بســم اللّـه الرّحمـن الرّحيــم
اَلحَمْـدُ لِلّـهِ رَبّ العَـالَمِـين، وَالصّـلاة وَالسّلام علـى سيدنا محـمَّدٍ، خاتم الأنبياء والمرسلين، وَعلـى آلـه وَصَحْبِـهِ أجمـعـين.
އެންމެހާ ލޮބުވެތި ދަރިވަރުން، ދަރިވަރުންގެ ޢިއްޒަތްތެރި މަންމައިންނާއި ބައްޕައިން، ލޮބުވެތި މުދައްރިސުން، ތަޢުލީމީ ދާއިރާގެ އިސްބޭފުޅުން، އެންމެހާ ޢިއްޒަތްތެރިން.
السّــلام عليــكم ورحـمــة اللّـه وبـركاتـه،
އާދެ! ޝައްކެއްވެސްނެތް، މިރޭގެ މި އުފާވެރި މުނާސަބަތުގައި، ތިޔަކުދިންނާ ބައްދަލުކޮށް، ތިޔަކުދިން ތިޔަކުރި މަސައްކަތުގެ އަގުހުރި ނަތީޖާ، ދިވެހި ދައުލަތަށާއި، މުޅި ދުނިޔެއަށް ފެނިގެންދާ ވަގުތެއްގައި، ތިޔަކުދިންނާ ބައްދަލުކޮށް، ތިޔަކުދިންނަށް މަރްޙަބާ ކިޔަން މިފުރްޞަތު ލިބުނު ކަމަށްޓަކައި، ވަރަށް އިޚްލާޞްތެރިކަމާއެކީ ﷲގެ ޙަޟުރަތަށް ޙަމްދުކޮށް ޝުކުރު ކުރަމުން، ތިޔަ އެންމެ ކުދިންނަށް އުފަލާއެކު މަރްޙަބާ ކިޔަން.
އާދެ! ޝައްކެއްވެސްނެތްގޮތުގައި، ތިޔަކުދިންނަށް މަރްޙަބާ ކިޔާއިރު، ތިޔަކުދިންނަށް އެނގޭނެ، ތިޔަކުދިންގެ މި ކާމިޔާބުގެ ފަހަތުގައި، ތަފާތު އެތަކެއް ފަރާތްތަކެއްވާކަން. ޝައްކެއްވެސްނެތްގޮތުގައި، ތަޢުލީމީ ޙަޔާތެއް، ފުރަތަމަ މަރްޙަލާ ނިމިގެންދާއިރު، ކުދިންގެ މުދައްރިސުންގެ މަތިން ހަނދާނެއް ނުނެތޭނެ. އަދި ތަޢުލީމީ ދާއިރާގެ އިސްބޭފުޅުންގެ ފަރާތުންވެސް ހަނދާނެއް ނުނެތޭނެ. އެހެން ނަމަވެސް، އެޔާއެކީ ތިޔަކުދިންނަށް ތިޔަހާ ބުރަ މަސައްކަތެއްކޮށް، އަދި ޙަޔާތުގެ އެހެން ކަންކަމާ ދޭތެރޭގައި ވިސްނަންނުޖެހި، ތިޔަކުދިން މިހިސާބަށް ތަރުބިއްޔަތުކޮށްދިން މައިންބަފައިންނަކީ، މިރޭގެ އެންމެ ފަޚްރުވެރި ޝުކުރުގެ ޙައްޤުވެރިން. އެކަމަށްޓަކައި ތިޔަ އެންމެ ކުދިންގެ ލޮބުވެތި މަންމައިންނަށް، ބައްޕައިންނަށް، ވަރަށް އިޚްލާޞްތެރިކަމާއެކީ ތަހުނިޔާ ދަންނަވައި ޝުކުރު ދަންނަވަން.
އާދެ! މި ފަހަކަށްއައިސް، މިއިން ކޮންމެ ޖަލްސާއަކީ، ދިވެހިރާއްޖެ، ދިވެހި ދައުލަތް، ދިވެހި ރައްޔިތުންނަށް ވަރަށް ބޮޑެތި އުފާތަކެއް ގެނެސްދޭ ޙަފްލާތަކެއް. އާދެ! މިކަހަލަ ކޮންމެ ޖަލްސާއަކުން އަޅުގަނޑުމެންނަށް ފެނިގެންދަނީ، ދުނިޔޭގެ އެންމެމަތީ ވަނަތަކުގައި ދިވެހިކުދިން ޝާމިލުވާތަން. އަޅުގަނޑުމެންނަށް ފެނިގެން މިދަނީ، ދުނިޔޭގެ އެންމެމަތީ ވަނަތަކުން ދިވެހިކުދިން މަތީ ފާސް ހޯދާތަން. މަތީ ކާމިޔާބުތައް ޙާޞިލުކުރާތަން. މުޅި ދުނިޔެއިން އިނގިރޭސިން 1 ވަނަ، މުޅި ދުނިޔެއިން ހިސާބުން 1 ވަނަ، މުޅި ދުނިޔެއިން އެކައުންޓިންގ އިން 1 ވަނަ، އަދި މިހެންގޮސް އެތަކެއް މާއްދާތަކުން މުޅި ދުނިޔެއިން 1 ވަނަ، މިއީކީ ކުޑަކުޑަ އެކޮމްޕްލިޝްމަންޓެއް ނޫން. މިކަހަލަ މަތީ ޝަރަފްވެރި ވަނަތައް ދިވެހިރާއްޖެއަށް، ދިވެހި ލޮބުވެތި ކިޔަވާކުދިން ގެނެސްދޭތާ ދުވަސްތަކެއް ވެއްޖެ. ޝައްކެއްވެސްނެތްގޮތުގައި، މިކަމުން އަޅުގަނޑުމެންނަށް ދައްކައިދެނީ، ދިވެހި ކުދިންގެ ޤާބިލުކަން. އަދި އެކުދިންގެ މުދައްރިސުން، އެކުދިންނާ ދޭތެރޭގައި ބަހައްޓަވާ އޯގާތެރިކަމާއި، ކިޔަވައިދެއްވުމުގެ ފެންވަރު.
