައް ކާލަޔޭ ޙަސަދަ. ހަމަ އަލިފާނަށް އެ ދަރު އެޅީމަ، ދަރުތައް އަނދައިގެންދާ ބީދައިން، ޙަސަދަވެރިއެއް ކުރާ ހުރިހާ ހެޔޮކަމެއްވެސް ހަމަ އެގޮތަށް އަނދައިގެންދެއޭ.

 

މިއީ އަޅުގަނޑުމެން މިވަގުތުކޮޅު ވިސްނަންޖެހޭ ކަމެއް. މި ޙަސަދައާއި، މި ފިތުނައާއި، މި ނުރުހުމާ، އެކަކު އަނެކަކަށް މި އޮންނަ ނަފްރަތު، މި ނިންމަންޖެހޭ. މި ނިންމަންޖެހޭ. މި ނިންމައިގެން އަޅުގަނޑުމެންނަށް ކުރިއަށް ދެވޭނީ. އަޅުގަނޑުމެން މި ބިލްޑިންގތައް އަޅާފާނެ. މި ސެންޓަރުތައް އަތުވެދާނެ. ގައިނީ ޑޮކްޓަރުވެސް އަތުވެދާނެ. ހަމަ ތިޔަބޭފުޅުންގެ ކުރިމަތީގައި މި ތަރައްޤީތައް މި އަންނަނީ. އިއްޔެ ނެތް ބަނދަރު މިއަދު އަތުވެއްޖެ. އިއްޔެގެ ޖަނަރޭޓަރު މައްސަލަ މިއަދު ޙައްލުވަނީ. އިއްޔެ އެއަރޕޯޓެއް ނެތް. މިއަދު މަތިން އައިސް ޖައްސާފައި، ތިމަރަފުށިން 5 މިނިޓުން މި ދަތުރުކުރަނީ. އިއްޔެ ރިޒޯޓެއްވެސް ނެތް. މާދަމާ އަޅުގަނޑުމެންގެ ދަރިން އެހެން ތަރައްޤީއެއްވެސް ދެކޭނެ. އެކަމަކު  އެ ތަރައްޤީއަކީ ވަރަށްކުޑަ އެއްޗެއް. އަޅުގަނޑުމެން މާއްދީ ތަރައްޤީއަށް އެކަނި ވިސްނާ ކަމުގައިވަންޏާ، އެއަށްވުރެ މާބޮޑު އެއްޗެއް، ކީރިތި ޤުރްއާނާއި، ކީރިތި ރަސޫލާގެ ޙަދީޘްފުޅުން އަޅުގަނޑުމެންނަށް މިންވަރު ކުރައްވާފައި މިއޮތް މަތިވެރި ނިޢުމަތް. އަޚުވަންތަކަމުގެ ނިޢުމަތް. މައިންބަފައިންނަށް އޮންނަންވާ ގާތްކަން. އެއްބަނޑު ތިމާގެ މީހުންނަށް އޮންނަންޖެހޭ ރަޙުމުގެ ގުޅުން. ކީރިތި ރަސޫލާގެ ޙަދީޘްފުޅުން އައިއްސަ އޮންނަ، މުސްލިމުން އެކަކު އަނެކަކާ މުޢާމަލާތް ކުރަންވާ ގޮތް. އެކަލޭގެފާނު ޙަދީޘް ކުރައްވަނީ، اَتَّبَسُم صَدَقَة  [މުސްލިމަކު އެކަކު އަނެކަކާ ބައްދަލުވެ ހިނިތުންވުމަކީވެސް އެއީ ޞަދަޤާތެކޭ.] [ހިނިތުންވުން] މިއަދު ނުފެނޭ، އެ މަންޒަރެއް. ރުޅި އައީ. އެމް.ޑީ.ޕީ މީހެއް އޭނައަށް ފެނުނީމަ ހޭކަށްނުވާނެ. ޕީ.ޕީ.އެމް މީހެއް އޭނައަށް ފެނުނީމަ ހޭކަށްނުވާނެ. ސަލާން ކުރުން، އަޅުގަނޑުމެންގެ ނެތް. އެހާ ހިސާބަށް ގޮސްފައި މިވަނީ. މިއަދު މި ނިޢުމަތުގެ މައްޗަށް ޝުކުރު އަދާކުރަންޖެހޭ. އެއްބައެއްގެ ގޮތުގައި ތިބުމުގެ ނިޢުމަތް. ފަލަސްޠީނުގެ މުސްލިމުން އުޅޭ ހާލު، ނިކަމެތި ހާލު. އެމީހުންގެ ވަޒަނުން އެމީހުން ބޭރުވެފައި އެތިބީ އެއޮއް ބޮޑު ފަސްގަނޑުގައި. އެމީހުންގެ އަމިއްލަ ވަޒަން އެއީ. އެއްވެސް ބައެއްގެ ތަނެއް ނޫން އެއީކީ. ފަލަސްޠީނު ރައްޔިތުންގެ އެކަނި ތަނެއް. ދުނިޔޭގެ ހުރިހާ ޤައުމެއް ހުރީ އެގޮތަށް. އެކަމަކު ކާކުތޯ މިއަދު އެކަން ގަބޫލުކުރަނީ. އެހެންވީމާ، އަޅުގަނޑުމެން މިއަދު ޝުކުރު އަދާކުރަން އެބަޖެހޭ، މިފަސްގަނޑުގައި އަޅުގަނޑުމެންނަށް މި މަތިވެރި ނިޢުމަތް اللّـه سبحـانـه وتعـالىމިންވަރު ކުރެއްވީތީ.

 

އަޅުގަނޑު ތިޔަބޭފުޅުންނަށް ކުރާ އިލްތިމާސަކީ، އެކުވެރިކަމާ އެކީގައި އުޅެން ހިނގާށޭ. ކުރިއަށް މިއޮތް އަހަރަކީ އަޅުގަނޑުމެންގެ މިނިވަންކަމުގެ 50 އަހަރު ފުރޭ ދުވަސް، އަޅުގަނޑުމެންނާ ކުރިމަތިވާއިރުގައި، އަޅުގަނޑުމެން މިއަދު އެބަޖެހޭ އެކުވެރިވާން، އަޅުގަނޑުމެން އެންމެން އެކަތިގަނޑަކަށް ވެގެންމެ. ސިޔާސީ ވާދަވެރިކަން އައިއްސަ ދާނެ. އެކަމަކު އެއަށްވުރެ ބޮޑު އެއްޗެއް އަޅުގަނޑުމެންގެ އަޚުވަންތަކަމުގެ ގުޅުމަކީ.  

 

اللّـه سبحـانـه وتعـالىއަޅުގަނޑުމެން އެންމެން މިކުރާ މަސައްކަތުގައި، ތައުފީޤާއި ބަރަކާތް މިންވަރު ކުރައްވާށި! އަޅުގަނޑުގެ ދުޢާއަކީ، މިއަތޮޅަށާއި މިރަށަށް އަދި ދިވެހިރާއްޖޭގެ ރައްޔިތުންނަށް اللّـه سبحـانـه وتعـالىހެޔޮ ދުވަސްތަކެއް މިންވަރު ކުރައްވައި، އަޅުގަނޑުމެންނަކީ އަޚުވަންތަ، އެއްބަޔަކު އަނެއް ބަޔަކަށް އިޙްތިރާމްކުރާ، ލޯބިވާ ބަޔަކަށް، އެކަލާނގެ މިންވަރު ކުރެއްވުން. އާމީން.