بســم اللّـه الرّحمـن الرّحيــم
ވަރަށް ބޮޑަށް ޝުކުރިއްޔާ އިނގޭތޯ. ދެން މިއީ ވަރަށް އުފާވެރި ޙަފްލާއެއް. އަޅުގަނޑަށާއި އަޅުގަނޑުގެ އަންހެނުންނަށާއި ޢާއިލާއަށް. ދެން އެންމެ ފުރަތަމަވެސް ކޫއްޑޫ ފިޝަރީޒް މެނޭޖްމަންޓްގެ ހަމަ މުޅި ޓީމަށާއި، މުވައްޒަފުންނަށާއި، އެސް.ޓީ.އޯ.ގެ މެނެޖްމަންޓް ޓީމަށާއި މުވައްޒަފުންނަށް ވަރަށް އިޚްލާޞްތެރިކަމާއެކީ ޝުކުރު ދަންނަވަން. ދެން އަޅުގަނޑުމެންގެ ނަމުގައި، މި ޓީޝާޓް، މި ފަންޑަށް އެހީވުމުގެ ގޮތުން، އެބޭފުޅުން ބައްލަވައިގެންދެއްވި ކަމަށްޓަކައި ވަރަށް އިޚްލާޞްތެރިކަމާއެކީ ޝުކުރު ދަންނަވަން.
ދެން އަޅުގަނޑުވެސް އަޅުގަނޑުގެ އަންހެނުންވެސް ހަމަ ވަރަށް އުފާވަން، މިކަހަލަ ކަންކަމުގައި އަޅުގަނޑުމެންނަށް ބައިވެރިވުމުގެ ފުރްޞަތު ލިބޭތީ. ދެން މިފަހަރު މި ދެކުންފުނީގެ ފަރާތުން އިސްނަންގަވައިގެން، މިކޮށްދެއްވި މަސައްކަތަށް ޝުކުރު ދަންނަވަމުންވެސް އަޅުގަނޑު ދަންނަވާލަން ބޭނުންވަނީ، މިކަމަކީ އަޅުގަނޑުވެސް މި ޓެލެތޯން، މި މީޑިއާގެ ފަރާތުން އިސްނަންގަވައިގެން މިގެންދަވާ ޓެލެތޯނުގެ ކަންތައްތައް މިއަންނަނީ ހަމަ ވަރަށް ކައިރިން ބަލަމުން. ދެން މިރޭ މި ވަގުތު ހަމަވެގެންދާއިރު ހަމަ ވަރަށް ފޯރިގަދަކަންވެސް އަޅުގަނޑަށް އެނގޭ. ދެން ހަމަ ފުރަތަމަ އަޅުގަނޑު މީޑިއާގެ މި އިންތިޒާމުތަކަށް، މީޑިއާގެ އިސްބޭފުޅުންނަށް ހަމަ ވަރަށް އިޚްލާޞްތެރިކަމާއެކު ޝުކުރު ދަންނަވަން.