ކޮންމެ ސްކޫލެއްގެ އަހަރު ނިމިގެންދާއިރު، އަހަރީ ރިޕޯޓް އިވޭއިރު އަދި ޢާންމު ޖަލްސާތަކުގައި އަޅުގަނޑުމެން ބަލައިލަންޖެހެނީ، އެ އަހަރެއްގައި ނިމިދިޔަ ކަންތައްތަކާ ދޭތެރޭގައި. ހުވަފެންތައް ޙަޤީޤަތަށްވޭ. އެހެން ނަމަވެސް، ހުވަފެނެއް ނުފެނުމަކީ، ފެއިލިއަރަކަށްވެސް ވާކަށްނުޖެހޭ. އަދި ހުވަފެނަކުން ޙަޤީޤަތެއް ޙާޞިލުކުރި ކަމުގައިވި ނަމަވެސް، އެ ޙަޤީޤަތަކީ ދާއިމީ ޙަޤީޤަތަށް ނުވެދާނެކަމާ ދޭތެރޭގައި، ތިޔަ އެންމެ ކުދިން ވިސްނަންޖެހޭ. އެހެން ނަމަވެސް، ޙަޔާތަކީ ހުވަފެންތަކެއްގެ މައްޗަށް ބިނާކޮށް، އުންމީދުތަކެއްގެ މައްޗަށް ބިނާކޮށް ފަށާ ދިގު ދަތުރެއް. މިރޭ މި އުފާވެރި ޖަލްސާގައި، އެތަކެއް ކުދިން ވަނީ މި ޝަރަފްވެރި ވަނަތައް ޙާޞިލުކޮށްފައި. އަޅުގަނޑަށް އެހުރިހާ ކުދިންގެ ނަންތައް އަދި އިޢުލާނުވެގެން ދިޔުމުގެ ކުރިންވެސް ތިޔަ އެންމެ ކުދިންނަށް މަރްޙަބާ ކިޔައި ތަހުނިޔާ ކިޔަން. އާދެ! މުޅި ދުނިޔެއިން 1 ވަނަ ހޯދި ކުދިން މަދެއް ނޫން. ހުރިހާ ލޮބުވެތި ދަރިވަރުންނަށް އަދި ލޮބުވެތި ދަރިވަރުންގެ ޓީޗަރުންނަށް، މަންމައިންނަށް، ބައްޕައިންނަށް އިޚްލާޞްތެރިކަމާއެކީ މަރްޙަބާ ދަންނަވައި، ތަހުނިޔާ ކިޔަން.
އާދެ! ތަޢުލީމުގެ ފުރަތަމަ މަރްޙަލާ މިވަނީ ކަޑައްތު ކުރެވިފައި. ތިޔަކުދިންނަށް އެކިއެކި ހުނަރުތައް މިވަނީ އުނގެނިފައި. ތިޔަކުދިންގެ އިންތިޒާރުގައި ވަނީ ފުރްޞަތުތައް. ތިޔަކުދިންގެ އިންތިޒާރުގައި ވަނީ ގޮންޖެހުންތައް. ތިޔަކުދިންގެ އިންތިޒާރުގައި ވަނީ އުފާވެރިކަން. ހަމައެހެންމެ، ތިޔަކުދިންގެ އިންތިޒާރުގައި، މަދުން ނަމަވެސް ހިތްދަތި ކަންތައްތަކާ ކުރިމަތިލާންޖެހޭނެ. މިއީ ޙަޔާތުގެ ދަތުރު. ތިޔަކުދިންނަށް އެތަކެއް ހުނަރުތަކެއް، ދުނިޔޭގައި އުޅުމުގެ، ތިޔަކުދިން ކުރަން ބޭނުންވާ މަސައްކަތެއް، ކާމިޔާބުކަމާއެކީ ކުރުމުގެ އަދި މަތީ ތަޢުލީމާ ހަމައަށް ވާސިލުވާން ތިޔަކުދިން ބޭނުންވާ އެތަކެއް ހުނަރުތަކެއް، މި ސްކޫލްގެ ފިލާވަޅުތަކުން ތިޔަކުދިންނަށް ދަސްކޮށްދޭ. މަދްރަސާގެ ފުރަތަމަ މަރްޙަލާ ނިމިގެންދާއިރު، މަތީ ޘާނަވީ ތަޢުލީމަށް، ނޫނިއްޔާ ޔުނިވަރސިޓީ ތަޢުލީމަށް، ނޫނިއްޔާ އަދި އެއަށްވުރެ މައްޗަށްދާ ކަމަށްވަންޏާ، ތިޔަކުދިންނަށް ޝައްކެއްވެސްނެތްގޮތުގައި ހުނަރުތަކެއް ލިބޭނެ. ތަފާތަކަށްވަނީ މިއަދު ތިޔަކުދިން ތިޔަ ފަށަނީ، ތިޔަކުދިންގެ ޙަޔާތުގެ އަމިއްލަ ދަތުރު. ތިޔަކުދިންނަކީ، ލޮބުވެތި މަންމައިންނާއި ބައްޕައިންގެ ހިޔާވަހިކަމުގެ ދަށުގައި މިއަދު މިހާ ހިސާބަށް އައިއްސަ ތިބި ކުދިން. އެހެން ނަމަވެސް، މަތީ ޘާނަވީއާ ހަމައަށްދާއިރު، ހުރިހާ ކުދިންނަކީ މި އުފާވެރި ކަމުގައި ތިބޭނޭ ކުދިންނަށްނުވެ ހިނގައިދާނެ. ވަރަށްގިނަ ކުދިންނަކީ، އެކި ދިމަދިމާލުން އެކިގޮތްގޮތަށް ލިބޭ ސްކޮލަރޝިޕްގައި ކިޔަވާ ކުދިންނަށް ވެދާނެ. ރާއްޖޭގައިވެސް އަދި ރާއްޖެއިން ބޭރުގައިވެސް. އެހެން ނަމަވެސް، ތިޔަކުދިންނަށް ހުރި ފުރްޞަތުތަކާ ދޭތެރޭގައި، ތިޔަކުދިން ވިސްނާއިރު، ތިޔަކުދިން ގަބޫލުކުރަންޖެހެނީ، ތިޔަކުދިން މިހާރު ކުރިމަތިލައި ތިޔަތިބީ، ނޫނިއްޔާ ނޭވާ ތިޔަލަނީ ޙަޤީޤީ ދުނިޔެއާކަން. ތިޔަކުދިން ކިޔަވަން ރާއްޖެއިން ބޭރަށްދާކަމަށްވަންޏާ، ދުނިޔޭގެ އެކި ޘަޤާފަތްތަކާ ތިޔަކުދިން ބައްދަލުކުރާނެ. ދުނިޔޭގެ ތަފާތު ނަސްލުތަކުގެ މީހުން ދިރިއުޅޭގޮތް، ތިޔަކުދިންނަށް ފެންނާނެ. ދުނިޔޭގެ އެކި ހިސާބުގައި، ތަފާތު މީހުންގެ ވިސްނުން ހުންނަގޮތާއި އަދި ތިޔަކުދިން މިހާތަނަށް ކިޔަވާފައި ހުރި އެއްޗަކާއި، ތިޔަކުދިންގެ ޢަޤީދާއާ ސުވާލުކުރާ އެތަކެއް ކަމެއް، ތިޔަކުދިންނާ ކުރިމަތިލާނެ. އެހެންވީމާ، އަޅުގަނޑުމެން އިނގިރޭސިބަހުން ކިޔާ ކަމަށްވަންޏާ، މި ބުނަނީ، welcome to the real world އޭ. އާދެ! ޙަޤީޤީ ދުނިޔެއަށް ތިޔަކުދިންނަށް މަރްޙަބާ ކިޔޭ ފުރަތަމަ މަރްޙަލާ، ތިޔަކުދިން މިރޭ ތިޔަ ފަށްޓަނީ. އެހެން ނަމަވެސް، ތިޔަކުދިންގެ ތެރެއިން ގިނަ ކުދިންނަކީ އަދިވެސް ލޮބުވެތި މަންމަޔަކާއި ބައްޕައެއްގެ އޯގާތެރި ބެލުމުގެ ދަށުގައިވާ ކުދިން، ހިޔާވަހިކަމުގެ ދަށުގައިވާ ކުދިން. އެހެން ނަމަވެސް، މިކަމެއް މާގިނަދުވަހަކު ދެމިނޯވެ ހިނގައިދާނެ.
