بســم اللّـه الرّحمـن الرّحيــم
اَلحَمْـدُ لِلّـهِ رَبّ العَـالَمِـين‘ وَالصّـلاة وَالسّلام علـى أشرف الأنبياء والمرسلين، وعلى آلـه وصحبـه أجمعـين.
މިނިސްޓަރ އޮފް އެޑިޔުކޭޝަން ޑޮކްޓަރ ޢާއިޝަތު ޝިހާމް، މިނިސްޓްރީގެ ސްޓޭޓް މިނިސްޓަރުންނާއި، ނާއިބުންނާއި މިނިސްޓްރީގެ އިސްވެރިން، އަދި ތަޢުލީމީ ފަންޑުގެ އިސްބޭފުޅުންނާއި، މިއަދުގެ މި އިޙްތިފާލުގައި ބައިވެރިވެވަޑައިގަންނަވާ އެންމެހައި ބޭފުޅުން.
السّــلام عليــكم ورحـمــة اللّـه وبـركاتـه
އާދެ! އަޅުގަނޑުގެ އެންމެ އިސް ވާޖިބެއް ކަމުގައި ދެކެނީ 14 އޮކްޓޯބަރ 2010 ގައި ބިންގާ އެޅުނު މި މުހިންމު ޢިމާރާތް ނިމިގެން މިއަދު ހުޅުވިގެންމިދާ ރަސްމިއްޔާތުގައި މި މަސައްކަތުގައި ވަރަށް ބުރަ މަސައްކަތާއެކީ ހަރަކާތްތެރިވި ތަޢުލީމީ ދާއިރާގެ އެންމެހައި ބޭފުޅުންނަށް، ޚާއްޞަކޮށް އެޑިޔުކޭޝަން މިނިސްޓަރަށާއި، އަދި ތަޢުލީމީ ފަންޑުގެ ހުރިހާ ބޭފުޅުން ކުރައްވާފައިވާ ހުރިހާ ބުރަ މަސައްކަތުގެ އަގު ވަޒަންކޮށް، އެބޭފުޅުންނަށް އިޚްލާޞްތެރިކަމާއެކީގައި ޝުކުރު ދެންނެވުން. ވަރަށް ބޮޑަށް ޝުކުރިއްޔާ!
އެއަށްފަހުގައި އެނގިވަޑައިގަންނަވާނެ ފދައިން މިއަދު އަޅުގަނޑުމެން މި ފާހަގަކުރާ ރަސްމިއްޔާތަކީ، ދިވެހިރާއްޖޭގެ ތަޢުލީމީ ދާއިރާގައި ހަރަކާތްތެރިވާ އެދުރުންނަށާއި، މުދައްރިސުންނަށް، އަދި އެ ބޭފުޅުންނަށް ދިމާވެފައިވާ އެންމެ ބޮޑު އެއް މައްސަލަ ކަމަށްވާ ގެދޮރުގެ މައްސަލައަށް ޙައްލެއް ލިބިގެންދާނެ ކަމަކަށްވާތީ، އަޅުގަނޑު އުއްމީދު ކުރަނީ މިއަދުގެ މި ރަސްމިއްޔާތަށް ފަހުގައިވެސް، ރާއްޖޭގެ މިދާއިރާގައި ހަރަކާތްތެރިވާ ބޭފުޅުންނަށް، ޚާއްޞަ ގޮތެއްގައި ތަޢުލީމީ ދާއިރާގައި ހަރަކާތްތެރިވާ އެންމެހައި ބޭފުޅުންނަށް މިކަމުން އެބޭފުޅުންގެ ހިތްތަކަށް ފިނިކަމެއް ލިބިގެންދާނެކަމަށް.
