بِسْمِ ٱللّٰهِ ٱلرَّحْمٰنِ ٱلرَّحِيمِ
اَلْحَمْدُ للَّهِ رَبِّ الْعاَلَمِينْ، وَالصَّلاَة وَالسَّلاَمُ عَلَى رَسُولِ ٱللَّهِ، وَعَلَى آلهِ وَصَحْبِهِ أَجْمَعِينْ.
ކިނބިދޫގެ ލޮބުވެތި އެންމެހައި ރައްޔިތުން، ކައުންސިލަރުން، ދާއިރާގެ ޢިއްޒަތްތެރި މަޖިލިސް މެންބަރު، ރަށުގެ މުއައްސަސާތަކުގެ ވެރިން، އަދި މި ރަށުގެ ޚިދުމަތްތެރި ރަށްވެހިން، ވަޑައިގެން ތިއްބެވި އެންމެހައި ޢިއްޒަތްތެރިން، މި ޖަލްސާ، އަޑުއައްސަވަމުން ގެންދަވާ، ބައްލަވަމުން ގެންދަވާ، ލޮބުވެތި އެންމެހައި ރައްޔިތުން؛
السَّلامُ عَلَيْكُم ورَحْمَةُ اللهِ وَبَرَكاتُهُ.
އާދެ، އަޅުގަނޑުމެންނަށް މި ރަށަށް އާދެވުނު ވަގުތު، ކިނބިދޫގެ ލޮބުވެތި ރައްޔިތުން ވަޑައިގެން، ވިދާޅުވި ހޫނު މަރުޙަބާއަށްޓަކައި، އަޅުގަނޑުގެ ހިތުގެ އެންމެ ފުންމިނުން، ތިޔަބޭފުޅުންނަށް ވަރަށް ބޮޑަށް ޝުކުރު ދަންނަވަން.
އާދެ، މިއަދު އަޅުގަނޑުމެން ބައެއް މަޝްރޫޢުތަކުގެ ޢަމަލީ މަސައްކަތް ފަށައިފިން. އަދި ކުރިއަށް އޮތް ދުވަސްތަކުގައި އިރާދަކުރެއްވިއްޔާ ހަމަ މިގޮތަށް، މި ރަށުގެ ތަރައްޤީއަށް މުހިންމު އެތައްކަމެއް ފެށިގެންދާނެ. އަޅުގަނޑު މިއަދު ހަމަ މިކަންކަމުގެ ވާހަކަ ދަންނަވާލަން ގަސްދުކުރަން.
އާދެ، އަޅުގަނޑުމެން މިއަދު މިފެށި މަގުހެދުމުގެ މަޝްރޫޢަކީ، ހަމަ ޔަޤީނުންވެސް މި ރަށުގެ ތަރައްޤީއަށް ވަރަށް މުހިންމު މަޝްރޫޢެއް. ހަމައެފަދައިން، ކުޅިވަރުގެ ދާއިރާއިން ތަރައްޤީ ހާސިލުކޮށްދިނުމަށްޓަކައި ފެށިގެންދިޔަ ފިޓްނަސް އެންޑް ރިކްރިއޭޝަން މަރުކަޒުގެ މަޝްރޫޢަކީވެސް، ހަމަ ޔަޤީނުންވެސް ޒުވާނުންނާއި، ޖުމްލަކޮށް ހަމަ ހުރިހާ ފަރާތްތަކަށްވެސް އޭގެ ކުރިއެރުން، ފަސޭހަކަން ލިބިގެންދާނެ މަޝްރޫޢެއް.
ހަމަ އެގޮތަށް، ފުލުހުންގެ މަރުކަޒެއް، ޕޮލިސް ސްޓޭޝަނެއް ޤާއިމުކުރުމަށްޓަކައި މި ފެށުނު މަޝްރޫޢުވެސް ވެގެންދާނީ، މި ރަށުގައި އަމަންއަމާންކަން ޤާއިމުކުރުމަށް، ފުލުހުންގެ ޚިދުމަތް އިތުރަށް ވަރުގަދަކުރުމަށް އެޅިގެންދާ ވަރަށް މުހިންމު ފިޔަވަޅެއް ކަމުގައި. އަދި އެއާއެކީގައި، އޭ.ޓީ.އެމް.ގެ ޚިދުމަތް ވެގެންދާނީ ޔަޤީނުންވެސް، މިހާތަނަށް ރައްޔިތުންނަށް އެތައް އުނދަގުލެއް، ވަރަށް ބޮޑު ޚަރަދުތަކެއް ހިނގަމުންދިޔަ ކަމެއް ނިމުމަކަށް އައިސް، ހިތްހަމަޖެހުން ލިބިގެންދާނެ ކަމަކަށް.