އަޅުގަނޑު ތިޔަކުދިންނަށް ކުރާ އިލްތިމާސަކީ، ޙަޤީޤީ ދުނިޔެއާ ކުރިމަތިލާއިރު، ޙަޤީޤީ މައްސަލަތަކާ ކުރިމަތިލާއިރު، ގޮންޖެހުންތަކާ ކުރިމަތިލާއިރު، ތިޔަކުދިންގެ އިންތިޒާރުގައިވާ ފުރްޞަތުތަކާ ތިޔަކުދިން ކުރިމަތިލާއިރު، މީގެ އެންމެ ފުރިހަމަ ބޭނުން، ކޮންމެ ކުއްޖަކުވެސް ހިފާށޭ. މަދްރަސާއިން ދަސްވެނިވެގެން ނުކުންނާނީ، ބައެއްކަހަލަ ހުނަރުތައް ލިބިގެން. ހުރިހާ ކަމަކީ ދަސްކޮށްދޭނެ ކަންކަމެއް ނޫން. ހުރިހާ ކަންކަމާ ދޭތެރޭގައި ޓެކްސްޓް ފޮތްތަކެއް ލިޔެފައެއް ނުހުންނާނެ. ވަރަށްގިނަ ކަންކަމަކީ، ތިޔަކުދިންނަށް ނަގައިދީފައި މިހިރަ އަސާސީ ހުނަރުތަކުގެ އަލީގައި، ތިޔަކުދިންގެ ވިސްނުމާއި، ތިޔަކުދިންގެ އިންޓަރރެކްޝަނާއެކީ، ތިޔަކުދިން ތަރައްޤީ ކުރާނެ ތިޔަކުދިންގެ ކެރެކްޓަރ. އެކަން ތިޔަކުދިންނަށް ކާމިޔާބުކަމާއެކީ ކުރެވިއްޖެ ކަމަށްވަންޏާ، ތިޔަކުދިންނަށް ދަސްވެނިވުމުގެ ނަޞީބު ލިބުނު ކަމަށް ތިޔަކުދިން ގަބޫލުކުރާނެ. އުފާވެރި ޙަފްލާއަކުން މޮޅު ކުދިންތަކެއް ފެނިގެންދާނެ. އެހެން ނަމަވެސް، އެކުދިންގެ ޙަޤީޤީ މޮޅުކަން ފެނިގެންދާނީ، އެކުދިން ކިޔެވި އެއްޗެއް އެކުއްޖަކަށް، އެކުއްޖަކަށް ދިމާވާ ޙާލަތްތަކުގައި ބޭނުންކުރަން އެނގޭ މިންވަރުގެ މޮޅުކަމުން. މަދްރަސާގައި ކިޔަވައެއްނުދޭނެ، އެކުއްޖާ ކިޔެވި ކޮންމެ އެއްޗެއް އެޕްލައިކުރާނެ ގޮތެއް. އެޕްލައި ކުރާނެގޮތް، އެކުއްޖާ ދަސްކުރަންޖެހެނީ، މަސައްކަތުގެ ވެށިން. ނޫނިއްޔާ އަޅުގަނޑު މިދެންނެވި ކަހަލަ ތަފާތު އިންޓަރރަކްޝަންތަކުން. ދިވެހިރާއްޖެއަށް ބޭނުންވާ ފަންނުތައް ވަރަށް ތަފާތު. ދިވެހިރާއްޖެއަށް ބޭނުންވާ ފަންނުތައް ވަރަށްގިނަ.
