بســم اللّـه الرّحمـن الرّحيــم
اَلحَمْـدُ لِلّـهِ رَبّ العَـالَمِـين، وَالصّـلاة وَالسّلام علـى سيدنا محـمَّدٍ، خاتم الأنبياء والمرسلين، وَعلـى آلـه وَصَحْبِـهِ أجمـعـين.
މިރޭގެ މި އުފާވެރި ޙަފްލާއަށް ވަޑައިގެންދެއްވި އެންމެހައި ޢިއްޒަތްތެރިންނަށް ވަރަށް ހޫނު މަރްޙަބާއެއް ދަންނަވަމުން، އަޅުގަނޑު ތިޔަބޭފުޅުންނާ ކޮންމެވެސްވަރެއްގެ ޚިޔާލުތަކެއް ބަދަލުކޮށްލަން ބޭނުންވާ ވާހަކަ ދަންނަވަން.
ފުރަތަމަ ކަމެއްގެ ގޮތުގައި އަޅުގަނޑު ދަންނަވާނީ، ދެންމެ ކޮމިޝަނަރ ޖެނެރަލްގެ ވާހަކަފުޅުގައި ވިދާޅުވިގޮތަށް، އަޅުގަނޑު މިތަނަށް އަންނަންޖެހޭ ސަބަބަކީ ކޮބައިބާވައޭ. އައީމާ ވަރަށް އުފާފުޅު ވާހަކަ ވިދާޅުވި. އެކަމަކު ދައުލަތް ހިންގަން ހަވާލުވެހުންނަ މީހެއްގެ ހައިސިއްޔަތުން ދައުލަތަށް ވީހާގިނަ ފައިސާއެއް ލިބުމަކީ، ދައުލަތް ހިންގަން ހުންނަ މީހާ އުފާވާނެ ކަމެއް ދޮއެއްތޯ. އެ ސަބަބަށްޓަކައިވެސް މިރޭގެ ޙަފްލާއަށް އަޅުގަނޑު އަންނަންޖެހޭ. ހަމައެޔާއެކީގައި އޮތީ، މީރާއިން މިކުރައްވާ މަސައްކަތްޕުޅުތަކާ ބެހޭގޮތުން އަޅުގަނޑުގެ ޚިޔާލުގައި، ދިވެހިރާއްޖޭގެ އިޤްތިޞާދު ދަތުރުކުރާ މި ދިމާއިން ޓެކްސްބޭސް ފުޅާކުރުމަށްޓަކައި ކުރެވޭ މަސައްކަތާ ބެހޭގޮތުން ބައެއް ކަންތައްތައް ޙިއްޞާކޮށްލަން ދައްކާ ވާހަކަ. މީގެތެރޭގައި، އެކައުންޓެބިލިޓީ ފުޅާކުރަން ކުރާ މަސައްކަތާއި، ޤާނޫނީ މަސައްކަތާއި ފްރޭމްވަރކްގެ އެތައް ތަފާތު ކަންތައްތަކެއް ހިމެނޭ. އަޅުގަނޑަށް މޭޒުތަކުގެ ކައިރިން މިކަންކަމުގެ މަސްއޫލު ބޭފުޅުން އަޅުގަނޑަށް އެބަ ފެންނަމުންދޭ. އެހެންވީމާ، ހިތަށްއެރީ ސަރުކާރުން މިކުރާ މަސައްކަތް، ތިޔަ އެންމެ ބޭފުޅުންނާ ޙިއްޞާކޮށްލަން ބޭނުމޭ.
އަޅުގަނޑުމެންގެ މިޒަމާނުގެ ހިންގުމުގައި، އަޅުގަނޑުމެންނަށް ދިމާވާ އެންމެބޮޑު މައްސަލައަކީ، އެއް މުއައްސަސާގެ އިންފާރު ނިމޭ ހިސާބު، އަނެއް މުއައްސަސާއަކަށް ދެނެގަންނަން އުނދަގޫވާގޮތް. މިއީ މިކަން އޮތްގޮތް. ހިންގުމުގެ ދާއިރާއާއި، ޤާނޫނު އެކުލަވައިލާ ދާއިރާގައިވެސް މިކަން އޮތްގޮތް. ޤާނޫނު އެކުލަވައިލާ ދާއިރާގެ އެކިއެކި ކޮމިޓީތަކުގައިވެސް މީގެކުރިންވެސް ޢަމަލުކުރެވިފައި މިހިރީ، ސަރުކާރު ހިންގުމަކީ، ސަރުކާރަށް އާމްދަނީ ހޯދައިދިނުމަކީ، ސީދާ އެގްޒެކެޓިވް ފަންކްޝަނަކަށްވާއިރުވެސް ހަމަ ކުޑަކުޑަ ޑިޕާޓްމަންޓެއް، މަޖިލީހުގެ ތެރޭގައިވެސް ހިނގާކަހަލަ އުޞޫލަކުން. އެހެންނަމަވެސް، މިތާ މި ތިއްބެވި ޕްރޮފެޝަނަރުން، ޕްރެކްޓިސް ކުރައްވާފައި ތިއްބެވި ބޭފުޅުން އަދި ޕްރެކްޓިސް ޕަރފެކްޓް ކުރައްވަމުން ގެންދަވާ ބޭފުޅުން. އަޅުގަނޑުމެންނަށް، އަޅުގަނޑުމެންގެ ދައުލަތުގެ މުއައްސަސާތަކުގައި އިސްކޮށް ތިއްބެވި ބޭފުޅުންނަށް، މި ތަފާތު ހަމަ ވަރަށް ރަނގަޅަށް އެނގެންޖެހޭނެ. ސަރުކާރު ހިންގުމާއި، ސަރުކާރަށް ފައިސާ ހޯދުމާއި، ސަރުކާރުގެ ޓެކްސްބޭސް ފުޅާކުރުމާއި، މިކަންކަމަކީ ސަރުކާރު ނޫން ދެވަނަ ފަރާތަކުން ކުރާނެ ކަމެއް ނޫން. ޤާނޫނު ހެދުމާއި އަދި ޓެކްސްބޭސް ފުޅާކުރުމަށް އެ ހަދާ ޤާނޫނުތައް ފާސްކުރުމާ، މިކަންކަން ޤާނޫނުހަދާ މަޖިލީހުން ކުރާނެ. އެހެން ނަމަވެސް، އެ ޤާނޫނުތައް އެކުލަވައިލެވިގެންދާނީ، ސަރުކާރުގެ ވިސްނުމުގައި، ރައްޔިތުންގެ ފަރާތުން ސަރުކާރަށް އެންމެ ފުޅާ ދާއިރާއެއްގައި، ރައްޔިތުންނަށް އުނދަގޫ ނުވާނެ ގޮތަކަށް، ފައިސާ ލިބޭނީ ކޮންގޮތަކަށްތޯ ވިސްނާފައި.
