بســم اللّـه الرّحمـن الرّحيــم
އަޅުގަނޑުމެން ޖަޕާނަށް މި ކުރާ ދަތުރަކީ، ޖަޕާނުގެ ސަރުކާރުގެ ފަރާތުން ޖަޕާނަށް ރަސްމީ ދަޢުވަތަކަށް ކުރާ ދަތުރެއް. ދެން މިއީ، ވަރަށް މަދުން ލިބޭ ފުރުސަތެއް ކަމަށް މިވަނީ. އެހެންވީމާ، މި ޝަރަފު ލިބުނީމާ ހަމަ އަޅުގަނޑު ދިވެހިރާއްޖޭގެ ފަރާތުން ޖަޕާނު ސަރުކާރަށް ޝުކުރު ދަންނަވަން.
ދެން މިދަތުރުގައި ޖަޕާނަށް އަޅުގަނޑުމެން ޒިޔާރަތް ކުރާއިރު ޖަޕާނަކީ ޒަމާނުއްސުރެ ދިވެހިރާއްޖެއަށް ވަރަށްގިނަ ކަންތައްތަކުގައި އެހީދެމުން އަންނަ ޤައުމެއް. ޚާއްޞަ ގޮތެއްގައި އަޅުގަނޑުމެންނަށް ތިމާވެށީގެ ބޮޑެތި ކަންކަމުގައި، މާލޭގެ ސީވޯލް ކަހަލަ ވަރަށްގިނަ ކަންކަމުގައި، ޖަޕާނު ސަރުކާރުން އެހީވެދެމުން މި އަންނަނީ. ސުނާމީގައިވެސް ވަރަށް ބޮޑެތި އެހީތެރިކަން ވެދީފައިވަނީ. އެހެންވީމާ، މިފަހަރު އަޅުގަނޑުމެން ޖަޕާނަށް މިކުރާ ދަތުރުގައި، ޖަޕާނުގެ ޕްރައިވެޓް ސެކްޓަރުންނާއި އަދި ސަރުކާރުގެ ފަރާތުން އެހީއަށް އެދޭނެ މަޝްރޫޢުތަކެއް އެކުލަވާލައިގެން އަޅުގަނޑުމެން މިދަނީ. ދެން އިޤްތިޞާދީ ދާއިރާގެ މަޝްރޫޢުތައް މިނިސްޓަރ ސަޢީދާއި އަދީބާ މިދެބޭފުޅުން ގެންދަވަނީ. މީގެތެރޭގައި، އަޅުގަނޑުމެން މިހާރު އަލަށް އަޅަން ބޭނުންވާ އެއަރޕޯޓް ނޫނީވިއްޔާ އެއަރޕޯޓް އެކްސްޕޭންޝަނަށް ބޭނުންވާ ޓަރމިނަލްގެ ވާހަކަދެއްކުން އަޅުގަނޑުމެން ހުށަހަޅާނަން. ހަމައެހެންމެ، އަޅުގަނޑުމެން ސަރުކާރުގެ ފަރާތުން އިޢްލާނު ކޮށްފައި އެއޮތީ އިހަވަންދިއްޕޮޅުގައި ޕޯޓެއް ހަދަން. ދެން އޭގައިވެސް ޖަޕާނުގެ ސަރވިސް ސެކްޓަރުގެ ޝައުޤުވެރިކަން ހުރިތޯ ބަލަން އަޅުގަނޑުމެން ހަމަ އެ ޕްރޮޖެކްޓާއި ތަފުސީލުތައް ހުށަހަޅާނަން. ދެން މީގެ އިތުރުންވެސް، ޕްރައިވެޓް ސެކްޓަރުންނާއި ސަރުކާރުގެ ފަރާތުން ޖަޕާނުން އެހީވާ ކަންކަމުގައި އަޅުގަނޑުމެން ޖަޕާނު ސަރުކާރުގެ އެހީއަށް ދަންނަވާނަން.
