بِسْمِ ٱللّٰهِ ٱلرَّحْمٰنِ ٱلرَّحِيمِ
اَلْحَمْدُ للَّهِ رَبِّ الْعاَلَمِينْ، وَالصَّلاَة وَالسَّلاَمُ عَلَى رَسُولِ ٱللَّهِ، وَعَلَى آلهِ وَصَحْبِهِ أَجْمَعِينْ.
އޮމަދޫގެ ލޮބުވެތި އެންމެހައި ރައްޔިތުން، ރަށުގެ ކައުންސިލަރުން، ދާއިރާގެ ޢިއްޒަތްތެރި މަޖިލިސް މެންބަރު، މުއައްސަސާތަކުގެ ވެރިން، ރަށުގެ ޚިދުމަތްތެރި އިސް ރަށްވެހިން، އަދި ވަޑައިގެން ތިއްބެވި އެންމެހައި ޢިއްޒަތްތެރިން، މި ޖަލްސާ، ދުރާއިގާތުން ބައްލަވަމުން ގެންދަވާ، އަދި އަޑުއައްސަވަމުން ގެންދަވާ، ލޮބުވެތި އެންމެހައި ރައްޔިތުން؛
السَّلامُ عَلَيْكُم ورَحْمَةُ اللهِ وَبَرَكاتُهُ.
އާދެ، އަޅުގަނޑުމެންނަށް މި ރަށަށް މިއަދު ހެނދުނު އާދެވުނު ވަގުތު، މި ރަށުގެ ރައްޔިތުން ވަޑައިގެން، އަޅުގަނޑުމެންނަށް ވިދާޅުވި މަރުޙަބާއަށްޓަކައި، އަޅުގަނޑުމެންގެ ހިތުގެ އެންމެ ފުންމިނުން އޮމަދޫގެ ލޮބުވެތި ރައްޔިތުންނަށް ވަރަށް ބޮޑަށް ޝުކުރު ދަންނަވަން.
އާދެ، މި ރަށުގެ ތަރައްޤީއަށް ހުރި ކަންކަމުގައި، އަވަސްމިނުގައި އެކަންކަން ކޮށްދިނުމަކީ، ސަރުކާރުގެ އެންމެ މުހިންމު މަސްއޫލިއްޔަތު. އެންމެ ބޮޑުވެފައިވާ މައްސަލަ ޙައްލުކުރުމުގައި ވަރަށް ލަސްވެގެން ހިނގައްޖެ. ފެނާއި ނަރުދަމާ މަޝްރޫޢަކީ، އަޅުގަނޑު ކުރިން ތިޔަބޭފުޅުންނާ ބައްދަލުވީއިރުގައިވެސް، ހަމަ އެހިސާބުގައި އޮތް މައްސަލައެއް.
އާދެ، މިކަމުގައި ވެފައި އޮތްގޮތް ސާފުކޮށްލައިދޭން އަޅުގަނޑު ބޭނުން. އާދެ، މި މަޝްރޫޢު ހިންގަނީ އަމިއްލަ ކުންފުންޏަކުން. އެފަރާތަށް އަޅުގަނޑުމެން މިހާރު މިދިޔަ ދުވަސްތަކުގައި ވާނީ، އެ ބޭފުޅުންނަށް ދޭންހުރި ހުރިހާ ފައިސާއެއްވިއްޔާ ދެވިފައި. ޕެންޑިންގ އެއްވެސް ބިލެއް މިހާރު ނޯންނާނެ. އެއްވެސްވަރަކަށް މަސައްކަތް ނުކޮށް ތިބެންޖެހޭނެ އެއްވެސް ސަބަބެއް ނޯންނާނެ. އެހެންވީމާ، ފައިސާދެވި، ކަންތައްތައް ކުރެވޭނެގޮތް ހަދައިދެވިފައި ވާނީ. އަޅުގަނޑުމެން މި ބަލަނީ، އެގްރީމަންޓް ކެންސަލްނުކޮށް، އެ މީހުން ލައްވައި އެ މަސައްކަތްކޮށް ނިންމޭނެ ގޮތެއް ހެދޭތޯ. އެގޮތަށް މަސައްކަތް ކުރިއަށް ނުގެންދާ ކަމުގައިވާނަމަ، ކޮންމެގޮތެއްވިޔަސް، ޤާނޫނީ ހަމަތަކުގެމަތިން، އެގްރީމަންޓަށް ނިމުމެއް އަޅުގަނޑުމެން ގެންނާނަން. ގެނެސްގެންވިޔަސް، އެހެން ރަނގަޅު ކުންފުންޏަކާ ހަވާލުކޮށްގެން ކަމުގައިވިޔަސް، މަސައްކަތް ނިންމާނަން. އަޅުގަނޑަށް އެނގޭ ހަމަ ވަރަށް ވަރަށް ދަތިވާ މައްސަލައެއްކަން. އެންމެ ގިނަ މީހުންނަށް، އެންމެ ބޮޑަށް ދަތިވާ މައްސަލަ މިއީ. އެހެންވީމާ، އެކަން އަދިވެސް އެ ކުންފުނި މެދުވެރިކޮށް ކުރުމަކީ، މީގައި އަޅުގަނޑުމެން އިސްކަންމިދޭ ގޮތް. ޕެންޑިންގ އެއްވެސް ބިލެއް ނެތް. ސަރުކާރުން ފެސިލިޓޭޓް ކޮށްދޭންޖެހޭ ކަމެއްވެސް ނެތް. ހުރިހާ ކަމެއް އެވަނީ ހަމަޖައްސައިދީފައި.
އެހެންވީމާ، އަޅުގަނޑުމެން އަދިވެސް އެ ބޭފުޅުންނާ އިތުރަށް ވާހަކަދައްކާނަން މި ދަތުރަށްފަހުގައި. މަސައްކަތް އަވަސްކޮށް، ވަރަށް އަވަހަށް ކުރިއަށް ގެންދިޔުމަށް. އެކަމުގައި އެއްވެސްވަރަކަށް އަޅުގަނޑުމެން ހިތްހަމަޖެހޭ ފެންވަރުގެ ކުރިއެރުމެއް ނުފެންނަ ކަމުގައިވާނަމަ، ތިޔަބޭފުޅުންނަށް މި ދަތިވެފައިވާ މައްސަލައަށް ޙައްލެއް ގެނައުމަށް، އަވަހަށް މަސައްކަތް ރީ-ސްޓާރޓްވެ، އަވަހަށް ހިނގާނެގޮތް ނަހަދާކަމުގައިވަންޏާ، އަޅުގަނޑުމެން ބާޠިލުވެސްކުރާނަން. ކޮށްގެންވިޔަސް، އެހެން ބަޔަކާ ހަވާލުކޮށް، މި މައްސަލަ ޙައްލުކޮށްދޭނަން. އެހެންވީމާ، އަޅުގަނޑު ބޭނުންވީ، މިކަން ސާފުކޮށްދޭން. އަޅުގަނޑުމެންނަށްވެސް އެންމެ މުހިންމު މަޝްރޫޢު، މި ރަށުގެ ރައްޔިތުންނަށްޓަކައި ކޮށްދިނުމަށް. ދެންހުރި ކަންތައްތައް ހަމަ ޔަޤީނުންވެސް އެއަށްވުރެ ފަހަތަށް އަންނަނީ. ދެންވެސް މުހިންމު ކަންކަން ހުރި. އެހެންނަމަވެސް، މިއީ އެންމެ ބޮޑު ކަންތައް. އެހެންވީމާ، އަޅުގަނޑު މިކަމުގައި ތިޔަބޭފުޅުންނަށް މި ދެންނެވި ގޮތަށް، އަޅުގަނޑުމެން ވަރަށް ގާތުން، ވަރަށް އިސްކަންދީގެން މިކަން ބަލައި، އަދި އަޅަންޖެހޭ ފިޔަވަޅުތައް އަޅާނަން. އިރާދަކުރެއްވިއްޔާ، އަޅުގަނޑުމެން މިކަން ޙައްލުކޮށްދޭނަން.