ޓެކްސްގެ އެންމެބޮޑު ޗެލެންޖަކީ، ޙަޤީޤަތުގައި މިއީ. ޓެކްސްއަކީ ދުނިޔެއަކަށް އާ ކަމެއް ނޫން. ދިވެހިރާއްޖެއަކަށް އާ ކަމެއްވެސް ނޫން. މީރާއަކީ، މީރާއެއްގެ ގޮތުގައި 4 އަހަރުވެފައި އޮތް މުއައްސަސާއެއް ކަމުގައިވީނަމަވެސް، ދެންމެ އަޅުގަނޑު ސަމާސާއެއްގެ ގޮތުގައި، ކޮމިޝަނަރ ޖެނެރަލް ޔަޒީދަށް ދަންނަވާލިން، މީރާގެ މި ފަންކްޝަނަކީ، ދިވެހި ދައުލަތުގައި 18 އަހަރު ވަންދެން ހިނގާފައި އޮތް ފަންކްޝަނެކޭ. މޯލްޑިވްސް އިންލަންޑް ރެވެނިއު ޑިޕާޓްމަންޓެއްގެ ނަމުގައި، މި މަސައްކަތް ކުރެވެމުން އަންނަނީ. ޓެކްސް ކަލެކްޓް ކުރެވެމުން އަންނަނީ. އެހެން ނަމަވެސް، ތަފާތަކަށްވަނީ ވަކި މިނިވަން މުއައްސަސާއަކަށް ނުވުމާއި އަދި މި މޯލްޑިވްސް އިންލަންޑް ރެވެނިއު ޑިޕާޓްމަންޓްގެ އިތުރުން، ސަރުކާރުގެ އެހެން އޮފީސްތަކުން ޓެކްސްގެ ގޮތުގައި، އިންލަންޑް ރެވެނިއު ޑިޕާޓްމަންޓުން ކަލެކްޓް ކުރަންޖެހޭ އެތައް ބައިވަރު ޓެކްސްއެއް ކަލެކްޓް ކުރެވެމުން އަންނާތީ. އެހެން ނަމަވެސް، އެއް ފުރާޅެއްގެ ދަށަށް އައިސް، ޤާނޫނީ މުއައްސަސާއެއްގެ މިނިވަންކަމާއި، ބާރުވެރިކަމާއި، އަމުރުވެރިކަން ލިބުމާއެކީ، ޝައްކެއްވެސްނެތްގޮތުގައި އަޅުގަނޑުމެންނަށް ރިޕޯޓްތަކުންވެސް އެނގިގެންދިޔަ ގޮތުގައި އަދި އަޅުގަނޑަށްވެސް ގަބޫލުކުރެވޭ ގޮތުގައި، މީރާއަކީ މިއަދު އިރާދަކުރެއްވިއްޔާ، ޅަފަތުގައި އޮތް މުއައްސަސާއެކޭ ދެންނެވޭކަށެއް ނެތް.
އެހެން ނަމަވެސް، އެޔާއެކީވެސް ހަމަ ދަންނަވާލަން ބޭނުންވަނީ، އަޅުގަނޑުމެން ޓެކްސްބޭސް ފުޅާކުރަން މިކުރާ މަސައްކަތުގަޔާއި އަދި ތަފާތު ކޮމްޕްލެކްސް ޓެކްސޭޝަން ނިޒާމުތައް އަންނައިރު، މީރާގެ މަސައްކަތް، ކުރިއަށް އޮތީ ވަރަށް ބުރަކޮންނޭ. އެއީ އަޅުގަނޑުމެން މިސާލަކަށް، ބީ.ޓީ.ޓީ. އަކަށް ބެލިކަމުގައިވީނަމަވެސް، ނޫނިއްޔާ ޑިރެކްޓް ކޯޕަރޭޓް ޓެކްސޭޝަނަށް ބަލައިފި ކަމަށްވަންޏާ، މީގެ ނޭޗަރއާއި، މީގެ ސްޓްރަކްޗަރާ ވަރަށް ތަފާތުވާނެ. މިސާލަކަށް، ޕެޓްރޯލިއަމް އެކްސްޕްލޮރޭޝަނަށް ގޮއްސަ، ޕެޓްރޯލިއަމް ޓެކްސޭޝަނަށް، ނޫނިއްޔާ އަޅުގަނޑުމެން އެހެން ތަފާތު ފާޑެއްގެ ޓެކްސޭޝަނަކަށް ގޮއްސި ކަމަށްވަންޏާ، މީގެ ޓަރމިނަލް ވެއްޖިއްޔާ، ޓެކްސް ނަގާ ގޮތާއި، ޓެކްސްބޭސްއާ ހަމަ ވަރަށް ތަފާތުވާނެ. ސިމްޕްލިސްޓިކް ފްލެޓް ކޯޕަރޭޓް ޓެކްސޭޝަނާ.
އަޅުގަނޑުމެން ﷲގެ ރަޙްމަތާއެކީ މިކުރާ މަސައްކަތަކީ ޓެކްސްބޭސް ފުޅާކުރަން ކުރާ މަސައްކަތް. މި މަސައްކަތުގެ ތެރޭގައި، ޞިނާޢަތު ފުޅާކުރުމަށްޓަކައި ކުރާ މަސައްކަތުގެ ތެރޭގައި ތެލުގެ މަސައްކަތްވެސް މިކުރަނީ. މީގެކުރިންވެސް ތެލުގެ މަސައްކަތް ދިވެހިރާއްޖޭގައި ކުރިއިރު، ޕެޓްރޯލިއަމް ޤާނޫނެއްވެސް އަޅުގަނޑުމެން އޮންނާނީ ހަދާފައި. އެ ޤާނޫނު ބަލައިލީމަ، އޭރު އެހާ ކުރިން ހަދާފައި އޮތް ޤާނޫނަކަށް ބެލިނަމަވެސް، އޭގައި ގެންގުޅެފައި ހުރި ޓެކްސް ޖާގަންއާއި، އޭގައި ހުރި ޓެކްސްނަގާ ތަފާތު މެތޮޑޮލޮޖީއަކީ އާދައިގެ ކޯޕަރޭޓް ޓެކްސްގެ ސްޓްރަކްޗަރުގެ ތެރޭގައި، ފްރޭމްވަރކްގެ ތެރޭގައި ހިމެނޭ އެއްޗެއް ނޫން. އެހެންވީމާ، ޓެކްސޭޝަނަކީ އެއްވައްތަރެއްގެ އަޅުގަނޑުމެން ދަންނަ އެއްޗެއް ނޫން. ޓެކްސޭޝަނަކީ ތަފާތު އެއްޗެއް. އިޤްތިޞާދުގެ ބޭސް ފުޅާވިވަރަކަށް، ތަފާތު ޓެކްސް އައި ގޮތަށް، ތަފާތު ޓެކްސް ކަލެކްޓް ކުރާ ގޮތާއި، ތަފާތު ޓެކްސް ނިޒާމުތައް އެބަދޭ ތަފާތުވެގެން. އެންމެ ފަސޭހަގޮތަކީ، އެންމެ ފަސޭހަގޮތަކީ، ޓެކްސް ނަގާ މީހުންނަށް، ނޫނީ ދައުލަތަކަށް ޓެކްސް ކަލެކްޓް ކުރަން އެންމެ ފަސޭހަގޮތަކީ، އިންޑިރެކްޓްކޮށް ނެގޭ ޓެކްސްތައް. މިސާލަކަށް، މުދަލެއް ރާއްޖެއަށް އައީމަ، ކަސްޓަމް ޑިއުޓީ ޖަހާލާފައި، 15 ޕަސެންޓް ޖަހާލީމަ ނަގަން ވަރަށް ފަސޭހަ. އެކަމަކު އޭގެ ބަދަލުގައި، ކަސްޓަމް ޑިއުޓީ ނުނަގައި، ބޯޑަރ ޓެކްސްއެއް ނުނަގައި، އޭގެ ބަދަލުގައި ވެލިއު-އެޑެޑް ޓެކްސްއަކަށް ދާކަމަށްވަންޏާ، ސޭލްސް ޓެކްސްއެއް، ޖީ.