ދިވެހިރާއްޖެއަކީ ޒުވާނުންގެ އާބާދީ އޮތް، ޒުވާނުންގެ ދިވެހިރާއްޖެއެއް. ދިވެހިރާއްޖެ ކުރިއަށް ގެންދަން ބޭނުންވަނީ، މިދެންނެވި ތަފާތު ޚިޔާލުތައް އެޕްލައިކޮށްގެން، އަޅުގަނޑުމެން މިހާރު މިއޮތް މަރްޙަލާއިން މައްޗަށް ޖައްސާލެވޭނެ މަރްޙަލާއަކަށް އަމާޒުކުރާނެ ހީވާގި، ހުނަރުވެރި އަދި މަސައްކަތް ކުރަން ކެރޭނެ ޤާބިލު ޒުވާން ކުދިންތަކެއް، މި މަސައްކަތަށް ނުކުމެގެން. މިވާހަކަ ދަންނަވާއިރުވެސް، އުފާވެރިކަމާއެކީ، އަޅުގަނޑު އުފަލާއެކީ މިރޭ ދަންނަވާލާނަން. އިރާދަކުރެއްވިއްޔާ، ﷲގެ ރަޙްމަތާއެކީ މިއަހަރުގެ ތެރޭގައި، ދިވެހިރާއްޖޭގައި އިސްލާމިކް ޔުނިވަރސިޓީއެއް ޤާއިމްވެގެންދާނޭ. މަދްރަސާ ކުދިންނަށް ބޭނުންވާ ތަފާތު އެތަކެއް ކަންތައްތަކެއް ދިވެހިރާއްޖޭގައި ހުރިހާ ސަރުކާރުތަކަކުންވެސް ވަނީ ކޮށްދެއްވާފައި. މިއަދު މިކަހަލަ އުފާވެރި ޙަފްލާއެއްގައި، މިހުރިހާ ސަރުކާރުތަކަކުން އަދި ހުރިހާ ސަރުކާރުތަކެއްގެ ރައީސުންނާއި އަދި ތަޢުލީމާބެހޭ ދާއިރާތަކާ ޙަވާލުވެ ތިއްބެވި ވަޒީރުން ކޮށްދެއްވާފައިވާ އަގުހުރި މަސައްކަތުގެ ނަތީޖާ، އަޅުގަނޑުމެންނަށް ދުނިޔޭގެ ޗާޓުން ފެނިގެން މިދަނީ. އެހުރިހާ ބޭފުޅުންނަށް، ދިވެހިރާއްޖެއަށް، ހިއުމަން ރިސޯސް ތަރައްޤީ ކުރުމަށް، އިންސާނީ ވަސީލަތްތައް މިހާ ފުޅާ ދާއިރާއެއްގައި ޤާއިމުކުރެއްވުމަށް ކުރައްވާފައި ހުރި މަސައްކަތްތައް، މިކަހަލަ ކޮންމެ އުފާވެރި ޖަލްސާއެއްގައި، އަޅުގަނޑުމެންގެ ޚިޔާލަށް ގެނެސް، ހަނދާނަށް ގެނެސް، މިހުރިހާ ބޭފުޅުންނަށް ޝުކުރު ދެންނެވުމަކީ، އަޅުގަނޑަށް ލިބޭ އުފަލެއް.
އަދި ދިވެހި ކިޔަވާ ކުދިންނަށް ބޭނުންވާ ކަންތައްތަކުގެ ތެރޭގައި، އަޅުގަނޑުމެން ދަސްވެނިވަނީ ހަމައެކަނި ފޮތްތަކަކުންނެއް ނޫން. އަޅުގަނޑުމެން ވާންޖެހެނީ ތަރުބިއްޔަތު. އަދި އެޔާއެކީ ސްކޫލްތަކުން ނޫނިއްޔާ ސަރުކާރުން، ސްކޫލްތައް ހިންގާ ފަރާތުން ކުދިންނަށް ކޮށްދެވޭނެ ކަންތައްތަކުގެ ތެރޭގައި، ކުދިންގެ ހަށިގަނޑުގެ ތަރުބިއްޔަތާއި އަދި ކުދިންނަށް ބޭނުންވާ ކަންކަން ޙާޞިލުކޮށްދިނުމަށްޓަކައި ސަރުކާރުން ކުރާ ތަފާތު ކަންތައްތަކެއް އެބަހުރި. މިކަންތައްތަކަކީ ރިޔާސީ އިންތިޚާބަށް ކުރިމަތިލައިގެން އުޅުނުއިރު، އަޅުގަނޑުގެ ޕާޓީގެ ފަރާތުން އަޅުގަނޑުގެ މެނިފެސްޓޯގައި، އަޅުގަނޑުމެންގެ ޕާޓީގެ މެނިފެސްޓޯގައި، ދިވެހި ކިޔަވާ ކުދިންނަށް ކޮށްދޭން ކަނޑައަޅާފައި ހުރި ކަންކަން. މީގެތެރޭގައި ވަރަށްގިނަ ކަންތައްތަކަކީ، މިހާރު އިރާދަކުރެއްވިއްޔާ، ޢަމަލީގޮތުން ފެށިފައި ހުރި ކަންކަން. މީގެތެރޭގައި ވަރަށް އަވަސް ފުރްޞަތެއްގެ ތެރޭގައި، ޚާއްޞަކޮށް، އަންހެން ކުދިންނަށް އަމާޒުކޮށްގެން، އަންހެން ކުދިންނަށް އަމާޒުކޮށްގެން ހެލްތް ސްކްރީނިންގ މަސައްކަތް، ރާއްޖޭގެ އެކި ހިސާބުގައި ފެށިގެންދާނެ. ﷲގެ ރަޙްމަތާއެކީ، އެކިއެކި ކަންތައްތައް ދެނެގަތުމަށް، ނޫނިއްޔާ ނުރައްކާތެރި ބަލިތަކުން ސަލާމަތްވުމަށް، ނޫނިއްޔާ އެކިއެކި ބަލިތައް، އޭގެ އެންމެ ކުރީކޮޅުގައި ދެނެގަތުމަށްޓަކައި، މި ހެލްތް ސްކްރީނިންގގެ މަސައްކަތްތައް، މިއަހަރުގެ ތެރޭގައި، އަތޮޅުތަކުގައި ހުރި ހުރިހާ ސްކޫލްތަކެއްގައި، އަދި މާލޭގެ ސްކޫލްތަކުގައިވެސް ފެށިގެންދާނެ ކަމަށް އަޅުގަނޑަށް އުންމީދު ކުރެވޭ.
