ދުނިޔޭގެ ބާޒާރުގައި މިވަގުތު އިންޓްރެސްޓް ރޭޓް ހުރީ ވަރަށް ދަށުގައި ކަމަށްވުމާއެކު، މިއީ ރާއްޖޭގެ ތަރައްޤީގެ މަޝްރޫޢުތަކަށް ބޭނުންވާ ފައިސާ ހޯދުމަށް ވަރަށްފަހި ދުވަސްވަރެއް ކަމަށްވާތީ، ސަރުކާރަށް މި ފުރްޞަތު ތަނަވަސްކޮށްދެއްވުމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް، ރައްޔިތުންގެ މަޖިލީހަށް އިލްތިމާސް ކުރައްވައިފިއެވެ. ރައީސުލްޖުމްހޫރިއްޔާ މިކަމަށް އިލްތިމާސް ކުރެއްވީ، ޤާނޫނުއަސާސީގެ 84 ވަނަ މާއްދާގައިވާ ގޮތުގެ މަތިން ރައްޔިތުންގެ މަޖިލީހަށް މިއަދު ރިޔާސީބަޔާން އިއްވަވަމުންނެވެ.
ރައީސުލްޖުމްހޫރިއްޔާގެ ރިޔާސީ ބަޔާނުގައި، އެމަނިކުފާނު ރައީސުލްޖުމްހޫރިއްޔާ ކަމުގެ މަޤާމާ ޙަވާލުވެވަޑައިގެންނެވިއިރު، ދިވެހި ޤައުމު އޮތީ ވަރަށް ނާޒުކު ފައްތަރެއްގައި ކަމަށާއި، ޤައުމު އަލުން ބިނާކުރުމަށް ގިނަގުނަ މަސައްކަތްތަކެއް ކުރަން ޖެހިފައިވާ ޙާލަތެއްގައި ކަމަށް ވިދާޅުވިއެވެ. ރާއްޖޭގައި އޮންނަންވާ ހަމަހަމަކަމާއި، ހަމަޖެހުމާއި، އަމަންއަމާންކަން އޮތީ ގެއްލިފައި ކަމަށާއި، ސިޔާސީ ވިސްނުމާއި ފިކުރުގެ ސަބަބުން ޤައުމު އޮތީ ހަލަބޮލިކަމެއްގެ ތެރޭގައި ކަމަށް ވިދާޅުވެ، އެހެން ނަމަވެސް، މާތްﷲގެ ވާގިފުޅާއެކު، ޤައުމުގެ ކަންކަން މިއަދު މިދަނީ ހަމަ މަގަށް އެޅެމުންކަން ރައީސުލްޖުމްހޫރިއްޔާ ފާހަގަކުރެއްވިއެވެ.
ރާއްޖޭގެ އިޤްތިޞާދީ ޙާލަތު އޮތީވެސް ހަމަ އެހާމެ ނާޒުކު ފައްތަރެއްގައި ކަމަށާއި، ޤައުމީ އުފެއްދުންތެރިކަމުގެ ރޮނގުން އިޤްތިޞާދީ ކުރިއެރުންތަކެއް ރާއްޖެއިން ޙާޞިލުކޮށްފައިވީނަމަވެސް، ރާއްޖޭގެ މާލީ ޙާލަތު އަދިވެސް އޮތީ އަޅުގަނޑުމެން ހިތްހަމަޖެހޭ ފެންވަރެއްގައި ނޫންކަމުގައި ރައީސުލްޖުމްހޫރިއްޔާ ވިދާޅުވިއެވެ. މިރޮނގުން ވާހަކަފުޅު ދައްކަވަމުން، ދައުލަތުގެ ދަރަނީގެ ޙާލަތަށް ރިޢާޔަތްކޮށް ބަލާއިރު، ދެމެހެއްޓެނިވި މިންގަނޑެއްގައި ދަރަނި ހިފެހެއްޓުމަކީ، ސަރުކާރުން އިސްކަންދެއްވާ ވަރަށްބޮޑު އަމާޒެއްކަން ރައީސުލްޖުމްހޫރިއްޔާ ބަޔާންކުރެއްވިއެވެ.
