ރައީސުލްޖުމްހޫރިއްޔާގެ ނައިބު ޑޮކްޓަރ މުޙަންމަދު ޖަމީލް އަޙްމަދު، މާލެއަތޮޅު ގުރައިދޫގެ ބަނދަރުގެ މަސައްކަތް މިއަދު ފަށްޓަވައިދެއްވައިފިއެވެ. މިކަމަށްޓަކައި މިއަދު ހެނދުނު ގުރައިދޫގައި ބޭއްވެވި ރަސްމިއްޔާތުގައި ރައީސުލްޖުމްހޫރިއްޔާގެ ނައިބު ދެއްކެވި ވާހަކަފުޅުގައި، މިއަދު ގުރައިދޫގައި މި ފެށުނު ބަނދަރު ހެދުމުގެ މަޝްރޫޢަކީ، ގުރައިދުއަށް ފާގަތިކަމާއި ތަރައްޤީ ގެނެސްދޭނެ މަޝްރޫޢެއް ކަމުގައި ވިދާޅުވިއެވެ. އަދި މި ސަރުކާރަކީ، ތަރައްޤީ ގެނައުމުގައި ވަރުބަލިނުވާނެ ސަރުކާރެއް ކަމަށާއި، ރާއްޖެއަށް ގެންނަ ތަރައްޤީގައި ޒުވާނުން މަޙުރޫމް ނުވާނެ ކަމުގައި ރައީސުލްޖުމްހޫރިއްޔާގެ ނައިބު ވިދާޅުވިއެވެ. މި ރޮނގުން ވާހަކަފުޅު ދައްކަވަމުން، ގުރައިދޫގެ ތަރައްޤީއަށް ކުރިއަށް ރޭވިފައިހުރި މަޝްރޫޢުތަކަށް އެމަނިކުފާނު ބައްލަވާލެއްވިއެވެ. އަދި ސަރުކާރުން ރާއްޖޭގެ ތަރައްޤީއަށް މި ކުރައްވާ މަސައްކަތްތަކުގެ ސަބަބުން މި 5 އަހަރު ދުވަހުގެ ތެރޭގައި މުޅި ރާއްޖޭގެ ތަޞްވީރު ބަދަލުވެގެންދާނެ ކަމުގައިވެސް އެމަނިކުފާނު ވިދާޅުވިއެވެ.
ރައީސުލްޖުމްހޫރިއްޔާގެ ނައިބުގެ ވާހަކަފުޅުގައި، ސަރުކާރުން ވެވަޑައިގެންފައިވާ ވަޢުދުތައް އިރާދަކުރެއްވިއްޔާ މި 5 އަހަރު ދުވަހުގެ ތެރޭގައި ފުއްދަވައި ދެއްވާނެ ކަމުގެ ޔަޤީންކަން ދެއްވިއެވެ. އަދި މި ސަރުކާރުގެ ފުރަތަމަ 100 ދުވަހުގެ ތެރޭގައި ގިނަ ވަޢުދުތަކެއް ފުއްދަވައިދެއްވާފައިވާނޭ ކަމަށް ވިދާޅުވެ، އެ ވަޢުދުތަކުގެ މައްޗަށް ރައީސުލްޖުމްހޫރިއްޔާގެ ނައިބު ބައްލަވާލެއްވިއެވެ.
