بســم اللّـه الرّحمـن الرّحيــم
اَلحَمْـدُ لِلّـهِ رَبّ العَـالَمِـين، وَالصّـلاة وَالسّلام علـى سيدنا محـمَّدٍ، خاتم الأنبياء والمرسلين، وَعلـى آلـه وَصَحْبِـهِ أجمـعـين.
އަޅުގަނޑުމެންގެ މި ޙަފްލާއަށް ވަޑައިގެންނެވި އެންމެހާ ޢިއްޒަތްތެރިން، އަޅުގަނޑުމެންގެ އަޑު އައްސަވައި ބައްލަވަމުން ގެންދަވާ އެންމެހާ ދިވެހި ލޮބުވެހި ރައްޔިތުން، ޚާއްޞަކޮށް، މި ދާއިރާއަށް ޝައުޤުވެރިކަން ހުރި ދިވެހި ޒުވާނުން.
السّــلام عليــكم ورحـمــة اللّـه وبـركاتـه،
އާދެ! މިރެޔަކީ އަޅުގަނޑުމެންގެ ރާއްޖެ މިކުރަން ފަށާފައި މިވާ ދަތުރުގައި، އަނެއްކާވެސް އާ އުސްމިނަކަށް ދިޔުމަށްޓަކައި ފުރަތަމަ މަރްޙަލާގެ ބިންގާ އަޅާ ރޭ. އާދެ! ރިސަރޗްތަކެއް ކުރެވިގެން، ވާހަކަތަކެއް ދެކެވިގެން، މަޝްވަރާތަކެއް ކުރެވިގެން، ޕީ.ޕީ.އެމް.ގެ މެނިފެސްޓޯ، ރިޔާސީ އިންތިޚާބަށް އަޅުގަނޑު ނުކުތްއިރު އެކުލަވައިލެވިފައި އެވަނީ. މެނިފެސްޓޯގައި މިހިމެނި ކަންތައްތަކުގައި، މަޓާޓޯއާއި އަދިވެސް ޞިނާޢަތުގެ އެހެން ބޭފުޅުންނާ ބައްދަލުކޮށް، ވަރަށް މުއްސަނދި މަޢުލޫމާތު ބަދަލުކުރުމުގެ ޙިއްޞާތަކެއް ވަނީ ކުރެވިފައި. އޭގެ ނަތީޖާވެސް ރަނގަޅު. އަޅުގަނޑުމެން އަބަދުވެސް މިބަލަނީ، ދިވެހިރާއްޖެ ތަރައްޤީ ކުރުމަށް މިއޮންނަ ޓްރެޑިޝަނަލް، ނޫނިއްޔާ ކަސްޓަމަރީ ޕްރެކްޓިސްއިން ދުރަށް ގޮއްސަ، ދިވެހިރާއްޖެ ތަރައްޤީ ކުރެވޭނެ ގޮތްތަކެއް ހުރިތޯ. ދިވެހިރާއްޖޭގައި ޓުއަރިޒަމް ފެށިގެން އައިގޮތް، އަދި ޓުއަރިޒަމާ ދޭތެރޭގައި އޭރު ޚިޔާލުހުރިގޮތުގެ ހަމަ ކުޑަ ވާހަކައެއް، ދެންމެ މިނިސްޓަރ ސަޢީދުގެ ވާހަކަފުޅުގައި، އެ ފާހަގަކުރެއްވީ.
އާދެ! އޭރުގެ ކޮންސަލްޓަންޓުން، އަޅުގަނޑު ހަނދާންވާ ގޮތުން ވެއްޖިއްޔާ، އިނގިރޭސިވިލާތުގެ ކޮންސަލްޓަންޓުން ދިވެހިރާއްޖޭގައި ޓުއަރިޒަމް ނުހިންގޭނެ ކަމަށް އޭރު ވަނީ ސަރުކާރަށް ލަފާދީފައި. ސަބަބެއް ކަމަށް ބުނަނީ ހަމަ އެންމެ ސަބަބެއް. އެ ސަބަބަކީ، ދިވެހިރާއްޖެއަކީ ސަތޭކައިންސަތޭކަ ރާއްޖެއަށް ބޭނުންވާ ތަކެތި އިމްޕޯޓްކުރާ ޤައުމަކަށްވެފައި، ދިވެހިރާއްޖޭގައި މިއޮތީ، ހަމަ ދުރުގައި އަތުރާލެވިފައި ހުރި ވަރަށް ރީތި ޖަޒީރާތަކަކަށްވިނަމަވެސް، ޓްރާންސްޕޯޓަކީ، ދަތުރުފަތުރަކީ މި އިންޑަސްޓްރީ ވަޔަބަލް ކުރުމަށްޓަކައި، ހަމަ ޓޯޓަލީ އިމްޕޮސިބަލް ޚަރަދަކަށްވެގެންދާނެ ކަމަށް.
އެހެންވީމާ، އެކަހަލަ އުނދަގޫ ވިސްނުންތަކަކާއެކީވެސް ދިވެހި ސަރުކާރުން އަދި ދިވެހި އިންޑަސްޓްރީން، ޓޫރިޒަމް އިންޑަސްޓްރީން މަސައްކަތްކުރީ، އިރާދަކުރެއްވިއްޔާ، ﷲގެ ރަޙްމަތާއެކީ މި އިންޑަސްޓްރީ ކާމިޔާބު ކުރެވޭތޯ. ތަފްޞީލަކަށްދާކަށް ނެތިން. ދިވެހިރާއްޖޭގައި ޓުއަރިޒަމް ހިނގާގޮތް މިއީ ދުނިޔޭގައި ހޮސްޕިޓޭލިޓީ އިންޑަސްޓްރީއާ ބެހޭގޮތުން ޔުނިވަރސިޓީތަކުގައި ލެކްޗަރ ނަގައިދޭއިރު، ދިވެހިރާއްޖެ، ކޭސް ސްޓަޑީއަކަށް ނެގިފައި އޮތް ވާހަކަ ދަންނަވާލީމަ، ދިވެހިރާއްޖޭގެ ޓޫރިޒަމް އިންޑަސްޓްރީއާ ދޭތެރޭގައި ދުނިޔޭގައި ދެކޭގޮތް ތިޔަބޭފުޅުންނަށް އެނގިވަޑައިގަންނަވާނެ.
މިރޭ އަޅުގަނޑުމެން އަނެއްކާވެސް މި ބަލަނީ، އަޅުގަނޑުމެންގެ ޓުއަރިޒަމް ޑައިވަރސިފައި ކުރެވޭތޯ. ޓުއަރިޒަމް ތަފާތު ގޮތަކަށް ބައްޓަން ކުރެވޭތޯ. އޭގެ މާނައަކީ، މިހާރު މިގެންގުޅޭ ރަށެއްގައި، ރިޒޯޓެއް އޮންނަ ކޮންސެޕްޓާ ދުރަށް ދިޔުމެއްވެސް ނޫން. އެކަން ހިނގާނެ. އެޔާއެކީވެސް ތަފާތު ޓުއަރިޒަމްގެ ކޮމްސެޕްޓްތަކެއް ގެނެވޭތޯ މަސައްކަތް މިކުރެވެނީ. އަޅުގަނޑުމެންގެ މުއްސަނދިކަމަކީ، ދިވެހިރާއްޖޭގައި މިހިރަ ރީތި ރަށްތައް. އަދި އެއަށްވުރެ ބޮޑު މުއްސަނދިކަމަކީ، އެރީތި ރަށްތަކާ ގުޅިފައިވާ ނަލަ ފަޅުތައް. މި ފަޅުތަކުގެ ބޭނުން އަޅުގަނޑުމެންނަށް، ޓުއަރިޒަމަށް ހިފެންވާނެ. މި ފަޅުތަކުގެ ބޭނުން މިއަދުވެސް ޓުއަރިޒަމްގައި އެބަ ހިފަމުން ގެންދޭ. އަޅުގަނޑުމެންގެ ފެތުރިފައި މިއޮތް ޓުއަރިޒަމް ކޮންސެޕްޓުން އަޅުގަނޑުމެން ވަރޓިކަލް ޓުއަރިޒަމަށް، ނޫނިއްޔާ އުސްމިނަށް ދަތުރުކުރާ ޓުއަރިޒަމްގެ ބޭނުމަކަށްވަނީ، ދިވެހިރާއްޖޭގައި ތަފާތު ޓުއަރިޒަމްގެ ފްލޭވަރ، ރަހަޖެއްސުމެއް ގެނައުން.
