ސިޔާސީގޮތުން ފިކުރު ތަފާތުވިނަމަވެސް، ޤައުމު ބިނާކުރުމުގެ ޚިޔާލު އެއްގޮތް ކުރުމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް އިލްތިމާސް ކުރައްވައިފިއެވެ. ރައީސުލްޖުމްހޫރިއްޔާ މިކަމަށް އިލްތިމާސް ކުރެއްވީ، މާޅޮސްމަޑުލު ދެކުނުބުރީ އޭދަފުށީ ބިންހިއްކުމުގެ މަޝްރޫޢު، ރަސްމީގޮތުން ފަށްޓަވައިދެއްވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
މިކަމަށްޓަކައި މިއަދު ހެނދުނު އޭދަފުށީގައި ބޭއްވެވި ރަސްމިއްޔާތުގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ޤައުމަށް އަންނަ ކުރިއެރުމަކީ އަދި ރަށަށް އަންނަ ދިރުމަކީ، އެކަންކަމުގައި ރައްޔިތުންގެ ބައިވެރިވުން އޮންނަ ކަންކަންކަމަށް ހެއްދެވުމަށް އެދިވަޑައިގެންނެވިއެވެ. އަދި ސަރުކާރުގެ ހަކަތަ ހުރިހާ ދުވަހަކު، އަދި ޒުވާނުންގެ ވިންދު ދިވެހިލޭގައި ހިނގައިހާ ދުވަހަކު، އިރާދަކުރެއްވިއްޔާ ސަރުކާރުގެ މިޞްރާބަކީ، ރާއްޖެއަށް ބޭނުންވާ އިޤްތިޞާދީ ކުރިއެރުމާއި، ހަމަޖެހުން ހޯއްދަވައި ދެއްވުން ކަމުގައި ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، އޭދަފުށީގެ ބިން ބޮޑުވެގެންދާ ދިޔުމަކީ، އޭދަފުށި އަލުން އުފަންވުން ކަމުގައި ވިދާޅުވެ، އޭދަފުށީގެ މި އިތުރުކުރެވޭ ބިން ހެޔޮ ގޮތުގައި ބޭނުންކުރުމަށް އެދިވަޑައިގެންނެވިއެވެ. އަދި އެމަނިކުފާނުގެ ސަރުކާރުގެ މެނިފެސްޓޯގައި ހުށަހަޅާފައިވާ ކަންތައްތައް ކިތަންމެ ކުޑަ މިންވަރަކަށް ނަމަވެސް ފުރިހަމަވެގެންދާކަމަށް ރައްޔިތުން ޤަބޫލު ކުރައްވާކަމަށްވާނަމަ އެއީ، އެމަނިކުފާނަށް ލިބިވަޑައިގަންނަވާ ވަރަށް ބޮޑު އުފާފުޅަކާއި ޝަރަފެއް ކަމުގައި ވިދާޅުވިއެވެ.
ރާއްޖޭގެ މުސްތަޤްބަލު އޮތީ ޒުވާނުންގެ އަތްމަތީގައިކަން ބަޔާންކުރައްވަމުން، ރާއްޖޭގެ އާބާދީގެ 52 އިންސައްތައަކީ، ދިވެހި ޒުވާނުންކަން ރައީސުލްޖުމްހޫރިއްޔާ ފާހަގަކުރެއްވިއެވެ. އަދި ޒުވާނުންގެ ތެރޭގައި ސިޔާސީ ގޮތުން ޚިޔާލުތަފާތުވާ މީހުންނާއި، ފިކުރުގެ ގޮތުން ޚިޔާލުތަފާތުވާ މީހުން ތިބުމަކީ މަރުޙަބާ ވިދާޅުވާކަމެއް ކަމުގައި ރައީސުލްޖުމްހޫރިއްޔާ ވިދާޅުވިއެވެ. އެހެންނަމަވެސް، ރަށަށް އަންނަން އޮތް ތަރައްޤީއަށް، އެ ފިކުރެއްގެ ސަބަބުން ހުރަހެއް އެޅިގެން ނުވާނެ ކަމުގައި ރައީސުލްޖުމްހޫރިއްޔާ ވިދާޅުވިއެވެ. "ރަށަށް އަންނަން އޮތް ތަރައްޤީއަކީ، ކޮންމެ ރައްޔިތެއްގެ ޒިންމާއެއް. އެއީ، ކޮންމެ ރައްޔިތަކަށް ލިބެންޖެހޭ ޙައްޤެއް. އެ ޙައްޤުން އެހެން ރައްޔިތުން މަޙްރޫމު ކުރުވުމަކީ ކުރެވިގެންވާނެކަމެއް ނޫން" ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، ކައުންސިލުތަކުގައިވެސް އަދި ރައްޔިތުންގެ ކަންކަން ނިންމައި ބަސްކިޔާ މަރުޙަލާއާ ހިސާބުގައިވެސް ޚިޔާލުތަފާތުވާ ބޭފުޅުން ތިއްބެވުމަކީ، އަޅުގަނޑުމެންގެ ވިސްނުމަށް އަންނަ މުއްސަނދިކަމެއް ކަމުގައި ވިދާޅުވިއެވެ. އެއާއެކީގައި ކޮންމެ ރަށެއްގައިވެސް އަދި ކޮންމެ މުޖުތަމަޢެއްގައިވެސް، މުޅި ރައްޔިތުންގެ މަޞްލަޙަތު އިސްކުރައްވާ ކަމަށްވާނަމަ، ޒުވާނުން މަގުން ކައްސާލައިގެންދާނެ މިޞްރާބެއް އަޅުގަނޑުމެންނަށް ފެނިގެން ނުދާނެ ކަމުގައި ރައީސުލްޖުމްހޫރިއްޔާ ވިދާޅުވިއެވެ.
އަޅުގަނޑުމެން އެންމެންގެވެސް ބޭނުމަކީ، ދުނިޔެއާއި އާޚިރަތް ބާއްޖަވެރިކުރުވުން ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ. އަދި އާމްދަނީ ހޯދައިގެން ޢާއިލާތަކަށް ތަނަވަސްކަން ގެންނަން މަސައްކަތް ކުރަންޖެހޭކަމަށާއި، އެހެން ނޫންނަމަ ފެނިގެންދާނީ، ލޯބިން އުފަންކޮށް، ބޮޑުކުރާ ދަރިން މަގުން ކައްސާލައިގެން ދާތަން ކަމުގައި އެމަނިކުފާނު ވިދާޅުވިއެވެ.
ރާއްޖެ ކުރިއަށްދާނީ ރާއްޖޭގައި ހުރި ވަސީލަތްތައް ބޭނުންކޮށްގެން އަދި ބޭރުގެ ފަރާތްތަކުންވެސް ރާއްޖޭގައި އިންވެސްޓްކޮށްގެން ކަމަށް ރައީސުލްޖުމްހޫރިއްޔާ ވިދާޅުވިއެވެ. ރާއްޖެއަށް މިއަދު އިންވެސްޓަރުން އަންނަން ބޭނުންވާކަމަށާއި، ބޭރުގެ ފަރާތްތަކުން ރާއްޖެއަށް އައިސް ރާއްޖޭގައި މިއޮތް ހަމަޖެހުމާއެކީ، ރާއްޖެއިން ދައްކާ ނަމޫނާ އެމީހުން ބަލައިގަންނަށް ބޭނުންވާކަމަށްވެސް ރައީސުލްޖުމްހޫރިއްޔާ ވިދާޅުވިއެވެ. އަދި ދިވެހި ޒުވާނުންގެ ތަރައްޤީއަށް އެދި ކުރާ މަސައްކަތްތަކުގައި، އަދި ދިވެހި ދައުލަތުގެ ފަސޭހަކަމާއި ތަރައްޤީއަށް އެދި ކުރާ މަސައްކަތުގައި، ސިޔާސީގޮތުން ޚިޔާލުތަފާތު ވީނަމަވެސް، ޤައުމު ބިނާކުރުމުގެ މަސައްކަތުގައި ބައިވެރިވާކަމަށްވާނަމަ، ދިވެހިރާއްޖެއަށް ކުރިއެރުމާއި ހަމަޖެހުން ނޫންކަމެއް އިރާދަކުރެއްވިއްޔާ ނެތް ކަމުގައި ރައީސުލްޖުމްހޫރިއްޔާ ވިދާޅުވިއެވެ.
