ރައްޔިތުންނަށް ތަރައްޤީ ގެނައުމުގައި، ސިޔާސީ ކުލައަކަށް އަދި ވަކި ރަށަކަށް އެއްވެސް ތަފާތުކުރެއްވުމެއް މި ސަރުކާރުން ނުގެންގުޅުއްވާނެ ކަމުގައި ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ، ފާދިއްޕޮޅު ނައިފަރު ރައްޔިތުންނާ ރޭ ބައްދަލުކުރައްވައި ވާހަކަފުޅު ދައްކަވަމުންނެވެ. މިރޮނގުން ރައީސުލްޖުމްހޫރިއްޔާ ވާހަކަފުޅު ދައްކަވަމުން، ސިޔާސީ ފިކުރު ކޮންމެ ކުލައެއްގައި ހުރިނަމަވެސް، ހުރިހާ ރައްޔިތުން އެމަނިކުފާނު ޤައުމު ބިނާކުރެއްވުމަށް ކުރައްވަމުން ގެންދަވާ މަސައްކަތްޕުޅާ ގުޅިވަޑައިގަތުމަށް އެދިވަޑައިގެންނެވިއެވެ. އަދި ރައްޔިތުންގެ މަޖިލީހުގެ ތެރޭގައި ކުރައްވާ މަސައްކަތުގައިވެސް، އެކި ފިކުރުގައި، އެކި ޕާޓީގެ ޓިކެޓްގައި ހޮވިވަޑައިގެންފައި ތިއްބެވި ބޭފުޅުންވެސް، ރައްޔިތުންނަށް، މުޅި ރާއްޖެއަށް ގެނައުމަށް ބޭނުންވާ ތަރައްޤީ ގެނައުމަށްޓަކައި ހޯދަން ބޭނުންވާ ފައިސާ ހޯދުމުގައި ސަރުކާރަށް ދަތިނުކުރެއްވުމަށް ރައީސުލްޖުމްހޫރިއްޔާ އެދިވަޑައިގެންނެވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، މި ސަރުކާރުން ކުރައްވާ މަސައްކަތަކީ، ރައްޔިތުން ބޭނުންވާ ހިސާބަށް ދިވެހިރާއްޖެ ގެންގޮސްދެއްވުން ކަމަށް ބަޔާންކުރައްވަމުން، އޭގެ ނަތީޖާއަކަށް ވެގެންދާނީ، މިއަދު އަޅުގަނޑުމެންގެ ޖީބަށް މިވަންނަ އާމްދަނީ، ފަސްހާސް ޑޮލަރުން ބާރަހާސް ޑޮލަރަށް އުފުލިގެންދިޔުން ކަމަށް ވިދާޅުވިއެވެ. އަދި އެވަރުގެ އާމްދަނީއެއް ވަންނަ އާބާދީއެއް ދިވެހިރާއްޖޭގައި އޮތުން ވެގެންދާނީ، ދިވެހި ދައުލަތުގެ ޚަޒާނާއަކީ، މިއަދުގެ ޚަޒާނާގެ ތިންގުނައަށްވުރެ ތަނަވަސް ޚަޒާނާއަކަށް ކަމުގައި ރައީސުލްޖުމްހޫރިއްޔާ ވިދާޅުވިއެވެ.