ހަމައެހެންމެ، އަޅުގަނޑުމެން މި އިންޓްރޮޑިއުސް ކުރާ ސްޓްރާޓަރ ޑިވެލޮޕްމަންޓް، ނޫނިއްޔާ ކޮމިއުނަލް ޓުއަރިޒަމް ޑިވެލޮޕްމަންޓަކީ، އިންޓަރގްރޭޓެޑް ޓުއަރިޒަމް ޑިވެލޮޕްމަންޓަކީވެސް އަނެއްކާވެސް މިއަށް އަންނަ ޑައިވަރސިފިކޭޝަނެއް. މިދަނީ އަޅުގަނޑުމެންގެ ޕްރޮޑަކްޓް ޑައިވައިސިފައިވެގެން. އެހެން ނަމަވެސް، ހަމަ އެޔާއެކީ ވިސްނާލަންޖެހެނީ، މި އިންޑަސްޓްރީއަށް ކުރިމަތިލާން ތިބި ޒުވާނުންތަކަކަށް ފުރްޞަތު ދިނުމުގެ މައިގަނޑު މަސައްކަތް މި ކުރެވެނީ. ޢާންމުކޮށް، އެއްރަށެއްގައި އެއް ރިޒޯޓް ކޮންސެޕްޓެއް ޑިވެލޮޕް ކުރެވެން މިހުރި ތަންތަނުގައި، އަޅުގަނޑުމެން މި ޚިޔާލުކުރަނީ، މި ތުނބުރި ކޮންސެޕްޓް، ނޫނިއްޔާ މިރަށުގެ ނަމުން މި ކޮންސެޕްޓަށް، އަޅުގަނޑުމެން، ނޫނީ މި ޕްރޮޖެކްޓަށް ނަންދެވިގެން، މިރޭ އިފްތިތާޙު މިކުރެވެނީ، ލޯންޗް މިކުރެވެނީ.
އިންޓަރގްރޭޓެޑް ޑިވެލޮޕްމަންޓެއްގެ ގޮތުގައި ޓުއަރިޒަމް ފެށިގެން އަންނަގޮތް، މިނިސްޓަރ އަދީބުގެ ވާހަކަފުޅުގައި އަދި އެމް.އެމް.ޕީ.އާރު.ސީ.ގެ ފަރާތުން ޒިއަތުގެ ވާހަކަފުޅުގައި، އިންޓްރޮޑަކްޝަންގައި އަޅުގަނޑުމެންނަށް ތަޢާރުފްވެގެންދިޔައީ. އޭގެ ތަފްޞީލަކަށްދާކަށް ނެތިން. އެހެން ނަމަވެސް، ހަމަ ކުރުގޮތަކަށް ދަންނަވާ ކަމަށްވަންޏާ، ލޮޖިސްޓިކަލް ހުރިހާ ސަޕޯޓެއް މިއަންނަނީވެސް ވިޔަފާރީގެ އުޞޫލުން ތަފާތު ބަޔަކު ދޭގޮތަށް. ދެން މިއޮންނަނީ ޕްރޮޑަކްޓް ޑައިވައިސިފައި ކުރުމުގެ ގޮތުން، ޕްރޮޑަކްޓްގެ އިންޓަރގްރޭޓަޑް އެކިއެކި ކޮމްޕޯނަންޓްތައް. އޭގެތެރޭގައި، ޓުއަރިޒަމް ޑިވެލޮޕްމަންޓަށް މި ބޭނުންވާ އެކޮމޮޑޭޝަން. އެކޮމޮޑޭޝަންގައިވެސް ތަފާތު ފްލޭވަރ އެބަހުރި. ބީޗް އައިލެންޑް ކޮންސެޕްޓް، ނޫނީ ބީޗް ގެސްޓްހައުސް ކޮންސެޕްޓާއެކީ ރަށުތެރޭގައި ޑިވެލޮޕްމަންޓްގެ ކޮންސެޕްޓް އެބަހުރި. ހަމައެޔާއެކީ، ތަފާތު ބަދިގެތައް، ތަފާތު ރެސްޓޯރެންޓްތައް، މިއީ ހަމަ މުޅިން ޓޯޓަލީ ތަފާތު އިންވެސްޓްމަންޓެއް ގޮތަށް ދާނީ. މިއީކީ ކޮންމެހެން ގެސްޓްހައުސް، ނޫނިއްޔާ މިތާ މިހުންނަ ހޮޓެލް ޕްރޮޕަޓީގެ އޯނަރ އިންވެސްޓްކުރާ ކަމަކަށް ވެގެނެއް ނުދާނެ. ދެން އެޔާއެކީ ކްލަބާއި، ބީޗްހައުސްތަކާ، މިއީވެސް ހަމަ މުޅިން ތަފާތު އިންޓަރގްރޭޓެޑް ޕްރޮޑަކްޓެއްގެ ތެރެއިން ހިންގޭ ތަފާތު މެނޭޖްމަންޓެއްގެ ދަށުން ހިންގާނީ. ކޮމިއުނަލް ސަރވިސަސް މެނޭޖްކުރާނީ، ވިޔަފާރީގެ އުޞޫލުން ވިޔަފާރި ކުންފުންޏަކުން، ނޫނިއްޔާ ކޮންސޯޓިއަމަކުން ކަމުގައިވާކަމަށްވަންޏާ، އެކަން ކުރުމުގައި އެކޮމޮޑޭޝަންގައި އިންވެސްޓްކޮށްގެން އުޅޭ ހޮސްޕިޓޭލިޓީގެ އެހެން ދާއިރާތަކުގައި، މިސާލަކަށް، ޑައިވިން ސްކޫލްގައި، ނޫނިއްޔާ ނައިޓް ސަފާރީގައި، ނޫނިއްޔާ ރެސްޓޯރެންޓްގައި އިންވެސްޓްކޮށްގެން އުޅޭ ފަރާތްތަކުން ވިސްނާކަށް ނުޖެހޭ. މީގެ ބޭނުމަކަށްވަނީ، އަޅުގަނޑަށް ދެއްވާފައި ހުރި ހިސާބުތައް އަޅުގަނޑު ބަލައިލިން. މިއިން ކޮންމެ ތަފާތު މާކެޓަބަލް ކޮންސެޕްޓަކުން އިންޓަރނަލް ރޭޓް އޮފް ރިޓަރން މިއުޅެނީ ގާތްގަނޑަކަށް 15 ޕަސެންޓަށްވުރެ މަތީގައި. އެއީ ހަމަ ވަރަށް އެޓްރެކްޓިވް އިންޓަރނަލް ރޭޓް އޮފް ރިޓަރންއެއް. ކުރަންޖެހޭ އިންވެސްޓްމަންޓްގެ ސައިޒް ކުޑަ. ގާތްގަނޑަކަށް މި ރިޒޯޓް ކޮންސެޕްޓަށްދާ ކަމަށްވަންޏާ މިއީ ރެސްޓޯރެންޓްތަކުގެ ވާހަކައެއް ނޫން. ރެސްޓޯރެންޓް އިންވެސްޓްމަންޓް މިއަށްވުރެ ކުޑަވާނެކަންނޭނގެ. ޓުއަރިޒަމްގެ އެކޮމޮޑޭޝަން ކޮންސެޕްޓަކަށްދާ ކަމަށްވަންޏާ މިދައްކަނީ އަންޑަރ 20 މިލިއަން ޑޮލަރސްގެ ވާހަކަ. އެކަމަކު އަޅުގަނޑުމެން