بســم اللّـه الرّحمـن الرّحيــم
އަޅުގަނޑުމެން ސިންގަޕޫރަށް ކުރި ދަތުރު ނިންމާލާފައި މިއައީ. މިދަތުރުގެ ބޭނުމަކީ، ދިވެހިރާއްޖޭގައި މިހާރު ހުރި ވިޔަފާރީގެ ފުރުސަތުތަކާބެހޭގޮތުން، ސިންގަޕޫރުގެ ވަރަށްގިނަ ބޮޑެތި ކުންފުނިތަކަށާއި އަދި ބައްދަލުވުމުގައި ބައިވެރިވި ބޭރުގެ އެކިއެކި ޤައުމުތަކުގެ ފަރާތްތަކަށް މަޢްލޫމާތު ސާފުކޮށްދިނުން. ދެން މީގެތެރެއިން ޚާއްޞަ ގޮތެއްގައި އަޅުގަނޑުމެންގެ އިޤްތިޞާދީ ތަޞައްވުރުގައި ހިމެނިފައި އެހެރަ ބޮޑެތި މަޝްރޫޢުތަކަށް، ބޭރުގެ ސަމާލުކަން ގެނައުމަށް މަސައްކަތްތަކެއް ކުރެވުނު. މައިގަނޑު ބޮޑެތި 5 މަޝްރޫޢެއް ހުށަހެޅިގެން ދިޔަ. އެއީ، މިދަތުރުގެ އެއް ބޭނުމަކީ.
ދެން ދިވެހިރާއްޖެއިންވެސް ހަމަ ވިޔަފާރިވެރިންނާއި އެކިއެކި ސިނާޢަތްތަކުގެ ވަރަށްގިނަ ބޭފުޅުން ބައިވެރިވެވަޑައިގެންނެވި. ދެން އެބޭފުޅުންގެ ބޭނުންފުޅަކަށްވަނީ، އެބޭފުޅުންގެ ދާއިރާއިން ބޭނުންވާ ކަންކަމަށް އިންވެސްޓަރުން ހޯދުމާއި، ފައިސާ ހޯދުމުގެ މަސައްކަތް. ދެން މި ސިމްޕޯޒިއަމްގައި ބޭރުގެ ކުންފުނިތައްވެސް ބައިވެރިވި. ހަމައެގޮތަށް މިދެންނެވި ގޮތަށް ދިވެހިރާއްޖެއިން މިވަޑައިގެންނެވި ވަފްދުގެ ބޭނުމަކަށްވެސްވަނީ ހަމަ އެކިއެކި ދާއިރާއިން، އެ ދާއިރާތަކަށް ބޭނުންވެފައިހުރި ކަންތައްތަކަށް ފައިސާ ހޯދާނެ ގޮތާއި، އަދި ބައެއް ކަހަލަ މަސައްކަތްތަކަށް ޖޮއިންޓް ވެންޗަރ ޕާޓްނަރ ހޯދުމުގެ މަސައްކަތް. ޓޫރިޒަމްގެ ދާއިރާގައިވެސް މިކަން ހިނގި. އަދި މަސްވެރިކަމުގެ ދާއިރާގައިވެސް އަދި އެހެން ދާއިރާތަކުގައިވެސް މިކަން ހިނގި. ސަރުކާރުގެ ކުންފުނިތަކުންވެސް މި ސިމްޕޯޒިއަމްގައި ބައިވެރިވި. މައިގަނޑު ގޮތެއްގައި ހަމަ ކުންފުނިތަކުގެ އެކިއެކި ބިޔަ މަޝްރޫޢުތަކަށް ފައިސާ ހޯދުމާއި، ޖޮއިންޓް ވެންޗަރ ޕާޓްނަރ ހޯދުމުގެ މަސައްކަތްތަކެއް ކުރެވެމުންދިޔައީ.
ދެން އަޅުގަނޑު ދަންނަވާނީ ހަމަ މިހާރު ޚަބަރުންވެސް ދިވެހިރާއްޖެއާ ހަމައަށްވެސް އައިސްފައި މިއޮތްގޮތަށް އިރާދަކުރެއްވިއްޔާ މިބައްދަލުވުމަކީ، މި ސިމްޕޯޒިއަމަކީ، ހަމަ ވަރަށް ބިނާކުރަނިވި ސިމްޕޯޒިއަމްއެކޭ. ހާޒިރުވެ ތިބި މީހުންގެ އަދަދަށް ބަލާ ކަމަށްވަންޏާ ހަމަ ވަރަށް އެދެވޭ ތަރުޙީބެއް ލިބިގެންދިޔަ. ދެން އަޅުގަނޑަށް ޤަބޫލު ކުރެވެނީ، ދިވެހިރާއްޖެއިން މިކުރެވުނު މަސައްކަތުގައި ނަތީޖާ ހަމަ ވަރަށް ރަނގަޅޭ. ވަޒީރުންނާއި އަދި އެބޭފުޅުންނާއެކު މަސައްކަތް ކުރެއްވި ޓީމުތަކުން ވަރަށްގިނަ މަސައްކަތްތަކެއް މިވަނީ ކޮށްފައި. އަދި ހަމައެހެންމެ، ރާއްޖޭގައި އިންވެސްޓްކޮށް މިއުޅޭ ބޮޑެތި ވިޔަފާރި ފަރާތްތަކުންވެސް، ވިޔަފާރީގެ އިސްފަރާތްތަކުންވެސް މަސައްކަތްތަކެއް ކޮށްފައިވަނީ. އަދި ރާއްޖެއާ ބެހޭގޮތުން އެމީހުންގެ ތަޖުރިބާވެސްވަނީ މި ސިމްޕޯޒިއަމްގައި ހާމަކޮށްފައި.
ދެން ސަރުކާރުގެ ފަރާތުން ވަޒީރުން މިހުށަހެޅުއްވި މަޝްރޫޢުތައްވެސް ހަމަ ވަރަށް އެދެވޭ ފެންވަރެއްގައި، ވަރަށް ރަނގަޅު ފެންވަރެއްގައި ހުށަހެޅިގެންދިޔަ. އެހެންވީމާ، ޖުމްލަ ގޮތެއްގައި ވަރަށް ބޮޑު ތަރުޙީބެއް ލިބިގެން ދިޔަކަމަށް އަޅުގަނޑުމެންނަށް ޤަބޫލުކުރެވޭ. ހަމައެގޮތަށް ބޭރުގެ ފަރާތްތަކުންވެސް ހަމަ ޤަބޫލުކުރޭ މި ސިމްޕޯޒިއަމަކީ، ވަރަށް ރޭވުންތެރިކަމާއެކީ ހަމަ ވަރަށް ކާމިޔާބު ސިމްޕޯޒިއަމެއް ކަމަށް. ދެން އަޅުގަނޑުމެން އިޢުލާން ކުރިން، އަޅުގަނޑުމެންގެ މިމަސައްކަތް މިފެށުނީ ސިންގަޕޫރުގައި ކަމަށް. ދެން މިއާއެކީ ޝަންހާއީގައި އަދި ހޮންގކޮންގގައި އަދި މެދުއިރުމައްޗަށް ބަލާލި ކަމުގައިވަންޏާ ދުބާއީ ހިސާބުގައި އަޅުގަނޑުމެން ސިމްޕޯޒިއަމެއް ބާއްވާނެ.
ދެން ދިވެހިރާއްޖޭގެ އިޤްތިޞާދީ މަޝްރޫޢުތަކަށް ޕްރޮމޯޓް ކުރުމަކީ، އަބަދުމެ ކުރަންޖެހޭ މަސައްކަތެއް. ޓޫރިޒަމަކީ މީގެ އެއް ޞިނާޢަތް. ޓޫރިޒަމް ޕްރޮމޯޝަންގެ މަސައްކަތްވެސް މި ހިނގަނީ ހަމަ އަބަދުމެ ކަހަލަ ގޮތަކަށް މި މަޝްރޫޢުތައް އިޝްތިހާރު ކުރުމަށް. އައި.ޓީ.ބީ، ނޫނީ އެހެންވެސް ފެއަރތަކަށް މިދަނީ. މިހާރު ހަމަ މިމަސައްކަތް މިވަނީ މަސްވެރިކަމުގެ ސިނާޢަތުގައިވެސް ފެށިފައި. ދާދިފަހުންވެސް ބޮސްޓަންގައި އޮތް ފެއަރއެއްގައި ޑޮކްޓަރ ޝައިނީ، ފިޝަރީޒް މިނިސްޓަރުވެސް ބައިވެރިވެވަޑައިގެންފައިވަނީ. ދެން މީގެ ނަތީޖާތައްވެސް ރަނގަޅު. އަޅުގަނޑުމެންނަށް ޔޫރަޕަށް ދަޅުމަސް އެކްސްޕޯޓް ކުރުމަށް މި ދިމާވި މައްސަލަތަކާ ގުޅިގެން، އެމެރކާގެ ބާޒާރު މިހާރު މިއޮތީ މަސްވެރިކަމަށް ހަމަ ވަރަށް ބޮޑަށް ހުޅުވާލެވިފައި. ދެން އެތަންތަނަށް ބޭނުންވާ އަދަދަށް އަޅުގަނޑުމެންނަށް މަސް ނުއުފެއްދުންކަންނޭނގެ، މިހާރު ބޮޑު މައްސަލައަކަށްވާނީ. އެހެންވީމާ، މިކަހަލަ މަސައްކަތަކީ އިޤްތިޞާދީ ގޮތުން ރާއްޖެ ތަޢާރުފު ކުރުމާއި އަދި މިމަސައްކަތްތަކަކީ ހަމަ އަބަދުމެ ކުރެވެންޖެހޭނެ މަސައްކަތްތަކެއް. ދެން މިއީ، ފުރަތަމަ ދުވަހުގެ ބައްދަލުވުން. ދެން އޭގެފަހުން، ކަރުދާސްތައް ހުށަހެޅުމާއި އަދި މަޝްރޫޢުތައް ވަކިވަކިން ހުށަހެޅުމުގެ ކަންތައްތައް ހިނގައިގެން ދިޔައީ.
ދެން މި ސިމްޕޯޒިއަމްގެ ތެރެއިން، ރާއްޖެއިން ބޭރުން މީގައި ބައިވެރިވެވަޑައިގެންނެވި ބައެއް ފަރާތްތަކުން މިހާރުވެސް ޝައުޤުވެރިކަން އުފައްދަވާފައި އެބަހުރި، ބައެއް ވަޒީރުންނާ ވާހަކަފުޅު ދެއްކެވި، ހުޅުމާލޭގެ އެކިއެކި މަޝްރޫޢުތަކަށް އަޅުގަނޑާ ހަމައަށް ވަޑައިގެންނެވި ބައެއް ބޭފުޅުން ޓްރާންސްޝިޕްމަންޓް ބަނދަރުގެ ވާހަކަ، މިހާރުން މިހާރަށްވެސް ތިލަފުށީގެ ބަނދަރާ ބެހޭގޮތުން ވާހަކަފުޅު ދެއްކެވި. މާލޭގެ ބަނދަރު، ސީޕޯޓް ތިލަފުށްޓަށް ބަދަލުކުރުމުގެ މަޝްރޫޢު އޮތީމާ. ދެން ހަމައެއާއެކީ ހުޅުމާލޭގެ ޓައުންޝިޕެއް ޑިވެލޮޕް ކުރުމަށް ކުރާ މަސައްކަތުގައިވެސް ވާހަކަވެސް ދެކެވިފައިވަނީ. އެއަރޕޯޓްގެ އެކިއެކި ކޮމްޕޯނަންޓްތަކުގެ ވާހަކަވެސް ޗައިނާއިން ބައިވެރިވި ވަރަށް ބޮޑު ކުންފުންޏަކުން އަޅުގަނޑުމެންނަށް ގެނައި. ދެން އިރާދަކުރެއްވިއްޔާ ހީވަނީ އިތުރަށް މަސައްކަތް ކުރެވިއްޖެ ކަމަށްވަންޏާ މިއިން ފައިދާތަކެއް ވާނެހެން. ކޮންމެއަކަސް ދިވެހިރާއްޖެއާބެހޭ ވަރަށްގިނަ މަޢްލޫމާތު އޮޅުންފިލުވުމުގެ ފުރުސަތު ބޭރުގެ ފަރާތްތަކަށްވެސް ލިބިގެންދިޔަ ސިމްޕޯޒިއަމެއް މި ސިމްޕޯޒިމަކީ. އެހެންވީމާ، ޖުމްލަ ގޮތެއްގައި ހަމަ އިރާދަފުޅުކުރެއްވިއްޔާ، މިއިން ނަތީޖާތަކެއް ފެންނަންވާނެ ކަމަށް ޤަބޫލުކުރެވޭ ފެންވަރުގައި ޝައުޤުވެރިކަން އުފެދިގެންދިޔަ ވިޔަފާރީގެ ބައްދަލުވުމެއް، މި ބައްދަލުވުމަކީ.