މިޞްބާޙް ޢައްބާސް - ސީ.އެން.އެމް
ކިހިނެއްތޯ އެއަރޕޯޓަށް އިންވެސްޓަރަކު ހޯއްދެވުމުގައި މަސައްކަތް ކުރައްވާނަންތޯ؟
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް
އެއަރޕޯޓަށް އަޅުގަނޑުމެން މިހޯދަނީ އެންމެ އިންވެސްޓަރަކު ނޫން އިނގޭތޯ. އެއީ، އެއަރޕޯޓަކީ ވަރަށް ބޮޑު މަޝްރޫޢަކަށް ވެގެންދާނެ. އަޅުގަނޑުމެން މިހާރު މިކުރާ މަސައްކަތަކީ، އެއަރޕޯޓަކީ އަޅުގަނޑުމެން އަލަށް ޤާއިމުކުރާ އެއަރޕޯޓް ނޫނީވިއްޔާ މީގެ އެކްސްޓެންޝަނެއް ނޫން. އަޅުގަނޑު ބޭނުންވަނީ، ހަމަ އާ އެއަރޕޯޓެއްގެ ވާހަކަ ދައްކަން އިނގޭތޯ. އިތުރު ރަންވޭއަކާއި ޓަރމިނަލްވެސް އާ ޓަރމިނަލް ފެސިލިޓީޒްތަކާ ހަމަ ވަރަށް ހައިކޯނިކް ވަރުގަދަ ބިލްޑިންގއަކަށްވާން މި ބޭނުންވަނީ. އަނެއްކާ މިއެއަރޕޯޓަކީ ފަސްމިލިއަނަށްވުރެ އިތުރު ފަސިންޖަރުން ކެރީ ކުރެވޭ ވަރުގެ އެއަރޕޯޓަކަށް ހެދޭތޯ ބަލަން އަޅުގަނޑުމެން ވިސްނަނީ. ކުރިއަށްއޮތް 50 އަހަރު ދުވަހަށް ދިވެހިރާއްޖޭގެ ޓޫރިޒަމްގެ ގްރޯތަށް ކޭޓަރ ކުރާވަރުގެ އެއަރޕޯޓަކަށް މިއެއަރޕޯޓް ހަދަން ބޭނުންވަނީ. އެހެންވީމާ، މިއީ ގާތްގަނޑަކަށް 600، 800 މިލިއަން ޑޮލަރުގެ ޕްރޮޖެކްޓަކަށްވާނެ ކަންނޭނގެ ކުޑަވެގެން. އެހެންވީމާ، އެއަރޕޯޓުގެ އެކި ކޮމްޕޯނަންޓް މިހިރީ ހަމަ ޖަޕާނާ އަޅުގަނޑުމެން މިހުށަހަޅަނީ އެ ޓަރމިނަލް ފެސިލިޓީ، ޓަރމިނަލް ބިލްޑިންގގެ ކަންތައް. އެހެންވީމާ، މިއީ، އެއްފަރާތަކުން މިކަން ކުރާނެ ބައެއް ހޯދަން ކުރާ ދަތުރެއް ނޫން ދޮއެއްތޯ. ތަފާތު ގްރެފިކްތައް މީގައި ހުންނާނެ. ދެން ހަމަ ޖަޕާނުގެ ފަރާތުން އެހީ ހޯދާ ކަމުގައިވީނަމަވެސް ޖަޕާނުން މިޕްރޮމޯޓަރުން ހަމަ ޖަޕާނުގެ ތަފާތު ކުންފުނިތައް ހޯދުމަކީވެސް ހަމަ އެމީހުންގެ އަތްމަތީގައި އޮތް ކަމެއް.