އެނގިވަޑައިގަންނަވާނެ ފަދައިން މިއަދުގެ ސަރުކާރަކީ، ޚާއްޞަ ގޮތެއްގައި ތަޢުލީމީ ދާއިރާއަށް ދިމާވެފައިވާ މައްސަލަތަކަށް ޙައްލު ހޯދައިދިނުމަށް މަސައްކަތްކުރާ ސަރުކާރެއް. މި ސަރުކާރުގެ އެންމެ ފުރަތަމަ އަމާޒަކަށް ވެގެންދިޔައީ، ރާއްޖޭގެ ސްކޫލްތަކުގައި ތަޢުލީމު ޙާޞިލުކުރާ ދަރިވަރުންނަށް މިހާރަށްވުރެ ރަނގަޅު ތަޢުލީމީ ނިޒާމެއް ފޯރުކޮށްދިނުމަށާއި، ތަޢުލީމީ މަންހަޖު އިސްލާހުކޮށް، ތަޢުލީމީ މަންހަޖަށް ގެންނަންޖެހޭ އިސްލާހުތައް ތަޢާރުފުކޮށްދިނުން. އަދި ހަމައެއާއެކީގައި، ރާއްޖޭގެ ތަޢުލީމީ ދާއިރާގައި ހަރަކާތްތެރިވާ ދަރިވަރުންނަށް އެ ދާއިރާއިން ލިބިދެވޭ ތަޢުލީމަކީ، އެންމެ ރަނގަޅު ތަޢުލީމު ކަމަށް ހަދައިދިނުމާއެކީގައި، ތަރުބަވީ ތަޢުލީމެއް ރާއްޖޭގެ ދަރިވަރުންނަށް ފޯރުކޮށްދިނުން. ނިމިގެންދިޔަ 100 ދުވަހުގެ ތެރޭގައި މި މަސައްކަތުގެ ތެރެއިން ވަރަށް ބޮޑު ކުރިއެރުންތަކެއް އަޅުގަނޑުމެންވަނީ ހޯދާފައި. އެހެންކަމުން، އަޅުގަނޑު މި ފުރުސަތުގައި ރާއްޖޭގެ އެންމެހައި މުދައްރިސުންނަށާއި، އަދި ތަޢުލީމީ ދާއިރާގައި ހަރަކާތްތެރިވާ އެންމެހައި ދަރިވަރުންނަށާއި، ރާއްޖޭގެ ދަރިވަރުންނަށް މިހާ ފުރިހަމަ ގޮތެއްގައި ރަނގަޅު މަންހަޖެއް ގެނެސްދެއްވައި އަދި ތަޢުލީމީ ދާއިރާއަށް ކުރިއެރުންތަކެއް ގެނެސްދެއްވުމަށްޓަކައި ރައީސް ޢަބްދުﷲ ޔާމީން ކުރައްވާފައިވާ ބުރަ މަސައްކަތްތައް ފާހަގަކޮށް، މިއަދުގެ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމަށް އަޅުގަނޑު ޚާއްޞަ ޝުކުރެއް އަދާކުރަން.
މިއަދު ކުރިއަށް މިދަނީ އަޅުގަނޑުމެން ދަރިވަރުންނާ ހަމައަށް ގެނައި އިސްލާހުތަކަށް ފަހުގައި ނުވަތަ ގެނައި ބަދަލުތަކަށްފަހުގައި ދަރިވަރުންނަށް ރަނގަޅު ތަޢުލީމެއް ފޯރުކޮށްދިނުމުގެ އެންމެ މުހިންމު އެއްއަމާޒަކަށް ވާންވާނީ، ކުދިންނަށް ތަޢުލީމު އުނގަންނައިދޭ މުޢައްލިމުންނަށާއި، މުދައްރިސުންނަށް، މި ދާއިރާއަކީ ޝައުޤުވެރިވާފަދަ ދާއިރާއަކަށް ހަދައިދީގެން. އަދި ހަމައެއާއެކީގައި މިދާއިރާގައި މުދައްރިސުންނަށާއި މުޢައްލިމުންނަށް ދިމާވެފައިވާ ގޮންޖެހުންތަކަށް އެކަށީގެންވާ ޙައްލެއް ފޯރުކޮށްދީގެން. މިގޮތުން ބަލާކަމުގައިވާނަމަ އެންމެ ބޮޑު އެއް ގޮންޖެހުމަކަށް ކުރިމަތިވެފައި މިއޮތީ ގެދޮރުވެރިކުރުމުގެ މައްސަލަ ކަމަށްވާތީ، އަޅުގަނޑު އުފަލާއެކީގައި ފާހަގަކުރަން، މިއަދު އަޅުގަނޑުމެން މި ހުޅުވި ޢިމާރާތުގެ ތެރެއިންވެސް އިރާދަކުރެއްވިއްޔާ ގިނަ މުދައްރިސުންނަށާއި މުޢައްލިމުންނަށް، މިހާރު މާލޭގެ އެކި ތަންތާނގައި ދަތިކޮށް ދިރިއުޅެމުން އަންނަ އަޅުގަނޑުމެންގެ މުދައްރިސުންނަށް މި ޢިމާރާތުގެ ތެރެއިން އިރާދަކުރެއްވިއްޔާ ވަރަށްބޮޑު ޙައްލެއް ލިބިގެންދާނެ. ހަމައެއާއެކީގައި އަޅުގަނޑު ފާހަގަކުރަން، މީގެކުރިން އަޅުގަނޑުމެންނަށް އައިސްފައިވާ ޝަކުވާތަކުގެ މައްޗަށް ބިނާކޮށް މިއަދު މިހުޅުވިގެން މިދާ ޢިމާރާތަށް ކޮލިފައިވުމަށް ނުވަތަ މިފުރުޞަތު ލިބުމަށްޓަކައި މީގެކުރިން އޮތް ޖާގަ އިތުރަށް ފުޅާކޮށް، މަޢުހަދުގައި ކިޔަވައިދޭ މުދައްރިސުންނަށާއި، އަދި ހަމައެއާއެކީގައި ކީރިތި ޤުރްއާން ކިޔަވައިދޭ މަރުކަޒުގައި ކިޔަވައިދޭ މުދައްރިސުންނަށްވެސް މިފުރުސަތުގެ ތެރެއިން ގެދޮރުވެރިވުމުގެ ފުރުސަތު މިހާރު މިތަނުން އެބޭފުޅުންނަށްވެސް ހުޅުވާލެވިފައިވާ ވާހަކަވެސް އަޅުގަނޑު ހަމައުފަލާއެކީގައި ފާހަގަކޮށްލަން ބޭނުންވޭ.
މީގެ އިތުރުން، އަޅުގަނޑުމެން މިސަރުކާރުން ފަށްޓާފައިވާ އެންމެ މުހިންމު އެއް މަޝްރޫޢަކީ، އެނގިވަޑައިގަންނަވާނެ ފަދައިން ތަފާތު ހުނަރުތައް ދަސްކޮށްދިނުން ކަމަށްވާތީވެ ރަސްމީ ތަޢުލީމުގެ ތެރެއިން އިރާދަކުރެއްވިއްޔާ މިއަދު އަޅުގަނޑުމެން ފަށާފައިވާ ނިޒާމުގައި ގްރޭޑް 10 ނިމޭ ކުދިންނަށް އޭގެ ކުރިންވެސް ފެށިގެން، ޕޮލިޓެކްގެ ދާއިރާއިން ތަފާތު ހުނަރު ދަސްކޮށްދިނުމުގެ ޕްރޮގްރާމް ފުޅާ ދާއިރާއެއްގައި، ކުރިއަށް މިއޮތް ފަސް އަހަރު ދުވަހުގެ ތެރޭގައި އެމަސައްކަތް ކުރިއަށް ގެންދާނެތީވެ ޕޮލިޓެކްގައި ޙަރަކާތްތެރިވާ މުދައްރިސުންނަށްވެސް، މި ސްކީމްގެ ދަށުން ގެދޮރު އެޅުމުގެ ފުރުސަތު ހުޅުވާލެވިފައިވާ ވާހަކަ އަޅުގަނޑު ދަންނަވާލަން ބޭނުން. އެހެންކަމުން، މިތިން ދާއިރާ ހިމެނިގެން ދިޔުމުން މަޢުހަދާއި، ކީރިތި ޤުރްއާން ދަސްކޮށްދޭ މަރުކަޒުގައި ހަރަކާތްތެރިވާ މުދައްރިސުންނަށާއި އަދި ޕޮލިޓެކްގައި ހަރަކާތްތެރިވާ މުދައްރިސުންވެސް ހިމެނޭ ގޮތަށް މިއަދު މި ފުރުސަތު ފުޅާވެގެންދިޔުމާއެކީގައި އިތުރަށް އެބޭފުޅުންނަށްވެސް މި ސްކީމަށް ވަނުމަށްޓަކައި، ޖާގަ ލިބުމަށްޓަކައި މިހާރު ހުޅުވިފައިވާ މުއްދަތު ކުރިއަށް އޮތް ދުވަސްތަކުގައި އިތުރުވެގެންދާނެ ކަމަށް އަޅުގަނޑު އުންމީދު ކުރަން. އެގޮތުގެ މަތިން އެ އިޢުލާނުތައް އެގޮތަށް ހަމަޖެހިގެންދާނެ ކަމަށް އަޅުގަނޑު އުންމީދުކުރަން މިއަދަށްފަހު.
