މަތީ ދަރަޖަ ހޯދާ ފަރާތްތަކަށް ރައީސުލްޖުމްހޫރިއްޔާ ދެއްވާ ޚާއްޞަ އިނާމަށް، ނަން ހުށަހެޅުމުގެ ފުރުޞަތު، ޚާއްޞަ އިނާމާބެހޭ ކޮމިޓީން މިއަދު ހުޅުއްވައިލައްވައި އެކަމާބެހޭ ލިޔުން، ދިވެހި ސަރުކާރުގެ ގެޒެޓްގައި ޝާއިޢު ކުރައްވައިފިއެވެ. މި އިނާމާބެހޭ އިތުރު ތަފްޞީލު މަޢުލޫމާތު، ޚާއްޞަ އިނާމާބެހޭ ކޮމިޓީން ރާއްޖޭގެ ޚަބަރުފަތުރާ ވަސީލަތްތަކަށް ދެއްވީ، މިއަދު މެންދުރުކުރިން ރައީސުލްޖުމްހޫރިއްޔާގެ އޮފީހުގައި ބޭއްވެވި ބައްދަލުވުމެއްގައި އެ ކޮމިޓީގެ މެންބަރުންނެވެ.
މި އިނާމު ދެއްވުމުގެ މަޤްޞަދަކީ، ރާއްޖެއަށް ރީތި ނަން ހޯދައިދޭ ފަރާތްތަކުގެ ކާމިޔާބީއާއި، ހިތްވަރާއި ހުނަރުން މަތީ ވަނަތައް ހޯދާ ފަރާތްތަކުގެ ކާމިޔާބީ އިޙްތިފާލު ކުރުމާއި، މިފަދަ ކާމިޔާބީތައް ހޯދުމަށް ހިތްވަރު ދިނުމާއި، ރާއްޖެއަށް ބޭނުންވާ ދާއިރާތަކަށް ދިވެހިންގެ އުފެއްދުންތެރިކަމާއި މަސައްކަތްތެރިކަން މިޞްރާބު ކުރުމެވެ.
މިއަހަރު ޚާއްޞަ އިނާމު ދެއްވާނީ ޖުމްހޫރީ ދުވަހުގެ މުނާސަބަތުގައި ބާއްވަވާ ރަސްމީ ޖަލްސާގައެވެ.
މިއަހަރު ޚާއްޞަ އިނާމު ދެއްވުމަށް ހަމަޖައްސަވާފައިވަނީ، މި ދަންނަވާ ކަންކަމަށެވެ.
1. މަތީ ތަޢުލީމާއި ތަމްރީނުގެ ކޯހަކުން އެންމެމަތީ ވަނަ ހޯދުން.
2. ބައިނަލްއަޤްވާމީ މަޢުރަޒަކުން ނުވަތަ މުބާރާތަކުން ނުވަތަ މިނޫންވެސް ބައިނަލްއަޤްވާމީ މިންކުރުމަކުން އެންމެމަތީ ވަނަ ނުވަތަ ޝަރަފު ހޯދުން.
3. މަސައްކަތްތެރިކަމާއި އުފެއްދުންތެރި ކަމުގެ ރޮނގުން އާދަޔާ ޚިލާފު ކާމިޔާބީއެއް ޙާޞިލު ކުރުން.
4. ސަރުކާރުން ކަނޑައަޅާ ފެންވަރަކަށް މަސައްކަތެއް ކުރުން ނުވަތަ އެއްޗެއް އުފެއްދުން.
މަތީ ތަޢުލީމާއި ތަމްރީނުގެ ކޯހަކުން އެންމެ މަތީ ވަނަ ހޯދުމުގެ ގިންތިން މިއަހަރު އިނާމު ދެއްވުމަށް ހަމަޖެހިފައިވަނީ، ހާސިލު ކޮށްފައިވާ ސަނަދުން ހޯދާފައިވާ މާކްސްގެ ނުވަތަ ގްރޭޑުގެ އެވރެޖް، އެ ސަނަދުގައި ދެވޭ އެންމެ މަތީ ދަރަޖައިގައި ހިމެނިފައިވުމާއެކު، ކޮންމެ މާއްދާއަކުން ނުވަތަ މޮޑިއުލްއަކުން އެންމެ މަތީ ދަރަޖަ ލިބިފައިވާނަމައެވެ.
