ސަޢޫދީ ޢަރަބިއްޔާގެ ވަލީޢަހުދު، ޑެޕިއުޓީ ޕްރީމިއަރ އަދި މިނިސްޓަރ އޮފް ޑިފެންސް ސަލްމާން ބިން ޢަބްދުލްޢަޒީޒް، ރަސްމީ ދަތުރުފުޅެއްގައި މިއަދު މެންދުރުފަހު ރާއްޖެ ވަޑައިގެންފިއެވެ. ސަޢޫދީ ވަލީޢަހުދަށް، އިބްރާޙީމް ނާޞިރު އިންޓަރނޭޝަނަލް އެއަރޕޯޓުން މަރްޙަބާ ވިދާޅުވީ، ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމެވެ. މަރްޙަބާ ދެންނެވުމަށްފަހު ވައިގެ ބަނދަރުގެ ވީ.ވީ.އައި.ޕީ ލައުންޖްގައި، ރައީސުލްޖުމްހޫރިއްޔާ، ސަޢޫދީ ވަލީޢަހުދާ ބައްދަލުކޮށްލެއްވިއެވެ.
ސަޢޫދީ ވަލީޢަހުދަށް މާލެއިން ރަސްމީގޮތުން މަރްޙަބާ ދެންނެވުން އޮތީ، ޖުމްހޫރީ މައިދާނުގައެވެ. ސަޢޫދީ ވަލީއަޙުދު މާލެ ވަޑައިގަތުމާއެކު، ބިއުގަލް ކޯލެއް އެރުވުނެވެ. އަދި އެއަށްފަހު ރައީސުލްޖުމްހޫރިއްޔާއާއި ސަޢޫދީ ޢަރަބިއްޔާގެ ވަލީޢަހުދު ޑަޔަސްއަށް އަރާވަޑައިގަތުމާއެކު، 7 ބަޑީގެ ސަލާމެއް އެރުވުނެވެ. އަދި ދިވެހިރާއްޖެއާއި ސަޢޫދީ ޢަރަބިއްޔާއާ ދެޤައުމުގެ ޤައުމީ ސަލާމް ކުޅުނެވެ. އެއަށްފަހު، ސަޢޫދީ ޢަރަބިއްޔާގެ ވަލީޢަހުދު ސަލްމާން ބިން ޢަބްދުލްޢަޒީޒުގެ ޝަރަފުގައި އޮތް އެމް.އެން.ޑީ.އެފް.ގެ ގާޑް އޮފް އޮނަރެއް، އެމަނިކުފާނު އިންސްޕެކްޓް ކޮށްދެއްވިއެވެ.
މަރްޙަބާ ދެންނެވުމުގެ ރަސްމިއްޔާތުގައި، ރައީސުލްޖުމްހޫރިއްޔާގެ ނައިބު ޑޮކްޓަރ މުޙަންމަދު ޖަމީލު އަޙްމަދާއި، ވަޒީރުންނާއި، އެފެންވަރުގެ ބޭފުޅުންނާއި، ސްޓޭޓް މިނިސްޓަރުންނާއި، ސަރުކާރުގެ އިސް ބައެއް ބޭފުޅުން، ސަޢޫދީ ވަލީޢަހުދަށް ތަޢާރުފުކޮށް އެރުވިއެވެ. އަދި އެމަނިކުފާނުގެ އަރިހުގައި ވަޑައިގެންނެވި ވަފްދުގައި ހިމެނިވަޑައިގަންނަވާ އިސްބޭފުޅުން، ރައީސުލްޖުމްހޫރިއްޔާއަށް ތަޢާރުފުކޮށް އެރުވިއެވެ.
މަރުޙަބާ ދެންނެވުމުގެ ރަސްމިއްޔާތަށްފަހު، ވަލީޢަހުދު ސަލްމާން ބިން ޢަބްދުލްޢަޒީޒު، ރައީސުލްޖުމްހޫރިއްޔާގެ އަރިހުގައި ވަޑައިގަތީ، ރަޢީސުލްޖުމްހޫރިއްޔާގެ އޮފީހަށެވެ. ރައީސުލްޖުމްހޫރިއްޔާގެ އޮފީހަށް އެމަނިކުފާނު ވަޑައިގެންނެވީ ހަތްކޮޅުގައެވެ.