ދެން ހަމައެޔާއެކީ، ދިވެހި ރައްޔިތުންނަށް ދަންނަވާލަން ބޭނުންވާ ވާހަކައަކީ، ފަލަސްޠީނުގެ ނިކަމެތި ރައްޔިތުންގެ އިޙްސާސްތައް އަޅުގަނޑުމެން މިދަނީ ކުރަމުންނޭ ދިވެހިރާއްޖެއިންވެސް. މިއީކީއެއް މިއަދުގެ އެކަނި ކަމެއް ނޫނޭ. ފަލަސްޠީނުގެ ނިކަމެތި ރައްޔިތުންގެ ޙާލަތާ ދޭތެރޭގައި އަޅުގަނޑުމެން ހަމްދަރުދީވެ އަދި ދައުލަތުގެ ފެންވަރުގައި ރައީސުން ކުރައްވާފައި ހުރި މަސައްކަތް އެބަހުރި. ޚާއްޞަ ގޮތެއްގައި، އަޅުގަނޑުމެންނަށް މާޒީގެ ތެރެއިން އަޅުގަނޑުމެންނަށް އެންމެ ފާހަގަކުރެވޭ މަސައްކަތްތަކެއް މިކަމުގައި ކުރައްވާފައި ހުރީ ރައީސް މައުމޫން. ދެން ހަމަ އެކަމާ ގުޅިގެން އަޅުގަނޑުމެންގެ ދެ ދައުލަތް ދޭތެރޭގައި އޮންނަ ގުޅުން ރަމްޒުކޮށްދޭ ދަތުރުތަކެއްވެސް މިހިރީ ކުރެވިފައި. އަޅުގަނޑު މިވާހަކަ ދައްކާއިރުވެސް ރައީސް މައުމޫނަށްވެސް ދަޢުވަތެއް އެބައޮތް ފަލަސްޠީނަށް ވަޑައިގަންނަވަން. ހަމަ އެހެންމެ، އަޅުގަނޑަށް ލިބިފައި އޮތް ދަޢުވަތެއްވެސް ހަމަ ކުޑަތަންކޮޅެއް ފަސްވެގެން މިދިޔައީ، މި ޙަރަކާތްތަކާ ގުޅިގެން. އެހެން ނޫންނަމަ، އަޅުގަނޑު މިހާރު ފަލަސްޠީނުގެ ދަތުރެއް ކޮށްފައި އޮންނަންވާނީ އިނގޭތޯ. ދެން ޔާސިރު ޢަރަފާތުވެސް ރާއްޖެ ވަޑައިގެންނެވި ދޮއެއްތޯ.
ދެން ދިވެހި ރައްޔިތުންނަށް ގަބޫލު ކުރެއްވޭނެ، ހަމަ މަތިވެރި ޤުރްބާނީއެއްވަމުން އެދަނީ. ބަޔަކު ދިރިއުޅޭ ޤައުމަކުން ބަޔަކު ބޭރުކޮށްލަން ކުރާ މަސައްކަތުގެ ތެރޭގައި، އަނިޔާވެރިކަމާއެކީ، މިކުރެވެމުންދާ ކަންތައްތަކުގެ ޝިކާރައަކަށް ވެގެން މިދަނީ، މުސްކުޅިން، އަންހެނުން، ކުޑަކުދިން. ވަކި ގިންތިއެއް، ވަކި ޢުމުރުފުރައެއްނެތި ދޮއެއްތޯ. ވަކި ޢުމުރުފުރައެއް ނެތި މިދަނީ. އެހެންވީމާ، މިއީކީއެއް އަޅުގަނޑުމެންނަކަށް ގަބޫލުކުރަން ފަސޭހަ ކަންކަމެއް ނޫން. އަދި ހަމަ އެޔާއެކީ، އަޅުގަނޑުމެންނަށް މިހާރު ފެނިގެން މިދަނީ، ޔަހޫދީ ދައުލަތުގެވެސް މިކަމަށް އިޙްތިޖާޖުކުރާ މީހުންތަކެއް އުފެދިގެން އެބަދޭ. އަދި 1 ވަނަ ދުނިޔޭގެ ޤައުމުތަކުގެވެސް މިކަންކަމާ ކަންބޮޑުވާ އަދި މިކަންކަމާ އިޙްތިޖާޖު ކުރަމުންދާ މީހުން އެބަ ފެނޭ. މިއީ، ދެން ތަންކޮޅެއް ތަފާތުކޮށް އަންނަ ކަމެއް މިހާރު. ގަބޫލު މިކުރެވެނީ، ވައިރަލް މީޑިއާއާއި، ޔޫޓިއުބާ މިކަހަލަ ހުރިހާ ކަމެއްގެ ތެރެއިން މިހާރު ޙަޤީޤަތުގައި މި ހިންގާ ބޮޑެތި ލާއިންސާނީ ޖަރީމާތައް މުޅި ދުނިޔެއަށް މިހާރު ފެންނަލެއް، މިހާރު ޢާންމުވެފައި އޮތްލެއް ބޮޑީ. ކުރީގައި އެވަރަކަށް ނުފެނޭ. އެހެން ނޫންތޯ. ކަވަރޭޖް ދޭންއުޅޭ ރިޕޯޓަރުންނާ ދޭތެރޭގައިވެސް، ޖަރނަލިސްޓުންނާ ދޭތެރޭގައިވެސް ވަރަށް ތަފާތު ގޮތްގޮތަށް ކަންތައް ކޮށްފައި ހުރީ. އެހެން ނަމަވެސް، މިހާރު ދުނިޔޭގެ މިހެން ހިނގާ ކަންކަމަކީ ސިއްރު ކުރެވޭނެ ކަންކަމެއް ނޫން.
