بســم اللّـه الرّحمـن الرّحيــم
ޢަލީ ނާފިޒް – ހަވީރު ނޫސް
ހަވީރުން ނާފިޒު އިނގޭތޯ. މީ މަޖިލީހުގެ ރައީސްގެ ކަންތަކުގައި އިއްޔެ ޕީ.ޕީ.އެމް. އިން ގޮތެއް ނިންމާފައި މިއޮތީ. މިއީ، ކައުންސިލުގެ ނިންމުމެއްތޯ؟
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް:
މަޖިލީހުގެ ރައީސްގެ މައްސަލައަކީ، ކައުންސިލުން ޖެހިވަޑައިގަންނަވާ މައްސަލައެއް ނޫން. އެއީ، ޕީ.ޖީ.ގެ މައްސަލައެއް. ޕާޓީގެ ރައީސާއި އަޅުގަނޑާ ވާހަކަ ދައްކާފައި، އެބޭފުޅުންގެ މަޝްވަރާގެ މަތިން އެ އޮތީ ނިންމާފައި.
ޢަލީ ނާފިޒް – ހަވީރު ނޫސް
މަޖިލީހުގެ މިހާރުގެ ނައިބު ރައީސް، ނާޒިމްވެސް ޝައުޤުވެރިކަން ފާޅުކުރައްވާފައިވަނީ ރައީސްކަމަށް ކުރިމަތިލެއްވުމުގެ. ކިހިނެއްތޯ، ނާޒިމް ނިންމަވާގޮތަކުން ޕާޓީގެ ބޭރުން ވާދަކުރައްވަން ނިންމަވާފާނެތޯ؟ ކިހިނެއްތޯ، ޕާޓީއިން މިކަހަލަ ޙާލަތެއްގައި ޢަމަލު ކުރައްވާނީ؟
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް:
އަޅުގަނޑަށް ވަރަށް އުނދަގޫވާނެ ދޮއެއްތޯ، އެހެން ބޭފުޅަކު ކަންތައް ކުރައްވާނެ ގޮތަށް އެއްޗެއް ދަންނަވަން. ޕާޓީގެ ނިންމުން އިއްޔެ އެއޮތީ ނިންމާފައި. އެއީ، މަޖިލީހުގެ ރައީސްކަމަށް މަސީޙު އަދި ނައިބު ރައީސްކަމަށް ޢަބްދުއްރަޙީމް ޢަބްދުﷲ. ދެން އަޅުގަނޑުމެންގެ ޕާޓީގެ އެހެން މެންބަރަކު، ނާޒިމް ނަމަވެސް، އަމިއްލަފުޅު ގޮތުން ނާޒިމުގެ ނަންފުޅު ބޭއްވެވުމަކީ ކުރެއްވިދާނެކަމެއް. އެކަމަކު ދެން އެއީ ޕާޓީއެއްގައި މެމްބަރުން ޙަރަކާތްތެރިވާއިރު، ޕާޓީގެ އުސޫލާ އެއްގޮތަށް ހިނގާކަމަކަށް ނުވާނެ. އެހެންވެއްޖެއްޔާ އެއީ، ދެން ވަރަށް ދެރަކަމަކަށް ވާނީ. އެހެންވީމާ، ނާޒިމްވަރުގެ ޒިންމާދާރު ބޭފުޅަކު އެވަރު ކަމެއް ނުކުރައްވާނެކަމަށް އަޅުގަނޑު ހަމަ ޔަޤީންކުރަން.
އަޙްމަދު ޖަދުވާން– ދި-ޓީވީ
މަޖިލީހުގެ ރައީސްގެ މައްސަލައިގައި ކޯލިޝަންގެ ތެރޭގައި ހިމެނިވަޑައިގަންނަވާ ޖުމްހޫރީ ޕާޓީގެ ލީޑަރު ޝައުޤުވެރިކަން ފާޅުކުރައްވާފައި އޮތީ. އެކަމާ ޖުމްހޫރީ ޕާޓީގެ ލީޑަރާ މަޝްވަރާ ކުރައްވާނަންތޯ؟ މަނިކުފާނު ކުރިން ވިދާޅުވެފައިއޮތީ މަޝްވަރާ ކުރައްވާނެ ވާހަކަ.
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް:
އާދެ! ވަރަށް ގިނަ މަޝްވަރާކުރެވުނު އިނގޭތޯ. ވަރަށް ގިނަ މަޝްވަރާ ކުރެވުނު. ޕާޓީއިން ވަނީ، ދެފަހަރު، ލިޔުމުންވެސް ޤާސިމަށް އަޅުގަނޑުމެންގެ ޕޮޒިޝަނާއި އަދި ޤާސިމު އެގޮތަށް ކަންތައް ކުރެއްވީމަ ދިމާވާނެ ގޮތާ، މިހުރިހާ ވާހަކައެއް ދަންނަވާފައި ވަނީ. އެހެން ނަމަވެސް، ޤާސިމަށް އަދި އެކަން ޤަބޫލު ނުކުރެއްވެނީ.
ޢަލީ ނާފިޒް – ހަވީރު ނޫސް
ޤާސިމް ކުރިމަތިލައްވައިފިނަމަ، މި ކޯލިޝަނަށް ކޮންކަހަލަ ބަދަލުތަކެއްތޯ އަންނާނީ؟
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް:
ޤާސިމު ކުރިމަތިލައްވައިފިނަމަވެސް މަޖިލީހުން ހޮވޭނީ މެމްބަރުން ވޯޓުދެއްވާ ރައީސެއް.
ޢަލީ ނާފިޒް – ހަވީރު ނޫސް
ކޯލިޝަނަށް އެއްވެސް ކަހަލަ ހީނަރުކަމެއް އަންނާނެތޯ؟
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް:
ދެން، ކޯލިޝަންގެ މައްސަލައަކީ ޕާޓީއިން ނިންމާނެކަމެއް ދެއްތޯ. ޝައްކެއްވެސްނެތްގޮތެއްގައި ކޯލިޝަނުގައި އޮންނަ އެކުވެރިކަމަށް ދެން ބުރުލެއް އަރާނެ. އެއީ، ކޯލިޝަނަކީ ހަމަ ދެފަރާތުގެ ގުޅުން، ކޯލިޝަނުގައި ހިމެނޭ ހުރިހާ ޕާޓީތަކެއް ގުޅުން. އެހެންވީމާ، އާންމު ޢުސޫލަކީ، ދުނިޔޭގެ ހުރިހާ ތަނެއްގައިވެސް މެޖޯރިޓީ ގޮނޑި ނަގާ ބަޔަކު ސްޕީކަރެއް ދައްކާނީ. އެހެންވީމާ، ކޯލިޝަނުގެ ތެރެއިން އަދި ހިމެނިވަޑައިގަންނަވާ އެހެން ޕާޓީތަކުން ބޭބޭފުޅުންގެ ނަންފުޅު ދެއްކުމަކީ، ޢާންމުކޮށް ކުރާކަމެއް ނޫން. އެއީ ހަމަ ޢުސޫލާ ޚިލާފުކަމެއް.
ޢަލީ ނާފިޒް – ހަވީރު ނޫސް
އަދި އިތުރަށް ޤާސިމާ މަޝްވަރާކުރައްވާނަންތޯ؟
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް:
ދެން، ޤާސިމު އަދިވެސް އެއޮތީ އަޅުގަނޑުމެންގެ ރައީސް، ޕާޓީގެ ފަރާތުން އެންމެފަހުން ފޮނުވި ސިޓީއަށް ޖަވާބު ނުދެއްވާ. އެހެންވީމާ، އަދިވެސް މަޝްވަރާގެ ދޮރުތައް އެހުރީ ހުޅުވިފައި. އެކަމަކު ދެން އަޅުގަނޑުމެންނަށް ކޮށްދެވޭނީ ކީއްކަމެއް ނޭނގޭ. ދެން ހަމަ ޖެހޭނީ ޤާސިމުގެ ނަންފުޅު ނަންގަވަން، އަޅުގަނޑަށް ވިސްނޭގޮތުގައި. ޤާސިމަށް އަޅުގަނޑުމެންނަށް ކޮށްދެވޭނެ އިތުރުކަމެއް މިހާ ހިސާބަކުންނެއް ނެތް.