އާދެ، ދެންހުރި ކަންކަމަށް ބަލާއިރުގައިވެސް، ސްކޫލް މަޝްރޫޢުވެސް، ނުހިނގާ އޮތް މަޝްރޫޢެއް މިއީ. ސްކޫލަށް ބޭނުންވާ ވަސީލަތްތަކާއި، ޖާގަ އިތުރުކުރުމަށް އިމާރާތް ނިމުން ވަރަށް މުހިންމު. މީގައިވެސް އޮތީ ކުރީގައި ހަދަންފަށާ، އެ މަސައްކަތްކުރި ކުންފުނިން މަސައްކަތް ނުކޮށް ދޫކޮށްލާފައި. ދެން، އޭގެ ސަބަބުން އަޅުގަނޑުމެންނަށް ވަރަށް ގިނަ ދުވަސްތަކެއްދިޔަ ބަޔަކާ ހަވާލުކުރަން. ސަރުކާރުގެ ކުންފުންޏަކާ މިހާރު މިވަނީ ހަވާލުކުރެވިފައި. ތަކެތި މޮބިލައިޒްކޮށް، މަސައްކަތް ފެށުމުގެ މަރުޙަލާ މިހާރު ކުރިއަށްދަނީ. ދެން، ރިސޯސަސް ވަރަށް ރަނގަޅަށް ހަމަކޮށްދީގެން، ވަރަށް ބާރު ސްޕީޑްގައި އިރާދަކުރެއްވިއްޔާ މަސައްކަތް ރީ-ސްޓާރޓް ވެގެންދާނެ. އަޅުގަނޑުމެން އިރާދަކުރެއްވިއްޔާ މި އަމާޒުކުރަނީ، އަދި ބޭނުންވަނީވެސް، މި އަންނަ ދިރާސީ އާ އަހަރު ފެށެންވާއިރަށް މަސައްކަތް ނިންމާލަން. މި މަސައްކަތް މި ކުރަނީ ފެނަކަ ކުންފުނިން. އެކަމަށް ބޭނުންވާ ހުރިހާ ކަމެއް ފެނަކައަށް ހަމަޖައްސައިދީގެން، އިރާދަކުރެއްވިއްޔާ އަޅުގަނޑުމެން އެގޮތަށް ގެންދާނަން. އެހެންވީމާ، އިރާދަކުރެއްވިއްޔާ ސްކޫލްގެ މި ދަތިތަކަށް ޙައްލެއް ގެނައުމަށް، މި މަޝްރޫޢު އަޅުގަނޑުމެން ދިރާސީ އާ އަހަރު ފެށެންވާއިރަށް، އިރާދަކުރެއްވިއްޔާ ނިންމާނަން. އެކަން ތިޔަބޭފުޅުންނަށް އަޅުގަނޑު ދަންނަވާލަން. އޭރުން، މަލްޓި ޕަރޕަސް ހޯލާއި، ކްލާސްރޫމާއި، ދެންވެސް މި ދަތިވާ ހުރިހާ ކަމެއް ޙައްލުވާނެ ކަމަށް އަޅުގަނޑަށް ޤަބޫލުކުރެވޭ.
އާދެ، އަޅުގަނޑުމެން މަގު ހެދުމުގެ މަޝްރޫޢުގައި ސޮއިކުރީ، ދެން އޭގެ ޑިޒައިން ކުރުމާއި، އެއަށް ވާންޖެހޭ ތައްޔާރީތައް އަޅުގަނޑުމެން ވުމަށްޓަކައި. ފެނާއި ނަރުދަމާގެ މަސައްކަތް ނިމުނުހާ އަވަހަކަށް، އޭރުން އިމީޑިއަޓްލީ މަސައްކަތް ފެށޭނެ. އެހެންވީމާ، އިރާދަކުރެއްވީތީ އެކަން އެވަނީ މިހާރު ދެން ހަމަޖެހިފައި. މީގެ ސަބަބުން، ރައްޔިތުންނަށް ހަމަ ޔަޤީނުންވެސް، ފެނާއި ނަރުދަމާ ނިމޭތަނުން މަސައްކަތް ފެށޭކަމަށްވަންޏާ، ވަރަށް ބޮޑު ހިތްހަމަޖެހުމެއް މަގުތައް ބޭނުންކުރުމުގައި ލިބިގެންދާނެ.