ރާއްޖޭގެ އިންފްލޭޝަން މައްޗަށްދާ މިންވަރު، 2008 ވަނަ އަހަރާ އަޅާބަލާއިރު، މިހާރުވަނީ ވަރަށްބޮޑުތަން މަޑުޖެހިފައިކަމުން، ސަރުކާރުން މަސައްކަތް ކުރައްވަމުން މިގެންދަވަނީ، އިންފްލޭޝަންގެ މިންވަރު މަތިވިޔަނުދީ ހިފެހެއްޓެވުމަށް ކަމުގައި ރައީސުލްޖުމްހޫރިއްޔާ ވިދާޅުވިއެވެ. އަދި މިދިޔަ އަހަރުގެ ފަހުކޮޅުން ފެށިގެން މިއަހަރާއެކު އިންފްލޭޝަން މައްޗަށްދާނެ ކަމަށް ލަފާކުރެވުނު ނަމަވެސް، މިއަދު މިވަނީ އިންފްލޭޝަން މައްޗަށްދިޔަނުދީ ހިފެހެއްޓިފައިކަން ރައީސުލްޖުމްހޫރިއްޔާ ހާމަކުރެއްވިއެވެ.
ރައީސުލްޖުމްހޫރިއްޔާގެ ރިޔާސީ ބަޔާނުގައި، ރާއްޖޭގެ އިޤްތިޞާދު ރަނގަޅު ކުރުމުގެ ގޮތުން، މިވޭތުވެދިޔަ ދުވަސްތަކުގެ ތެރޭގައި މުހިންމު ފިޔަވަޅުތަކެއް ސަރުކާރުން އަޅުއްވާފައިވާ ކަމުގައި ވިދާޅުވިއެވެ. މިގޮތުން، ބޭންކިންގ ނިޒާމު ހަރުދަނާކުރުމަށްޓަކައި ދުނިޔޭގެ އެހެން ޤައުމުތަކާ އަޅާބަލާއިރު، މިނިމަމް ރިޒަރވް ރިކްޔަރމަންޓް ކަމަށްވާ 25 ޕަރސެންޓް މިހާރުވަނީ 20 ޕަރސެންޓަށް ކުޑަކުރެވިފައި ކަމަށާއި، މިކަމުގެ ސަބަބުން އިންވެސްޓް ކުރުމަށް، ކުޑަ އިންޓްރެސްޓް ރޭޓެއްގައި ފައިސާ ލިބޭނެމަގު ތަނަވަސްވެގެންދާނެ ކަމުގައި ރައީސުލްޖުމްހޫރިއްޔާ ވިދާޅުވިއެވެ. މިމޭރުމުން ރިޔާސީ ބަޔާން ކުރިއަށް ގެންދަވަމުން، އިޤްތިޞާދަށް އަންނަ ބަދަލުތަކަށް ބަލައި، މިނިމަމް ރިޒަރވް ރިކްޔަރމަންޓް 10 ޕަރސެންޓަށް ކުޑަކުރެއްވުމަކީ، ސަރުކާރުގެ އަމާޒެއްކަން އެމަނިކުފާނު ހާމަކުރެއްވިއެވެ.