އިބްރާހީމް މުޢާޒު – އެމް.ބީ.ސީ
ފޯރަމްގެ އެންމެ ކާމިޔާބު މަޝްރޫޢަކީ ކޮބައިތޯ؟ މިއަދު އިވިގެންދިޔަ ޖީ.އެމް.އާރުން 1.4 ބިލިއަން ޑޮލަރު ބަދަލެއްގެ ގޮތުގައި ހޯދުމަށް. އެ އަދަދު ކުޑަ ނުކުރާނެ ކަމަށް. މަނިކުފާނުގެ ވިސްނުންފުޅު ހުރީ ކޮންގޮތަކަށްތޯ؟
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް:
މީގައި ޝައުޤުވެރިކަން އުފެދިގެން ދިޔަ މަޝްރޫޢުތަކަށް ބަލާކަމަށްވަންޏާ އަޅުގަނޑަށް ޤަބޫލު ކުރެވެނީ، ފަހަރުގައި ތަރުތީބުން ކަމަށް ނުވެދާނެ. އެންމެބޮޑު ޝައުޤުވެރިކަމެއް މިއޮތީ އެއަރޕޯޓަށް. އާ އެއަރޕޯޓެއް ނޫނީވިއްޔާ އެއަރޕޯޓުގެ އެކްސްޓެންޝަނެއް ހަމަ އާ އެއަރޕޯޓުގެ. ދެން އޭގައި މިހާރުވެސް އަޅުގަނޑުމެން ޖަޕާނަށް ކުރި ދަތުރުގައިވެސް އެއަރޕޯޓުގެ ޓަރމިނަލް ފެސިލިޓީޒްގެ ކަންތައް އިރާދަކުރެއްވިއްޔާ ޖަޕާނުގެ ދެ ކުންފުންޏަކުން އެމް.އޭ.ސީ.އެލް.އާ އެކީ ޖޮއިންޓް ވެންޗަރ ހަދައިގެން މިމަސައްކަތް ކުރިއަށްދާގޮތަށް، ފަންޑިން ޖޭޕިކްގެ ފަރާތުން ލިބޭނެކަމަށް އިންތިޒާރު ކުރެވެނީ. ދެން އެއަރޕޯޓުގައި ހުރި ބައިތަކަށް ހަމަ ވަރަށްބޮޑު ޝައުޤުވެރިކަމެއް އެބައޮތް. ދެން އެއާއެކީ މިއަންނަނީ ހުޅުމާލޭގެ އިޤްތިޞާދީ ތަރައްޤީއަށް ކުރެވޭ މަސައްކަތްތައް. އެހެންވީމާ، އެއީ ތަރުތީބުން ދަންނަވާ ކަމަށްވަންޏާ އަޅުގަނޑަށް ފާހަގަ ކުރެވުނު، އަޅުގަނޑާ ހަމައަށް އައިސްފައި ހުރި މަޝްރޫޢުތައް. އެހެންނަމަވެސް އަޅުގަނޑުމެންނާއެކީ ވަޑައިގެންނެވި ބައެއް ވަޒީރުން އަދި އެބަތިއްބެވި. މާދަމާ ވަޑައިގަންނަވާނީ. އެބޭފުޅުންނާ ހަމައަށް އައި އިތުރު މަޝްރޫޢުތަކެއް އަދި އަޅުގަނޑަކަށް ދަންނަވާކަށް ނޭނގެ.
ދެން ޖީ.އެމް.އާރާ ބެހޭގޮތުން ތިޔަކުރެއްވި ސުވާލުގައި ހަމަ އަޅުގަނޑު ދަންނަވާލަން ބޭނުންވަނީ އެއީ ޖީ.އެމް.އާރު.ގެ ޕްލޭނޭ. އެމީހުން 1.4 ބިލިއަން ނޫނީ 1400 މިލިއަނަށް އެމީހުންގެ ކްލެއިމް އޮތީ. ދެން ހަމަ ތެދުތެދަށް ދަންނަވާކަމަށްވަންޏާ އަޅުގަނޑަކަށް ޤަބޫލެއްނުކުރެވޭ، އެވަރު އަރަންޖެހޭނެ ކަމަކަށް. އެއީ، އަޅުގަނޑުމެންނަށް އެގްރީމެންޓް ބާޠިލު ކުރެވިދާނެ. ދިވެހިރާއްޖޭގެ އެއަރޕޯޓަކީ، ފައިދާހުރި ގޮތެއްގައި ދެވިފައި އޮތް އެއަރޕޯޓަކަށްނުވާތީ އަދި ރާއްޖޭގެ ރައްޔިތުން އެދޭ ގޮތަކީ، ސަރުކާރުން ބޭނުންވަނީ ފައިދާހުރި ގޮތެއްގައި މިކަން ކުރެވޭނީ، އަޅުގަނޑުމެން އަމިއްލައަށް ކަމަށްވަންޏާ އެކަން އަޅުގަނޑުމެންނަށް ކުރެވޭނެ. އެހެންނަމަވެސް، އަޅުގަނޑު ފުރުމުގެ ކުރިންވެސް ދަންނަވާލިގޮތަށް ބަދަލުދޭންޖެހޭނެ. އެކަމު ބަދަލުދިނުން ބިނާވާނެ ކަމަށް އަޅުގަނޑަށް ޤަބޫލު ކުރެވެނީ ޖީ.އެމް.އާރުންވެސް އެހެރީ ޚަރަދުތަކެއް ކޮށްފައި. 200 މިލިއަން ޑޮލަރާ ހަމައަކަށްނާރާނެ. އެކަމު އަޅުގަނޑަށް ހަނދާންވާ ގޮތުން ވެއްޖިއްޔާ 140 މިލިއަނާއި 160 މިލިއަނާ ހަމައަށް ޚަރަދު ކޮށްފައި. އެކަމަކު އަޅުގަނޑުމެންނަށް މީޑިއާއިންވެސް އެނގިގެންދިޔަ އޭރުގެ ބަންޑާރަނައިބު ޢާޒިމާ ވަޑައިގެން އަޅުގަނޑުމެންގެ މާލިއްޔަތު ކޮމިޓީގައި، އޭރު އަޅުގަނޑުވެސް މާލިއްޔަތު ކޮމިޓީގެ މެންބަރެއްގެ ގޮތުގައި އިނިން ރައްޔިތުންގެ މަޖިލީހުގައި. އެހެރީ ދެއްވާފައި ހުރި ބަޔާންތައް. ޖީ.އެމް.