އެހެންވީމާ، ދިވެހި ރައްޔިތުންނަށް ކުރީގައި މިއޮތް އިޙްސާސްތައް ގަބޫލު ކުރެވެމުންދިޔަޔަސް މިހާރު ހަމަ ވަރަށް ވަރުގަދައަށް އެމީހުންނަށް ފެނިގެން މިދަނީ، މި ލާއިންސާނީ އަނިޔާވެރި ޖަރީމާތައް ހިންގާ ތަން. ކުޑަކުޑަ ކުދިންނާ ދޭތެރޭގައި ރަޙުމް ކުޑަ ގޮތެއްގައި މިކަންތައްކޮށް، ކުދިން މަރާލެވިފައި ހުންނަތަން ފެނިގެން މިދަނީ. ޢުމުރުން ދޮށީ މީހުންނާ ދޭތެރޭގައި ކަންތައް ކުރެވެމުންދާގޮތް މި ފެނިގެން މިދަނީ ދޮއެއްތޯ.
އެހެންވީމާ، މީގައި ހަމަ އަޅުގަނޑުމެން ދިވެހި ރައްޔިތުންގެ ހިތްތަކަށް އަސަރުތަކެއް ކުރޭ. ދެން މިކަން ކިތަންމެ ރަނގަޅަކަށްވެސް ދިވެހި ރައްޔިތުން ސާބިތުކޮށްދެއްވަމުން އެ ގެންދަވަނީ. މީގައި ވަކި އިސްތިސްނާއެއް ނެތް. ރަށްރަށުގެ ފެންވަރުގައި، ސަރުކާރުގެ ކުންފުނިތަކުގެ ފެންވަރުގައި، ސަރުކާރުގެ އޮފީސްތަކުގެ ފެންވަރުގައި، ހަމަ އެކިކަހަލަ ކޮންޓްރިބިއުޝަން ހައްދަވަމުން އެ ގެންދަވަނީ. ހަމަ ވަރަށް އެދެވޭ ޢަދަދަކަށް ފައިސާވެސް، ހަމަ ނިޒާމުވަމުން، ރެއިޒްވަމުން އެ ދަނީ. އަދި މީގެ އެހެން ޙަރަކާތްތައްވެސް ހިނގާނެ ކަމަށް އަޅުގަނޑަށް ގަބޫލުކުރެވޭ.
އެހެންވީމާ، އެކަމާ އެންމެ ފުރަތަމަވެސް ހަމަ ދަންނަވާލަން ބޭނުންވަނީ، މި ޙަރަކާތްތައް ފެށްޓެވި އެކިއެކި ބޭފުޅުންނަށް ނޫނީ އެކިއެކި އޯގަނައިޒޭޝަންތަކަށް ޝުކުރިއްޔާއޭ ދަންނަވަމޭ.
