ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ފުވައްމުލަކު ސިޓީގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅު

بِسْمِ ٱللّٰهِ ٱلرَّحْمٰنِ ٱلرَّحِيمِ‎

اَلْحَمْدُ للَّهِ رَبِّ الْعاَلَمِينْ، وَالصَّلاَة وَالسَّلاَمُ عَلَى رَسُولِ ٱللَّهِ، وَعَلَى آلهِ وَصَحْبِهِ أَجْمَعِينْ.

ފުވައްމުލަކު ސިޓީގެ ލޮބުވެތި އެންމެހައި ރައްޔިތުން، ސިޓީގެ މޭޔަރ، ސިޓީގެ 3 ދާއިރާގެ ޢިއްޒަތްތެރި މަޖިލިސް މެންބަރުން، ހުރިހާ ކައުންސިލަރުންނާއި، މުއައްސަސާތަކުގެ ވެރިން، ޚިދުމަތްތެރި އިސް ރަށްވެހިން، އަދި ވަޑައިގެން ތިއްބެވި އެންމެހައި ޢިއްޒަތްތެރިން، މި ޖަލްސާ، ދުރާއި ގާތުން ބައްލަވާ، އަޑުއައްސަވާ ލޮބުވެތި އެންމެހައި ރައްޔިތުން؛

السَّلامُ عَلَيْكُم ورَحْمَةُ اللهِ وَبَرَكاتُهُ.

އާދެ، މިއަދު ހަވީރު އަޅުގަނޑުމެންނަށް މި ސިޓީއަށް އާދެވުނު ވަގުތު، ލޮބުވެތި ހުރިހާ ރައްޔިތުން، ވިދާޅުވި ހޫނު މަރުޙަބާއަށްޓަކައި، އަޅުގަނޑުގެ ހިތުގެ އެންމެ ފުންމިނުން، ފުވައްމުލަކު ސިޓީގެ ލޮބުވެތި އެންމެހައި ރައްޔިތުންނަށް ފަށްފަށުން ޝުކުރު ދަންނަވަން.

މިއަދު އިރާދަކުރެއްވިއްޔާ މި ފެށެނީ، މި ސިޓީގެ ތަރައްޤީގެ ވަރަށް މުހިންމު ބާބެއްގެ މަސައްކަތް. އާދެ، މިއަދު މި އެއްލޭ ޞަފްޙާއަކީ، މި ސިޓީގެ ތަރައްޤީގައި އިރާދަކުރެއްވިއްޔާ އެންމެ މުހިންމު ޞަފްޙާއަށްވާނެ. އަޅުގަނޑު ރިޔާސީ އިންތިޚާބުގައި ތިޔަ ލޮބުވެތި ރައްޔިތުންނަށް އެކި ކަންކަމުގައި ވީ ވަޢުދުތައް ފުއްދުމުގެ ގޮތުން، މިއަދާ ހަމައަށް އައިއިރުގައި، ކުރެވިފައިވާ މަސައްކަތްތައް ޙަޤީޤަތަކަށް ހެދުމަށްޓަކައި، އެ ކަންކަމުގެ ނަތީޖާ ރައްޔިތުންނަށް ފޯރުކޮށްދިނުމަށްޓަކައި، މިއަދުގެ ދަތުރު މި ޚާއްޞަ ކުރެވިގެން މި ދަނީ.

އާދެ، ރައްޔިތުން ބޭނުންވެލައްވާފައިވާ މުހިންމު ކަންކަމުގައި، ޙަޤީޤީކުލަ ޖައްސައިދިނުމަކީ އަޅުގަނޑުގެ ޒިންމާ. އަދި އަޅުގަނޑުގެ މަސްއޫލިއްޔަތު. ސަރުކާރުގެ ޒިންމާ. ސަރުކާރުން ކުރަމުންދާ މަސައްކަތް. ރާއްޖޭގެ އިޤްތިޞާދީ ޙާލަތު އަޅުގަނޑުމެންނާ މީގެ ދެއަހަރެއްހާ ދުވަސްކުރިން ބައްދަލުކުރީ ވަރަށްވެސް ނާޒުކު ފައްތަރެއްގައި އޮވެ. ވަރަށްބޮޑު ދަރަންޏަކާ އެކުގައި. ވަރަށް ނުރައްކާތެރި ޙާލަތެއްގައި. ބަނގުރޫޓްވުމުގެ ޙާލަތުގައި، ކުރުކޮށް ދަންނަވަންޏާ. އެ ޙާލަތުން އިރާދަކުރެއްވިއްޔާ އަރައިގަނެ، ރައްޔިތުންނަށް ބޭނުންވާ ކަންކަން ފުއްދައިދިނުމުގެ މަސައްކަތްތައް ހަލުވި ދުވެލީގައި ފެށި، ރައްޔިތުންނަށްވީ ވަޢުދުތަކުގެ ޢަމަލީ މަސައްކަތް މި އަހަރުގެ ބަޖެޓާއެކު ފަށައިގެން މިއަދާ ހަމައަށް މި އާދެވުނީ.

މި އަހަރުގެ މިއަދާ ހަމައަށް އާދެވުނު އިރުގައި، މި ދެންނެވިފަދައިން ރާއްޖޭގެ އިޤްތިޞާދު ވަށައިޖެހޭ ތަރައްޤީއެއް ގެނެވޭނޭ ގޮތުގެމަތިން ބައްޓަންކުރެވި، ރައްޔިތުންނަށް މިގޮތަށް ވެފައިހުރި ގިނަ ވަޢުދުތަކެއް ފުއްދުމަށްޓަކައި ގިނަ މަސައްކަތްތަކެއް މިވަނީ ތަރުތީބު ކުރެވިފައި. އަހަރުގެ ކުރީކޮޅު އަޅުގަނޑު އިޢުލާނު ކުރި ފަދައިން، މި އަހަރާއި، އަދި މި އަންނަ އަހަރަކީ، މިގޮތަށް، ވީ ވަޢުދުތަކާއި ވެފައި ހުރި ވަޢުދުތަކުގެ މަސައްކަތްތައް ޢަމަލީގޮތުން ފެށިގެންދާ ދެ އަހަރު ކަމުގައޭ ވެގެންދާނީ. އެގޮތަށް މި ގެންދަނީ. އެގޮތަށް އެދަނީ. އަދި މި އަންނަ އަހަރުވެސް އޮތީ އެގޮތަށް.

މި އަހަރު މި ފެށޭ ގިނަ މަސައްކަތްތަކެއް، ސޮއިކުރެވިގެންދާ ގިނަ މަސައްކަތްތަކެއް، ހަލުވި ދުވެލީގައި، ބާރު މިނުގައި ކުރިއަށްދާނެ. އަދި އޭގެތެރެއިން ބައެއް މަސައްކަތްތަކަކީ، އެ މަސައްކަތުގެ ބާވަތުން ދާދިއަވަހަށް ނިމޭނެ މަސައްކަތްތައް. އަދި ބޮޑެތި ސްކޭލްގެ މަޝްރޫޢުތަކަކީ، އޭގެޒާތުގައި ވަގުތު ނަގައި، އެހެންނަމަވެސް، ވީ އެންމެ ބާރު ސްޕީޑެއްގައި ނިމޭނެ ކަންކަން. ހަމައެފަދައިން، މި އަންނަ އަހަރަށް ތަރުތީބު ކުރެވިފައިވާ މަސައްކަތްތައްވެސް ހުރީ އެފަދައިން. މިހާރު އެވަނީ ރައްޔިތުންގެ މަޖިލީހަށް ބަޖެޓު ހުށަހެޅިފައި. އެ ބަޖެޓުގެ ތެރޭގައި، އަލަށްފަށާ މަޝްރޫޢުތަކުގެ ތެރޭގައި، މި އަހަރު ރާއްޖޭގެ އެކި ކަންކޮޅުތަކުގައި، ފެށުމަށް ކަނޑައެޅިފައިވާ މަޝްރޫޢުތަކުގެ އިތުރުން، ދެން އަޅުގަނޑު ވެފައިހުރި ހުރިހާ ވަޢުދެއް ފުއްދުމަށްޓަކައި އެވަނީ ހިމެނިފައި.

އާދެ، މިއަދު އިރާދަކުރެއްވީތީ އެގޮތުން އަޅުގަނޑުމެން މި ދަތުރުގައި މި ފެށުނު މަސައްކަތްތަކާ ބެހޭގޮތުން އަޅުގަނޑު ކުޑަކޮށް އަލިއަޅުވާލާނަން. އާދެ، ކުނި މެނޭޖްކުރުމަކީ، ނޫނީވިއްޔާ ކުނީގެ މައްސަލައަކީ، ވަރަށް ބޮޑު މައްސަލައެއް. ޚާއްޞަކޮށް މި ސިޓީގައި. އެތައް އަހަރެއްވި، ނުގެންދެވިފައި ހުރި ލެގަސީ ވޭސްޓް، ކުނީގެ މައްސަލަ މި ސިޓީގައި ވަރަށްބޮޑު. އަދި އައްޑޫ ސިޓީގައި އަދި މި ހިސާބު ގަނޑުގައި، ދެކުނުގައި ވަރަށް ބޮޑު މައްސަލައެއް. އަދި ރާއްޖޭގެ ބައެއް އެހެން ސަރަޙައްދު ތަކުގައިވެސް އިންތިހާއަށް ބޮޑު މައްސަލައެއް. މިކަން މި ސަރަޙައްދަށް، ދެކުނުގެ ހަތަރު އަތޮޅަށް ޙައްލުކުރުމަށްޓަކައި، ސަރުކާރުން މިހާރުވާނީ، ގއ. ގައި މީހުން ދިރުނޫޅޭ ރަށެއް ވެމްކޯއާ ހަވާލުކޮށްފައި. އެތަނުގައި ދާއިމީ ވޭސްޓް މެނޭޖްމަންޓް މަރުކަޒެއް ހަދަން. ލެގަސީ ވޭސްޓް ގެންގޮސް މެނޭޖްކުރުމަށްޓަކައި. އެތަނަށް ބޭނުންވާ ބަޖެޓުގެ ކަންތައް ހަމަޖައްސައިދެވިފައިވަނީ. އީ.އައި.އޭ.ގެ މައްސަލަ މިހާރު ނުއެއްއުޅޭނެ. އެހެންވީމާ، އެތަނުގައި ހަދަންޖެހޭ ހާބަރާއި، ދެން ކުރަންޖެހޭ ހުރިހާ ކަމެއްގެ ޢަމަލީ މަސައްކަތް މިހާރު ފެށުމަށް އެވަނީ ތައްޔާރުވެފައި.

