بســم اللّـه الرّحمـن الرّحيــم
اَلحَمْـدُ لِلّـهِ رَبّ العَـالَمِـين، وَالصّـلاة وَالسّلام علـى سيدنا محـمَّدٍ، خاتم الأنبياء والمرسلين، وَعلـى آلـه وَصَحْبِـهِ أجمـعـين.
މިރޭގެ މި އުފާވެރި ޖަލްސާގެ އިނާމުގެ ޙައްޤުވެރި ދަރިވަރުން، އެ ދަރިވަރުންގެ މައިންބަފައިންނާއި ބެލެނިވެރިން، ތަޢުލީމީ ދާއިރާގައި ޚިދްމަތް ކުރައްވާ އެންމެހައި ބޭފުޅުން ޢިއްޒަތްތެރިން.
السّــلام عليــكم ورحـمــة اللّـه وبـركاتـه،
މިރެއަކީ، އަޅުގަނޑު ދިވެހިރާއްޖޭގެ ރައީސުލްޖުމްހޫރިއްޔާކަމުގެ މަޤާމާ ހަވާލުވިފަހުން ފާއިތުވި ސަތޭކަވަރަކަށް ދުވަހުގެ ތެރެއިން އަޅުގަނޑާ ބައްދަލުކުރާ އެންމެ އުފާވެރި އެއް ރޭ. އާދެ، ދުނިޔެއިން އެންމެ މަތީވަނަ ޙާޞިލު ކޮށްފައިވާ ދަރިވަރުންނާއި، ތަޢުލީމީ ޙަޔާތުގެ މުހިންމު ހަރުފަތެއް ގިރާކޮށް، އާދަޔާ ޚިލާފު ކާމިޔާބީ ޙާޞިލުކޮށްފައިވާ ތިޔަ ލޮބުވެތި ދަރިންނާ ބައްދަލުކޮށް އަދި ތިޔަ ލޮބުވެތި ދަރިންނާ މުޚާޠަބުކޮށް އެއްޗެއް ބުނެލަން ފުރްޞަތު ލިބޭ ރޭ.
މިރެއަކީ ކާމިޔާބީގެ އަގު ވަޒަންކުރުމުގެ ރޭ ކަމަށްވުމާއެކު، މަތީ ޘާނަވީ އިމްތިޙާނުގައި އެކި ވަނަތައް ޙާޞިލުކުރި ދަރިވަރުންނަށް މަރުޙަބާއާއި މުބާރަކްބާދީ ދަންނަވަން. އަދި މި އިމްތިޙާނު ނިންމި ހުރިހާ ކުދިންނަށްވެސް މަރުޙަބާ ކިޔައި، ހިތްވަރުދީ ސާބަސް ރައްދުކުރަން.
ދިވެހިރާއްޖެ މިއަދު މިވަނީ މުޅިން އާ މިޞްރާބަކާ ދިމާއަށް އަމާޒު ހިފާފައި. މުޅިން އާ މުސްތަޤްބަލަކަށް ދަތުރު ފަށާފައި. ޝައްކެއްނެތް ގޮތުގައި މުސްތަޤްބަލުގެ ތަޞައްވުރު ބަލާ ދުރުމީއަކީ، މިއަދުގެ ކިޔަވާކުދިން. މުސްތަޤްބަލްގެ ތަޞްވީރު ސާފުވާނީ، ތިޔަކުދިންނަށް އުނގަންނައި ދެވޭ ތަޢުލީމާއި ދެވޭ ތަރުބިއްޔަތުގެ ތެރެއިން ތިޔަކުދިން ޙާޞިލުކުރާ ނަތީޖާއެއްގެ މައްޗަށް. އަދި އެ ތަޞްވީރުގެ ރީތި ކުލަތަކާއި މަންޒަރުތަކަކީ ޙަޤީޤަތުގައި ތިޔަ ލޮބުވެތި ކުދިން.
