بِسْمِ ٱللّٰهِ ٱلرَّحْمٰنِ ٱلرَّحِيمِ
اَلْحَمْدُ للَّهِ رَبِّ الْعاَلَمِينْ، وَالصَّلاَة وَالسَّلاَمُ عَلَى رَسُولِ ٱللَّهِ، وَعَلَى آلهِ وَصَحْبِهِ أَجْمَعِينْ.
ވޭމަންޑޫގެ ލޮބުވެތި އެންމެހައި ރައްޔިތުން، ރަށުގެ ކައުންސިލްގެ ރައީސް، އަދި މި ދާއިރާގެ ޢިއްޒަތްތެރި މަޖިލިސް މެންބަރު، އަތޮޅު ކައުންސިލްގެ ރައީސް، ކައުންސިލަރުން، މުއައްސަސާތަކުގެ ވެރިން، މި ރަށުގެ ޚިދުމަތްތެރި އިސް ރަށްވެހިން، ވަޑައިގެން ތިއްބެވި އެންމެހައި ޢިއްޒަތްތެރިން، މި ޖަލްސާ، ދުރާއިގާތުން ބައްލަވަމުން ގެންދަވާ ލޮބުވެތި އެންމެހައި ރައްޔިތުން؛
السَّلامُ عَلَيْكُم ورَحْمَةُ اللهِ وَبَرَكاتُهُ.
މިރޭ އަޅުގަނޑުމެންނަށް މި ރަށަށް އާދެވުނު ވަގުތު، މި ރަށުގެ ލޮބުވެތި ރައްޔިތުން ވަޑައިގެން، އަޅުގަނޑުމެންނަށް ވިދާޅުވި ހޫނު މަރުޙަބާއަށްޓަކައި، އަޅުގަނޑުގެ ހިތުގެ އެންމެ ފުންމިނުން ވޭމަންޑޫގެ ލޮބުވެތި އެންމެހައި ރައްޔިތުންނަށް ވަރަށް ބޮޑަށް ޝުކުރު ދަންނަވަން.
އާދެ، މިއަދު އަޅުގަނޑު މިތަނަށް މިއައީ، ރިޔާސީ އިންތިޚާބުގައި އަދި އޭގެފަހުންވެސް ތިޔަބޭފުޅުންގެ ކަންކަމުގައި، ޙަޤީޤީ ކުލަ ޖައްސައިދިނުމުގެ ފުރިހަމަ ޢަޒުމުގައި. ތިޔަބޭފުޅުންނަށްވީ ވަޢުދުތައް ފުއްދުމުގެ ޢަމަލީ މަސައްކަތް ފެށުމަށް. އެގޮތުން އަޅުގަނޑުމެން މިއަދު މި ސޮއިކުރި،,މި ޖަލްސާގައި މި ސޮއިކުރި ތިން އެއްބަސްވުމަކީވެސް ހަމަ މިފަދަ މުހިންމު ތިން ދާއިރާއަކުން މި ރަށުގެ ތަރައްޤީއަށް ބޮޑު ކުރިއެރުމެއް ލިބިގެންދާނެ ތިން މަޝްރޫޢުކަން އަޅުގަނޑަށް ޔަޤީން.
މަގުތައް ވަރަށް ބޮޑަށް ހަލާކުވެ، ވަރަށް ގިނަ ގެއްލުން ރައްޔިތުންނަށް އޭގެ ސަބަބުން، ޖިސްމާނީގޮތުންވެސް އަދި ހުރިހާ ގޮތަކުންވެސް ލިބެމުންދާ ހާލަތުގައި މި ރަށުގެ މަގުތައް އޮތީ. އެހެންކަމުން، އަޅުގަނޑުމެން މަގު ހެދުމުގެ މަޝްރޫޢުގައި މި ސޮއިކުރީ. ވަރަށް އަވަސް ސްޕީޑްގައި އިރާދަކުރެއްވިއްޔާ އެކަންކޮށް ނިންމާލުމަށް. އިރާދަކުރެއްވިއްޔާ، ވަރަށް ފުރިހަމަކަމާ އެކީގައި، މި މަޝްރޫޢު ތިޔަބޭފުޅުންނަށް ނިންމައިދޭނަން. އެ ޔަޤީންކަން އަޅުގަނޑު އަރުވަން.