އެހެންވީމާ، އެތަން ހެދިގެން ދިޔައިމާ، މި ހިސާބުގައި މި ހިމެނޭ، އައްޑޫ ސިޓީ، ފުވައްމުލައް، ހުވަދު އަތޮޅުގެ ދެބުރީގައި މި ހުންނަ، ގިނަ ދުވަސްވީ ފުނިޖެހިފައި ހުރި ފުނިތައް، ކުނިފުނިތައް ގެންދެވޭނެ. ގެންދެވޭނެގޮތަށް، އަދި ވެހިކަލްސްތަކާއި، ލޭންޑިންގ ކުރާފްޓްތައް ހަމަޖައްސައިދެވި، އެ ހުރިހާކަމެއް ތަރުތީބުވެގެންދާ ގޮތަށް ބަޖެޓު ހަމަޖައްސައިދީފައި އެވަނީ. އެހެންވީމާ، އެއީ ދާދިއަވަހަށް، އެތަނަށް މި ކުނިގޮނޑު އެކީގައި ގެންދެވޭނެގޮތަށް ތަރުތީބުވެފައިވާ، މި ދެންނެވިގޮތަށް އޮތް ކަމެއް. އަދި އޭގެއިތުރަށް، ދާއިމީ މަރުކަޒެއް ވޭސްޓް މެނޭޖްމަންޓް ސެންޓަރެއް ހެދުމަށް މިއަދު އަޅުގަނޑުމެން މި މަސައްކަތް ފެށީ. އެހެންވީމާ، މިއީ މި ކުނީގެ މައްސަލައަށް އެޑްރެސްކުރާ ގޮތަކީ. އެހެންވީމާ، އެ މަޝްރޫޢު އަޅުގަނޑު މި ދެންނެވިފަދައިން، އެވަނީ ފެށިފައި. އެކަން އިރާދަކުރެއްވިއްޔާ ހަމަ ރަނގަޅަށް ކުރިއަށްދާނެ.

އާދެ، އޭގެއިތުރަށް މިއަދު އަޅުގަނޑުމެން މަސައްކަތް ފެށިން، މި އަތޮޅު ތަޢުލީމީ މަރުކަޒުގައި ފަސް ބުރީގެ އިމާރާތެއް އެޅުމުގެ މަސައްކަތް. އެ މަސައްކަތް ރަސްމީކޮށް ފެށިގެން އެދިޔައީ. ޢަމަލީ މަސައްކަތް ފެށިގެން ދިޔައީ. އެއީވެސް އިރާދަކުރެއްވިއްޔާ، ހަމަ ރަނގަޅަށް ހުރިހާ ކަމެއް ތަރުތީބުކުރެވިގެން ބާރަށް ކުރިއަށްދާނެ މަސައްކަތެއް. އޭގެ އިތުރަށް އަޅުގަނޑުމެން މި ތަނުގައި، ސޮއިކުރިން، ފުވައްމުލަކު ސްކޫލްގެ ކުލާސްރޫމްތަކާއި، ލެބް ހިމެނޭ އިމާރާތެއް އެޅުމަށްޓަކައި. އެ މަޝްރޫޢަކީވެސް މި ސިޓީގެ ތަޢުލީމީ ކުރިއެރުމަށްޓަކައި، ވަރަށް މުހިންމު މަޝްރޫޢެއް. އާދެ، މި 16 ކުލާސްރޫމާއި، ލެބްތައް ހިމެނޭ މި މަޝްރޫޢު ވެގެންދާނީ ހަމަ ޔަޤީނުންވެސް، މި ސްކޫލްގެ ތަރައްޤީއަށް އަދި މި ސިޓީގެ ތަރައްޤީއަށް، ތަޢުލީމީގޮތުން ވަރަށް މުހިންމު ދައުރެއް އަދާކުރާނެ މަޝްރޫޢަކަށް. އަދި މިއަދު މި ފެށި މަޝްރޫޢާ އެކީ ދެ މަޝްރޫޢުވެސް ވެގެންދާނީ އެފަދަ މަޝްރޫޢުތަކަށް.

އާދެ، އޭގެއިތުރަށްވެސް ތަޢުލީމީ ދާއިރާއިން މިހާރު ފެށިފައިވާ އެމް.އެން.ޔޫ.ގެ ކެމްޕަސްއާއި ދަނާލުގެ މަސައްކަތް ހަލުވި ސްޕީޑުގައި ގެންދިޔުމަށްޓަކައި، ކުރަންޖެހޭ ކަންކަން އެބަ ކުރިއަށްދޭ. އަދި ޓިވެޓް އިމާރާތެއް އެޅުމަށްޓަކައި، މިހާރު ޓެންޑަރިން މަރުޙަލާ އެދަނީ ނިމެމުން. އެހެންވީމާ، މި ދެންނެވި ތަޢުލީމީ ގޮތުން އެކި ކަންތައްތައް މި ސިޓީގެ ތަރައްޤީއަށްޓަކައި، އެވަނީ ތަރުތީބު ކުރެވިފައި.

ހަމައެއާއެކީގައި ޞިއްޙީ ދާއިރާއަށް ބަލާއިރު، އަޅުގަނޑު ވަޢުދުވިން ޓާރޝަރީ ހޮސްޕިޓަލެއް ޤާއިމުކުރާނެކަމަށް. ޓާރޝަރީ ހޮސްޕިޓަލް މި ޤާއިމުކުރަނީ ބޭރުގެ ފަންޑަކުން. ސައުދީ ފަންޑުގެ ފަންޑު ހަމަޖެހި، ކޮންފަރމް ވެފައިއޮތް މަޝްރޫޢެއް. އެކަމަށްޓަކައި ސައުދީ ފަންޑުގައި އޮންނަ ޕްރޮކިއުމަންޓް ޕްރޮސީޖަރގެ ތެރެއިން، ހަމަ އެއްވެސް މައްސަލައެއް ނެތި އެކަން އެބަ ހިނގާ. މިހާރު އެ އޮތީ ކޮންސަލްޓެންސީ ސްޓޭޖުގައި. ކޮންސަލްޓެންޓް ހޯދަން އިޢުލާންކޮށްފައި. ޑިސެންބަރު މަހަށް މުއްދަލު ހަމަވާއިރު ކޮންސަލްޓެންޓެއް ނެގި، ދެން އޭނާގެ މަސައްކަތް ކުރިއަށްގޮސް، އެ އޮންނަ ޕްރޮސީޖަރއިން ޑީޓެއިލް ޑިޒައިން، ކޮންޓްރެކްޓް އެވޯޑު ކުރުމާއި، ކަންކަން ހިނގާނެ. އާންމުކޮށް މި ކަހަލަ ބޭރުގެ ފަންޑުތަކަށް އަށެއްކަ މަސްދުވަސް ނަގާ، ޢަމަލީގޮތުން ބިން މަތީގައި އިމާރާތެއް ފެށެން.

އެހެންނަމަވެސް، ޔަޤީންކަމަކީ، އެއްވެސްކަހަލަ ފަންޑިންގ އިޝޫއެއް ނެތްކަން. ބަރާބަރަށް ހިނގަމުންދާ މަޝްރޫޢެކޭ. އެއީވެސް ހަމަޖެހިފައި އޮތް މަޝްރޫޢެއް. އެހެންވީމާ، މިހާރުން ފެށިގެން ބަލާނަމަ، މި އަންނަ އަހަރުގެ މެއި، ޖޫން ހިސާބުގައި އެންމެ ލަސްވެގެން އެއީ، އިމާރާތްކުރުމުގެ މަސައްކަތް، ޢަމަލީގޮތުން ފެށުމާ ހަމައަށްދާނެ ކަމެއް. އޭގެ ކުރިންވެސް ދިޔުމަކީ އެކަށީގެންވާ ކަމެއް. މެކްސިމަމް ނަގަނީ އާންމުކޮށް އަށެއްކަ މަސްދުވަސް، މިހާ ހިސާބުން ފެށިގެން.

އޭގެ ކުރިއަށް އަޅުގަނޑުމެން މިފަށަނީ ފެށެންހުރި ޚިދުމަތްތައް. ސީ.ޓީ.ގެ ޚިދުމަތް ރަސްމީކޮށް މިއަދު ފެށުނީ. މިހާރު ފެށިގެން 90 ވަރަކަށް ޕޭޝަންޓުންނަށް ޚިދުމަތް ދެވިފައިވޭ. މެމޮގްރަފީގެ ޚިދުމަތް ދިނުމަށްޓަކައި، އެވަނީ މިހާރު ތަކެތި ހަމަޖެހި، ޓްރެއިނިންގ މަސައްކަތް އެ ދަނީ. އެމް.އާރު.އައި. ޚިދުމަތް ދިނުމަށްޓަކައި، އަދި ޑީކޮމްޕްރެޝަން ޗެމްބަރެއް ޤާއިމުކުރުމަށްޓަކައި މި ސިޓީގައި، އަދި އަޅުގަނޑު ވަޢުދުތައްވީ ބައެއް އިތުރު ރަށްތައް ހުންނާނެ. މި ތަންތަނާ އެކުގައި، ބަލްކުކޮށް މި މެޝިނަރީ ގަތުމަށްޓަކައި ބަޔަކާ ހަވާލުކުރުމުގެ މަސައްކަތް އެބަ ހިނގާ. އޭގައިވެސް ފަންޑިންގ އިޝޫއެއް ނެތް. ފަންޑިންގެ އިޝޫ ނެތް މައްސަލައެއް އެވެސް. އެހެންވީމާ، ދާދި އަވަހަށް ޑީކޮމްޕްރެޝަން ޗެމްބަރު ބެހެއްޓުމާއި، އެމް.އާރު.އައި. ބެހެއްޓުމަށްޓަކައިވެސް އެބަ ހަވާލުކުރެވޭ. މެކްސިމަމް ތުރީ ވަރަކަށް މަންތްސް އެ ގެނައުމަށް ދާނީ. އެހެންވީމާ، އެއީވެސް މި ދެންނެވިހެން ހަމަ މާދުރުނޫން މުސްތަޤުބަލެއްގައި އަންނާނެ ކަންތައް. އެހެންނަމަވެސް، އިމާރާތުގައި އިތުރުކުރަންޖެހޭ ޖާގައެއް ބޭނުންވާނަމަ، ފަހަރެއްގައި އެމް.އާރު.އައި ޚިދުމަތް ދިނުމުގައި، ނޫނީވިއްޔާ ޑީކޯ ޗެމްބަރަށް ޖާގަ އިތުރުކުރަން ޖެހިދާނެ. އެހެންނަމަވެސް، އަޅުގަނޑަށް އަންދާޒާ ކުރެވެނީ، ކުރިއަށް އޮތް ތިން ހަތަރު މަހެއްގެ ތެރޭގައި، އެއީވެސް ނިންމޭނެ ކަންކަމޭ.