އާދެ، އަދި އިތުރު ކަންކަމަށް ބަލައިލާއިރު، ކުޅިވަރުގެ ދާއިރާއިން ދެތިން ކަމެއް ދަންނަވާލަން އަޅުގަނޑު ބޭނުން. އެއްކަމަކީ، މިހާރު ބޭނުންކުރާ ފުޓްސަލް ދަނޑުގެ ޓަރފް އެވަނީ ވަރަށް ބޮޑަށް ހަލާކުވެފައި. އަދި ލައިޓްތައްވެސް ރަނގަޅެއްނޫން. އެ ޓަރފް ބަދަލުކޮށް އާދެ، މުޅިން އާ ޕިޗެއް، އާ ޓަރފެއް އިރާދަކުރެއްވިއްޔާ އެޅުމާއެކީގައި، ލައިޓްތަކުގެ މައްސަލަ ޙައްލުކޮށްދިނުން. އިރާދަކުރެއްވިއްޔާ، އަޅުގަނޑުމެން މި އަންނަ އަހަރަށް ބަޖެޓު ކަނޑައަޅާއިރުގައި ހިމަނައިގެން، އަހަރުގެ އެންމެ ކުރީކޮޅު، ޖަނަވަރީމަސް ހިސާބުގައި، އެ މަސައްކަތް ކޮށްދޭނަން. ފުޓްސަލް ދަނޑު ބޭނުންކުރާ ހުރިހާ ބޭފުޅުންނަށް އެކަން އަޅުގަނޑު ދަންނަވާލަން.
ހަމައެއާއެކީގައި ވޮލީކޯޓެއް، އާ އަހަރުގެ ބަޖެޓުގައި ހިމަނައިގެން، އަހަރުގެ ކުރީކޮޅު، އަޅުގަނޑުމެން މި ރަށުގައި ވޮލީކޯޓެއް ޤާއިމުކޮށްދޭނަން. އެހެންވީމާ، މިދެ ކުޅިވަރު މި ރަށުގައި ކުޅެވޭނެގޮތެއް އަޅުގަނޑުމެން ހަމަޖައްސައިދޭނަން.
އަދި އެއާއެކީގައި، މި އަންނަ އަހަރުގެ ބަޖެޓުގައި ހިމެނިގެންދާނެ، އިތުރު މިސްކިތެއް އެޅުންވެސް. މި ރަށުގައި އާ މިސްކިތެއްވެސް މި އަންނަ އަހަރުގެ ބަޖެޓުގައި އަޅުގަނޑުމެން ހިމަނާފައި މިހާރު އޮންނާނީ. އެހެންވީމާ، އިރާދަކުރެއްވިއްޔާ އެވެސް މި އަންނަ އަހަރު، މި ރަށުގައި ފެށިގެންދާނެ މަޝްރޫޢެއް.
އާދެ، މީގެ އިތުރަށް މިހާރު ޞިއްޙީ ދާއިރާއަށް ބަލާއިރުގައި، ދެ ކަމެއް ކުރަން އަޅުގަނޑުމެން ނިންމާފައި މިއޮތީ. އެއްކަމަކީ އެމްބިއުލެންސެއް ހޯދައިދިނުން. އަޅުގަނޑުމެން އެބަ ގެންނަން މިހާރު ވަރަށްގިނަ އެމްބިއުލެންސްތަކެއް. ގާތްގަނޑަކަށް ފަންސާހަކަށް ރަށަށްވާވަރަށް އެމްބިއުލެންސް އެބަގެންނަން. މި އަހަރުގެ ތެރޭގައި ރާއްޖެއަށް ލިބޭނެ. މިހާރު ދަނީ ގެނައުމުގެ މަސައްކަތް. އޭގެތެރެއިން، މި ރަށަށްވެސް އެމްބިއުލެންސެއް ފޯރުކޮށްދެވޭނެ. އެހެންވީމާ، ބައްލަވަންވީ، މި އަހަރު ނިމުމުގެ ކުރީގައި އިރާދަކުރެއްވިއްޔާ ޞިއްޙީ މަރުކަޒަށް އާ އެމްބިއުލެންސެއް ލިބިގެންދާނެ ކަމަށް.
އޭގެއިތުރަށް، ޖާގައަށް ދިމާވެފައިވާ ދަތިކަން ހައްލުކޮށްދިނުމަށް ޞިއްޙީ މަރުކަޒުގެ އެކްސްޓެންޝަން މަޝްރޫޢެއް، މި އަންނަ އަހަރުގެ ބަޖެޓުގައި އަޅުގަނޑުމެން ހިމަނައިގެން، އެ މަޝްރޫޢުވެސް އިރާދަކުރެއްވިއްޔާ ކުރިއަށްދާނެ. އެހެންވީމާ، އެކަންވެސް އަޅުގަނޑު ތިޔަބޭފުޅުންނަށް ދަންނަވާލަން.
