ރައީސުލްޖުމްހޫރިއްޔާގެ ނައިބު ޑޮކްޓަރ މުޙަންމަދު ޖަމީލު އަޙްމަދު، ސްރީލަންކާގެ ރައީސް މަހިންދަ ރާޖަޕަކްސައާ މިއަދު ބައްދަލުކުރައްވައިފިއެވެ. މިބައްދަލުކުރެއްވުން އޮތީ، މިއަދު މެންދުރުކުރީގައި ކުރުނބާ މޯލްޑިވްސްގައެވެ.
މިބައްދަލުކުރެއްވުމުގައި، ދިވެހިރާއްޖެއާއި ސްރީލަންކާއާ ދެޤައުމުގެ ދެމެދުގައި އޮތް ޒަމާންވީ ގާތް ރަޙްމަތްތެރި ގުޅުމާއި، މިގުޅުން އިތުރަށް ބަދަހިކުރެއްވުމާ ބެހޭގޮތުން ދެބޭފުޅުން މަޝްވަރާ ކުރެއްވިއެވެ.
މިބައްދަލުކުރެއްވުމުގައި، ރައީސުލްޖުމްހޫރިއްޔާގެ ނައިބު ދެއްކެވި ވާހަކަފުޅުގައި ސްރީލަންކާ ސަރުކާރުން ދިވެހިރާއްޖެއާމެދު ބަހައްޓަވާ ގާތް ކަމަށާއި، މިގުޅުން ދެމެހެއްޓުމަށްޓަކައި ސްރީލަންކާ ސަރުކާރާއި ރައްޔިތުން ކުރައްވާ މަސައްކަތްޕުޅަށާއި، ދިވެހިރާއްޖެއަށް ދެއްވާ އެއްބާރުލެއްވުމާއި އެހީތެރިކަމަށްޓަކައި ސްރީލަންކާގެ ރައީސަށާއި ސަރުކާރަށް ޝުކުރު އަދާކުރެއްވިއެވެ.
ސްރީލަންކާ ރައީސްގެ މިދަތުރުފުޅުގައި ދެޤައުމުގެ ދެމެދުގައި ސޮއިކުރެވުނު 3 އެއްބަސްވުމުގެ ސަބަބުން، ދެޤައުމުގެ ގުޅުން އިތުރަށް ތަރައްޤީވެގެން ދާނެކަމަށް އުންމީދު ކުރައްވާ ކަމުގައިވެސް ރައީސުލްޖުމްހޫރިއްޔާގެ ނައިބު ވިދާޅުވިއެވެ.
ރައީސް ރާޖަޕަކްސަގެ ވާހަކަފުޅުގައި، ރާއްޖެއަށް ދަތުރުފުޅެއް ކުރެއްވުމަށް ދަޢުވަތު ދެއްވި ކަމަށްޓަކައި ރައީސުލްޖުމްހޫރިއްޔާއަށާއި، ދިވެހި ސަރުކާރަށާއި، ރައްޔިތުންނަށް ޝުކުރު އަދާކުރެއްވިއެވެ. އަދި، ދިވެހިރާއްޖެއިން ބޭނުންވާ ކަންކަމުގައި ސްރީލަންކާ ސަރުކާރުން އަބަދުވެސް އެހީތެރިކަމާއި އެއްބާރުލެއްވުން ދެއްވާނެކަމުގެ ޔަޤީންކަންވެސް ރައީސް ރާޖަޕަކްސަ ދެއްވިއެވެ.