އަޅުގަނޑު މިރޭ އެކިއެކި މަތީ ވަނަތައް ޙާޞިލުކުރި ކުދިންނަށް މަރްޙަބާ ދަންނަވަމުން، އަޅުގަނޑު ދަންނަވާލަން ބޭނުންވާ ތަފާތު ވާހަކައެއް އެބައޮތް. ޝައްކެއްވެސްނެތްގޮތުގައި، މިކަހަލަ ދަސްވެނިވުމުގެ ޕްރޮގްރާމެއް ނިމި، ނޫނިއްޔާ، ސަނަދުތަކެއް ހާޞިލްވެގެންދާ ޖަލްސާގައި، ކުދިންނަށް، އެކުދިންގެ ޚިދްމަތުން ސަރުކާރު ބިނާކުރުމާ ބެހޭގޮތުން ވާހަކަ ދައްކަވާނެ ތަފާތު އެތައް ބޭފުޅުންނެއް ތިއްބަވާނެ. މިރޭގެ ޖަލްސާގައި، ދެންމެ މިނިސްޓަރ ޑޮކްޓަރ ޢާއިޝަތު ޝިހާމްވެސް މިކަހަލަ ވަރަށްގިނަ ވާހަކަފުޅުތައް ދައްކަވައިފި. އަޅުގަނޑަށް އެނގޭ، މިއީ އަޅުގަނޑުވެސް ދައްކަންޖެހޭ ވާހަކަ. ހަމަ ކުރުގޮތަކަށް އަޅުގަނޑު ތިޔަ ހުރިހާ ކުދިންގެ ފަރާތުން އެދެނީ، ތިޔަކުދިން ކިޔެވި އެއްޗެއްގެ ބޭނުންހިފައިގެން، ދިވެހި ދައުލަތް އަޅުގަނޑުމެން އަމާޒުހިފަން މި ބޭނުންވާ މިޞްރާބަށް ދިޔުމުގައި، ތިޔަކުދިންގެ އެހީތެރިކަން ބޭނުމޭ. މި ދިވެހިރާއްޖެއަކީ ތިޔަ ހުރިހާ ކުދިންގެ ދިވެހިރާއްޖެ. މިތަނަށް ހަމަޖެހުން އައިއްސިއްޔާ، ހަމަޖެހުމުގެ ހުރިހާ ޙިއްޞާއެއްގެ ބައިވެރިންނަށް ތިބީ ތިޔަކުދިން. މިތަން ހަލާކުވާކަމަށްވަންޏާ، އެ ހަލާކުވުމުގެ ހިތި ނަތީޖާއާއި، ނޫނިއްޔާ ހަލާކުވުމުގައި ޙިއްޞާދާރުންގެ ގޮތުގައިވެސް ވާންތިބީ ހަމަ ދިވެހި ޒުވާނުން. ކިޔަވައިގެން ތިބި ކުދިންނާއި، ކިޔަވާ ކުދިންނާއި، އެނޫން އެހެން ކުދިންނާ ހުރި ތަފާތަކީ، ކިޔަވާ އެއްޗެއްގެ ބޭނުން، އީޖާބީ ގޮތެއްގައި ހިފައިގެން، އީޖާބީ ދިވެހިރާއްޖެއެއް ބިނާކުރަން ކުރާ މަސައްކަތް. މިއީ އަޅުގަނޑުމެން އިންސާނުންނާ ހައިވާނުންނާވެސް ހުރި ތަފާތަކީ. ބުއްދީގެ ބޭނުންކޮށްގެން އަދި އެ ކިޔެވުނު އެއްޗެއްގެ ބޭނުންގެ ބޭނުންހިފައިގެން، އީޖާބީ ގޮތެއްގައި، އެކުދިންގެ ޙަޔާތުގެ ރާސްތާ ކަނޑައަޅައި، އެ ރާސްތާގައި ހިނގަން ކުރާ މަސައްކަތުގެ ނަތީޖާ.
އެހެންވީމާ، އަޅުގަނޑު ވަރަށް ކުރުކޮށް، މި އިލްތިމާސްކޮށްލުމާއެކީ، އަޅުގަނޑު ހުރިހާ ކުދިންނާ ތަންކޮޅެއް ޕްރައިވެޓްކޮށް، އަމިއްލަ ޝަޚްސީ ވާހަކައެއް ދަންނަވާލަން ބޭނުންވޭ، ކޮންމެ ކުއްޖަކަށް އަމާޒުކޮށް.
އަޅުގަނޑު ދަންނަވާލިން، މިއީ ތިޔަކުދިންގެ ތަޢުލީމީ ޙަޔާތުގެ ފުރަތަމަ މަރްޙަލާ ނިމުނީއޭ. ޝައްކެއްވެސްނެތްގޮތުގައި، ތަޢުލީމީ ޙަޔާތުގެ ނިމުމެއް ނޫން މިއީކީއެއް. Far from that މި އަދި ފެށުނީ މި. މަތީ ތަޢުލީމަށް ދާންތިބި ކުދިން، އިރާދަކުރެއްވިއްޔާ، ﷲގެ ރަޙްމަތާއެކީ، މީގެތެރެއިން ގިނަ ކުދިންނަކީ އެ ފުރްޞަތު ތަނަވަސްވެ، މިކަން ޙާޞިލްވާނޭ ކުދިން. އެހެން ނަމަވެސް، ތަފާތަކީ މިހާރު ތިޔަ ފަށްޓަނީ ތިޔަކުދިންގެ އަމިއްލަ މަސައްކަތް. ދިރިއުޅުމުގެ ހަނގުރާމަޔާވެސް ކުރިމަތިލާން މިޖެހެނީ. އަބަދަކު މަންމަޔާއި އޯގާތެރި ބައްޕައެއްގެ އެހީތެރިކަން ލިބޭނެކަމަށް އިންތިޒާރުކުރާކަށް ނުވާނެ. މަންމަޔާއި ބައްޕަގެ އޯގާތެރިކަމާއި އަދި ބަޖެޓްގެ ފަސޭހަކަން، ތިޔަކުދިންގެ ހަގު ކޮއްކޮމެންނާ ހަމަޔަށް ދާން އެބަޖެހޭ. ތިޔަކުދިންނަކީ މިހާރު ބޮޑެތިވެފައި ތިބި ކުދިން. އެހެންވީމާ، ތިޔަކުދިންނާ މުޚާޠަބުކޮށް، އަމިއްލަ ވާހަކައެއް، ހަމަ ތިޔަކުދިންނަށް ކޮންމެވެސްކަހަލަ ޢިބްރަތެއް ލިބޭތޯ ދަންނަވާލަން އަޅުގަނޑު ބޭނުންވަނީ.