އެހެންވީމާ، ފުލް ޓަރޝަރީ ބިލްޑިންގއެއް، ހޮސްޕިޓަލެއް އިމާރާތް ކުރުމަށްޓަކައި ސައުދީ ފަންޑުގެ ތެރެއިން، ހަމަޖެހިގެން ޢަމަލީ މަސައްކަތަށް ދިޔުމުގެ ކުރިންވެސް އެމް.އާރު.އައި. ޤާއިމުކުރުން، ޑީކޯ ޗެމްބަރު ޤާއިމުކުރުން، މެމޯގްރަފީ ޚިދުމަތް، އަދިވެސް އިތުރު ކަންކަން އަޅުގަނޑުމެން ގެނައުމަށްޓަކައި، އިމާރާތުން ޖާގަލިބޭ އެންމެ ފުޅާމިނެއްގައި ކުރުމަށް ހުރި ކަންކަން މިވަނީ ހަމަޖެހިފައި. އިރާދަކުރެއްވިއްޔާ، އަޅުގަނޑު ވަޢުދުވެފައި އޮތް ގޮތަށް، ހަމަ އެންމެ މަތީ ފެންވަރުގެ ޞިއްޙީ ޚިދުމަތްތައް ލިބޭ ހޮސްޕިޓަލަކަށް މި ސިޓީގެ ހޮސްޕިޓަލް ވެގެންދާނެ. އެ ޔަޤީންކަން އަރުވަން.

އާދެ، ޞިއްޙީ ދާއިރާއާއި، ތަޢުލީމީ ދާއިރާއަށް ފަހު، އަޅުގަނޑު ބޯހިޔާވަހިކަމުގެ ވާހަކަ ފަހަގަކޮށްލާނަން. އާދެ، އަޅުގަނޑުމެންނާ ހަވާލުވިއިރުގައިވެސް ސޮއިކުރެވިފައި އޮތް 400 ޔުނިޓެއްގެ މަސައްކަތް، މި ދިޔައީ ދެ އަހަރެއްހާ ދުވަސް، އެކި މައްސަލަތަކުގެ ތެރޭގައި، އެ މަސައްކަތް ނުފެށި. ކުރުކޮށްލާފައި ދަންނަވަންޏާ މައްސަލަތައް ޙައްލުވެއްޖެ. އެހެންވީމާ، މިއަދު ޢަމަލީގޮތުން މަސައްކަތް މި ފެށުނީ. ދެން އޭގެ ތަފްސީލަށް އަޅުގަނޑު ހަމަ ނުދިޔައީ ގަސްތުގައި. އޭގައި ޕޭމަންޓު އަދި އިތުރު އެކި މައްސަލަތައް، އިޝޫތައް ހުރި. އެހެންނަމަވެސް އެކަން ޙައްލުކުރެވި އިރާދަކުރެއްވީތީ މިހާރު އެއޮތީ ފެށިފައި.

އޭގެއިތުރަށް އަޅުގަނޑުމެން މި ސޮއިކުރީ، 75 ޔުނިޓެއްގެ މަސައްކަތް. އަޅުގަނޑު ރިޔާސީ އިންތިޚާބުގައި ވަޢުދުވިން 500 ހައުސިންގ ޔުނިޓު އިތުރަށް އަޅައިދޭނެ ކަމަށް. އެހެންވީމާ، އޭގެތެރެއިން 75 ޔުނިޓު ކޮންޓްރެކްޓް ފައިނޭންސް އުސޫލުން ފައިނޭންސް ހަމަޖެހި، ހުރިހާ ޕްރޮސީޖަރއެއް ފުރިހަމަ ކުރެވި، ހަމަ ހުރިހާ ފޯމުލެޓީޒްތައް ނިންމައިގެން މިއަދު މި ސޮއިކުރީ. އެހެންވީމާ، އެއީ 500 ހައުސިންގ ޔުނިޓުގެ ވަޢުދުގެ ތެރެއިން އެޅިގެންދާ 75 ޔުނިޓެއް.

އޭގެއިތުރަށް ހަމަ އިރާދަކުރެއްވިއްޔާ، އަޅުގަނޑުމެން މި އަންނަ އަހަރަށް އަދި ޖެހިގެން އަންނަ އަހަރަށް ބަހާލައިގެން އިރާދަކުރެއްވިއްޔާ، އަޅުގަނޑު ވަޢުދުވީ އަދަދު ފުރިހަމަ ކުރުމަށްޓަކައި އިތުރު މަޝްރޫޢުތައް ކުރިއަށް ގެންދާނަން. ހަމަ ޔަޤީނުންވެސް ބޯހިޔާވަހި ކަމަކީ، މި ސިޓީއަށް އެންމެ ބޮޑު، އެންމެ ގިނަ ރައްޔިތުން އެކަމަށްޓަކައި އެދެމުންދާ އެންމެ ބޮޑު އެއް މައްސަލަކަން ޔަޤީން. އެހެންވީމާ، މި ފެށިގެން މިދިޔަ 400 ހައުސިންގ ޔުނިޓާއި، ސޮއިކުރެވިގެންދިޔަ 75 ޔުނިޓާއި، އަދި ކުރިޔަށް އޮތް ދެ އަހަރަށް ބަހާލައިގެން އަޅުގަނޑުމެން އިތުރަށް އަޅާނެ 325ހެއްހާ ޔުނިޓު ވެގެންދާނީ، ގާތްގަނޑަކަށް 900 ހައުސިންގ ޔުނިޓު މި ދައުރުގެ ތެރޭގައި އިރާދަކުރެއްވިއްޔާ ނިމި، ތިޔަބޭފުޅުންނަށް އޭގެ ފައިދާކުރާނެ މަޝްރޫޢުތަކަކަށްކަން އަޅުގަނޑަށް ހަމަ ޔަޤީން.

އާދެ، އޭގެއިތުރަށްވެސް އަޅުގަނޑުމެން މިއަދު ވަރަށް ގިނަ ވަޢުދުތައް ފުއްދުމަށްޓަކައި، އެގްރިމެންޓްތަކުގައި މިވަނީ ސޮއިކޮށްފައި. އާދެ، އަޅުގަނޑުމެން މިއަދު މި ސޮއިކުރި މަޝްރޫޢުތަކުގެ ތެރޭގައި، އޮފީސް ކޮމްޕްލެކްސް މަޝްރޫޢު ހަމަ ޔަޤީނުންވެސް ވެގެންދާނީ، މި ސިޓީގައި ވަޒީފާ އަދާކުރާ ފަރާތްތަކަށް، އަދި ވަޒީފާއަށް ނުކުންނަން ތިބި ފަރާތްތަކަށް ވަރަށް މުހިންމު މަޝްރޫޢަކަށް. އެކި ތަންތަނުގައި އެކި އޮފީސްތަކުގައި ޚިދުމަތްތައް ދިނުމުގެ ބަދަލުގައި، ޒަމާނީ ބޮޑު އޮފީސް ކޮމްޕްލެކްސްއެއްގެ ތެރޭގައި، އެ ޚިދުމަތްތައް ދިނުމަކީ ރައްޔިތުން އެދިވަޑައިގެންނެވި ގޮތް. އަޅުގަނޑު ވަޢުދުވީ އެހެންވެގެން އެގޮތަށް އެ ކަން ކުރަން. އެގޮތުގެ މަތިން، މިއަދު މި ފެށިގެންދާ، ސޮއިކުރެވިގެންދިޔަ މަޝްރޫޢުގެ ތެރެއިން، އިރާދަކުރެއްވިއްޔާ އެ ޙަޤީޤަތް ތިޔަބޭފުޅުންނަށް ހާސިލުވެގެން ދާނެ.

ހަމައެއާއެކީގައި، ބަނދަރުގެ މަޝްރޫޢަށް ބަލާއިރުގައި މިއީ، ވަރަށް ދަތިވެފައި އޮތް މައްސަލައެއް. މިހާރު އޮތް ބަނދަރާ ގުޅުވާލެވިގެން އިތުރު އާ ބަނދަރެއް ހެދިގެން މި ދަނީ. މިއީ ސައިންޓިފިކަލީ ދިރާސާކުރެވި، ކަމާބެހޭ ކޮންސަލްޓެންޓް އެތައް ވަގުތެއް ހޭދަކޮށްގެން، މި ސިޓީގައި މަސައްކަތްކޮށްގެން، ފައިނަލައިޒް ކޮށްފައި އޮތް ލޮކޭޝަންގައި، ކޮންސެޕްޓުގައި، ޑިޒައިންގައި، ހެދިގެންދާ ބަނދަރެއް. އޭގެވެސް ހުރިހާ ފައިނޭންޝަލް ކަންކަން ހަމަޖެހިފައިވަނީ. ބަޖެޓުގެ އިޝޫއެއް ނެތް، ހުރިހާ ކަމެއް ހަމަޖެހިގެން ސޮއިކުރެވިގެންދިޔަ މަޝްރޫޢެއް.

އެހެންވީމާ، ''ހެވީ ފޯސް'' އަކީ ވަރަށް ފެންވަރު ރަނގަޅުކޮށް، މިފަދަ މަސައްކަތް މީގެ ކުރިންވެސް ރާއްޖޭގެ ގިނަ ރަށްރަށުގައި ކޮށްފައިވާ ކުންފުންޏެއް. މި ރަށުގައި މި ހަދަންޖެހޭ ފެންވަރުގެ ބަނދަރެއް، އެބޭފުޅުންނަށް ހެދޭނެކަން މިއީ ޝައްކެއްއޮތް ކަމެއްނޫން. އެހެންވީމާ، މިއަދު މި ސޮއިކުރެވިގެންދިޔަ ބަނދަރުގެ މަޝްރޫޢު ވެގެންދާނީ، ހަމަޔަޤީނުންވެސް، ބަނދަރުގެ ދަތިކަމަށް، ވަރަށް ބޮޑު ފުރިހަމަ ޙައްލެއް އިރާދަކުރެއްވިއްޔާ އަންނާނެ ކަމަކަށް. އެހެންވީމާ، އެއީ އަޅުގަނޑު ހިތުން މި ސިޓީގެ ރައްޔިތުން ވަރަށް ބޮޑަށް އެދިވަޑައިގަންނަވަމުން އައި ކަމެއް ޙަޤީޤަތަކަށް ވެގެންދަނީ.