ހަމައެފަދައިން އަޅުގަނޑުމެން މިރޭ ދެން ސޮއިކުރި މަޝްރޫޢުތަކަށް ބަލައިލާއިރު ބަނދަރު ހެދުމުގެ މަޝްރޫޢަކީ، ހަމަ އެހާމެ މުހިންމު، އެހާމެ ދަތިވެފައިވާ މައްސަލައެއް ހައްލުކުރުމަށް ސޮއިކުރެވުނު މަޝްރޫޢެއް. ބަނދަރު އަޕްގްރޭޑް، ކީ ނަމަވެސް، ހަމަ މުޅިން ޓޯޓަލް ރީ ކޮންސްޓްރަކްޝަނަކަށް މިދަނީ. ނެރު ބަދަލުކުރުން، މިހެންގޮސް އެތައްކަމެއް ހިމެނޭ. އާ ބަނދަރެއް ޙަޤީޤަތުގައި މި ހެދެނީ.
އެހެންވީމާ، އިރާދަކުރެއްވިއްޔާ، މި މަޝްރޫޢަކީވެސް ކަނޑައެޅިފައި އޮތް ތާވަލާ އެއްގޮތަށް ހަމަ މަޝްރޫޢުގެ އެގްރިމެންޓްގައި އޮތްގޮތަށް، ތިޔަބޭފުޅުންގެ ފަރާތްޕުޅުން، ކައުންސިލުން މިނިސްޓްރީއާ މަޝްވަރާކޮށް، ފައިނަލްކޮށްފައި އޮތް ކޮންސެޕްޓާ އެއްގޮތަށް، އިރާދަކުރެއްވީތީ ވަރަށް ހަލުވި ދުވެލީގައި ގޮސް ނިންމައިދީ، ތިޔަބޭފުޅުންނަށް އޭގެ ފުރިހަމަ ނަފާ، ލިއްބައިދޭނެ މަޝްރޫޢެއް ކަމުގެ ޔަޤީންކަންވެސް އަޅުގަނޑު ތިޔަބޭފުޅުންނަށް އަރުވަން.
އާދެ، މި ރަށަކީ މިއީ މި އަތޮޅުގެ ވެރިކަންކުރާ ރަށް. މި ރަށުގެ ތަރައްޤީއަށް ވަރަށް މުހިންމު، ރަށަށް ބިން އިތުރުވެގެންދިޔުން. ރިޔާސީ އިންތިޚާބުގައި އަޅުގަނޑު އެކަމަށް ރައްޔިތުންނަށް ވަޢުދުވިން. މިރޭ މި ސޮއިކުރި އެއްބަސްވުމުގެ ދަށުން، 25 ހެކްޓަރުގެ ބިން މި ރަށަށް އިތުރުކުރެވިގެންދާނެ. މި މަޝްރޫޢު އިރާދަކުރެއްވިއްޔާ ވަރަށް އަވަހަށް ޢަމަލީގޮތުން ފެށި، އެއްވެސް ހުއްޓުމެއް ނައިސް ގޮސް ނިމިގެންދާނެ. އާދެ، މި ތިން މަޝްރޫޢުގެ އިތުރުންވެސް، ގިނަ ކަންތައްތަކެއް މި ރަށުގައި ކުރަން އެބަހުރި.
އާދެ، އަޅުގަނޑުމެން މިއަދު މި ރަށަށް އައިސް ފެށި އާރު.ޓީ.އެލް.ގެ ޚިދުމަތަކީ މުޅި އަތޮޅަށް ވަރަށް މުހިންމުވެފައި އޮތް ޚިދުމަތެއް. ޖިއޮގްރަފިކަލީ ބަލާއިރުގައި، ވަރަށް ދުރުގައި ރަށްތައް ހުރީ. ޙަޤީޤަތުގައި އެއް އަތޮޅަށް ބަލާއިރުގައި އެންމެ ބޮޑު އަތޮޅު. ދުރުދުރުގައި ރަށްތައް ހުރީ. ވަރަށްދަތި ހާލުގައި، މި އޮތްހާ ޒަމާނުގައި، ތިޔަބޭފުޅުން އުޅެމުން ތިއައީ. އަޅުގަނޑު ރައްޔިތުންނަށް ވަޢުދުވިން، މިކަން ބަދަލުކުރާނެ ކަމަށް. މި އަތޮޅު ތަރައްޤީގެ ރާޑަރަށް އަރުވައިދޭނެ ކަމަށް. އެ ވަޢުދު ފުއްދަން އަޅުގަނޑު ވަޢުދުވީގޮތަށް އެކަން ކުރަމުން މިދަނީ. މިއީ އެގޮތުން ކުރެވުނު މަސައްކަތެއް.