އެއަށްފަހުގައި އަޅުގަނޑު ހަމައެއާއެކީގައި ދަންނަވާލަން ބޭނުންވަނީ، މިއަދުގެ ސަރުކާރުން އަޅުގަނޑުމެން މުދައްރިސުންގެ ހާލަތު ރަނގަޅު ކުރުމަށްޓަކައި ވިސްނާފައިވާ ގެދޮރުވެރި ކުރުމުގެ ޕްރޮގްރާމްގެ ތެރޭގައި މިއީ އެއް ފިޔަވަހި. އެހެންނަމަވެސް މީގެ އިތުރުން، ސަރުކާރުން މިހާރު އިޖުތިމާޢީ ރައްކާތެރިކަމުގެ ތެރެއިން މުޅި ރާއްޖޭގެ ރައްޔިތުންނަށް ގެދޮރުވެރި ކުރުމަށްޓަކައި މިދިޔަ ދުވަސްތަކުގައި އަޅުގަނޑުމެން އިޢުލާނު ކޮށްފައިވާ ޕްރޮގްރާމަކީ، ވަރަށް ފުޅާ ދާއިރާއެއްގައި އިރާދަކުރެއްވިއްޔާ ކުރިއަށް މިއޮތް ފަސް އަހަރު ދުވަހުގެ ތެރޭގައި ހިންގޭނެ ޕްރޮގްރާމެއް. މި ޕްރޮގްރާމްގެ ފުރަތަމަ ފިޔަވަހި މިހާރުވަނީ އިޢުލާނު ކުރެވިގެން ގޮސްފައި. މިގޮތުން އިރާދަކުރެއްވިއްޔާ ހުޅުމާލޭގައި ފްލެޓް އެޅުމުގެ މަޝްރޫޢުތައް ވަރަށް އަވަހަށް ކުރިއަށް ހިނގައިގަންނާނެ. އަދި މި މަޝްރޫޢު ކުރިއަށްދާއިރުގައި މާލޭގައި އެންމެ ބޮޑަށް ގެދޮރުވެރިވުމަށް ބޭނުންވެފައިވާ ޢާއިލާތައް ދެނެގަނެ، އެ ޢާއިލާތަކަށް ޚާއްޞަ ގޮތެއްގައި މި ގެދޮރުވެރިކުރުވުމުގެ މަޝްރޫޢަށް ވަދެވޭނެފަދަ ގޮތަކަށް އިރާދަކުރެއްވިއްޔާ މި މަޝްރޫޢު ކުރިއަށްދާއިރުގައި މި މަޝްރޫޢުތަކުގެ ތެރެއިންވެސް މުދައްރިސުން މަޙުރޫމްނުވެ، މި މަޝްރޫޢުގެ ތެރެއިންވެސް މުދައްރިސުންނަށް ފުރުސަތު ލިބިގެންދާނެ ވާހަކަވެސް މިފުރުސަތުގައި އަޅުގަނޑު ދަންނަވާލަން ބޭނުންވޭ.
ހަމައެއާއެކީގައި، އަޅުގަނޑުމެންގެ ސަރުކާރުން ނިމިގެންދިޔަ ރިޔާސީ އިންތިޚާބުގެ ތެރޭގައިވެސް ރާއްޖޭގެ އެކިހިސާބުތަކަށް އަޅުގަނޑުމެން ކުރި ދަތުރުގައި ޚާއްޞަ ގޮތެއްގައި އެކިއެކި ދާއިރާތަކަށް ދިމާވެފައިވާ ގޮންޖެހުންތައް އަޅުގަނޑުމެން އަޑުއެހީމު. އެގޮތުން އަޅުގަނޑުމެންނަށް އިވިގެންދިޔަ އެންމެ މުހިންމު އެއް ޝަކުވާއަކީ، ޚާއްޞަ ގޮތެއްގައި އަޅުގަނޑުމެންގެ ސިވިލް ސަރވިސްގެ ތެރޭގައި ހަރަކާތްތެރިވާ ބޮޑު ބައެއް، މުދައްރިސުންގެ ފަރާތުން އައިސްފައިވާ ގިނަ ޝަކުވާތަކެއް އަޅުގަނޑުމެންނަށް ލިބިގެންދިޔަ. އޭގެތެރޭގައި ގެދޮރުވެރިކުރުމާއި އަދި ހަމަ މުސާރައާއި ޢިނާޔަތްތަކުގެ ވާހަކަތައް އަޅުގަނޑުމެންނާ ހަމައަށް އައިސްފައިވޭ. މީގެތެރެއިން ވަރަށް ގިނަ ކަންތައްތަކެއް، އިރާދަކުރެއްވިއްޔާ ކުރިއަށް މިއޮތް ދުވަސްތަކުގެ ތެރޭގައި ވަރަށްގިނަ ޙައްލުތަކެއް އަޅުގަނޑުމެންނަށް ހޯދޭނެ ކަމުގެ ޔަޤީންކަން އެބައޮތް. އެއާއެކީގައި ދެންމެ މިނިސްޓަރުވެސް ފާހަގަކުރެއްވި ފަދައިން އެއްބައި ކަންތައްތަކަކީ، މިހާރުވެސް އެކަންތައްތަކަށް އަޅުގަނޑުމެންނަށް ޙައްލު ފޯރުކޮށްދެވިފައިވާ ކަންތައްތަކެއް. އެގޮތުން މުދައްރިސުންނަށް އެބޭފުޅުން އިތުރަށް ތަޢުލީމު ހާސިލުކުރުމަށްޓަކައި ހޭދަކުރާ މުއްދަތުގެ ތެރޭގައި މުސާރަ ހިނގާ ގޮތަށް ހަމަޖެހިގެން މިހާރުވަނީ ސްކީމް ފެށިފައި. އިރާދަކުރެއްވިއްޔާ މިއީވެސް އަޅުގަނޑު ދެކޭގޮތުގައި ޚިދުމަތުގައި ތިއްބެވި މުދައްރިސުންނަށާއި މުޢައްލިމުންނަށް ލިބިގެންދިޔަ ވަރަށްބޮޑު ކުރިއެރުމެއް. މީގެކުރިން މިކަމުގައި ވަރަށް ބޮޑެތި ހިތްދަތިކަމެއް މުދައްރިސުން ތަޙައްމަލު ކުރުމުގެ ނަތީޖާއަކަށް ވެގެންދިޔައީ، ކުރިއަށްދާން ބޭނުންވާ އަދި މިދާއިރާގައި ޙަރަކާތްތެރިވާ ބޭފުޅުންގެ ފަންނުވެރިކަމާއި ޤާބިލިއްޔަތު އިތުރުކުރުމަށްޓަކައި ހުރި ފުރުސަތުތައް ހަނިވެގެންދިޔުން. އިރާދަކުރެއްވިއްޔާ މާތްﷲގެ ރަޙްމަތާއެކީގައި މިހާރު ޕޭލީވްގައި އިތުރަށް ކިޔެވުމުގެ ފުރުސަތު ހަމަޖެހިގެން ދިޔުމާއެކީގައި، އަޅުގަނޑު ދެކޭގޮތުގައި މި ދާއިރާގައި ހަރަކާތްތެރިވާ މުދައްރިސުންގެ ފަންނުވެރިކަމާ އަދި އެބޭފުޅުންގެ ފެންވަރާއި ޤާބިލިއްޔަތު އިތުރު ކުރުމަށް އިރާދަކުރެއްވިއްޔާ މިހުޅުވިގެން ދިޔައީ އިތުރު ފުރުސަތުތަކެއް. އޭގެ އިތުރުންވެސް ކުރިއަށް މިއޮތް ދުވަސްތަކުގައިވެސް އަޅުގަނޑުމެންގެ މުދައްރިސުންގެ ޙާލަތު ރަނގަޅު ކުރުމަށްޓަކައި އެބޭފުޅުންގެ މަސައްކަތުގެ އަގު ވަޒަންކުރުމާއެކީގައި އަދި ޚާއްޞަކޮށް ރާއްޖޭގެ ދިރިއުޅުމުގެ ޙާލަތު މިހާރު އޮތްގޮތާއި ތަކެތީގެ އަގު އުފުލިގެންދާ މިންގަނޑަށް ބަލާއިރުގައި މުދައްރިސުންނަކީ، އަބުރުވެރި ދިރިއުޅުމެއްގައި އުޅެވޭފަދަ ބަޔަކަށް ހެދުމަށްޓަކައި ކުރެވެން އޮތް ހުރިހާ މަސައްކަތްތަކެއް ކުރުމަކީ ރައީސް ޢަބްދުﷲ ޔާމީން ޢަބްދުލްޤައްޔޫމްގެ ސަރުކާރުގެ ވަރަށް މުހިންމު އެއް އަމާޒު. އެގޮތުން މިއަދު އަޅުގަނޑު އުފަލާއެކީގައި ފާހަގަކުރަން، ނިމިގެންދިޔަ ދުވަސްތަކުގައި 2009ވަނަ އަހަރު ހުއްޓިފައިވާ، މުދައްރިސުންނަށް އިތުރުގަޑީގެ އެލަވަންސް އެކިގޮތްގޮތަށް އެކި ޙާލަތުގައި އެކި މިންވަރަށް ދެމުން އައިސްފައި މިހާރު ގާތްގަނޑަކަށް ފަސް ޕަސެންޓަށް