ދެން އަޅުގަނޑުމެންނަށް އެއަރޕޯޓުގެ ފައިނޭންސް ކަންތަކުގައި މި ދޭތެރެއިން ނައިބު ރައީސް ޑޮކްޓަރ ޖަމީލް ކުވެއިތަށް ވަޑައިގެންނެވިއިރު ކުވޭތު ސަރުކާރާ މިވާހަކަ ދެއްކެވި. އެހެންވީމާ، ކުވޭތު ފަންޑުގެ ފަރާތުންވެސް އަޅުގަނޑުމެންނަށް މިއެއަރޕޯޓަށް އެހީތެރިކަން ލިބޭނެކަމަށް އަޅުގަނޑުމެންނަށް ޤަބޫލުކުރެވޭ. ދެން ހަމަ އެގޮތަށް މިފަހަރު ސަޢޫދީ ޢަރަބިއްޔާއަށް އަޅުގަނޑު ކުރި އަމިއްލަ ދަތުރުގައި ސަޢޫދީ ޢަރަބިއްޔާގެ ހަމަ އެންމެ ބޮޑު ކޮންސްޓްރަކްޝަން ކުންފުނި އެއީ، ބިންލާދިން ގްރޫޕް. އޭގެ އިސްބޭފުޅުންނާ އަޅުގަނޑު ވާހަކަ ދެއްކިން. ދެން އެބޭފުޅުންގެވެސް ޝައުޤުވެރިކަން އެބަހުރި އެއަރޕޯޓުގައި. އެއްގޮތަކީ ހަމަ ޕީ.އޯ.ޓީ ބޭސިސްގައި އެބޭފުޅުން އެކަން ކުރެއްވުން. ދެން އަނެއްގޮތަކީ ހަމަ ސިންޑިކޭޓް ކުރައްވައިގެން މިކަން ކުރުން. އެހެންނަމަވެސް މިކަން ކުރުމަށްޓަކައި އަޅުގަނޑުމެން އެންމެ ފުރަތަމަ މިދެންނެވި ގޮތަށް ފަންސާސް އަހަރަށް ބޭނުންވާ އެއަރޕޯޓެއްގެ ކޮންސެޕްޓް ޑިޒައިނާއެކީ، ސްޓެޕްސް ތަކަކަށް ހަދަން ބޭނުންވޭ ޑީޓެއިލް ފީސިބިލިޓީ ހަދަން. ދެން ޑީޓެއިލް ފީސިބިލިޓީ ހެދުނީމާ، އެއަރޕޯޓަށް ދާނެ ޚަރަދާ ކަންތައް އަޅުގަނޑުމެންނަށް އެނގޭނީ. ދެން ކޮންސެޕްޓް ޑިޒައިނާ މިކަންކަން ކުރުމުގެ މަސައްކަތް މިހާރު މިނިސްޓަރ ސަޢީދާއި އަދީބާ މިދެބޭފުޅުން އެބަކުރައްވާ.
މިއަދު އަޅުގަނޑުމެން މިވާހަކަ ދައްކާއިރު ހަމަ ސިންގަޕޫރުގެ ޗާންގީ އެއަރޕޯޓްގައި ހަމަ އިސްކޮށް ހަރަކާތްތެރިވާ ހުރިހާ ކޯޕްރޭޓް ލީޑަރުން މާލޭގައި އެބަތިބި ދޮއެއްތޯ. އަޅުގަނޑާވެސް މިއަދު ބައްދަލުކުރެއްވި. ދެން އެބޭފުޅުން އަޅުގަނޑުމެން މިބަލަނީ އެންގޭޖް ކުރަން ކޮންސަލްޓަންޓުން ގޮތަށް. އަދި ޕްރޮޖެކްޓް ކުރިއަށްދާ ކަމަށްވަންޏާ މެނޭޖްމަންޓްވެސް އަދި ޕްރޮޖެކްޓްގެ މެނޭޖްމަންޓްވެސް އެބޭފުޅުންގެ ޝައުޤުވެރިކަން އެބަހުރި ނަންގަވަން. އެހެންވީމާ، ބޭނުންވަނީ ވަރަށް ވަރުގަދަ ކެޕޭސިޓީއަށް ކޭޓަރ ކުރާވަރުގެ އެއަރޕޯޓެއް.