އެހެންކަމުން، އަޅުގަނޑު ދެކެން ބޭނުންވަނީ، މާދަމާ، ތިޔަކުދިން ޤައުމު ހިންގުމުގެ މަތިވެރި ޒިންމާއާއި މަސްއޫލިއްޔަތުތަކާ ހަވާލުވާއިރު، ތިޔަކުދިންނަކީ ޢިލްމީގޮތުންނާއި ވިސްނުމުގެ ގޮތުން އެންމެ ޤާބިލު، ހުނަރާއި މަސައްކަތްތެރިކަމުގެ ގޮތުން އެންމެ ފަންނުވެރި އަދި އަޚުލާގީ ގޮތުން ޤައުމު ދެކެ ލޯބިވާ ޒިންމާދާރު ކުދިބައެއްގެ ގޮތުގައި.
މިއަދު ތިޔަކުދިން ޙާޞިލުކޮށްފައިވާ ޝަރަފުވެރި ނަތީޖާއަށް ބަލާއިރު، ތިޔަކުދިންނަކީ ރާއްޖޭގެ މުސްތަޤްބަލުކަމާމެދު ޝައްކެތްނެތް. ތިޔަކުދިންނަކީ، އަޅުގަނޑުގެ ތަޞައްވުރު ޙަޤީޤަތަކަށް ހަދައިދޭނެ ދަރިވަރުންކަމާމެދުވެސް ޝައްކެއްނެތް.
ތިޔަކުދިންނަކީ، މައިންބަފައިންނާއި ޢާއިލާތައް އަދި މުޅި ޤައުމު ފަޚުރުވެރިވާނޭ، މުޅިން އާ ޖީލެއްގެ ބިންގާކަމުގައިވާނެކަމާމެދު އަޅުގަނޑު ޝައްކެއްނުކުރަން.
ތަހުޒީބު މުޖުތަމަޢެއް ބިނާކުރުމަށްޓަކައި، އެންމެ ކުއްޖަކުވެސް ބާކީނުކޮށް، ހަމަހަމަ އުޞޫލަކުން ތަޢުލީމާއި ހުނަރު އަދި ތަމްރީނު ހޯދައިދިނުމާއި، ދިވެހި ޒުވާނުންނަށް މަތީ ތަޢުލީމު ލިބުމުގެ ފުރުޞަތު ހޯދައިދީ، ދިވެހިރާއްޖޭގެ އިޤްތިޞާދީ ޞިނާޢަތަށް ބޭނުންވާ ފަންނީ ހުނަރު، ދިވެހި ދަރީންނަށް ހޯދައިދިނުމަކީ މިސަރުކާރުގެ އަމާޒު.
މި އުންމީދު ޙަޤީޤަތަކަށް ހެދުމަށްޓަކައި އަޅުގަނޑު މިރޭ މި އިޢުލާނުކުރަނީ މަތީ ތަޢުލީމުގެ 1000 ފުރުޞަތު. މީގެތެރެއިން 500 ފުރުޞަތަކީ، ރާއްޖޭގައި މަތީ ތަޢުލީމު ޙާޞިލުކުރުމަށް ހުޅުވާލެވޭ ސްކޮލަރޝިޕް ފުރުޞަތު. އަދި 500 ފުރުޞަތަކީ ރާއްޖެއިން ބޭރުގައި މަތީ ތަޢުލީމު ޙާޞިލު ކުރުމަށް ހުޅާލެވޭ ސްކޮލަރޝިޕްގެ ފުރުޞަތު.
1000 ފުރުޞަތުގެ ތެރޭގައި ހިމެނެނީ، މިހާރު ކިޔަވަމުންދާ ދަރިވަރުންނަށް ހުޅުވާލެވޭ ސްކޮލަޝިޕް ފުރުޞަތާއި، އަލަށް ކިޔަވަން ފަށަން ބޭނުންވާ ދަރިވަރުންނަށް ހުޅުވާލެވޭ ސްކޮލަރޝިޕް ފުރުޞަތާއި، ވަޒީފާގައި އުޅެމުން ކިޔަވަން އެދޭ ފަރާތްތަކަށް ހުޅުވާލެވޭ ފުރުޞަތާއި، ރާއްޖެއިން ބޭރުގެ އެކުވެރި ޤައުމުތަކުންނާއި ޖަމާޢަތްތަކުން ހަދިޔާކުރާ ސްކޮލަރޝިޕްގެ ފުރުޞަތު.
