* މި އިންޓަރވިޔުގައި، ސަންގު ޓީވީގެ ފަރާތުން ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފުގެ އަރިހުގައި ސުވާލުތައް ދެންނެވީ، ވީޑިޔޯ ޖާނަލިސްޓް ފާޠިމަތު މަދަދާ.
ފާޠިމަތު މަދަދާ:
بِسْمِ ٱللّٰهِ ٱلرَّحْمٰنِ ٱلرَّحِيمِ
السَّلَامُ عَلَيْكُمْ
ސަންގު ޓީވީ ބައްލަވަމުން ގެންދަވާ އެންމެހާ ބެލުންތެރިންނަށް މަރުޙަބާ ދަންނަވަން. އަޅުގަނޑުމެން ކުރިއަށް މި ގެންދަނީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ސަރުކާރަށް ދެ އަހަރު ފުރުމާ ގުޅިގެން، ކުރިއަށްގެންދާ ޚާއްޞަ ކަވަރޭޖް. މި ދަންފަޅީގައި ބެލުންތެރިންނާ މި ބައްދަލުކުރީ އަޅުގަނޑު ފާޠިމަތު މަދަދާ.
ސަރުކާރުގެ ވުޒާރާތަކުގެ މަސައްކަތްތަކާއި، ސަރުކާރުގެ އެކިއެކި ކުންފުނިތަކާއި، އެސް.އޯ.އީ.ތަކުގެ މަސައްކަތްތަކާ ގުޅޭގޮތުން، އަޅުގަނޑުމެން މި ޚާއްޞަ ދުވަހު މައުލޫމާތުތައް ގެނެސްދެމުން މިދަނީ. އެކިއެކި ވަޒީރުން ބައިވެރިވެވަޑައިގެން މައުލޫމާތުތަކެއް ގެނެސްދީފައިވާނެ. އެގޮތުން މި ދަންފަޅީގައި އަޅުގަނޑާ އެކު ބައިވެރިވެވަޑައިގަންނަވަނީ، ދިވެހިރާއްޖޭގެ ޢިއްޒަތްތެރި ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް.
ވަރަށް ބޮޑަށް ޝުކުރިއްޔާ، ސަންގު ޓީވީއިން ދެއްވި ދައުވަތު ގަބޫލުކުރައްވައި ވަޑައިގެންނެވީތީ.
ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް:
އާދެ، ޝުކުރިއްޔާ.
ފާޠިމަތު މަދަދާ:
އަޅުގަނޑު ހަމަ މި ދަނޑިވަޅުގައި ނައިބު ރައީސާ ބައްދަލުވުމުން އެންމެ ބޮޑަށް ކޮށްލަން ބޭނުންވާ ސުވާލަކީ، މިހާ ހިސާބަށް އައިއިރުގައި ސަރުކާރަށް ވަރަށް ބޮޑެތި ޕްރެޝަރުތަކަކާ ކުރިމަތިވެއްޖެއޭ. ވަރަށް ބައިވަރު ފިއްތުންތަކަކާ، ވަރަށް ގިނަ ފާޑުކިޔުންތަކާ އެކުގައި، މިހާހިސާބަށް މި އައީ. އެގޮތުން، އެއްވެސް ރޭވުންތެރިކަމެއް ނެތި، ޔޫ-ޓާންތަކެއް ނަންގަވަމުންދާ ކަމަށާއި، ޕްލޭންތަކެއް ނެތި ސަރުކާރުން ހިތުހުރިހާ ގޮތަކަށް ކަންތައްތައް ކުރައްވަމުން ގެންދަވާކަމަށް. މި ކަހަލަ ވަރަށް ބައިވަރު ފާޑުކިޔުންތަކެއް އަމާޒުވޭ. ނައިބު ރައީސް ކިހިނެއްތޯ މި ދެ އަހަރު ސިފަކުރައްވާނީ؟ މަނިކުފާނު ދެކެވަޑައިގަންނަވާ ގޮތުގައި، މިހާހިސާބަށް އައިއިރުގައި، ރަނގަޅު މަސައްކަތްތަކެއް ކުރެވިފައި އެބަވޭތޯ ސަރުކާރަށް؟
ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް:
بِسْمِ ٱللّٰهِ ٱلرَّحْمٰنِ ٱلرَّحِيمِ
ޝުކުރިއްޔާ ފުރަތަމަވެސް އަޅުގަނޑަށް މި ފުރުޞަތު ތަނަވަސްކޮށްދެއްވީތީވެ. ޚާއްޞަކޮށް، ސަންގު ޓީވީގެ އިސްވެރިންނަށް، މަދަދާއަށްވެސް ވަރަށް ބޮޑަށް ޝުކުރު ދަންނަވަން.
އާދެ، ތިޔަ ފާހަގަކުރެއްވި ފަދައިން، ސަރުކާރަށް ދެ އަހަރުވެގެން މިދަނީ ދޮގެއްތޯ؟ ދިޔައިރު އަޅުގަނޑުމެންގެ މީޒާނުގައި ކިރަންޖެހޭނީ ރައްޔިތުންގެ ނިންމުން ދޮގެއްތޯ؟ ރައްޔިތުންނަށްޓަކައި ވެރިކަމެއް ޤާއިމުކޮށްދޭން، ރައްޔިތުން އެ އިންތިޚާބު ކޮށްދެނީ އެ 5 އަހަރަކަށް ރައްޔިތުންނަށް ޚިދުމަތްކުރައްވާނެ ވެރިއެއް. އެ ވެރިޔާ ރިޔާސީ އިންތިޚާބުގެ ތެރޭގައި، ނޫނީ ރިޔާސީ ކެންޑިޑޭޓް ރިޔާސީ އިންތިޚާބުގެ ތެރޭގައި ރައްޔިތުންނަށް ވެވަޑައިގަންނަވާ ވަޢުދުތަކާއި، ރައްޔިތުންނާ ހިއްސާ ކުރައްވާ ކަންތައްތައް، ރައްޔިތުން މިނެކިރުމަށްފަހުގައި، ރައްޔިތުން އެ ވެރިޔަކު ހޮއްވަވަނީ ވޯޓުން. އެހެންވީމާ، ފުރިހަމަ އަޣުލަބިއްޔަތަކާއެކީ އިރާދަކުރެއްވީތީ މިއަދުގެ ރައީސުލްޖުމްހޫރިއްޔާ ރައީސް ޑޮކްޓަރ މުޙައްމަދު މުޢިއްޒު އިންތިޚާބުވެވަޑައިގަތީ.
އިންތިޚާބުވެވަޑައިގަތުމާ ގުޅިގެން، އޭގެކުރިއަށް ވިސްނާލާއިރުގައި، އޭރު އޮޕޮޒިޝަން ޕާޓީއެއްގެ ގޮތުގައި ޕީ.ޕީ.އެމް.، ޕީ.އެން.ސީ. އޮތް އިރުގައި، އަޅުގަނޑުމެން ދިޔައީ ވަރަށް ގިނަ ވާހަކަ ދައްކަމުން ކުރީގެ ސަރުކާރާ ދޭތެރޭ ވަރަށް ގިނަ ތުހުމަތުތަކެއް ކުރަމުން. ރައްޔިތުންގެ މަޖިލިސް ތެރެއިންނާއި، އޭރު އަޅުގަނޑުމެންނަށް ލިބުނު ހުރިހާ ޕްލެޓްފޯމެއްގައި، މި ވާހަކަތައް ހިއްސާކުރަމުން އައީ ރައްޔިތުންގެ ސަމާލުކަމަށް އޭރުގައި އޮތް ސަރުކާރުން ކުރަމުން އައި ނޭދެވޭ ކަންތައްތަކުގެ ވާހަކަ ހިއްސާ ކުރަމުން އައީ.
އެގޮތަށް ކުރަމުން އައިއިރުގައި، އެންމެ މުހިންމު އެއް ކަމަކަށް އަޅުގަނޑުމެން ދައްކަމުން އައި އެއްވާހަކައަކީ ފައިސާ ޗާޕުކުރާ، ޚަރަދަށް ޒިންމާވާ ޤާނޫނު ސަސްޕެންޑް ކުރުމަށްފަހު، ޤާނޫނުއަސާސީއާ ޚިލާފަށް މަސައްކަތް ފެށްޓިވާހަކަ. އަދި އެފަދަ މާލީ ކޮންމެކަމަކީ، ރައްޔިތުންގެ މަޖިލީހާ ހިއްސާކުރެވިގެން، ރުހުންލިބިގެން ކުރަންޖެހޭ ކަންކަމަށް ވީހިނދު، އެއިން އެއްވެސް ކަމަކަށް ބަލައިލުމެއްނެތި، އެބޭފުޅުންނަށް ލިބިވަޑައިގެންފައި އޮތް ސުޕަރ މެޖޯރިޓީ ނަހަމަ ގޮތުގައި ހިއްޕަވައިގެން ސަރުކާރުން ޢަމަލުކުރައްވަން ފެށްޓެވީމާ، އެވާހަކަ އަޅުގަނޑުމެން ހިއްސާކުރަމުން އައީ.
އޭގެއިތުރުން، ކޮވިޑް ތެރޭގައި، ދައުލަތަށް އެތައް އަދަދެއްގެ ފައިސާގެ އެހީތެރިކަމާއި، އަދި އެހެނިހެންވެސް އެތައް އެހީތައް ލިބިފައި އެބަހުރި. އެހެންނަމަވެސް، މިއިން އެއްވެސް ކަމެއްގައި ދިވެހި ރައްޔިތަކަށް ލުއިވާގޮތަކަށް ސަރުކާރުން ޢަމަލުކޮށްފައި ނުވާނުވުމަށް އަޅުގަނޑުމެން ވާނީ އިޙްތިޖާޖުކޮށްފައި.
ރައީސް ޑޮކްޓަރ މުޙައްމަދު މުޢިއްޒު ވެރިކަމާ ހަވާލުވެވަޑައިގަތުމަށްފަހު، އެންމެ ފުރަތަމަވެސް ބައްލަވަން ފެށްޓެވީ، ދައުލަތުގެ މުއައްސަސާތަކުގެ ޙާލަތު، ކިހިނެއްތޯ އޮތީ. އަޅުގަނޑުމެން އޭރު ވާހަކަދެއްކި ގޮތަށްތޯ ޙަޤީޤަތުގައި އޮތީ. ރާއްޖޭގެ އެމް.އެމް.އޭ.ގެ ޙާލަތު އޮތީ ކިހާ ހިސާބެއްގައިތޯ. އެ ހުރިހާ ކަމެއް ބެއްލެވިއިރުގައި، އަޅުގަނޑުމެން އޭރު ދެއްކި ވާހަކަތަކާ އެތައް ގުނައެއް ތަފާތު، ނިކަމެތި، ވަރަށް ދެރަ ޙާލަތެއްގައި ދިވެހިރާއްޖޭގެ އިޤްތިޞާދު އޮތީ. އިޖުތިމާޢީ ގޮތުންވެސް އޮތީ. ޞިއްޙީ ދާއިރާވެސް އޮތީ. ހުރިހާ ދާއިރާއެއް އެހާ ނިކަމެތި، އެހާ ބަލިކަށިކޮށް އޮއްވައި، އެ މަނިކުފާނަށް ފުރަތަމަވެސް ޖެހިވަޑައިގަތީ އެކަންކަން ހަމަމަގަށް އެޅުވުމަށްޓަކައި ވަރަށް ހަރުދަނާ ސިޔާސަތުތަކެއް ތަންފީޒުކުރައްވަން ފަށްޓަވަން.
އެގޮތުން، ރޭވުންތެރިކަމާ އެކީގައި، ވަރަށް ހިކުމަތްތެރިކަމާ އެކީގައި، އެ މަނިކުފާނު ޢަމަލުތައް ބެހެއްޓެވީ. އެއާ އެކީގައި، ތިޔަ ވިދާޅުވިގޮތަށް، އެ މަނިކުފާނަށް ގޮންޖެހުންތަކާ ކުރިމަތިލައްވަން ޖެހިވަޑައިގަތީ. ނިމިދިޔަ ސަރުކާރުގެ ސުޕަރ މެޖޯރިޓީ އޮތް މަޖިލީހެއް ރައްޔިތުންގެ މަޖިލީހަކީ. އެ މަޖިލީހުން ދިވެހިރާއްޖޭގެ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒަށް ޖެއްސުންކުރުމުގެ ގޮތުން، އޭރު ފާސްކުރަން ލިބުނު ފުރަތަމަ ބަޖެޓުވެސް ފާސްކުރީ ޖެއްސުމަށް އިނގޭތޯ. އެއީ، އެ މަނިކުފާނަށް ދަތިކުރުމުގެ ފިޔަވަޅު އެޅުމަށްޓަކައި. އޭރުގައި ގޮވަމުން އައީ ރާއްޖެ ބަނގުރޫޓް ވެދާނެއޭ. ދިވެހިން އިނދަޖެހިދާނެއޭ. މި ވާހަކަތަކަށް މަގުފަހިކުރުމަށްޓަކައި، އެ ބަޖެޓު އެހެން ހެއްދެވީ.