އެސް.ޓީއަކަށް ދާ ކަމަށްވަންޏާ، ދެންމެ ޔަޒީދު އަދި މި ރިޕޯޓްގައި ފާހަގަކުރެވުނު ގޮތަށް، އަޅުގަނޑުމެން ކުރާ މަސައްކަތް ވަރަށްބޮޑު. ކޮސްޓް އޮފް އެޑްމިނިސްޓްރޭޝަން ވަރަށް އަގުބޮޑުވެގެންދޭ. ކޮންމެ ފިހާރައަކުން، އެއީ ތުރާކުނުގައި ހުރި ކުޑަކުޑަ ފިހާރައަކަށްވީނަމަވެސް އަދި މާލޭގައި ހުރި ލެކިއުޓް ކަމުގައިވީނަމަވެސް، ކައުންޓަރުތަކުގައި މި މަސައްކަތް ކުރެވެނީ، ޕަންޗް ކުރެވެނީ ކިހިނެއްކަން އެބަ އެނގެންޖެހޭ. އަޅުގަނޑުމެންގެ އާޚިރުގެ ޗެލެންޖަކަށްވާނީ، ޙަޤީޤަތުގައި މުޅި ކަންތައް ނެޓްވަރކް ކުރެވިގެން. ކޮންމެ ތަނަކުން ޕަންޗްކުރާ ޓްރާންސެކްޝަނެއްވެސް އެއީ މީރާގެ މެއިން ފްރޭމުން ފެންނަ ޓްރާންސްސެކްޝަނަކަށްވުން. އޭރަށް މީރާގެ މިއަދުގެ ހިންގުމުގެ އެއްރުފިޔާއަށް ސަތޭކަ ނުވަދިހަ ނުވަރުފިޔާ، އާމްދަނީ ގޮތަށް ވަންނަ ވަނުން، މި އެފިޝަންސީ މިއީ ޙަޤީޤަތުގައި މީރާގެ ސަކްސަސްއަކީ.
ދިވެހިރާއްޖޭގެ ޓެކްސްބޭސް ބްރޯޑްވާނެކަމާ ދޭތެރޭ، ފުޅާވާނެކަމާ ދޭތެރޭ އެއީ އެއްވެސް ބޭފުޅެއްގެ ހިތްޕުޅުގައި ޝައްކު އުފައްދަވަންޖެހޭ ކަމެއް ނޫން. އަޅުގަނޑުމެން މިކުރާ މަސައްކަތަކީ، ޙަޤީޤަތުގައި ދިވެހިރާއްޖޭގެ އިޤްތިޞާދު މިއޮތީ ހަމަ ވަރަށް ކޮންވެންޝަނަލް ނޫނިއްޔާ ރާއްޖޭގައި ޒަމާނުއްސުރެ ކުރެވެމުން އަންނަ އިޤްތިޞާދެއްގެ މަތީގައި. ސަރުކާރުން މިކުރާ މަސައްކަތަކީ، އިކޮނޮމިކް ޓްރާންސްފޮމޭޝަނަކަށް ދިޔުން. އިޤްތިޞާދީ އާ ހޮރައިޒަންއަކަށް، އާ ފްރޮންޓިއަރަކަށް ދަތުރުކުރަން ކުރާ މަސައްކަތް. އެހެންވީމާ، ތަފާތު ޓެކްސް އަންނާނެ. ޓެކްސްވެސް ފުޅާވެގެންދާނެ. ފުޅާވެގެންދާއިރު، ކޮސްޓް އޮފް އެޑްމިނިސްޓްރޭޝަންއަކީ މީރާއިން އެންމެ ވިސްނަންޖެހޭ ކަންތައް.
އެޔާއެކީވެސް އަޅުގަނޑު ދަންނަވާލާނަން. އަޅުގަނޑު މިވާހަކަ ދެއްކުމުގެ ބޭނުމަކީ، އެއްގޮތަކަށްވެސް މީރާއިން ކުރައްވާ މަސައްކަތްޕުޅު، ނޫނީ އެކޮމްޕްލިޝްމަންޓް ފާހަގަނުކުރުމެއް ނޫން. ޝައްކެއްވެސްނެތްގޮތުގައި، މީރާއިން ކުރައްވާ މަސައްކަތްޕުޅަކީ ކްރެޑިޓް ވަރތީ، ނޫނިއްޔާ ތިޔަބޭފުޅުންގެ މަސައްކަތްޕުޅުގެ އަގު ވަޒަންކުރަންޖެހޭފަދަ ވަރުގަދަ މަސައްކަތްޕުޅުތަކެއް ތިޔަ ކުރައްވަނީ. އެ މަސައްކަތް ކުރައްވާއިރު، އަޅުގަނޑު ހަމަ މިވާހަކަތައް ދަންނަވާލުމުގެ ބޭނުމަކަށްވަނީ، ހަމަ މީގެތެރޭގައި، މިދެންނެވި ކަހަލަ ތަފާތު ކަންކަން އައުން. މީރާއިން ކުރާ މަސައްކަތުގައި، ލިޓްމަސް ޓެސްޓަކަށް ވާނީ ޙަޤީޤަތުގައި، އެޑްމިނިސްޓްރޭޝަން ހިނގާ ކޮންމެ ލާރިއަކުން، އާމްދަނީ ލިބޭ ލާރީގެ ނިސްބަތް ރަނގަޅުވެގެންދަނީ، އެއް އަހަރުން އަނެއް އަހަރަށް ކިހާވަރަކަށްތޯ. އަޅުގަނޑުމެން މީރާއިން ކުރާ މަސައްކަތަށް ކުރިއެރުން އަންނަނީ، ކިހާވަރަކަށްތޯ ބަލާކަމަށްވަންޏާ، ދެންމެ އަޅުގަނޑުމެންނަށް އެ އިޢުލާނު ކުރެއްވީ، 2015 އިން 2019ގެ ސްޓްރެޓީޖިކް ޕްލޭންގެ އެންމެފަހު ފޮޅުވަތުގައި، ބޮޓަމް ލައިނަކީ ޙަޤީޤަތުގައި އަޅުގަނޑު ދެކޭހިތްވަނީ، މީރާއިން ޚަރަދުކުރާ އެއްރުފިޔާއަށް ސަތޭކަ ނުވަދިހަ ނުވަރުފިޔާ ލިބުމުގެ ބަދަލުގައި، މީރާއަށް ސަތޭކަ ނުވަދިހަ ނުވަރުފިޔާ ލިބޭ، މީރާއިން ޚަރަދުކުރާ ދިހަލާރިއަށް. އެއީ ޙަޤީޤަތުގައި މީރާގެ އެފިޝަންސީ އަޅުގަނޑުމެން ދަންނަންޖެހޭގޮތަކީ.