މިއަދު ރާއްޖޭގައި، އެއްރަށެއްގައި ފައިވް ސްޓާރ ޕްލަސް، މި ކެޓަގަރީއަށް މިދާންޖެހެނީ، މާކެޓް ރެޒިލިއަންސް ހޯދުމަށްޓަކައި. މި ދާއިރު މިއުޅެނީ 80 މިލިއަނަށްވުރެ މަތީގައި، އަޅުގަނޑުމެންގެ އިންވެސްޓްމަންޓް މިއުޅެނީ. އެހެންވީމާ، މިދާއިރާއަކަށް އާ ކެޕިޓަލިސްޓުންނަކަށް ޒުވާން ވިޔަފާރި ވެރިންނަކަށް ވަދެވޭނެ ހަމަ އެއްވެސް ފުރްޞަތެއް ނެތް. ރާއްޖޭގެ ޘަޤާފަތާއި ނޫނީ އަޅުގަނޑުމެންގެ ވިސްނުމާ އެހާ ދޯޅުކަމަކަށް މިހާތަނަކަށް ވެފައެއްނެތް، ތަފާތު އެކިއެކި މީހުން ޙިއްޞާވެގެން އުފައްދާ ކުންފުނި، މިތަނުގައި ބޮޑެތި އިންވެސްޓްމަންޓް ކުރިއަށް ގެންދާކަށް. ރާއްޖޭގައި އެންމެ ކާމިޔާބުކަމާއެކީ އުފެދިފައި ހުރި ބްރޭންޑްތައް އުފެދިފައި މިހިރީ ހަމަ ޕްރޮޕަރޓިޝިޕް ގޮތަކަށް. މިސާލަކަށް، ވިލާ ހޮޓެލްސް އަށް ބެއްޔަސް، ޖޭ. ހޮޓެލްސް އަށް ބެއްޔަސް، ސަން ބްރޭންޑިންގ އަށް ބެއްޔަސް، ޔުނިވަރސަލަށް ބެއްޔަސް، މިހުންނަނީ ފެމިލިއަރ މޫނު، ނޫނިއްޔާ ވަކިވަކި ފަރުދުންގެ އިންވެސްޓްމަންޓްތައް. ކޯހިބިޓެއް ނުކުރޭ، ތަފާތު ޚިޔާލުގެ، ތަފާތު ވިޔަފާރިވެރިން ސިންޑިކޭޓް ކޮށްގެން، ކޮންސޯޓިއަމް ހަދައިގެން، ނޫނިއްޔާ ޕާޓްނަރޝިޕް ޑިވެލޮޕްވެގެން ކުރާ ވިޔަފާރި، އެހާ ކާމިޔާބުކަމާއެކީ ކުރެވިފައެއް ނެތް. ހަމައެކަނި އެގޮތުން ފާހަގަކުރަންޖެހޭ، ކާމިޔާބުކަމާއެކީ ކުރެވިފައި ހުރި ތަންތަނަށް ބަލާކަމަށްވަންޏާ، މިސާލަކަށް، ހަމަ ކޮންމެ ކަމެއްގައިވެސް އިސްތިސްނާ އުޅޭނެ. ކްރައުންއަކީ މިކަހަލަ ތަފާތު ރިޒޯޓް އޯނަރ ކުންފުންޏެއް.
އެހެންވީމާ، މިހާރު މި އެސްޓެބްލިޝް ކުރެވޭ ކޮންސެޕްޓްގައި، މިހާރު މިހުޅުވާލެވޭ، ތަޢާރުފް ކުރެވޭ ކޮންސެޕްޓްގައި، އަޅުގަނޑުމެން އިންވައިޓް މިކުރަނީ، އެކިއެކި ކުދިކުދި ވިޔަފާރިތަކާއި، މެދުފަންތީގެ މި ޞިނާޢަތަށް އިންޓްރެސްޓް ހުރި ފަރާތްތަކުން އައިސްފައި، ފައިސާ ޗިޕިންގ ކޮށްގެން، ނޫނިއްޔާ ބޭންކް ފެސިލިޓީގައި ދިޔަ ކަމުގައިވީނަމަވެސް، ފަސޭހަކަމާއެކީ ނެނގޭ ޢަދަދުތަކަށް ބިނާކޮށްގެން، ފަތުރާ ފަތުރުވެރިކަމެއްގެ ގޮތުގައި މިއޮތީ. ދެން ދިވެހިރާއްޖޭގައި މި ކޮންސެޕްޓް، ވަރަށް މުއްސަނދި އާ ކޮންސެޕްޓަކަށް ވެގެން މިދަނީ. އެހެން ނަމަވެސް، އެޔާއެކީވެސް ހަމަ ދަންނަވާލަން ބޭނުންވަނީ، މި ސްޓްރާޓާ ނޫނިއްޔާ ކޮމިއުނަލް ޓުއަރިޒަމް ޑިވެލޮޕްމަންޓަކީ، ދުނިޔޭގައި މުޅިން ކަމެއް ނޫން. ދުނިޔޭގައި މިހާރުވެސް އެބަހުރި. މިސާލަކަށް، އޮސްޓްރޭލިއާއަށް ބަލާކަމަށްވަންޏާ ސްޓްރާޓާ، މިއީ ޓުއަރިޒަމް ޑިވެލޮޕްމަންޓް، ނޫނީ ކޮމިއުނަލް ޓުއަރިޒަމް ޑިވެލޮޕްމަންޓަކީ، ހަމަ ކާމިޔާބުކަމާއެކީ ހިނގާ ކަމެއް. ދިވެހިރާއްޖެއަށް މިއަންނަނީ އޭގެ މޮޑިފައިޑް އޭގެ އާ ވަރޝަނެއް މިއަންނަނީ. މުޅިން އާ ކޮންސެޕްޓަކާއެކީ މިއަންނަނީ. މީގެ ފަސޭހަކަން، ނޫނިއްޔާ މީގެ ތަނަވަސްކަން ލިބިގެން މިދަނީ އެންމެ ފަރުދަކަށެއް ނޫން. މިކަހަލަ ކޮންމެ ކަމެއް ކުރާއިރު، އަޅުގަނޑުމެންގެ މިއަދުގެ ސަރުކާރުގެ، އަޅުގަނޑުމެންގެ އިކޮނޮމިކް ޓީމުގެ އަދި ޕީ.ޕީ.އެމް. ސަރުކާރުގެ އަމާޒަކަށްވެފައި މިއޮތީ، ގިނަބަޔަކަށް ވަޒީފާގެ ފުރްޞަތު ތަނަވަސްކޮށްދިނުން. މިސާލަކަށް، މިރަށުން އެކަނި، މިރަށުގެ 2000 އެނދުގެ ކޮންސެޕްޓްގެ ތެރެއިން އެކަނި 4000 ނޫނީ 4500 ވަޒީފާ އުފެދިގެންދާނެ. އެއީ، ހަމަ ޑިރެކްޓް ޖޮބް އޮޕަރޗުނިޓީޒް. އެކަމަކު މިޔާއެކީ މިއަންނަ ސަޕޯޓް ސަރވިސަސްއާއި، ލިންކޭޑް އިންޑަސްޓްރީއަށް ބަލާކަމަށްވަންޏާ، މީގެ ވަޒީފާގެ އަދަދު އެތައް ތަނެއް އިތުރުވެގެންދާނެ.
