މިއަދުގެ ސަރުކާރަކީ އިސްލާމީ ތަޢުލީމަށް ޚާއްޞަ ސަމާލުކަމެއްދޭނެ އަދި ކީރިތި ޤުރްއާނުގެ ތަޢުލީމު، މުޅި ރާއްޖޭގައި ޢާންމު ކުރުމަށްޓަކައި ކުރެވެންހުރި ހުރިހާ މަސައްކަތްތަކެއް ކުރާނެ ސަރުކާރެއް ކަމުގައި ރައީސުލްޖުމްހޫރިއްޔާގެ ނައިބު ޑޮކްޓަރ މުޙަންމަދު ޖަމީލް އަޙްމަދު ވިދާޅުވެއްޖެއެވެ. ރައީސުލްޖުމްހޫރިއްޔާގެ ނައިބު މިހެން ވިދާޅުވީ، ރާއްޖޭގެ ސްކޫލްތަކުގައި ޢަރަބިބަސް ކިޔަވައިދިނުން ފެށުމަށްޓަކައި މިއަދު ހަވީރު ހިރިޔާ ސްކޫލްގައި ބޭއްވެވި ރަސްމިއްޔާތުގައި ވާހަކަފުޅު ދައްކަވަމުންނެވެ. ރައީސުލްޖުމްހޫރިއްޔާގެ ނައިބުގެ ވާހަކަފުޅުގައި، މިއަދުގެ ސަރުކާރަކީ އިރާދަކުރެއްވިއްޔާ، ﷲގެ ރަޙްމަތްފުޅާއެކު، ރާއްޖޭގައި ޢަރަބި ތަޢުލީމް ޢާންމުކުރާނެ ސަރުކާރެއް ކަމަށާއި، ކޮންމެ ދަރިވަރަކީވެސް ރީތި އަޚްލާޤެއްގެ ތެރެއިން ތަރުބިއްޔަތުވެގެން ނުކުންނަ ދަރިވަރަކަށް ހެދުމަކީ، ސަރުކާރުގެ ނިޔަތް ކަމުގައި ވިދާޅުވިއެވެ.
ރައީސުލްޖުމްހޫރިއްޔާގެ ނައިބުގެ ވާހަކަފުޅުގައި، ކީރިތި ޤުރްއާނުގެ ތަޢުލީމް އިތުރަށް ފުޅާކުރެއްވުމަށްޓަކައި ރާއްޖޭގެ ސްކޫލްތަކުގައި އިސްލާމީ އަޚްލާޤިއްޔާތާއި، އިސްލާމްދީނުގެ މަތިވެރި އުޞޫލުތަކުގެ ތަޢުލީމް ފުޅާކުރެއްވުމުގެ ޕްރޮގްރާމެއްވެސް މިއަހަރު ފަށާފައިވާކަން ހާމަކުރެއްވިއެވެ. އަދި ރާއްޖޭގެ ހުރިހާ ސްކޫލްތަކެއްގައި މިއަހަރުގެ ތެރޭގައި ހިންގޭ ޕްރޮގްރާމްތަކުގައި އަޚްލާޤިއްޔާތު ތަޢާރުފް ކުރުމުގެ ޚާއްޞަ މަސައްކަތްތަކެއް ކުރުމަށް މިހާރުވަނީ ނިންމަވާފައި ކަމަށާއި، އަދި ވަރަށްގިނަ ސްކޫލްތަކުގައި އެމަސައްކަތް މިހާރު ފެށިގެން ހިނގަމުންދާ ކަމުގައިވެސް އެމަނިކުފާނު ވިދާޅުވިއެވެ.