ތިރިވެފައިވާ ވުމަކީ ޙަޤީޤަތުގައި މިދާއިރާގައި ހަރަކާތްތެރިވާ އެތަކެއް ސަތޭކަ މުދައްރިސުންނަށް ދިމާވެފައި އޮތް ވަރަށްބޮޑު މައްސަލައެއް. އަދި މިމައްސަލައިގެ ސަބަބުން ތަޢުލީމީ ދާއިރާއަށް ފެންވަރު ރަނގަޅު އަދި މިދާއިރާގައި ޝައުޤުވެރިކަމާއެކީގައި ޙަރަކާތްތެރިވާނެ މީހުން ލިބުމުގެ މައްސަލަވެސްވަނީ ކޮންމެވެސް ވަރަކަށް ކުރިމަތިވެފައި.
އަޅުގަނޑުމެންގެ ދަރިންނަށާއި މުޖުތަމަޢަށް ދިމާވެފައިވާ އެންމެބޮޑު އެއް މައްސަލައަކީ، އުނގެނުން ކަމުގައި ވާކަމަށްވާނަމަ އަދި އެދާއިރާ އިތުރަށް ތަރައްޤީކުރަން އަޅުގަނޑުމެން ބޭނުން ކަމުގައިވާނަމަ އެދާއިރާގައި ޙަރަކާތްތެރިވާ ބޭފުޅުންނަށް އެކަށީގެންވާ ޢިނާޔަތްތަކެއް ލިބޭނެ މަގު ހޯދައިދިނުމަކީ އެއީ، ސަރުކާރުގެ ވަރަށްބޮޑު ޒިންމާއެއް. އެހެންކަމުން، މުދައްރިސުންނަށް އިތުރުގަޑީގައި ދޭ ފަސް ޕަސެންޓް އެލަވަންސް، އިރާދަކުރެއްވިއްޔާ މި މަހުން ފެށިގެން ދިހަ ޕަސެންޓަށް ހަމަޖައްސާނެ ވާހަކަވެސް އަޅުގަނޑު މިއަދު އުފަލާއެކީގައި ފާހަގަކުރަން.
އަޅުގަނޑުމެންގެ އުންމީދަކީ އަދި އިރާދަކުރެއްވިއްޔާ ކުރިއަށް މިއޮތް ދުވަސްތަކުގެ ތެރޭގައި، ސަރުކާރުން މިހާރު ފަށާފައިވާ ރާއްޖޭގެ ސިވިލް ސަރވިސްގައި ހަރަކާތްތެރިވާ މުވައްޒަފުންގެ މުސާރައާއި އޮނިގަނޑު މުރާޖަޢާ ކުރުމުގެ މަސައްކަތް ވަރަށް އަވަހަށް ނިމިގެން ދިޔުމާއެކީގައި ޖުމްލަ ގޮތެއްގައި ރާއްޖޭގެ ސިވިލް ސަރވިސްގައި ހަރަކާތްތެރިވާ މުވައްޒަފުންނަށް ލިބޭ އާމްދަނީގެ މިންވަރަކީ، އަމިއްލަ ޚިދުމަތްތަކުގައި ހަރަކާތްތެރިވާ ބޭފުޅުންނަށް ލިބޭ އެއްޗަކާ އެއްވަރަކަށް އުފުލިގެންދާ އެއްޗަކަށް ހެދުން. އަދި ހަމައެއާއެކީގައި، ސަރުކާރުގެ ނުވަތަ ދައުލަތުގެ އެކި މުއައްސަސާތަކުގެ ތެރެއިން މުސާރައިގެ އޮނިގަނޑުގައި ހުރި ތަފާތުތައް ނައްތާލައި، އެއްހަމައަކަށް، ތިލަފަތް ހަމަ މިންގަނޑަކަށް ބެލެވޭފަދަ ގޮތަކަށް މުސާރައިގެ އޮނިގަނޑު ހަމަޖެހިގެން ދިޔުމަކީ އެއީ، އެންމެ އިންސާފުވެރި ގޮތް ކަމަށްވާތީ، އިރާދަކުރެއްވިއްޔާ ކުރިއަށް މިއޮތް ދުވަސްތަކުގެ ތެރޭގައި ލަސްނުވެ އެމަސައްކަތް ނިމިގެން އެގޮތުގެ މަތިން އެކަންތައް ހަމަޖެހިގެން ދިޔުމަކީ އެއީ، ސަރުކާރުގެ ވަރަށްބޮޑު އުންމީދެއް. އެކަމުގެ އުންމީދު އޮތް ވާހަކަ އަޅުގަނޑު މިފުރުސަތުގައި ދަންނަވާލަން ބޭނުންވޭ.