އާދެ، އޭގެ އިތުރަށްވެސް އަޅުގަނޑުމެން ވަރަށް ގިނަ މަޝްރޫޢުތަކުގައި މިއަދު މި ސޮއިކުރީ، ކޮންމެ ކަމަކަށްވެސް ސޮއި މިކުރަނީ، ހަމަ ހުރިހާ ކަމެއްގައިވެސް، އެންމެ މުހިންމު ކަމަކަށް، ބޭނުންވާ ފަންޑިންގ، ހަމަޖެހިގެން. ބަޖެޓުގެ ތެރެއިން، އަދި އެހެނިހެން ތަރުތީބުތަކުގެ ތެރެއިން ހަމަޖެހިގެން. އިޖުރާޢަތްތައް ފުރިހަމަ ކުރެވިގެން. އެހެންވީމާ، އެއްވެސް މަޑުޖެހުމެއްނެތި ކުރިއަށްދާނެ ކަންކަން.

މިސާލަކަށް ދަންނަވަންޏާ، މި ސިޓީއަކީ، ދީނީ ރޮނގުން ވަރަށް ގިނަ ޚިދުމަތްތަކެއް ކޮށްފައިވާ، އަދި ކުރަމުންދާ ރައްޔިތެއް އުޅޭ ސިޓީއެއް. އެކިއެކި ދާއިރާތަކުން، ޤުރްއާން ކިޔެވުމާއި އެކި ދާއިރާތަކުން، ވަރަށް ފާހަގަކުރެވޭ ސިޓީއަކަށްވާއިރު، ޒަމާނީ ފެންވަރުގެ އިސްލާމީ މަރުކަޒެއް ޤާއިމުކުރުމަކީ، ރައްޔިތުންގެ އުންމީދު. އެކަން ޙަޤީޤަތަކަށް ހެދުމަށްޓަކައި، މި ހަވާލުކުރެވުނު މަޝްރޫޢަކީ، މި ދެންނެވިގޮތަށް ކުރިއަށްދާނެ ހަމަ ވަރަށް ހަލުވި ދުވެލީގައި، ބާރު ސްޕީޑުގައި ކުރިއަށްދާނެ މަޝްރޫޢެއް. އިރާދަކުރެއްވިއްޔާ ވަރަށް ކާމިޔާބު މަޝްރޫޢަކަށް މި މަޝްރޫޢު ވެގެންދާނެ.

ހަމައެއާއެކީގައި، ޓޫރިޒަމްގެ ދާއިރާއިން މި ސިޓީ ވަރަށްބޮޑަށް އެބަ ކުރިއަރާ. ޑައިވިންގައި، ދުނިޔޭގެ ފެންވަރުގައި، އެންމެ ރަނގަޅު ޓޫރިޒަމް ހިނގާ ސިޓީއަކަށް މި ސިޓީގެ ރައްޔިތުން މި ސިޓީ މިހާރުވަނީ ހަދާފައި. އެކަމަށް ފުރިހަމަ އެއްބާރުލުން ދިނުމަށްޓަކައި، ސަރުކާރުން އެކަން ކުރުމަށް، އަޅުގަނޑުވީ ވަޢުދު ފުއްދުމަށްޓަކައި މިއަދު އެމް.އޭ.ސީ.އެލް.އާ އެކީގައި، މި ސޮއިކުރެވުނު އެއްބަސްވުމުގެ މަޝްރޫޢަކީ، ވަރަށް ކާމިޔާބުކަމާ އެކީގައި އެ ކުންފުނިން ފުރިހަމަކުރާނެ މަޝްރޫޢެއް. އާދެ، އިކޯ ޓޫރިޒަމްގެ މަޝްރޫޢަކާއި، އިކޯ ޓޫރިޒަމް އޭގެ ތެރެއިން ފުރިހަމަވެގެންދާ މަޝްރޫޢަކާއެކު، ސިޓީ ހޮޓަލެއް ޤާއިމުކުރުމަށްޓަކައި، އެމް.އޭ.ސީ.އެލް.އާ އެކީގައި އެއްބަސްވެވުނީ، ރައްޔިތުންނަށް ސީދާ އެއިން ނަފާ ލިބޭނެގޮތް ހަމަޖެހިގެންދާގޮތަށް.
އަޅުގަނޑުމެން ރަށްރަށުގައި މިފަދަ ލޯކަލް ޓޫރިޒަމް މަޝްރޫޢުތައް އެމް.އޭ.ސީ.އެލް.އާ ހަވާލު މި ކުރަނީ، އެ ރަށެއްގެ ރައްޔިތުންނަށް އޭގެން ފައިދާވާނެގޮތަށް، މަންފާ އާމްދަނީގެ ގޮތުން ލިބޭނެގޮތް ހަމަޖެހިގެންދާގޮތަށް. އެހެންވީމާ، ރަށުގެ ކައުންސިލްގެ ނޫނީ ސިޓީ ކައުންސިލްގެ ލޯކަލް އޮތޯރިޓީ ކޮމްޕެނީއަށް އޭގެ ހިއްސާ ލިބޭގޮތަށް، ރައްޔިތުންނަށް އޭގެން ފައިދާ ސީދާ ލިބޭނެގޮތް އެމް.އޭ.ސީ.އެލުން މި ސިޓީގައި މި އިމާރާތް ކުރެވިގެންދާ ބިން އޭގެ ހިއްސާގެ ގޮތުގައި ހިމެނޭ ފޯމިއުލާއެއްގެ ތެރެއިން، ކައުންސިލާއި، އެމް.އޭ.ސީ.އެލް.އާ ވަކި އެއްބަސްވުމެއް ހަދާނެ. ހަދައިގެން ރަށުގެ ރައްޔިތުންނަށް އެ ސިޓީ ހޮޓެލް އަދި އީކޯ ޓޫރިޒަމް އިންވެސްޓްމެންޓްގެ ތެރެއިން، ރައްޔިތުންނަށް ދާއިމީ ގޮތެއްގައި އާމްދަނީގެ ގޮތުން، އަދި ވަޒީފާގެ ގޮތުން، އަދި ޓޫރިޒަމް ސީދާ ފުޅާކުރުމުގެ ގޮތުން، ސީދާ އަދި ނުސީދާ ފައިދާވާނެ ވަރަށް ކާމިޔާބު މަޝްރޫޢަކަށް އިރާދަކުރެއްވިއްޔާ މި މަޝްރޫޢު ވެގެންދާނެކަމުގެ ޔަޤީންކަން ތިޔަބޭފުޅުންނަށް އަޅުގަނޑު އަރުވަން.

ހަމައެއާއެކީގައި، ކުޅިވަރުގެ ދާއިރާއިން އަޅުގަނޑުމެން މިއަދު މި ސޮއިކުރި ސްޕޯޓްސް ކޮމްޕްލެކްސްގެ މަޝްރޫޢަކީވެސް، މި ސިޓީގެ ކުރިއެރުމަށްޓަކައި، ކުޅިވަރުގެ ދާއިރާއިން ވަރަށް މުހިންމު މަޝްރޫޢެއް. އާދެ، އިންޑޯ ހުރިހާ ކުޅިވަރެއް، ޒަމާނީ ފެންވަރުގެ ކުޅިވަރުތައް ކުޅެވޭ، 1200 މީހުންގެ ސްޕެކްޓޭޓަރ ކެޕޭސިޓީ ހިމެނޭ، ފުރިހަމަ، ޒަމާނީ ސްޕޯޓްސް ކޮމްޕްލެކްސެއް އެޅުމަށްޓަކައި އަޅުގަނޑުމެން ހަވާލު މިކުރީ. އެހެންވީމާ، އެ މަޝްރޫޢުގެ ތެރެއިންވެސް، އިރާދަކުރެއްވިއްޔާ މި ސިޓީއަށް ވަރަށް ބޮޑު ކުރިއެރުމެއް އަންނާނެ.

ޒުވާނުންނަށް ބޭނުންވާ އެކިކަހަލަ ފުރުޞަތުތައް ހޯދައިދިނުމަށްޓަކައި، ތަރޑް ސްޕޭސް ކޮންސެޕްޓްގެ ދަށުން، ދެވަނަ މަޝްރޫޢުގައި މި ސިޓީގައި މި ސޮއިކުރީ. ފުރަތަމަ މަޝްރޫޢު މާލޭގައި ނިމެމުން އެދަނީ. ދެވަނައަށް ސޮއިކުރެވިގެން މިދިޔައީ މި ސިޓީގައި. އާދެ، އިތުރު ބައެއް ސިޓީތަކުގައި، ބައެއް ރަށްރަށުގައި ސޮއިކުރުން އެބައޮތް ކުރިއަށް. އެހެންވީމާ، މީގެތެރެއިން ބިނާކުރުވަނިވި ކަންކަމުގައި ވަގުތު ހޭދަކުރުމުގެ ހުރިހާ ފެސިލިޓީއެއް ޒުވާނުންނަށް ހަމަޖެހިގެންދާ، ޒަމާނީ ބިނާއެއް މީގެތެރެއިން ކުރެވިގެންދާނެ. އެކަމަށްވެސް ފަންޑިންގގެ ހުރިހާ ކަމެއް ހަމަޖެހި، ހުރިހާ އިޖުރާތްތަކެއް ފުރިހަމަކުރެވިގެން، ހަވާލުކުރެވިގެންދިޔަ މަޝްރޫޢެއް އެއީ.