އާދެ، އޭގެ އިތުރުން ބަލާއިރުގައި، މި ރަށުގައި މި ސަރުކާރުން ރައްޔިތުންގެ ކުރިމަގަށްޓަކައި، ރައްޔިތުންގެ އެދިވަޑައިގަތުމަށް، އަޅުގަނޑުވީ ވަޢުދު ފުއްދުމުގެ ގޮތުން، ހިއްކިބިން ޙިމާޔަތްކުރުމުގެ މަޝްރޫޢު ހަވާލުކުރެވުނު ފަރާތާ ހަވާލުކުރުން އެގްރިމެންޓްގައި އޮތްގޮތަށް ކުރިއަށްދާނެ. އެ ބިން ހިއްކުމުގެ އިތުރަށް، އެ ތަނަކީ ރައްޔިތުންނަށް ބޭނުންތެރި ތަނަކަށް ހެދުމަކީވެސް، އަޅުގަނޑުމެންގެ ޕްލޭންގައި ކުރިއަށް އޮތް އަހަރުތަކަށް އޮތް ކަމެއް.
ހަމައެއާއެކީގައި، ރަށުގައި ހުރި އެހެން މަޝްރޫޢުތަކަށް ބަލާއިރުގައި، އެންމެ މުހިންމު އެއްކަމަކީ ތަޢުލީމީ ދާއިރާއަށް ކުރަންހުރި ކަންކަން. އާދެ، މި އަހަރު ތެރޭގައި ވަރަށް އަވަހަށް އަޅުގަނޑުމެން ކުރިއަށް އޮތް ދެމަހެއްހާ ދުވަހުގެ ތެރޭގައި، ޢަމަލީ މަސައްކަތް ކުރުމަށް ބަޔަކާ ހަވާލުކުރެވިގެންދާނެ. މަލްޓި ޕަރޕަސް ހޯލާއި، އަދި ކުލާސްރޫމްތަކާއި، ސްކޫލަށް ބޭނުންވާ އެހެނިހެން އިންފްރާސްޓްރަކްޗަރ ހިމެނޭ މަޝްރޫޢެއްގެ ޢަމަލީ މަސައްކަތް ކުރުން. އެއީ، ހަމަ ޔަޤީނުންވެސް ތަޢުލީމީ ދާއިރާއިން މި ރަށުގެ ރައްޔިތުންނަށް، ދަރިވަރުންނަށް، ޓީޗަރުންނަށް ވަރަށް މުހިންމު ކަމަކަށްވޭ. އާދެ، އިރާދަކުރެއްވިއްޔާ މި ދެންނެވި ގޮތަށް، މިކަމުގެ މަސައްކަތް ފެށުމަށް މިހާރު ބަޔަކާ ހަވާލުކުރުމުގެ ފަހު މަރުޙަލާގައި މިއުޅެނީ. ސްކޫލާއި، އެޑިޔުކޭޝަން މިނިސްޓްރީއާ މަޝްވަރާ ކުރެވިގެން، މީގެ އެންމެފަހުގެ ޑީޓެއިލްސްތައް ނިންމާލައިދިނީމާ، އަޅުގަނޑުމެން ބަޔަކާ ހަވާލުކުރާނަން. މިކަމުގެ ހުރިހާ ކަމެއް ފައިނަލް ކުރެވިފައި އޮތް މަޝްރޫޢެއް މިއީ.
ހަމައެއާއެކީގައި، މިހާރު ހުއްޓިފައި ހުރި އަދި މިހާރު ހިނގަމުންދާ ޞިއްޙީ މަރުކަޒުގެ މަޝްރޫޢަކީ، މިހާރަށްވުރެ އަވަހަށް ހިނގާނެގޮތަކަށް، އެ މަޝްރޫޢު އަލުން ހަވާލުކުރެވުނު ކުންފުންޏާ އެކީގައި، އަޅުގަނޑުމެން މަޝްވަރާ ކުރާނެ ކަމެއް. ޞިއްޙީ މަރުކަޒު އިތުރަށް ތަރައްޤީކުރުމަށް، އެ މަޝްރޫޢަކީ ޙަޤީޤަތުގައިވެސް ވަރަށް މުހިންމު މަޝްރޫޢެއް.