މީރާގައި މަސައްކަތް ކުރައްވާ ހުރިހާ ފަންނީ މުވައްޒަފުންނަށްވެސް އަޅުގަނޑު މަރްޙަބާ ދަންނަވަން. އެޔާއެކީވެސް އަޅުގަނޑު ދަންނަވާލަން ބޭނުންވަނީ، މީރާއަކީ ތަފާތު ވަރަށްގިނަ ޓެކްސް ރިޓަރންތަކާއި، ޓެކްސް ފޯމްތައް ފައިލްކުރާ ތަނަކަށްވާތީ، ކޮންމެވެސް ގޮތަކަށް އަޅުގަނޑުމެންނަށް އެބަ އެނގެންޖެހޭ، އެޓެންޑެންސްގެ ބޭރުން، އެޓެންޑެންސްގެ ބޭރުން ކޮންމެވެސް ގޮތަކަށް އެބަޖެހޭ ކޮލިޓީ ޖަޖްމަންޓެއް ހެދެން. އެންމެ ކުށްމަދުކޮށް، އެންމެ ގިނަ ޓެކްސް ރިޓަރން ފައިލްތައް ޕްރޮސެސްކޮށް، އަދި އެންމެ ރަނގަޅު ގޮތެއްގައި، އެންމެ ގިނަ ޢަދަދެއްގެ ފޯމްތައް ފައިލް ކުރެވެނީ ކޮން ކުއްޖަކަށްތޯ. ޙަޤީޤަތުގައި އެއީ މީރާގައި މަސައްކަތް ކުރާ ކުދިންގެ ކޮލިޓީ ދެނެގަނެވޭނެ އެއްގޮތް. އަދި މިނޫން އެހެން ގޮތްގޮތްވެސް ހުންނާނެކަންނޭނގެ.
މިކަންކަމާއެކީ އަޅުގަނޑުގެ ވާހަކަ ކުރިއަށް ގެންދާއިރު ދަންނަވާލަން ބޭނުންވަނީ، ސަރުކާރަށް ދިމާވާ ޗެލެންޖްތަކުގެ ތެރޭގައި، މީރާއަށް ދިމާވާ ޗެލެންޖްތަކުގެ ތެރޭގައި، މި ނުކުންނަ މައްސަލައަކީ، މިއަންނަނީ ކޮމާޝަލް ފްރޯޑާއި، ކޮމާޝަލް ކްލެއިމްގެ ދާއިރާއަށް. ޓެކްސްއަކީ އަބަދުވެސް، ކޮންމެ ތަނެއްގައި ޓެކްސް ނެގި ކަމުގައިވީނަމަވެސް، ޓެކްސް ފްރޯޑް އިންވޯލްވާނެ ކަންތައްތައް. އޭގެތެރޭގައި، އިވޭޝަނާއި، ނޭނގިގެންދާ ކަންތައްތަކާއި، ޑެލިބަރޭޓް ފްރޯޑް އިންވޯލްވާނެ ކަންތައްތައް. ކްރިމިނަލް އޮޑިޓްތަކާއި، އެންޓި-ކޮރަޕްޝަން ޕްރެކްޓިސަސްއާއި، އަދި ނޯމަލް ފައިނޭންޝަލް އޮޑިޓިންގއަކީ މީރާއާއެކީ އެހީތެރިވާން ހުރި ފަންނީ މަސައްކަތްކުރާ ތަންތަން. މިތާ އޭ.ސީ.ސީ.ގެ އިސް ކޮމިޝަނަރވެސް އެބަ އިންނެވި. އަދި ހަމައެހެންމެ، މި މައްސަލަތައް ޖެހުނީމަ، މައްސަލަތައް ދައުލަތުގެ ފަރާތުން ޕްރޮސެކިއުޓް ކުރެއްވުމަށް ޕްރޮސެކިއުޓަރ ޖެނެރަލްވެސް އެބަ އިންނެވި. އެހެންވީމާ، ހަމަ ތިޔަބޭފުޅުންނަށް ވަރަށް އުފާވެރި ޢީދެއްކަންނޭނގެ މިއަދު މިއީ.
އެހެންނަމަވެސް، ދައުލަތަށް މިދިމާވާ އެންމެބޮޑު ޗެލެންޖަކީ، އަޅުގަނޑުގެ ސަރުކާރެއް ހަމަގައިމުވެސް ބޭނުމެއް ނޫން، ވިޔަފާރީގައި މަސައްކަތްކުރާ މީހުން ކުށްވެރިކުރާކަށް. އަޅުގަނޑަށް ޔަޤީން، މީރާގެ ކޮމިޝަނަރ ޖެނެރަލާ، މީރާގެ ކޮމިޝަނަރުން، ޓެކްސް ކޮމިޝަނަރުން، ޓެކްސް ކަލެކްޓަރުން ބޭނުންފުޅެއް ނުވާނެ، އެއްވެސް ވިޔަފާރިވެރިޔަކާ ދޭތެރޭގައި، ޖިނާއީ ޕްރޮސެކިއުޝަނެއް ފައިލްކުރާކަށެއް. އެހެންނަމަވެސް، އެއް އުޞޫލަކުން ހުރިހާ އެންމެންނާ ދޭތެރޭގައި އެއްގޮތަކަށް ކަންތައް ކުރާކަމަށްވަންޏާ، ޓެކްސް އިވޭޑް ކުރަންޏާ، ޓެކްސް ފްރޯޑް އިންވޯލްވާ ކަމަށްވަންޏާ، ކުރަންޖެހޭ ކަމެއް ދޫކޮށްނުލެވޭނެކަންވެސް އެބަ އެނގޭ. އަޅުގަނޑުމެންގެ ސަރުކާރުން، އަޅުގަނޑުމެން ސަރުކާރާ ޙަވާލުވީއްސުރެ، އަޅުގަނޑުމެން މިކުރާ މަސައްކަތަކީ، ދިވެހިރާއްޖެއަށް ފަސޭހަ، ވިޔަފާރިވެރިންނާ ދޯޅު ޕްރެކްޓިސްތަކެއް އޮންނަ ސަރުކާރަކަށް ހެދުން.