މިޞްބާޙް ޢައްބާސް - ސީ.އެން.އެމް
ތަންކޮޅެއް ކުރިން ރައީސް އިންޑިއާއަށް ކުރެއްވި ދަތުރުފުޅަށްފަހު އާބިޓްރޭޝަންގައި އޮތް މައްސަލަ ކޯޓުން ބޭރުގައި ޙައްލު ކުރުމަށް މަޝްވަރާ ކުރައްވާނެ ކަމަށް ވިދާޅުވި. ކިހިނެއްތޯވީ މިހާރު އާބިޓްރޭޝަން މަރުޙަލާ ފަށާފައި މިވަނީ؟
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް
މަރުޙަލާ ފެށިއްޖެ ދޮއެއްތޯ. އަޅުގަނޑުމެންގެ ހަމަ ވިޓްނަސަސްގެ ގޮތުގައި އިއްޔެ ނޫން އިހަށް ދުވަހު ޑިފެންސް މިނިސްޓަރ ނާޒިމްވެސް އަދި ކުރީގެ ބަންޑާރަ ނައިބު ޢާޒިމާވެސް ވަޑައިގެންފައި އެވަޑައިގަތީ. އާބިޓްރޭޝަންގެ މަސައްކަތް ފެށިއްޖެ. އެހެންވީމާ، ފުރަތަމަ ސެޝަންގެ ހިއަރިންގއަށް ބޭނުންވާ މަޢްލޫމާތުތައް އަޅުގަނޑުމެންގެ ސަރުކާރުގެ ފަރާތުން އޭރު އެކަން ހެންޑްލް ކުރެއްވި ބޭފުޅުން މަޢްލޫމާތު ދެއްވާފައި އެވަޑައިގަތީ.
މިޞްބާޙް ޢައްބާސް - ސީ.އެން.އެމް
ކިހިނެއްތޯވީ އޭރު ފާހަގަކުރެއްވިމ ކޯޓުން ބޭރުގައި އައުޓް އޮފް ކޯޓް ސެޓްލްމަންޓަކަށް ދިޔުމަށް މަޝްވަރާ ކުރައްވާނެ ކަމަށް. ކިހިނެއްތޯވީ؟
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް
އެ މަޝްވަރާތައްވެސް އެބަކުރެވޭ ޖީ.އެމް.އާރު.އާއެކީ އަޅުގަނޑުމެން ހަމަ އައުޓް އޮފް ކޯޓް އާބިޓްރޭޝަނުން ބޭރުގައި މިކަން ކުރެވޭނެ ގޮތެއް އެބަކުރެވޭ. އެހެންނަމަވެސް، މީގައި މިވާ ގޮތަކީ ޖީ.އެމް.އާރު.ގެ ވިސްނުމުގައި އެމީހުން ހަމަ ވަރަށްބޮޑު ކޮމްޕެންސޭޝަނަކަށް، ބަދަލަކަށް މިއަހަނީ. ދެން އެވަރުގެ ބަދަލެއް ދެވިދާނެ ކަމަކަށްވެސް އަދި ކޮންމެހެން ދޭންވާ ކަމަށްވެސް ސަރުކާރަކަށް ޤަބޫލެއް ނުކުރެވޭ. އެހެންވީމާ، އަޅުގަނޑުމެންނަށް މިއުޅެނީ އަދަދުގެ ތެރޭގައި މިއަދަދު ދިމާނުވާތީ. އެހެންވީމާ. އެމީހުންގެ ޝައުޤުވެރިކަން މިހާރު އޮތީ ބޮޑަށް އާބިޓްރޭޝަނުން ގޮތެއް ނިމެންދެން މަޑުކޮށްލާނީއޭ. އެހެންވީމާ، އާބިޓްރޭޝަނުން ގޮތެއް ނިމުނީމާ ދެން ކުރިއަށް ގެންދާގޮތަށް.