މިރޭވެސް އަޅުގަނޑު ސިނިކްސް އަށް ދަންނަވާލަން އޮތް ވާހަކައަކީ، ސަރުކާރަށް ކުރެވޭނެ މަސައްކަތަކީ، އިންޑަސްޓްރީއަށް ކުރެވޭނެ މަސައްކަތަކީ، ވަޒީފާގެ ފުރްޞަތު ތަނަވަސްކޮށްދިނުމޭ. އެކަމަކު ވަޒީފާ އަދާކުރަން ތިބި ބައެއްގެވެސް އެވަރުގެ ކެރުންތެރިކަމެއް، ވަޒީފާއަށް ނުކުތުމަށް ހޭލުންތެރިކަމެއް ހުންނަންވާނެ. ވަޒީފާގެ ފުރްޞަތު ތަނަވަސްކޮށްދިނުމަށް ސަރުކާރުން އެތަކެއް މަސައްކަތްތަކެއް އެބަކުރޭ. އަދި އިރާދަކުރެއްވިއްޔާ، އަޅުގަނޑުމެންގެ މެނިފެސްޓޯގައި ކޮމިޓްކޮށްފައި އޮތްގޮތަށް، ވަޒީފާގެ ފުރްޞަތު ހޯދުމުގެ މަސައްކަތް، އަޅުގަނޑުމެންގެ މި 5 އަހަރުގެ ދައުރުގެ ތެރޭގައި، އަޅުގަނޑުމެން ކުރާނަން.
މި ކޮންސެޕްޓް އައުމާއެކީ، އަޅުގަނޑުމެންނަށް ދެން ފެނިގެން މިދަނީ، މި ކޮންސެޕްޓްގެ އެޑްވާންޓޭޖަކަށް މިދެންނެވެނީ، ޒުވާން ވިޔަފާރިވެރިންނަށް ޖާގަ ލިބިގެން ދިޔުން. ދެންމެ މިނިސްޓަރ ސަޢީދު، އެ ކަށަވަރުކަން ދެއްވީ، އެޝުއަރެންސް ދެއްވީ، އެސް.އެމް.އީޒް އަށް މިހާރު އިކޮނޮމިކް މިނިސްޓްރީއަށް ލިބިފައި ހުރި ފެސިލިޓީގެ ތެރެއިން މިކަންތަކަށް ކުރިމަތިލާ މީހުންނަށް އިސްކަން ދެއްވާނަމޭ. އެސް.އެމް.އީޒް އަށް މި އިސްކަން ދެއްވާ ދެއްވުމުގައި، އަޅުގަނޑަށް މިހާރުވެސް އެނގިފައި އޮތް ގޮތުން ވެއްޖިއްޔާ، އެ މިނިސްޓްރީގައިވެސް، އަދި ފިޝަރީޒް އެންޑް އެގްރިކަލްޗަރ މިނިސްޓްރީގައިވެސް މި ލޯނު ދޫކުރުމަށް ގެންގުޅުއްވާ ސްކީމްގައި، އަންހެން އޮންޓްރަޕްރިނަރުންނަށް އިސްކަން ދެއްވައި، ޒުވާން ކެޕިޓަލިސްޓުންނަށް އިސްކަން އެބަ ދެއްވާ. އެހެންވީމާ، އަޅުގަނޑުމެންގެ މި މަޝްރޫޢުވެސް ހާމަވެގެންދާއިރު، ފެތުރިގެންދާއިރު، މި ވިޔަފާރިއަށް ނުކުންނަ ޒުވާން އިންޑަސްޓްރިލީޒުންނަށް ނޫނީ އޮންޓަރޕްރިނަރުންނަށް އިސްކަން ލިބޭނެ. ހަމައެހެންމެ، ވިޔަފާރީގެ ދާއިރާއަށް މި ޝައުޤުވެރިކަން ހުންނަ އަންހެން ބޭފުޅުންނަށްވެސް އިސްކަން ދެވޭނެ.
ޓުއަރިޒަމްގެ ޞިނާޢަތަކީ، އަންހެން އޮންޓްރޕްރިނަރުން އެ ޞިނާޢަތުން ނުފެންނަންވީ ޞިނާޢަތެއް ނޫން. މިގޮތަށް ސްޓްރާޓާ ޓުއަރިޒަމަށްދާ ކަމަށްވަންޏާ، މި ކޮންސެޕްޓްގެ ތެރެއިން އިންޓަރގްރޭޓެޑް ވުމަށް އަންހެނުންނަށްވެސް، ޒުވާނުންނަށްވެސް ފަންކްޝަނަލީ އިންޓަރގްރޭޓްވުމުގެ ފުރްޞަތު ހަމަ ތަނަވަސްވެގެން އެބަދޭ. އެހެންވީމާ، އަޅުގަނޑު ދަންނަވާނީ އިރާދަކުރެއްވިއްޔާ، ﷲގެ ރަޙްމަތާއެކީ، މި ފެށޭ، މި ލޯންޗް ކުރެވޭ ޕްރޮޖެކްޓަކީ، އޭގެ ޒާތުގައި ވަޔަބަލް، އަދި އޭގެ ޒާތުގައި ކާމިޔާބު މަޝްރޫޢަކަށް ވެގެންދާނޭ.
އަޅުގަނޑުމެން މި ފަށަނީ ހައްދުންމަތިން. އެކަމަކު އެޔާއެކީ މި މަޝްރޫޢު ފެތުރިގެންދާނެ، ރާއްޖޭގެ އެކިހިސާބުތަކަށް. އަތޮޅުތެރޭގެ އެކިހިސާބުތަކަށް ދާނެ. އެހެންވީމާ، އަޅުގަނޑުމެންގެ ޓުއަރިޒަމް އިންޑަސްޓްރީ، ދެން ބިނާވެފައި އޮންނާނީ، މިހާރު މިއޮންނަ ގޮތަކަށް، ވަން އައިލެންޑް ރިޒޯޓް ކޮންސެޕްޓަކަށެއް ނޫން. އެޔާއެކީގައި، މިދެންނެވި ފްލޭވަރ، ނޫނިއްޔާ މިދެންނެވި ޕްރޫލަރިޓީ އަޅުގަނޑުމެންގެ ޓުއަރިޒަމް އިންޑަސްޓްރީން ފެނިގެންދާނެ. މިކަންކަމުގެ ބޭނުމަކަށްވަނީ، އާޚިރު ބޭނުމަކަށްވާނީ، އަޅުގަނޑުމެން ވިސްނާފައި އޮތް ގޮތުން ވެއްޖިއްޔާ، ވަޒީފާގެ ފުރްޞަތު އިތުރުވުމާއެކީ، އެތައް ބައިވަރު ދިވެހި އާ ޒުވާނުންނެއް، އިޤްތިޞާދުގެ ތަނަވަސްކަމުގައި، ކުރިއަށް ދިޔުމުގެ ފުރްޞަތު، ނޫނިއްޔާ ޕަޔަރނިއަރ ކުރަން ފުރްޞަތު ލިބުމާއެކީ، 5 އަހަރުގެ ދައުރެއް ނިމިގެންދާއިރު، އަޅުގަނޑުމެންގެ ޕަރ ކެޕިޓަލް ޖީ.ޑީ.ޕީ އިންކަމް މިހާރު އޮތްވަރުން ދެގުނަ އިތުރުވެގެން ދިޔުން. މިއީ، އަޅުގަނޑުމެން އަންދާޒާކުރާގޮތް. ﷲގެ ރަޙްމަތާއެކީ ދިވެހިރާއްޖޭގައި މިހާރު މިއޮތް ހަމަޖެހުން ދެމެހެއްޓި، އަދި ސިޔާސީގޮތުން މިކުރެވޭ މަސައްކަތުގައި، އިރާދަކުރެއްވިއްޔާ ސިޔާސީ ޕާޓީތަކުންވެސް އަދި ޕޮލިޓިކަލް ރެޓްރިކް ކިތަންމެވަރަކަށް ދިޔަނަމަވެސް، އަޅުގަނޑުމެން މިކުރާ މިކަހަލަ ތަރައްޤީގެ މަޝްރޫޢުތަކުގައި، ރައްޔިތުންގެ މަޖިލީހުގެ ތެރެއިން ހުރިހާ ޕާޓީތަކުން އެއްބާރުލުން ލިބޭ ކަމަށްވަންޏާ، އަޅުގަނޑުމެންނަށް، އަޅުގަނޑުމެންގެ މި ކޮންސެޕްޓްތައް ކާމިޔާބު ކުރެވޭނެ.
