އިސްލާމްދީނުގެ ފުރިހަމަކަމާއި، އެ ދީނުގެ ލުއިފަސޭހަކަމާއި، އެ ދީނުގެ ސަމާޙަތްތެރިކަމުގެ ވާހަކަ، ރާއްޖޭގެ ޒުވާނުންނަށް ވިސްނޭފަދަ ބަހުރުވަޔަކުން ފޯރުކޮށްދެއްވައި، ރާއްޖޭގައި މިއޮތް ސައްތައިންސައްތަ އިސްލާމީ ޝަޚުޞިއްޔަތު ދެމެހެއްޓެވުމަށް ގަދައަޅައި މަސައްކަތް ކޮށްދެއްވުމަށް ރާއްޖޭގެ ޢިލްމުވެރިންނަށް ރައީސުލްޖުމްހޫރިއްޔާގެ ނައިބު ޑޮކްޓަރ މުޙަންމަދު ޖަމީލު އަޙްމަދު އިލްތިމާސް ކުރައްވައިފިއެވެ. ރައީސުލްޖުމްހޫރިއްޔާގެ ނައިބު މިކަމަށް އިލްތިމާސް ކުރެއްވީ، މަސްޖިދުލްފުރުޤާން ހުޅުއްވައިދެއްވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ. މަސްޖިދުލް ފުރުޤާން ހުޅުއްވައިދެއްވުން އޮތީ މިއަދުގެ ޢަޞްރު ނަމާދު ވަގުތުއެވެ.
ރައިސުލްޖުމްހޫރިއްޔާގެ ނައިބުގެ ވާހަކަފުޅުގައި، ރާއްޖޭގެ ރައްޔިތުންނަށް ފުރިހަމަ ފައިދާ ލިބިދެވޭފަދަ ގޮތަކަށް ޢިލްމުވެރިންގެ މަސައްކަތް ބައްޓަން ކޮށްދެއްވުމަށްވެސް ރާއްޖޭގެ ދީނީ ޢިލްމުވެރިންނަށް އިލްތިމާސް ކުރެއްވިއެވެ. އަދި މި ވަގުތަކީ، ރާއްޖެއަށާއި، ރާއްޖޭގެ ޒުވާނުންނަށާއި މުޖުތަމަޢަށް، ދިނީ ގޮތުންނާއި އިޖުތިމާޢީ އެއްބައިވަންތަކަމުގެ ގޮތުން ވަރަށް ގިނަ ގޮންޖެހުންތަކެއް، އެތެރެއިންނާއި ތަފާތު ދިމަދިމާއިން ކުރިމަތިވަމުންދާ ދުވަސްކޮޅެއްކަންވެސް ފާހަގަކުރެއްވިއެވެ.
ބަރަކާތްތެރި ރަމަޟާން މަހުގެ ފުރިހަމަ ފައިދާ ހޯއްދެވުމަށް ރާއްޖޭގެ ރައްޔިތުން ސަމާލުވެވަޑައިގަތުމަށްވެސް ރައީސުލްޖުމްހޫރިއްޔާގެ ނައިބު ނަސޭހަތްތެރިވެވަޑައިގެންނެވިއެވެ. އެމަނިކުފާނު ވިދާޅުވިގޮތުގައި، ކުރިއަށް އޮތް މަހަކީ، އަޅުގަނޑުމެން އެކުވެރިވާންވީ މަހެވެ. ވީހާވެސް ގިނައިން ހެޔޮކަމާއި އަޅުކަމުގައި ވަގުތު ހޭދަކޮށް، އެމަހުގެ ފުރިހަމަ ބަރަކަތާއި ސަވާބު ހޯދުމަށްޓަކައި އަވަސްވެގަންނަވަންވީ މަހެވެ.
ރައީސުލްޖުމްހޫރިއްޔާގެ ނައިބުގެ ވާހަކަފުޅުގައި، މިސްކިތުގެ މަސައްކަތް ނިންމެވުމަށް ބޮޑު އިސްކަމެއް ދެއްވައިގެން، އެއްވެސް ކަހަލަ ދަތިކަމެއް ދިމާނުވާގޮތަށް ކަންތައްތައް އިންތިޒާމު ކޮށްދެއްވިކަމަށްޓަކައި ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމަށް ޝުކުރު އަދާކުރެއްވިއެވެ. އަދި މި މަސައްކަތް ވަރަށް ދިގު ދުވަސްތަކަކަށް ދެމިގެންދިޔުމަށްފަހު، ނިމުމަކާ ހަމައަށް މި ގެނެވުނީ، އިސްލާމިކް މިނިސްޓްރީއާއި، ހައުސިން މިނިސްޓްރީއާއި، މަސައްކަތުގެ ކޮންޓްރެކްޓަރާއި، މާލޭ ސިޓީ ކައުންސިލުގެ ފުރިހަމަ އެއްބާރުލުމާއި ބުރަ މަސައްކަތާ އެކުގައިކަން ފާހަގަކުރައްވައި، އެ ހުރިހާ ފަރާތްތަކަށް އެމަނިކުފާނު ޙައްޤު ތަޢުރީފާއި ޝުކުރުއަދާކުރެއްވިއެވެ.