އެހެންނަމަވެސް، އަޅުގަނޑު ވަރަށް ހިތާމައާއެކީ، ވަރަށް ދެރަވެފައި މި ވާހަކަ ހިއްސާކޮށްލަން ބޭނުން. މި ރާއްޖޭގެ ތާރީޚުގައި އެގޮތަށް ޢަމަލުކުރި ފުރަތަމަ ފަހަރު އެއީ އިނގޭތޯ. އެއީ، ނިމިދާ ސަރުކާރަކުން އަބަދުވެސް ދެން އަންނަ ސަރުކާރަށް ކަންކަން ފަހިކޮށްދިނުމަށްޓަކައި، އެ ސަރުކާރަކުން ބޭނުންވާގޮތަށް ބަޖެޓާއި ހުރިހާ ކަމެއް ފަހިކޮށްލަދޭ. އަޅުގަނޑު ޚުދު މާލިއްޔަތު ކޮމިޓީގައި އިނިން ޕީ.ޕީ.އެމް.ގެ ވެރިކަން ނިމިގެން ދިޔައިރުގައި. އޭރުގައި އެމް.ޑީ.ޕީ.ގެ ރައީސް އިބްރާޙީމް މުޙައްމަދު ޞާލިޙްގެ ވެރިކަންފެށުމާ އެކީގައި، ޕީ.ޕީ.އެމުން ޢަމަލުކުރި ގޮތަކީ، އޭރުގެ ރައީސުލްޖުމްހޫރިއްޔާ ބޭނުންފުޅުވި ގޮތަށް މާލިއްޔަތު ކޮމިޓީގެ މުޤައްރިރުކަމާއި، ނައިބު މުޤައްރިރުކަންވެސް ދީފައި، އެ ބޭފުޅުން ބޭނުންވިގޮތަށް ބަޖެޓު ފާސްކޮށްދިނީވެސް ޕީ.ޕީ.އެމް. މެޖޯރިޓީ އޮތްއިރު އިނގޭތޯ.
އެހެންނަމަވެސް، އެމް.ޑީ.ޕީ. އިން ކަންކުރީ އެހެނެއްނޫނޭ. އެމް.ޑީ.ޕީން ކަންކުރިގޮތް އަޅުގަނޑު މި ފާހަގަކުރީ. ޖެއްސުމަށް އެކަން ކުރީ. މިސާލަކަށް އަޅުގަނޑުމެން އާންމުކޮށް މި ދަންނަވާގޮތަށް ދަންނަވަންޏާ 30 މިލިއަން ރުފިޔާގެ ޕްރޮޖެކްޓަކަށް 2 ލައްކަ ރުފިޔާ ޖަހައިލީމާ ދޮގެއްތޯ މިއީ، ރައްޔިތުންނަށް ކުރާ ޖެއްސުމެއް. މިއީ، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އާއި އެ މަނިކުފާނުގެ ސަރުކާރަށް ކުރާ ޖެއްސުމެއްނޫން. ދިވެހި ރައްޔިތުންނަށް މީގެ ގެއްލުން ލިބެނީ. އެފަދަ ގޮންޖެހުންތަކާ އެކު ފުރަތަމަ އަހަރު ފެށީ.
އަދި އެކަން އެހެން ނުވެގެން ރައީސުލްޖުމްހޫރިއްޔާގެ ނޯ ކޮންފިޑެންސް ވޯޓެއް ނަގަންއުޅުނު. އަޅުގަނޑު އެކަން ސިފަކުރަނީ ކުޑަ ބަޣާވަތެއްގެ ގޮތުގައި އިނގޭތޯ. ރައްޔިތުންގެ ރުހުމާ އެކީ، ފުރިހަމަ ތާއީދާ އެކީގައި، ލޯތްބާ އެކީގައި ހޮވުނު ސަރުކާރެއް ވައްޓާލުމަށްޓަކައި، ރައްޔިތުންގެ މަޖިލިސް ތެރެއިން، އެ ހިންގެވި ޢަމަލަކީ އެ ބޭފުޅުންނަށް ރައްޔިތުންގެ މަޖިލީހުގައި މެޖޯރިޓީ ވަރަށް ވަރަށް ބޮޑުތަނުން ގެއްލިގެން ދިޔަދިޔުން. ރައްޔިތުން ގަބޫލުކުރި އެމް.ޑީ.ޕީ.އަކީ އެއްވެސް ހަރުދަނާ ސިޔާސަތެއް ނެތް ބައެއްގެ ގޮތުގައި. އެ ނިންމުން އެގޮތަށް ނިންމީމާ، މުޅި ދުނިޔެއަށް ސާބިތުވެގެންދިޔައީ އެގޮތަށް. އެއީ، ސަރުކާރަކަށް 3 މަސް ނުފުރި، ރައްޔިތުންގެ މަޖިލީހުގެ އިންތިޚާބު ކުރިމަތިވެފައި އޮއްވާ، އިންތިގާލީ މަރުޙަލާއެއްގެ ތެރޭގައި މިފަދަ ގޮތަކަށް، ނާތަހުޒީބީ ޢަމަލުތަކެއް، ޑިމޮކްރަސީއާ ބީރައްޓެހި ޢަމަލުތަކެއް، އެމް.ޑީ.ޕީ.ގެ ފަރާތުން ފެނިގެންދިޔަދިޔުމުގެ ނަތީޖާ އެއީ، ރައީސް ޑޮކްޓަރ މުޙައްމަދު މުޢިއްޒަށް ސުޕަރ މެޖޯރިޓީ ދިވެހި ރައްޔިތުން، ރައްޔިތުންގެ މަޖިލީހުގެ އިންތިޚާބުގައި ދެއްވުން. އެއާ ގުޅިގެން، އެ އިންތިޚާބު ކާމިޔާބުވުމާ ގުޅިގެން އިރާދަކުރެއްވީތީ، އެ މަނިކުފާނުގެ މަސައްކަތްޕުޅުތަކަށް ވަރަށް ބޮޑު ލުޔެއް ލިބިވަޑައިގަތް. އެހެންނަމަވެސް، ހުރި ގޮންޖެހުންތައް މަދެއްނޫން.
ހުރި ގޮންޖެހުންތަކަކީ، ރާއްޖެ އޮތީ ދަރަނިވެރިވެފައި. ޙަޤީޤަތަކީ އެއީ ދޮގެއްތޯ؟ ދަރަނިވެރިވެފައި. ބޭރު ފައިސާ މި ރާއްޖެއަކު ނެތް. ދަރަނި ދައްކާނެ ގޮތްތަކެއް ނެތް. އެހެންނަމަވެސް، މި ހުރިހާ ފިޔަވަޅުތަކަކާ އެކީގައި، އެ މަނިކުފާނުގެ ހަރުދަނާ ސިޔާސަތުތަކާ އެކީގައި، ޤައުމުގެ އިޤްތިޞާދު ހަމަމަގަކަށް އެޅުވުމުގެ މަސައްކަތް ފަށްޓަވައި، ދަރަނި ދެއްކުމަށް އަޅުގަނޑުމެން ބޮޑެތި ދަރަނިތައް އަދާކުރަންޖެހޭ ފަރާތްތަކާ ގާތް ގުޅުމެއް ބާއްވަވައި، ސަރުކާރުތަކާ ގާތް ގުޅުމެއް އުފައްދަވައި، އެ ދަރަނިތައް މެނޭޖްކުރެވޭނެ އުސޫލުތަކެއް ހަމަޖައްސަވައި، އެމް.އެމް.އޭ.އާއި އަދި މިނިވަން މުއައްސަސާތައް ހަމަޖެއްސި މިއީ ވަރަށް ގިނަ މަސައްކަތް. އަޅުގަނޑު މި ދެންނެވީ ކުރިން ފާހަގަކުރިހެން ބޮއްސުންލާފައި އޮތް ތަނެއް ހަމަ މަގަކަށް އަޅުވަން ވަގުތުކޮޅެއް ނެގި.
އެއަށްފަހުގައި، އެ ގޮންޖެހުންތަކާ އެކުގައި އެ މަނިކުފާނު ޙަޤީޤަތުގައި ރައްޔިތުންނަށް އިތުރު މަންފާތަކެއް ގެނެސްދެއްވުމަށްޓަކައި މަސައްކަތްޕުޅު ފެށްޓެވި. އޭގެ ނަތީޖާ މިއަދާ ހަމައަށް އައިއިރު، ދެ އަހަރުވެގެން މިދާއިރު، އަޅުގަނޑު ދަންނަވާނީ، އެ މަނިކުފާނު އަމިއްލަފުޅު ބަޖެޓެއް ފާސްކުރައްވަން ފުރުޞަތު ލިބި، އެ ބަޖެޓް ފާސްކުރައްވައިގެން އޭގެ ފޮނި މީރުކަން ދިވެހި ރައްޔިތުންނަށް މިހާރުއެވަނީ ލިބެންފަށާފައި. އެ ކުޑަވަގުތުކޮޅާ އެކީގައި، ކަންކަން ހަމަމަގަށް އަޅުއްވައި، އިޤްތިޞާދު ހަމަމަގަށް އަޅުވައި، އިޖުތިމާޢީގޮތުން ރަނގަޅު ފޭރާމަކަށް ދިވެހި ރައްޔިތުން ގެނެސްދެއްވައި، ހަމަޖެހޭ ދިރިއުޅުމެއް ގެނެސްދެއްވައި، މިނިވަން ދައުލަތެއްކަން ޔަޤީންކޮށްދެއްވައި، އިރާދަކުރެއްވީތީ، މި ހުރިހާ މަސައްކަތްޕުޅެއް މިހާހިސާބަށް ކުރައްވާފައި، ދެ އަހަރު ވީއިރުގައި މިއޮތީ. ދިވެހި ދައުލަތް ހަމަމަގަށް އަޅުވައި، ދިވެހި ޤައުމު މިނިވަންކޮށްދެއްވާފައި. އިރާދަކުރެއްވީތީ ވަރަށް ބުރަ، ބޮޑު މަސައްކަތްތަކެއް ދިވެހި ރައްޔިތުންނަށް ކޮށްދެއްވާފައި. ކާމިޔާބު ދެ އަހަރެއް މި ދިޔަ ދެ އަހަރަކީ.
ފާޠިމަތު މަދަދާ:
އާދެ، ދެން ހަމަ އަޅުގަނޑުގެ ދެވަނަ ސުވާލާ ވަރަށް ގުޅޭ ވާހަކަތަކެއް ނައިބު ރައީސްގެ ވާހަކައިގައި ތިޔަ ފާހަގަކުރެއްވީ. ޤައުމުގެ އިޤްތިޞާދީ ޙާލަތުގެ ވާހަކަ. ރާއްޖޭގެ އިޤްތިޞާދަށް ބަލާއިރުގައި މިސާލަކަށް ފަތުރުވެރިކަމުގެ ޞިނާޢަތް، ވަރަށް މަދު ޞިނާޢަތްތަކެއް ހުރީ. އެހެންނަމަވެސް، ޙަޤީޤަތަކީ ރާއްޖެފަދަ ޤުދުރަތީގޮތުން މުއްސަނދި ވަސީލަތްތަކެއް ހުރި ޤައުމަކާ އަޅާބަލާއިރުގައި، ވަރަށް ބޮޑެތި ނަފާތަކެއް ހޯދޭނެ ދާއިރާތަކެއް އެބަހުރިކަން. ގަބޫލުކުރައްވަންތޯ މި ރޮނގުން ރަނގަޅު މަސައްކަތްތަކެއް ފާއިތުވެގެން މިދިޔަ ދުވަސްތަކުގެ ތެރޭގައި، ސަރުކާރަށް ކުރެވިފައިވާކަމަށް؟ މިސާލަކަށް ފަތުރުވެރިކަމުގެ ދާއިރާ، މަސްވެރިކަމުގެ ދާއިރާ އަދި ދަނޑުވެރިކަމަށް ބެލިނަމަވެސް، މިހެން ހުރި އެކިއެކި ރޮނގުތަކުން ކުރެވިފައިވަނީ ހަމަ އެކަށީގެންވާ މަސައްކަތްތަކެއް ކަމަށް ގަބޫލުކުރައްވަންތޯ؟
ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް:
އާދެ، ޝައްކެއްވެސްނެތް ދޮގެއްތޯ؟ މިސާލަކަށް ބައްލަވާ. އަޅުގަނޑު ކުރިން މި ދެންނެވީ އިޤްތިޞާދީ ގޮތުން މިހާ އަޅުގަނޑުމެން ބަލިކަށިކޮށް އޮއްވާ، އެންމެ ފުރަތަމަ އިސްކަންދެއްވީވެސް ރާއްޖޭގެ ރައްޔިތުންނަށް ނަފާވެރިކަން ހޯދައިދެވޭނީ ކޮން މަސައްކަތެއް ކޮށްގެންތޯ. ނޫނީ މަސައްކަތެއް ނިންމައިގެންތޯ. އެގޮތުން ދިވެހިރާއްޖޭގެ އިންޓަރނޭޝަނަލް އެއަރޕޯޓް، ވެލާނާ އިންޓަރނޭޝަނަލް އެއަރޕޯޓުގެ އާ ޓާމިނަލް ހުޅުއްވައިދެއްވީ. އެއީ، ރާއްޖެއަށް އެންމެ ރަނގަޅު އިންކަމެއް ޖެނަރޭޓްކުރެވެން އޮތް ހަމައެކަނި މަގަށްވީމާ ދޮގެއްތޯ؟ އެކަން ކޮށްދެއްވި. ވަރަށް އުނދަގޫ ޙާލަތުގައި، އެކަން ފުރަތަމަ އެ މަނިކުފާނު އިޢުލާނު ކުރެއްވި ޑޭޓަކަށްވެސް ނޫން އެ ތަން ހުޅުވިގެން ދިޔައީ. އެހެންނަމަވެސް، ހަމަ ގޮންޖެހުންތަކާ އެކީގައި، އެކަން ތަންފީޒު ކުރެވިގެން ދިޔައީ. އެ މަނިކުފާނުގެ ވަޢުދުފުޅެއް އެއީ. އެކަން ނިންމަވައި ދެއްވި. އެއީ، ރާއްޖޭގެ ރައްޔިތުންނަށް ލިބިގެންދިޔަ ވަރަށް ބޮޑު ލުޔެއް އިނގޭތޯ. އިޤްތިޞާދީގޮތުން ލިބުނު ވަރަށް ބޮޑު ހިތްހަމަޖެހުމެއް. ދިވެހިރާއްޖޭގެ ޓޫރިޒަމް ކުރިއެރުވުމަށްޓަކައި، ދުނިޔޭގެ އެކި ޤައުމުތަކުން ފަތުރުވެރިން އިތުރުކުރުމަށްޓަކައި، އޮތް އެންމެ ބޮޑު ފުރުޞަތަކީވެސް އެއީ. އެހެންވީމާ، އެ ފުރުޞަތު ފުރަތަމަވެސް ހުޅުއްވައިދެއްވީ.