ދެން ދެވަނަ ކަމަކަށް ހަމަ ދަންނަވާލަން ބޭނުންވަނީ، މިފަހަރު މީޑިއާގެ މަސައްކަތް މީގައި ހަމަ ވަރަށް ވަރުގަދަ އިނގޭތޯ. އެހެންވީމާ، މީޑިއާގެ ފަރާތުން މި އޯގަނައިޒް ކުރެއްވި ޓެލެތޯނުގެ ސަބަބުން ވަރަށް ބޮޑެތި އެހީތަކެއް ހަމަޖެހިގެން މިދަނީ. ދެން މިފަހަރު އަޅުގަނޑު އުފާވާ އަނެއް ކަމަކީ، މިކަހަލަ ހުރިހާ ކަމެއްގައި ސަރުކާރުން އިސްނަގާ. އެހެން ނަމަވެސް، ހުޅަނގު ދުނިޔެއިންވެސް އަދި ދުނިޔޭގެ ހުރިހާ ފަރާތްތަކަށްވެސް ސަރުކާރުން ކުރާ ކަންކަމާއި، ރައްޔިތުން ފަލަސްޠީނުގެ ރައްޔިތުންގެ އިޙްސާސްތަކާއި ކެކުޅުންތައް، އެ ހަމްދަރުދީއާ ގުޅިގެން ރައްޔިތުންގެ އިޙްސާސްތައް ފެންނަގޮތަށް މިފަހަރު ދިޔަކަން އެއީ ވަރަށް ރަނގަޅު ކަމެއް އިނގޭތޯ. އެހެން ނޫނީ ސަރުކާރުން އިސްނަގައިގެން ކުރާ ކަންކަމުގައި، ސަރުކާރުގެ ކުންފުނިތައް، ނޫނީ އެހެން ޖަމާޢަތްތަކާ، މިތަންތަން ބައިވެރިވާނެ ދޮއެއްތޯ. އެހެން ނަމަވެސް، އޭގައި އިޚްލާޞްތެރިކަން އޮތް މިންވަރާ ދޭތެރޭގައި ސުވާލު އުފައްދާނެ. އެހެން ނަމަވެސް، މިފަހަރު މިކަން ފެށިގެން މިއަންނަނީ ރައްޔިތުންނާ ހަމައިން. ރައްޔިތުންނާ ހަމައިން ފެށިގެން މިއަންނަނީ. އަންނައިރު ހަމަ ސަރުކާރުގެ ކުންފުނިތަކުގައި، ސަރުކާރުގެ އޮފީސްތަކުގައި މިތިބީވެސް ހަމަ ދިވެހި ރައްޔިތުން. އެހެންވީމާ، ހަމަ އިސްލާމް އެތައް ބަޔަކަށް ލިބޭ ގެއްލުންތައް، އޭގެ އިޙްސާސް އަޅުގަނޑުމެން ކުރަމުން މިދަނީ.
އެހެންވީމާ، ކުންފުންޏެއްގެ ސިފައިގައި ނަމަވެސް، މިއަންނަނީ ދިވެހި ރައްޔިތުންގެ އިޙްސާސްތައް. އެހެންވީމާ، އަޅުގަނޑު ވަރަށް އުފާވޭ، ޙަޤީޤަތުގައި މިކަމުގައި ސަރުކާރުން އިސްނެގުމުގެ ކުރިން، ދިވެހި ރައްޔިތުންގެ ފަރާތުން އިންތިޒާމުވެގެން މިކަން އައިމަ. ދެން އަދި ހަމަ ސަރުކާރުން ކުރާ މަސައްކަތްތަކެއްވެސް އަދިވެސް ހަމަ ހުންނާނެ ހަމަ މިކަމާ ގުޅިގެންވެސް. ދެން މިހާރު އަޅުގަނޑުމެން މިތިބީ، ހަމަ ތިޔަ ކުރައްވާ މަސައްކަތުގައި، އަޅުގަނޑުމެންގެ ޓީޝާޓް، އެސް.ޓީ.އޯ. އާއި ކޫއްޑޫގެ ފަރާތުން ބައްލަވައިގަތީ ތި.
ދެންހަމަ މިޔާއެކީ އަޅުގަނޑު ދަންނަވާލަން ބޭނުންވަނީ، އަޅުގަނޑުވެސް ރައީސުލްޖުމްހޫރިއްޔާގެ ހައިސިއްޔަތުން އަދި ވަކިން އަމިއްލަ ހައިސިއްޔަތުން، އަޅުގަނޑުގެ އަންހެނުންވެސް ހަމަ އޭނާގެ ކަމަނާގެ އަމިއްލަ ޙައިޘިއްޔަތުން ހަމަ މި ފަންޑުގައި އަޅުގަނޑުމެން ބައިވެރިވަމޭ އެބަ އިނގޭތޯ. ބައިވެރިވަމޭ، އެއީ އަޅުގަނޑުމެންނަށް ހަމަ ލިބޭ ވަރަށްބޮޑު ޝަރަފެއް އިނގޭތޯ. އެހެންވީމާ، މި އިޚްލާޞްތެރިކަމާއެކީ މިކަމުގައި އަޅުގަނޑުމެން އަދި ވަކިން އެބަ ބައިވެރިވަން.