މިޞްބާޙް ޢައްބާސް - ސީ.އެން.އެމް
އިތުރު ދިމާއަކުން އަދި ސުވާލެއް. އަޅުގަނޑުމެންނަށް ކޮންމެވެސް ވަރަކަށް ކޯލިޝަންގެ ބައެއް ޕާޓްނަރުންގެ ވާހަކަތަކުން ފާހަގަކުރެވޭ ކޮންމެވެސް ވަރަކަށް ނުތަނަވަސްކަމެއް ކޯލިޝަން ތެރޭގައި ހުރި ކަމަށް. ކިހިނެއްތޯ! އެކަހަލަ އެއްވެސް ކަމެއް އެބައުޅޭތޯ؟
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް
މިހާރު އަޅުގަނޑުމެން ކޯލިޝަންގެ ދެވަޒީރުން މިތިއްބެވީ ދޮއެއްތޯ. އަޅުގަނޑުމެން މިދަނީ މުޅި ސަރުކާރަށް މުޅި ރައްޔިތުންނަށް ބޭނުންވާ ކަންތައްތަކެއް ކުރަން. ދެން އަޅުގަނޑުމެންގެ ތެރޭގައި އިންޓަރނަލް ޑައިނަމިކްސްގައި ކޮންމެވެސް ވަރެއްގެ މައްސަލަތަކެއް ނޫނީ ހުށަހެޅުންތަކެއް ހުރިނަމަވެސް އަޅުގަނޑުމެން ކޯލިޝަން ހަމަ އިރާދަކުރެއްވިއްޔާ އަދިވެސް ހަމަ ވަރަށް ސްޓްރޯންގްކޮށް މިއޮތީ އިނގޭތޯ. މީގައި ނުކުންނަ މައްސަލަތަކަކީ، ޙަޤީޤަތުގައި މި ނުކުންނަ މައްސަލަތަކަކީ އެހާ ކުރުމުއްދަތެއްގައި ސަރުކާރަށްވެސް ޙައްލު ކުރަން ފަސޭހަ ކަމެއްނޫން. ކޯލިޝަންގެ ތެރޭ އެންމެ ބޮޑު ކަމަކަށް މި އޮންނަނީ، ހަމަ ހުރިހާ ޕާޓީއަކުން ބޭނުންވާ އަދަދުތަކަށް ސަރުކާރުގެ ސިޔާސީ މަގާމުތަކަށް މީހުން ހަމަޖެއްސުން. ދެން އެހެންނަމަވެސް މި ސިޔާސީ މަގާމުތަކަށް މީހުން ހަމަޖައްސާއިރު ދެތިން ކަމެއް މިއުޅެނީ. އެއްކަމަކީ، އަޅުގަނޑެއް ބޭނުމެއްނުވޭ، ސަރުކާރަކީ އެހާގިނަ ސިޔާސީ މަގާމު އޮތް ސަރުކާރަކަށެއް ވާކަށެއް. އަޅުގަނޑު ބޭނުންވަނީ ކޮންމެވެސް ހުދޫދެއްގެ ތެރޭގައި ސިޔާސީ މަގާމުތައް ހިފަހައްޓަން. އެންމެފަހުން އަޅުގަނޑު ނިންމާފައި އެއޮތީ ރައީސް ވަޙީދު ވަކިވެވަޑައިގެންނެވިއިރު އޭރުހުރި ސިޔާސީ މަގާމަށްވުރެ އަދަދު އިތުރުނުވެ ހިފެހެއްޓޭތޯ ބަލަން. އެހެންނަމަވެސް، އޭރަށްވުރެ ބޮޑަށް އަޅުގަނޑުމެންގެ ކޯލިޝަންގެ ލިޔެފައި އޮތް އެގްރީމެންޓްގެ ދަށުން ބޮޑެތި އަދަދުތައް އެބަހުރި.
އެހެންވީމާ، ފުރަތަމަ މި އުނދަގޫވާ މައްސަލައަކީ، މި އަދަދުތައް ހިފަހައްޓައިގެން މިކަން ކުރަންވީމާ ދިމާވާ އުނދަގޫ. އެއީ، މިފަހަރު ކޯލިޝަންގެ ފަރާތުން މަސައްކަތް ކުރެއްވިއިރު ވަރަށްގިނަ ބޭފުޅުން މި ސަރުކާރު ގެނައުމަށް މަސައްކަތް ކޮށްދެއްވި. ޖޭޕީގެ ފަރާތުންވެސް، ޢަދާލަތުގެ ފަރާތުންވެސް، އަދި ރަސްމީކޮށް ޢަދާލަތާ އަޅުގަނޑުމެން ކޯލިޝަން ނެތަސް، ޢަދާލަތަށްވެސް ހަމަ އަޅުގަނޑުމެން މަގާމުތައް ހަމަޖައްސައިދެމުން މިގެންދަނީ. އަދި އެމް.ޑީ.އޭ.ގެ ފަރާތުންވެސް ވަރަށްގިނަ ތަފާތު ފަރާތްތައް މަސައްކަތް ކުރެއްވި. ދެން އަޅުގަނޑުމެންގެ ވިސްނުމުގައި މިވާގޮތަކީ، މަސައްކަތްކޮށްފި ކަމަށްވަންޏާ ކޮންމެވެސް ކަހަލަ މަގާމަކަށް އިންތިޒާރު ކުރެވޭ. އެހެންނަމަވެސް، މިދެންނެވި ގޮތަށް އަދަދު ހިފަހައްޓައިގެން މިކަން ކުރާއިރު އަޅުގަނޑުމެންނަށް ކޮންމެވެސް ވަރެއްގެ ދަތިތަކެއް އަރާ. އެއީ އެއް ކަންތައް.