އާދެ! ޙަޔާތުގެ ދަތުރަކީ އުފާވެރި ދަތުރެއް. ޙަޔާތުގެ ދަތުރަކީ އުންމީދުތަކެއްގެ މައްޗަށް ބިނާކުރާ ދަތުރެއް. ޙަޔާތުގެ ދަތުރަކީ ހުވަފެންތަކެއްގެ މައްޗަށް ބިނާކުރާ ދަތުރެއް. ބާއްޖަވެރި ޙަޔާތެއް ބިނާވެގެންދާނީ، ހުވަފެންތަކެއް ދެކޭ މީހަކަށް. ބާއްޖަވެރި ޙަޔާތެއް ބިނާވެގެންދާނީ، ލިބިގެންދާނީ، މިދެންނެވި ކަހަލަ އުންމީދުތަކެއް ކުރާ މީހަކަށް. އުންމީދެއް ނެތިއްޔާ، ދިރިއުޅުމުގައި ކުރިއަށްދާނެ ހުވަފެނެއް ނުފެންނަ ކަމަށްވަންޏާ، ދިރިހުރުމުގެ ބޭނުމެއް އޮތްތޯވެސް ސުވާލު އުފެދޭ. އެހެންވީމާ، ޝައްކެއްވެސްނެތްގޮތުގައި، ދިރިއުޅުމުގެ މި ޙަޔާތަކީ، މިޙަޔާތުގެ ދަތުރަކީ، ދިގު ދަތުރެއް. އެކަމަކު މީގެ އުފަލަކީ، މިހާރު މި ފަށާ ޙަޔާތުގެ ދަތުރުގެ މަންޒިލް ކަނޑައަޅާނީ ތިޔަކުދިން. ހުއްޓާނެ މަންޒިލްތައްވެސް ކަނޑައަޅާނީ، ތިޔަކުދިން. ދާނެ ރާސްތާގެ ދިގުމިންވެސް ކަނޑައަޅާނީ ތިޔަކުދިން. ތިޔަކުދިންގެ އަމިއްލަ ހަޔާތުގެ ހުރިހާ ކަމެއްގެ ކޮމާންޑް، ކޮންޓްރޯލް ނަގާ ކުދިންނަށް، މިއަދު މި ބަދަލުވަނީ ތިޔަކުދިން. މިހާ ހިސާބަށް ތިޔަކުދިން ދަތުރު ފަށާއިރު، މައިންބަފައިންގެ ފަރާތުން އަދި މުދައްރިސުންގެ ފަރާތުން ތިޔަކުދިންނަށް ދެނީ އަގުހުރި ހުނަރުތަކެއް. މި ހުނަރުތަކަކީ، ފޮތްތަކަކުން ކިޔަވައިދޭ އެއްޗެއް. ކެމިސްޓްރީ ލެބްގައިވެސް ނަގައިދޭ ފިލާވަޅުތަކެއް. ފިޒިކްސް ލެބްގައި ނަގައިދޭ ފިލާވަޅުތަކެއް. ގުނަކުރުމުންވެސް ނަގައިދޭ ފިލާވަޅުތަކެއް. އެޕްލައި ކުރުމަކީ، ތިޔަކުދިން ކުރަންޖެހޭ މަސައްކަތް. އެ ހިފުނު ބޭނުމެއް، ރަނގަޅު ގޮތުގައި ކުރިއަށް ގެންދިޔުމަކީ، ތިޔަކުދިން ދަސްކުރަންޖެހޭ ފަންނެއް. ދަސްކުރަންޖެހޭ ހުނަރެއް. އެހެންވީމާ، މި ދަތުރު ފަށާއިރު، ތިޔަކުދިންނަށް އެބަ އެނގޭ، ތިޔަކުދިންނަކީ މި ދަތުރުގެ މާލިމީން. އަދި ތިޔަކުދިންނަކީ މިދަތުރުގެ އޮޑިވެރިންވެސްމެ. އޮޑި ދުއްވަން ތިބި މީހުންވެސްމެ. އޮޑި ފަރަށްއަރާނީ، ތިޔަ ކުދިންގެ ނާޤާބިލުކަމުން. ހިޔާވަހިކަމުގެ އައްސޭރިއަށް، ސަލާމަތުގެ އައްސޭރިއަށް ދާނީ، ތިޔަކުދިންގެ މޮޅުކަމުން. ހުއްޓާނެ މަންޒިލްތައް، ބަނދަރުތައް ކަނޑައަޅާނީ ތިޔަކުދިން. ބަނދަރުން ފުރާނެ ގަޑި ކަނޑައަޅާނީ ތިޔަކުދިން.
އެހެންވީމާ، ޙަޔާތުގެ ދަތުރު ފަށާއިރު، ތިޔަކުދިން ގަބޫލުކުރަން ޖެހެނީ، މަދްރަސާއިން މިވަނީ ފިލާވަޅުތަކެއް ނަގައިދީފައޭ. ހުނަރުތަކެއް ނަގައިދީފައޭ. ހުނަރުގެ ބޭނުންހިފާއިރު، ތިޔަކުދިން ގަބޫލުކުރަންޖެހެނީ، އަމިއްލަގޮތުން ވިސްނަންޖެހެނީ، ދާދި ފަސޭހައިން ތިޔަކުދިންނަށް އެނގޭނެ، ތިޔަކުދިން ކުރި ޚިޔާލުތައް، ނޫނީ ތިޔަކުދިން ކުރަމުންގެންދާ ޚިޔާލުތައް ބަސްތަކަކަށް ބަދަލުވެގެންދާނެ. ތިޔަކުދިން ބޭނުންކުރާ ބަސްތަކަކަށް ބަދަލުވެގެންދާނެ. އަދި އެބަސްތައް އިސާހިތަކު ތިޔަކުދިން ޢަމަލުކުރާ އުޞޫލުތަކަކަށް ބަދަލުވެގެން ހިނގައިދާނެ. އަދި ތިޔަކުދިން ޢަމަލުކުރާ އުޞޫލުތަކަކީ، ތިޔަކުދިން ލޯބިކުރާ އުޞޫލުތަކަކަށްވެގެން ހިނގައިދާނެ. އަދި އެ އުޞޫލުތަކަކީ، ތިޔަކުދިން ލޯބިކުރާ ކަންކަން، ތަމްސީލުވެގެންދާ ކަންތައްތަކަށްވެގެން ހިނގައިދާނެ. ތިޔަކުދިން ލޯބިކުރާ އުޞޫލުތަކަކީ، ތިޔަކުދިން ލޯބިކުރާ ކަންތައްތަކަކީ، ތިޔަކުދިންގެ ޠަބީޢަތު ކަމަށް، ތިޔަކުދިންގެ މިޒާޖު ކަމަށް ކަނޑައެޅިގެން ހިނގައިދާނެ އިސާހިތަކު.