މަގުހެދުމަކީ މިހާރު ފެށިފައި އޮތް މަސައްކަތެއް. ކުޑަކޮށް ލަސްކޮށް ދިޔަނަމަވެސް، އެއާ ބެހޭ ހުރިހާ ކަންތައްތަކެއް، ޚާއްޞަކޮށް ފައިސާއާ ގުޅޭ ކަންކަން، މިހާރު އެވަނީ ހަމަޖެހިފައި. ދެވަނަ ފިޔަވަހީގެ މަސައްކަވެސް ބާރު ސްޕްޑީގައި ހިނގަމުންދާނެ. ހަމައެއާއެކީގައި، މިހާރު މި ހަވާލުކުރެވުނީ، ދެންހުރި ހުރިހާ މަގެއް އޭގައި ހިމެނިފައި އޮތް ތިންވަނަ ފޭސް. އެހެންވީމާ، ތިންވަނަ ފޭހަކީ، އަޅުގަނޑު ވީ ވަޢުދު ފުދޭ ފޭސް. އެއީ، މި ސިޓީގެ ހުރިހާ މަގެއް ހަދާނެ ކަމަށް އަޅުގަނޑު ވަޢުދުވިން. އެހެންވީމާ، އިރާދަކުރެއްވިއްޔާ ދެވަނަ ފޭސްއާއެކު، މިއަދު މި ސޮއިކުރެވިގެން މިދިޔަ ތިންވަނަ ފޭސް ނިމިގެންދާއިރުގައި، އަޅުގަނޑު ވީ ވަޢުދު ފުދި، މި ސިޓީގެ ހުރިހާ މަގެއް ހެދިފައި އޮންނާނީ. އެކަމުގެ ޔަޤީންކަން ތިޔަ ލޮބުވެތި ރައްޔިތުންނަށް އަޅުގަނޑު އަރުވަން.

އާދެ، އޭގެއިތުރަށްވެސް ބައެއް މަޝްރޫޢުތަކުގައި އަޅުގަނޑުމެން ސޮއިކޮށްފިން. އާދެ، ސްކޭޓް ޕާކެއް ގާއިމުކުރުމަށްޓަކައި ސޮއިކުރެވިގެންދިޔަ މަޝްރޫޢަކީވެސް، ހަމަ އެފަދަ މަޝްރޫޢެއް.

އާދެ، ކުރިއަށް އޮތް ތަނުގައި އަދި އިތުރު ކަންކަން ކުރިއަށް ގެންދިޔުމަށް އެބައޮތް. އަޅުގަނޑު ވީ ބައެއް އެހެން ވަޢުދުތައް އަދި މި އަންނަ އަހަރު އޮތީ. ވަޤުފު އިމާރާތެއް ގާއިމުކުރުމަށްޓަކައި ވީ ވަޢުދު ފުއްދުމަށް، މި އަންނަ އަހަރުގެ ބަޖެޓުގައި، ނިއު ޕޮލިސީ އިނިޝިއޭޓިވްގެ ތެރެއިން ކުރިއަށް ގެންދިޔުމަށް ވަނީ ހަމަޖެހިފައި.

އިންޑިއާގެ އެލް.އޯ.ސީ.ގެ ތެރޭގައި ވަނީ، ސިންތެޓިކް ޓްރެކް ގާއިމުކުރުން ހަމަޖެހިފައި. އެހެންވީމާ، އެ ކަންކަން ވެގެންދިޔައީމަ، މައިގަނޑު ގޮތެއްގައި އަޅުގަނޑު ވީ ގިނަ ވަޢުދުތަކެއް ފުދިގެންދާނެ.

އާދެ، މި ސިޓީގައި ވަރަށް ބޮޑު މައްސަލައެއް ކަރަންޓު މައްސަލަ. ކަރަންޓު މައްސަލަ ޙައްލުކުރުމަށްޓަކައި، ފެނަކައިން މަސައްކަތްތަކެއް ކުރަމުން މިއަދާ ހަމައަށްވެސް މިއައީ. މިހާރު އޯޑަރު ޖަހާފައި ވާނެ، 1.2 މެގަވޮޓްސްގެ އިތުރު ޖެންސެޓަކަށް. 1.2 މެގަވޮޓްސްގެ މި ޖެންސެޓް އިރާދަކުރެއްވިއްޔާ ގެނެވޭނެ. ފެނަކައިން މިއަދުވެސް އަޅުގަނޑުމެންނަށް ޔަޤީންކަން ދެއްވި. ކުރިއަށް އޮތް ދެމަހެއްހާ ދުވަހުގެ ތެރޭގައި، މާނައަކީ، ރަމަޟާން މަހުގެ ކުރީގައި، ހަމަ ޔަޤީނުންވެސް އިރާދަކުރެއްވިއްޔާ، އެ އިތުރު ކެޕޭސިޓީ ގާއިމުވެގެން ދިޔައީމަ، މިހާރު ތިޔަބޭފުޅުންނަށް މި ދިމާވާ ކަންބޮޑުވުންތައް ޙައްލުވެ، އިރާދަކުރެއްވިއްޔާ ކަރަންޓުގެ މައްސަލައަށް ރަނގަޅު ޙައްލެއް ލިބިގެންދާނެ. އެހެންވީމާ، އެކަންވެސް އެގޮތަށް ހަމަޖެހިފައިވާކަން އަޅުގަނޑު ފާހަގަކޮށްލަން.

ހަމަ އޭގެއިތުރަށް، ވަރަށް މުހިންމު އިންވެސްޓްމަންޓެއް އެބަ ކުރަން. ސޯލަރ ޕަވަރގެ ދާއިރާއިން. މި މަސައްކަތް ވަރަށް ކުރިއަށް ގެންދެވިއްޖެ. މި ސިޓީގައި، އައްޑޫ ސިޓީގައި، އަދި ރާއްޖޭގެ ގާތްގަނޑަކަށް އަށާވީހަކަށް ރަށުގައި، އަޅުގަނޑުމެން އެ ރަށްތަކުގެ ހުރިހާ ގޭބިސީއަށް ވާވަރަށް ސޯލަރ ޕަވަރ ޖެނެރޭޓް ކުރުމުގެ މަސައްކަތް، ބެޓްރީ ކެޕޭސިޓީއާ އެކީގައި. މިހާރު ކަރަންޓުގެ މި ރޭޓުތަކަށްވުރެ ކުޑަކޮށް، މާނައަކީ އެއްވެސް ސަބްސިޑީއެއް ދޭން ނުޖެހޭ މިންގަނޑުގައި، އަޅުގަނޑުމެން ސޯލަރ ޕަވަރ ޕްރޮޖެކްޓެއްގައި ސޮއިކުރުމުގެ މަސައްކަތް، ވަރަށް ބާރު ސްޕީޑުގައި އެބަ ހިނގާ. މިކަމާ ގުޅޭ އެމް.އޯ.ޔޫ.ގައި އަޅުގަނޑު ސޮއިކުރީ، އެންމެފަހުން އަޅުގަނޑު ޗައިނާއަށް ކުރި ދަތުރުގައި، އެކަމާ ބެހޭ ކުންފުންޏަކާ. އޭގެދަށުން، މި ސިޓީގައިވެސް، މުޅި ސިޓީއަށް ބޭނުންވާ ވަރަށް، ސޯލަރ ޕަވަރ ޖެނެރޭޓް ކުރެވޭ ވަރަށް އިންފްރާސްޓްރަކްޗަރ ގާއިމުކުރުން ހަމަޖެހިގެންދާނެ.

އެހެންވީމާ، ޕަވަރ ކެޕޭސިޓީ ހަމަޖެހިގެންދާއިރުގައި، ސޯލަރ ޕަވަރވެސް މި ހަމަޖައްސަނީ. އެހެންވީމާ، ސޯލަރ ޕަވަރ ގާއިމުވެގެން ދިޔައީމަ، އެއިން ރަންކުރާގޮތް ވާނީ ޑިފޯލްޓަށް. ދެން، އެ ޑިފޯލްޓުން ބޭރަށް ދާންޖެހޭ ވަގުތު، ކޮންވެންޝަނަލް ޕަވަރ ހުންނާނެ. އެހެންވީމާ، އެއީ އަޅުގަނޑުމެން ދާން ބޭނުންވާ މިސްރާބަކީ. އަޅުގަނޑު އިޢުލާނުކުރިން، މީގެ ދޮޅު އަހަރެއްހާ ދުވަސްކުރިން، މި ފަސް އަހަރު ނިމެންވާއިރަށް އަޅުގަނޑުމެންގެ އަމާޒަކީ، އިލެކްޓްރިސިޓީ ޑިމާންޑުގެ މަދުވެގެން، 33 އިންސައްތައަކީ، ރިނިވަބަލް އެނަރޖީން ރަންކުރާ އެއްޗަކަށް ހަދަން ބޭނުންވޭ. އެކަން ހާސިލުކުރުމަށްޓަކައި، މި މަޝްރޫޢު މިހާރު ދާދި އަވަހަށް މި ސިޓީގައިވެސް ފެށިގެންދާނެ. އެހެންވީމާ، ޕަވަރ އިޝޫއަކީ ހަމަ ޔަޤީނުންވެސް، މާގިނަ ދުވަސްތަކެއްނުވެ ޙައްލުވާނެ ކަމެއްކަމުގެ، ފުރިހަމަ ޔަޤީންކަން ތިޔަބޭފުޅުންނަށް އަޅުގަނޑު އަރުވަން.

އާދެ، މިއީ ދެން ވަރަށް ގިނަ ކަންކަން އަޅުގަނޑު މި ފާހަގަކޮށްލައިދިނީ. ދެންމެ ހަވާލުކުރެވިގެން މިދިޔަ ފިލާ، ނޫނީވިއްޔާ މަޝްރޫޢު ނިންމާފައި ހަވާލުކުރެވިގެންދިޔަ ދިޔުމަކީވެސް، އަޅުގަނޑު ވީ ވަޢުދެއްގެ ތެރެއިން ކަންތައްތައް ފުރިހަމަވެ، ތިން ސަރަޙައްދެއްގައި މޫދަށްއެރެވޭ ގޮތަށް، ޑިޒައިންގެ ތެރެއިން ހެދިގެންގޮސް، ހަވާލުކުރެވިގެންދިޔަ މަޝްރޫޢެއް.