ރާއްޖޭގައި ޢަރަބި މީޑިއަމަށް ކިޔަވައިނުދޭ ސްކޫލްތަކުގައި، އަރަބިބަސް ކިޔަވައިދޭގޮތަށް ހަމަޖެހިގެން ދިޔުމަކީ، ރާއްޖޭގެ މުޖްތަމަޢަށާއި، ރާއްޖޭގެ ރައްޔިތުންނަށް ޚާއްޞަ އުފަލެއް ލިބިގެންދާނެ ކަމެއްކަންވެސް ރައީސުލްޖުމްހޫރިއްޔާގެ ނައިބުގެ ވާހަކަފުޅުގައި ފާހަގަކުރެއްވިއެވެ. އަދި މިއީ ދިވެހިންގެ ޢަޤީދާ ވަރުގަދަވެ، ރާއްޖޭގެ ރައްޔިތުންގެ ތެރޭގައި ރީތި އަޚްލާޤު ތަޢާރުފްވެގެންދާނެ ކަމެއް ކަމުގައިވެސް ރައީސުލްޖުމްހޫރިއްޔާގެ ނައިބު ވިދާޅުވިއެވެ.
ރައީސުލްޖުމްހޫރިއްޔާގެ ނައިބުގެ ވާހަކަފުޅުގައި، ރާއްޖޭގެ ސްކޫލްތަކުގައި ޢަރަބިބަސް ކިޔަވައިދިނުން މިއަދު ފެށިގެން މިދަނީ، މުހިންމު ސަބަބުތަކަކަށްޓަކައި ކަމަށްވެސް ވިދާޅުވިއެވެ. އެމަނިކުފާނު ވިދާޅުވިގޮތުގައި، ރާއްޖޭގެ ކާމިޔާބާއި، މުޖްތަމަޢުގެ ހަމަޖެހުމާއި، ރާއްޖޭގެ ޞުލްޙަމަސަލަސްކަން ޤާއިމުވުން ބިނާވެފައިވަނީ ރަނގަޅު ތަރުބިއްޔަތަކާއި، ރިވެތި އަޚްލާޤެއްގެ ތެރޭގައި ދިރިއުޅޭ ވެށްޓަކަށް ރާއްޖެ ވެގެންނެވެ. އެކަން އެގޮތަށް ގެންދިޔުމަށްޓަކައި އަޅުގަނޑުމެންގެ ތަޢުލީމީ ނިޒާމުގެ ތެރެއަށް، އިތުރު ވިސްނުންތަކެއް މިއަދު ތަޢާރުފް ކުރަން ޖެހިފައިވާ ކަމުގައިވެސް ރައީސުލްޖުމްހޫރިއްޔާގެ ނައިބު ވިދާޅުވިއެވެ.
ރާއްޖޭގެ ސްކޫލްތަކުގައި ޢަރަބިބަސް ކިޔަވައިދިނުން ފެށުމަށްޓަކައި މިއަދު ހަވީރު ބޭއްވެވި ރަސްމިއްޔާތުގައި، މިނިސްޓަރ އޮފް އެޑިޔުކޭޝަން ޑޮކްޓަރ ޢާއިޝަތު ޝިހާމް ވާހަކަފުޅު ދެއްކެވިއެވެ. މި ރަސްމިއްޔާތު ތަޢާރުފް ކުރައްވައި މަރްޙަބާ ދެންނެވީ، ނޭޝަނަލް އިންސްޓިޓިއުޓް އޮފް އެޑިޔުކޭޝަންގެ ޑިރެކްޓަރ ޖެނެރަލް އާދަމް ޝަރީފް ޢުމަރެވެ.
މި ރަސްމިއްޔާތަށްފަހު، ރައީސުލްޖުމްހޫރިއްޔާގެ ނައިބު ޑޮކްޓަރ މުޙަންމަދު ޖަމީލް އަޙްމަދު، މިއަދު ފެށުނު ކްލާސްތަކުގެ ތެރެއިން އެއް ކްލާހުގައި ޢަރަބިބަހުގެ ނަމޫނާ ފިލާވަޅެއް ނަންގަވައިދެއްވިއެވެ.