އާރުން ނަގާފައި ހުރި ހުރިހާ ލޯނަކަށް އެގްރީމެންޓްގައި އޮންނަ ގޮތުން ވެއްޖެއްޔާ ދައުލަތުންވަނީ ސޮވެރިން ގެރަންޓީވެސް ދީފައި. އެހެންވީމާ، ޖީ.އެމް.އާރަށް އެ ލޯނު އަދާނުކުރެވިއްޖެ ކަމަށްވަންޏާ އޭގެ މާނައަކީ، ދިވެހި ދައުލަތުން އެ ލޯނަށް ޒިންމާ އުފުލަންޖެހޭ ގޮތަށް އެހެރީ އެގްރީމެންޓް ކުރެވިގެން، ސޮވެރިން ގެރެންޓީ ދީގެން އެކަންކަން ކުރެވިފައި. އެހެންވީމާ، ޖީ.އެމް.އާރުން ރާއްޖޭގައި އެއަރޕޯޓުގައި މަސައްކަތްތަކެއް ކުރި. އިންވެސްޓްމަންޓްތަކެއް ކުރި. މިދެންނެވި އަދަދު. އެހެންވީމާ، އެއާ ގުޅުންހުރި އަދަދަކަށް، ނޫނިއްޔާ އެއާ ދާދި އެއްވަރުގެ އަދަދަކަށް ބަދަލު ނެނގެންޖެހޭނެ ކަމަށް ނޫނީ ނަގައިދޭނެ ކަމަށް އަޅުގަނޑަށް ޤަބޫލު ކުރެވޭ. އެހެންނަމަވެސް އެމީހުން 30 އަހަރުގެ ކޮންސެޝަނަކަށް ހިންގީމާ، ކޮންމެ އަހަރަކު ލިބޭނެ ފައިދާއަކަށް ބިނާކޮށް 35 އަހަރު ވަންދެން އެމީހުންގެ އަތުގައި އެއަރޕޯޓް އޮވެއްޖެ ކަމަށްވަންޏާ ނެގޭނެ ޖުމްލަ އާމްދަނީ، ކަލްކިއުލޭޓް ކޮށްގެން، ހިސާބު ކޮށްގެން، 1400 މިލިއަން ނޫނީވިއްޔާ އެއަށްވުރެ ބޮޑު އަދަދެއް ނަގައިދީފާނެ ކަމާ ދޭތެރޭގައި އަޅުގަނޑު ހިތުގައި ސުވާލު އުފެދޭ. އަޅުގަނޑަކަށް ޤަބޫލެއް ނުކުރަން، އެހެން ވެދާނެ ކަމަކަށް. އެހެންނަމަވެސް ކޮށްފައިހުރި މަސައްކަތަށް ބަދަލު ދޭންޖެހޭނެ.
ސުވާލު:
މުޢާޒްގެ ސުވާލާ ގުޅުންހުރި ސުވާލެއް އިނގޭތޯ. ކިހިނެއްތޯ ސަރުކާރުން ދެކެވަޑައިގަންނަވަނީ، ކިހާވަރެއްގެ ބަދަލެއް ޖީ.އެމް.އާރަށް ދޭންޖެހޭނެ ކަމަށްތޯ؟
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް:
އެގޮތަށް ހިސާބެއް ހަދަން ދަތި އިނގޭތޯ. އެހެންނަމަވެސް، އަޅުގަނޑުމެންގެ ވިސްނުމުގައި، އަޅުގަނޑުމެންގެ ޓީމުގެ ވިސްނުމުގައި 300 މިލިއަން ޑޮލަރަށްވުރެ މަތިވާނެ ކަމަކަށް އަޅުގަނޑުމެންނަކަށް ޤަބޫލެއް ނުކުރެވޭ. އެހާކަށްހާވަރު އުޅޭނެކަމަށް ލަފާކުރެވެނީ. އެއަށްވުރެ މަތިވެދާނެ ކަމަކަށް ޤަބޫލެއް ނުކުރެވޭ.
އަޙްމަދު ނާއިފް – ހަވީރު ނޫސް
އެއަރޕޯޓް ތަރައްޤީ ކުރުމާ ބެހޭގޮތުން ޖަޕާނުގެ އިތުރަށް ދެން ކޮންކޮން ޤައުމުތަކަކުންތޯ ޝައުޤުވެރިވަނީ؟ ކޮންކޮން ކުންފުނިތަކެއްތޯ؟
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް:
އެއަރޕޯޓް ތަރައްޤީކުރުމުގެ މަޝްރޫޢުގައި މިފަހަރު އަޅުގަނޑުމެންގެ ސިމްޕޯޒިއަމުން އެންމެ ފާހަގަވެގެންދިޔައީ، އެންމެ އިސްކޮށް މިއުޅެނީ، ހަމަ މިހާރު ދުނިޔޭގައި އެންމެ ބޮޑަށް މިކަހަލަ ސުޕަރ އިންފްރާސްޓްރަކްޗަރގެ މަސައްކަތްތަކުގައި އެންމެ ފުންނާބުއުސް ކުންފުނިތައް ހުރީ ޗައިނާގައި. އެހެންވީމާ، ޗައިނާ ކުންފުނިތަކުން މިކަމަށް ޝައުޤުވެރިކަން އެބަހުރި. ދެން ނައިބު ރައީސް ޑޮކްޓަރ ޖަމީލް، ކުވައިތަށް ވަޑައިގެންނެވި ދަތުރުގައި، ކުވެއިތު ސަރުކާރުގެ ފަރާތުންވެސް މިކަމަށް އެހީތެރިވާނެ ކަމަށް ވިދާޅުވި. ޒަމާނުއްސުރެ އަޅުގަނޑުމެންގެ އެއަރޕޯޓަށް، އެންމެ ފުރަތަމަ ރައީސް މައުމޫން ޓްރާންސްޕޯޓް މިނިސްޓަރަކަށް ހުންނަވާފައި، އޭގެފަހުން ރައީސަކަށް ވެވަޑައިގެންނެވި ފަހުންވެސް، ކުވައިތު ފަންޑުން މިއޮތީ އެއަރޕޯޓަށް ވަރަށް ބޮޑެތި އެހީވެފައި. އެހެންވީމާ، ކުވައިތު ފަންޑުން އެހީވާނެކަމަށް އަޅުގަނޑުމެންނަށް ޤަބޫލު ކުރެވޭ.