މި ކޮންސެޕްޓްގައިވެސް އެންމެ މުހިންމު ކަމަކަށް މިވަނީ، ހަމަ އެކަށީގެންވާ މުއްދަތެއް ލިބިގެންދިޔުން. މިއިން ކޮންމެ ކޮންސެޕްޓެއް މިވަނީ، ދެންމެ މިނިސްޓަރ ސަޢީދުގެ ވާހަކަފުޅުގައި އެފާހަގަކުރެއްވި ގޮތުން، ޚާއްޞަ އިޤްތިޞާދީ ސަރަޙައްދަކަށް. އަޅުގަނޑުމެންގެ ޓުއަރިޒަމްގެ ރަށްތައް ފެށިގެން އައިސް، ތަރައްޤީކޮށްފައި މިވަނީވެސް ކޮންމެ ރަށަކަށް ބޭނުންވާ ޓޯޓަލް ޑިއުޓީ ފްރީ ޕެކެޖް ދީފައި. ޓެކްސް އެގްޒެމްޕްޝަން ދީފައި. އަދި އެތަންތަނަށް މުދާ ގެންދިޔުމުގެ ފަސޭހަކަމެއް ދީފައި. އަދި އެތަންތަނަށް ބޭނުންވާ އެހެން ވަސީލަތްތަކުގެ ފަސޭހަ ކަންތައްތަކެއް ދީފައި. ސްޕެޝަލް އިކޮނޮމިކް ޒޯންގެ ބެކްބޯނަކީވެސް ޙަޤީޤަތުގައި ޢާންމުކޮށް ސަރުކާރެއްގައި، ޢާންމުކޮށް ދައުލަތެއްގައި ޢަމަލުކުރާ އުޞޫލާ ތަފާތުކޮށް، އިސްތިސްނާތަކެއް އެ ފާހަގަކުރެވޭ ސަރަޙައްދަކަށް ދިނުން. އޭގެ ޓެކްސް ރެޖީމުގެ ތެރޭގައި ނޫނީ ފިޒިކަލް ޕޮލިސީސްގެ ތެރޭގައި، ޓެކްސް އެޑްމިނިސްޓްރޭޝަނުން ޢަމަލުކުރާގޮތް، އިމްޕޯޓް އެކްސްޕޯޓް ކުރުމަށް، ނޫނިއްޔާ ޓެކްސް ފޭސް ދިނުމަށް މިއީ އެންމެ ބޮޑަށް ހިމެނޭ ކަންކަން. އަޅުގަނޑުމެންގެ އައިހޭވަން ޕްރޮޖެކްޓް މި ވެގެންދަނީ، މީގެ އެންމެބޮޑު މަޝްރޫޢަށް. އެކަމަކު އެޔާއެކީ އަންނަންހުރީ ހަމަ މިކަހަލަ ތަފާތު މަޝްރޫޢުތައް. އައިހޭވަންއެއް ނޫން. މިދެންނެވި ގޮތަށް އިންޓަރގްރޭޓެޑް އިކޮނޮމިކް ޕްރޮޖެކްޓްތަކެއް. އެކަމަކު މިކަންކަން އަޅުގަނޑުމެންނަށް ކުރެވެން މި އަންނަނީ، މިދެންނެވި ގޮތަށް ޚާއްޞަ އިޤްތިޞާދީ ސަރަޙައްދުތަކެއް ޤާއިމުކުރުމަށް.
މިހާރު އޮތް ޤާނޫނަށް މި އަންނަނީ ހަމަ ބޮޑު ބަދަލެއް. މިހާރު އޮތް ޤާނޫނުގައި މިއޮންނަނީ އެންމެ ފޮޅުވަތެއް. ރައީސުލްޖުމްހޫރިއްޔާ ކަނޑައަޅާ ތަންތަނެއްގައި، ދިވެހިރާއްޖޭގެ ޚާއްޞަ އިޤްތިޞާދީ ސަރަޙައްދުތަކެއް އުފެއްދިދާނޭ. އުފެއްދުމަށް ބޭނުންވާ ޤަވާޢިދު ހެދުމުގެ ބާރު، ރައީސުލްޖުމްހޫރިއްޔާއަށް އެބަ ލިބޭ. އެހެން ނަމަވެސް، ބޮޑެތި މަލްޓި މިލިއަން ޑޮލަރު އިންވެސްޓްމަންޓް ރާއްޖެއަށް ގެންނަ ކަމަށްވަންޏާ، މިއީކީ އަޅުގަނޑުމެންނަށް ފުއްދާލެވޭނެ ކަމެއް ނޫން. އެންމެ ކުޑަމިނުން ޤާނޫނުއަސާސީގައި އެބުނާގޮތަށް، 99 އަހަރު ނޫނީ ފްރީ ހޯލްޑެއްގެ ޓެނުއަރ އެބަ ލިބެންޖެހޭ. މީގެ ބޭނުމަކަށްވަނީ، މިހާރު މިހިނގާ ރިޒޯޓްތަކުގައިވެސް އިންވެސްޓްމަންޓްގެ ރިޓަރން 12 އަހަރު ފަހުން ލިބޭ ބޮޑެތި ރިޒޯޓްތައްވެސް އެބަހުރޭ. ނޫނީ އެއަށްވުރެ ފަހު މުއްދަތެއްގައިވެސް ލިބޭ ރިޒޯޓްތައް އެބަހުރި. އަޅުގަނޑުމެންނަށް ދިގު މުއްދަތެއް ދެވޭކަމަށްވަންޏާ، ފުރަތަމައިނުންވެސް އެމީހުންގެ ކެޕިޓަލް ސްޓްރަކްޗަރ، ނޫނިއްޔާ ލެވްރެޖް ކުރުމަށް ބޮޑެތި ބަދަލުތަކެއް ގެނައުމަށް ބޯޑްރޫމްތަކުގައި ނިންމަން ފަސޭހަ އެބަވޭ. އެހެންވީމާ، އަޅުގަނޑުމެން ޚިޔާލު މިކުރަނީ، ﷲގެ ރަޙްމަތާއެކީ ސްޕެޝަލް އިކޮނޮމިކް ޒޯންގެ ބިލް، މަޖިލީހުން މެންބަރުން ފާސްކޮށްދެއްވާނެކަމާ ދޭތެރޭގައި އަޅުގަނޑުގެ ހިތުގައި ޝައްކުކަމެއް އުފެދޭތީކީ ނޫން. ފާސްކޮށްދެއްވާނެ އިރާދަކުރެއްވިއްޔާ. އެއީ އަޅުގަނޑުމެން ތަރައްޤީއަށް ކުރާ މަސައްކަތް. އެޔާއެކީ ހަމަ އޭގެ ބެނެފިޓް މިހާރު ޓޫރިޒމް އިންޑަސްޓްރީއަށް، އެގްޒިސްޓިންގ ޞިނާޢަތަށްވެސް ލިބިގެންދާންވާނެ ކަމަށް. މިހާރު ހުރި ރަށްރަށުގެ މުއްދަތުވެސް ދިގުކުރެވޭނޭ ފޯމިއުލަރތަކަކަށް މިހާރު ޓުއަރިޒަމް މިނިސްޓްރީއާއެކީ މަސައްކަތް ކުރެވެމުން ދަނީ. މިކަންކަމުގެ ބޭނުމަކަށްވާނީ، ދިވެހިރާއްޖޭގައި އިންވެސްޓްކުރާ ބޭރުގެ ފަރާތްތަކަށްވެސް ކަށަވަރުކަން ދިނުން. އިތުބާރާއި ޔަޤީންކަން ދިނުން. އަދި ހަމައެހެންމެ، ދިވެހި ޞިނާޢަތުގައި ކުރިއަށްދާން ބޭނުންވާ މިހާރު އެގްޒިސްޓްވާ އޮންޓަރޕްރިނަރުންނަށް އަދި އަލަށް މިދާއިރާއަށް ނުކުންނަން ބޭނުންވާ ޒުވާނުންނަށްވެސް ހިތްވަރުދިނުމާއެކީ ކަށަވަރުކަން ދިނުން.