އާދެ، އެހެންވީމާ، މައިގަނޑު ގޮތެއްގައި މި ހުރިހާ ކަމެއް މިހިރީ މިގޮތަށް. ދެން އަޅުގަނޑު ހަމަ ދަންނަވާލަން ބޭނުން، މި ރަށުގައި ދެންހުރި މަޝްރޫޢުތަކަށް ބަލާއިރުގައި، މިއަދު މި ފެށުނު ފުލުހުންގެ މަރުކަޒުގެ މަސައްކަތްވެސް ހަމަ އިރާދަކުރެއްވިއްޔާ ވަރަށް ރަނގަޅަށް، ބާރަށް ކުރިއަށްދާނެ. އަދި ކުރިއަށްދާ ޔޫތު ސެންޓަރު، ނޫނީވިއްޔާ ފިޓްނަސް ރިކްރިއޭޝަން މަރުކަޒުވެސް މިހާރު އެދަނީ ނިމުމަކާ ހަމައަށް. އެހެންވީމާ، މި ހުރިހާ ކަމެއް އިރާދަކުރެއްވިއްޔާ، މިގޮތުގައި އަޅުގަނޑުމެން ކުރިއަށް ގެންދާނަން.
އާދެ، އިޤްތިޞާދީ ގޮތުން ބަލާއިރުގައި، އިޤްތިޞާދީ ގޮތުން ކުރަންހުރި ކަންކަމަށް ބަލާއިރުގައި، ތިޔަބޭފުޅުންގެ ފަޅުތެރޭގައި އިޚްތިޞާޞްގައި ހިމެނޭ ދެ ރަށެއް އޮވޭ. ކުރިންވެސް އަޅުގަނޑު ވާނީ މި ވާހަކަ ދަންނަވާފައި. މިކަމަށް އަޅުގަނޑުމެން މަގުތަކެއް ފަހިކޮށްދޭނަމޭ. ޤާނޫނުގައި ބަޔާންކޮށްފައި މި އޮންނަނީ، އިޚްތިޞާޞް ތެރޭގައި ފަޅުރަށެއް އޮތަސް، އެ ފަޅުރަށް އިޚްތިޞާޞްގެ ތެރޭގައި ބާއްވައިގެން ރިޒޯޓެއް ތަރައްޤީއެއް ނުކުރެވޭނޭ. އިންޓަރގްރޭޓަޑް ޓޫރިޒަމް ރިޒޯޓެއްވެސް އަދި ނޯމަލް ޓޫރިޒަމް ރިޒޯޓެއްވެސް ނުގެންދެވޭ. އިޚްތިޞާޞުން ވަކިކޮށްފައި، ދެން ރިޒޯޓަކަށް އިންވެސްޓަރެއް ހޯދައިގެން ރިޒޯޓެއް ހެދިދާނެ.
މީގެކުރިން އަޅުގަނޑުމެން ހަމަ މި އަހަރުގެ ތެރޭގައި ހުންނާނެ، ބައެއް އެހެން ރަށްރަށުގައިވެސް ކައުންސިލްތަކުން ބޭނުންވެގެން، އިންވެސްޓަރުން ހޯދައިގެން، އެ ރަށްރަށުގައި ފަޅުތެރޭގައި އޮންނަ، އިޚްތިޞާޞްގައި އޮންނަ ރަށްރަށް، އިޚްތިޞާޞުން ވަކިކޮށްދީފައި. ޓޫރިޒަމް އިންވެސްޓްމަންޓަށް ފުރުޞަތުދީގެން މިހާރު ބައެއް ރަށްރަށުގައި މަޝްރޫޢުތައްވެސް ފަށައިފި. އެހެންވީމާ، އިޚްތިޞާޞްގެ ތެރޭގައި ބާއްވައިގެނެއް ޓޫރިޒަމް ރިޒޯޓެއް ނުހިންގޭ. ރިޒޯޓު ނުހިންގޭ. އެހެނެއްނޫން، ސިޓީ ހޮޓެލް ކަހަލަ، އެހެންކަހަލަ ގެސްޓްހައުސް ޓޫރިޒަމް، މިކަހަލަ ކަންތައް ކުރެވޭނެ. އެހެނެއްނޫން، އިންޓަރގްރޭޓަޑް ޓޫރިޒަމް، ނޫނީވިއްޔާ ނޯމަލް ކޮންވެންޝަނަލް ޓޫރިޒަމް ރިޒޯޓުތަކެއް ނުހިންގޭ. އެއީ ޤާނޫނުގައި އެހެންއޮވޭ.