ދެން އެއާއެކީ އަޅުގަނޑު މިދޭތެރެއިން ނުރަސްމީ ދަތުރެއްގައި ސައޫދީ ޢަރަބިއްޔާއަށް ދިޔައިރު ސައޫދީ ޢަރަބިއްޔާގައި ޢިމާރާތް ކުރުމުގައި ހަމަ އެންމެ ބޮޑު ބިޔަ ކުންފުނީގެ އިސްބޭފުޅުންނާ ބައްދަލުވި. އެބޭފުޅުންގެ ޝައުޤުވެރިކަން ހުރިކަންވެސް ފާހަގަކުރެއްވި. މިހާރު އަޅުގަނޑުމެން ކުރަން ޖެހިފައި އޮތް ކަމަކީ، ކޮންމެވެސް ވަރަކަށް އެ މަސައްކަތް ކުރެވިއްޖެކަންނޭނގެ. ޗާންގީ އެއަރޕޯޓްގެ އިސްމީހުންނާ ވާހަކަ ދައްކައިގެން އެއަރޕޯޓްގެ މޮޑެލެއް، ނޫނީ އެއަރޕޯޓްގެ ޑިޒައިނެއް، ކޮންސެޕްޓްގައި ހިމެނޭނެ ބައިތައް އެކުލަވާލާފައި ދެން އަޅުގަނޑުމެންނަށް ޙަޤީޤަތުގައި މާކެޓް ކުރުމުގެ މަސައްކަތް ކުރެވޭނީ. އެހެންވީމާ، އެމަސައްކަތް ވަރަށް އަވަހަށް އިރާދަކުރެއްވިއްޔާ ނިމޭނެ.
އެއަރޕޯޓުގައި ހިމެނެންޖެހެނީ ކޮންކޮން ބައިތަކެއްތޯ. އެއީ ދެން ހުޅުމާލޭގެ ބައިވެސް ލައިގެން. އެހެންވީމާ، އެކަން ނިމުނީމާ، ޙަޤީޤަތުގައި އަޅުގަނޑުމެން އެކި ބައިބައި ވަކިވަކިން ޓެންޑަރ ކުރުމުގެ މަސައްކަތް، ނޫނީވިއްޔާ އެކިފަރާތްތަކާ ވާހަކަދައްކައިގެން ޝައުޤުވެރިކަން އުފައްދައިގެން އޭގެ ފައިނޭންސިން ޕެކެޖަކާ ހަމައަށް ގެންދެވޭނީ.
އަޅުގަނޑާ ބައްދަލުކުރި ޗައިނާގެ ގްރޫޕުންވެސް ފައިނޭންސްގެ ވާހަކަތައް ދެކެވުނު. އޭގެ ތެރޭގައި އެބޭފުޅުން ވިދާޅުވެފައި އޮތީ، މީގެ ތެރެއިން އެއްބަޔަކީ، ހަމަ ޗައިނާ ސަރުކާރުން ވަރަށް ކޮންސެޝަނަލްކޮށް ލިބޭނެ. އަނެއްބަޔަކީ އެގްޒިމް ފައިނޭންސްގެ ތެރެއިން ލިބޭނެ. އެހެންވީމާ، އަޅުގަނޑުމެންނަށް މިހާރު މައްސަލައަކަށްވާނީ، މިއީ ކިހާވަރެއްގެ ޚަރަދެއްތޯ، ކޮސްޓް އޮފް ކެޕިޓަލް ނޫނީ އިންޓަރެސްޓް ކިހާވަރެއްގައި ބޮރޯކުރަން ޖެހޭނެތޯ، އެކަމު މިއަށް ފައިސާ ލިބޭނެ ކަމަށް އެޕާޓީން ހަމަ ވަރަށް އަޅުގަނޑުމެންނަށް ކަށަވަރުކަން ދިން. ދެން އަޅުގަނޑުމެންވެސް އެމީހުންނަށް ފުރުސަތެއް ދިނިން. ފައިސާ ލިބޭނެ ކަމަށްވަންޏާ ލިބޭނެ ގޮތެއް އަޅުގަނޑުމެންނަށް ޚަބަރު ކުރާށޭ، އޭރަށް އަޅުގަނޑުމެން އެއަރޕޯޓްގައި ދެން ހުރި ބައިބައި އެމީހުންނަށް ހަވާލު ކުރުމުގެ ނޫނިއްޔާ އެއިން ބައެއް އެމީހުންނާ ހަވާލު ކުރުމުގެ މަސައްކަތް ކުރިއަށް ގެންދާނީ.
ޒަކަރިއްޔާ ޙަސަން – ރާއްޖެ ޓީވީ
ގުޅުންހުރި ސުވާލެއް. ބަދަލުގެ ގޮތުގައި ޖީ.އެމް.އާރަށް ފައިސާ ދޭންޖެހޭ ކަމަށްވާނަމަ ދައުލަތުން އެދޭ ދިނުމުގެ މާލީ ކެރިފޯރުންތެރިކަން އެބަހުރިތޯ؟ އަދި މިކަމުގެ ސަބަބުން އެމައްސަލައަށް ޙައްލެއް ލިބިގެންދާނެތޯ؟ ދެން ނޫނީ އިތުރު ބަޔަކާ ވާހަކަ ދައްކައިގެން އެއަރޕޯޓް ތަރައްޤީ ކުރުމަށް ހަވާލު ކުރުމަށް ބިޑަށް ހުޅުވާލައިގެންތޯ ކޮން އުސޫލަކުންތޯ ކުރިއަށްގެންދާނީ؟ ވަކި ބަޔަކާ ހަވާލު ކުރައްވައިގެން ކުރައްވާ ގޮތަށްތޯ؟
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް:
ނޫން. ނޫން. އަޅުގަނޑުމެން ހުރިހާ މަޝްރޫޢުތަކެއްވެސް މިގެންދަނީ ޢާންމުކޮށް ބިޑަށް ހުޅުވާލައިގެން. ނޫނީ އެކްސްޕްރެސް އޮފް އިންޓަރެސްޓަށް ހުޅުވާލައިގެން އޭގެ ތެރޭގައި ހަތަރު ފަސް ޕާޓީ އުޅޭ ކަމަށްވަންޏާ، އެ ހަތަރު ފަސް ޕާޓީގެ ސްޓްރެންތައް ބަލާފައި ދެން އޭގެ ފަހުން އެމީހުންގެ ތެރޭގައި ޓެންޑަރ ކުރަނީ. އެހެންވީމާ، ދާނީ ހަމަ ވަރަށް ޓްރާންސްޕޭރަންޓްކޮށް، ހާމަކަން ބޮޑު ގޮތެއްގައި އެކަން ދާނީ. އެހެން ނޫނިއްޔާ އަޅުގަނޑުމެންނަކަށްވެސް ނޭނގެ، އަޅުގަނޑުމެންނަށް ކޮންޓްރެކްޓެއް މި ހަވާލު ކުރެވެނީ އޭގެ އެންމެ ރަނގަޅު އަގުގައި އަދި ސަރުކާރާއި ރައްޔިތުންނަށް އޭގެ އެންމެ ފައިދާހުރި ގޮތަކަށްކަމެއް.