އާދެ، ކުޅިވަރުގެ ދާއިރާއިން، މި ރަށުގައި އަޅުގަނޑުމެން ހަދައިދީފައިވާ ފުޓްބޯޅަ ދަނޑު އިތުރަށް ތަރައްޤީކުރުމަށްޓަކައި، ވަށައި ފެންސްޖެހުން، އަދި ލައިޓް ޖެހުމާއި، ސިޑިބަރިއާއި، ޗޭންޖިންގ ރޫމް ހިމެނޭގޮތަށް، އަދި އޭގެ އިތުރަށް، ފުޓްސަލް ދަނޑުގައި އަޅާފައިވާ ޓާރފް ބަދަލުކޮށްދީ، ފުޓްސަލްއާއި ހޭންޑްބޯލް ކުޅެވޭގޮތަށް، މި ހުރިހާ ކަމެއް ހިމެނޭގޮތަށް މިހާރު ބަޔަކާ ހަވާލުކުރުމަށް ނިންމައި، އެ މަސައްކަތް، ކުރިއަށް އޮތް ދެ މަހެއްހާ ދުވަހުގެ ތެރޭގައި ޢަމަލީގޮތުން ފެށިގެންދާނެ.
އެހެންވީމާ، މި އަހަރުގެ ތެރޭގައި ޢަމަލީގޮތުން އަލަށް ފެށޭ މަސައްކަތްތައް، ނޫނީވިއްޔާ ފެށިގެންދާނެ ކަންކަމުގެ ތެރޭގައި، މި ދެންނެވި ކުޅިވަރު ދާއިރާއާއި، ތަޢުލީމީ ދާއިރާގެ މަޝްރޫޢު ހިމެނިގެންދޭ.
އާދެ، އޭގެ އިތުރަށްވެސް، މުހިންމު ކަންކަން މި ރަށުގެ ތަރައްޤީއަށް އެބަހުރި ކުރިއަށް ގެންދަން. އެންމެ މުހިންމު ކަމަކީ ހަމަ ވޭމަންޑުއާ ދޭތެރޭގައި އަޅުގަނޑު ވަޢުދުވިހެން، ރައްޔިތުން ބޭނުންވާ ކޯޒްވޭގެ މަސައްކަތް. އަޅުގަނޑު ރޭގައި ވާނީ، މިކަން މިހާރު ދާގޮތް ތަފްޞީލުކޮށް ބަޔާންކޮށްދީފައި، ވޭމަންޑޫގައި އޮތް ޖަލްސާގައި. މިހާރު ޝައުޤުވެރިކަން ހުރި ފަރާތްތައް ހޯދަން އިޢުލާނުކުރީ.
އަޅުގަނޑުމެން މި މަސައްކަތް ކުރަނީ، އިންވެސްޓަރ ފައިނޭންސް މޮޑެލްއެއްގެ ތެރެއިން، އިންޓަރގްރޭޓަޑް ޓޫރިޒަމް ޑިވެލޮޕްމަންޓަށް އެލާ ދީގެން، އެ ޕްރޮޖެކްޓްގެ ތެރެއިން، މި ދެ ރަށް ގުޅޭނެގޮތަށް މަސައްކަތްކުރުމަށް. ވަރަށް ގިނަ ޑިސްކައުންޓްތައް ހިމެނޭގޮތަށް، މުޅި އަތޮޅަށް އަޅުގަނޑުމެން މިހާރު ޓޫރިޒަމް ފުޅާކުރުމަށް، ވަރަށް ގިނަ ޑިސްކައުންޓްތައް ދީފިން. ރޭގައި އަޅުގަނޑު އެ ތަފްޞީލުތައް ކިޔައިދިނިން. އެހެންވީމާ، ވަރަށް ވަރަށް ބޮޑު ޔަޤީންކަން އެބައޮތް، އެ ޕްރޮޖެކްޓް އެ މޮޑެލްގައި ހިނގާނެކަން. ދެން، އަޅުގަނޑުމެން މިހާރު ހުޅުވައިލާފައި އޮތް ފުރުޞަތު، މިމަހު 22 ގައި އިޢުލާނުކުރީ. ދެން، އެ ސަބްމިޝަން ހަދައި، އިވެލުއޭޝަނާ ހުރިހާ ކަމެއް ހިނގާނެ. މި ހުރިހާ ތަފްޞީލެއް އަޅުގަނޑު މި ދަންނަވާލީ، އިތުރަށް ޔަޤީންކަން ދިނުމަށްޓަކައި. އަޅުގަނޑު އަނެއްކާވެސް ތަކުރާރުކޮށްލާނީ، އަޅުގަނޑުގެ ވަޢުދު. ތިޔަބޭފުޅުންނަށް މި އެންމެ މުހިންމު މަޝްރޫޢު، މި ދެ ރަށް ގުޅާލުމުގެ ކޯޒްވޭގެ މަޝްރޫޢު. ހަމަ ޙަޤީޤަތުގައިވެސް އަޅުގަނޑުމެން އެކަން ކޮށްދޭނަން. އެ ޔަޤީންކަން އަރުވަން.