އެއީ، ޓޫރިޒަމް އިންޑަސްޓްރީ ހިމާޔަތް ކުރުމަށްޓަކައި، ޓޫރިޒަމް އިންޑަސްޓްރީ އިތުރަށް ކުރިއަށް ގެންދިޔުމުގައި އިޚްތިޞާޞުން ވަކިކޮށްގެން، ހަމަ ވަކިކުރިޔަސް ކައުންސިލަށް، ރައްޔިތުންނަށް، މިތާ ކައިރީގައި އޮތީމާ އެންމެ ފައިދާވާނީ. ވަޒީފާގެ ގޮތުންނާއި، އެހެން ގޮތްގޮތުން. އެހެންނަމަވެސް، އަޅުގަނޑު ހިތުން ކައުންސިލްތަކުން އޭގައި އެ ބައްލަވަނީ، އެގްރިމެންޓްގެ ތެރޭގައި ހިމަނައިގެން ކައުންސިލަށް އޭގެ ވަކި އިންސައްތައެއްގެ ޕްރޮފިޓެއް ލިބޭގޮތް ހަދަން. ދެން މީގައި ޤާނޫނީގޮތުން އެ ފުރުޞަތު ދެވޭނެތޯ، ނޫންތޯ، އެއީ އަޅުގަނޑުމެން އަދިވެސް ހަމަ ބަލަމުންދާ ކަމެއް. ވަކިން ވަކި ރަށެއްގެ ކައުންސިލަށް އެއިން ފައިދާވުން އެއީ، ހަމައެކަނި މިހާރު އަޅުގަނޑުމެންނަށް ހައްލުނުވެ އޮންނާނެ ކަމަކީ.
އެހެންނަމަވެސް، ރަށުގެ އެންމެ ކައިރީގައި އޮންނަ ފަޅުރަށްވީމާ، އެ ރަށް ރިޒޯޓަކަށް ހެދިގެންދިޔައިމާ، ހަމަ ރަށަށް އެއިން އެންމެ ބޮޑު ފައިދާއެއްވާނީ. އެހެންނަމަވެސް، ދާއިމީ އިންކަމެއްގެ ގޮތުގައި ކައުންސިލަށް އެއިން ފައިދާ ލިބޭނެގޮތް ހެދޭތޯ އަޅުގަނޑުމެން އަދިވެސް ހަމަ އެބަ ބަލަން. އެކަމުގައި މިހާރު އޮތް ޤާނޫނުގެ ތެރެއިން، ޤާނޫނު ބަދަލުނުކޮށް، ގަވާއިދުގެ ތެރެއިންވިޔަސް، އެކަމަށް ފުރުޞަތެއް ހޯދައިދެވޭތޯ. އެހެންވީމާ، އެއީ އަޅުގަނޑުމެން މަސައްކަތް ކުރަމުންދާގޮތް.
އެހެންވީމާ، މިހާރުވެސް ބޭނުންވަންޏާ، އިންވެސްޓަރަކަށް އެ ރަށް ހަވާލުކުރުމަށް، އެއީ ލިޔެކިޔުމުން ކުރާ ކަމެއް. އިޚްތިޞާޞުން ވަކިކުރުން. ރަށް އޮންނާނީ ހަމަ މި ރަށުގެ ފަޅުތެރޭގައި. މި ރަށުގެ ކައިރީގައި އޮންނަ ދެ ރަށް. އެހެންވީމާ، އެކަން ބައެއް އެހެން ރަށްރަށުގައި ކުރޭ މިހާރު. އަޅުގަނޑުމެން ހަމަ އެގޮތަށް ކައުންސިލްތަކުން އެދިގެން ކައުންސިލްތަކަށް، ކައުންސިލްތަކުން އިންވެސްޓަރުން ހޯދީމާ ހުންނާނެ މިހާރު އިޚްތިޞާޞްގެ ތެރޭގައި ހުންނަ ރަށްރަށް، އިޚްތިޞާޞުން ވަކިކޮށްފައި، ރިޒޯޓު ހަދަން ދީފައި. އެހެންވީމާ، އެގޮތަށް ބޭނުންކުރެވޭގޮތަށް އެބައޮތް.