އާދެ، އަޅުގަނޑު ލިސްޓެއްގެ ގޮތަށް މި ކަންކަން މި ދަންނަވާލީ. އަޅުގަނޑު ހަމަ ޔަޤީންކަންދޭން ބޭނުންވާތީ. ސަރުކާރުން އަޅުގަނޑު ވީ ހުރިހާ ވަޢުދެއް ހަނދާން ބަހައްޓައިގެން، ލިސްޓުކޮށްގެން، ވަރަށް ބޮޑަށް ޑީޓެއިލަށް ގޮސްގެން، ވަރަށް ކޯޑިނޭޓެޑް މަސައްކަތްތަކެއް، ސަރުކާރުގެ ހުރިހާ ވުޒާރާތަކާއި، ކަމާގުޅޭ ހުރިހާ ކުންފުނިތަކާ އެކީގައި ކުރަމުންދާ ކަމާއި، ކޮށް، އޭގެ ނަތީޖާ ނެރެމުންދާނެ ކަމާއި، އިރާދަކުރެއްވިއްޔާ މިއަދު މި ސޮއިކުރެވިގެން، ފެށިގެންދިޔަ ކަންކަމަކީ، ވަރަށް ރަނގަޅަށް ތައްޔާރުވެގެން، ޕްލޭންކުރެވިގެން، ހަމަޖެހިގެން ކުރިއަށްދާނެ ކަންކަމުގެ ޔަޤީންކަން، ތިޔަ ލޮބުވެތި ރައްޔިތުންނަށް ދިނުމަށްޓަކައި، ތަކުރާރުކޮށްވެސް ދަންނަވާލަން ބޭނުންވަނީ، ދެންމެ މިތާނގައި ސޮއިކުރެވުނު 11 މަޝްރޫޢާއި، މިއަދު މި ސިޓީގައި ޢަމަލީގޮތުން ފެށުނު 5 މަޝްރޫޢާއެކު، ޖުމްލަ 16 މަޝްރޫޢަކީ، ހަމަ ވަރަށް ފުރިހަމަކަމާ އެކީގައި، ކާމިޔާބުކަމާ އެކީގައި، ނިންމައިދޭނެ މަޝްރޫޢުތަކެއް ކަމުގެ ޔަޤީންކަން، ތިޔަ ލޮބުވެތި ރައްޔިތުންނަށް އަރުވަން.

މީގެއިތުރަށްވެސް، އަޅުގަނޑު ދެންނެވިހެން ކަންކަން އެބަހުރި. އެއަރޕޯޓަށް ތަރައްޤީގެ މަސައްކަތްތައް ގެނެސްދިނުން. އެމް.އޭ.ސީ.އެލް.އިން ފުރަތަމަ ކުރާނެ އެއްކަމަކަށް ވާނީ، އެއަރޕޯޓުގެ ޓަރމިނަލް، ޒަމާނީ ޓަރމިނަލަކަށް ހެދުން. އެ ބޭފުޅުން ދާދި އަވަހަށް އެ މަސައްކަތް ފަށާނެ. އަދި، އަޅުގަނޑު މި ހުރިހާ ކަންކަން ދަންނަވައިނުލި ނަމަވެސް، ވަޢުދުވީ ކޮންމެ ކަމެއްވިއްޔާ، ހަނދާން އެބަހުރި ކަމާއި، އެ ކަންކަން ކުރަމުންދާނެ ކަމުގެ ޔަޤީންކަން ދޭންވެގެން، އެ ކަންކަން އަޅުގަނޑު މި ފާހަގަކޮށްލީ.

އާދެ، އަޅުގަނޑުމެން ސަރުކާރުގެ ފަރާތުން ކުރިންވެސް އަޅުގަނޑު ދަންނަވާލި ފަދައިން، ރައްޔިތުންނަށް ވީ ވަޢުދުތައް ފުއްދުމުގައި މި ގެންދަނީ، ވަށާޖެހޭ ތަރައްޤީއެއް ހާސިލުކުރުމުގެ ނިޔަތުގައި، ކަންކަން ކޮށްދެމުން. އާދެ އަޅުގަނޑު ވަޢުދުވިން، މިގޮތަށް ރައްޔިތުންނަށް ލިބޭ އާމްދަނީއަށް ރަނގަޅު ގޮތްތަކެއް ހަދައިދޭނެ ކަމަށް. އެގޮތުން، ދެ އަހަރަށް ބަހާލައިގެން، ހުރިހާ މުވައްޒަފުންގެ މުސާރަ، ޕޭ ހަރމަނައިޒް ކުރެވި، ބޮޑުކޮށްދޭނެ ކަމަށް އަޅުގަނޑު ވަޢުދުވިން. އެހެންވީމާ، މިފަދަ މަޝްރޫޢުތައް ފެށުމުގެ އިތުރަށް، ރައްޔިތުންނަށް ލިބޭ އާމްދަނީ އިތުރުކުރުމާއި، މިފަދަ ހުރިހާ ކަމެއް ގުޅި ލާމެހި، ވަށާޖެހިގެންދާ ގޮތަށޭ ކަންކަން ތަރައްޤީ ކުރެވިގެން، ހަމަޖެހިގެން ގެންދާނީ.

އެގޮތުގެ މަތިން މިހާރު އެއޮތީ، މި އަހަރުގެ ތެރޭގައި ޕޭ ހަރމަނައިޒް ކުރެވޭނެ ފަރާތްތަކަށް، އެކަން އިޢުލާނު ކުރެވުނު ގޮތަށް ހަމަޖައްސާފައި. ނޮވެންބަރު 1ން ފެށިގެން އިޢުލާނު ކުރެވިފައި. އެހެންނަމަވެސް، މީގައި އެބަހުރި ކަންބޮޑުވުންތަކެއް، ނޫނީވިއްޔާ އޮޅުންނުފިލާ ކަންތައްތަކެއް. ޕޭ ކޮމިޝަނުގެ ފަރާތުން ވަރަށް ތަފުސީލުކޮށް، އިރާދަކުރެއްވިއްޔާ ކުރިއަށް އޮތް ދުވަސްތަކުގައި ހުރިހާ އޮފީސްތަކަށް، އެއީ ސަރުކާރުގެ ސިވިލް ސަރވިސް އޮފީސްތައް ވިޔަސް، ޖުޑިޝަރީ ކަމުގައިވިޔަސް، ކައުންސިލްތައް ކަމުގައިވިޔަސް، މި ހުރިހާ ތަނަކަށް ދާނީ، ވަރަށް ގާތުން މުޢާމަލާތްކޮށް، މި ކަންކަން ކިޔައިދެމުން. އެހެންނަމަވެސް، މި ސިޓީގައި އަޅުގަނޑު މި ދަތުރުގައި، މިދިޔަ ކުޑަ ވަގުތުކޮޅުގެ ތެރޭގައިވެސް ފާހަގަވެއްޖެ، ވަޒީފާ އަދާކުރާ ވަރަށްގިނަ ރައްޔިތުންނަށް މިކަމުގެ ތަފުސީލު އެނގިވަޑައިނުގަންނަވާތީ، ހުރި ކަންބޮޑުވުންތައް. އަޅުގަނޑު ހިތުން މިއީ ރާއްޖޭގެ ހުރިހާ ކަންކޮޅެއްގައިވެސް މި ކަންބޮޑުވުން މިގޮތަށް އޮންނާނެ ގޮތް. އެއީ، އަދި ރަނގަޅަށް މި އިޢުލާނުކުރެވިގެން މިދިޔައީ، އަދި ތިން ދުވަސް މިވީ. އެހެންވީމާ، އެ ތަފުސީލުތައް އަދި އެނގިގެން ދިޔައީމަ، އޭގެ ހިތްހަމަޖެހުން ލިބޭނެ ކަމުގެ ޔަޤީންކަން އަޅުގަނޑަށް އެބައޮތް. އެހެންނަމަވެސް، އަޅުގަނޑު ހިތަށް އެރީ، މި ޖަލްސާގައި، މި ޕޭ ހަރމަނައިޒް ކުރުން ކަނޑައަޅައި، ރަސްމީކޮށް އިޢުލާނުކުރެވި، އޭގެފަހުން، މިކަހަލަ ގޮތަކަށް ރައްޔިތުންނާ އަޅުގަނޑު ފުރަތަމަ ބައްދަލުވާ ފަހަރު ކަމަށްވާތީ، މިފަދަ ވާހަކައެއް ދެއްކޭނެ ކަހަލަ ފުރަތަމަ މާހައުލު ކަމަށް އަޅުގަނޑަށް ޤަބޫލުކުރެވޭތީ، އެއާ ބެހޭގޮތުން މުޅި ރާއްޖޭގެ ހުރިހާ ސިވިލް ސަރވިސް، ކައުންސިލް، އަދި ޖުޑިޝަރީ، މި ހުރިހާ ތަނެއްގެ ޕޭ ހަރމަނައިޒް ކުރެވި، މުސާރައަށް ބަދަލުތައް އައި، ކުރިއެރުން އައި ފަރާތްތަކަށް ކުޑަ އެއްޗެއް ދަންނަވާލާނަމޭ. އެއީ ވަރަށް ބޮޑު ކަންބޮޑުވުންތައް އޮތްކަމަށް އަޅުގަނޑަށް ފާހަގަވާތީ.

އާދެ، މިމަހުގެ އެކަކުން ފެށިގެން، މުސާރަ ބޮޑު ކުރެވިގެން މިދިޔަ ދާއިރަތައް، އަދި ސިވިލް ސަރވިސް، އޭގެތެރޭގައި ކައުންސިލްތަކުގެ އިދާރީ މުވައްޒަފުން ހިމެނޭހެން، ޝަރުޢީ ދާއިރާއިން ޖުމްލަ 20,000ހަށްވުރެ ގިނަ މުވައްޒަފުންގެ މުސާރަ އެވަނީ، ޕޭ ހަރމަނައިޒް ކުރެވިފައި. އާދެ، މުސާރަ ލިބޭނީ މި މަސް ނިމޭއިރު. އެހެންވީމާ، އެއްވަނަ ދުވަހުން ފެށިގެން މި އިޢުލާނުކުރީ، ކުރިއަށް އޮތް ދުވަސްކޮޅުގެ ތެރޭގައި، ކުރިން އަޅުގަނޑު ދަންނަވާލިގޮތަށް، ޕޭ ކޮމިޝަނުން ހުރިހާ އޮފީސްތަކާ މުޢާމަލާތް ކުރާނެ. ކޮށްފައި، ކޮންމެ އޮފީހެއްގައި ހުރި ކަންބޮޑުވުމެއްވިއްޔާ، އެއަށް އެޑްރެސް ކުރައްވާނެ. އެއޮތީ ގެޒެޓްކޮށްފައި. ޕޭ ހަރމަނައިޒޭޝަންގެ ގަވާއިދަށް، ނޫނީވިއްޔާ އެއަށް ބަދަލުތަކެއް ގެނެސްފައި، އެއޮތީ އިޢުލާނުކޮށްފައި. ތިޔަބޭފުޅުން ބައްލަވާލެއްވީމަ، ގެޒެޓުން ފެނިވަޑައިގަންނަވާނެ އޭގައި ހުރި ހުރިހާ ތަފުސީލެއް. އެހެންވީމާ، އެއާ އެއްގޮތަށް، ހުރިހާ އޮފީސްތަކާ ކޮމިޝަނުން ދާނެ ވާހަކަ ދައްކަމުން. އަދި، އޭގައި ބުނެފައިވާ ގޮތަށް އެޑްރެސްކުރާނެ ކަންކަމާ. ޙައްލުތައް ގެނެސްދޭނެ މައްސަލައެއް، ނޫނީވިއްޔާ ކަންބޮޑުވުމެއް އޮތީވިއްޔާ. އެހެންވީމާ، ވިއްސަކަށް ހާސް މުޒައްޒަފުންގެ މުސާރަ މި އަހަރު ބޮޑުކުރެވިގެން މިދަނީ. އާދެ، މިގޮތަށް ޕޭ ހަރމަނައިޒް ނުކުރެވޭ ޕޭ ފްރޭމްވަރކަށް ހިޖުރަ ނުކުރާ ފަރާތްތަކަށް އަޅުގަނޑު ވަޢުދުވީ ފަދައިން، މި އަންނަ އަހަރު މުސާރަ ބޮޑުވާނެ. އެއީ މައިގަނޑު ގޮތެއްގައި، ދެންހުރި ހުރިހާ މިނިވަން ކޮމިޝަންތަކާއި މިފަދަ ތަންތަން.