މަތީ ތަޢުލީމުގެ ފުރުޞަތުތައް ހުޅުވާލާއިރު، ރާއްޖެއަށް އެންމެ ބޭނުންތެރި ދާއިރާތަކުން މަތީ ތަޢުލީމު ޙާޞިލު ކުރުމުގެ ފުރުޞަތު ލިބިދިނުމަށް އިސްކަންދެވޭނެ. މިގޮތުން ޞިއްޙީ ދާއިރާއަށް އަމާޒުކޮށްގެން، ޖެނެރަލް މެޑިސިންގގެ ފުރުޞަތާއި، އެކި ބަލިތަކަށް ޚާއްޞަ ޑޮކްޓަރުން އުފެއްދުމަށް ސްޕެޝަލައިޒްވުމަށް، ޕޯސްޓް ގްރެޖުއޭޓް މެޑިސިން ހެދުމުގެ ފުރުޞަތު ހިމެނޭނެ.
މީގެ އިތުރުން، އިކޮނޮމިކްސް، ބޭންކިންގ، ފައިނޭންސްފަދަ ދާއިރާތައް ފާހަގަކޮށްލެވޭ. އަދި މިނޫނަސް ރާއްޖެއަށް ބޭނުންވާ މުހިންމު ދާއިރާތައް ހިމެނިގެންދާނެ. އިރާދަކުރެއްވިއްޔާ ރާއްޖޭގެ ކޮންމެ ކުއްޖަކީ، މަތީ ތަޢުލީމު ފުރިހަމަކުރުމުގެ ފުރުޞަތު ފަހިވެފައިވާ ކުއްޖަކަށް ވެގެންދާނެ.
މަތީ ތަޢުލީމުގެ ފުރުޞަތު ހުޅުވިގެންދާއިރު، ތަޢުލީމީ ދާއިރާ އިތުރަށް ހަރުދަނާކޮށް، ތަރުބަވީ ތަޢުލީމުގެ ތެރެއިން ރަނގަޅު މުޖުތަމަޢެއް އަދި ވަރުގަދަ ޖީލެއް ބިނާކުރުމުގެ ބުރަ މަސައްކަތް އަޅުގަނޑުމެން މިވަނީ ފަށާފައި.
މިގޮތުން މިހާރު މުރާޖަޢާކޮށް ނިމިފައިވާ ޤައުމީ މަންހަޖު، އަންނަ އަހަރު ރާއްޖޭގެ ހުރިހާ ސްކޫލްތަކެއްގައި ތަންފީޒުކުރުމަށް ބޭނުންވާ، އުނގެނުމާއި އުނގަންނައިދިނުމުގެ ވަސީލަތްތައް މިއަހަރުގެ ތެރޭގައި ތައްޔާރުކޮށް ނިންމާނެ.
އަދި، ރާއްޖޭގެ ތަޢުލީމީ ނިޒާމުގެ ތެރެއިން ނުކުންނަ ކުދިންގެ ކިބައިގައި، މަސައްކަތުގެ ހުނަރު އަށަގަންނުވައި، ވަޒީފާއަށް އަހުލުވެރި ކުރުވުމުގެ ގޮތުން ސްކޫލްތަކުގައި ބައިނަލްއަޤްވާމީ ސްކޫލް ޓިވެޓް ޕްރޮގްރާމް ހިންގުމަށް ކަނޑައަޅައި، އެކަން ފެށުމުގެ އެންމެހައި އިންތިޒާމުތައް މިހާރުވަނީ ހަމަޖައްސާފައި.