ދެން ޖީ.އެމް.އާރަށް ފައިސާ ދައްކަންޖެހިއްޖެ ކަމަށްވަންޏާ ފައިސާ ދެއްކޭނެ ހެއްޔޭ. އެއަރޕޯޓް ކުންފުނިން، މީގެ އެންމެ އިސް މަސައްކަތްތަކެއް ކުރައްވަނީ. އެއަރޕޯޓް ކުންފުނިން މިހާރުވެސް ފައިސާ، އެއްފަރާތަށް ޖައްސަން ފަށްޓައިފި، ޖީ.އެމް.އާރަށް ބަދަލުދޭން ޖެހިއްޖެ ކަމަށްވަންޏާ ބަދަލު ދިނުމަށްޓަކައި ފައިސާ އެއްކުރުމަށް. ދެން އަދި ހަމަ ސަރުކާރުންވެސް އެހެން ފުރުސަތުތައްވެސް ހުރީ ކިހާވަރަކަށްތޯ ބެލުމުގެ މަސައްކަތް އެބަކުރެވޭ. ދެން ބަދަލު ދައްކަން ޖެހުނަސް، އަޅުގަނޑަށް ޤަބޫލު ކުރެވެނީ، ދެން ކޮންމެވެސް ވަރެއްގެ، އެކަށީގެންވާ މުއްދަތެއްވެސް ލިބޭނެ ކަމަށް. ދެން ހަމައެއާއެކީ އަޅުގަނޑުމެންނާ އިންޑިއާއާ މިއީ ހަމަ ވަރަށް ގާތް ދެޤައުމު ދޮއެއްތޯ. އެއީ، ސާކްގެ ތެރޭގައިވެސް ވަރަށް ގުޅުން އޮވޭ. އެހެންވީމާ، އެބަދަލު ދިނުމަށް އަދަދެއް ކަނޑައެޅި އެއަށް އަޅުގަނޑުމެންނަށް ގޮތްތަކަކަށް އެއްބަސްވެވޭނެ ކަމަށް އަޅުގަނޑު ޤަބޫލުކުރަން. އަދި ފައިސާ ދެއްކުމުގައި އަޅުގަނޑުމެންނަށް ދަތިނޫން ގޮތްތަކެއް ރޭވިދާނެ ކަމަށް އިންތިޒާރު ކުރެވޭ އިނގޭތޯ.
ޒަކަރިއްޔާ ޙަސަން – ރާއްޖެ ޓީވީ
ތިޔަ ވިދާޅުވިހެން ބަދަލު ދައްކަން ޖެހިއްޖެނަމަ އިޤްތިޞާދީ ގޮތުން މާބޮޑު ހީނަރުކަމެއް އަތުވެދާނެތޯ؟
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް:
ނޫން. ނޫން. އިޤްތިޞާދީ ގޮތުން ހީނަރުކަމެއް ނާންނާނެއެކޭ ނޫން. މިއަށް މުއްދަތު ލިބިގެން އަޅުގަނޑުމެންނަށް އެކަން ކުރުމުގެ ފުރުޞަތު ލިބޭނެ. އެހެންނަމަވެސް ހަމަ ޤަބޫލު ކުރައްވާ، ޚަޒާނާއިން ނަގާ ފައިސާއަކީ. އެހެން ކަންކަމަށް ބޭނުން ކުރަން ހުރި ފައިސާ ދެއްތޯ. އެހެންވީމާ. ކޮންމެވެސް ކަހަލަ ބަދަލުތަކެއް، އެ ޖަސްޓްމަންޓްތަކެއް ހަދަންޖެހޭނެ. ހަމަ ބައެއް ކަހަލަ މަޝްރޫޢުތަކުން ޚަރަދު ކުޑަކުރުމާއި، މިކަހަލަ އެތައް ކަމެއް ހިނގާނެ. ލޯނެއްގެ ގޮތުގައިވެސް މިއަދަދަށް ފައިސާ ނަގާ ކަމަށްވަންޏާވެސް، ހަމަ އެލޯނަކީވެސް ސަރުކާރުގެ ބަޖެޓުގައި ޖަހައިގެން އަދާކުރަންވެސް ޖެހޭނެ އެއްޗެއް ދެއްތޯ. އެހެންވީމާ، އެއަށް ހަމަ އަޅުގަނޑުމެން ގޮތެއް ނެރެން ޖެހޭނެ. އެހެންނަމަވެސް، އެކަން ކޮށްގެންވެސް އަޅުގަނޑުމެންނަށް އެ ބަދަލު ދޭންޖެހޭނެ ކަމަށް ޤަބޫލުކުރެވޭ. އެއަރޕޯޓް އަޅުގަނޑުމެންގެ އަތުގައި އޮންނަން ޖެހޭނެ ކަމަށް ޤަބޫލުކުރެވޭ. އެހެންވީމާ، އިޤްތިޞާދީ ގޮތުން މިއީ، އަޅުގަނޑުމެންނަށް އެންމެ ފަސޭހަގޮތް ކަމަށް ނުވެ ހިނގައިދާނެ. އެހެންނަމަވެސް، އިރާދަކުރެއްވިއްޔާ 300 މިލިއަނެއްހާ އަދަދުގެ ތެރޭގައި މިކަން ހަމަޖެހިގެންދާ ކަމަށްވަންޏާ މާބޮޑެތި އުނދަގޫތަކެއް ނުވެ، އަޅުގަނޑުމެންނަށް ހަމަ އެޖަސްޓް ކުރެވޭނެ ކަމަށް ޤަބޫލު ކުރެވޭ.
ޢަބްދުއްލަޠީފް - މިއަދު ނޫސް
މިފަހަރު މަނިކުފާނު ތިޔަ އިޢުލާން ކުރެއްވި މަޝްރޫޢުތަކުގެ ތެރޭގައި، މަނިކުފާނުގެ ސަރުކާރެއްގައި ފެށޭނެ ކަމަށް ބެލެވޭ އެންމެ ބޮޑު އެއް ޕްރޮޖެކްޓްކަމަށްވާ އިކޮނޮމިކް ޒޯން ޕްރޮޖެކްޓާ ދޭތެރޭގައި މަނިކުފާނު ކިހިނެއްތޯ ދެކެވަޑައިގަންނަވަނީ.