އާދެ، މުސާރައަށް މި ގެނެވުނު ހެޔޮ ބަދަލާ ގުޅިގެން، މުވައްޒަފުންގެ އާމްދަނީ އިތުރުވެގެންދާނެ. އޭގެ ސަބަބުން، ދިރިއުޅުމުގެ ފެންވަރު މަތިވުމުގެ އިތުރަށް، މުޒައްޒަފުންނަށް ފަހަށް ރައްކާކުރަން ލިބޭ އެއްޗެއް އިތުރުކުރުން މަގުސަދަކީ. އާދެ، މިހާރު މި ބަދަލު ގެނައުމުގެ ސަބަބުން، ހުރިހާ މުވައްޒަފުންގެވެސް އަސާސީ މުސާރައަށް ބޮޑު ކުރިއެރުމެއް އަންނާނެ. އަދި އެންމެ ކުޑަކޮށް އަސާސީ މުސާރަ ކަނޑައެޅިފައިވާ މުވައްޒަފުންނަށްވެސް، 7000 ރުފިޔާއަށްވުރެ ބޮޑު އަސާސީ މުސާރައެއް ލިބިގެންދާނެ. އެހެންކަމުން، ހުރިހާ މުވައްޒަފުންނަށްވެސް މިނިމަމް ވޭޖުގެ މިންވަރު، އަސާސީ މުސާރައިގެ ގޮތުގައި، މީގެފަހުން ލިބިގެންދާނެ. އަދި އަސާސީ މުސާރައަށް މި ގެނައި ބަދަލުގެ ސަބަބުން، މުވައްޒަފުންގެ ޕެންޝަން ފަންޑަށް ލިބިގެންދާނެ ވަރަށް ބޮޑު ކުރިއެރުމަކަށް މިކަން ވާނެ. މުވައްޒަފުން ރިޓަޔަރ ކުރާއިރުގައި، ނަތީޖާއަކަށް ވެގެންދާނީ، ޕެންޝަން ފަންޑުގައި ޖަމާވެފައިވާ އަދަދު އިތުރުވެގެން ދިޔުން.

އާދެ، ޕެންޝަން ފަންޑުގެ ވާހަކަ އަޅުގަނޑު ދަންނަވާލާއިރުގައި، އަޅުގަނޑު ވަޢުދުވީ ކަމެއް، ޕެންޝަން ފަންޑުގެ ތެރެއިން އިތުރު ލުއިތައް، ނޫނީވިއްޔާ އެހީތެރިކަން ލިބޭގޮތަށް، ފައިދާވާނެ ގޮތަށް، ޤާނޫނަށް ބަދަލު ގެންނާނެ ވާހަކަވެސް. އެކަމަށްވެސް އެބަ ތައްޔާރުވޭ. މިހާރު ޕެންޝަން ފަންޑުން މި އޮންނަނީ ވަރަށް ލިމިޓެޑް ބޭނުންތަކެއް ކުރެވޭ ގޮތް. އެހެންވީމާ، ވަޢުދުވީ ވަޢުދުތައް ފުއްދުމުގެ ބަދަލުތައް އެބަ ހުށަހަޅަން ޤާނޫނަށް. އެހެންވީމާ، ޕެންޝަން ފަންޑަށް އިތުރަށް އެއްޗެއް ޖަމާވުމަކީ، ތިޔަބޭފުޅުންނަށް އެއިން ފައިދާތަކެއް ކުރާނެ ކަމަކަށްވާނެ. މިހާރަށްވުރެ ގިނަ ފައިދާތައް. އާދެ، މި ހެޔޮ ބަދަލާއެކު، މުސާރަ ކަނޑައަޅަފައިވާ ގޮތްވެސް އެވަނީ އެއްހަމަ ކުރެވި، ކަންތައްތައް ހަމަޖެހިގެން ގޮސްފައި. އަދި، މައިގަނޑު ކަންބޮޑުވުމަކަށް މިއޮތީ، އިތުރު ގަޑީގެ ކަންތައްކަންވެސް އަޅުގަނޑަށް ފާހަގަކުރެވޭ. އެހެންނަމަވެސް، އޭގައިވެސް ދަންނަވާލަން ބޭނުންވަނީ، މީގެކުރިން ޕޭ ހަރމަނައިޒް ކުރެވުނު ފަރާތްތަކުގައި އެއޮތް ކަންބޮޑުވުމަށްވެސް އެޑްރެސްކުރެވި، ވަރަށް ބޮޑެތި ލުއިތަކެއްވެސް ދެވިފައި މިފަހަރު މިވަނީ. ތިޔަބޭފުޅުން ގެޒެޓުން ބައްލަވާލެއްވީމަ، އެކަން ވަރަށް ސާފުކޮށް ފެނިވަޑައިގަންނަވާނެ.

އާދެ، އެއްކަމެއްގެ ގޮތުގައި އަޅުގަނޑު ފާހަގަކޮށްލަން ބޭނުންވަނީ، މިސާލެއް ގޮތުގައި، ހޮސްޕިޓަލްތައް. ހޮސްޕިޓަލްތަކަކީ، 24 ގަޑިއިރު، ހަފުތާގެ ހުރިހާ ދުވަސްތަކެއްގައި މަސައްކަތް ކުރަންޖެހޭ ތަންތަނަށް ވާއިރުގައި، އިތުރުގަޑީގެ 10 އިންސައްތައިގެ ކެޕް ހަމަވާ މައްސަލައަށް މިހާރު އެވަނީ ލުޔެއް ގެނެސްދީފައި. މިއީ، ޖުމްލަކޮށް ހުރިހާ ދާއިރާއަކަށްވެސް އެޕްލައިވާނެ ކަމެއް. އެންމެ ބޮޑަށް ހޮސްޕިޓަލްތަކަށް، ނޫނީވިއްޔާ ޞިއްޙީ ދާއިރާއަށް އެޕްލައިވާތީ، މިސާލެއް ގޮތުގައި މި ފާހަގަކޮށްލީ. އާދެ، އެހެންވީމާ، މީގައި މިވާގޮތަކީ، މިސާލަކަށް މީގެތެރެއިން އިސްތިސްނާ މިހާރުވާނެ، އިތުރުގަޑީގައި މި 10 ޕަސެންޓުގެ ކެޕް އެޕްލައިނުވެ، އިތުރުގަޑި ލިބޭނެ ދުވަސްތަކެއް ކަނޑައެޅިގެން މިދިޔައީ. އެއީ، ރަމަޟާން މަހުގެ ފަހު ދިހައެއްގައި މި ބަންދުވާ ހުރިހާ ދުވަހެއް، އަދި ރައީސުލްޖުމްހޫރިއްޔާގެ ދެންނެވުމަކުން ބަންދުކުރާ ހުރިހާ ދުވަހެއް، ދެން، ވަޒީފާއާ ބެހޭ ޤާނޫނުގައި ފާހަގަކޮށްފައި އޮންނަ ރަސްމީ ހުރިހާ ބަންދު ދުވަސްތަކެއް، އޭގައި ހުކުރު ދުވަސް ހިމެނޭ. މިކަހަލަ ހުރިހާ ދުވަހެއްގައި، މި 10 ޕަސެންޓެއް އެޕްލައިއެއް ނުވޭ. އިތުރުގަޑީ ގޮތުގައި މަސައްކަތް ކުރަންޖެހޭ މުވައްޒަފުންނަށް އިތުރުގަޑި ލިބޭނެ އޭރުން. އެއީ ގެނެވުނު ވަރަށް ބޮޑު ބަދަލެއް.