ސްކޫލްތަކުގައި މަދަނީ ތަޢުލީމު އުނގަންނައިދީ، ޤައުމިއްޔަތާއި ދިވެހިބަހަށް ދަރިވަރުންގެ ޝައުޤުވެރިކަން އިތުރުކުރުމަށް ޕްރޮގްރާމުތަކެއް މިހާރުވަނީ ފަށާފައި.
ދަރިވަރުންގެ ޢަޤީދާ ވަރުގަދަކޮށް، މާތްވެގެންވާ އިސްލާމްދީން ދެކެ ލޯބިވާ ދަރިވަރުން އުފެއްދުމަށް، ސްކޫލުތަކުގެ ގްރޭޑް 1 ން 7 އަށް ޤުރުއާން، މަޖުބޫރު މާއްދާއެއްގެ ގޮތުގައި ހަމަޖައްސައި، ހުރިހާ ސްކޫލެއްގައި ޤުރުއާން ކިޔަވައިދޭން މިހާރުވަނީ ފަށާފައި.
ރާއްޖޭގެ ސްކޫލުތަކުގައި ޢަރަބި ބަސް ކިޔަވައިދިނުމަށް ކުރެވޭ މަސައްކަތުގެ ތެރެއިން ގްރޭޑް 1 ގެ ދަރިވަރުންނަށް، ޢަރަބި ބަސް ކިޔަވައިދިނުމަށް މިހާރުވަނީ ފަށާފައި.
މިއަހަރުގެ އޭލެވެލް އިމްތިޙާނުގެ ނަތީޖާއަށް ބަލާއިރުވެސް އެބަ ޔަޤީންވޭ، ކަށަވަރުވޭ، ރާއްޖޭގެ ކިޔަވާ ކުދިންނަކީ، ވިސްނުންތޫނު، ޤާބިލު ކުޅަދާނަ ކުދިންތަކެއްކަން. ޚާއްޞަކޮށް އެކައުންޓިންގ މާއްދާއިން ދުނިޔޭގެ އެންމެމޮޅު ކުދިންގެ ތެރޭގައި، ރާއްޖޭގެ ދަރިވަރުން ހިމެނުމުން އަޅުގަނޑަށް ކަށަވަރުވަނީ ޓީޗަރުންގެވެސް ހުނަރާއި ޤާބިލުކަން އަދި ބެލެނިވެރިންގެ ބުރަ މަސައްކަތް.
އެހެންކަމުން، ޓީޗަރުންނާއި ބެލެނިވެރިން އަދި ދަރިވަރުންނަށް އަޅުގަނޑު އިލްތިމާސް ކޮށްލަން ބޭނުންވަނީ، އެކައުންޓިންގގެ އިތުރުން އިކޮނޮމިކްސް، މެތަމެޓިކްސް، އަދި މިނޫންވެސް އިތުރު މާއްދާތަކުން ދުނިޔޭގެ އެންމެ މޮޅު ނަތީޖާ ހޯދުމަށް ހިތްވަރާއެކު މަސައްކަތް ކުރައްވާށޭ.