އެހެންވީމާ، ދެން ދިވެހި ރައްޔިތުންނަށް ހަމަ ދަންނަވާލަން ބޭނުންވަނީ، ދުނިޔޭގައި މިހިންގާ ލާއިންސާނީ ކަންތައްތައް ހަމަ އަބަދުވެސް އަޅުގަނޑުމެން ފާރަވެރިވެ ބަލަން ތިބޭނަމޭ. ދެން ސަރުކާރުން މިކުރާ ރަސްމީ ކަންތައްތަކުގެ ތެރޭގައި، ހަމަ ކުރަންޖެހޭ ހުރިހާ މަސައްކަތެއް، މިހާރު މިއޮތް ސަރުކާރުން ކުރާނެ. އަދި މީގެ ކުރީގައި، ރައީސް މައުމޫންގެ ސަރުކާރުގައިވެސް ހަމަ ހުރީ ކޮށްފައި އިނގޭތޯ. އެހެންވީމާ، އަޅުގަނޑުމެން މިއަންނަނީ ހަމަ މިކަންކަމުގައި އިސްލާމް އަރަބި ރައްޔިތުންނަށް ޚާއްޞަކޮށް، ފަލަސްޠީނަށް މިލިބޭ ޙަމަލާތަކުގައި މިއަންނަނީ ހަމަ ކޮންސިސްޓަންޓް، އެއް ސިޔާސަތެއް ފޮލޯ ކުރަމުން މިއަންނަނީ، އެހެން ނޫންތޯ. މިފަހަރު މިއަނިޔާވެރިކަން ޙައްދުފަހަނަޅާދިޔައީ. މީގެކުރިންވެސް އެކި މިންވަރަށް އަނިޔާވެރިކަން އަޅުގަނޑުމެންނަށް ފެނިފައި މިހިރީ. އެކަމަކު މިހާ ފާޅުކަންބޮޑު ގޮތެއްގައި، ދައުލަތުގެ ފަރާތުން، އިސްރާއީލު ދައުލަތުގެ ފަރާތުން މިކަން މިހާ ވަރުގަދައަށް ގެންދިޔައީމަ ދެން މި އަޅުގަނޑުމެންނަށް މިހާ މުހިންމު ކަމަކަށްވެގެން މިދިޔައީ ދޮއެއްތޯ. ދެން އެހެން ނަމަވެސް، ފަލަސްޠީނުގެ ރައްޔިތުންގެ ޙާލަތާ ދޭތެރޭގައި އަބަދުވެސް ދިވެހިރާއްޖޭގެ ހުރިހާ ރައްޔިތުންވެސް ހަމްދަރުދީ އޮވޭ.
ހަމަ ނިންމާލަމުންވެސް އަޅުގަނޑު ދަންނަވާލަން ބޭނުންވަނީ، ހަމަ މި މަސައްކަތްޕުޅުގައި ދިވެހި އަމިއްލަ ފަރާތްތަކުން އިސްނެންގެވީމަ ޝުކުރު ދަންނަވަމޭ. މިހާރުގެ މި ޓެލެތޯންގައި މީޑިއާގެ ފަރާތުން އިސްނެންގެވީމަ، ތިޔަބޭފުޅުންނަށް އަޅުގަނޑު އިޚްލާޞްތެރިކަމާއެކީ ހަމަ ޝުކުރު ދަންނަވަމޭ. ދެން ހަމަ އަޅުގަނޑުމެންގެ ނަމުގައި މި ފަންޑަށް އެހީވެވަޑައިގަތުމުގެ ގޮތުން، މި ޓީޝާޓްތައް ބައްލަވައިގަތީމަ، އެސް.ޓީ.އޯ އާއި، ކޫއްޑޫ މި ދެކުންފުންޏަށްވެސް އަޅުގަނޑުމެން ހަމަ ވަރަށް އިޚްލާޞްތެރިކަމާއެކީ، އަޅުގަނޑާއި އަޅުގަނޑުގެ އަންހެނުން ޝުކުރު ދަންނަވަން.
والســّلام عليــكم ورحـمــة اللّـه وبـركاتـه
_____________________________