މި ފެރީ ނިޒާމު ވެގެންދާނީ އިރާދަކުރެއްވިއްޔާ ވަރަށް ބޮޑު ތަކުލީފުތަކަކުން ތިޔަބޭފުޅުން ސަލާމަތްވެ، ކުރިއެރުންތައް ލިބިގެންދާނެ ކަމަކަށް. އަދި ކުރިއަށް އޮތް ދުވަސްތަކުގައި އިތުރު ލޯންޗުތައް އިތުރުކުރެވިގެންވެސް ދާނެ. އަޅުގަނޑުމެން މުޅި ރާއްޖެ ކަވަރކުރުމުގެ ޓާގެޓް ހާސިލުކުރުމަށްފަހު، ދެން އިތުރު ލޯންޗުތައް އިތުރުކުރަމުންވެސް ދާނަން. އަޅުގަނޑު ރިޔާސީ ބަޔާނުގައި މި އަހަރުގެ ފެބުރުވަރީމަހު އިޢުލާނު ކުރިން، މުޅި ރާއްޖޭގެ ހުރިހާ އަތޮޅެއްގެ މި ނިޒާމު އަޅުގަނޑުމެން ނިންމާނަމޭ. އަޅުގަނޑު ދެންނެވީ މި އަހަރުގެ ނިޔަލަށޭ. އެހެންނަމަވެސް، ކުޑަކުޑަ ޑިލޭއެއް އެބައާދޭ. މާރިޗުމަހާ ހަމައަށްދާއިރު، ދެތިންމަސް އިތުރުވޭ އެބަ. އަޅުގަނޑުމެންނަށް ބައެއް ކަންކަމުގައި މަސައްކަތްކޮށްލަން އިތުރަށް ވަގުތު ދިޔައިމާ. އެހެންނަމަވެސް، ހަމަ ކުރިއަށް މިއޮތީ. މިހާރު މި އަތޮޅު މި ނިމުނީ. ހައެއްކަމަސް ތެރޭގައި މުޅި ރާއްޖޭގެ ހުރިހާ އަތޮޅެއްގައި މި ނިޒާމު ޤާއިމުކޮށް ނިމޭނެ. ނިމުނީމާ ދެން މި އަތޮޅަށް އަދި އިތުރު ވެސެލްސް އަޅުގަނޑުމެން އިތުރުކުރާނަން.
އެހެންވީމާ، ކުރިއަށް އޮތީ، އިތުރަށް ފަސޭހަވުން. މި ދެންނެވިހެން ވަރަށް ދުރުދުރުގައި ރަށްތައް ހުރުމުން، މި އަތޮޅަށް އިތުރު އުޅަނދު ބޭނުންވާނެ. އެހެންވީމާ، މިއަދު އަދި މިގޮތަށް ފެށުނު ނަމަވެސް، މިހާރު މިފެށޭ ނެޓްވަރކްގެ ތެރެއިން ނަގާ ވަގުތު، ނަގާވަރު ކުރިއަށްއޮތްތާނގައި ވާނީ އިރާދަކުރެއްވިއްޔާ ކުރު. އެހެންވީމާ، އެ އުންމީދު އަޅުގަނޑު ހަމަ އުންމީދަކަށްވުރެ ބޮޑު ޔަޤީންކަމެއް ތިޔަބޭފުޅުންނަށް އަރުވަން. އާދެ، މީގެ ސަބަބުންވެސް ވަރަށް ބޮޑު ކުރިއެރުމެއް ލިބޭނެ. ޚާއްޞަކޮށް، މި ރަށަށް އަންނަން ބޭނުންވާ ފަރާތްތަކަށް. އަދި ހަމަ މި ރަށުން އެހެން ރަށްރަށަށް ދާ ފަރާތްތަކަށް. މިހެންގޮސް ހަމަ އަތޮޅުތެރޭގައި، ދަތުރުކުރުމާއި، މި ހުރިހާ ކަމަކަށް މިއީ ވަރަށް ބޮޑު ކަމެއް. އިރާދަކުރެއްވިއްޔާ ވެގެންދާނެ ކަމެއް.