ސަރުކާރުން ކަނޑައަޅާ ފެންވަރަކަށް މަސައްކަތެއްކުރުން ނުވަތަ އުފެއްދުމުގެ ގިންތިން މިއަހަރު 4 ދާއިރާއަކުން އިނާމު ދެއްވުމަށް ވަނީ ހަމަޖައްސަވާފައެވެ. އެ ދާއިރާތަކަކީ،
(ހ) ދިވެހިބަހުގެ ބަހުރުވަތައް ދިރުވައި އާލާކުރުމުގެ ދާއިރާއިން "ދިވެހިބަހުގެ ބަހުރުވަތަކުގެ އަދަބީބަސް" ފޮތް ލިޔުމުގެ މުބާރާތް. މިކަމާބެހޭ މަސައްކަތް ކުރިއަށް ގެންދަވާނީ، ދިވެހިބަހުގެ އެކެޑަމީންނެވެ.
(ށ) ވިޜުއަލް އާޓްސްގެ ދާއިރާއިން، ދިވެހިރާއްޖޭގެ ތާރީޚީ ހާދިސާތަކުގެ މައްޗަށް ލިޔެފައިވާ ވާހަކަތައް އަސްލަކަށް ބަލައިގެން އެވާހަކައިގެ އަސްލު ނުގެއްލޭގޮތަށް ކުރެހުމުން ހުށަހެޅުން. މިކަމާބެހޭ މަސައްކަތް ކުރިއަށް ގެންދަވާނީ، ނޭޝަނަލް ސެންޓަރ ފޮރ ދި އާޓްސްއިންނެވެ.
(ނ) ދިވެހި ޤައުމީ ތަރިކައާއި ދިވެހި ޘަޤާފަތް ދިރުވައި އާލާކުރުމުގެ ދާއިރާއިން، ކާބަފައިންގެ މަސައްކަތްތެރިކަމާއި އުފެއްދުންތެރިކަން ދައްކުވައިދޭ މިނިއޭޗަރ އުފެއްދުން. މިކަމާބެހޭ މަސައްކަތް ކުރިއަށް ގެންދަވާނީ، ޑިޕާޓްމަންޓް އޮފް ހެރިޓޭޖުންނެވެ.
(ރ) ނެތެމުންދާ ދިވެހި މަސައްކަތްތެރިކަން ދިރުވައި އާލާކުރުމުގެ ދާއިރާއިން، ކުނަލާއި، ކުނަލުން ތަކެތި އުފެއްދުން. މިކަމާބެހޭ މަސައްކަތް ކުރިއަށް ގެންދަވާނީ، މިނިސްޓްރީ އޮފް އިކޮނޮމިކް ޑިވެލޮޕްމަންޓުންނެވެ.
މި މުބާރާތްތަކާބެހޭ އިތުރު ތަފުޞީލު ނޫސްވެރިންނާ ޙިއްޞާ ކުރެއްވީ މި ދާއިރާތަކުގެ އިސްބޭފުޅުންނެވެ.
ޚާއްޞަ އިނާމަށް ނަން ހުށަހަޅާ ފޯމު ރަސްމީ ގަޑީގައި ރައީސުލްޖުމްހޫރިއްޔާގެ އޮފީހުން ދޫކުރައްވާނެއެވެ. އަދި އެ އޮފީހުގެ ވެބްސައިޓުންވެސް ޑައުންލޯޑް ކުރެއްވޭނެއެވެ. ވެބްސައިޓްގެ އެޑްރެހަކީ www.presidencymaldives.gov.mv އެވެ. ފޯމު ފުރިހަމަކުރައްވައި ފޮނުއްވަންޖެހެނީ "ޚާއްޞަ އިނާމާބެހޭ ކޮމިޓީ" އަށް އެޑްރެސްކޮށް، 2014 ސެޕްޓެންބަރު 15 ވާ ހޯމަ ދުވަހުގެ ހަވީރު 4 ޖެހުމުގެ ކުރިން ރައީސުލްޖުމްހޫރިއްޔާގެ އޮފީހަށެވެ.
މަތީ ދަރަޖަ ހޯދާ ފަރާތްތަކަށް ރައީސުލްޖުމްހޫރިއްޔާ ދެއްވާ ޚާއްޞަ އިނާމަށް އެދި ހުށަހަޅާ ފޯމު: މަތީ ތަޢުލީމާއި ތަމްރީނުގެ ކޯހަކުން އެންމެ މަތީ ވަނަ ހޯދުން
މަތީ ދަރަޖަ ހޯދާ ފަރާތްތަކަށް ރައީސުލްޖުމްހޫރިއްޔާ ދެއްވާ ޚާއްޞަ އިނާމަށް އެދި ހުށަހަޅާ ފޯމު: މަސައްކަތްތެރިކަމާއި، އުފެއްދުންތެރިކަމުގެ ރޮނގުން އާދަޔާ ޚިލާފު ކާމިޔާބީއެއް ހާސިލުކުރުން