ބަރަކާތްތެރި ރަމަޟާން މަސް ފެށުމުގެ މުނާސަބަތުގައި، ރާއްޖޭގެ ލޮބުވެތި ރައްޔިތުންނަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ތަހުނިޔާ ފޮނުއްވައިފިއެވެ. މިދަންނަވާލަނީ މިމުނާސަބަތުގައި ރައީސުލްޖުމްހޫރިއްޔާ ފޮނުއްވި ތަހުނިޔާގެ މެސެޖެވެ.
[ބަރަކާތްތެރި ރަމަޟާންމަސް އަޅުގަނޑުމެންނާ ބައްދަލުކުރުމުގެ ހެޔޮ ތައުފީޤު މިންވަރު ކުރެއްވި ކަމަށްޓަކައި اللّـه سبحـانـه وتعـالىގެ ޙަޟްރަތަށް ޙަމްދާއި ޝުކުރު ދަންނަވަމެވެ. އެއަށްފަހު، މި މާތް މައްސަރުގެ ތަހުނިޔާ، ރާއްޖޭގެ އެންމެހާ ލޮބުވެތި ރައްޔިތުންނަށް ދަންނަވައި، މި މައްސަރުގެ ހެޔޮއެދުންތައް އަޅުގަނޑު ވަރަށް އިޚްލާޞްތެރިކަމާއެކު ފޮނުވަމެވެ.
ރަމަޟާން މަހަކީ، މާތްﷲ މަތިވެރި ކުރައްވާފައިވާ ވަރަށް މާތް ރޫޙާނީ މައްސަރެކެވެ. އެހެންކަމުން، މި މާތް މައްސަރުގެ ބަރަކާތާއި ހެޔޮ ދަރުމަ ލިބިގަނެ، ރޯދައިގެ މަތިވެރި ވާޖިބު އަދާކޮށް، ޞަދަޤާތްދީ، ހެޔޮ ކަންތައްތައް އިތުރުކުރުމަކީ، އަޅުގަނޑުމެންގެ މައްޗަށް އޮތް ވާޖިބެކެވެ. އަދި މިއީ ކީރިތި ޤުރްއާނުގެ މައްސަރު ކަމަށްވާތީ، ޤުރްއާނަށް އިތުރު އަހަންމިއްޔަތު ކަމެއް ދެއްވުމަށް، ރާއްޖޭގެ ރައްޔިތުންނަށް، މިމުނާސަބަތުގައި އަޅުގަނޑު އިލްތިމާސް ކުރަމެވެ.
ރާއްޖޭގެ ރައްޔިތުންނަކީ ޒަމާނުއްސުރެ މާތްވެގެންވާ އިސްލާމްދީނުގެ މަތިވެރި އުޞޫލުތަކަށް ފުރިހަމައަށް ބޯލަނބައި، އެ އުޞޫލުތަކުގެ މަތީގައި ހަރުދަނާކަމާއެކު ސާބިތުވެ ތިބި ބައެކެވެ. އެހެންކަމުން، މި ބަރަކާތްތެރި ރަމަޟާން މަސް އަޅުގަނޑުމެންނާ ބައްދަލުކުރާއިރު، މިކަންކަމުގެ މަތިން ހަނދާންކޮށް، އިސްލާމީ ރީތި އުޞޫލުތަކަށާއި، މުޖްތަމަޢުގެ މަތިވެރި ހަމަތަކަށް ސަމާލުކަން ދެއްވުމަށްވެސް ރާއްޖޭގެ ރައްޔިތުންނަށް އަޅުގަނޑު އިލްތިމާސް ކުރަމެވެ.
ރާއްޖޭގެ ޒަމާންވީ އާދަކާދައިގެ މަތިން، މި ބަރަކާތްތެރި ރަމަޟާން މަހަށް ރާއްޖޭގެ ރައްޔިތުން މިވަނީ ވަރަށް ބޮޑަށް ތައްޔާރުވެވަޑައިގެންފައެވެ. ހަމައެޔާއެކު، ރައްޔިތުންގެ ލުއިފަސޭހައަށްޓަކައި ސަރުކާރުންވެސް ވަރަށްގިނަ މަސައްކަތްތަކެއް މިވަނީ ކޮށްފައެވެ. މިގޮތުން، ރާއްޖޭގެ ގިނަ ޢަދަދެއްގެ މިސްކިތްތައް، ރަމަޟާން މަހަށްޓަކައި މިވަނީ މަރާމާތު ކުރެވި، އާބާތުރަ ފިލުވާފައެވެ. އަދި ރާއްޖޭގައި ޢާންމުކޮށް ބޭނުންކުރާ ކާބޯތަކެތި ފަސޭހައިން ރައްޔިތުންނަށް ލިބޭނެ އިންތިޒާމްތައް ހަމަޖައްސައި، ޢާންމުކޮށް ބޭނުންކުރާ ކާބޯތަކެތީގެ އަގުތައް، އާދަޔާ ޚިލާފަށް ބޮޑުވިޔަނުދީ ހިފެހެއްޓުމަށްވެސް ޚާއްޞަ ސަމާލުކަމެއް މިދަނީ ދެމުންނެވެ.
އަޅުގަނޑުގެ އުންމީދަކީ، މިފެށުނު ބަރަކާތްތެރި ރަމަޟާން މަހަކީ، ހުރިހާ ގޮތަކުންވެސް އަޅުގަނޑުމެންނަށް ބާއްޖަވެރި މަހަކަށް ވެގެންދިޔުމެވެ.
މާތްﷲ، މި ބަރަކާތްތެރި މައްސަރުގެ ރޯދަ ހެޔޮގޮތުގައި ހިފުމުގެ ހެޔޮ ތައުފީޤު އަޅުގަނޑުމެން އެންމެންނަށް ދެއްވާށިއެވެ. އަދި މި މައްސަރުގެ ބަރަކާތާއި ހެޔޮ ދަރުމަ މިންވަރު ކުރައްވާށިއެވެ."
ބަރަކާތްތެރި ރަމަޟާން މަސް ފެށުމުގެ މުނާސަބަތުގައި، އިސްލާމީ ޤައުމުތަކުގެ ވެރިންނަށާއި، ބައިނަލްއަޤްވާމީ އިސްލާމީ ޖަމާޢަތްތަކުގެ ވެރިންނަށް ރައީސުލްޖުމްހޫރިއްޔާ ވަނީ ތަހުނިޔާ ފޮނުއްވާފައެވެ. އަދި އިސްލާމީ ޤައުމުތަކުގެ ވެރިންނާއި، ބައިނަލްއަޤްވާމީ އިސްލާމީ ޖަމްޢިއްޔާ ޖަމާޢަތްތަކުގެ ވެރިންވެސް މި މުނާސަބަތާ ގުޅިގެން ރައީސުލްޖުމްހޫރިއްޔާގެ އަރިހަށް ތަހުނިޔާ ފޮނުއްވަމުން ގެންދަވައެވެ.