އާދެ، އަޅުގަނޑު ރިޔާސީ އިންތިޚާބުގައި ވަޢުދުވިން، މި ރަށާއި ކިނބިދުއާ ދޭތެރޭ ގުޅާލުމަށް ކޯޒްވޭއެއް އެޅުމުގެ ވާހަކަ. ކޮށްދޭން ވަޢުދުވެފައި އޮތް ކަމެއް. އަޅުގަނޑުމެން މިހާރު މިކަން ކުރުމަށް، ވަރަށް ގިނަ ގޮތްގޮތުން މަޝްވަރާ ކުރުމަށްފަހު، މިހާރުވާނެ އިޢުލާނުކޮށްފައި. މި ކޯޒްވޭ އެޅުމަށް ޝައުޤުވެރިކަން ހުރި ފަރާތްތައް ހޯދަން. އާދެ، މިދޭތެރޭގައި މި ދުރުމިން ހުރި ގޮތާއި، އަދި މިދޭތެރޭގައި ކޯޒްވޭ އެޅުމުގައި ހުރި އެކިކަންކަމަށް ބަލާއިރުގައި، އެންމެ ފީޒިބަލް ވާނެ ގޮތެއްކަމަށް އަޅުގަނޑުމެންނަށް ފެނުނީ، ސަރުކާރުގެ ބަޖެޓުން، ސީދާ ޕީ.އެސް.އައި.ޕީ. މަޝްރޫޢެއް ގޮތަށް ކުރިއަށް ގެންދިޔުމުގެ ބަދަލުގައި މިގޮތަށް ކުރިއަށް ގެންދަން. އެހެންވީމާ، މި މަހުގެ 22 ވަނަ ދުވަހު ކޮންސްޓްރަކްޝަން މިނިސްޓްރީން ވާނީ އިޢުލާނުކޮށްފައި. މިކަމަށް ޝައުޤުވެރިވާ ފަރާތްތައް ހޯދުމަށް. އިންޓަރގްރޭޓަޑް ޓޫރިޒަމް އައިލެންޑެއްގެ ގޮތުގައި، މި ދޭތެރޭގައި އޮންނަ އެލާގައި އިންވެސްޓް ކުރުމަށް. އަދި އޭގެ ދަށުން، އެ ޕްރޮޖެކްޓް ނަގާ ފަރާތުން ކްރޮސް ސަބްސިޑީ މޮޑެލްގެ ދަށުން، މިކަން ކުރުމަށް ޝައުޤުވެރިކަން ހުރި ފަރާތްތަކަށް އަދި އެކުރާ އިންވެސްޓްމަންޓް ރިކަވަރ ކުރުމަށް އެހެން މޮޑެލްތައްވެސް ޕްރޮޕޯޒް ކުރެވޭގޮތަށް، ޕީ.ޕީ.ޕީ. މޮޑެލުންވިޔަސް، އިންވެސްޓަރ ފައިނޭންސް، ލޯނު ފައިނޭންސް، ކޮންޓްރެކްޓަރ ފައިނޭންސް، ހުރިހާ އޮޕްޝަންސްތައްވެސް ހުޅުވިފައިވާ ގޮތަށް، އަޅުގަނޑުމެން ހުޅުވާލާފައި މިވަނީ މިހާރު. އެހެންވީމާ، މިގޮތަށް އަޅުގަނޑުމެން މި ހުޅުވާލީ. އިރާދަކުރެއްވިއްޔާ، މިއީ ވަރަށް ކާމިޔާބުކަމާ އެކީގައި، ވާނެ ކަމެއްކަމަށް އަޅުގަނޑު ގަބޫލުކުރަން.