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް:
މި ޕްރޮޖެކްޓަކީ، ޙަޤީޤަތުގައި މުޅި ސިމްޕޯޒިއަމްގެ ތެރޭގައިވެސް މީހުންގެ ޝައުޤުވެރިކަން އެންމެ އިތުރުވެގެން ދިޔަ މަޝްރޫޢު. ދެން މިމަޝްރޫޢުގެ ކުރެހުންތަކާއި ވިޝުއަލްއާ މިއީ ހަމަ ވަރަށް ވަރުގަދައަށް ސަރުކާރުން ތައްޔާރު ކޮށްގެން އިކޮނޮމިކް މިނިސްޓްރީއާ ޖޮއިން ކޮށްގެން ދިޔަ ޓީމުތަކުން ހުށަހެޅި މަޝްރޫޢެއް. އެއީ ވަރަށް ސްޓެގަރިން، ވަރުގަދަ ޕްރޮޖެކްޓެއްގެ ގޮތުގައި ހަމަ އެތަނަށް ވަޑައިގެންނެވި ހުރިހާ ބޭފުޅުންނަށްވެސް ފާހަގަކުރެއްވުނު. އަދި އޭގެފަހުން އެއަށް ޑިސްކަޝަންވެސް ހިނގައިދިޔަ އިނގޭތޯ. އެހެންވީމާ، އިހަވަންދިއްޕޮޅުވެސް އަޅުގަނޑު ޤަބޫލުކުރާ ގޮތުން ވެއްޖެއްޔާ ހަމަ އެއީ، ދެން ވަރަށް ބިޔަ އަޅުގަނޑުމެން މިހުށަހަޅާ ޕްރޮޖެކްޓްތަކުގެ ތެރޭގައި އޮތް އެންމެ ބިޔަ ޕްރޮޖެކްޓަކީ އެއީ. ދެތިން ހަތަރު ބިލިއަން ޑޮލަރު މިޕްރޮޖެކްޓް ކޮމްޕްލީޓް ވެގެންދާއިރު ހިނގާނެ. ވަރަށް ވަރުގަދަ މަޝްރޫޢެއް. މިޕްރޮޖެކްޓަކީ އެއްބަޔަކަށް ނެގޭނެ ޕްރޮޖެކްޓެއްވެސް ނޫން. އަދި ސިންޑިކޭޓް ކޮށްގެން އެކި ކުންފުނިތައް މީގެ ތެރެއަށް ލައިގެންވެސް އަޅުގަނޑު ހިތް ބުނަނީ މިޕްރޮޖެކްޓްގެ ތެރެއިން ކޮމްޕޯނަންޓް ތަފާތު މީހުން ނަގާނެހެން. އިހަވަންދިއްޕޮޅުގެ މަސައްކަތަކީ، ޝައުޤުވެރިކަން އޮތަސް ހަމަ ވަރަށް ފައިސާ ހޯދުމުގައި މަސައްކަތްތަކެއް ކުރަންޖެހޭނެ.
އިހަވަންދިއްޕޮޅުގެ މަޝްރޫޢާ ގުޅިގެން ހަމަ އެ މަޝްރޫޢު ފާޅުކަން ބޮޑު ގޮތެއްގައި ނޫނީވިއްޔާ، ފީޒިބަލްކޮށް އަޅުގަނޑުމެން ހުށަހެޅީމާ ކަންނޭނގެ، މީގެ ކުރީގައިވެސް ޝައުޤުވެރިކަން އުފެދިފައިހުރި ކުންފުންޏެއް އަޅުގަނޑާ ވަކިން ވާހަކަ ދެއްކި. މާލޭގެ ޕޯޓް ކުރިންވެސް، އިހަވަންދިއްޕޮޅުގެ މާލޭގެ ޕޯޓް ތިލަފުށްޓަށް ބަދަލުކުރުމުގެ ވާހަކަ ދެއްކި. އަޅުގަނޑު ހަނދާންވާ ގޮތުން ވެއްޖެއްޔާ ރައީސް ނަޝީދު ސަރުކާރުގައިވެސް ދެއްކިފައި އޮތް ވާހަކައެއް، ރައީސް ވަޙީދު ސަރުކާރުގައިވެސް ދައްކާފައި ޓެންޑަރވެސް ކުރެވިފައި އޮތް. އެ މަޝްރޫޢާ ގުޅިގެން ޝައުޤުވެރިކަން ހުރީ ވަރަށް ބޮޑު ކުންފުންޏެއް. އަޅުގަނޑަށް ހީވަނީ، ދުނިޔޭގެ ނިސްބަތުން ފުރަތަމަ ފަނަރައިގެ ތެރޭގައި އުޅޭ ކުންފުންޏެއްހެން އަޅުގަނޑުމެންނާ ބައްދަލުކުރީ. އެހެންވީމާ، އެ މަޝްރޫޢުވެސް އިރާދަކުރެއްވިއްޔާ ވަރަށް އަވަހަށް ނިންމާނެހެން. އިހަވަންދިއްޕޮޅުގެ ޓްރާންސްޝިޕްމަންޓް ބަނދަރަށް ޝައުޤުވެރިކަން އޮތް ކަމަށް އަޅުގަނޑަށް ޤަބޫލުކުރެވޭ. އެކަމަކު މިކަހަލަ ސިމްޕޯޒިއަމެއްގައި އެންމެ ބޮޑު މަސައްކަތަކީ، ނެޓްވަރކިންގ މަސައްކަތް. އަޅުގަނޑުމެން ބޭނުންވާ ކަންކަން އަޅުގަނޑުމެން ހުށަހަޅަނީ. ދެން މިއަށް ޝައުޤުވެރިކަން ހުންނަ ފަރާތްތަކުން މަޢުލޫމާތު ސާފުކުރުމާއެކީ އަދި އޭގެ އިތުރަށް ތަފްޞީލު މަޢުލޫމާތު ހޯދާނެ ދޮއެއްތޯ. އެއްދުވަހުން ދެދުވަހުން ހަމަ ތިބެފައި އެގްރީމެންޓްގައި ސޮއިކުރާ ހިސާބަކަށް ހުރިހާ މަޝްރޫޢެއް ނުދާނެ. އެހެންނަމަވެސް، އިރާދަކުރެއްވިއްޔާ މި މަސައްކަތްތައް އަޅުގަނޑުމެން އަދި ޝަންހާއީގައިވެސް އަދި ހޮންގކޮންގގައިވެސް ކުރާނެ. އެހެންނަމަވެސް މި ސިމްޕޯޒިއަމްގެ ފަރާތުން ހަމަ ވަރަށްގިނަ އިންޑަސްޓްރީގެ އިސްފަރާތްތަކަށް ދިވެހިރާއްޖޭގައި ހުރި މަޝްރޫޢުތަކާއި، ދިވެހިރާއްޖޭގައި ހުރި ޕޮޓެންޝަލާ މީގެ ވަރަށްގިނަ މަޢްލޫމާތުތަކެއް ހާމަވެގެން މި ދިޔައީ.