އަޅުގަނޑުމެން މިހުރިހާ ކަމެއް މިކުރަނީ އެއްވެސް ޝައްކެއްނެތްގޮތުގައި ރާއްޖޭގެ ތަޢުލީމީ އޮނިގަނޑުގައި މިހާރު ދިމާވެފައިވާ މައްސަލަތަކަށް ޙައްލު ފޯރުކޮށްދިނުމަށް. އެއާއެކީގައި ތަޢުލީމީ ނިޒާމުގެ ފެންވަރު މަތި ކުރުމަށްޓަކައި ކުރެވޭ މަސައްކަތުގެ ތެރެއިން އެއް މަސައްކަތް މިއީވެސް. އަޅުގަނޑު އުންމީދުކުރަނީ މިއާއެކީގައި މިދާއިރާއަށް އިތުރަށް ބޭފުޅުން ޝައުޤުވެރިވެވަޑައިގަންނަވާނެ ކަމަށް. އަދި މިހާރު ތިއްބެވި ބޭފުޅުން، މިދާއިރާގައި ދެމިތިއްބެވުމާއެކީގައި އެބޭފުޅުންވެސް، ރާއްޖޭގެ މާޙައުލަށް މި އަންނަ ބަދަލާއި އަދި ރާއްޖެ އިޤްތިޞާދީ ގޮތުން ހޯދަމުންދާ ކުރިއެރުމާއި އިޤްތިޞާދީ ގޮތުން ރާއްޖެ ބަދަލުވެގެންދާ ދިޔުމާއެއްގޮތަށް ތަޢްލީމީ ދާއިރާގައި ހަރަކާތްތެރިވާ މުދައްރިސުންގެ ފެންވަރާއި އަދި އެބޭފުޅުންގެ ފަންނުވެރިކަންވެސް އެގޮތުގެ މަތިން ބަދަލު ކުރުމުގެ ވިސްނުން ގެންގުޅުއްވައި، އަދި އެގޮތަށް ތަޢުލީމީ ދާއިރާގެ ތެރެއިން އެ އިންތިޒާމު ހަމަޖައްސާނެ ކަމަށް އަޅުގަނޑު އުންމީދު ކުރަން. އަދި އެއާއެކީގައި އަޅުގަނޑު އުންމީދުކުރަން، މިއަދު އަޅުގަނޑުމެންގެ ތެރޭގައި ހުރި އެކިއެކި ޝަކުވާތައް ނިމުމަކަށް ގެނައުމަށްޓަކައި މުދައްރިސުންވެސް ޒިންމާދާރުކަމާއެކީގައި ކުރިއަށް މިއޮތް ދުވަސްތަކުގެ ތެރޭގައި ހަރަކާތްތެރިވެ، އަޅުގަނޑުމެން ރައްޔިތުންނާ ދޭތެރޭގައި އަދި އަޅުގަނޑުމެންގެ ދަރިވަރުންނާ ދޭތެރޭގައި އޯގާތެރިކަމާއެކީގައި އެބޭފުޅުންވެސް މަސައްކަތް ކޮށްދެއްވުމަކީ އެއީ، އަޅުގަނޑު މިއަދު ކުރާ ވަރަށްބޮޑު އިލްތިމާސެއް.