ދެން ދެވަނަ ކަމަކީ، އަޅުގަނޑުގެ ސަރުކާރުގައި ހަމަ ވީވަރަކުން މި ބަލަނީ، ސިޔާސީ މަގާމުތަކަށް މިސާލަކަށް ޑެޕިޔުޓީ މިނިސްޓަރުން ފެށިގެން މަތީ މަގާމުތަކަށް އަޅުގަނޑު މިބަލަނީ، ހަމަ ތަޢުލީމީ ބޭފުޅުން ގެނެވޭތޯ. އަދި ހަމަ އިސްކަން މި ދެނީ ތަޢްލީމީ ޒުވާނުންނަށް. ވަރަށް އިސްތިސްނާއީ ހާލަތެއްގައި ނުހުންނާނޭ ދަންނަވަނީކީއެއް ނޫން. އެހެންނަމަވެސް ޑެޕިޔުޓީ މިނިސްޓަރުންގެ ފެންވަރަށް ޢާންމުކޮށް ގެންނެވޭތޯ މިބަލަނީ ފަސްޓް ޑިގްރީ އެންމެ ކުޑަވެގެން ފަސްޓް ޑިގްރީ އޮންނަ ޒުވާން ބޭފުޅުން.
ދެން މީގައި މަގާމުތަކަށް ބޭބޭފުޅުންލާއިރު ނުކުންނަ އަނެއް މައްސަލައަކީ، ސަރުކާރުގެ މަގާމުތަކުގެ އިތުރަށް ކުންފުނި ކުންފުނީގެ ބޯޑު މިހުންނަނީ. ވަރަށްގިނަ ބޭފުޅުން އެދިވަޑައިގަންނަވާ ބޯޑަށް އެހެންނަމަވެސް ސަރުކާރުގެ އަތް މީގައި ބަނދެވޭގޮތެއް މިހާރު އެއޮތީ ޕްރައިވެޓައިޒޭޝަން ޤާނޫނެއް ފާސްކޮށްފައި. ޢަމަލުކުރަން ފަށައިފި. ޕްރައިވަޓައިޒޭޝަން ކޮމިޓީއެއް އޮވޭ. އެހެންވީމާ، ބޯޑުތަކަށް މިލާ މެންބަރުންގެ ނޫނީއްޔާ ޑިރެކްޓަރުންގެ ހަމަ މިނިމަމް ޝަރުޠުތަކެއް ހުރޭ. އެޝަރުޠުތަކަށް ނުފެތޭ ކަމަށްވަންޏާ ސަރުކާރުން ނަން ހުށަހެޅިކަމުގައިވިޔަސް ބޯޑުން އެ އިވެލުއޭޓް ކުރައްވާފައި އެނަންފުޅެއް ދޫކޮށްލައްވަނީ. އެހެންވީމާ، މިކަހަލަ އުނދަގުލުގެ ތެރޭގައި މަސައްކަތް ކުރާތީ ވަގުތު ނަގަނީ. އެހެންނަމަވެސް ހަމަ މިހުރިހާ ޕާޓީތަކަށް ވަރަށްގިނަ މަގާމުތަކެއް މިހާރު އެހެރީ ހަމަޖެހިފައި.