ޢަލީ ސުލައިމާން – ވީ.ޓީ.ވީ
28 ވަނަ ދުވަހު މަޖިލީހުގެ ރައީސެއް ޢައްޔަންވެގެންދާނެ. ދާއިރު، ފަހަރެއްގައި ހަމަ އެކަށީގެންވޭ ޕީ.ޕީ.އެމް އިން ހުށަހަޅާ ބޭފުޅުންވެސް ހަމަ ނުހޮވުން. އެހެންވީމާ، ނިމިގެން ދާގޮތަކާ ދޭތެރޭ ސަރުކާރުންވެސް ޤަބޫލުކުރައްވަންޖެހޭނެ.
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް:
ޝައްކެއްވެސްނެތް ދޮއެއްތޯ.
ޢަލީ ސުލައިމާން– ވީ ނިއުސް.
ދެން އެގޮތުން ވަކި ބޭފުޅަކު ހޮވިގެން، ނުވަތަ ވަކި ބޭފުޅަކު ނުހޮވިގެން ކޯލިޝަނަށް އެކަމުން އަރާނެ ބުރުލެއް އޮންނާނެތޯ؟
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް:
މިހާރު ތިޔަ ސުވާލު ދެންމެ އެކުރެއްވީ ދޮއެއްތޯ. މިސާލަކަށް އެމް.ޑީ.ޕީ.ގެ ބޭފުޅަކު އެކަމަށް ކުރިމަތިލައްވައިގެން، އެމް.ޑީ.ޕީގެ ބޭފުޅަކު ހޮވިއްޖެއްޔާ އެއީކީ ކޯލިޝަނާ ބެހޭކަމެއް ނޫން. އެހެންނަމަވެސް، ކޯލިޝަނުގައި ހިމެނޭ ޕާޓީތަކުގެ ތެރެއިން، ބޭފުޅަކު ކުރިމަތިލައްވައިގެން ޕީ.ޕީ.އެމްގެ ކެންޑިޑޭޓު ނޫން ބޭފުޅަކު ހޮވިއްޖެކަމަށްވަންޏާ އެއީ، ދެން މައްސަލައެއް. އެއީ ދެން ހަމަ އަޅުގަނޑުމެން ޕާޓީ ތެރޭގައި ވާހަކަ ދައްކާފައި، ކޯލިޝަނާ ވާހަކަ ދައްކާފައި، އެއަށް ޢަމަލުކުރާނީ ކިހިނެއްތޯ ނިންމާނީ ދޮއެއްތޯ. އެއީކީ، ސީދާ ރައީސުލްޖުމްހޫރިއްޔާ ނިންމާ މައްސަލައެއް ނޫން. އެއީ، ޕާޓީއާއި ޕާޓީއާ އެއް ލެވެލްގައި އޮންނަ މައްސަލައެއް.