މިކަން ވެގެންދާނީ، މި ދެ ރަށްގުޅި، މި ސަރަޙައްދަށް އެތައް ކުރިއެރުމެއް ލިބޭނެ، މި އަތޮޅަށްވެސް، މި ސަރަޙައްދަށްވެސް ވަރަށް މުހިންމު މަޝްރޫޢަކަށް. އާބާދީ ތަރައްޤީ އެއްފަސްކުރުމަކީ، އަޅުގަނޑުމެންގެ ވަރަށް މުހިންމު ސިޔާސަތެއް. އެހެންނަމަވެސް، އެކަމަކީ، ރައްޔިތުން އަމިއްލައަށް، ވިލިންގްލީ، ބޭނުންވެގެން އަޅުގަނޑުމެން ކުރާނެކަމެއް. ރާއްޖޭގެ އެކި ކަންކޮޅުތަކުގައި، ސަރަޙައްދީ ތަރައްޤީގެ ސިޔާސަތުގެ ދަށުން، އަޅުގަނޑުމެން އެބަ ފުރުޞަތު ދެން އަދި ހިތްވަރުވެސް ދެން، އާބާދީ ތަރައްޤީ އެއްފަސްވުމަށް. ކުދިކުދި ރަށްރަށުގެ ރައްޔިތުން އެކީގައި އެ ރަށްދޫކޮށް، ބޮޑު ރަށަކަށް އަދި ޚިދުމަތްތައް ޤާއިމުވެފައި އޮންނަ ސަރަޙައްދުތަކަށް، ރަށްތަކަށް ބަދަލުވާން. އެހެންވީމާ، މި ދެ ރަށް މިހެން ގުޅިގެން ދިޔުމުން، މި ދެ ރަށަށާއި، ދެ ރަށުގެ ރައްޔިތުންނަށާއި، އަދި މި ދެންނެވިހެން، ހިޖުރަކުރަން ބޭނުންވާ ފަރާތްތަކަށްވެސް، މިއީ މުހިންމު ނޯޑަކަށްވޭ، ސަރަޙައްދަކަށްވޭ. އެއީ، އަޅުގަނޑަށް ޤަބޫލުކުރެވޭ ގޮތުގައި، ތިޔަބޭފުޅުންގެވެސް ވިސްނުންފުޅުގައި މިކަން އޮތްގޮތަކީ.