އެހެންނޫނިއްޔާ ސިޓީ ހޮޓެލް، ގެސްޓްހައުސް، މިކަހަލަ ކަންކަން އިޚްތިޞާޞްގެ ތެރޭގައި ހިމަނައިގެން ކުރެވޭނެ. އެގޮތަށް ކުރެވޭނެ. އެގޮތަށް ބޭނުންވަންޏާ، ކަމާބެހޭ މިނިސްޓްރީތަކުން ހުއްދަ ނަގައިގެން ހަމަ މިހާރުވެސް ކުރިއަށްދާންވީ. އެކަމަށް މިހާރުވެސް ފުރުޞަތު އެބައޮތް. އޭރުން ކައުންސިލަށްވެސް އާމްދަނީ ލިބޭނެ. އެހެންވީމާ، ބޭނުންވާ މޮޑެލްގައި މިއުޅެނީ އިޝޫއެއް. އެހެންވީމާ، އެ ބޭނުންވާ މޮޑެލްގައި ކުރިއަށްދިޔުމުގައި މިހާރު ޤާނޫނުގައި އޮތްގޮތަށްދަންޏާ، މި ދެންނެވި ގޮތަށް، ގެސްޓްހައުސް ޓޫރިޒަމް، ނޫނީވިއްޔާ ސިޓީ ހޮޓެލް ޓޫރިޒަމަށް ދެވޭނެ.
އެހެންވީމާ، އަޅުގަނޑު ހަމަ ހިތަށްއެރީ، މިގޮތަށް ބައްދަލުވާއިރުގައި، ތިޔަބޭފުޅުންނަށް މިކަން އަޅުގަނޑު ސާފުކޮށްދިނުން ވަރަށް މުހިންމުވާނެއޭ. އެހެންނޫނީވިއްޔާ، މީގައި ވަރަށް ނޭނގުމުގެ ތެރޭގައި މި އޮންނަނީ. ދެން މިއީ ވަކި މި ރަށަށް އެކަނި ދަންނަވާ ވާހަކައެއްވެސް ނޫން. މިއީ ހަމަ އެހެން ރަށްރަށުގައިވެސް، އެހެން ކައުންސިލްތަކަށްވެސް މިކަމުގައި ޖަވާބު ބޭނުންވެފައި އޮތް ކަމެއް. އެހެންވީމާ، އެ ބޭފުޅުންނަށްވެސް ހަމަ މި ވާހަކަ އަޅުގަނޑު މި ދަންނަވާލީ.
އަޅުގަނޑު އެދެނީ، ކުރިއަށް ވަޑައިގަންނަވަން ކައުންސިލުން. އެކަމަކު ޤާނޫނަށް ބަދަލެއް ނުގެނެސް މިކަން ކުރަންޏާ މިގޮތަށް އޮންނާނީ. އެހެންނަމަވެސް، އަޅުގަނޑުމެން ބަލައިދޭނަން އަދިވެސް ޤާނޫނު ބަދަލުނުކޮށް، ގަވާއިދުގެ ތެރެއިން ރިޒޯޓެއް ހަދަންޏާވެސް، އޭގައި ގޮތެއް ހޯދެން އޮތްތޯ.