މިއަދު މަދުން ނަމަވެސް އަޅުގަނޑުމެންނާ ހަމައަށް އަންނަ ޝަކުވާތަކުގެ ތެރޭގައި ހަމަ ޚިދުމަތުގައި ތިއްބަވާ ބޭފުޅުންގެ ފަރާތްޕުޅުން އެންމެ އެކަށީގެންވާ ޚިދުމަތް އެކި ޙާލަތްތަކުގައި ލިބިގެންނުދާ ވާހަކަ އަންނާތީއާއެކީގައި އަދި ހަމައެއާއެކީގައި ބެލެނިވެރިން ތަފާތު ގޮތްގޮތަށް ތަޢްލީމަށްޓަކައި ކުރަންޖެހޭ ހޭދަ، ރަސްމީ މަދަރުސާގެ އިތުރުން، އެހެނިހެން ގޮތްގޮތަށް ކުރަންޖެހޭ ހޭދަ އިތުރުވަމުންދާ ދިޔުމަށް އެއީ، މިއަދު އަޅުގަނޑު ދެކޭ ގޮތުގައި މުދައްރިސުންވެސް އިސްނަގައިގެން އެކަމަށް ޙައްލެއް ފޯރުކޮށްދިނުމަށްޓަކައި އަޅުގަނޑުމެން މިއަދު ކުރަން ޖެހިފައިވާ މަސައްކަތެއްކަންވެސް އަޅުގަނޑު ފާހަގަކުރަން. އެއްވެސް ޝައްކެއްނެތް ގޮތުގައި އުނގެނުމަކީ އެންމެ މަތިވެރި މަސައްކަތް. އުނގަންނައި ދިނުމަކީ އެންމެ މަތިވެރި ޚިދުމަތް. ކީރިތި ޤުރްއާނުގައި اللّـه سبحـانـه وتعـالى ވަޙީ ކުރައްވާފައިވަނީ "قُلْ هَلْ يَسْتَوِي الَّذِينَ يَعْلَمُونَ وَالَّذِينَ لَا يَعْلَمُونَ " އެނގޭ މީހުންނާއި ނޭނގޭ މީހުން ހަމަހަމަ ވާނެހޭ، ހަމަ ޔަޤީނުންވެސް ނުވާނެޔޭ."
އަޅުގަނޑުގެ ދުޢާއަކީ، اللّـه سبحـانـه وتعـالى އިރާދަކުރެއްވިއްޔާ އަޅުގަނޑުމެން މިކުރާ މަސައްކަތުގައި ތައުފީޤާއި ބަރަކާތް މިންވަރު ކުރެއްވުން. އަދި މިއަދު އަޅުގަނޑުމެން މި ހުޅުވި ޢިމާރާތުގެ ސަބަބުން، ތަޢުލީމީ ދާއިރާއަށް ދިމާވެފައިވާ ގޮންޖެހުންތަކަށް އެކަށީގެންވާ ޙައްލެއް ލިބިގެން ދިޔުން. ހަމައެއާއެކީގައި ކުރިމަގުގައި އަޅުގަނޑުމެންގެ މުދައްރިސުންނާއި މުޢައްލިމުންނަށް މިދާއިރާއަށް އިތުރު ފުރުސަތުތައް ހުޅުވިގެން ދިޔުން. އަޅުގަނޑުމެން އެންމެން މިކުރާ މަސައްކަތުގައި އެކަލާނގެ ތައުފީޤާއި ބަރަކާތް މިންވަރު ކުރެއްވުން.
އަޅުގަނޑުގެ ވާހަކަ ނިންމާލަމުންވެސް އަދިވެސް އެއްފަހަރު މިމަސައްކަތުގައި ވަރަށް ބުރަކޮށް ޙަރަކާތްތެރިވި ތަޢުލީމީ ފަންޑުގެ އިސްބޭފުޅުންނަށާއި އަދި ތަޢުލީމާބެހޭ ވަޒީރު ޑޮކްޓަރ ޢާއިޝަތު ޝިހާމަށާއި، މިޕްރޮޖެކްޓް ކުރިއަށް ގެންދެވުމުގައި ޖުމުލަ ގޮތެއްގައި ޝާމިލުވި ހުރިހާ ބޭފުޅުންނަށާއި، އަދި އެމަސައްކަތުގައި ހަރަކާތްތެރިވި އެންމެހާ ބޭފުޅުންނަށް އިޚްލާޞްތެރި ޝުކުރެއް އަޅުގަނޑު އަދާކުރަން. އަޅުގަނޑުމެންގެ މި މަސައްކަތުގައި اللّـه سبحـانـه وتعـالى ބަރަކާތް މިންވަރު ކުރައްވާށި. އާމީން!
والســّلام عليــكم ورحـمــة اللّـه وبـركاتـه
_____________________________