ކުރިއަށް އޮތީ އަޅުގަނޑުމެން ހައުސިންގ މަޝްރޫޢުތައްވެސް ހިއްކި ބިމުގައި ހިންގުމުގެ ދުވަސްތައް. އަޅުގަނޑަށް އެނގޭ، މި ރަށުގައި ގޯތި ލިބިފައި، ގޯތީގައި ގެނޭޅި އެތައް ބަޔަކުވެސް އެބަތިބި. އަދި ލޭންޑްޔޫސް ޕްލޭން ހެދޭއިރުގައި، ނޫނީވިއްޔާ ހެދިފައި އޮތް ލޭންޑްޔޫސް ޕްލޭންގައި އޮންނާނެ، ހައުސިންގއަށް، ޕަބްލިކް ހައުސިންގއަށް ކަނޑައަޅާފައި އޮންނަ އޭރިއާވެސް ހިއްކި ބިމުގައި. އެހެންވީމާ، ހައުސިންގ އަޅަންވެސް ތިޔަބޭފުޅުން ބޭނުންވާނެ، މައިގަނޑު އެއް ސަބަބަކަށް ވާނެ، އާބާދީއާއި ތަރައްޤީ އެއްފަސްކުރުން. އަދި މި ރަށުގެ ރައްޔިތުންނަށް، ޒުވާނުންނަށްވެސް ހައުސިންގ ލިބިގެންދިޔުން. އެހެންވީމާ، އަޅުގަނޑުމެން މިތިބީ ތިޔަބޭފުޅުންނާ އެއްވިސްނުމެއްގައި މިކަމުގައި. ތިޔަބޭފުޅުންނާ ގާތުން، ރައްޔިތުންގެ އުންމީދުތަކުގައި ކުލަޖައްސައިދިނުމުގައި، އަޅުގަނޑުމެން ތިޔަބޭފުޅުންނާ އެކުގައި ކުރިއަށް މިދަނީ. އިރާދަކުރެއްވިއްޔާ، އަޅުގަނޑުމެން ހައުސިންގގެ ދާއިރާއިންވެސް ކަންތައްތައް ވަރަށް ރަނގަޅަށް މި ދާއިރާއަށް، މި ސަރަޙައްދަށް، މި ދެ ރަށަށް ގުޅިގެންދާގޮތަށް، މި ކޯޒްވޭގެ ވަސީލަތުގެ ބޭނުންކޮށްގެން އަޅުގަނޑުމެން ކުރާނަން. އެއީ، ތިޔަބޭފުޅުންނަށް އަޅުގަނޑު ދޭ ވަރަށް މުހިންމު ޔަޤީންކަމެއް. އަދި ދޭ އުފާވެރި ޚަބަރެއް. އެހެންވީމާ، ވަކި އަދަދަކަށް ހައުސިންގ ޔުނިޓު އަޅާނެ ވާހަކައާއި، މިވެނި ތާރީޚެއްގައި ފަށާނެ ވާހަކަ މިއަދު އަޅުގަނޑު މި ނުދެންނެވީ، މިއީ، ހަމަ ތިޔަބޭފުޅުންނާ އެކީގައި މަޝްވަރާ ކުރެވިގެން، ކުރިއަށް އޮތްތަނުގައި އަޅުގަނޑުމެން ފައިނަލްކުރާނެ ކަންކަމަށްވާނެތީވެ. އެންމެ މުހިންމު ކަންތައް މި ދެންނެވީ. ކޯޒްވޭ އަޅާނަމޭ އިރާދަކުރެއްވިއްޔާ. ދެން އެއާއެކީގައި، މި ރަށުގައި މިހާރު ކުރަންހުރި މުހިންމު ކަންކަން ކުރިއަށްދާނެ ގޮތް މި ދަންނަވާލީ. ސްކޫލް ދާއިރާ، ޞިއްޙީ ދާއިރާ، ކުޅިވަރުގެ ދާއިރާތައް، މި ހުރިހާ ކަމެއް މިހިރީ މިގޮތަށް ރޭވިފައި.
ދެން، މި ދެންނެވިހެން، މިހާރުން ފެށިގެން މިއަދު ފެށިގެން މިދިޔަ މަޝްރޫޢުތައް. މިކަންކަން ވެގެންދިޔުމުން، ހަމަ ޔަޤީނުންވެސް ތިޔަބޭފުޅުންނަށް ވަރަށް މުހިންމު ކަންކަން މިވަނީ. އާބާދީ ތަރައްޤީ އެއްފަސްވުމަށްވެސް، އަދި މި ރަށުން ބޭރަށްގޮސް، އެހެން ތަންތާނގައި ދިރިއުޅޭ ފަރާތްތަކަށްވެސް، އެނބުރި އައުމަށްވެސް ވަރަށް މުހިންމު، އަންނަންވީ ސަބަބުތަކެއް އޮތުން. އެންމެ މުހިންމު އެއް ސަބަބަކަށްވާނީ، ވަޒީފާ ލިބިގެންދިޔުން. އެހެންވީމާ، އަޅުގަނޑަށް ހަމަ ޔަޤީން، މި އަތޮޅުގެ ރައްޔިތުން ޓޫރިޒަމް އެހާބޮޑަށް މި އަތޮޅަށް ގެންނަން ބޭނުންވަނީ. އެއީ، އަޅުގަނޑުވެސް ހަމަ ބޭނުންވާ ގޮތަކީ. އެހެންވީމާ، އަޅުގަނޑުމެން ވަރަށް ބޮޑެތި ޑިސްކައުންޓްތައް ދީފައި، ކުރިއަށް ދެ އަހަރު ދުވަހަށް ލުއިކޮށްލީ ހުރިހާ ކަމެއް. އިކުއިޒިޝަން ފީ، ރެންޓް ދެއްކުން، ދެން، ރޭގައި ތަފްޞީލުދިން ހުރިހާ ކަމެއް.
