ޖަޕާނު ސަރުކާރުން ރާއްޖޭގެ ކުރިއެރުމަށް ވެދެއްވާފައިވާ އެހީތައް، ރާއްޖޭގެ ހުރިހާ ކަންކޮޅުތަކުންވެސް ފެންނަން އެބަހުރި ކަމުގައި ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ، އެމަނިކުފާނުގެ ޝަރަފުގައި، ޖަޕާނުގެ ބޮޑުވަޒީރު ޝިންޒޯ އަބޭ މިރޭ ބޭއްވެވި ރަސްމީ ޖާފަތުގައި ވާހަކަފުޅު ދައްކަވަމުންނެވެ.
ޖަޕާނު ބޮޑުވަޒީރުގެ ރަސްމީ ގެކޮޅުގައި ބޭއްވެވި މި ޖާފަތުގައި، ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ޖަޕާނަކީ ރާއްޖެއަށް އެންމެ ބޮޑެތި ދީލަތި އެހީތައް ވެދީފައިވާ ރާއްޖޭގެ ތަރައްޤީގެ ވަރަށް މުހިންމު ބައިވެރިއެއްކަން ފާހަގަކުރެއްވިއެވެ. މިރޮނގުން ރައީސުލްޖުމްހޫރިއްޔާ ވާހަކަފުޅު ދައްކަވަމުން، ޚާއްޞަކޮށް ރާއްޖޭގެ އިޤްތިޞާދީ އަދި އިޖުތިމާޢީ ތަރައްޤީއަށް ޖަޕާން ސަރުކާރުން ވެދެއްވާފައިވާ ގިނަގުނަ އެހީތަކުގެ މައްޗަށް އަލިއަޅުއްވައިލެއްވިއެވެ. މިގޮތުން، އިންސާނީ ވަސީލަތްތައް ތަރައްޤީކުރުމާއި، ތިމާވެށި ހިމާޔަތްކުރުމާއި، ދެމެހެއްޓެނިވި މަސްވެރިކަމާއި، ޒަމާނީ މުވާޞަލާތާއި ބްރޯޑްކާސްޓިންގެ ޚިދުމަތް ދިނުމާއި، ސުނާމީގެ ކާރިޘާގައި ލިބުނު ގެއްލުންތަކުން އަރައިގަނެ، ޤައުމު އަލުން އާރާސްތުކުރުމަށް ވެދެއްވާފައިވާ އެހީތެރިކަމުގެ އިތުރުން، ކުޅިވަރު ކުރިއެރުވުމަށާއި، ޒުވާނުން ބާރުވެރިކުރުމަށް ޖަޕާން ސަރުކާރުން ރާއްޖެއަށް ވެދެއްވާފައިވާ އެހީތައް ރައީސުލްޖުމްހޫރިއްޔާ ފާހަގަކުރެއްވިއެވެ. އަދި ސީދާގޮތުންނާއި ނުސީދާގޮތުންވިޔަސް، ޖަޕާނު ސަރުކާރުން ދިވެހި ސަރުކާރަށް ފޯރުކޮށްދެއްވާފައިވާ އެހީތަކުގެ ފައިދާ ލިބިފައިނުވާ ދިވެއްސެއް ހުރުމަކީ، ވަރަށް ނާދިރުކަމެއް ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.
ޖަޕާނުން ރާއްޖެއަށް ޒިޔާރަތްކުރާ ފަތުރުވެރިންގެ ޢަދަދު، ފާއިތުވެދިޔަ 30 އަހަރު ދުވަހުގެ ތެރޭގައި އެއް މިންގަނޑެއްގައި ހިފެހެއްޓިފައިވާކަން ރައީސުލްޖުމްހޫރިއްޔާގެ ވާހަކަފުޅުގައި ފާހަގަކުރެއްވިއެވެ. އަދި ޖަޕާން ރައްޔިތުންގެ ހުވަފެނީ މަންޒިލަކަށް މިއަހަރުވެސް ރާއްޖެ ހޮވިފައިވާތީ، އެކަމާ އުފާފުޅު ކުރައްވާ ކަމުގައި ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، ދެޤައުމުގެ ދެމެދުގައި ވިޔަފާރީގެ ގުޅުން ފަހަކަށް އައިސް ވަރަށް ބޮޑުތަން ކުރިއަރާފައިވާކަން ހާމަކުރައްވަމުން، ފާއިތުވެދިޔަ ތިން އަހަރުދުވަހުގެ ތެރޭގައި ރާއްޖެއިން ޖަޕާނަށް އެކްސްޕޯޓް ކޮށްފައިވާ ބާވަތްތަކުގެ މިންވަރު ދެ ގުނައަށް އިތުރުވެފައިވާ ކަމުގައި ވިދާޅުވިއެވެ. އަދި އެމަނިކުފާނުގެ ދަތުރުފުޅުގެ ޕްރޮގްރާމުތަކުގެ ތެރެއިން، މާދަމާ ބޭއްވުމަށް ހަމަޖެހިފައިވާ މޯލްޑިވްސް އިންވެސްޓް ފޯރަމާއި، މޯލްޑިވްސް ޓޫރިޒަމް ޕްރޮމޯޝަން ރިސެޕްޝަނުގެ ސަބަބުން ދެޤައުމުގެ ދެމެދުގައި، ވިޔަފާރިއާއި އިންވެސްޓްމަންޓް އަދި ފަތުރުވެރިކަމުގެ ގުޅުން އިތުރަށް ބަދަހިވެގެންދާނެކަމަށް އުންމީދު ކުރައްވާ ކަމުގައިވެސް ވިދާޅުވިއެވެ.
ޖަޕާނަށް ކުރައްވަމުން ގެންދަވާ ރަސްމީ ދަތުރުފުޅު ރަމްޒުކޮށްދެނީ، ދެޤައުމުގެ ދެމެދުގައި އުފެދިފައިވާ ގާތް ރަޙުމަތްތެރި ގުޅުން ކަމުގައި ރައީސުލްޖުމްހޫރިއްޔާ ވިދާޅުވިއެވެ. އަދި މިދަތުރުފުޅުން ޔަޤީންކޮށްދެނީ، ޖަޕާނާއި ދިވެހިރާއްޖެއާ ދެމެދު އޮތް ގުޅުން މިހާރަށްވުރެ ވަރުގަދަކުރުމަށްޓަކައި ދެޤައުމު ގުޅިގެން މަސައްކަތްކުރުމަށް ތައްޔާރަށް އޮތްކަން ކަމުގައި ވިދާޅުވިއެވެ.