މިއާ ގުޅުވާލާފައި އަޅުގަނޑު ހަމަ ދަންނަވާލަން ބޭނުންވަނީ، ޓޫރިޒަމް ކުރިއެރުވުމަށް، އަޅުގަނޑުވީ އަނެއް ވަޢުދު އެއީ، މި އަތޮޅުގައި. ޓޫރިޒަމްގެ ފޮނިމީރުކަން މި އަތޮޅަށް ގެނެސްދޭނެ ކަމަށް އިރާދަކުރެއްވިއްޔާ. އެހެންވީމާ، ދެންމެ މި ދެންނެވި ޕްރޮޖެކްޓަށް އިންވެސްޓް ކުރާ ފަރާތްތަކަށްވެސް، އެ އިންސެންޓިވް، އެ ޝައުޤުވެރިކަން އުފެދިގެންދާނެ، މުޅި އަތޮޅަށް އަޅުގަނޑުމެން ޓޫރިޒަމް ގެނައުމަށްޓަކައި މިހާރު ދީފައި އޮތް ލުއިގެ ތެރެއިން.
އާދެ، މި އަތޮޅަށް ޚާއްޞަކޮށް އަދި ހަމަ ބައެއް އަތޮޅުތައްވެސް ހިމެނޭހެން، އަޅުގަނޑުމެން މި އަހަރުގެ ޖޫންމަހު 29 ވަނަ ދުވަހު އޮންނާނެ ހުޅުވާލާފައި ދެ އަހަރު ދުވަހުގެ ޕީރިއަޑަކަށް، ޚާއްޞަ ޑިސްކައުންޓްތަކެއް ދީފައި ޓޫރިޒަމަށް އިންވެސްޓް ކުރަން. ވަރަށް ވަރަށް ބޮޑެތި ލުއިތައް ދީފައި އިންވެސްޓް ކުރަން ހުޅުވާލީ. އޭގެތެރޭގައި ހަމަ ކްރޮސް ސަބްސިޑީ މޮޑެލުންވިޔަސް، އަދި ކްލޯޒް ބިޑިންގ، އޯޕަން ބިޑިންގ، ނޯމަލް ޕްރޮސެސުންވިޔަސް، އިންވެސްޓްކުރަން ބޭނުންވާ ފަރާތްތަކަށް. އެހެން އަތޮޅުތަކުގައި އަދި މި އަތޮޅުގައިވެސް މިގޮތަށް ހުޅުވާލުމުގެ ކުރިން ހުރި އެކި ރޭޓުތަކާއި، ހުރިހާ ކަމެއް ވަރަށް ބޮޑުތަނުން ކުޑަކޮށްލާފައި، ހުޅުވާލާފައި އޮންނާނީ. މި ފެށޭ މަހުގެ އެކި ތާރީޚުތަކުގައި، މި ހުޅުވާލި ފުރުޞަތުގެ މުއްދަތު ހަމަވާނެ. ބައެއް ފަރާތްތަކުން މިހާރު ސަބްމިޓްވެސް ކޮށްފި. އަދި ބައެއް ފަރާތްތަކުން މަޢުލޫމާތު ހޯދައި، އެ ސަބްމިޝަން ޕްރޮސެސްގައިވެސް އެބައުޅޭ އިންވެސްޓް ކުރަން ބޭނުންވެގެން.
މީގެ ތެރޭގައި ހަމަ އަޅުގަނޑުމެން ބަލާއިރުގައި، އެކުއިޒިޝަން، ލީޒް އެކުއިޒިޝަނަށްވެސް އާންމުކޮށް އެހެން އަތޮޅުތަކުގައި ރަށަކަށް ދައްކަން އޮންނަވަރު، ކްލޯޒް ބިޑިންގގައި ވިއްޔާ، އާންމުކޮށް މި އޮންނަނީ، ދެލައްކަ ފަންސާސްހާސް ޑޮލަރު ހެކްޓަރަކަށް ދައްކަން. މި އަތޮޅަށް އަޅުގަނޑުމެން މިވަނީ މި އަދަދު ހަތްދިހަ ފަސްހާސް ޑޮލަރަށް ކުޑަކޮށްފައި ހެކްޓަރަކަށް. އެހެންވީމާ، ވަރަށް ބޮޑުތަނުން މި ކުޑަކޮށްލަނީ. މި އަތޮޅުގައި އަޅުގަނޑުމެން މި ފުރުޞަތު ހުޅުވައިލީ ފަޅުތައް، މި ގޮތަށް ޓޫރިޒަމަށް ހުޅުވާލި ފަޅުތައްވެސް، ހުޅުވާލުމުގެ ކުރިން އަދި މިހާރުވެސް އެހެން އަތޮޅުތަކުގައި މިގޮތަށް މި ލުއިދިން ފަސް އަތޮޅު ފިޔަވައި، ދެން ހުރި އަތޮޅުތަކުގައި، ދެ ލައްކަ ޑޮލަރު ހެކްޓަރަކަށް ދައްކަންޖެހޭނެ ލީޒް އެކުއިޒިޝަނަށް. އެކަމަކު އެ ދެބައިކުޅަ އެއްބަޔަށް ކުޑަކޮށްލާފައި، އެއްލައްކަ ޑޮލަރ ޕަރ ހެކްޓަރއަށް މިވަނީ ކުޑަކޮށްފައި.