އޭގެ އިތުރަށް، ދެން ނުހެދިހުރި ގިނަ ރިޒޯޓުތައް އެބަ ހުރި، އެ ރަށްތަކަށް އިތުރު ޢިނާޔަތްތައް ދެއްވައިގެން، އެ ފަރާތަށް އިތުރު ލުއިތަކެއް ދެއްވައިގެންވެސް، އެ ރަށްތައް ރަނިންގ ކޮންޑިޝަނަށް ގެނައުމަށްޓަކައި، ބުރަ މަސައްކަތްތަކެއް ކޮށްދެއްވި. ޓޫރިޒަމް ދާއިރާގެ ތެރެއިން މިއަދާ ހަމައަށް އައިއިރު ގިނަ ރަށްތައް ނެހެދޭ، މިހާރު އެ ހުރީ ބައެއް ރަށްތައް ހުޅުވިފައި. މި އަހަރުގެ ތެރޭގައިވެސް އަދި މި އަންނަ އަހަރުގެ ކުރީކޮޅުގައިވެސް ގިނަ ރަށްތައް ހުޅުވިގެންދާނެ. އޭގެ ސަބަބުން ދިވެހި އިޤްތިޞާދަށް ފައިދާ މި ވަނީ އިނގޭތޯ.
ހަމަ އޭގެއިތުރަށް ކުރީގެ ރައީސުން ލުއިގޮތް އިޚްތިޔާރު ކުރެއްވުމުގެ ސަބަބުން، ރައްޔިތުންނަށް ވަރަށް ބޮޑު ނިކަމެތިކަމެއް ލިބިފައި އޮތީ. އެހެންނަމަވެސް، އެ މަނިކުފާނު ބެއްލެވީ އާންމު ދިވެހި ރައްޔިތުންނަށް އެންމެ މަޞްލަޙަތު ހުރިގޮތް، އެންމެ ރަނގަޅުގޮތް އިޚްތިޔާރުކުރެއްވީ. ބޭރުފައިސާ ދިވެހިރާއްޖޭގައި ހިފެހެއްޓުމަށްޓަކައި ބޮޑެތި ނިންމުންތައް ނިންމެވި. އެ ނިންމެވުމުގެ ނަތީޖާއަކީ، ދިވެހި ރައްޔިތުންނަށް މިއަދު ޑޮލަރު ލިބެން ކުރީގައި ލިމިޓްކޮށްފައި އޮތް ލިމިޓްވުން ނިމުމަކަށް ގެނައުން. އިޤްތިޞާދު ހަމަ މަގަކަށް އެޅޭ ވަރަކަށް މިހާރު އެދަނީ ޑޮލަރު އަދަދު އިތުރުވަމުން. އިރާދަކުރެއްވީތީ އެ މަނިކުފާނުގެ ވަޢުދުފުޅާ އެއްގޮތަށް އެ މަނިކުފާނު އެކަން ކޮށްދެއްވާނެ. އެ ފެންނަނީ އޭގެ މިސާލުތައް އަޅުގަނޑުމެން ލޯ ކުރިމަތިން. އިޖުތިމާޢީގޮތުންވެސް، އިޤްތިޞާދީގޮތުންވެސް، މިއިން ކޮންމެ ކަމަކަށް ކުރިން ފެށްޓެވި ފިޔަވަޅުތައް ފަހަރަކު ބައެއް އެ އަންނަނީ. އައީމާ ތަރުތީބުން ހަމަމަގަށް އަޅުއްވަމުން ގެންދަވަނީ.
ދެން އަޅުގަނޑުމެން އިޤްތިޞާދީގޮތުން ފާހަގަކޮށްލާއިރު މަސްވެރިކަމުގެ ވާހަކަ ތިޔަ ވިދާޅުވީ. އެމް.ޑީ.ޕީ. ވެރިކަން ނިމުނުއިރު، ރިޔާސީ އިންތިޚާބަށްޓަކައި 25 ރުފިޔާ ނޫނީ 20 ރުފިޔާއަށްވުރެ މައްޗަށް މަހުގެ އަގު ޖައްސާފައިދިޔަ ދިޔުން އެއީ، އަޅުގަނޑުމެން ގަބޫލުކުރާ ގަބޫލުކުރުންތަކެއްނޫން. އިންތިޚާބެއް ކާމިޔާބު ކުރުމަށްޓަކައި އެފަދަ އެއްވެސް ނިންމުމެއް ސިޔާސީގޮތުން ވެރިން ނިންމުވުމަކީ އެއީ، ނާތަހުޒީބީ ޢަމަލުތަކެއްގެ ގޮތުގައި އަޅުގަނޑު ސިފަކުރަން އިނގޭތޯ.
އެހެންނަމަވެސް، ރައީސުލްޖުމްހޫރިއްޔާގެ އިޚްލާޞްތެރިކަމަކީ ރައީސްވެސް ވަޢުދުވެވަޑައިގެންނެވި ދޮގެއްތޯ މަހުގެ އަގު ބޮޑުކުރައްވަން. އެހެންނަމަވެސް، ރާއްޖޭގެ އިޤްތިޞާދާ ނުބައްދަލު ކަމެއް ކިހިނެއްތޯ ކުރާނީ؟ ރައްޔިތުންގެ ލޮލުގައި އަނދުން އަޅުވައިގެން އެކަން ކުރަން އަޅުގަނޑުމެން ގަދައަޅައި މަސައްކަތް ކުރިނަމަ، ގަދަބަސްބުނެ ގަދައަޅައި މަސައްކަތްކުރި ނަމަ މިއަދު އެކަން ނުވެދާނެ. އެހެންނަމަވެސް މީގެ ދެ އަހަރު ފަހުން، އެއް އަހަރު ފަހުން، ރައްޔިތުން ތިބޭނީ ކޮން ޙާލަތެއްގައިތޯ އަޅުގަނޑުމެން އޭރުގައި ދައުލަތުގެ ޚަރަދަށް ޒިންމާވާ ޤާނޫނު ސަސްޕެންޑް ކުރުމަށްފަހު ފައިސާ ޗާޕްކުރީމާ އަޅުގަނޑުމެން ދެއްކީ އެ ވާހަކަ. މިއަދަކު ނޫނޭ، އެއް އަހަރަކުން ނޫނޭ މިކަމާ އަޅުގަނޑުމެން ކުރިމަތިލާނީ. ކުރިއަށް އޮތް ދެ ތިން އަހަރު ތެރޭ އަޅުގަނޑުމެން މިއަށް ކުރިމަތިލާނެއޭ. ޑޮލަރުގެ އަގު ބޮޑުވާނެއޭ. މިއީ، ޚުދު އަޅުގަނޑުމެން އެކަނި ދެއްކި ވާހަކައެއް ނޫން. އޭރު އެމް.ޑީ.ޕީ.ގެ ރައީސަކަށް ހުންނެވި ރައްޔިތުންގެ މަޖިލީހުގެ ޢިއްޒަތްތެރި ރައީސް، ރައީސް މުޙައްމަދު ނަޝީދުވެސް އެވާހަކަ ހިއްސާ ކޮށްދެއްވި. މި ވާހަކަތައް އަޅުގަނޑުމެން މި ދެއްކީ، މިހެންވީމާ، އަޅުގަނޑުމެންގެ ރައީސުލްޖުމްހޫރިއްޔާ ޢަމަލުފުޅުތައް ބެހެއްޓެވިގޮތަކީ، މަސްވެރިންނާ ވާހަކަ ދައްކަވައިގެން، މަސްވެރިންނަށް ނުލިބި ހުރި ފައިސާތައް ދެވޭނެ އިންތިޒާމު ފުރަތަމަ ހަމަޖެއްސެވުން.
މަހުގެ އަގު ރަނގަޅު އަގަކަށް އަޅުގަނޑުމެން ތިރި ކުރީން. މަސްވެރިންނަށް އެންމެ ލުއިގޮތް ހޯއްދަވައިދެއްވި. މަސްވެރިންނާ މަޝްވަރާކުރެއްވި. މިއީ، ޑިމޮކްރަސީގެ އެންމެ ރީތި އުސޫލު. އެބަޔަކާ ގުޅޭ ކަންކަން، އެ ބަޔަކާ ހަމައަށް ތިރިކޮށް، އެ ބަޔަކާ ވާހަކަ ދެއްކުން. މިހާރަކު ނުހުންނާނެ އިނގޭތޯ އެއްވެސް މަސްދޯންޏަކު، އޮޑިވެރިއެއް ފައިސާ ނުލިބި. ދުވަހުން ދުވަހަށް ފައިސާ ދޭނެ. އެހެންނަމަވެސް މަހުގެ އަގު އެވަނީ ތިރިކޮށްފައި. އެހެންނަމަވެސް، އެ މަނިކުފާނު ވަޢުދުވެވަޑައިގަތް، ވަކި މުއްދަތެއްގެ ތެރޭގައި މަހުގެ އަގު މައްޗަށް ޖައްސަވާނަމޭ އިޤްތިޞާދު ރަނގަޅުވަމުންދާ މިންވަރަކަށް. މިއީ އެހެންނޫންތޯ ވެރިންގެ އޯގާތެރިކަމަކީ. ކޮންމެ ކަމެއްވެސް މި ނިންމަވަނީ، ރައްޔިތުންނާ ހަމައިން. ރައްޔިތުން ބޭނުންވާ ގޮތަށް. ރައްޔިތުންނަށް ލުއި ހޯދައިދޭ ގޮތަށް. އެހެންވީމާ، އިރާދަކުރެއްވީތީ އިޤްތިޞާދީގޮތުން، މިދަނީ، ހަމަ މަޑުމަޑުން އަޅުގަނޑުމެން ކުރިއަރަމުން.
ފާޠިމަތު މަދަދާ:
ދެން އިޖުތިމާޢީ ރޮނގުން ބަލާއިރުގައި ރައީސުލްޖުމްހޫރިއްޔާ ދާދި ފަހުން ރައްޔިތުންނާ މުޚާޠަބު ކުރެއްވިއިރުގައި، ޖުމްހޫރީ ދުވަހުގެ ޖަލްސާގައިވެސް އަދި އޭގެ އިތުރުން، އެކިއެކި ހަރަކާތްތަކުގެ ތެރެއިން، އެމަނިކުފާނު އެބަވޭ، އިޖުތިމާޢީ ރޮނގުން ރާއްޖޭގެ ކުރިއެރުމަށް އަދި ރައްޔިތުންގެ ފުދުންތެރިކަމަށާއި ކާމިޔާބަށް މިކުރައްވަމުން ގެންދަވާ މަސައްކަތްތަކަށްވެސް ވަރަށް ބޮޑަށް އަލިއަޅުވާލައްވާފައި. ގިނަ ކަންތައްތަކެއް ހާސިލުކުރެވުނު ކަމަށް ފާހަގަކުރައްވަނީ. ކޮބައިތޯ އެ ވިދާޅުވާ ކަންކަމަކީ؟ އިޖުތިމާޢީ ރޮނގުން ބަލާއިރުގައި ސަރުކާރަށް ދެ އަހަރުވެގެން އައިއިރުގައި މި ހާސިލުކުރެވުނު؟
ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް:
އާދެ، އިޖުތިމާޢީގޮތުން ދުޅަހެޔޮ މުޖުތަމަޢެއް ދިވެހިންނަށް ހޯއްދަވައިދެއްވުމަށްޓަކައި، އެ މަނިކުފާނު އެވަނީ ވަރަށް ބޮޑެތި ނިންމެވުންތަކެއް ނިންމަވާފައި. އެއާ ގުޅިގެން އެ މަނިކުފާނަށް ވަރަށް ބޮޑެތި ގޮންޖެހުންތަކާވެސް ކުރިމަތިލައްވަން ޖެހުނު. އެހެންނަމަވެސް، އެއިން އެއްވެސް ކަމަކަށް ޖެހިލުންވެވަޑައިނުގެން، ކުރިމަތިލެއްވީ، ދިވެހި ރައްޔިތުންގެ މުސްތަޤުބަލް ދިވެހިންނަށް ހޯއްދަވައިދެއްވުމަށްޓަކައި. ދިވެހިންގެ ޖީލެއް ސަލާމަތްކޮށްދެއްވުމަށްޓަކައި، އެގޮތުން ވޭޕް މަނާކުރެއްވީ. އެގޮތުން ޖެނެރޭޝަން ބޭނެއް އިޢުލާންކުރައްވައި، އެ މަސައްކަތްޕުޅު ފެށްޓެވި.