ޢަލީ ސުލައިމާން – ވީ.ޓީ.ވީ
ދެން، އިންޑިޔާއަށް ތިޔަ ވަޑައިގަންނަވަނީ މޯދީގެ ހުވާކުރެއްވުމުގެ ރަސްމިއްޔާތަށް. މި ރަސްމިއްޔާތަށްފަހު، އިންޑިޔާ ސަރުކާރާއި ދިވެހި ސަރުކާރާ ދެމެދު އެއްވެސް ކަހަލަ ބައިލެޓްރަލް މަޝްވަރާތަކެއް ކުރެވޭނެތޯ؟ ކުރެވޭނީ ކޮންކޮން ދާއިރާތަކަކުންތޯ؟
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް:
އަޅުގަނޑު، ދިވެހިރާއްޖޭގެ ފަރާތުން ވަފުދެއް ގޮވައިގެން އިންޑިޔާއަށް ދިޔައީ ދާދިފަހުން ދޮއެއްތޯ. ދެން އެހެންވީމާ، އޭރު އަޅުގަނޑުމެން ނަގާފައި ހުރި މައްސަލަތައް އަނެއްކާވެސް ނަގާނީ. މާދަމާ އޮންނާނެ، ރަސްމީ ވާހަކަދެއްކުން ދެޤައުމުގެ ވެރިންގެ ލެވެލްގައި. އެ ރަސްމީ ވާހަކަދެއްކުމުގައި އަޅުގަނޑުމެން އޭރުވެސް ނަގާފައިހުރި މައްސަލަތައް ނަގާނީ. އެއީ، އިންޑިޔާއާއި އަޅުގަނޑުމެންނާ ދޭތެރޭގައި މިއޮތް އެކުވެރިކަމުގެ ގުޅުން ދެމެހެއްޓުމުގެ ތެރެއިން، އިންޑިޔާގެ ސަރުކާރުން، އިންޑިޔާގެ އެކިއެކި އިންވެސްޓަރުން ރާއްޖޭގައި ކުރަން ހުށަހަޅާފައި ހުރި މަސައްކަތްތަކާއި އަދި ދިވެހި ދައުލަތަށް، ދިވެހިރާއްޖެއަށް، އިންޑިޔާގެ ފަރާތްތަކުން ބޭނުންވާ ކަންތައްތައް. އެ މަޝްވަރާތައް މާދަމާ ކުރެވޭނެ. ދެން، އޭގެ އިތުރުންވެސް ސާކުގެ 8 ޤައުމުގެ ވެރިންވެސް ވަޑައިގެން އުޅުއްވާނެތީއާއެކީގައި އަޅުގަނޑު އޭގެތެރެއިން ބައެއް ބޭފުޅުންނާ ބައްދަލުކުރަންވެސް ޚިޔާލުކުރަން. އަދި މިހާރުވެސް ބައެއް ބޭފުޅުންނާ އަޅުގަނޑު ބައްދަލުކުރަން ވަގުތުވެސް އެހެރީ ހަމަޖެހިފައި. ދެން އިރާދަކުރެއްވިއްޔާ، މީގެ ތެރެއިން ގިނަ ބޭފުޅުންނާ ބައްދަލުކުރެވޭތޯވެސް އަޅުގަނޑުމެން ބަލާނަން. އެހެންނަމަވެސް ވަގުތުވެސް ހަމަ ވަރަށް ކުޑަ. މިއަދު ހަމަ މިދާގޮތަށް، މިރޭގެ ނިޔަލަށް މި ފަންކްޝަންތަކުގައި އުޅެން މިޖެހެނީ. އުޅެފައި، މާދަމާ މިހުރީ ރަސްމީ ވާހަކަތައް. ދެން އެއަރޕޯޓަށް ފުރުމުގެ ކުރިން އަދި ބީ.ޖޭ.ޕީ.ގެ ލީޑަރުން، ވެރިކަންކުރާ ޕާޓީގެ ލީޑަރުންނާވެސް ބައްދަލުކުރުން އެބައޮތް. އެހެންވީމާ، ވަގުތު ލިބުނު މިންވަރަކުން ހަމަ އެހެން ޤައުމުތަކުގެ ވެރިންނާވެސް ބައްދަލުކުރަން އަޅުގަނޑު ޚިޔާލުކުރަން.
ޢަލީ ނާފިޒް – ހަވީރު ނޫސް
މަނިކުފާނު މިދިޔަ ޖެނުއަރީމަހު އިންޑިޔާއަށް ކުރެއްވި ދަތުރުފުޅުގައިވެސް އިންޑިޔާއިން އެދިފައިމިވަނީ އެއަރޕޯޓުގެ މައްސަލަ ދެފަރާތަށް އެއްބަސްވެވޭގޮތަކަށް ޙައްލުކުރުން. މިފަހަރު އައު ސަރުކާރާއެކު އެއަރޕޯޓުގެ އެއްވެސް މަޝްވަރާއެއް ކުރެވޭނެތޯ؟.