ދެން މިއުޅެނީ ސަފީރުންގެ މައްސަލަ. ސަފީރުންގެ މައްސަލައިގައިވެސް މި ދިމާވާކަމަކީ، ހަމަ ހުރިހާ ޕާޓީއަކުންވެސް ސަފީރުން ފޮނުއްވަން ބޭނުންފުޅުވޭ. އެހެންނަމަވެސް، ޚާރިޖީ ދާއިރާގައި ނޫނީއްޔާ ޑިޕްލޮމަސީ ދާއިރާއަކީ، މިކަހަލަ ޝަރުޠުތަކެއް ނޫނީވިއްޔާ ވަކިކަހަލަ ޝަރުޠުތަކެއް، ފެންވަރުތަކެއް ހުރެގެން ނޫނިއްޔާ ސަފީރުންގެ ފެންވަރުގައި އަޅުގަނޑަކަށް ބޭފުޅުން ހިމަނާކަށް ފަސޭހަ ދާއިރާއެއް ނޫން. އެހެންވީމާ، އެ ކެޓަގަރީއަށް އެ ފެންވަރަށް ފެތޭ ބޭފުޅުން އަޅުގަނޑު ސަފީރުންގެ ގޮތުގައި މިފޮނުވަނީ ކޮންމެ ޕާޓިއަކުންވެސް. އެހެންވީމާ، މިކަހަލަ ދަތިތައް ހުންނާތީއާއެކީ މަގާމު ހަމަޖެހުމުގައި ޕާޓީތަކުގެ ކޮންމެވެސް ލެވެލްއެއްގެ ބޭބޭފުޅުންގެ ތެރޭގައި އުޅޭ މައްސަލަތައް މިއުޅެނީ. އަޅުގަނޑަކަށް ޤަބޫލެއް ނުކުރެވޭ، ޕާޓީތަކުގެ އެންމެ އިސްވެރިންނާ ހަމައިގައި ބޮޑެތި މައްސަލަތަކެއް ހުރިކަމަކަށް. އެހެންވީމާ، މި އުނދަގޫ ހަމަ ދުވަސްކޮޅެއް ވަންދެން އުޅޭނެ. އެހެންނަމަވެސް އިރާދަކުރެއްވިއްޔާ މިއަކުންނެއް ކޯލިޝަނަކަށް މާބޮޑު އަސަރެއް ކުރާނެ ކަމަކަށް އަޅުގަނޑު ޤަބޫލެއް ނުކުރަން.
މިޞްބާޙް ޢައްބާސް - ސީ.އެން.އެމް
ފަހު ސުވާލު. ކިހިނެއްތޯ ކުރިއަށް މިއޮތް 18 ވަނަ ރައްޔިތުންގެ މަޖިލީހުގެ ރިޔާސަތާމެދު ކޯލިޝަންގެ ތެރޭގައި މިހާރު ކޮންގޮތަކަށްތޯ ނިމުނީ؟
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް
ދެން މީގައި މިވާގޮތަކީ، ކޯލިޝަންގެ ތެރޭގައި އަދި މިވާހަކައެއް ނުދެއްކޭ. ޙަޤީޤަތުގައި މި ރައްޔިތުންގެ މަޖިލިސް އެންމެ މުހިންމު ވަނީ ސަރުކާރަށް. އެއީ ސަރުކާރުން ބޭނުންވަނީ ރައްޔިތުންނަށް ވެފައިހުރި ވަޢުދުތައް ފުއްދައިދޭން. ސަރުކާރުން މިވަޢުދުތައް ފުއްދައިދޭން ބޭނުންވާއިރު، ރައްޔިތުންގެ މަޖިލީހަކީ ވަރަށް މުހިންމު ދައުރެއް އަދާ ކުރާނެ ތަނެއް ދޮއެއްތޯ. އެއީ، ސަރުކާރުން ރައްޔިތުންގެ ޙައްޤުތައް ހޯދަން ޤާނޫނަށް ގެންނަ އިޞްލާޙްތައް ނޫނިއްޔާ އަލަށް ވުޖޫދުކުރާ ޤާނޫނުތައް ހެދުމުގައިވެސް ރައްޔިތުންގެ މަޖިލީހުގެ އެއްބާރުލުން ބޭނުންވޭ. ދެން އެއަށްވުރެ ބޮޑަށް ރައްޔިތުންގެ މަޖިލީހުގެ އެއްބާރުލުން