ސިޔާސީގޮތުން މިއޮންނަ ހަމަޖެހުން، ދެމިގެން މިދަނީވެސް ހަމަ މިބޭނުމަށްޓަކައި. އަޅުގަނޑުމެން ބޭނުމެއްނުވޭ، ކުރީގައި ހުރި މައްސަލަތައް ނަގާ ބަލާކަށެއް. އެއީ، އަޅުގަނޑުމެން ކުރާނެ ކަމެއް ނޫން. އޭގެ ޒާތުގައި އެކަންކަން ތަޙުޤީޤުކުރާ ބަޔަކު، ނޫނިއްޔާ ޤާނޫނުއަސާސީއިން މެންޑޭޓްކޮށްފައި އޮތް ބަޔަކު ކުރާ މަސައްކަތެއް ކުރާނެ. އެކަމަކު ސަރުކާރުގެ އިންޓްރެސްޓްގައި އޮތް ކަމެއް ނޫން، ސަރުކާރުން ޕުޝްކޮށްގެން މިކަންކަން ކުރުން މިއީކީއެއް. އަޅުގަނޑުމެންގެ ސަރުކާރުން، ޚާއްޞަކޮށް، އަޅުގަނޑުމެންގެ އިޤްތިޞާދީ ޓީމުގައި މަސައްކަތް ކުރައްވާ އިކޮނޮމިކް ކައުންސިލްގެ މިނިސްޓަރުންނާއި އަދި އަޅުގަނޑުމެންގެ ދެން ތިއްބެވި އެހެން ވަޒީރުންގެވެސް އެންމެބޮޑު މަޝްރޫޢަކީ، އެންމެބޮޑު ވިސްނުމަކަށް މިއޮތީ، މި 5 އަހަރުގެ ތެރޭގައި ރައްޔިތުންނަށް އަޅުގަނޑުމެން ގެނެސްދޭން ބޭނުންވަނީ، ރައްޔިތުންނަށް ބޭނުންވާ ތަރައްޤީ. އެ ތަރައްޤީ އަންނަން ބޭނުންވަނީ، ދިވެހިރާއްޖޭގެ އިޤްތިޞާދު މިހާރު މިއޮތް މަރްޙަލާއިން ނޫނީ މިހާރު މިއޮތް ފަށަލައިން އެހެން ފަށަލައަކަށް ގޮސްގެން. އަޅުގަނޑުމެންގެ އިޤްތިޞާދު ދެގޮތަކަށް ކުރިއަށް ދާން އޮންނާނެ. ދެން އަޅުގަނޑު މިވާހަކަ މިދަންނަވަނީ، އެއްގޮތަކަށްވެސް ވާހަކަ ދިގުކުރާކަށްވެސް ނޫން. އެއްގޮތަކީ މިހާރު މިދާ ސްޕީޑްގައި، ކޮންމެ އަހަރެއްގައި އެނުއަލް ގްރޯތެއް، އިންކްރިމަންޓަކާއެކީ ކުރިއަށް ދިޔުން. އެއީ، އޭގެ ޒާތުގައި ޠަބީޢީގޮތުން އަންނަ ގްރޯތް. އަނެއް ގްރޯތަކީ އޭގެ ޒާތުގައި ސަރުކާރުގެ ޕޮލިސީން ޑިރެކްޓްކުރާ ގްރޯތް. އޭގެ މާނައަކީ، އިކޮނޮމީ އެ ޓަޔަރުގައި އުޅޭ ކަމަށްވަންޏާ، އެ ޓަޔަރުގައި ކުރިއަށްދާއިރު، ހޮރިޒޯންޓަލީ ދިޔުމުގެ ބަދަލުގައި، އެހެން ޓަޔަރަކަށް ބަދަލުވެ ވަރޓިކަލީ މައްޗަށްދިޔުން. އޭރުން ޖީ.ޑީ.ޕީ އިތުރުވެގެންދާނީ. އެހެންވީމާ، އެމަސައްކަތް ކުރުމަށްޓަކައި މިކަހަލަ ބޮޑެތި މަޝްރޫޢުތަކާއި އަދި އަޅުގަނޑުމެންގެ މެނިފެސްޓޯގައި ހިމަނާފައި އެހެރަ ބޮޑެތި މަޝްރޫޢުތައް ހިމަނާފައި މިއޮތީ. އިޤްތިޞާދު މިހާރު އުޅޭ ލެވެލުން ޑައިވަރސިފައި ކުރުމަށް އަދި އެ ޑައިވަރސިފައި ކުރުމުގެ ނަތީޖާއަކަށް ވެގެންދާނީ، އިޤްތިޞާދު މިހާރު މިއޮތް މަރްޙަލާ، ހަރުފަތުން، ފަށަލައިން މުޅިން އެހެން ފަށަލައަކަށް ދިޔުން. އެނޫން ގޮތަކަށް އަޅުގަނޑުމެންގެ ޖީ.ޑީ.ޕީ ޑަބަލް ކުރެވޭނެ ގޮތެއް ނޯންނާނެ. އަދި އެނޫންގޮތަކަށް އަޅުގަނޑުމެންނަކަށް އަޅުގަނޑުމެން އުންމީދުކުރާ ގޮތަކަށް، ލައްކައަކާ ކައިރި ޢަދަދަކަށް ވަޒީފާއެއް ނުއުފެއްދޭނެ.