ކޮންމެ ކުއްޖެއްގެ މިޒާޖާއި، ކޮންމެ ކުއްޖެއްގެ ސުލޫކު ބިނާވަނީ، މިދެންނެވި މަރްޙަލާގެ މިދެންނެވި ކަންތައްތަކުގެ މައްޗަށް. ތިޔަކުދިންގެ މިޒާޖާއި، ތިޔަކުދިންގެ ޠަބީޢަތަކީ، އިސާހިތަކު ތިޔަކުދިންގެ ކެރެކްޓަރ ދެނެގަންނަން ކަމަކަށް ބަދަލުވެގެން މިދަނީ. އަދި ތިޔަކުދިންގެ ކެރެކްޓަރއަކީ ތިޔަކުދިންގެ ޑެސްޓިނީ ކަނޑައަޅާ އެއްޗަކަށްވެގެން މިދަނީ، ތިޔަކުދިންގެ ކެރެކްޓަރ. މީހަކު ނުބައިވެގެންދަނީ، މީހަކު ބޮޑު މީހަކަށް ވުމަށްފަހު، އެމީހަކު ނުބައިވެގެންދަނީ، މިދެންނެވި ގޮތަށް، އެމީހެއްގެ ކެރެކްޓަރ ޝޭޕް ކުރުމުގައި، އެމީހަކު އަޅާ ކަތި ފިޔަވަޅު. މީހަކު ވަގަކަށްވަނީ، ވައްކަން ކުރަނީ، ނޫނިއްޔާ މީހަކު ޤާތިލަކަށްވަނީ، އެމީހާގެ ކެރެކްޓަރ، އެމީހާ ޝޭޕްކުރާ ހިސާބުން. އެކަމަކު ކެރެކްޓަރ ޝޭޕްކުރާ ހިސާބަށް އައިސް، އެމީހެއްގެ ކެރެކްޓަރ އިން އެމީހެއްގެ ޑެސްޓިނީ ކަނޑައަޅާ ހިސާބަށް މި އަންނަނީ މަރްޙަލާތަކަކަށްފަހު. މި މަރްޙަލާތައް ފެށިގެން މި އަންނަނީ، އެންމެ ޒުވާން ދައުރުގައި. ފުރަތަމަ ތިޔަ ކުދިންގެ ޚިޔާލުތައް. ފުރަތަމަ ތިޔަކުދިން ޙަޔާތާ ދޭތެރޭގައި ކުރާ އުންމީދުތައް، ކުރާ އިންތިޒާރުތައް، ލިބެންހުރި ފުރްޞަތުތައް ބޭނުންހިފަން ބޭނުންވާގޮތް.
މިކަންކަން އެންމެ ފުރަތަމަ އަޅުގަނޑުމެންނާ ހަމަޔަށް، އެހެން އިންސާނުންނާ ހަމަޔަށް އަންނަނީ، ތިޔަކުދިންގެ ބަސްތަކުން. ތިޔަކުދިންގެ ބަސްމަގު ބަހައްޓާގޮތުން، ތިޔަކުދިންގެ ވިސްނާ ވިސްނުން މި އެނގެނީ. ތިޔަކުދިންގެ ސިކުނޑީގައި ދަތުރުކުރާ ކަންކަން މި އެނގެނީ، ތިޔަކުދިންގެ ބަސްމަގު ހުންނަގޮތުން. ތިޔަކުދިންގެ ބަސްތައް، ތިޔަކުދިން ބޭނުންކުރާގޮތުން. އިސާހިތަކު މި ބަސްތައް ބަދަލުވެގެން މިދަނީ، ތިޔަކުދިން ޢަމަލުކުރާ އުޞޫލުތަކަކަށް. ތިޔަކުދިންގެ ބަސްމަގު ބަދަލުވެގެންދާނީ، ތިޔަކުދިން ކަންކަމާ ދޭތެރޭގައި ތިޔަކުދިން ޢަމަލުކުރާ އުޞޫލަތަކުން. މި އުޞޫލުތައް ބަދަލުވެގެން މިދަނީ، ތިޔަކުދިންގެ މިޒާޖަށް، ތިޔަކުދިންގެ ސުލޫކަށް، ތިޔަކުދިންގެ ޠަބީޢަތަށް. ތިޔަ ކުދިންގެ ޠަބީޢަތު، އިސާހިތަކު ފެނިގެން މިދަނީ، ތިޔަކުދިން ލޯބިކުރާ ކަންކަން ފެނިގެން މިދަނީ، ތިޔަކުދިންގެ ކެރެކްޓަރ ޝޭޕްކުރާ ކަންކަމުގެ ތެރޭގައި. ކެރެކްޓަރ ޝޭޕްކުރުމާއެކީ، އެ ކެރެކްޓަރ މި ކަނޑައަޅައިދެނީ، ތިޔަކުދިންގެ ޑެސްޓިނީ. މި ޙަޔާތުގެ ދިގު ދަތުރުގައި، އެހެން ނަމަވެސް، ހުރި ކުރު މަރްޙަލާތައް. މި މަރްޙަލާތަކަކީ، ކޮމްޕާޓްމަންޓްތަކަކަށް ބަހާލައިގެން، ކޮންމެ ކުއްޖަކަށް މިއިން ކޮންމެ މަރްޙަލާއެއްގައި، 5 އަހަރު ހިމެނޭ ކަމެއް ކަމަކަށް ނުބުނެވޭނެ. 2 މަސްދުވަސް ހިމެނޭ ކަމަކަށް ނުބުނެވޭނެ. މިއިން ކޮންމެ ކުއްޖެއްގެ ބެސްޓް ޖަޖަކީ ތިޔައިން ކޮންމެ ކުއްޖަކު. އެކަމަކު ގަބޫލުކުރަންޖެހޭ ޙަޤީޤަތަކީ، މިއިން ކޮންމެ ކަމެއް ރަނގަޅު ގޮތުގައި ޝޭޕް ކުރުމުގެ ހުނަރުތައް، މިއަދު ތިޔަކުދިންނަށް ތިޔަވަނީ ޙާޞިލްވެފައި. ދަސްވެނިވުމުގެ ޕްރޮގްރާމްތަކުން ތިޔަ ކުދިންނަށް ނަގައިދޭ ފިލާވަޅަކީ މިއީ. އެހެންވީމާ، ކަންކަން ގޯސްވީމަ، މުޖްތަމަޢު ގޯސްކުރުމުގެ ފުރްޞަތު، ތިޔަކުދިންނަށް ނެތް ވާހަކަ ބުނެލަން، އަޅުގަނޑު މި ފުރްޞަތުގެ ބޭނުން މި ހިފަނީ. ކަންކަން ގޯސްވީމަ، މިއީ ﷲގެ އިރާދައިގައި ތިމަންނައާ ދޭތެރޭގައި މިންވަރުފުޅު ހުރިގޮތޭ ބުނުމުގެ ފުރްޞަތު ނެތް ވާހަކަ، އަޅުގަނޑު ތިޔަކުދިންނަށް ހަނދާންކޮށްދޭން، މިފުރްޞަތުގެ ބޭނުން މި ހިފަނީ. ކަންކަން ގޯސްވަނީ، އެކުދިން ދުނިޔެއަށް އަންނައިރު، ކަންކަން ގޯސްކޮށް ހުންނާތީކީ ނޫން. ކޮންމެ ކުއްޖަކީ، އެކުއްޖާގެ ޑެސްޓިނީ ޝޭޕް ކުރުމުގައި، ފުރިހަމަ ޒިންމާތަކެއް، ބޮޑު މަސްއޫލިއްޔަތެއް، އެކުއްޖަކު އުފުލާ ކުއްޖަކަށްވެގެން މިދަނީ.