އެހެންވީމާ، ކައުންސިލްތަކުން އަދި އެހެން ދިމަދިމާއިންވެސް، ހޮސްޕިޓަލާއި، އެކި ތަންތަނުގައި އެންމެ ބޮޑު ކަންބޮޑުވުމަކަށް އޮތް ކަންތައް މިއީ. ދެން އެހެންނަމަވެސް، ސިވިލް ސަރވިސް ގަވާއިދުގައި އޮވޭ، އިތުރު ގަޑީގައި މަސައްކަތް ކުރެވެނީ ކޮން ހަމައަކުން ކަން. ޒިންމާދާރު ކަމާއެކީގައި މަސައްކަތް ކުރަންޖެހޭނީ. އޮންނަ އުސޫލަކުން، ނަގަންޖެހޭ ހުއްދަތަކެއް ނެގި، މަސައްކަތް ކުރަންޖެހޭ ފަރާތްތަކުން މަސައްކަތް ކުރަމުންދާނެ. އާދެ އެހެންވީމާ، އެންމެ ބޮޑު އެއް ޙައްލަކީ އެއީ. މި ބަދަލު ގެނައީމަ، އިތުރުގަޑީގެ ކެޕް ހަމަވާނީ ހަމަ ވަރަށް މަދު ޙާލަތެއްގައި. ނަމަވެސް އެފަދަ ޙާލަތްތަކުގައިވެސް، ޢަމަލުކުރެވޭނެ ތަފާތު ގޮތްތައް މި މިންގަނޑުގައި، މިހާރު ގެޒެޓް ކުރެވިފައި އޮތް މިންގަނޑުގައި އޮންނާނެ ބަޔާންކޮށްފައި. އެ ކަންކަން ޕޭ ކޮމިޝަނުގެ ފަރާތުން، އެއަށް ކޭސް ބައި ކޭސް، އެ މުއައްސަސާއަކަށް އެ ޙައްލު ގެނެސްދޭނެ. އެކި މުއައްސަސާތަކުގައި އެކި ޙައްލު ގެންނަންޖެހޭނެ. މައިގަނޑު ޙައްލު ޖުޑިޝަރީއަށް. ޖުޑިޝަރީގައި މަސައްކަތް ކުރަނީ، ވަރަށް ތަފާތު ގޮތަކަށް. އަދި އެހެން މުއައްސަސާތަކުގައިވެސް ހުރޭ ތަފާތުތަކެއް، ކައުންސިލްތަކުގައިވެސް ހުރޭ ތަފާތުތަކެއް. އެހެންވީމާ، އެކަމަށް އެޑްރެސްކުރެވޭ ގޮތަށް، ޕޭ ކޮމިޝަނަށް ބާރުތަކެއް ލިބިފައި އޮންނަ ގޮތަށް، މިއޮތީ ގަވާއިދު ހަދާފައި. އެހެންވީމާ، އެއްވެސް ވަރެއްގެ ކަންބޮޑުވުމެއް މި ކަންކަމުގައި މުވައްޒަފުންގެ ތެރޭގައި ނުބޭއްވުމަށް، އަދި އޮތަނުދިނުމަކީ އަޅުގަނޑުގެ އެދުން. މިކަމުގައި ކަމާބެހޭ މުއައްސަސާތަކުގެ ޕީ.އެސް.އިންނާއި، އެސް.ޖީ.ންނާއި، ކައުންސިލްތަކުގެ ރައީސުންނާއި، މޭޔަރުން، މި ހުރިހާ ބޭފުޅުން ކަމާބެހޭ ކޮމިޝަނާ އެކީގައި މުޢާމަލާތު ކުރެއްވީމާ، މުވައްޒަފުންނަށް އެ ކަން ކަން ވަރަށް ސާފުވާނެ. އަޅުގަނޑު ހަމަ ކުރުކޮށް ދަންނަވާލަން ބޭނުންވެގެން މި ކަންކަން މި ފާހަގަކޮށްލީ.

އާދެ އެހެންވީމާ، ޖުމްލަކޮށް، މި ޕޭ ހަރމަނައިޒް މިކުރެވުނީ، ވަރަށް ބޮޑަށް ދިރާސާކުރެވި، މިހާރު މިހިރަ ކަންބޮޑުވުންތަކަށްވެސް ޙައްލު ލިބޭގޮތަށް. އެހެންވީމާ، ކުރިއަށް އޮތްތާނގައި، މި ދެންނެވި ފައިދާތައް ވާގޮތަށް، މިވަނީ މުވައްޒަފުންގެ މުސާރަ ބޮޑުކުރެވިފައި. ޙަޤީޤީ މާނައިގައި އޭގެ ފައިދާވާނެ. މުވައްޒަފަކަށް މިހާރު ލިބޭ މުސާރައެއް އެއްވެސް ވަރަކަށް ކުޑަވެ، އޭގެ ސަބަބުން ގެއްލުންވާނެ ކަހަލަ ގޮތަކަށް ކޮށްފައި އޮތް ކަމެއް ނޫން. ކޮންމެ ކަމަކަށްވެސް އެޑްރެސްކުރެވޭ ގޮތަށް ގަވާއިދު ހަދައި، އެއަށް ރަނގަޅު ޙައްލުވެގެނެވޭ ގޮތަށް މިވަނީ ހަމަޖެހިފައި.

އާދެ، ސަރުކާރުން މަސައްކަތް ކުރަމުން ގެންދާނީ، ރައްޔިތުންގެ ވިންދާއި އިހުސާސާ އެއްގޮތަށް. ވިންދާއި، އިހުސާސް ދެނެގަނެގެން. ރައްޔިތުންނާ ގާތުން. ރައްޔިތުން ގާތަށް އައިސް އެ މަސައްކަތް ކުރަނީވެސް އެހެންވެގެން. ރައްޔިތުން ގާތަށް އަޅުގަނޑު މި އަންނަނީ، އަޅުގަނޑުމެން މި އަންނަ ސަބަބަކީވެސް އެހެންވެގެން. ރައްޔިތުން ބޭނުންވާ ކަންކަން ގާތުން އަޑުއަހައި، އޮޅުންފިލުވައި، ރައްޔިތުން ބޭނުންވާ އަމާޒަށް ކަންކަން ގެންދިޔުމަށްޓަކައި. މި ސަރުކާރަކީ ރައްޔިތުންނާ އެކީގައި އޮތް، ރައްޔިތުންގެ ސަރުކާރެއް. ރައްޔިތުން ބޭނުންވާ ގޮތަށް، ރައްޔިތުންނަށް ހެޔޮވާގޮތަށް ކަންކަން ކުރާނެ ސަރުކާރެއް. އިރާދަކުރެއްވިއްޔާ، މިއަދާ ހަމައަށްވެސް ސަރުކާރުން ކަންކަން ކުރަމުން އައިގޮތަށް، ކުރިއަށް އޮތް ދުވަސްތަކުގައި ހަމަ މި ދެންނެވި ފަދައިން، ރައްޔިތުންގެ ހެވާއި ލާބައަށް ފަހިވާގޮތަށް، އަޅުގަނޑު ވީ ވަޢުދުތައް ފުއްދަމުން ގެންދާނީ.

އާދެ، ބައެއް ކަންކަމަކީ، އޭގެ ސަބަބުން ބައެއް ފަރާތްތަކުގެ ހިތްހަމަނުޖެހުން ހުރެދާނެ ކަންތައްތައް. އެހެންނަމަވެސް، ޖުމްލަކޮށް މުޅި ޤައުމަށް ފައިދާވާނެ ކަންކަން. އަޅުގަނޑު އިސްކުރަނީ، ރަނގަޅު ކަންކަން ކުރަން، ޕޮޕިއުލަރ ކަންކަން ކުރާކަށް ނޫން. ޕޮޕިއުލަރ ކަންކަން ކުރަންޏާ، ފަސޭހަގޮތް ޚިޔާރުކޮށްގެން، ކުރީގެ ސަރުކާރުތަކުން ހެދިގޮތް ހަދައިގެން ތިބެވިދާނެ. ވޭޕްވެސް މަނާކުރާނެ ކަމެއް ނެތް. ޖެނެރޭޝަނަލް ބޭންވެސް ގެންނާނެ ކަމެއް ނެތް. މިހެންހުރި އެއްވެސް ކަމެއް ނުކުރަންވީ. އެޔެއް ނޫން އަޅުގަނޑުގެ އުސޫލަކީ، ސިޔާސަތަކީ. އިޚްލާޞްތެރިކަމާ އެކީގައި، ލޮބުވެތި ދިވެހި ރައްޔިތުންނަށް އެންމެ ފައިދާވާނެ ގޮތަށް، ކަންތައްތައް ކުރިއަށް ގެންދިޔުން. ރަނގަޅު ގޮތް އިސްކުރުން. އެހެންވެގެން، ޒުވާނުންނަށް މި މަނާކުރީ، ސިނގިރޭޓާއި ދުންފަތުގެ އިސްތިއުމާލު ކުރުން. އަދި މުޅި އާބާދީއަށް ވޭޕް މަނާކުރީ. އަދި މިފަދަ ކަންކަން، ޞިއްޙަތު ސަލާމަތްކޮށްދިނުމަށްޓަކައި މިކުރަނީ. ޞިއްޙަތަށްކުރާ ހޭދައަކީ އިންވެސްޓްމަންޓެއް. މި އިންވެސްޓްމަންޓްގެ ފައިދާކުރާނީ ހަމައެކަނި ޞިއްޙަތަކަށް ނޫން. އިޤްތިޞާދީ ގޮތުންވެސް އަދި މުޅި މުޖުތަމަޢަށްވެސް ފައިދާކުރާނެ. ކޮންމެ މީހަކުވެސް ޞިއްޙަތު ރަނގަޅުކޮށް ހުރުމަކީ، އެ މީހާއަށްވެސް ފައިދާކުރާނެ ގޮތް، އެމީހާގެ ޢާއިލާއަށްވެސް، މުޖުތަމަޢަށްވެސް ފައިދާކުރާނެ ގޮތް. އެހެންވީމާ، އެކަމަށްވެސް އަޅުގަނޑުމެން މި އިސްނެގީ. އެގޮތުން، ވަށާޖެހޭގޮތަށް ކަންކަން ކުރަމުން މިދަނީ.

އާދެ، އަދިވެސް އެއްފަހަރު، ލޮބުވެތި ހުރިހާ ރައްޔިތުންނަށް ވަރަށް ބޮޑަށް ޝުކުރު ދަންނަވަން. މި ސިޓީގެ ތަރައްޤީއަށްޓަކައި މިއަދު އެއްލިގެން މިދިޔަ ސަފުހާއަކީ، އަޅުގަނޑު ކުރިން ދަންނަވާލި ފަދައިން، ރައްޔިތުންގެ އުފާފާގަތިކަން ޙަޤީޤަތަކަށް ވެގެންދާނެ ސަފުހާއަކަށް ވެގެންދާނެ ކަމުގެ ފުރިހަމަ ޔަޤީންކަން، އިރާދަކުރެއްވީތީ އަދިވެސް ތިޔަ ލޮބުވެތި ރައްޔިތުންނަށް އަރުވަން.

އަޅުގަނޑުގެ ދުޢާއަކީ، މި ސިޓީގެ ތަރައްޤީއަށް، އަދި މުޅި ޤައުމު ތަރައްޤީ ޙަޤީޤަތަށް ހެދުމުގައި، އަޅުގަނޑުމެންނަށް ހެޔޮ ތައުފީޤު މިންވަރު ކުރެއްވުން. އާމީން.

وَمَا تَوْفِيقِي إِلَّا بِاللَّهِ عَلَيْهِ تَوَكَّلْتُ وَإِلَيْهِ أُنِيبُ.
وَالسَّلَامُ عَلَيْكُمْ وَرَحْمَةُ اللهِ وَبَرَكَاتُه.