ބޭނުންވަނީ، މިހާރު މާލިއްޔަތު ޤާނޫނާއި ޕްރައިވެޓައިޒޭޝަން ޤާނޫނާއި މި ވިޔަފާރިއާބެހޭ ޤާނޫނުތައް އެކަށައެޅިފައި ހުރިގޮތުން ސަރުކާރުން ލޯނެއް ނަގާ ކަމަށްވަންޏާ މިޖެހެނީ ރައްޔިތުންގެ މަޖިލީހުގެ ރުހުން ހޯދަން. ދެން އެހެންވީމާ، މިކަހަލަ ކަންކަމަށް މަޖިލީހަކީ އިއްތިޙާދު ސަރުކާރުގެ އެޖެންޑާ ރައްޔިތުންނާ ހަމައަށް ފޯރުކޮށްދިނުމަށްޓަކައި ރައްޔިތުންގެ މަޖިލީހަށް ވަރަށް ބޮޑަށް ބަރޯސާވާ ގޮތަށް މިހާރު މިއޮތީ އަޅުގަނޑުމެންގެ ނިޒާމު ހަމަޖެހިފައި ދޮއެއްތޯ. އެހެންވީމާ، އަޅުގަނޑު ކަށަވަރުކުރަން ބޭނުންވޭ، އަޅުގަނޑަށް މީގައި ފުރުސަތެއް އޮންނަންޖެހޭ ކަމަށް އަޅުގަނޑު ޤަބޫލު ކުރަން. ސަރުކާރުން ރައްޔިތުންނަށް ދޭންވާ ސަރވިސް ޑެލިވަރ ކުރުމުގައި އެއްވެސް މީހަކަށް އެއަށް ހުރަސް އެޅިގެން ނުވާނެ. ހުރިހާ އެންމެންވެސް މަސައްކަތް ކުރަންވާނީ ޚިދްމަތް ދެވޭތޯ. އަޅުގަނޑާ އަޅުގަނޑާއެކު މަސައްކަތް ކުރައްވާ ކެބިނެޓްގެ ޓީމު މިމަސައްކަތް ކުރަނީ އަޅުގަނޑުމެން ހަމަ އިއްތިޙާދުގެ ފަރާތުން ބުނެފައި ހުރި ހުރިހާ ކަންތަކެއް ރައްޔިތުންނަށް ވީހާވެސް އަވަހަކަށް، ވީހާ ޚަރަދު ކުޑަ ގޮތަކަށް އެފިޝެންޓްކޮށް ގެނެސްދެވޭތޯ. އެހެންވީމާ، އެކަންކަން ކުރުމުގައި ރައްޔިތުންގެ މަޖިލީހުގެ ތެރެއިން އަޅުގަނޑުމެން އެކިމަގާމުތަކަށް އިންތިޚާބު ކުރެވޭ ކޮމިޓީގެ މުޤައްރިރުން ކަމުގައިވީނަމަވެސް، އިންތިޚާބު ކުރެވޭ ބޭފުޅުންނާ ހަމައިން މަޖިލިސް ސްލޯޑައުންވާގޮތް ވިއްޔާ ނޫނީ ސަރުކާރުން ސަމާލުކަންދޭ މިންވަރަށް ކަންކަމަށް ސަމާލުކަން ނުދެވޭ ކަމަށްވަންޏާ އޭގެ އުނދަގޫ އުފުލަން ޖެހޭނީ އެންމެ ފުރަތަމަ އަޅުގަނޑު. އަޅުގަނޑު ރައްޔިތުންނަށް ޒިންމާދާރުވާ މީހަކަށް މިހިރީ. އެހެންވީމާ، އެ ސަބަބަށްޓަކައި އަޅުގަނޑު މިއުޅެނީ ރައްޔިތުންގެ މަޖިލީހުގެ ރައީސްކަން އަޅުގަނޑުގެ ޕާޓީއަށް ބޭނުންވެގެން. ދެން ހަމަ އެގޮތަށް އަޅުގަނޑަށް އެނގޭ ޤާސިމްވެސް ޝައުޤުވެރިކަން އެބަހުރި. އަދި އަޅުގަނޑުމެން ޤާސިމާއެކީގައި އިރާދަކުރެއްވިއްޔާ ކޯލިޝަންތެރޭ އެވާހަކަ އިތުރަށް ދައްކާނަން.
މިޞްބާޙް ޢައްބާސް - ސީ.އެން.އެމް
ޝުކުރިއްޔާ އިނގޭތޯ.
________________________