އާދެ! ކުދިންގެ ޑެސްޓިނީ ޝޭޕްކުރާ ވާހަކަ ދައްކާއިރު، މިދެންނެވީ ކޮންމެ ކުއްޖަކާ ދޭތެރޭގައި ވަރަށް އަމިއްލަގޮތުން އަޅުގަނޑު ދަންނަވާލަން ބޭނުންވާ ވާހަކައެއް. ޝައްކެއްވެސްނެތްގޮތުގައި، ޖުމްލަ ގޮތެއްގައި، މިކަން މި އަންނަނީ، މުޅި ޒުވާނުންގެ މައްޗަށް އަންނަ މެސެޖެއްގެ ގޮތުގައި، ޒުވާނުން ކުރާ މަސައްކަތުން، ޒުވާނުންގެ ކެރެކްޓަރ ހުންނަގޮތުން، ދައުލަތެއްގެ، ނޫނިއްޔާ، ޤައުމެއްގެ ޑެސްޓިނީ ބަދަލުވެގެން މިދަނީ. ކޮންމެ ކުއްޖަކު، އެކުއްޖެއްގެ ޙާލަތު ބަދަލުކުރުމުގެ ޚިޔާލު، އެކުއްޖެއްގެ ވާންއެބަޖެހޭ. ޖުމްލަ ގޮތެއްގައި، އެކުދިންގެ ޙާލަތު ބަދަލުކުރުމުގެ ޚިޔާލާތު، އެކުދިންގެ ތެރޭގައި ހުރެއްޖެ ކަމަށްވަންޏާ، މުޖްތަމަޢު ރަނގަޅު މިޞްރާބަކަށް އަނބުރާ މިލެވެނީ.
އެހެންވީމާ، ކިޔަވާކުދިނާ ހަމައިގައި ހުރިހާ ކަމެއްގައި ފުރްޞަތުތައް މިއޮތީ. ކިޔަވާކުދިން ކިޔަވަންޖެހެނީ ކީއްވެގެންކަން، މިކަމުން މި ދަސްކޮށްދެނީ. ކިޔަވާކުދިން ކިޔަވަނީކީ ކޮންމެހެން ކެމިސްޓްރީ ލެބެއްގައި، ދެ އެލިމަންޓް އެއްކުރީމަ، ނުކުންނާކީ ކޮން މޮލިކިއުލެއްތޯ ދަސްކުރުމުގެ ބޭނުމަކު ނޫން. ކިޔަވާކުދިން ކިޔަވަނީ، ދޭކާ ދޭކާ އެއްކުރީމަ، ފަހަރުގައި ފަހެއް ނުކުމެދާނެތޯ، ސުވާލުކޮށްފާނެތީ، އޭގެ ޖަވާބުދޭކަށެއްވެސް ނޫން. ކިޔަވާކުދިން ކިޔަވަނީ، އެއަށްވުރެ މާބޮޑު، މާ ބޭނުންތެރި ކަމެއް ޙާޞިލު ކުރުމަށްޓަކައި.
އަޅުގަނޑުގެ ވާހަކަކޮޅު ނިންމާލަމުންވެސް، އަޅުގަނޑު ތިޔަކުދިންނަށް އިލްތިމާސްކޮށްލަން ބޭނުންވާ ވާހަކައަކީ، މިއީ އުފާވެރި ޖަލްސާއެކޭ. އުފާވެރި ޖަލްސާއަކަށް މިވަނީ، ކުދިންގެ އެކޮމްޕްލިޝަމަންޓް ފާހަގަކުރާ ޖަލްސާއަކަށް، މި ޖަލްސާ ބަދަލުވެގެންދާތީ. އުފާވެރި ޖަލްސާއަކުން މޮޅު ކުދިންގެ ނަންތައް އަޅުގަނޑުމެންނަށް އިވިގެންދާނެ. އުފާވެރި ޖަލްސާއަކުން އިވޭނީ މޮޅު ކުދިންގެ ނަންތައް. އެހެން ނަމަވެސް، އެ މޮޅު ކުދިންގެ true test of character އެނގޭނީކީ، މިކަހަލަ ޖަލްސާއެއްގައި، އެކުދިންގެ ނަންތައް އިޢުލާނުވީމައެއް ނޫން. އެކުދިންގެ true test of character އެނގޭނީ، އުނދަގޫ ޙާލަތާއި، ނުރަނގަޅު ޙާލަތުގައި، އެކުދިން މަސައްކަތްކުރާ ގޮތުން. އެކަމަށްޓަކައި ތިޔަކުދިންގެ ޑެސްޓިނީ ޝޭޕް ކުރުމުގެ ފުރިހަމަ އިޚްތިޔާރު، ތިޔަކުދިންގެ އަތްމަތީގައިވާ ވާހަކަ، އަޅުގަނޑު މި ދަންނަވާލަނީ.
އަޅުގަނޑު އެދެނީ، ތިޔަކުދިން ތިޔަ ފަށާ ޙަޔާތު، އާދެ! ދަތުރުގެ ޙަޔާތު، ނޫނީ ޙަޔާތުގެ ދަތުރަކީ ވަރަށް ކާމިޔާބު، ވަރަށް އުފާވެރި، ވަރަށް ބާއްޖަވެރި ޙަޔާތަކަށް ވެގެންދިޔުން.
والســّلام عليــكم ورحـمــة اللّـه وبـركاتـه
_____________________________