ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް، ސިންގަޕޫރުގެ ޗާންގީ އެއަރޕޯޓް ގްރޫޕާއި، ޗާންގީ އެއަރޕޯޓް އިންޓަރނޭޝަލްގެ ވަފްދަކާ މިއަދު ބައްދަލުކުރައްވައިފިއެވެ.
މިއަދު ހެނދުނު ރައީސުލްޖުމްހޫރިއްޔާގެ އޮފީހުގައި އޮތް މި ބައްދަލުކުރެއްވުމުގައި، ސިންގަޕޫރުގެ ޗާންގީ އެއަރޕޯޓް ތަރައްޤީކޮށްފައިވާ ގޮތާބެހޭ މަޢުލޫމާތު، އެ ގްރޫޕުގެ ފަރާތުން ރައީސުލްޖުމްހޫރިއްޔާއަށް އެރުވިއެވެ.
މިބައްދަލުކުރެއްވުމުގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، އިބްރާހީމް ނާޞިރު އިންޓަރނޭޝަނަލް އެއަރޕޯޓަކީ، ރާއްޖޭގެ ފަތުރުވެރިކަމުގެ ޞިނާޢަތުގެ މައިބަދަކަން ފާހަގަކުރެއްވިއެވެ. އަދި މި ޞިނާޢަތް އިތުރަށް ކުރިއަރުވައި އާލާކުރުމަށްޓަކައި، ގިނަ އަދަދެއްގެ ފަސިންޖަރުންނަށް އެއްފަހަރާ ޚިދުމަތް ދެވޭގޮތަށް، މި އެއަރޕޯޓު ތަރައްޤީކުރެއްވުމަށް އެމަނިކުފާނުގެ ސަރުކާރުން ގެންގުޅުއްވާ ތަޞައްވުރު، ސިންގަޕޫރުގެ ވަފުދާ ޙިއްޞާ ކުރެއްވިއެވެ.
މިބައްދަލުކުރެއްވުމުގައި، މިނިސްޓަރ އޮފް ޓޫރިޒަމް އަޙްމަދު އަދީބު ޢަބްދުލްޣަފޫރު ބައިވެރިވެވަޑައިގެންނެވިއެވެ.