ހަމައެގޮތުން، މަސްތުވާތަކެތީގެ ވަބާއިން ދިވެހިން ސަލާމަތްކުރުމަށްޓަކައި ދިވެހި ޒުވާނުން ކުށުގެ ވެށިން ރައްކާތެރިކުރުމަށްޓަކައި، ރިހިބިލިޓޭޝަން ސެންޓަރުތަކެއް ޤާއިމުކޮށްދެއްވައި، އެ ފަރުވާ ހޯދޭނެ ނިޒާމެއްގެ ތަރުތީބުން، މުޅި ވަށައިޖެހޭ ނިޒާމެއްގެ ތެރެއިން އެކަން ކޮށްދެއްވުމަށް މަސައްކަތްޕުޅު ފެށްޓެވި. މި ޑުރަގް ނެޓްވަރކް އެކީގައި ނައްތާލުމަށްޓަކައި، ބޮޑެތި މަސައްކަތްތަކެއް އެބަ އޮތް ފަށްޓަވާފައި. ޤައުމީ ބޮޑު މަސައްކަތެއްގެ ގޮތުގައި އެ މަސައްކަތް އޮތީ ފަށްޓަވައި ދެއްވާފައި. އެގޮތުން، 100 އެތައް ތަނެއް މިދިޔަ ހަފްތާތެރޭގައިވެސް ފާސްކޮށް، 90 އަށްވުރެ ގިނަ ބަޔަކު ހައްޔަރުވެސް ކޮށްފައިވޭ. އަދި ވިދާޅުވި ދޮގެއްތޯ އިހަށްރޭ ބޮޑު ޖަލްސާއެއްގައިވެސް، ތިމަން މަނިކުފާނުގެ ވަރަށް ބޮޑު އެދިވަޑައިގަތުމެކޭ، މިއިން އެއްވެސް ނުފޫޒަކުން، އެއްވެސް ކަމަކުން، މިގޮތަށް ފުލުހުން ބަލާ ބެލުމުގެ ތެރެއިން ހައްޔަރުކުރެވޭ މީހުން ދޫވެގެން ނުވާނެކަން. އިންސާފުގެ މަގަށް، ކުރިމައްޗަށް ގެނެވެންޖެހޭނެއޭ.
އެހެންވީމާ، މިހާވަރަށް އެ މަނިކުފާނު ދިވެހިންގެ ރައްކާތެރިކަން ކަށަވަރުކޮށްދެއްވުމަށްޓަކައި މަސައްކަތްޕުޅު އެބަ ކުރައްވާ. ޙަޤީޤަތުގައިވެސް ވަރަށް ބިރުވެރި މާޙައުލެއްގެ ތެރޭގައި އަޅުގަނޑުމެންގެ ދިވެހި ރައްޔިތުން ދިރިއުޅެމުން މި ގެންދަނީ. އެހެންވީމާ، އެކަން ކަށަވަރު ކުރުމަށްޓަކައި އެ މަސައްކަތްޕުޅު ފަށްޓަވައި، އަދި މީގެ އިތުރަށް، މުޖުތަމަޢުގެ އެތައް ބަޔަކީ، ހަރުދަނާ ބަޔަކަށް ހެއްދެވުމަށްޓަކައި، ދުޅަހެޔޮ މުޖުތަމަޢަކަށް ހެއްދެވުމަށްޓަކައި، ތެލެސީމިއާ ކުދިންނަށްވެސް ޢިނާޔަތްތައް ހަމަޖައްސަވައި، އެކަނިވެރި މައިންނަށްވެސް ޢިނާޔަތް އިތުރުކޮށްދެއްވައި، އަދި އިޤްތިޞާދީގޮތުންނާއި ސިޔާސީގޮތުން އަންހެނުން ބާރުވެރި ކުރެއްވުމަށްޓަކައި، އެކިއެކި ސްކީމްތައް ހުޅުއްވައިދެއްވައި، އޭގައި ބައިވެރިވާން ފުރުޞަތު ދެއްވައި، މި ހިންގަނީ ވަރަށް ގިނަ މަސައްކަތްތައް ދޮގެއްތޯ؟ މިއިން ޙަޤީޤީ ފައިދާ ރައްޔިތުންނަށް ލިބިގެންދާނެ. އެހެންވީމާ، ކޮންމެ ކަމަކީވެސް ދިވެހި އާންމު ނިކަމެތި ރައްޔިތު މީހާއަށް ލުއިވެގެންދާނެ ކަންކަން.
ފާޠިމަތު މަދަދާ:
މުޅި ޖުމްލަ ގޮތެއްގައި، ރާއްޖޭގެ މަސްރަޙަށް ބަލައިލާއިރުގައި، އަދި އާންމުކޮށް ރައްޔިތުންގެ ތެރެއިންވެސް މިއިވޭ ކަންބޮޑުވުންތަކާއި، ޝަކުވާތަކަށް ބަލައިލާއިރުގައި، އަބަދުވެސް މި ދައްކާ ވާހަކައަކީ، ޚަރަދާ ބައްދަލު އާމްދަނީއެއް ނުލިބޭ ވާހަކަ. މި ކަހަލަ ވަރަށް ގިނަ ކަންބޮޑުވުންތަކެއް، ޝަކުވާތަކެއް އެބަ އޮވޭ. ކިހިނެއްތޯ މިކަމާ މެދުގައި ދެކެވަޑައިގަންނަވަނީ؟ މިކަމަށް ޙައްލެއް ލިބޭނެ މަގަކުން ސަރުކާރަށް މަސައްކަތްތަކެއް ކުރެވިފައި އެބަވޭތޯ؟
ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް:
އާދެ، ސަރުކާރުން މި މަސައްކަތް ކުރަނީ، ދެކޮޅުޖެހޭ ނިޒާމެއްގެ ތެރެއިން، ރައްޔިތުންނަށް ޚިދުމަތް ކުރުމަށްޓަކައި. އެހެންނަމަވެސް، ކޮންމެ ސަރުކާރަކުން އަޔަސްވެސް މި ކުރާ ކަމަކީ، ކުރީ ސަރުކާރުން ފަށްޓަވާފައި ހުންނަ މަޝްރޫޢުތައް ހުއްޓާލާފައި، އާ މަޝްރޫޢުތަކަކަށް މިދަނީ. އޭގެ ސަބަބުން، ތިޔަ ވިދާޅުވާ ކަންތައްތަކަށް މި އޮތް ފުރުޞަތު ހުޅުވިގެން މިދަނީ. އާ މަޝްރޫޢުތައް ފެށީމާ ވާގޮތަކީ، ކުރިން ހުރި މަޝްރޫޢުތައް ހުއްޓާލީމާ، އެއަށް ކުރެވުނު ޚަރަދުތަކާއި، އެއަށްދޭންޖެހޭ ބަދަލުތަކާއި، މިހެންގޮސް މާލީ ނިޒާމުގެ ތެރޭގައި ވަރަށް އުނދަގޫ ކަންތައްތަކަކާ ކުރިމަތިލާންޖެހެނީ. ކޮންމެ ސަރުކާރެއް އަޔަސްވެސް.
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ސަރުކާރާ ހަވާލުވެވަޑައިގަތުމަށްފަހު އެ މަނިކުފާނަށްވެސް ހަމަ އޮތް އެ މަގު އިޚްތިޔާރު ކުރެއްވެން. އެހެންނަމަވެސް، ތަކުރާރުކޮށް ވިދާޅުވަމުން ވަޑައިގަންނަވަމުން ގެންދެވީ، މިހާރުވެސް ތިޔަބޭފުޅުންނަށް ވަރަށް ސާފުކޮށް އެ މަނިކުފާނު ވިދާޅުވާ ބަސްފުޅު އަޑުއިވިގެންދާނެ އިންތިޚާބުގެ ތެރޭގައި. މީޑިއާތަކަށް ސާފުވެސްވާނެ. ތިމަން މަނިކުފާނު އެއްވެސް މަޝްރޫޢެއް ކުރިން ފަށްޓާފައިހުރި އެއްވެސް މަޝްރޫޢެއް ނުހުއްޓާނަމޭ. ދިވެހި ރައްޔިތުންގެ ޙައްޤުގައި ކުރީގެ ސަރުކާރުންވެސް މަސައްކަތް ފަށްޓަވާފައި އޮތީ. އެހެންވީމާ، އެ މަސައްކަތް ތިމަން މަނިކުފާނު ނިންމަވައި ދެއްވާނަމޭ. އެ ނުނިންމާ އޮތް އޮތުމަކީ، އެއީ ރައްޔިތުންނަށް ލިބޭ ނިކަމެތިކަމެއް. ރައްޔިތުންގެ ފައިސާ އެއީ. ޚިޔާނާތަކަށް ނޫނީ ނުވާނެ. އެއީ، ޝައްކެއްއޮތް ކަމެއްނޫން. މަސައްކަތްތައް އެހެން ބައްޓަން ނުކުރުމަށްޓަކައި، ވަރަށް ރަނގަޅު މިސާލެއް މިއަދުގެ ރައީސުލްޖުމްހޫރިއްޔާ ފަރާތްޕުޅުން ދިވެހި ރައްޔިތުންނަށްޓަކައި އެ ފެނިވަޑައިގަންނަވަނީ. ދެކޮޅުޖެހޭ ނިޒާމެއްގެ ތެރެއިން، މި ޚަރަދު ބަރަދު ބެލެހެއްޓުމުގެ ކަންތައްތަކެއް އެމަނިކުފާނު ފަށްޓަވާފައި އެއޮތީ.
އެހެންނަމަވެސް، އުނދަގޫތަކެއް އެބަހުރި. އުނދަގޫތަކަކީ، ސަރުކާރު ހަވާލުވީމާ ރައީސްގެ އަތްޕުޅުން ކުރައްވާ މަސައްކަތްޕުޅުތަކުންވާ އުނދަގޫތަކެއް ނޫން. ކުރީގައި ހުރި ދަރަނިތައް އަދާކުރުމާއި، އަދި އޭގެ އިތުރަށް، އެބޭފުޅުން ނަންގަވާފައިހުރި ސްކޫކްތަކަކަށްވެސް މި އަހަރުގެ ތެރޭގައި އަޅުގަނޑުމެން ދައްކަންއެބަޖެހޭ ވަރަށް ގިނަ އަދަދު. ދެން ބަޖެޓުވެސް ޙަޤީޤަތުގައި މި ފަހަރު ވަރަށް ބޮޑުތަނުން ކުޑަވި. އެހެންނަމަވެސް، މި ސްކޫކަށް ދައްކަންޖެހޭ ބައިތަކާހުރެ ބޮޑުވެފައި މިއޮތީ ބަޖެޓުން ފެންނަ އަދަދުތައް. މި ބަޖެޓު ފޮތުގެ ތަފްސީލު ބައްލަވައިލެއްވީމާ އެކަން ފެނިގެންދާނެ. އެހެންވީމާ، މިގޮތަށް ޚަރަދު ކުރުމުގައި ދެކޮޅުޖެހޭ ސިޔާސަތެއް އެމަނިކުފާނު އެބަ އެކުލަވައިލައްވާ. އެހެންނަމަވެސް، މިއީ އެއް އަހަރުން ދެ އަހަރުން ވާނެ ކަމެއްނޫން. އިރާދަކުރެއްވިއްޔާ މި 5 އަހަރުގެ ތެރޭގައި އެ މަނިކުފާނު އެކަން ތަންފީޒުކޮށްދެއްވާނެ.
ފާޠިމަތު މަދަދާ:
ރާއްޖޭގެ ޑިމޮކްރެޓިކް ނިޒާމަށް ބަލައިލާއިރުގައި، ހަރުދަނާކުރުމަށްޓަކައި އަދިވެސް ވަރަށް ގިނަ މަސައްކަތްތަކެއް ކުރަންޖެހޭކަން ފާހަގަވެގެންމިދަނީ. ރާއްޖެއަކީ ޑިމޮކްރަސީއަށް ފައްކާ ޤައުމެއްގެ ގޮތުގައި ސިފަކުރި ނަމަވެސް، ދެމެހެއްޓެނިވި ގޮތެއްގައި، ކުރިއަށް ގެންދިޔުމަށްޓަކައި ކުރަންޖެހޭ ކަންތައްތަކެއް އަންނަ މައިގަނޑު އެއް ސަބަބަކީ، 5 އަހަރުން 5 އަހަރުން ބަދަލުވަމުން މި އަންނަ ސިޔާސަތުތަކާއި، ވެރިކަމުގެ ގެންގުޅުންތަކާއި އެކުގައި. ދެން ވެރިކަން ބަދަލުވެގެން އެބަ އާދޭ، 5 އަހަރުގެ ކޮންމެ ދައުރަކާ އެކުގައި. އެގޮތުން ބަލާއިރުގައި ރާއްޖޭގެ ޑިމޮކްރެޓިކް މި ނިޒާމު ހަރުދަނާ ގޮތެއްގައި ދެމެހެއްޓުމަށްޓަކައި، މި ސަރުކާރުން އަޅާފައިވާ ފިޔަވަޅުތަކަކީ ކޮބައިތޯ؟
ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް:
ޑިމޮކްރަސީގެ އެންމެ ރީތި އެއް ސިފައަކީ، އެންމެ މުހިންމު އަސާސަސީ، ރައްޔިތުންނާ ގާތުން މަސައްކަތް ކުރުން ދޮގެއްތޯ؟
ރައީސުލްޖުމްހޫރިއްޔާ އެންމެ ފުރަތަމަވެސް ފެށްޓެވީ، އަދި ވަޢުދުވެސް ވެވަޑައިގެންނެވީ، ދިވެހިރާއްޖޭގެ ހުރިހާ ރަށަކަށް، ފުރަތަމަ ދެ އަހަރު ތެރޭގައި ވަޑައިގެން، ރައްޔިތުންގެ ޚިޔާލު ހޯއްދަވައިގެން، މަސައްކަތްޕުޅު ބައްޓަންކުރައްވާނެ ކަމަށް.