އަޅުގަނޑުމެން މި ހުޅުވާލި ރަށްތަކަށް މިހާރު ބައެއް ފަރާތްތަކުން ޝައުޤުވެރިކަން ފާޅުކުރަމުން އެބަދޭ. އޭގެތެރެއިން، ބައެއް ރަށްތަކަށް މިހާރު އެވޯޑުވެސް އަޅުގަނޑުމެން ކޮށްފިން. ދެން، އެ ފަރާތްތަކުން ފައިސާ ދެއްކީމަ، އެގްރީމަންޓްގައި ސައިން ކުރެވިގެންދާނެ. މިތާ ކައިރީގައި އޮތް ފަޅުރަށެއްވެސް އެގޮތަށް އަޅުގަނޑުމެން ހުޅުވާލާފައި، މިހާރު އެވޯޑުވެސް ކުރެވިފައި އޮތީ. ދެން އަތޮޅުތެރޭގައި ހުރި އެކި ހިސާބުތަކުން މި ހުޅުވާލި ރަށްތައް، އެގޮތަށް ބައެއް ފަރާތްތަކުން މަޢުލޫމާތުތައް ގެންގޮސް، ސަބްމިޝަންތައްވެސް ހަދަމުންދަނީ. ޢަމަލީގޮތުން ހަދަމުންދާ، ފިޒިކަލް ކޮންސްޓްރަކްޝަން ވަރކް ހިނގަމުން މި އަތޮޅުގައި އެބަދޭ، ދެ ރަށެއްގައި. ދެ ރިޒޯޓެއް ހެދުމުގެ މަސައްކަތް ވަރަށް ބާރަށް އެބަ ހިނގާ. އޭގެތެރެއިން އެއް ރިޒޯޓު ހަދާ ފަރާތުން އަޅުގަނޑަށް ޔަޤީންކަންދޭ، މި އަންނަ އަހަރު ނިމުމުގެ ކުރީގައި، އެ ރިޒޯޓު ހުޅުވާނެ ކަމަށް. އެހެންވީމާ، އިރާދަކުރެއްވިއްޔާ ކުރިއަށް އޮތީ އުފާ ފާގަތި ދުވަސްތައް. ޓޫރިޒަމް އިންޑަސްޓްރީ މި އަތޮޅަށް ގެނެވި، ހަމަ ޙަޤީޤަތުގައިވެސް، ތަރައްޤީގެ ރާޑަރުގެ މެދަށް މި އަތޮޅު އަންނަމުން މިދަނީ އިރާދަކުރެއްވިއްޔާ. އެކަން އަޅުގަނޑުމެން ކޮށްދޭނަން.
އާދެ، ތަފްޞީލުކޮށްވެސް، ގިނައިންވެސް ދައްކަން އޮތީ ހަމަ މި ވާހަކަ. އެހެންވީމާ، ޚުލާޞާކޮށްލާފައި އަނެއްކާވެސް ދަންނަވާލާނީ، ކިނބިދޫ ރައްޔިތުންގެ ތަރައްޤީގައި ހުރި ކަންކަމަކީ، އަޅުގަނޑު ހަމަ އެންމެ އިސްކަންދޭ ކަންކަމޭ. ކޯޒްވޭއިން ފެށިގެން، ދެންހުރި ކަންކަން، އިރާދަކުރެއްވިއްޔާ ކޮށްދޭނަން. އެގޮތުގައި އަޅުގަނޑުމެން ދާނީ ތިޔަބޭފުޅުންނާ އެކީގައި ކުރިއަށް.
އަދިވެސް އެއްފަހަރު، ވަރަށް ބޮޑަށް ޝުކުރިއްޔާ!
އަޅުގަނޑުގެ ދުޢާއަކީ، އަޅުގަނޑުމެން މިކުރާ މަސައްކަތްތަކުގައި، اللهُ سُبْحَانَهُ وَتَعَالَى ބަރަކާތް ލެއްވުން. އާމީން.
وَمَا تَوْفِيقِي إِلَّا بِاللَّهِ عَلَيْهِ تَوَكَّلْتُ وَإِلَيْهِ أُنِيبُ.
وَالسَّلَامُ عَلَيْكُمْ وَرَحْمَةُ اللهِ وَبَرَكَاتُه.