މިއަދު ފުލުހުންގެ ޚިދުމަތް ވާޞިލުވެފައިވާ ހިސާބު ރަމްޒުކޮށްދެނީ، މުޖުތަމަޢަށް ލިބިފައިވާ ކުރިއެރުން ކަމުގައި ރައީސުލްޖުމްހޫރިއްޔާގެ ނައިބު ޑޮކްޓަރ މުޙަންމަދު ޖަމީލު އަޙްމަދު ވިދާޅުވެއްޖެއެވެ. ރައީސުލްޖުމްހޫރިއްޔާގެ ނައިބު މިހެން ވިދާޅުވީ، ފުލުހުންގެ 81 ވަނަ އަހަރީ ދުވަސް ފާހަގަކުރެއްވުމުގެ ގޮތުން، އައްޑޫ ސިޓީގައި ރޭ ބޭއްވެވި ރަސްމިއްޔާތުގައި ވާހަކަފުޅު ދައްކަވަމުންނެވެ.
ރައީސުލްޖުމްހޫރިއްޔާގެ ނައިބުގެ ވާހަކަފުޅުގައި، ކޮންމެ މުޖުތަމަޢެއްގެވެސް ކުރިއެރުން ބިނާވެފައިވަނީ، އެތަނެއްގެ ރައްޔިތުން، އެތަނެއްގެ ޤާނޫނުތަކަށް ބޯލަނބައި، ޙުރުމަތްތެރިކޮށްހިތާ މިންވަރެއްގެ މައްޗަށް ކަމަށާއި، އެތަނެއްގައި ޤާނޫނު ހިނގައި، ޤާނޫނަށް ތަބާވާ މިންވަރެއްގެ މައްޗަށް ކަމުގައި ވިދާޅުވިއެވެ. މިއީ، ދުނިޔޭގެ އެންމެ ތަހުޒީބު ވެފައިވާ ތަންތަނުގައިވެސް، އެތަނެއް ތަހުޒީބު ވެފައިވާ މިންވަރު ބަލާ ނިސްބަތްކަން އެމަނިކުފާނު ފާހަގަކުރެއްވިއެވެ. މިރޮނގުން ވާހަކަފުޅު ދައްކަވަމުން، ރާއްޖޭގައި ސިޔާސީގޮތުން ދެބަސްވުން ހިނގާ ކޮންމެ ފަހަރަކު، ޙަޤީޤީ ތަހުޒީބުގެ މި ވާހަކަތައް ހަނދާން އެބަކުރަންޖެހޭ ކަމަށާއި، މިއަށްވުރެ ބޮޑު ތަހުޒީބެއް، މިއަށްވުރެ ބޮޑު ކުރިއެރުމެއް ނުވާނެ ކަމުގައި ރައީސުލްޖުމްހޫރިއްޔާގެ ނައިބު ވިދާޅުވިއެވެ.
ރައީސުލްޖުމްހޫރިއްޔާގެ ނައިބުގެ ވާހަކަފުޅުގައި، ދިވެހި މުޖުތަމަޢުގައި "ތަހުޒީބު" މިހާރު މާނަކުރަނީ ކިހިނެއްތޯ، އަލުން ބަލަންޖެހޭ ކަމުގައި ވިދާޅުވިއެވެ. ރާއްޖެއަށް މިފަދަ މުހިންމު ވަގުތެއްގައި، އެކި ގޮތްގޮތުން ޤައުމަށް ފާގަތިކަން ހޯދައިދޭން މަސައްކަތްކުރާ ފަރާތްތަކުން ޤާނޫނުތަކަށް ޢަމަލުކުރަނީ ކިހާވަރަކަށްކަމާމެދު އެބަ ވިސްނަންޖެހޭ ކަމުގައިވެސް އެމަނިކުފާނު ވިދާޅުވިއެވެ. މިރޮނގުން ވާހަކަފުޅު ދައްކަވަމުން، ފުލުހުންގެ ޚިދުމަތަކީ، ޤާނޫނު ރައްކާތެރިކޮށް ދަމަހައްޓާ ޚިދުމަތެއްކަން ރައީސުލްޖުމްހޫރިއްޔާގެ ނައިބު ފާހަގަކުރެއްވިއެވެ. އަދި ޤައުމުގެ ސިޔާސީ ވެރިން، މުޖުތަމަޢުގެ ހަރުދަނާ ޤާނޫނުތަކަށް ބޯލަނބާތަން ފެނިގެން ދިޔުމަކީ، ކުރިއެރުން ލިބިގެންދާކަން ދައްކައިދޭ ކަމެއް ކަމަށާއި، "ތަރައްޤީ" އޭ މިއަދު މި ކިޔަނީ، މި ކަންކަމަށް ކަމުގައި ރައީސުލްޖުމްހޫރިއްޔާގެ ނައިބު ވިދާޅުވިއެވެ.
އެއްވެސް ފަރުދަކަށްވުރެ، އަދި ސިޔާސީ ޕާޓީއަކަށްވުރެ، ޤައުމުގެ ސަލާމަތްތެރިކަމާއި ރައްކާތެރިކަން އަބަދުވެސް ބޮޑުވާނެކަން ރައީސުލްޖުމްހޫރިއްޔާގެ ނައިބު ހަނދާންކޮށްދެއްވިއެވެ. އަދި ސިޔާސީ ފިކުރުގެ ތެރެއިން، ޤައުމީ ފިކުރަށް އިސްކަންދޭން ޖެހޭނެކަންވެސް އެމަނިކުފާނުގެ ވާހަކަފުޅުގައި ފާހަގަކުރެއްވިއެވެ. ހަމައެއާއެކު، ޤާނޫނަށް ތަބާވާ، ޤާނޫނަށް ޙުރްމަތްތެރިކޮށްހިތާ މުޖުތަމަޢެއް ބިނާވެގެންނޫނީ، ޤައުމަށް ކުރިއެރުމެއް ލިބިގެން ނުދާނެ ކަމުގައިވެސް އެމަނިކުފާނު ވިދާޅުވިއެވެ.
މި ރަސްމިއްޔާތުގައި، ފުލުހުންގެ ޚިދުމަތުގައި 25 އަހަރަށްވުރެ ދިގު މުއްދަތެއްގައި ޚިދުމަތްކޮށްފައިވާ ފަރާތަކަށް ދެވޭ ހަނދާނީ ފިލަޔާއި، އާންމުންގެ ތެރެއިން ފުލުހުންގެ މަސައްކަތްތަކަށް ވޭތުވެދިޔަ އަހަރު އެހީތެރިވެދީފައިވާ ފަރާތްތަކަށް އެކަމުގެ އަގު ވަޒަންކުރުމުގެ ގޮތުން ދެވޭ ހަނދާނީ ފިލަޔާއި، 2013 ވަނަ އަހަރު ފާހަގަ ކުރެވޭ އިޚްލާސްތެރި ޚިދުމަތްތަކެއް ކޮށްދެއްވާފައިވާ މުވައްޒަފުންނަށް ދެވޭ ހަނދާނީ ލިޔުން ދެއްވުން އޮތެވެ.