އެގޮތުން، އެ މަނިކުފާނު އެވަނީ އެ މަނިކުފާނުގެ ވަޢުދުފުޅު ފުއްދަވާފައި. ދިވެހި ރައްޔިތުންނާ އެންމެ ކައިރިން މަސައްކަތްޕުޅު ފެށްޓެވި، ރައްޔިތުން ބޭނުންވާ ގޮތަކަށް، އެ ރަށެއްގެ ރައްޔިތުންގެ ޚިޔާލާއި، މަޝްވަރާއާ އެކީގައި، އެ ރަށެއްގެ ތަރައްޤީ ބައްޓަން މިކުރަނީ. މާނައަކީ، އެ ރަށެއްގައި އޮވެދާނެއޭ، ބަނދަރު ހެދުމުގައި ދައުލަތުން، ނޫނީވިއްޔާ ސަރުކާރުން ކުރީގައި ޑިޒައިން ކުރި ތަފާތު ގޮތެއް. އެހެންނަމަވެސް، އެ ރަށެއްގެ ރައްޔިތުންނަށް، ޒަމާންތަކެއް ވަންދެން އެނގޭނެ ދޮގެއްތޯ، އެ ރަށުގެ އޮއިވަރާއި، މި ކަންކަން ހިނގަމުން އަންނަ ގޮތް. ރަށަށް ރާޅުއެރުމާއި، މި ކަންކަން ހުންނަ ގޮތް. އެހެންވީމާ، އެ ސަރވޭ ކުރުމުގެ ތެރޭގައި، ދެ ފަރާތާ ވާހަކަ ދައްކައިގެން، ރައްޔިތުންނަށް އެންމެ ރަނގަޅު ލުއި ޙައްލުތައް، ހޯއްދަވައިދެއްވަނީ.
މިސާލަކަށް، ސްކޫލް އިމާރާތެއް އެޅުމުގައިވެސް، އިތުރަށް ބޭނުންވެފައި ހުރި ކަންކަން، ނޫނީ އިތުރު ކްލާސްރޫމެއް ކަމުގައިވިޔަސް، ސްކޫލްގެ ބެލެނިވެރިންނާއި، ޓީޗަރުންނާއި، އަދި ރަށުގެ އެހެނިހެން އިސް ރަށްވެހިންގެ ފަރާތުން ޚިޔާލު ހޯއްދަވައިގެން، އެކަން ނިންމަވަމުން، ތަންފީޒު ކުރައްވަމުން އެގެންދަވަނީ. މިހާރު ފަށްޓަވާފައި ހުރީ ތަންފީޒީ ކަންކަން އިނގޭތޯ. މިހާރު އެގެންދަވަނީ، ރައްޔިތުންނާ އެކީ މަޝްވަރާ ކުރައްވަމުން، ޚިޔާލު ހޯއްދަވަމުން، ދުވަހުން ދުވަހަށް ކަންކަން ތަންފީޒު ކުރައްވަމުން. އެހެންކަމުން، ޑިމޮކްރަސީގެ އެންމެ މުހިންމު އެއް ސިފަ، އެ ތަންފީޒުކުރައްވަނީ.
ދެން، ޚިޔާލުފާޅުކުރުމުގެ މިނިވަންކަން. ޚިޔާލުފާޅުކުރުމުގެ މިއަށްވުރެ ރަނގަޅު ފުރުޞަތުތަކެއް ދިވެހި ރައްޔިތުންނަކަށް ނުލިބޭނެ. ރައީސުލްޖުމްހޫރިއްޔާގެ އަރިހަށް ވަޑައިގެން، ބޭނުންފުޅުވާ ވާހަކައެއް ދެއްކެވުމުގެ. އެ ވަގުތު ހަމަ އެ ބޭފުޅަކު އެ ބޭނުންވާ ވަރަށް، އެ ރައްޔިތަކު ބޭނުންވާ ވަރަކަށް އެ ފުރުޞަތު ހުޅުއްވައިދެއްވާފައި އޮތީ.
ދެން، އެމް.ޑީ.ޕީ. ވެރިކަމުގައި، ވަކި ތަންތަނަކަށް އެއްވެގެން ނޫނީ، ހުއްދަ ނަގައިގެން ނޫނީ، އަޅުގަނޑުމެންނަށް އެކަން ނުކުރެވޭނެ ޤާނޫނެއް އޮތް. އެހެންނަމަވެސް، މިހާރު އަޅުގަނޑުމެންގެ މި ވެރިކަމުގައި، އިރާދަކުރެއްވީތީވެ އެއްވެސް ހުއްދައަކާނުލައި އެއްވެވޭނެ، ޚިޔާލުފާޅުކުރެވޭނެ، ބޭނުންވަރަކަށް ތިބެވޭނެ. އެހެންނަމަވެސް، މިއިން ކޮންމެ ކަމެއްގައިވެސް އޮންނާނެ ނޫންތޯ ޙުދޫދެއް. މިންގަނޑުތަކެއް ކަނޑައެޅިފައި. އަޅުގަނޑުވެސް ވާހަކަ ދައްކާއިރު، މަދަދާގެވެސް އޮންނާނެއޭ ޙައްޤުތަކެއް. އެއީ، އަޅުގަނޑު ޔަޤީންކުރަންޖެހޭ އެއްޗެއް. އެއަށްފަހުގައި އަޅުގަނޑު ވާހަކަ ދައްކަންޖެހޭނީ. އެހެންނޫންނަމަ، އަޅުގަނޑަށް މި އަރައިގަނެވެނީ، އަނެކާގެ ޙައްޤުތަކަކަށް. އަނެކާގެ އަބުރަށް. އެހެންވީމާ، އަޅުގަނޑުމެން ރައްކާތެރި ނުކުރި ކަމެއް، ކާކުތޯ މާދަމާ ރައްކާތެރިކުރާނީ. މިއަދުގެ ވަލިއްޔުއްއަމްރުގެ ގޮތުގައި، އަޅުގަނޑުމެން، ލޮބުވެތި ދިވެހި ރައްޔިތުން އިޚްތިޔާރު ކުރެއްވީ، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުއެއް ނޫންތޯ؟ އެހެންވީމާ، އެ މަނިކުފާނު ޖެހިވަޑައިގަންނަވާނެ ނޫންތޯ، ދިވެހީންގެ ރައްކާތެރިކަން ކަށަވަރުކޮށްދެއްވަން ދިވެހީންނަށް. ބަޔަކު ކިތަންމެ ވާހަކައެއް، އެގޮތަށް ތަފާތު ގޮތްގޮތަށް ދެއްކިޔަސް، އެ މަނިކުފާނު މަސައްކަތްޕުޅު ކުރައްވާ ގޮތުގެ މިސާލު އަޅުގަނޑުމެންނަށް ފެންނަން މިއޮތީ. ޙަޤީޤަތުގައިވެސް، އޯގާތެރި ރައީސެއްގެ އެންމެ މާތް އެއް ސިފަ.
އެހެންވީމާ، އަޅުގަނޑުމެންގެ މި ރާއްޖޭގައި، އެ މަނިކުފާނު އެ ވިދާޅުވަނީ ތަކުރާރުކޮށް، ދިވެހި ރައްޔިތުންގެ ޙައްޤުތައް ކަށަވަރުކުރާހެން، ހުރިހާ މިނިވަން ކަމެއް، ހުރިހާ ވާހަކައެއް ދެއްކުމުގެ، ޚިޔާލުފާޅުކުރުމުގެ މިނިވަންކަން އޮންނާނެއޭ. މީޑީއާތަކުގައި އިރާދަކުރެއްވީތީ، އެކަން އެއޮތީ ފެންނަން. ކޮން ފިޔަވަޅެއްތޯ، ކާކާ ދޭތެރޭގައިތޯ އެޅުއްވީ؟ އެހެންވީމާ، އެ ފުރުޞަތު އެބައޮތް އިނގޭތޯ.
ފާޠިމަތު މަދަދާ:
ދެން، ނައިބު ރައީސްގެ ވާހަކަފުޅުގައި ހަމަ ވަރަށް ބޮޑަށް އަލިއަޅުވާލައްވައިފި، އަތޮޅުތެރޭގެ ރަށްތަކަށް މި ކުރައްވަމުން ގެންދަވާ ދަތުރުފުޅުތަކަށް. ދެން، ވާދަވެރި، ނޫނީވިއްޔާ ސަރުކާރުގެ މި ސިޔާސަތުތައް ކަމުނުދާ ބޭފުޅުން ދައްކަވާ ވާހަކަތަކަށް ބަލައިލާއިރުގައި، މިސާލަކަށް މި ވިދާޅުވަނީ، އައްޑޫ ސިޓީ އަކީ، ވަރަށް ބޮޑު ސިޓީއެކޭ. އެ ސިޓީއަށް އެ މަނިކުފާނު ވަޑައިގެން ނުވެއޭ ވިއްސަކަށް މިނިޓު. ކިހިނެއްތޯއޭ، ކޮން ރައްޔިތަކާތޯއޭ ބައްދަލުކުރާނީ؟ ރައްޔިތުންނާ ބައްދަލުކުރެއްވުމެއް ނޫނޭ، ކައުންސިލްތަކާއި، ކައުންސިލްތަކުގެ މެންބަރުންނާއި، ރައީސުންނާއި، ބައްދަލުކުރެއްވުމަކީ، ނޫނީ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ މެންބަރުންނާ ވާހަކަ ދެއްކުމަކީ.
ކިހިނެއްތޯ މިކަމާ ދޭތެރޭގައި ދެކެވަޑައިގަންނަވަނީ؟ ރައީސް އަތޮޅުތެރޭގެ ރަށްތަކަށް މި ކުރައްވާ ދަތުރުފުޅުތަކަކީ ރަނގަޅު ގޮތެއްގެ މަތިން ކުރައްވާ ދަތުރުފުޅުތަކެއްތޯ؟
ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް:
އަޅުގަނޑުމެން ރައީސުލްޖުމްހޫރިއްޔާ ކަނޑައެޅުމަށްފަހު، ބާރުތަކެއް މި ދިނީ. ރައްޔިތުން ބާރުތަކެއްވެސް ދެއްވާފައި މިއޮތީ. ރައްޔިތުން އެއްބާރުލުން މި ދެނީ، ރައްޔިތުންގެ މަންދޫބުން ގޮތުގައި، ރައްޔިތުންގެ މަޖިލީހަށް ހޮވާ މެންބަރުންތަކަށް. ކިހިނެއްތޯ ހުރިހާ ރައްޔިތުންނަށް، ރައްޔިތުންގެ މަޖިލިސް ތެރޭގައި، އެ ބޭފުޅަކު ބޭނުންވާ ޚިޔާލު ވަކިވަކިން ދެއްވޭނީ؟
އެހެންވީމާ، ނިޒާމެއް ކަނޑައެޅިފައޭ މިއޮތީ. އެ ނިޒާމަކަށް އަޅުގަނޑުމެން ޕްރެކްޓިސް މިކުރަނީ. އެހެންވީމާ، އެ ނިޒާމުގެ ތެރޭގައި، ރަށްރަށުގައި ކައުންސިލެއް އެކުވެލިފައި އެއީ، ރައްޔިތުންގެ އަޑުއުފުލުމަށްޓަކައި. ރައްޔިތުންގެ ޚިޔާލާއި، މަޝްވަރާ އެ ކައުންސިލުން ރައީސަށް އަރުވާނީ.
އެހެންވީމާ، މިސާލަކަށް ޑަބްލިޔޫ.ޑީ.ސީ.، އަންހެނުން ތަރައްޤީކުރާ، ކުރިއަރުވާ ކޮމިޓީން، އެ ޚިޔާލުތައް އެ ދެއްވަނީ، ރަށުގެ އަންހެން ބޭފުޅުންގެ ޚިޔާލާއި މަޝްވަރާއާ އެކީގައި، މަޝްވަރާތައް އެ ދެނީ. އެ ބޭފުޅުންގެ އަމިއްލަ މަޝްވަރާތަކެއް ނޫނޭ އިނގޭތޯ. އެހެންވީމާ، ދެކޮޅުޖެހޭ ވާހަކަ އަޅުގަނޑުމެން ދައްކަންޖެހޭނީ. އެ ނިޒާމުތައް ކަނޑައެޅުމުގައި، އެންމެ ވަރުގަދައަށް ޑިމޮކްރަސީ ރޫޙުގައި އެ ވާހަކަ ދައްކަވަން ފެށްޓެވީ އެ ބޭފުޅުން. އަޅުގަނޑުމެން ދޭންޖެހޭ ޝުކުރެއް، އެ ބޭފުޅުންނަށް އަދާކޮށްގެން މަސައްކަތް މިކުރަނީ.
އެހެންނަމަވެސް، ތިމާމެންނަށް މިހާރު ވެރިކަން ނުލީބުނީމާ، އަނެކުން ގޯސްކުރުމަށްޓަކައި އެކަހަލަ ވާހަކަ ދެއްކުމަކީ އެއީ، މުޖުތަމަޢު ބަލައިގަންނާނެ ކަމެއް ނޫނޭ. މި ޒަމާނީ، ތަހުޒީބީ މުޖުތަމަޢުގައި، އެއީ ދެކޮޅުނުޖެހޭ ވާހަކަތަކެއް އިނގޭތޯ.