ސުވާލު:
ސިންގަޕޫރުގެ މި އިންވެސްޓްމަންޓް ފޯރަމަށް ކިހާވަރެއްގެ ފައިސާއެއް ޚަރަދު ކުރެއްވިންތޯ؟
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް:
އަޅުގަނޑަކަށް ތަފްސީލެއް ނޭނގެ އިނގޭތޯ. އަޅުގަނޑަށް ހީވަނީ މާދަމާ އިކޮނޮމިކް މިނިސްޓަރ ވަޑައިގަންނަވާނެހެން. އޭނަގެ ޓީމުން މިކަން ކޯޑިނޭޓް ކުރެއްވީ. މީގެ ހަމަ ބޮޑު އަދަދުގެ ފައިސާއަކީ، މުޅި ބަލްކަކީ ހަމަ ސްޕޮންސަރުން އަތުން ރެއިޒްކުރި ފައިސާ.
ސުވާލު:
ޖީ.އެމް.އާރަށް ދޭންޖެހޭ ބަދަލު ކުޑަކުރުމަށް މަނިކުފާނު މަސައްކަތް ކުރައްވާތޯ؟
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް:
ބަންޑާރަ ނައިބު ދޮއެއްތޯ އަޅުގަނޑުމެންގެ ޓީމު ލީޑް ކުރައްވަނީ. ބަންޑާރަ ނައިބުވެސް އަދި އަޅުގަނޑުމެންގެ ޓީމުން ޤަބޫލުކުރާ ގޮތް އަޅުގަނޑު މިދެންނެވީ. އަޅުގަނޑުމެންގެ ސަރުކާރުން މި ބަލަނީ، ރައީސާ ޓީމާ ތަފާތު ދޭއްޗެއް ނުކިޔޭތޯ މިބަލަނީ މިކަހަލަ މައްސަލަތަކުގައި. އެހެންވީމާ، ބަންޑާރަ ނައިބުވެސް އެމަސައްކަތް ކުރައްވަނީ ހަމަ ޙަޤީޤަތުގައިވެސް އެމީހުންނަށް ދޭންޖެހޭނެ ޢަދުލުވެރި ބަދަލެއް ދިނުމަށްޓަކައި. އަޅުގަނޑުމެންނަކަށް އެހާ ބޮޑެތި ބަދަލެއް ދޭންޖެހޭނެ ކަމަކަށް ޤަބޫލެއް ނުކުރެވޭ. އަދި ދިނުމަކީވެސް ދަތިކަމަކަށްވާނެ ދޮއެއްތޯ. ބަންޑާރަ ނައިބުވެސް ހަމަ ގެންގުޅުއްވާ ފިގަރ އަޅުގަނޑު މިދަންނަވަނީ. ގާތްގަނޑަކަށް 300 ވަރަކަށް މިލިއަން ޑޮލަރު ކަމަށް އަޅުގަނޑުމެން އަންދާޒާ ކުރަނީ.
ޢަބްދުއްލަޠީފް - މިއަދު ނޫސް
ކުރީގައި މިމަސައްކަތުގައި ޖީ.އެމް.އާރ. މަސައްކަތުގައި ވަރަށް ބުރަކޮށް މަސައްކަތް ކުރެއްވި ބޭފުޅެއް ޢާޒިމާ ޝަކޫރަކީ. ދެން މިވަގުތު މަގާމެއްގައި ނޫންކަންނޭނގެ ހުންނެވީކީ. އެކަމަކުވެސް މިކަމުގައި އެއްވެސް ވަރަކަށް އެކަމަނާގެ ލަފާފުޅެއް ބޭނުން ކުރައްވަންތޯ؟
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް:
އެކަމަނާގެ ލަފާފުޅު އެކަންޏެއް ނޫން އިނގޭތޯ. ދެން ވަރަށް އެހީތެރިވެވަޑައިގަންނަވާ ޢާޒިމާ އިނގޭތޯ. ވަރަށް އެހީތެރިވެވަޑައިގަންނަވާ. އަދި އޭގެ އިތުރަށް، އަޅުގަނޑުމެންގެ ފަރާތުން ވިޓްނަސްއެއްގެ ގޮތުގައިވެސް ޢާޒިމާ ވަޑައިގެންދެއްވި އިނގޭތޯ. ޢާޒިމާ ވަޑައިގެން ދެއްވި. އަޅުގަނޑުމެންގެ ޑިފެންސް މިނިސްޓަރ ނާޒިމް ވަޑައިގެންދެއްވި. އޭރު ނާޒިމްގެ ބެއްލެވުމުގެ ދަށުގައި އެތަން ބަދަލުވިއިރު ޓްރާންސްޕޯޓް މިނިސްޓްރީ ބަލަހައްޓަވަމުން ގެންދެވީ ނާޒިމް. އެއަރޕޯޓް ބަލަހައްޓަވަމުން ގެންދެވީ. މިދޭތެރެއިން އަނިލްއާއެކީ، ބަންޑާރަނައިބާއެކީ ވަޑައިގެންނެވި ޓީމުގައި މިބޭފުޅުން ވަޑައިގެންނެވި. މިބޭފުޅުންގެ ވިޓްނަސް ސްޓޭންޑަށްވެސް އިނގޭތޯ. އާބިޓްރޭޝަންގައި ތިއްބެވި ބޭފުޅުން ބޭނުންވާ މަޢުލޫމާތު ސާފުކޮށްދިނުމާއި، ދިވެހި ސަރުކާރުން އޭރު ނަގަން ޖެހުނު ނެގުން ޖަސްޓިފައި ކޮށްދެއްވަން ޢާޒިމާވެސް އަދި ޑިފެންސް މިނިސްޓަރ ނާޒިމްވެސް މިބޭބޭފުޅުން ވަޑައިގެންފައި ހަމަ ރަސްމީ މަސައްކަތްތަކުގައިވެސް ބައިވެރިވެވަޑައިގެންނެވި. ޢާޒިމާގެ އެހީތެރިކަން އަޅުގަނޑުމެންނަށް ހަމަ ޖީ.އެމް.އާރު.ގައި ހިނގާ މައްސަލައިގައި، ސަރުކާރަށް ޢާޒިމާ ހަމަ ވަރަށް ބޮޑަށް އެހީތެރިވެވަޑައިގެން ދެއްވާ.
________________________