އިއްޔެ އަޅުގަނޑުމެން ކެބިނެޓްގައި މިވާހަކަ ވަރަށް ތަފްޞީލުކޮށް ދައްކައިފީމު. މިއީ ހަމައެކަނި ބިދޭސީ ވިޔަފާރިތަކަކަށް ދިވެހިރާއްޖޭގެ ވިޔަފާރީގެ ވެށި ރަޙްމަތްތެރިވުމެއްވެސް ނޫން. މިއީ ދިވެހި ވިޔަފާރިވެރިންނަށް، ދިވެހިރާއްޖޭގެ ވިޔަފާރި ޕްރެކްޓިސް، ނޫނިއްޔާ ވެށި ފަރިތަވެގެންދިޔުން. ދިވެހިރާއްޖޭގެ ވިޔަފާރިވެރިންނަށް، ދިވެހިރާއްޖޭގެ ވެށި ފަރިތަވެގެންދާއިރު، މިކަން މިއަންނަނީ ހަމައެކަނި އިމްޕޯޓްކުރާ މުދަލާ ހަމައަކުންނެއް ނޫން. މިކަން މިއަންނަނީ އިމިގްރޭޝަންގައި ސަފުތައް ކުރުވުމާއި އަދި އިމިގްރޭޝަންގެ ސަފުތަކުގައި ބޭރުން ގެންނަ މީހުން ތިބޭ ތިބުމުގެ ތެރޭގައި، އާދައިގެ އަންސްކިލްޑް ލޭބަރުންނާއި، ކުންފުނި ކުންފުނީގެ ޑިރެކްޓަރުންގެ ފެންވަރުގައި ތިއްބަވާ ބޭފުޅުންނާއި، އެމީހުންގެ ޑިޕެންޑަންޓުން ތިބޭ ކިޔުތަކަކީ ތަފާތުވާންޖެހޭ ތަންތަން. މީރާގެ ޕްރޮވިޜަނަލް އެކައުންޓްސް ކްލޯޒް ކުރާއިރު، މީރާއިންވެސް ހަމަ ބައްލަވާ ކަންތައްތަކުގެ ތެރޭގައި، މި ބައްލަވަނީ އެ ލެވެލްއާ ހަމައިން އަދި އެއީކީ ކުށެއް އޮތްކަމުގައިވީ ނަމަވެސް، އެއީކީ މައްސަލައެއް ނޫނޭ. އެކައުންޓް ފައިނަލައިޒްވެގެންދާއިރު، ޓެކްސް ރިޓަރން ފައިނަލައިޒް ވެގެންދާއިރު، އެޖަސްޓްމަންޓް ހަދާނެ ޖާގަ އެބަ ލިބޭ. އެހެންވީމާ، މީރާއިން މިކުރައްވާ މަސައްކަތްޕުޅުގައިވެސް އަޅުގަނޑު އެދެނީ، ދިވެހި ސަރުކާރުގެ ވިސްނުމަކަށް މިއަދު ވެފައި މިއޮތީ، ދިވެހިރާއްޖެއަކީ ވިޔަފާރިއަށް ފަރިތަ، ވިޔަފާރި ފަސޭހަ، ދިވެހިންނަށާއި، ބިދޭސީންނަށް ވިޔަފާރި ފަސޭހަ ތަނަކަށްވެގެން ދިޔުން.
އަޅުގަނޑުމެން މިކަންކަން ކުރަންޖެހޭ ސަބަބަކީ، އިކޮނޮމިކް ޓްރާންސްފޮމޭޝަނެއްގައި، ނޫނިއްޔާ މިހާރު މިއުޅޭ ޕްރޮޑަކްޝަން ފްރޮންޓިއަރ، މި ލެވެލުން މުޅިން އެހެން ލެވެލްއަކަށް ޖައްސާ ކަމަށްވަންޏާ، މި ދައްކަނީއަކީ ޓުއަރިޒަމް އިތުރުކުރާ ވާހަކައެއް ނޫން. އެއީ ނެޗްރަލް އިކޮނޮމިކް ފަންކްޝަނެއް. ޓުއަރިޒަމް އެރައިވަލް މިހާރުހުރީ ތިން މިލިއަނުގައި ކަމަށްވަންޏާ، އަޅުގަނޑުމެން ވިސްނައިގެން، އޭތި ފަސް މިލިއަނަށް ޖެއްސުން އެއީ، ނެޗްރަލް އިކޮނޮމިކް ގްރޯތް. ދެން އިކޮނޮމިކް ގްރޯތްގައި ފޭސް ބަދަލުވުމަކީ ޝައްކެއްވެސްނެތްގޮތުގައި، ގިނަ މަސައްކަތްތަކެއްގެ ނަތީޖާ. އެކަމަކު އިކޮނޮމީ ޑައިވަރސިފައި ކުރުމަށް، ޓުއަރިޒަމްގެ އިތުރުން، ޓުއަރިޒަމަށް ހުރި މުހިންމު އެހެން މަސައްކަތްތަކެއް ތަޢާރުފް ކުރެވިއްޖެ ކަމަށްވަންޏާ، ދެން މިދަނީ ޕްރޮޑަކްޝަން ފްރޮންޓިއަރގެ އެއް ލެވެލުން މުޅިން އެހެން މަތީ ފަށަލައަކަށް. އެއީ، ޓްރާންސްފޮމޭޝަންގެ މާނައަކީ. އެހެންވީމާ، ޓެކްސް ކަލެކްޓް ކުރާއިރުވެސް އަޅުގަނޑުމެން ޓެކްސްބޭސް ފުޅާކުރަން މިކުރާ މަސައްކަތުގައި، އެއްވައްތަރެއްގެ ޓެކްސް ދައްކާ މީހުން ގިނަވުމަކީ، އަޅުގަނޑު މިދެންނެވި ކަހަލަ ޓްރާންސްފޮމޭޝަނެއް ނޫން. އެއީ ޓެކްސްބޭސް ވައިޑްން ކުރުމުގައި ނެޗްރަލް ގްރޯތް. އެހެންވީމާ، ވިޔަފާރިކުރާ 10 ފިހާރަ، ވިޔަފާރިއަށް ހިތްވަރު ލިބިގެން، 20 ފިހާރައަށް ވުމަކީ، ކޮންމެހެން އިންލަންޑް ރެވެނިއު ބޭފުޅުން، ނޫނިއްޔާ ސަރުކާރުން އުފާކުރަންޖެހޭ ކަމެއް ނޫން. އެހެން ނަމަވެސް، ތަފާތު ވިޔަފާރިއާއި، ތަފާތު އިންވެސްޓްމަންޓް، ތަފާތު އާމްދަނީގެ ޓެކްސް ދައްކާ ކަމަށްވަންޏާ، އެއީ އަޅުގަނޑުމެންގެ ބޭސް ބްރޯޑްވެގެންދަނީ، ފުޅާވެގެންދަނީ. އެއީ ޓްރާންސްފޮމޭޝަނަކީ.
އަޅުގަނޑުމެންގެ ވިސްނުމުގައި މިހިރީ، އަޅުގަނޑުމެންގެ އިޤްތިޞާދު ފުޅާކުރުމަށްޓަކައި އަޅުގަނޑުމެންގެ ވިސްނުމުގައި މިހިރީ، ތަފާތު ބޮޑެތި މެގަ ޕްރޮޖެކްޓްތަކެއްގެ ވާހަކަ މިދެއްކެނީ. މިރޭ މިއީކީ އެކަހަލަ ވާހަކަ ދެއްކުމުގެ ޙަފްލާއެއްވެސް ނޫން. އެހެން ނަމަވެސް، ޙަޤީޤަތުގައި މީގެ ބެނެފިޝަރީއަކީ މި މަޝްރޫޢުތައް ހިނގާކަމަށްވަންޏާ، މީގެ އެންމެބޮޑު ބެނެފިޝަރީއަކަށް މިވަނީ ދައުލަތް. އެއީ، ދައުލަތަށް ވަންނަ އާމްދަނީ އިތުރުވުމާއި، ދައުލަތުގެ މިވަގުތުގެ އެންމެ އިސްކަމަކީ، ދައުލަތަށް ވަންނަ އާމްދަނީ އިތުރުވުމުގެ އިތުރަށް، ދިވެހި ރައްޔިތުންނަށް، ދިވެހި ޒުވާނުންނަށް ވަޒީފާގެ ފުރްޞަތު ތަނަވެސްވެގެން ދިޔުން. އެހެންވީމާ، މިކަހަލަ މަސައްކަތްތަކުގައި، ދިވެހި ޒުވާނުންނަށް ވަޒީފާގެ ފުރްޞަތު ތަނަވަސްވެގެންދާ ކޮންމެ އިޤްތިޞާދީ ޙަރަކާތަކީ، ޓްރާންސްފޮމޭޝަންގެ ނަމުގައި އަންނަ ކޮންމެ މެގަ ޕްރޮޖެކްޓަކީ، ޙަޤީޤަތުގައި އޭގެ ރިޓަރންސް އެތައް ގުނައެއް މިހާރަށްވުރެ އިތުރުވެގެންދާނެ ކަންކަން.