އެހެންވީމާ، ނިޒާމުގެ ތެރެއިން މިހިރީ، ކަންތައްތަކެއް ކަނޑައެޅިފައި. ޑަބްލިޔޫ.ޑީ.ސީ.، ރަށްރަށުގެ ކައުންސިލް އިދާރާތައް، ރަށުގެ އިސް ރަށްވެހިން، މިހެންގޮސް، ޖަމުޢިއްޔާ، ޖަމާޢަތްތައްވެސް ހެދިފައި އެބަހުރި. މިސާލަކަށް، ޒުވާނުންނާ ގުޅޭގޮތުން ރަށްރަށުގެ ކުރިއެރުވުމަށްޓަކައިވެސް، ޒުވާނުންނާ ގުޅިގެން، ކައުންސިލްތަކުން އިސްވެގެން ބައެއް ޖަމުޢިއްޔާތައް އެބަ އުފެދޭ. އެހެންވީމާ، އެ ޖަމާޢަތަކުން، ނޫނީވިއްޔާ އެ ޖަމުޢިއްޔާއަކުން އައިސް، ސްޕޯޓްސް މިނިސްޓްރީގައި ބައެއް ކަންކަމަށް އެދިގެން މިދަނީ. ވަކިވަކި ފަރުދުން އައިސް އެހެން އެދޭ ކަންކަމުގައިވެސް، ހުންނާނެ އެޓެންޑް ވަމުންދާ ކަންކަން. އެހެންނަމަވެސް، މި ދެންނެވީ، މުޅި މުޖުތަމަޢު ތަމްސީލުކުރެވޭ ނިޒާމުގައި، ކައުންސިލްތަކާއި، ޑަބްލިޔޫ.ޑީ.ސީ.އާއި، ނޫނީ މިނިސްޓްރީތަކާއި، މިހެން ހުންނަ އިސް ތަންތަނޭ އެ ކަނޑައަޅާފައި މި ހުންނަނީ. އެހެންވީމާ، ނިޒާމަކަށޭ އަޅުގަނޑުމެން މަސައްކަތް މި ކުރަނީ.
ފާޠިމަތު މަދަދާ:
ދެން، ސަރުކާރުގެ މުހިންމު ނިންމެވުންތަކާ އެކުގައި، މަދަނީ ޖަމުޢިއްޔާތަކުގެ ކަންބޮޑުވުންތަކާއި، އެ ބޭފުޅުންގެ ޝުޢޫރުތައް، ހަމައެކަނި ކަންބޮޑުވުމެއް ނޫން، އެ ބޭފުޅުންގެ ޝުޢޫރުތައް ޖުމްލަގޮތެއްގައި އެބަ ޙިއްޞާކުރެވިގެންދޭ. ދެން، އެ އަޑު ސަރުކާރަށް އިވުމަކީ، ޙަޤީޤަތުގައި ވަރަށް މުހިންމު ކަމެއް. މަނިކުފާނުގެ ވާހަކައިގައިވެސް ތިޔަ ފާހަގަކުރެއްވި ފަދައިން، ކޮންމެ ރައްޔިތަކު އައިސް ވަކިވަކިންނެއް ނޫން ކަންކަން ދަންނަވާނީ. ހަމަ އެގޮތަށް، ޖަމުޢިއްޔާތަކެއް އުފެދިގެން އައިސްފައި މި ހުންނަނީ، އެކިއެކި ކަންކަމަށް ޚާއްޞަ ކުރެވިގެން. އެކަމާގުޅޭ ނިންމެވުމެއް ނިންމާއިރު، އަޅުގަނޑުމެންނަށް ފެނިގެން މިދަނީ ހަމަ އެ ޖަމުޢިއްޔާތަކުގެ އަޑު، ސަރުކާރަށް އިއްވުމަށްޓަކައި މަސައްކަތްތަކެއް ކުރަމުންދާ މަންޒަރު. ދެން، އެ އަޑު ރައީސުލްޖުމްހޫރިއްޔާއަށް، ސަރުކާރަށް އިވެމުންދާކަން އަޅުގަނޑުމެންނަށް ހަމަ ޔަޤީން. ސޯޝަލް މީޑިއާގެ އެކިއެކި ޕްލެޓްފޯމްތަކުންނާއި، މި ހުރިހާ ކަންކަމަކުން، ޚުދު ރައީސުލްޖުމްހޫރިއްޔާއަށް، މަނިކުފާނަށްވެސް އެ ކަންކަން ފާހަގަވާނެ.
މިއާ އެއްގޮތަށް ސަރުކާރުން ނިންމުންތައް ބައްޓަންކޮށް، ރައްޔިތުން އެ އެދޭ މަގުން ކަންކަން ކުރިއަށްގެންދިޔުމަށްޓަކައި، ކޮބައިތޯ ކުރެވިފައިވާ މަސައްކަތްތަކަކީ؟
ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް:
ވަރަށް ރީތި މިސާލެއް ނޫންތޯ، ރައީސް ރަށްރަށަށް ވަޑައިގެން ކައުންސިލްތަކާއި، ޑަބްލިޔޫ.ޑީ.ސީ.އާ މަޝްވަރާކުރައްވައި، އޭގެއިތުރަށް، މި ދެންނެވި ގޮތަށް، އެފަދަ ޖަމުޢިއްޔާއަކުން ރިކްއެސްޓެއް އައިސްފައި އޮތިއްޔާ، ވަގުތުން ހަމަ އެއަށް އިޖާބަދެއްވާ އިނގޭތޯ. ބައްދަލުކުރައްވާ، މި ދެންނެވި ގޮތަށް، ވަރަށް ފުރިހަމައަށް ވަގުތު ދެއްވައިގެން، އައްސަވައިގެން، އަދި އަރިހުގައި ތިއްބަވާ މިނިސްޓަރުންވެސް، އެ ކަންކަމާ ގުޅޭ މިނިސްޓަރުން ކުރެން އައްސަވައިގެން، އެ ދުވަހުން ދުވަހަށް އެކަމެއް ޙައްލުކޮށްދެވެން އޮތީވިއްޔާ، އެކަމަށްވެސް އިސްކަންދެއްވައިގެން މަސައްކަތްޕުޅު އެ ކުރައްވަނީ.
އަޅުގަނޑު މި ދެންނެވީ، ޑިމޮކްރަސީގެ ވަރަށް ރީތި ސިފައެކޭ އެއީ، ރައްޔިތުންނާ ކައިރިން މަސައްކަތް ކުރެއްވުން. އެހެންވީމާ، އިތުރަށް އަޅުގަނޑުމެން މީގައި ދައްކަންޖެހޭ ވާހަކަތަކެއް ނެތް.
ދެން، އަޅުގަނޑުމެންގެ މާލޭ ސިޓީއަށް ބަލައިލިކަމުގައި ވީނަމަވެސް، މުއައްސަސާތައް މިހިރީ މާލޭގައި. އަޅުގަނޑުމެން ސްޕޯޓްސް މިނިސްޓްރީ، ނޫނީ ޔޫތް މިނިސްޓްރީން، ހަމަ ކޮންމެ އިރަކުވެސް މިނިސްޓަރުންނަށް ދެއްވެން އޮތް ހުރިހާ ވަގުތުތަކެއް، ރައީސްގެ އިރުޝާދާ އެކީގައި ޖަމުޢިއްޔާތަކަށް އެ ގެންދަވަނީ ދެއްވަމުން.
އެހެންވީމާ، އެ ހުރިހާ ކަމެއް، ބިލެއް އެކުލަވައިލި ކަމުގައިވިޔަސް، މިސާލަކަށް، އެންމެ ބޮޑަށް އަޅުގަނޑު ފާހަގަކޮށްލަން ބޭނުން، ކުޅިވަރާ ބެހޭ ޤާނޫނެއް އެކުލަވައިލުމަށްޓަކައި، އެމް.ޑީ.ޕީ. ވެރިކަމުގައި އޮތް އާ ބިލެއް ހުށަހަޅާފައި. ދެ ފެކްޝަނެއްގެ ކޯޅުމާ ގުޅިގެން، އެ ބިލު އިޖުތިމާޢީ ކޮމިޓީގައި، އަޅުގަނޑުމެންގެ މި ވެރިކަން އައިއިރުގައިވެސް އޮތީ ތަޅުލެވިފައި. އެ ވާހަކަވެސް މިދިޔަ ބޮޑު ޖަލްސާގައި ތިޔަބޭފުޅުންނަށް އަޑުއިވިވަޑައިގެންނެވި. މުހިންމު ބިލުތަކެއް ހުރީ ތަޅުލެވިފައޭ. އެ ފާސްކުރާކަށް ނުކެރުނޭ. އެހެންނަމަވެސް، ރައީސުލްޖުމްހޫރިއްޔާ ވަޑައިގެން، މިފަދަ ކޮންމެ ބިލެއް، ޞިއްޙަތާ ގުޅުންހުރި ބިލެއްވެސް، ކުޅިވަރާ ބެހޭ ބިލެއްވެސް، ގެންނަވައި އެއޮތީ، މަޖިލީހުން ފާސްކުރައްވައި، ތަންފީޒުކުރައްވަންވެސް ފަށްޓަވާފައި. އެގޮތުން، އާންމު ދިވެހި ރައްޔިތުންނަށް މަންފާ ލިބޭ، ގިނަގުނަ ކަންކަން ފަށްޓަވާފައި މިވަނީ.
އެހެންވީމާ، އަދި ކުރިއަށް ތިން އަހަރު އެބައޮތް. އިރާދަކުރެއްވިއްޔާ، ފާގަތި ދުވަސްތަކެއް ކުރިއަށް އޮތީ އިނގޭތޯ.
ފާޠިމަތު މަދަދާ:
އާދެ، ދެން، 2025 ވަނަ އަހަރަށް ބަޖެޓު ފާސްކުރި ވާހަކަވެސް ނައިބު ރައީސްގެ ވާހަކައިގައި ފާހަގަކުރައްވައިފި. ސަރުކާރުން ބޭނުންވީ ކަންތައްތަކަށް ބޭނުންވާ ފައިސާ ހިމަނައިގެން، މަސައްކަތްތަކެއް ފެށިގެން އައި ވާހަކަ. އެގޮތުން، މި އަހަރުގެ ބަޖެޓު ޖުމްލަގޮތެއްގައި، ސަރުކާރުން ސިފަކުރީ، ރާއްޖޭގައި މިއޮތް އެންމެ ބޮޑު އެއް މައްސަލަތަކުގެ ތެރޭގައި ހިމެނޭ ބޯހިޔާވަހިކަމުގެ މައްސަލަތަކާއި، މިހެން ހުރި ގިނަ މައްސަލަތަކަކަށް ޙައްލު ލިބިގެންދާނެ ބަޖެޓެއްގެ ގޮތުގައި. މި އަހަރަށް ބަލައިލާއިރުގައި ގަބޫލުކުރެވޭތޯ، ބަޖެޓުން އަމާޒު ހިފި، ގިނަ ކަންތައްތަކެއް ހާސިލުކުރެވިފައިވާ ކަމަށް؟
ދެން، ވަރަށް ބޮޑު އުންމީދީ ބަޖެޓެއްގެ ގޮތުގައި ފާހަގަކުރެވިގެން މިދިޔައީ. ކިހިނެއްތޯ މަނިކުފާނު ދެކެވަޑައިގަންނަވަނީ؟
ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް:
މިދިޔަ އަހަރުގެ ބަޖެޓުތޯ؟ 2026 ވަނަ އަހަރު ތަންފީޒުކުރާނެ ބަޖެޓުގެ ވާހަކަ ދޮގެއްތޯ؟
ފާޠިމަތު މަދަދާ:
އާދެ!
ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް:
އާދެ، އަޅުގަނޑަށް ހީވަނީ، އެ ބަޖެޓުގައި ރައީސް އެންމެ ބޮޑަށް އިސްކަންދެއްވާފައި އެއޮތީ، ޞިއްޙީ ދާއިރާއަށްހެން އިނގޭތޯ. ވަށާޖެހޭ ނިޒާމެއްގެ ތެރެއިން، ރައްޔިތުންނަށް ޞިއްޙީ ފަރުވާ ފޯރުކޮށްދެއްވުމަށްޓަކައި، ދުޅަހެޔޮ ޞިއްޙަތެއް ޔަޤީންކޮށްދެއްވުމަށްޓަކައި، އަދި އަޅުގަނޑުމެންގެ ތެރޭގައި، ދާއިމީގޮތެއްގައި މި ފަރުވާ ހޯއްދަވަންޖެހޭ ފަރާތްތަކުގެވެސް ޖީބަށް ބުރަބޮޑު ނުވާނެގޮތަކަށް މި ނިޒާމު ކަށަވަރުކޮށްދެއްވުމަށްޓަކައި، އެ ބަޖެޓު އެކުލަވައިލެވިފައި އޮތީ.
އޭގެ ސަބަބަކީ، އެ މަނިކުފާނު މިދިޔަ ދެ އަހަރު ތެރޭގައި ރަށްތަކަށް ކުރެއްވި ޒިޔާރަތްތަކާއި، އަދި ކުރިންވެސް ކެމްޕެއިނުގައި ކުރެއްވި ޒިޔާރަތްތަކުގައި، ރައްޔިތުންގެ ހުރި އެންމެ ބޮޑު ޝަކުވާތައް އަޑުއައްސަވައި، އެ ރަށްރަށުގައި ޞިއްޙީ މަރުކަޒުތަކާއި، ހޮސްޕިޓަލްތައް ހުރި ހާލަތު އެ މަނިކުފާނަށް ވަރަށް ރަނގަޅަށް ވަޒަންކުރެއްވިފައިވުން.