އޭގެއިތުރަށް، ދެން ހަމަ ދަތުރުފަތުރު ކުރުމުގައި، ހުޅަނގު ފަރާތުން ނެރެއް ކަނޑައިދިނުމަށް، މިއަދު އަޅުގަނޑުމެންނަށް ތިޔަބޭފުޅުންގެ އެ ރިކްއެސްޓް އައި. މިއީ އެއްގޮތަކަށްވެސް އަޅުގަނޑުމެން އަދި ދިރާސާކޮށްފައި އޮތް ކަމެއްނޫން. އެހެންނަމަވެސް، އޭގެ ލޮޖިކް އަޅުގަނޑަށް އަންޑަރސްޓޭންޑްވޭ. ވަރަށް ބޮޑަށް ރޫޓު ކުރުވާނެ ކަމެއް އެއީ. އެހެންވީމާ، އަޅުގަނޑުމެން އެކަމުގެ ދިރާސާ ފަށާނަން. އޭގެ ދިރާސާ، އޭގައި ކުރަންޖެހޭ ޓެކްނިކަލް ވަރަށްގިނަ ދިރާސާތައް ހުންނާނެ އެގޮތަށް ކުރުމުގައި. އެހެންވީމާ، އެ މަސައްކަތް އަޅުގަނޑުމެން ފަށާނަން. ދެން އެއީ ހަމަ ކުރެވޭވަރުގެ ކަމެއް ވެއްޖިއްޔާ، ޓެކްނިކަލީ، ފައިނޭންޝިއަލީ، އެ ފީޒިބަލްވަންޏާ، އަޅުގަނޑުމެން ހަމަ ވަރަށް ބޮޑަށް އެކަމަށް އިސްކަންދޭނަން. އަޅުގަނޑުމެންނަށް މިއަދު މިކަން ރިކްއެސްޓް އައިސްފައި އޮތީމާ އެކަން މިއަދު ހަމަ އަޅުގަނޑު ތިޔަބޭފުޅުންނަށް ދަންނަވާލީ.
އާދެ، އެހެންވީމާ، މި ދެންނެވި ގޮތަށް، އަޅުގަނޑުމެން މި ރަށުގެ ތަރައްޤީގެ ހުރިހާ މަސައްކަތްތަކެއް ކުރިއަށް ގެންދާނަން. ހަމަ އަޅުގަނޑު ދެންނެވި ތާރީޚުތަކަށް ކަންކަން ނިންމައިދޭނަން އިރާދަކުރެއްވިއްޔާ. ސްކޫލް މަޝްރޫޢާއި، ދެން މިހިރަ ކަންކަން. އެހެންވީމާ، އެގޮތުގައި މި ހުރިހާ މަސައްކަތެއް ކޮށްދޭނަން.
އެންމެ ބޮޑުވެފައި އޮތް މައްސަލައަށް އަދިވެސް ހަމަ އިޝާރާތް ކޮށްލާފައި ނިންމާލާނީ. އެ ކުންފުނިން އެކަން ނުކުރާ ކަމަށްވަންޏާ، އަޅުގަނޑުމެން ހަމަ މާލެގޮސްފައި ވަރަށް ސީރިއަސްކޮށް އެބޭފުޅުންނާ އެކީގައި ވާހަކަދައްކައި، އިމީޑިއަޓްލީ މޮބިލައިޒްވެ، ބާރު ސްޕީޑްގައި ދާގޮތަށް މަސައްކަތް ނުފަށާކަމަށް އަޅުގަނޑުމެންނަށް ގަބޫލުކުރެވެންޏާ، ހަމަ ޓަރމިނޭޓް ކޮށްފައި އެހެން ބަޔަކު ހޯދާނަން. އެހެންވީމާ، އެ މައްސަލަ އެގޮތުގައި އަޅުގަނޑުމެން ކުރިއަށްގެންދާނަން. ދެންހުރި ކަންކަންވެސް އަޅުގަނޑު މި ދެންނެވި ގޮތަށް ކުރިއަށްދާނެ.
އާދެ، އަދިވެސް އެއްފަހަރު، ތިޔަބޭފުޅުންނަށް ވަރަށް ބޮޑަށް ޝުކުރު ދަންނަވަން. އަދި އިރާދަކުރެއްވިއްޔާ އަނެއްކާވެސް ތިޔަބޭފުޅުންނާ ބައްދަލުކޮށްލުމުގެ އުންމީދުގައި އަޅުގަނޑު ވަކިވެލަން.
އަޅުގަނޑުގެ ދުޢާއަކީ، އަޅުގަނޑުމެން މިކުރާ މަސައްކަތްތަކުގައި، اللهُ سُبْحَانَهُ وَتَعَالَى ބަރަކާތް ލެއްވުން. އާމީން.
وَمَا تَوْفِيقِي إِلَّا بِاللَّهِ عَلَيْهِ تَوَكَّلْتُ وَإِلَيْهِ أُنِيبُ.
وَالسَّلَامُ عَلَيْكُمْ وَرَحْمَةُ اللهِ وَبَرَكَاتُه.