އަޅުގަނޑުގެ ވާހަކަ ނިންމާލުމުގެ ކުރިން، މިރޭ ރަންވަނަތައް ޙާޞިލުކުރި ހުރިހާ ދަރިވަރުންނަށް، ޚާއްޞަކޮށް، މުޅި ދުނިޔެއިން އެކައުންޓްސްއިން 1 ވަނަ ހޯދި 7 ދަރިވަރުންނަށާއި، ރާއްޖެއިން 1 ވަނަ ހޯދި 11 ދަރިވަރުންނަށާއި، އެދަރިވަރުން ތަޢުލީމު ޙާޞިލުކުރި ސްކޫލުތަކުގެ ވެރިންނަށާއި، އެންމެހައި ހިންގުންތެރިންނަށާއި، ޓީޗަރުންނަށާއި، އެކުދިންގެ މައިންބަފައިންނަށާއި ބެލެނިވެރިންނަށް ވަރަށް އިޚްލާޞްތެރިކަމާއެކީ ތަހުނިޔާ ދަންނަވަން. އަދި މަތީ ސާނަވީ އިމްތިޙާނުގައި ރާއްޖެއަށް ރީތިނަން ހޯއްދަވައިދެއްވުމަށް ސްކޫލްތަކުން ކުރައްވާފައިވާ ބުރަ މަސައްކަތުގެ އަގު ވަޒަންކުރާއިރު، އެންމެ ފާހަގަކުރަނީ، CHSE އިން މަތީ ސާނަވީގައި ޙާޞިލު ކުރައްވާފައިވާ ފަޚުރުވެރި ވަނަ. CHSE ވަނީ އެންމެ މަތީ 10 ވަނަ ހޯދި 126 ދަރިވަރުންގެ ތެރޭގައި އެ ސެންޓަރުގެ 78 ދަރިވަރުން ހިމެނޭގޮތަށް މި ވަނަ ހޯއްދަވާފައި. 1 ވަނަ ހޯދި 11 ދަރިވަރުންގެ ތެރެއިން 8 ދަރިވަރުންނަކީ، އެ ސެންޓަރުގެ ދަރިވަރުން. އަދި މުޅި ދުނިޔެއިން އެކައުންޓްސްއިން 1 ވަނަ ހޯދި 7 ދަރިވަރުންގެ ތެރޭގައި، އެ ސެންޓަރުގެ 5 ދަރިވަރުން ހިމެނޭ.
މި ފުރުޞަތުގައި، ރާއްޖޭގެ ތަޢުލީމީ ފެންވަރު މަތިކުރައްވައި، ރާއްޖޭގެ ތަޢުލީމީ ނިޒާމަކީ، ހަރުދަނާ ނިޒާމަކަށް ހައްދަވައި، ހަމަހަމަ އުސޫލަކުން ތަޢުލީމާއި ހުނަރު އަދި ތަމްރީނު ހޯއްދަވައި ދެއްވުމަށް މިނިސްޓްރީ އޮފް އެޑިޔުކޭޝަނުން ކުރައްވަމުން ގެންދަވާ މަސައްކަތްތައް ފާހަގަކޮށް، މިނިސްޓަރ ޑޮކްޓަރ ޢާއިޝަތު ޝިހާމަށާއި، އެމިނިސްޓްރީގެ އެންމެހައި ވެރިންނަށާއި މުވައްޒަފުންނަށް އަޅުގަނޑު އިޚްލާސްތެރިކަމާއެކީ ޝުކުރު ދަންނަވަން.
ރާއްޖޭގެ ތަޢުލީމީ ދާއިރާ ތަރައްޤީކޮށް، ވީހާވެސް ގިނަ ދަރިވަރުންނަށް ތަޢުލީމީ ފުރުޞަތުތައް ތަނަވަސްކޮށްދިނުމަށް ސަރުކާރުން ފަށާފައިމިވާ މަސައްކަތްތަކުގައި މާތްﷲ ބަރަކާތް ލައްވާށި!
ސަރުކާރުގެ ތަޢުލީމީ ސިޔާސަތުތައް ހިތްވަރާއެކު އަދި ކިޔަވާކުދިންނަށް އެންމެ ފައިދާހުރި ގޮތުގައި ކުރިއަށް ގެންދިޔުމުގެ ހެޔޮ ތައުފީޤު ދެއްވާށި! ތަޢުލީމީ ޖީލެއް ބިނާކުރުމަށް ކުރަމުން ގެންދާ މަސައްކަތްތަކަށް އެކަލާނގެ ކާމިޔާބީ މިންވަރު ކުރައްވާށި! ޢިލްމީ ނޫރުން ދިވެހި މި ދީބު އަލިކުރައްވާށި! އާމީން!
والســّلام عليــكم ورحـمــة اللّـه وبـركاتـه