އެހެންވީމާ، އެ ކަންކަމަށް ރިޢާޔަތްކުރައްވައި، އެ މަނިކުފާނު ބޭނުންފުޅުވީ، ބޮޑު ބަދަލެއް ގެންނަން. އެ ބަދަލަކީ ޙަޤީޤަތުގައި، ރައްޔިތުންނަށް ފައިދާހުރި ބަދަލެއް. މިސާލަކަށް، ގދ. ތިނަދޫ ހޮސްޕިޓަލް، އައްޑޫ ހޮސްޕިޓަލް، ކުޅުދުއްފުށީ ހޮސްޕިޓަލް، މިއީ މައިގަނޑު ބޮޑެތި ހޮސްޕިޓަލްތައް އަޅުގަނޑުމެން މި ފާހަގަކުރަމުން އަންނަ. ރާއްޖޭގެ އެކި ރަށްތަކުގައި، ސިޓީތަކުގައި ހުރި. މި ތަންތަން އައި.ޖީ.އެމް.އެޗް. ފެންވަރަށް، ނޫނީ އެއަށްވުރެ ރަނގަޅު ފެންވަރުގައި ގާއިމުކޮށް، އެކްސް-ރޭއާއި، އެމް.އާރު.އައި.އާއި، މިހެންގޮސް ބޮޑެތި މެޝިނަރީޒްއާ އެކީގައި ޚިދުމަތް ދެވޭނެ ތަންތަނަށް ހައްދަވާފައި، އަދި އޭގެއިތުރަށް، ސްޓާފުންނަށް ލިބެންޖެހޭ ޒަމާނީ ފެންވަރުގެ ޓްރޭނިންގ ލިބިފައި ފެންވަރު ރަނގަޅު ޑޮކްޓަރުންނާއި، އެކި ޚިދުމަތްތައް ދެއްވައި، އެކިއެކި ފަންނުގެ ޑޮކްޓަރުން މި ތަންތަނަށް ގެނެވޭނެ އިންތިޒާމުތައް ހަމަޖެއްސުމާއި، މިހެންގޮސް، މުޅި ނިޒާމު ވަށާޖެހޭއިރު އޮންނާނީ، ވަރަށް ހަރުދަނާ ސިޔާސީ ނިންމުންތަކެއް ނިންމިފައި، ތަންފީޒުކުރެވިފައި.
ރައީސްގެ އެންމެ ބޮޑު ނިންމެވުމަކީ، ދިވެހިން، ދިވެހިރާއްޖެއިން ބޭރަށްދާ ދިޔުން މަދުކުރެއްވުން މާނައަކީ، އެ ކަމަކާ ގުޅުންހުރި ފަރުވާ، ރާއްޖެއިން ލިބުމޭ. ޓެސްޓުތައް ރާއްޖެއިން ހެދުމޭ. ދިވެހިން އެންމެ ގިނައިން ބޭރަށްދާންޖެހޭނީ، މިފަދަ ކަންކަމާ ގުޅިގެން. އެހެންނަމަވެސް، ރާއްޖޭގެ ބައެއް ރަށްރަށުގައި، ލެބޯރެޓަރީން ޔޫރިން ޓެސްޓުވެސް ހަދައިނުލެވޭ. ލޭނަގަންވެސް ދާންމިޖެހެނީ، ދަތުރުފަތުރު ކޮށްފައި، ކަނޑުގަދަ ދުވަސްތަކުގައި މާބަނޑު މީހާވެސް ދާންޖެހެނީ، ސްކޭނެއް ހަދަންވިޔަސް، ޓެސްޓެއް ހަދަންވެސް އެތައް މޭލެއް ދުރަށް. އެހެންނަމަވެސް، މި ކަންކަން ހުއްޓުވުމަށްޓަކައި، އިރާދަކުރެއްވިއްޔާ ރައީސްގެ މަސައްކަތްޕުޅު، މިފަހަރުގެ ބަޖެޓުގައި ހިމަނާފައި އޮތީ. އެކަން އިރާދަކުރެއްވިއްޔާ، ތަންފީޒުކުރެވިގެންދާނެ ކުރިއަށް އޮތް ދެ މަސް ތެރޭގައި. އަޅުގަނޑު ގަބޫލުކުރަނީ، މި ކަންކަމަށް މަސައްކަތް ފެށިގެންދާތަން، ދިވެހި ރައްޔިތުންނަށް ފެނިގެންދާނެ ކަމަށް. މިއީ، ބޮޑެތި، ބޮޑެތި ބަދަލުތައް އިނގޭތޯ.
ފާޠިމަތު މަދަދާ:
ސަރުކާރުން މިހާ ހިސާބަށް އައިއިރުގައި ރާއްޖޭގެ ހާލަތު، އަދި ދައުލަތުގެ ހާލަތުވެސް ވަރަށް ބޮޑަށް ދެނެގަނެވިފައި ވާނީ. ކުރިއަށް، އާ އަހަރަކަށް އަޅުގަނޑުމެން ތައްޔާރުވަމުން ދާއިރުގައި، ހަމަ ޔަޤީން، ސަރުކާރުން ސަމާލުވެ ތިބޭނެ، މިހުންނަ އެކިއެކި ކަންކަމާ ގުޅޭގޮތުން.
އެގޮތަށް ފާހަގަކުރެވޭއިރުގައި، ކިހިނެއްތޯ ގަބޫލުކުރައްވަނީ، 2026 ވަނަ އަހަރު ސަރުކާރަށް ކުރިމަތިވެދާނެ ގޮންޖެހުންތަކާ ގުޅޭގޮތުން. އަދި ޚާއްޞަ ގޮތެއްގައި، އެ ގޮންޖެހުންތަކުން އަރައިގަނެ، ޤައުމު ކުރިއަށް ގެންދިޔުމަށްޓަކައި، އިޤްތިޞާދީ ގޮތުން ކަމަށް ވީނަމަވެސް، ޚާރިޖީ ސިޔާސަތުތަކުގެ ގޮތުން ބަލާއިރުގައިވެސް، ކޮބައިތޯ ސަރުކާރުން އަޅުއްވާނެ ފިޔަވަޅުތަކަކީ، މިހެން ހުރި ކަންތައްތަކުން ދުރާލާ ރައްކާތެރިވުމަށްޓަކައި؟
ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް:
އާދެ، ވަރަށް ގިނަ ބޭފުޅުން ދައްކަވާ ވާހަކައެއް ދޮގެއްތޯ؟ 2026 ވަނަ އަހަރަކީ މިއީ، އަޅުގަނޑުމެންގެ ސަރުކާރަށް ވަރަށް ބޮޑެތި ގޮންޖެހުންތަކެއް އޮންނާނެ އަހަރެކޭ؟
އެއީ އަޅުގަނޑުމެން މި ސަރުކާރުން ކޮށްފައި އޮތް ކަންތައްތަކެއްގެ ސަބަބަކުންނެއް ނޫން. އެއީ، މާ ކުރީގެ ވެރިކަންތަކުން އައިސް، މިހާ ހިސާބަށް އައިއިރު ހުރި ދަތިތަކެއްގެ ސަބަބުން، މި ވާހަކަ މި ދެކެވެނީ.
އެހެންނަމަވެސް، އަޅުގަނޑު ކުރިން ދެންނެވިހެން، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވެރިކަމާ ހަވާލުވެވަޑައިގެން، މި ހުރި ކޮންމެ ކަމެއް ވަރަށް ރަނގަޅަށް ދިރާސާ ކުރައްވައިގެން ފެށްޓެވީ. އެހެންކަމުން، މިހާ ހިސާބަށް އަންނައިރު، މި ކަންކަމާ ކުރިމަތިލާންޖެހޭނެ ކަން އެނގިވަޑައިގެން، އަޅުގަނޑުމެންގެ އަވަށްޓެރި ޤައުމުތަކާއި، އަޅުގަނޑުމެންނަށް އެހީތެރިވަމުން އަންނަ ޤައުމުތަކާ މަޝްވަރާކުރައްވައިގެން، ގާތް ގުޅުމެއް އުފެއްދެވި. ވަރަށް ރަނގަޅު ޚާރިޖީ ސިޔާސަތެއް ފެށްޓެވި. ދެކޮޅުޖެހޭ ނިޒާމެއްގެ ތެރެއިން މަސައްކަތްޕުޅު ފެށްޓެވި. އެކަން މިހާރު ފެންނާނެ. ދުނިޔޭގެ ވަރަށް ގިނަ ޤައުމުތަކުގައި އަޅުގަނޑުމެންގެ އެމްބަސީތަކާއި، އަޅުގަނޑުމެންގެ ކޮންސިއުލޭޓު ހުޅުވި، މިހެންގޮސް ގިނަ ކަންތައްތަކެއް ކުރެވި، ވަރަށް އެކުވެރި ގުޅުމެއް މިއޮތީ ބަދަހިވެފައި. އަދި އޭގެއިތުރުން، އަޅުގަނޑުމެން ހަމަ ބޮޑެތި ލޯނު ނަގާފައި ހުރި ޤައުމުތަކުންވެސް، އަޅުގަނޑުމެންނަށް ބޮޑެތި ލުއިތަކެއް އެބަ ދެއްވާ. އަދި، މި ސުކޫކުގެ ވާހަކަ، ދެން އެންމެ ބޮޑަށް މި ދެކެވެނީ 2026 ގައި. އެހެންނަމަވެސް، އިރާދަކުރެއްވީތީ، ސުކޫކުވެސް ދެއްކޭނެގޮތް އެއޮތީ، ނިޒާމުގެ ތެރެއިން ހަމަޖައްސަވާފައި.
ދެން، މީގައި އަޅުގަނޑުމެންނަށް ހާސްކަމެއް ނެތް އިނގޭތޯ. ވަރަށް ޔަޤީންކަމާއެކީގައި މި ދަންނަވަނީ، ދިވެހި ރައްޔިތަކު ނިކަމެތިވާނެ އެއްވެސް ކަމެއް، އެ މަނިކުފާނުގެ ވެރިކަމުގައި ނުވާނެ. ފުރަތަމަ އަހަރު ފެށި ވަގުތުކޮޅުގައި، ކަންކަމުގައި ކުޑަކޮށް ލަސްކަމެއް ފެނިގެންދިޔަ. އެހެންނަމަވެސް، ބާރު މިނުގައި ކަންކަން ހިނގައިގަތްތަން، އެ ހެޔޮނަތީޖާ މިހާރު މި ފެންނަނީ.
އިޤްތިޞާދީ ގޮތުން ހަރުދަނާ ފިޔަވަޅުތަކެއް އެޅުނީމައޭ މަސްވެރިންނަށް ފައިސާ ދެވެމުން މިދަނީ. ރާއްޖެއަށް އަންނަ ފަތުރުވެރިން އިތުރުވަމުން މިދަނީ. ރާއްޖޭގެ އެތެރޭގައި، ބޭރު ފައިސާ ހަރުލާފައި ހުރި ހުރުމޭ، ދިވެހީންނަށް ފަސޭހައިން ޑޮލަރު ލިބޭނެ އިންތިޒާމުތަކެއް ހަމަޖެހިގެން މިދަނީ. އުނދަގޫތަކެއް ހުންނާނެ. އެހެންނަމަވެސް، އަޅުގަނޑު މި ދަންނަވަނީ، އެއްދުވަހުން، ދެދުވަހުން ހާސިލުވާނެ ކަންކަމެއް ނޫނޭ. ކުރުމުއްދަތެއްގެ ތެރޭގައި، އެހެންނަމަވެސް ހެޔޮ ނަތީޖާ ފެނިގެންދާނެއޭ.
ފާޠިމަތު މަދަދާ:
ރާއްޖެއަށް ބަލާއިރުގައި، އަޅުގަނޑުމެންނަށް ފާހަގަވެގެން މިދަނީ، ޤައުމީ އުފެއްދުންތެރިކަން އަދިވެސް އިތުރުކުރަން ޖެހިފައިވާ ތަން. ދެން، ޤައުމީ އުފެއްދުންތެރިކަމަކީ، ޤައުމެއްގެ ކުރިއެރުން. އިތުރު ޤައުމުތަކަށް ބަރޯސާނުވެ، އަމިއްލަ ޤައުމުން ތިމާމެން ބޭނުންވާ ކަންކަން އެއީ، އާމްދަނީގެ ގޮތުން އާ، ފަހި ފުރުޞަތުތަކެއް ހޯދުމަށްޓަކައި ބެލެވޭ ކަންކަން.