އަޅުގަނޑުމެންގެ އެއަރޕޯޓް، މިވަގުތު ކޭޓަރ މިކުރަނީ ގާތްގަނޑަކަށް ދޮޅުމިލިއަނެއްހާ ފަސިންޖަރުންނަށް. އަޅުގަނޑުމެންގެ ޚިޔާލުގައި މިއޮތީ، އަޅުގަނޑުމެން މިކުރާ މަސައްކަތުން ހިތްވަރުކޮށްލައިގެން، ދޮޅު މިލިއަންގެ ޕެސެންޖަރ ލޯޑް، ނޫނިއްޔާ ދޮޅުމިލިއަންގެ އެއަރޕޯޓް، އަޅުގަނޑުމެން އެއަރޕޯޓް، އާ އެއަރޕޯޓަކާއި، އާ ރަންވޭއަކާއި، ޓަރމިނަލް ފެސިލިޓީޒް އިތުރުކުރުމާ، ހަމަ ޓޯޓަލް ވަރކްސް އިތުރުކުރުމާއެކީ، އަޅުގަނޑުމެން ބޭނުންވަނީ ކުރިއަށް އޮތް ފަންސާސް އަހަރަކަށް ހިފެހެއްޓޭވަރަށް، ގާތްގަނޑަކަށް ފައިވް ޓު ސެވަން މިލިއަން ޕެސެންޖަރ ލޯޑެއް ހިފަހައްޓާވަރުގެ އެއަރޕޯޓަކަށް ހަދަން. އެ އަންނަނީ ޑައިވަރސިފިކޭޝަން. ބޭސް ބްރޯޑްވާ ވާހަކަ މިދައްކަނީ. އެޔާއެކީ ހަމަ އަންނަ ޕެސެންޖަރުން އެކަނި އެރައިވްވާވަރު އިތުރުވަނީކީ ނޫން. ތަފާތު އެކިކަހަލަ އިޤްތިޞާދީ މަސައްކަތް އިތުރުވެގެން ދަނީ. އެހެންވީމާ، ސަރުކާރުގެ ވިސްނުމުގައި މިހާރު މިއޮތް 1.5 މިލިއަން ހޭންޑްލްކުރާ އެއަރޕޯޓް، 5 މިލިއަން، ނޫނީ 7 މިލިއަން ހޭންޑްލް ކުރާވަރުގެ އެއަރޕޯޓަކަށް ހެދިފައި އަދި އަޅުގަނޑުމެން ހުވަފެނުން ދެކޭކަހަލަ އައިހެވަން ޕްރޮޖެކްޓެއް، ﷲގެ ރަޙްމަތާއެކީ އަޅުގަނޑުމެންނަށް ޙާޞިލުވެގެން ހިނގައްޖެ ކަމަށްވަންޏާ، މިދައްކަނީ އިކޮނޮމިކް ލޭންޑްސްކޭޕް މުޅިން ބަދަލުވެގެންދާ ދިޔުން.
އަޅުގަނޑުމެންގެ އިޤްތިޞާދުގައި، އަޅުގަނޑުމެންނަށް އެންމެ ގިނަ އާމްދަނީ ލިބޭ ކަންކަމުގެ ތެރޭގައި މިހިރީ، ޓުއަރިޒަމުން ލިބޭ ޓެކްސާއި، ކަސްޓަމްސް ޑިއުޓީއިން ލިބޭ ޓެކްސާ، މިކަހަލަ ކަންތައްތަކެއް މިހިރީ. އެހެން ނަމަވެސް، އިޤްތިޞާދަށް އާ ދިރުމެއް އައިސް، އާރޯކަމެއް އައިއްސަ، ޓެކްސްބޭސް ބްރޯޑްވެގެންދާއިރު، ފުޅާވެގެންދާއިރު، މިދެންނެވި ކަހަލަ ތަފާތު ޑައިވަރސިފިކޭޝަން މެގަ ޕްރޮޖެކްޓްސްއަށްދާ ކަމަށްވަންޏާ، އެއީ ޙަޤީޤަތުގައި ޓްރާންސްފޮމޭޝަނަކީ. އޭގައި މިހާރު މީރާއިން ކުރައްވާ މަސައްކަތް ވަރަށް ބޮޑަށް އެމްޕްލިފައި ވާންޖެހޭ. ވަރަށް ބޮޑަށް ތަފާތުވާންޖެހޭ. ވަރަށް ތަފާތު ޓެކްސޭޝަނަށް ޕްރޮފެސަރުން އެބަ ކިޔައިދެއްވަންޖެހޭ، އެހެން ނޫންތޯ. އެ މަސައްކަތް ޔަޒީދު ތިޔަ ކުރައްވަނީ މިހާރުވެސް ހަމަ ބޭރުގެ މާހިރަކާއެކީ.
އަޅުގަނޑުމެންގެ ވިސްނުމަކީ، ނޫނިއްޔާ އަޅުގަނޑުމެންގެ ހުވަފެނަކީ މިދެންނެވި ހުވަފެން. އަޅުގަނޑުމެންގެ ސަރުކާރަކީ ދިވެހި ރައްޔިތުން ބޭނުންވާ ކަންތައްތައް، ދިވެހި ރައްޔިތުންނަށް ފުއްދައިދިނުމަށްޓަކައި ވަސީލަތެއްގެ ގޮތުގައި، އިޤްތިޞާދު ކުރިއަށް ނެރެގެން މަސައްކަތް ކުރާނެ ބައެއް. އަޅުގަނޑުމެންނަކަށް ސިޔާސީ ކަންތައް އެހާ މުހިންމެއް ނޫން. އެހެން ނަމަވެސް، މިހެން ދަންނަވާއިރުވެސް އަޅުގަނޑު ދަންނަވާނަން. ސިޔާސީގޮތުން ރާއްޖެ ހަމަހިމޭންކަން އޮތުމާއި، އެކަކު އަނެކަކު، އެމީހެއްގެ ޙައްޤުތަކަށް ޙިމާޔަތްތެރިކަން، ނޫނިއްޔާ ޙައްޤުތަކަށް އިޙްތިރާމް ކުރުމާއި، އަދި އަމުދުން ޖިސްމާނީ ކުށްތައް ދިވެހިރާއްޖޭގައި ނެތުމަކީ، ރާއްޖެ ހަމަޖެހުމުގެ އަޞްލު. މިއީ އަޞްލުގައި އަޅުގަނޑު މިދެންނެވި ކަހަލަ ޓްރާންސްފޮމޭޝަން ބޮޑު މަޝްރޫޢަކަށް ބޭނުންވާނެ ބޭސިކް އިންގްރިޑިއަންޓްސް. އެހެންވީމާ، ކުށް މަދުވުމާއި، ބޮޑެތި ކުށްތައް ނެތުމާއި، އަދި ކުށް ކުށަށްވުން، ކުރިމިނަލައިޒްވުން، އަޅުގަނޑުމެން އެބަޖެހޭ އީޖާދު ކުރަން ތަފާތުގޮތަކަށް. މިއަދުވެސް މަގުމަތީގައި ބައިސްކަލް ބައްތި ނުދުއްވާ މީހަކީ ކުށްވެރިއަކަށް ހަދާނެތޯ، އަޅުގަނޑުމެން ވިސްނާލަންޖެހޭ. މަގުގެ ވަކިފަރާތަކުން ހިނގާފައިދާ މީހާ، ހިނގަން އޮންނަ ފަރާތް ނޫން އެހެން ފަރާތަކުން ހިނގާކަމަށްވަންޏާ، އެއީ ކުށެއްތޯ އަޅުގަނޑުމެން ވިސްނާލަން އެބަޖެހޭ. ސަރުކާރުގެ ކުންފުންޏެއްގެ، އަތޮޅުތެރޭގައި ހުންނަ ކުންފުންޏެއްގެ ގޯތިތެރޭގައި ހުންނަ ރުކަކުން ވެއްޓޭ ކާށްޓެއް، އެތާ ހުންނަ ޑަރޯގާ، ނޫނިއްޔާ އެތާ ހުންނަ ޖެނިޓަރެއް، އެ ނަގާ ވިއްކާލީމަ، އަޅުގަނޑުމެން އޭނައާ ދަޢުވާ ކުރާނެތޯ، އަޅުގަނޑުމެން ވިސްނާލަންޖެހޭ. އެހެންވީމާ، ކްރިމިނަލައިޒް ކުރުމަކީ، އަޅުގަނޑުމެންގެ ޘަޤާފަތުގައި މިދެންނެވި ގޮތަށް، ދިވެހިރާއްޖެ ޔޫތު، ނުވަތަ ދިވެހިރާއްޖޭގެ ޒުވާނުން، އެމީހުންނަށް ހިތްވަރުދީގެން، ކޮންވިކްޝަންދީގެން، އެމީހުންނަކީ، ދިވެހިރާއްޖޭގެ އިޤްތިޞާދުގައި ހަކަތަ ކަމަށް، ޙަޤީޤަތުގައި އެމީހުންނަށް ގަބޫލުކުރެވޭނެ ފުރްޞަތުތައް، ހުރިހާ ފަރާތަކުން އެބަދޭންޖެހޭ.