މި ކޮންސެޕްޓް މިހެން އައިމަ، އަޅުގަނޑަށް އެނގޭ، ޝައްކެއްވެސްނެތްގޮތުގައި، ހައްދުންމަތީގެ ޢިއްޒަތްތެރި މެންބަރުން އުފާފުޅުވާނެ. އެކަމަކު އަޅުގަނޑު ށ. އަތޮޅުގެ މެންބަރުންނަށްވެސް ދަންނަވާލަން ބޭނުންވަނީ، ށ. އަތޮޅަށްވެސް ހަމަ މި މަޝްރޫޢު ހަމަ މިގޮތަށް ދާނެއޭ. ށ. އަތޮޅަކީ މިވަގުތު ޓުއަރިޒަމް އެހާ ދޯޅު ތަނެއް ނޫން. އެހެން ނަމަވެސް، އަޅުގަނޑުމެންގެ ސަރުކާރުގައި މި ދޫކުރަން ޚިޔާލުކޮށްފައި އޮތް 50 ރަށަށް ބަލާކަމަށްވަންޏާ، އެއީ އަދި މި ކޮންސެޕްޓް ނުހިމަނާ. 50 ރަށަށް ބަލާކަމަށްވަންޏާ، އަޅުގަނޑު ހަނދާންވާ ގޮތުން ވެއްޖިއްޔާ، ހއ. ހދ. ށ. އަށް އޭގެތެރެއިން 17 ރިޒޯޓް، މި 3 އަތޮޅުން ހުޅުވިގެންދާނެ. އެޔާއެކީ މި ކޮންސެޕްޓް އައިމަ، މިދަންނަވަނީ، މިދައްކަނީ ވަރަށްބޮޑު ވަޒީފާގެ ފުރްޞަތުތައް އިތުރުވެގެންދާ ވާހަކަ. ހަމަ މިކަމާއެކީ، ﷲގެ ރަޙްމަތާއެކީ އަޅުގަނޑުމެންނަށް ދިވެހިރާއްޖޭގެ އިޤްތިޞާދުގެ ދުވެއްޔާއި ސިޔާސީ ހަމަޖެހުން، މިއޮތްގޮތް މަތީގައި ދެމެހެއްޓިއްޖެ ކަމަށްވަންޏާ، އައިހޭވަން ޕްރޮޖެކްޓާއި، އަދި މިނޫން އެހެން ބޮޑެތި އިންޓަރގްރޭޓެޑް ޕްރޮޖެކްޓް އަންނަން މިއޮތީ. އެހެންވީމާ، މިކަންކަން އޮތީ ރައްޔިތުންގެ މަޖިލީހުގެ މެންބަރުންގެ އަތްޕުޅުމަތީގައި. މިކަންކަން އޮތީ ދިވެހި ޢާންމު ރައްޔިތުންގެ އަތްޕުޅުމަތީގައި. ހަމަޖެހުމާއެކީ އިޤްތިޞާދު ކުރިއަށްދާ ކަމަށްވަންޏާ، ކުރިއަށް ގެންދެވޭ ކަމަށްވަންޏާ، ސިޔާސީގޮތުން މިއޮންނަ ހަމަޖެހުމުގެ ތެރޭގައި، އިޤްތިޞާދީ ދުވެއްޔަކީ ހިފެހެއްޓުމެއްނެތި މަޑުޖެހުމެއްނެތި ކުރިއަށްދާނެ ދުވެލި.
އަޅުގަނޑު ހަމަ އުފަލާއެކީ މިރޭވެސް ފާހަގަކޮށްލަން ބޭނުންވޭ، އަޅުގަނޑާއެކީ މަސައްކަތް ކުރައްވާ، މި ސަރުކާރުގައި މަސައްކަތް ކުރައްވާ އިކޮނޮމިކް ޓީމް އަދި އިޖްތިމާޢީ ޓީމަކީ، ޓީމްގައި ތިއްބެވި ވަޒީރުންނަކީ ހަކަތަހުރި، މިކަންކަން ކުރައްވަން ޝައުޤުވެރިކަން ހުރި ބޭފުޅުންތަކެއް. އެހެންވީމާ، އެބޭފުޅުންގެ މަސައްކަތްޕުޅު ނުހުއްޓުވައި ކުރިއަށް ގެންދާ ކަމަށްވަންޏާ، ހަމަ އަޅުގަނޑު ދަންނަވާނީ ހަމަ ވަރޓިކަލް ޓޫރިޒަމް ގޮތުގައި ދަ ސްކައި އިޒް ދަ ލިމިޓޭ. އިރާދަކުރެއްވިއްޔާ، ﷲގެ ރަޙްމަތާއެކީ އަޅުގަނޑުމެން ދާން ބޭނުން ބާރުމިނުގައި އަޅުގަނޑުމެން ދިޔުމުގެ ފުރްޞަތު ތަނަވަސްކޮށްދެއްވާށޭ. އެއީ، ދިވެހި ރައްޔިތުންގެ އަތްޕުޅުމަތީގައި އޮތް ކަމެކޭ. ރައްޔިތުން ތަމްސީލު ކުރައްވަން ތިއްބެވީ ރައްޔިތުންގެ މަޖިލީހުގެ މަންދޫބުން. މިހާރު އެބޭފުޅުންގެ ކުރިފުޅުމައްޗަށް ހުށަހެޅިފައި އޮތީވެސް މިކަހަލަ ބިލެއް.
އިޤްތިޞާދީ ކުރިއެރުމުގެ ވާހަކަ ދައްކާއިރު، ހަމަ އުފާވެރި ޚަބަރެއްވެސް ހަމަ ދަންނަވާލާފައި އަޅުގަނޑު ވާހަކަ ނިންމާލާނީ. އަޅުގަނޑުމެންގެ ޢަޒުމަކީ ހަމައެކަނި އިޤްތިޞާދު ކުރިއަށް ގެންދިޔުމެއް ނޫން. ޝައްކެއްވެސްނެތްގޮތުގައި ވެއްޖިއްޔާ މިއީ ހަމަ ތަފާތުކުރުމެއްނެތި، އަޅުގަނޑުމެންގެ ސަރުކާރުގެ އެންމެ އިސް ވިސްނުން. އިޤްތިޞާދު ކުރިއަށް ގޮސްގެން، އޭގެ ރާޙަތް، ދިވެހި ޢާންމު ފަރުދުންނާ ހަމަޔަށް ހާމަވެގެން ދިޔުން. އަދި އަތޮޅުތެރޭގެ ރަށްރަށަށް މި ތަރައްޤީ ފެތުރިގެން ދިޔުން. ރާއްޖޭގެ ޓުއަރިޒަމް ފުރަތަމަ ފެށިފައި މިއޮންނަނީ، މީހުން އުޅޭ ރަށްރަށުން ޓުއަރިޒަމުން މުޅިން ދުރުވާނެ. އަދި ވަކި ޒޯންތަކަކަށް ޓުއަރިޒަމް ގޮސްގެން. ވަކި ޒޯންތަކަށް ޓުއަރިޒަމް ޚާއްޞަވެގެން. މިއަދުގެ ތަފާތަކީ މީހުން އުޅޭ ރަށްރަށާ ހަމަޔަށް އަޅުގަނޑުމެން މި ޓުއަރިޒަމް ގެންދަނީ. އަޅުގަނޑުމެންގެ މި ގެސްޓްހައުސް ޓުއަރިޒަމަކީ އެއްގޮތަކަށްވެސް ވަކިވަކި ގޭގޭގައި ގެސްޓްހައުސް ހަދާ ވާހަކައެއް ނޫން. އެއަށްވުރެ ބްރޯޑަރ އިންޓަރގްރޭޓެޑް ކޮންސެޕްޓެއްގެ ތެރެއިން މި ހަދާ ޓުއަރިޒަމް، މިއީ ޙަޤީޤަތުގައި މަޢުނަވީ ގޮތުގައި އާމްދަނީ ލިބޭނެ ކަމަކީ. މިއީ ޙަޤީޤަތުގައި މަޢުނަވީ ގޮތެއްގައި އަޅުގަނޑުމެން ޙާޞިލުކުރަން މިއުޅޭ ވަޒީފާގެ ފުރްޞަތުތައް އިތުރުވެގެންދާނެ ގޮތަކީ.