ނަމަވެސް، ކޮބައިތޯ މި ސަރުކާރުން ޤައުމީ އުފެއްދުންތެރިކަން އިތުރު ކުރުމަށް، މިދިޔަ ދުވަސްތަކުގެ ތެރޭގައި، އަދި ކުރިއަށް އޮތް ތަނުގައިވެސް ކުރައްވާނެ މަސައްކަތްތަކަކީ؟ އެގޮތުން ބަލާއިރުގައި ގަބޫލުކުރައްވަންތޯ، ކުރިއެރުންތަކެއް ހޯދިފައިވާ ކަމަށް، މި ފާއިތުވެގެން މިދިޔަ ދުވަސްތަކާ އެކީގައި ބަލާއިރު؟
ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް:
އާދެ، އަޅުގަނޑުމެންގެ އިޤްތިޞާދު ހަމައެކަނި ބަރޯސާވެފައި މި އޮންނަނީ ޓޫރިޒަމަށް. އޭގެ ވަރަށް ނޭދެވޭ އަސަރުތަކެއް ކޯވިޑާ ގުޅިގެން އަޅުގަނޑުމެންގެ ދައުލަތަށް، ނޫނީވިއްޔާ ދިވެހި ރައްޔިތުންނަށްވެސް ކޮށްފައި މިއޮތީ. އެ ތަޖުރިބާގެ އަލީގައި، މުޅި ދުނިޔެވެސް އެ ކަންކަމަށް ލޯހުޅުވައިގެން، ކޮންމެ ޤައުމެއްގެ އިޤްތިޞާދުގައި، އެބަޔަކަށް ކުރެވެން އޮތް މަސައްކަތްތަކެއް އެބަ ކުރޭ. އަޅުގަނޑުމެންގެ ރައީސުލްޖުމްހޫރިއްޔާވެސް ސަރުކާރާ ހަވާލުވެވަޑައިގަތުމަށްފަހު، އެ މަސައްކަތްޕުޅުތައް ވަރަށް ބާރަށް އެބަ ކުރިއަށް ގެންދަވާ.
އެގޮތުން، އަޅުގަނޑުމެންގެ އެކިއެކި ފަންނުވެރިންވެސް، ރާއްޖޭގައި ކުރެވެން ހުރި މަސައްކަތްތައް ބަލައި، އެ ފުރުޞަތުތައް ހުޅުވައިލައިގެން، ވަރަށް ބޮޑަށް މަސައްކަތް އެބަ ކުރޭ، ޓޫރިޒަމަށް އެކަނި ބަރޯސާ ނުވުމަށްޓަކައި. މަސްވެރިކަމުގެ ސިނާއަތްވެސް އިތުރަށް ފުޅާކޮށްފައި. އެގްރިކަލްޗަރގެ މަސައްކަތްތައް ރަށްތަކުގައި ފުޅާކުރުމަށްޓަކައި، ލުއި ލޯނުތަކާއި، އަދި އެހެނިހެން ސްކީމްތައް ހުޅުވައިގެން، އަދި ސަރުކާރުން އެއްބާރުލުން ދީގެން، އެ ކަންކަން ރަށްރަށުގައި ބާރަށް ކުރިއަށް އެބަ ގެންދޭ. އަދިބޭރުގެ ޤައުމުތަކުގެ އެހީތެރިކަމާއެކީގައި، ފަންނުވެރިން ގެނެސްގެން، އެ ރަށްތަކުގައި އެކަމަށް ޝައުގުވެރިކަން ހުރި ފަރާތްތަކާ ގުޅިގެން، ވަރަށް ގިނަ ރަށްތަކުގައި އެ މަސައްކަތް ފެށިގެން މިދަނީ.
އޭގެއިތުރަށްވެސް، އަޅުގަނޑުމެންގެ ޤައުމަކީ، ތިމާވެށްޓާ ރަށްޓެހި، ތިމާވެށްޓަށް ލޯބިކުރާ، ރައްޔިތުން ދިރިއުޅޭ ތަނަކަށް ހެދުމަށްޓަކައި، އެ މަސައްކަތްވެސް ބާރަށް އެބަ ކުރިއަށް ގެންދޭ. މިފަދަ ކޮންމެ ފޯރަމެއްގައި، އިންޓަރނޭޝަނަލް ފޯރަމެއްގައިވެސް އަޅުގަނޑު މި ދައްކަނީ އެ ވާހަކަތައް. އަޅުގަނޑުމެން އިކޮނޮމީ ޑައިވަރސިފައި ކުރަމުންދާ ވާހަކަ. އެހެންވީމާ، އިތުރު ދިމަދިމާގައި ރައީސްގެ އިރުޝާދާ އެކީގައި، އަޅުގަނޑުމެންގެ ޤައުމުގައި ތިބި ފަންނުވެރިން މިކަމަށް މަސައްކަތް ކުރަމުންދަނީ.
އެ ނަތީޖާއަކީ، ފަސޭހައިން އަޅުގަނޑުމެންނަށް ފެންނާނެ ނަތީޖާއެއް ނޫން. އެހެންނަމަވެސް، އެ މަސައްކަތް ބާރަށް އެބަ ހިނގާ. އެހެންވެގެން ރައީސް އެ ބޭނުންފުޅުވަނީ، ތަޢުލީމީ، އަދި ޞިއްޙީ ގޮތުންނާއި، ހުރިހާ ގޮތަކުން ގާބިލު ޒުވާނުންތަކެއް، މުޖުތަމަޢުގައި އުފެދިގެން އައުމަށް. އޭރުން މި މަސައްކަތް ކުރެވޭނެ، ކޮންމެ ދާއިރާއެއްގައިވެސް، ކޮންމެ ހިސާބެއްގައިވެސް.
ފާޠިމަތު މަދަދާ:
އާދެ، ދެން، ބައިނަލްއަގުވާމީ ގޮތުން މިހުރި ފުރުޞަތުތަކާއި، އަދި ހޯދެން ހުރި ފުރުޞަތުތަކާ ގުޅޭގޮތުން ފާހަގަކުރެއްވި. އަޅުގަނޑުމެންނަށް ފެނޭ، ނައިބު ރައީސްވެސް ވަޑައިގެން، ބައިނަލްއަގުވާމީ އެކިއެކި ސެމިނަރތަކުގައި، ފޯރަމްތަކުގައި، ކޮންފަރެންސްތަކުގައި ބައިވެރިވެވަޑައިގަންނަވާ މަންޒަރު. މިގޮތައް ބަލާއިރުގައި، ކޮބައިތޯ މިދިޔަ ދުވަސްތަކުގެ ތެރޭގައި ކުރެވިފައިވާ ފާހަގަކުރެވޭ މަސައްކަތްތަކަކީ؟
ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް:
އާދެ، އިރާދަކުރެއްވީތީ ރައީސްވެސް ވަރަށް ގިނަ ފޯރަމްތަކުގައި ބައިވެރިވެވަޑައިގެންފި. އަޅުގަނޑުވެސް މިދަނީ ބައިވެރިވަމުން. އަދި އަޅުގަނޑުމެން ނޫނަސް، ސަރުކާރުގެ އެކިއެކި ބޭބޭފުޅުން، އިސްވެރިންވެސް ބައިވެރިވެވަޑައިގެންފައިވޭ. އެތައް ގިނަ ޤައުމުތަކެއްގެ، އަދި ޚާއްޞަގޮތެއްގައި އަޅުގަނޑުމެންގެ މި ކުދި ޤައުމުތަކުގެ ތިމާވެށްޓާއި، މި ނާޒުކު ޤައުމުތަކުގެ އިސްވެރިންނާ އެކީގައި، ނޫނީ އެ ފަރާތްތަކަށް ލިބިދޭނެ ލުއިތަކާއި، ހޯދޭނެ މަގުތައް ފަހިކޮށްދޭނެ ކަންތައްތަކާ ގުޅޭގޮތުން ބައިވެރިވެ، މަޝްވަރާ މި ކުރެވެނީ. އޭގެ ސަބަބުން، މުޅި ދުނިޔެއަށްވެސް، ޤައުމުތަކަށްވެސް ބޮޑެތި ބަދަލުތަކެއް އާދޭ. ލުއިތަކެއް ލިބިގެންދޭ.
ޚާއްޞަކޮށް، އަޅުގަނޑުމެން ފަދަ ކުދި ޤައުމުތަކާއި، މި ތިމާވެށްޓަށް ނުރައްކާވެފައި ހުރި ޤައުމުތަކަށް، ގޮންޖެހުންތަކެއް އެބަހުރި. އެހެންނަމަވެސް، މިކަމުން އަރައިގަތުމަށްޓަކައި، މަޝްވަރާތަކެއް ކުރެވެމުން މިދަނީ. އެ މަޝްވަރާތަކުގެ އަލީގައި، އިރާދަކުރެއްވިއްޔާ، ގިނަ ފައިދާތަކެއް، މަންފާތަކެއް މިފަދަ ކުދި ޤައުމުތަކަށް ލިބެމުން އެބަދޭ. އޭގެ ބޭނުމަކީ، އަޅުގަނޑުމެން މިކުރާ މަސައްކަތުގައި، އަޅުގަނޑުމެންނަށް އެހީތެރިކަން ހޯދައިދިނުން. އެހެންވީމާ، އިރާދަކުރެއްވިއްޔާ އެ މަގު ފަހިވެގެން އެބަދޭ.
ފާޠިމަތު މަދަދާ:
އާދެ، ވަރަށް ދިގުކޮށްވެސް ދެކެވިދާނެ ވާހަކަތަކެއް. އެހެންނަމަވެސް، އަޅުގަނޑަށް ލިބިފައިވާ ވަގުތުވެސް ހަމަވުމާ އެކުގައި، އެބައޮތްތޯ އިތުރަށް ފާހަގަކޮށްލައްވަން ބޭނުންފުޅުވާ ކަމެއް؟
ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް:
ތިޔަ ވިދާޅުވީ ދޮގެއްތޯ ވަރަށް ގިނަ ވާހަކަތައް އެބަހުއްޓޭ؟
އަޅުގަނޑު ފާހަގަކޮށްލަން ބޭނުން، ދިވެހި ރައްޔިތުންނަށް ދޭން ބޭނުންވާ ޔަޤީންކަމަކީ، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވެރިކަމާ ހަވާލުވެވަޑައިގަތީ، ދިވެހި ރައްޔިތުންނަށް ޚިދުމަތް ކުރެއްވުމަށޭ. އެ މަނިކުފާނު އެ ގެންދަވަނީ، ސިޔާސީ ގޮތުން ވަރަށް ރީތި މިސާލެއް ދައްކަވަމުންނޭ. އެ މަނިކުފާނާ ބެހޭގޮތުން، އެ މަނިކުފާނުގެ ޢާއިލާއާ ބެހޭގޮތުން، އެ މަނިކުފާނުގެ ސަރުކާރާ ބެހޭގޮތުން، ނޫނީ ޒާތީ ކަންކަމާ ބެހޭ ވާހަކަ އެބަ ދެކެވޭ. އެހެންނަމަވެސް، އެއިން އެއްވެސް ކަމަކަށް ސަމާލުކަމެއް ނުދެއްވާ، އެ މަނިކުފާނާ ހަވާލުކުރި ޒިންމާއާ އެކީގައި، ކުރިއަށް ވަޑައިގަންނަވަނީ.
އެއްވެސް ހިނދެއްގައި ރައްޔިތުންގެ މަތިން ހަނދުމަފުޅެއް ނައްތައެއްނުލައްވައި. ރައްޔިތުންނާ ގުޅުންހުރި، ރައްޔިތުންނަށް މަންފާކުރަނިވި ވާހަކަ ދައްކަވަނީ. އެ ބަޔަކަށް ރައްދުދީ، އެ މަނިކުފާނު ވަގުތު އެގޮތަށް ބޭކާރުކޮށެއްނުލައްވާ.
މި މިސާލު ފެނިވަޑައިގަންނަވާނެ، އެ މަނިކުފާނު އެންމެ ފުރަތަމަ މިނިސްޓަރަކަށް ހުންނެވި އިރުވެސް، މާލޭ ސިޓީގެ މޭޔަރަކަށް ހުންނެވި އިރުވެސް. މިއަދު ރައީސުލްޖުމްހޫރިއްޔާއަށް އެ ވެވަޑައިގަތީ. އެހެންވީމާ، ކަންކަން ތަންފީޒުކުރުމުގައި، ރައްޔިތުންނަށް ކަމެއް ފޯރުކޮށްދެއްވުމަށް އެންމެ ވަގުތެއްވެސް ހުސްނުކުރައްވާ، އެ ކަން ކުރައްވަނީ.
އަޅުގަނޑު ޔަޤީންކަން ދޭން ބޭނުން، ﷲ އިރާދަކުރެއްވިއްޔާ ކުރިއަށް އޮތް ދުވަސްތަކަކީ، ދިވެހީންނަށް ފާގަތި، ތިޔާގި ދުވަސްތަކެއް ކަމަށް ވާނޭ ކަމަށް.
ފާޠިމަތު މަދަދާ:
ވަރަށް ބޮޑަށް ޝުކުރިއްޔާ، އަޅުގަނޑުމެންނަށް ތިޔަ ދެއްވި މަޢުލޫމާތާއި، އަދި ވަގުތުކޮޅަށް.
އުންމީދުކުރަނީ، ހަމަ މުހިންމު މަޢުލޫމާތުތަކެއް ބެލުންތެރިންނަށް ލިބިގެން ހިނގައްޖެ ކަމަށް. ސަންގު ޓީވީގެ ކުރިއަށް ހުރި އެކިއެކި ވަގުތުތަކުގައިވެސް، ސަރުކާރަށް ދެ އަހަރު ފުރުމާ ގުޅިގެން، ސަރުކާރުގެ މަސައްކަތްތަކާއި، ސިޔާސަތުތަކާއި، ކުރެވިފައި ހުރި ކަންކަމާ ގުޅޭ މަޢުލޫމާތުތައް، އަޅުގަނޑުމެން ގެނެސްދެމުންދާނެ ވާހަކަ ފާހަގަކޮށްލަމުން، މިވަގުތަށް މި ކަވަރޭޖް މެދުކަނޑައިލާނަން.
އެންމެހައި ބެލުންތެރިނަށްވެސް ބާއްޖަވެރި، ރައްކާތެރި ދުވަހަކަށް އެދެން.
وَالسَّلَامُ عَلَيْكُمْ