ރާއްޖޭގެ އިޤްތިޞާދީ ކުރިއެރުމުގެ މައި ދޮރޯށި ކަމުގައިވާ އިބްރާހީމް ނާޞިރު އިންޓަރނޭޝަނަލް އެއަރޕޯޓް ތަރައްޤީ ކުރުމަށް ވާންޖެހޭ ތައްޔާރީތައް މިހާރުވަނީ ކޮށް ނިމިފައި ކަމަށާއި، އިރާދަކުރެއްވިއްޔާ، ތަރައްޤީކޮށް ނިމޭއިރު، މި އެއަރޕޯޓް ވެގެންދާނީ، ކުރިއަށް އޮތް 50 އަހަރަށްވެސް ފުދޭ، ފުޅާވަމުންދާ ފަތުރުވެރިކަމާއި، ހުޅުވާލެވޭ އިޤްތިޞާދަކަށް ފަހި، ދިވެހިންގެ އެއަރޕޯޓަކަށް ކަމުގައި ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާ، ރައްޔިތުންގެ މަޖިލީހަށް މިއަދު އިއްވެވި ރިޔާސީ ބަޔާނުގައި، އެމަނިކުފާނުގެ ސަރުކާރުން 100 ދުވަހުގެ ތެރޭގައި ކުރުމަށް ވަޢުދުވެވަޑައިގެންނެވި ހުރިހާ ކަމެއް ކޮށް ނިމިފައިވާ ކަމުގައި ވިދާޅުވިއެވެ. ޚާއްޞަކޮށް، ރާއްޖޭގެ ޒުވާނުންނާއި، އަންހެނުންގެ ކުރިއެރުމަށާއި، އިޤްތިޞާދީ އަދި އިޖްތިމާޢީ ތަރައްޤީ ޙާޞިލުކުރުމަށްޓަކައި ސަރުކާރުގެ ވިސްނުމުގައި ހިމެނިފައިވާ ކަންކަން ޙާޞިލު ކުރެއްވިފައިވާކަން ފާހަގަކުރައްވައި، އޭގެތެރެއިން ބައެއް މުހިންމު ކަންކަމުގެ މައްޗަށް ރައީސުލްޖުމްހޫރިއްޔާ ބައްލަވައިލެއްވިއެވެ.
ރައީސުލްޖުމްހޫރިއްޔާގެ ރިޔާސީ ބަޔާނުގައި، ސަރުކާރުން އެންމެބޮޑު އިސްކަމެއް ދެއްވަން ޖެހިފައިވަނީ، ރާއްޖޭގެ އިޤްތިޞާދު ރަނގަޅު ކުރުމަށް ކަމަށާއި، ރާއްޖެއަށާއި ރާއްޖޭގެ ރައްޔިތުންނަށް ފައިދާހުރި އެކިއެކި ބޮޑެތި މަޝްރޫޢުތައް، ރާއްޖޭގައި ހިންގުމުގެ ފުރްޞަތު، ބޭރުގެ އިންވެސްޓަރުންނަށް ހުޅުވައިލުމަށް ކަމުގައި ވިދާޅުވިއެވެ. އަދި ސަރުކާރުން ހިންގަވާ ތަރައްޤީގެ މަޝްރޫޢުތަކުގެ ތެރެއިން ވީހާވެސް ގިނަ ޢަދަދެއްގެ ޒުވާނުންނަށް ވަޒީފާގެ ފުރްޞަތުތައް، އިރާދަކުރެއްވިއްޔާ ސަރުކާރުން ތަނަވަސްކޮށްދެއްވާނެ ކަމަށާއި، މިކަމުގައި ރާއްޖޭގެ އަމިއްލަ ކުންފުނިތަކާއި، އަމިއްލަ ޖަމްޢިއްޔާ ޖަމާޢަތްތަކުގެ ފުރިހަމަ އެއްބާރުލުމާއި އެހީތެރިކަން ބޭނުންވާ ކަމުގައި ރައީސުލްޖުމްހޫރިއްޔާ ވިދާޅުވިއެވެ. ރައީސުލްޖުމްހޫރިއްޔާ ވިދާޅުވިގޮތުގައި، މިއަދު ރާއްޖޭގެ މުހިންމު ޞިނާޢަތްތަކުން ޒުވާނުންނަށް ވަޒީފާގެ ފުރްޞަތުތައް ހުޅުވައިލެވިގެން މެނުވީ، އަޅުގަނޑުމެން މި އެދޭ ތަރައްޤީ، އަޅުގަނޑުމެންނަކަށް ނުގެނެވޭނެއެވެ.