އަޅުގަނޑު ދަންނަވާލަން އޮތް އިޖްތިމާޢީ ދާއިރާގައި އޮތް ވާހަކައަކީ، ދިވެހިރާއްޖެ މިދޭތެރެއިން މިވަނީ ހިއުމަން ޓްރެފިކިންގގެ މައްސަލައިގައި، ޔޫ.އެސް.ގެ ސްޓޭޓް ޑިޕާޓްމަންޓްގެ ވޮޗް ލިސްޓްގައި ހިމަނާފައި. އެކަމަކު ﷲގެ ރަޙްމަތާއެކީ، މި ނިމިގެންދިޔަ މަޖިލީހުގައި ހިއުމަން ޓްރެފިކިންގއާބެހޭ ބިލް އަޅުގަނޑުމެން ފާސްކުރުމާއެކީ އަދި ސަރުކާރުގެ ތެރެއިން މިކަން ހުއްޓުވުމަށް ނޫނީ މިކަމާ ދެކޮޅަށް ކުރެވިފައި ހުރި މަސައްކަތްތަކުގެ ނަތީޖާއަކަށްވެގެން މިދިޔައީ، މިއަދު އަޅުގަނޑުމެން މިވަނީ ސްޓޭޓް ޑިޕާޓްމަންޓްގެ ހިއުމަން ޓްރެފިކް ވޮޗް ލިސްޓުން އަޅުގަނޑުމެން އުނިކޮށްފައި. މިއީ ޝައްކެއްވެސްނެތްގޮތުގައި، ދިވެހިރާއްޖެއަށް ހަމަ ލިބުނު ވަރަށް ވަރުގަދަ ކުރިއެރުމެއް. މީގެ ބޭނުމަކަށް، މީގެ ނަތީޖާއަކަށް ވެގެންދާނީ، ދިވެހިރާއްޖެއަށް އެކިއެކި އެކްސްޕެޓްރޭޓުން އައިސްގެން މަސައްކަތްކުރާ ކުރުމުގައި، އަޅުގަނޑުމެން ރެގިއުލޭޓް ކުރާއިރު، ކަށަވަރުކަން އެބަ ލިބޭ، އިރާދަކުރެއްވިއްޔާ، ހަމައެކަނި އަޅުގަނޑުމެންގެ މިއޮންނަ އިޤްތިޞާދީ މަސައްކަތާ، މިކަންކަމަށް އެކަންޏެއް ނޫނޭ. ހިއުމަން ޓްރެފިކިންގ ކަހަލަ އެކްސްޕްލޮއިޓިޓިވް އިންސާނުންގެ ކަރާމާތް ގެއްލޭފަދަ އެކްސްޕްލޮއިޓިޓިވް ކަންތައްތަކަށް ދިވެހި ސަރުކާރު ހުޝިޔާރުކަމާއެކީ އެކަންކަން ކުރާ ކަމުގެ މެސެޖް، މި ލިބިގެންދަނީ. މިހުރިހާ ކަމެއްގެ ބޭނުމަކަށްވާނީ، ދިވެހިރާއްޖެއަކީ ހިއުމަން ރައިޓްސްއަށް އިޙްތިރާމްކުރާ ޤައުމަކަށްވުމުގެ ނަން އެކަންޏެއް ނޫން. ޢަމަލީގޮތުން އެކަން ދައްކައިދޭކަން މުޅި ދުނިޔެއަށް ހާމަވެގެން މިދަނީ.
އެހެންވީމާ، ﷲގެ ރަޙްމަތާއެކީ އިރާދަކުރެއްވިއްޔާ މިކުރެވޭ މަސައްކަތުގައި، ދިވެހިރާއްޖެ ކުރިއަށްދިޔުމުގެ ފުރްޞަތު އެބައޮތް. އަޅުގަނޑުމެން މި ފުރްޞަތު ކުރިއަށްދާއިރު، ސިޔާސީ ލީޑަރުންގެ އަތްޕުޅުމަތީގައި، ރައްޔިތުންގެ މަޖިލީހުގެ މެންބަރުންގެ އަތްޕުޅުމަތީގައި އަދި ސިޔާސީ ޕާޓީތަކުގައި، އެކިއެކި ކޮމިޓީތަކުގެ އަތްޕުޅުމަތީގައި އޮތީ ދިވެހިރާއްޖޭގައި މިއޮތް ޞުލްޙަ، ރައްޔިތުންނަށްޓަކައި ތަރައްޤީއަށް މަގުފަހިކޮށްދިނުމަށްޓަކައި ޞުލްޙަ ދެމެހެއްޓުން. އެ ޞުލްޙަ ދަމަހައްޓައިގެން އަޅުގަނޑުމެން މިކަން ކުރާ ކަމަށްވަންޏާ، އިރާދަކުރެއްވިއްޔާ، ﷲގެ ރަޙްމަތާއެކީ، އިޤްތިޞާދީ ތަރައްޤީ އަޅުގަނޑުމެން ހަމަ ކޮންމެ ފަރުދަކާ ހަމަޔަށް އައުމަކީ ކައިރީގައި އޮތް ކަމެއް.
އަޅުގަނޑުގެ ވާހަކަކޮޅު ނިންމާލާނީ، ތިޔަބޭފުޅުން މި އިޙްތިފާލަށް ވަޑައިގެން، އަޅުގަނޑުމެންގެ މި މަޝްރޫޢަށް މި ދެއްވާ ތާއީދަށް، ސަމާލުކަމަށް ހަމަ ޝުކުރު ދަންނަވަމުން. ހަމައެޔާއެކީ، އަޅުގަނޑުމެން ދިވެހިރާއްޖޭގެ އިޤްތިޞާދީ މަސައްކަތްތައް، އާ އުސްމިންތަކަކަށް ގެންދިޔުމަށް މިކުރާ މަސައްކަތުގައި، ތިޔަބޭފުޅުން މިކަހަލަ ޙަފްލާތަކުގައި ބައިވެރިވެވަޑައިގަތުމަކީ، ތިޔަބޭފުޅުން މިއަށް ތާއީދު ކުރައްވާކަން ރަމްޒުކޮށްދޭ ކަމަކަށްވާތީ، އެކަންކަމަށްޓަކައި ތިޔަ އެންމެހާ ބޭފުޅުންނަށް ޝުކުރު ދަންނަވަމުން، މި މަސައްކަތްތަކަށް ކުރިމަތިލައްވަން އަޅުގަނޑު މި އެދެނީ، ހަމަ ދިވެހި ޒުވާނުންނަށް. އޭގެ މާނައަކީ މިއީ، ހަމައެކަނި ދިވެހި ޒުވާނުންނަށް އޮތް ފުރްޞަތެއް ނޫނޭ. މިއީ ދިވެހި ޒުވާނުން ކުރިއަށް ވަޑައިގަންނަވަން އޮތް ކަމެއް. ދިވެހި ޒުވާނުންނަކީ އަޅުގަނޑުމެންގެ އިޤްތިޞާދުގެ ހަކަތަ. ހަކަތަ އުފައްދައިގެން ނޫނީ އިޤްތިޞާދު ކުރިއަކަށް ނުދާނެ. އެހެންވީމާ، މިއީ ޒުވާނުންނަށް ހުރި ފުރްޞަތުތައް. ޒުވާނުންނަށް ކުރިއަށް ދެވޭނެ. ސަރުކާރުގެ އެކި އިދާރާތަކުން މަސައްކަތް ކުރާނީ، މިކަންކަން ކުރުމުގައި ޒުވާނުންނަށް ބޭނުންވާ ކަންކަން ފަހިކޮށްދިނުމަށްޓަކައި. އެހެންވީމާ، އެއީ އަޅުގަނޑުމެންގެ ހަމަ އޮނަސްޓް ސިންސިއަރ ކޮމިޓްމަންޓް. އަޅުގަނޑުމެންގެ ކޮމިޓްމަންޓާއެކީ އަޅުގަނޑުމެން މިހާތަނަށް ލިވްކޮށްފިން. ކޮމިޓްމަންޓް އަޅުގަނޑުމެން ދައްކައިދީފިން. އެހެންވީމާ، މި ފެށޭ އާ މަޝްރޫޢުގައިވެސް އަޅުގަނޑު ބޭނުންވަނީ، ހަމަ ދިވެހި ޒުވާނުން އިސްނަންގަވަން. އިރާދަކުރެއްވިއްޔާ، ﷲގެ ރަޙްމަތާއެކީ އަޅުގަނޑުމެން މި ފަށާ މަސައްކަތަކީ، ކާމިޔާބު މަސައްކަތެއް ކަމަށް ވެގެންދާނެ. އަދި މީގެ މަންފާ ޢާންމުކޮށް މުޅި ދިވެހިރާއްޖެއަށް ފެތުރިގެންދާނެ.
والســّلام عليــكم ورحـمــة اللّـه وبـركاتـه
_____________________________