ރައީސުލްޖުމްހޫރިއްޔާގެ އޮފީހުގެ ނޭޝަނަލް ސެކިއުރިޓީ އޮފީހުން، "މެރިޓައިމް ސެކިއުރިޓީ ޕޮލިސީ ކޯޑިނޭޓިން ކޮމިޓީ" އެކުލަވާލައްވައި، ކޮމިޓީގެ ފުރަތަމަ ބައްދަލުވުން މިއަދު ބާއްވަވައިފިއެވެ. އެކޮމިޓީ މި އުފެއްދެވީ، ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރުގެ ފުރަތަމަ ޖަލްސާއަށް ރައީސުލްޖުމްހޫރިއްޔާ މުޙަންމަދު ނަޝީދު ހުށަހެޅުއްވި ރިޔާސީ ބަޔާނުގައި، ޤައުމީ ސަލާމަތީ އޮނިގަނޑުގެ ތެރެއިން މެރިޓައިމް ސެކިއުރިޓީއާބެހޭ ޤައުމީ ސިޔާސަތެއް އެކުލަވާލައްވައި، އެ ސިޔާސަތުގެ އަލީގައި ސްޓްރެޓެޖީތަކެއް ކަނޑައަޅައި، އެކަމާ ގުޅޭގޮތުން ހޭލުންތެރިކުރުމުގެ ޕްރޮގްރާމެއް މިއަހަރުގެ ތެރޭގައި ފެށިގެންދާނެ ކަމަށް ވިދާޅުވުމާ ގުޅިގެން، އެކަން ހިންގެވުމަށްޓަކައެވެ.
ރައީސުލްޖުމްހޫރިއްޔާގެ ރިޔާސީ ބަޔާނުގައި، މެރިޓައިމް ސެކިއުރިޓީއާ ގުޅޭގޮތުން ހިންގަވާ ހޭލުންތެރިކުރުމުގެ ޕްރޮގްރާމްގެ ތެރެއިން، 8 އެކްޝަން ޕްލޭނެއް އެކުލެވޭނެކަމަށްވަނީ ވިދާޅުވެފައެވެ. މި ދެންނެވި 8 އެކްޝަން ޕްލޭންގައި މައިގަނޑުގޮތެއްގައި ހިމެނޭނީ، މެރިޓައިމް ޑޮމެއިން އެވެއަރނެސްއާއި، ކަނޑުމަތީގެ ސަލާމަތާބެހޭ މަޢްލޫމާތުގެ އޮނިގަނޑާއި، ދިވެހިރާއްޖޭގެ އެތެރޭގެ ނުރައްކާތައް ދެނެގަތުމާއި، ބައިނަލްއަޤްވާމީ ގުޅުން ބަދަހިކުރުމާއި، ކަނޑުމަތީގެ ނުރައްކާތަކާއި، ކަނޑުމައްޗާބެހޭ ދާއިރާގެ ވިއުގަ ސަލާމަތް ކުރުމާއި، ދަތުރުފަތުރުގެ ނިޒާމާއި، އަދި ކަނޑުމަތީގައި ކުރެވޭ ވިޔަފާރިތައް ބެލުން ކަމަށްވެސް ރިޔާސީ ބަޔާނުގައި ރައީސުލްޖުމްހޫރިއްޔާވަނީ ވިދާޅުވެފައިވެއެވެ.
މި އެކްޝަން ޕްލޭން ކުރިއަށް އޮތް 90 ދުވަހުގެ ތެރޭގައި ޤާއިމް ކުރެވިގެން ދާނެކަމަށް ރައީސުލްޖުމްހޫރިއްޔާ ވިދާޅުވެފައިވާތީ، އެކަމާބެހޭ ތައްޔާރީތައް ނޭޝަނަލް ސެކިއުރިޓީ އެޑްވައިޒަރގެ އޮފީހުން ގެންދަވަނީ ކުރައްވަމުންނެވެ.
"މެރިޓައިމް ސެކިއުރިޓީ ޕޮލިސީ ކޯޑިނޭޓިން ކޮމިޓީ"އަކީ، ސަރުކާރުގެ ކަމާބެހޭ 15 ދާއިރާއަކުން ތަޖުރިބާކާރު ބޭފުޅުން ހިމެނިވަޑައިގަންނަވާ ގޮތަށް އުފެއްދެވި ކޮމިޓީއެކެވެ. މިކޮމިޓީގެ މިއަދުގެ ބައްދަލުވުމުގައި، މެރިޓައިމް ޑޮމެއިން އެވެއަރނެސް އެކުލަވާލުމަށްޓަކައި ތައްޔާރުކުރެވިފައިވާ ސްޓްރެޓަޖީއާ ބެހޭގޮތުން ޕްރެޒެންޓޭޝަނެއް ދެއްވައި، ކޮމިޓީގެ މަސައްކަތްތައް ކުރިއަށް ގެންދިއުމަށް ރޭވިފައިވާގޮތްތަކާ ބެހޭގޮތުން މަޝްވަރާ ކުރެއްވިއެވެ.
"މެރިޓައިމް ސެކިއުރިޓީ ޕޮލިސީ ކޯޑިނޭޓިން ކޮމިޓީ"ގައި ހިމެނޭ ފަނަރަ ދާއިރާއަކީ، މިނިސްޓްރީ އޮފް ފިޝަރީޒް އެންޑް އެގްރިކަލްޗަރ، މިނިސްޓްރީ އޮފް ހޯމް އެފެއަރޒް، މިނިސްޓްރީ އޮފް ހައުސިން އެންޑް އެންވަޔަރަންމަންޓް، މިނިސްޓްރީ އޮފް ޓުއަރިޒަމް އާރޓްސް އެންޑް ކަލްޗަރ، މިނިސްޓްރީ އޮފް ހެލްތް އެންޑް ފެމިލީ، މިނިސްޓްރީ އޮފް އިކޮނޮމިކް ޑިވެލޮޕްމަންޓް، މިނިސްޓްރީ އޮފް ފޮރިންގ އެފެއާޒް، މިނިސްޓްރީ އޮފް ޓްރާންސްޕޯޓް އެންޑް ކޮމިއުނިކޭޝަން، އެޓަރނީ ޖެނެރަލްގެ އޮފީސް، ޑިޕާޓްމަންޓް އިމިގްރޭޝަން އެންޑް އެމިގްރޭޝަން، މޯލްޑިވްސް ކަސްޓަމްސް ސަރވިސް، މޯލްޑިވްސް ޕޯޓްސް ލިމިޓެޑް، މޯލްޑިވްސް ނޭޝަނަލް ޑިފެންސް ފޯސް، މޯލްޑިވްސް ޕޮލިސް ސަރވިސް، އަދި ސިވިލް އޭވިއޭޝަން ޑިޕާޓްމަންޓެވެ.