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް:
އަޅުގަނޑާ ހަމައަކުންނެއް އެއަރޕޯޓުގެ މައްސަލައެއް ނުނަގާނަން. އެހެނެއްނޫން، އިންޑިޔާ ސަރުކާރުން އެއަރޕޯޓުގެ މައްސަލަ ނަންގަވައިފިކަމުގައިވަންޏާ ދިވެހި ސަރުކާރުން އެކަމުގައި ދެކޭގޮތް ދަންނަވާނަން. އެއަރޕޯޓުގެ މައްސަލަ ދެފަރާތުން ވާހަކަދައްކައިގެން ޙައްލުކުރުމުގެ ފުރުޞަތު އޮތް. އަޅުގަނޑުމެން އެކަމަށް އެދުނިން. އެހެންނަމަވެސް، ޖީ.އެމް.އާރު.ގެ ފަރާތުން އެ މައްސަލައިގައި ދެފަރާތުން ވާހަކަ ދައްކައިގެން މިކަމަށް ޙައްލެއް ހޯދަން މިވަގުތަށް ބޭނުންނުވާކަމަށް އަޅުގަނޑުމެންނަށް ޚަބަރުކޮށްފައި މިއޮތީ. އާރބިޓްރޭޝަނުން ގޮތެއް ނިމުނީމާ، އޭގެފަހުން ވާހަކަ ދައްކަން. އެހެންވީމާ، މިހާރަކު ހިޔެއްނުވޭ އެމީހުންގެ އެވަރުގެ ޝައުގުވެރިކަމެއް އޮތްހެނެއް. ލަފައެއްވެސް ނުކުރެވޭ އިންޑިޔާ ސަރުކާރުގެ ފަރާތުން މިމައްސަލަ މިފަހަރު ނަންގަވަފާނެކަމަށްވެސް.
މުޙަންމަދު މިއުވާން - ރާއްޖެ ޓީވީ:
އިންޑިޔާއިން ތެޔޮ ލިބުމުގެ މައްސަލައަށް އެއްވެސް ކަހަލަ ޙައްލެއް ނުލިބޭތޯ؟ މިކަމަށް މަސައްކަތް ކުރެވޭނެތޯ؟
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް:
ހަމަ މަސައްކަތްކުރެވޭނެ އިނގޭތޯ. އަޅުގަނޑުމެންނަށް އިންޑިޔާއިން ތެޔޮ ލިބުމުގެ ދަތިކަމެއް އުޅެނީކީއެއްނޫން. އަޅުގަނޑުމެން އަލަށް އިންޑިޔާއިން ތެޔޮ ހޯދަން، ތެޔޮ ގެންނަން މި މަސައްކަތްކުރަނީ. އެހެންވީމާ، އެތަނުގެ ފެޑެރަލް ގަވަރންމަންޓާއި، ސެންޓްރަލް ގަވަރންމަންޓާ ސަރަޙައްދީ ޤައުމުތަކާ ދޭތެރޭގައި ހުންނަ ނިންމުންތައް ނިންމަންޖެހޭތީ. އެހެންނަމަވެސް، އަޅުގަނޑަށް ހަމަ ޔަޤީން، އިރާދަކުރެއްވިއްޔާ އެކަންވާނެ. ދެން، އެކަން އަވަސްވޭތޯ އަޅުގަނޑު މަސައްކަތްކުރާނަން. އެހެންވީމާ، އަނެއްހެނެއް ދެން މީގައި ދަތިކަމެއް އުޅެނީއެއްނޫން، އެކަމަކު ބައެއް ޤައުމުތަކުގައި މިކަހަލަ ޕްރޮސެސްއަކީ، ވަރަށް ދިގުލާ ޕްރޮސެސްއަކަށްވަނީ. ދެން ސަރުކާރުގެ ލެވެލްގައި ހިންގާ ކަމެއް މިއީ. އެހެންވީމާ، އަޅުގަނޑަށް ހީވަނީ އެއުޅެނީ ކެޕިޓަލާއި ސަރަޙައްދީ ސްޓޭޓާ ދޭތެރޭގައި ލިޔެކިޔުންތައް ބަދަލުކޮށް، މިކަންކަމަށް ގޮތެއް ނުނިމިގެންހެން ހީވަނީ އަދި. އެހެންވީމާ، މިކަން އިރާދަކުރެއްވިއްޔާ ވާނެ.
________________________