އަޅުގަނޑު ވަރަށް އުފާވި، އާ ޕްރޮސެކިއުޓަރ ޖެނެރަލް، މަޤާމާ ޙަވާލުވެވަޑައިގަތުމުގެ ތެރޭގައި، ހަމަ އެންމެ ކުރީގައި އޭނަ އިޢުލާނު ކުރެއްވި، އޭނަގެ ވިސްނުންފުޅު ހުރިގޮތް. އޭގެތެރޭގައި އުޞޫލުތަކެއް، ލަސްވެގެން މަހެއްހާ ދުވަހުގެ ތެރޭގައި އެކަށައަޅުއްވާފައި، މިހެން ނުހިނގާ ހުރި އެތައް ޕްރޮސިކިއުޝަންގެ މައްސަލަތަކަކާ ދޭތެރޭގައި ގޮތްތަކެއް ނިންމަވާނެ ކަމަށް ވިދާޅުވި. ގަބޫލު ކުރައްވާ، މީހުން ކުށްވެރިވަނީކީއެއް ބޮޑެތި ކުށްތަކަކު ނޫން. މީހުން ކުށްވެރިވުމުގައި ހުރިހާ ފާޑެއްގެ ކަންކަން ހިމެނޭ. އެހެންވީމާ، އަޅުގަނޑުމެންގެ ވިސްނުން ވާންވާނީ، ޓެކްސް އޮތޯރިޓީގެ ތެރެއިން މިކުރެވޭ މަސައްކަތުގައިވެސް، އަދި އެހެން ކަންކަމުގައި މިކުރެވޭ މަސައްކަތުގައިވެސް ވާންވާނީ، ކުށްކުރުން މަދު، ނޫނިއްޔާ ކުށުގެ އެނެޓޮމީ ދަނެގެން، ކުށަށް އަރައިނުގަނެވޭ ކަހަލަ ވެށްޓެއް ޤާއިމުކުރުން. އެކަން ކުރުމުގައި، އެންމެބޮޑު ދައުރެއް އަދާކޮށްދޭނީ ޙަޤީޤަތުގައިވެސް އިޤްތިޞާދު ފުޅާވެގެން. ކުށަށް އަރައިގަންނަ ޢުމުރުފުރައިގައި ތިބި ކުދިންނަކީ، ކުށުގެ ވެށްޓަށް ނުދާވަރުގެ އާމްދަނީ ލިބި، އަދި އެކުދިންނަކީ އެކުދިންގެ ޕްރި އޮކިއުޕޭޝަންގައި، އެކުދިންގެ ވަގުތުތައް، ހުސް ވަގުތުތައް ބޭނުންތެރި މަސައްކަތެއްގައި ފުރޭގޮތަކަށް ދައުލަތުން އޮޕަޗުނިޓީ ފުރްޞަތު ތަނަވަސްކޮށްދެވޭ ކަހަލަ ވެށްޓެއް، ދިވެހިރާއްޖޭގައި ޤާއިމުކުރެވިގެން. މިކަން ކުރުމާއެކީ، ދިވެހިރާއްޖޭގައި ވިޔަފާރިކުރަން ބޮޑެތި ދިވެހި ވިޔަފާރިވެރިންނަށް އަދި ބޭރުގެ ވިޔަފާރިވެރިންނަށް ފަހި ވެށްޓެއް ދިވެހިރާއްޖޭގައި ޤާއިމު ކުރެވިއްޖެ ކަމަށްވަންޏާ، އަޅުގަނޑުމެން މިދެންނެވި ލެވެލަށް އަޅުގަނޑުމެން އުދުހޭއިރު، އަޅުގަނޑު ހިތަށްއަރަނީ، ޓެކްސް އޮތޯރިޓީއަކީ އަޅުގަނޑުމެންނާއެކީ ދައުލަތަށް ހަމަ އެންމެބޮޑު އާމްދަނީއެއް ހޯއްދަވައިދެއްވުމަށް ހަމަ އެންމެބޮޑު މަސައްކަތް ކުރައްވާނެ ފަރާތޭ.