ސަރުކާރުން ކުރެއްވުމަށް ނިންމަވާފައިވާ ބޮޑެތި އިންވެސްޓްމަންޓްތަކަށް ބޭނުންވާ އިންވެސްޓަރުން ހޯދުމަށް ކުރެވޭ މަސައްކަތްތަކަކީ، ދައުލަތުގެ މާލިއްޔަތުން ޚަރަދުކޮށްގެން ކުރައްވާ މަސައްކަތްތަކެއް ނޫންކަން ފާހަގަކުރައްވަމުން، ރައީސުލްޖުމްހޫރިއްޔާ ވިދާޅުވީ، ދާދިފަހުން ސިންގަޕޫރުގައި ބޭއްވުނު މޯލްޑިވްސް އިންވެސްޓްމަންޓް ފޯރަމް އިންތިޒާމްކޮށް ބޭއްވުމަށް ދިވެހިރާއްޖޭގެ ބަޖެޓުން ލޯ ލާރިއެއްވެސް އެ ސިމްޕޯޒިއަމަށް ޚަރަދު ކުރައްވާފައި ނުވާނެ ކަމަށެވެ. އަދި އެ ސިމްޕޯޒިއަމަށް ޚަރަދުވެފައިވާ ދެލައްކަ ހަތްދިހަ ދެހާސް އެމެރިކާ ޑޮލަރު ހޯއްދަވާފައިވަނީ، ދިވެހިރާއްޖޭގެ ޞިނާޢަތްތައް ހިންގަވާ ބޭފުޅުންނާއި، ރާއްޖޭގައި އިންވެސްޓް ކުރައްވަމުން ގެންދަވާ ބޭރުގެ ފަރާތްތަކުންކަން ރައީސުލްޖުމްހޫރިއްޔާ ހާމަކުރެއްވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، ނޫސްވެރިކަމުގެ މިނިވަންކަމާ ބެހޭގޮތުންވެސް އަލިއަޅުއްވައިލެއްވިއެވެ. މިގޮތުން، ދިވެހިރާއްޖެއަށް ވުރެން ބޮޑަށް މިނިވަންކަން އޮތް ތަނެއް ނޯންނާނެ ކަމަށާއި، މިއަދުގެ ސަރުކާރުގައި ނޫސްވެރިންނަށް މިދޭ މިނިވަންކަން، ކޮންމެ ހިސާބަކަށް ނޫސްވެރިން ގެންދެވި ނަމަވެސް، މި ސަރުކާރަކުން ނޫސްވެރިންނާ ދޭތެރޭގައި ފިޔަވަޅެއް ނާޅުއްވާނެ ކަމުގެ ޔަޤީންކަން ދެއްވިއެވެ. އަދި ނޫސްވެރިކަމުގެ މިނިވަންކަން، ދުވަހަކު ދިވެހިން ނުދެކޭވަރަށް، ނުވަތަ ނޫސްވެރިން ދުވަހަކު ނުދެކޭވަރަށް ދިވެހިރާއްޖޭގައި އޮންނާނެ ކަމަށާއި، ސަރުކާރުން ކުރާ ކަންކަމަށް ފާޑުކިޔުން އެއީ މި ސަރުކާރަކަށް މައްސަލައަކަށް ނުވާ ކަމުގައިވެސް ވިދާޅުވިއެވެ.
ޞިއްޙީ ދާއިރާއަށް އަލިއަޅުއްވާލައްވައި، އެމަނިކުފާނު ދެއްކެވި ވާހަކަފުޅުގައި، އެދާއިރާއިން އެންމެ މުހިންމު އަދި އެންމެ ފުރަތަމަ މަސައްކަތަކަށް ސަރުކާރުން ކުރައްވާފައިވާ މަސައްކަތަކީ، ރާއްޖޭގައި ހުރި ޞިއްޙީ ޚިދްމަތްދޭ ތަންތަން ގިންތިކޮށް ދެނެގަތުމަށް ކުރެއްވި މަސައްކަތް ކަމަށް ވިދާޅުވިއެވެ. ހަމައެހެންމެ، ޑޮކްޓަރުންގެ މުސާރައިގެ އާ އޮނިގަނޑު އެކުލަވައިލެވިފައިވަނީ، އެފަރާތްތަކުގެ މަޝްވަރާއާ އެކުގައިކަން ފާހަގަކުރައްވައި، ރައީސުލްޖުމްހޫރިއްޔާ ވިދާޅުވީ، އެއީ ޑޮކްޓަރުން އެދިވަޑައިގަންނަވާ އޮނިގަނޑު ކަމަށެވެ. މީގެއިތުރުން، ސީއެމްބިއުލާންޗުގެ ޚިދްމަތް، ސެޕްޓެމްބަރު މަހުގެ ނިޔަލަށް ނިންމާލެވޭނެ ކަމުގައި ރައީސުލްޖުމްހޫރިއްޔާ ވިދާޅުވިއެވެ.