އަޅުގަނޑުގެ ވާހަކަކޮޅު ނިންމާލަމުންވެސް ދަންނަވާނީ، ހަމަ މިޔާއެކީ އަޅުގަނޑުމެން މިހާރު ވިސްނާ އަދި މަސައްކަތް ކުރަމުންދާ ކަންތައްތަކުގެ ތެރޭގައި، ޔަޒީދު މިކޮޅުން ޓެކްސް ކަލެކްޓް ކުރައްވާއިރު، އަޅުގަނޑު އެބަ ބައެއް މަސައްކަތް އެބަ ކުރަން. އަޅުގަނޑުމެންނާއެކީ އެކުވެރި ޤައުމުތަކުން، ޚާއްޞަކޮށް، ޓުއަރިޒަމް ދާއިރާގައި އިންވެސްޓް ކޮށްގެން، މި މަސައްކަތްކުރާ ޤައުމުތަކުގެ ކޯޕަރޭޓް ލީޑަރުން މިތާ ރާއްޖޭގައިވެސް އެބަ ވިޔަފާރި ކުރޭ. އެހެންވީމާ، އެބަޖެހޭ އޭނަގެ ޕަރސަނަލް ޓެކްސް، ނޫނިއްޔާ އޭނަގެ ކޯޕަރޭޓް ޓެކްސް، ދެޤައުމުގައި ނެގިގެނެއް ނުވާނެ. އެހެންވީމާ، އެވޮއިޑެންސް އޮފް ޑަބަލް ޓެކްސޭޝަން، މި ޓްރީޓީތަކެއްގައި، ފްރޭމްވަރކް އެގްރީމަންޓްތަކެއް އަޅުގަނޑުމެން މިހާރު މި ރިވިއު ކުރަނީ. ރިވިއުކޮށްފައި، އިރާދަކުރެއްވިއްޔާ، އަޅުގަނޑުމެން މިދެންނެވި ކަހަލަ ޤައުމުތަކުގެ ވިޔަފާރީގައި ރާއްޖެއާއެކީ މަސައްކަތްކުރާ ޤައުމުތަކުގެ ވިޔަފާރިވެރިން ހިމެނޭ ޤައުމުތަކުގެ ސަރުކާރުތަކާއެކީ ހަމަ ޑަބަލް ޓެކްސޭޝަން އެވޮއިޑެންސް އެގްރީމަންޓްތަކެއްވެސް އަޅުގަނޑުމެން ސޮއިކުރަމުން އެބަ ގެންދަމު. މީގެ ބޭނުމަކަށްވެސް ވަނީ ޙަޤީޤަތުގައި ދިވެހިރާއްޖެއަށް ބޮޑެތި އިންވެސްޓަރުން އައުން. ދެން ދިވެހިރާއްޖެއަށް ބޮޑެތި އިންވެސްޓަރުން އައުން އެއީ ގަބޫލު ކުރައްވާ، އެއީ އިސްލާމްދީނުގެ އަޞްލަކާ ޚިލާފުކަމެއްވާނެ ކަމެއް ނޫން. އެއީ ދިވެހިރާއްޖޭގައި ކެސިނޯ ހިނގާނެ ކަމެއްވެސް ނޫން. އެއީ ރައީސުލްޖުމްހޫރިއްޔާއަށް ލިބެންވާ ބާރަށްވުރެ އިތުރު ބާރެއް ލިބޭނެ ކަމެއްވެސް ނޫން. މިއިން ކޮންމެ ކަމެއްވެސް ހިނގާނީ، ޤާނޫނުގެ ޙުދޫދުގެ ތެރޭގައި. މިއިން ކޮންމެ ކަމެއްވެސް ހިނގާނީ ޤާނޫނުގެ ޙުދޫދުގެ ތެރޭގައި. ދިވެހި ދައުލަތުގެ ފުރިހަމަ ސިޔާދަތު، ކޮންމެ ތަނަކަށްވެސް ހިނގާނެ. އެހެންވީމާ، ދިވެހިރާއްޖޭގައި ޚާއްޞަ އިޤްތިޞާދީ ސަރަޙައްދުތަކެއް ޤާއިމުކުރިޔަސް، އަދި ދިވެހިރާއްޖޭގެ އިޤްތިޞާދު ފުޅާވެގެންދިޔަސް، މިއީކީ އަޅުގަނޑުމެން ކަންބޮޑުވާންޖެހޭ ކަމެއް ނޫން. އަޅުގަނޑުމެން މިހާރު އެބަ ވިސްނަންޖެހޭ، އަޅުގަނޑުމެން މިތިބަ ކުޑަ ކަކުނިހޮރުން ބޭރަށް ނުކުމެގެން، ދުނިޔޭގައި އުޅެވޭވަރުގެ ބަޔަކަށް އަޅުގަނޑުމެންވާން. އެހެންވީމާ، ފުރަތަމަފަހަރަށް ހަމަޖެހުމާއެކީ، ހިތްހަމަޖެހުމުގެ ނޭވާއެއް ސިޔާސީ ހުރިހާ ފަރާތްތަކުން ދިވެހި ޖައްވަށްލާ ވަގުތެއްގައި، ދިވެހިރާއްޖޭގެ ރައްޔިތުންނަށް އެންމެ ކުޑަމިނުން ވަޒީފާގެ ފުރްޞަތާއި، އެމީހުންނަށް ބޭނުންވާ ޞިއްޙީ ދާއިރާއާއި، ތަޢުލީމީ ދާއިރާ ކުރިއެރުމަށް ބޭނުންވާނެ ފައިސާ، ތަފާތު އިޤްތިޞާދީ ވަސީލަތްތަކުން ހޯދައިދޭން ސަރުކާރުން ކުރާ މަސައްކަތަކީ، It’s not a big ask. މިއީ, އަޅުގަނޑުމެންގެ ސަރުކާރުގައި ތިބޭ ސިޔާސީ ހުރިހާ ފަރާތްތަކުން އެންމެ ކުޑަމިނުން ދިވެހި ރައްޔިތުންނަށް އޯވް ކުރާވަރުގެ ކުޑަކުޑަ ޖިޒީއެއް.
އެހެންވީމާ، އަޅުގަނޑު ހަމަ މިރޭވެސް ކަށަވަރުކަން އަރުވަން ބޭނުންވޭ، އަޅުގަނޑުމެން މިކުރާ މަސައްކަތުގައި، ދިވެހިރާއްޖޭގެ އިސްތިޤްލާލެއް ޗެލެންޖެއް ނުވާނެ. ދިވެހިރާއްޖޭގެ ސިޔާދަތެއް ޗެލެންޖެއް ނުވާނެ. ދިވެހިރާއްޖެއަށް ޤާނޫނުއަސާސީގެ ބާރެއް ނުކެނޑޭނެ. އަދި ދިވެހިރާއްޖޭގައި ޢަމަލުކުރާ އުޞޫލުތަކަކަށް އެއްވެސްކަހަލަ ބުރުލެއް ނާރާނެ. އެކަމަކު އެޔާއެކީވެސް އަޅުގަނޑުމެން ކުރިއަށް ދިޔުމުގެ ވިސްނުން ހުންނަންވާނެ. ކުރިޔަށް ދިޔުމުގެ ކެރުންތެރިކަން ހުންނަންވާނެ. އާ ކަންކަމާ ކުރިމަތިލުމުގެ ކެޕޭސިޓީ އަޅުގަނޑުމެންގެ ތެރޭގައި ހުންނަންވާނެ. އެހެން ނޫނިއްޔާ، އަޅުގަނޑުމެން ތަފާތު އެކިއެކި ފަންނުތައް ޒުވާނުންނަށް ކިޔަވައިދީގެން، ޒުވާނުންނަށް ވަޒީފާގެ ފުރްޞަތު އެބައޮތޭ، މިކަހަލަ ވާހަކަ ދެއްކުމުގެ ބޭނުމެއް ނޯންނާނެކަންނޭނގެ.
އަޅުގަނޑު އެދެނީ، ތިޔަ ހުރިހާ ބޭފުޅުންނަށް، އަޅުގަނޑުމެން ދިވެހިރާއްޖެއަށް، މިއަދަށްވުރެ ފަހި މާދަމައެއް. އިރާދަކުރެއްވިއްޔާ، ﷲގެ ރަޙްމަތާއެކީ އަޅުގަނޑުމެން ބޭނުންވަނީ ފެހި ފަހި ދިވެހިރާއްޖޭގެ ފުރްޞަތުތަކެއް ރައްޔިތުންނަށް ޤާއިމުވެގެންދިޔުން.
والســّلام عليــكم ورحـمــة اللّـه وبـركاتـه.
_____________________________