އެހެންވީމާ، ވަރަށް ބޮޑު ލުއިތަކެއް މިދެނީ. އަދި ލޮކޭޝަން ޕްރީމިއަމްވެސް އެކީގައި ކެންސަލް ކޮށްލައި، އަތޮޅު ޕްރީމިއަމްއަށް އޮންނަ އަދަދުވެސް، ތިރީސް އިންސައްތަ ކުޑަކޮށް، ވަރަށް ބޮޑެތި ލުއިތައް. އަދި ކްރޮސް ސަބްސިޑީ މޮޑެލްގައި ބޭސް ރޭޓުގެ ގޮތުގައި ދައްކަން އޮންނަ އަދަދުވެސް ހަމަ ދެބައިކުޅަ އެއްބަޔަށް ކުޑަކޮށްލައި، ރެންޓު ދެއްކުންވެސް ލަސްކޮށްލެވޭ ގޮތަށް. ޑިއުޓީ އެގްޒެމްޕްޝަން މިހާރުދޭވަރު 15 އިންސައްތަ އިތުރުކޮށްދީ، އަދި ޑިއުޓީ އެގްޒެމްޕްޝަން ލިބޭ ބާވަތްތައްވެސް، ޕްރޮޖެކްޓަށް ގެންނަ ބާވަތްތައްވެސް އެތައް ބާވަތްތަކެއް އިތުރުކޮށްދީ، މިކަހަލަ އެތައް ލުޔެއް. އެތައް ލުޔެއް.
މީގެ ބޭނުމަކީ، މި އަތޮޅަށް ޓޫރިޒަމް ގެނައުން. އިތުރުކުރުން. މިދިން ލުއިތަކުގެ ބޭނުންކޮށްގެން، މި އިންސެންޓިވްތަކުގެ ބޭނުންކޮށްގެން، މި އަތޮޅުގައި ޓޫރިޒަމް އިރާދަކުރެއްވިއްޔާ ފައްކާވާނެ. އަޅުގަނޑުމެން ވާނީ 9 ރަށެއް، ފަޅުތައް ހިމެނޭހެން، އޭގެތެރެއިން ބައެއް ރަށްރަށަކީ ކްލަސްޗަރޒްގެ ގޮތުގައި ހުންނާނެ. އެހެންވީމާ 6 ޕްރޮޖެކްޓެއްގެ ގޮތުގައި، ފުރުޞަތު ހުޅުވާލާފައި. މި ދެންނެވިހެން ބައެއް ފަރާތްތަކުން އެބަ ޝައުޤުވެރިކަން ފާޅުކުރޭ. މިހާރު ބައެއް ފަރާތްތަކުން ސަބްމިޓްވެސް ކޮށްފި. އެހެންވީމާ، މި ޕްރޮސެސް، ކުރިއަށް މި އޮތް މަސްތެރޭގައި މުއްދަތު ހަމަވެގެން، އިވެއުލޭޝަން ނިމިގެން، އިރާދަކުރެއްވިއްޔާ އަޅުގަނޑުމެންނަށް ހަމަ ވަރަށް ޔަޤީންކަން އެބައޮތް، ޝައުޤުވެރިކަން ހުރި ފަރާތްތައް ހޮވި، މި އަތޮޅުގައި ޓޫރިޒަމް ވަރަށް ރަނގަޅަށް ފުޅާވެ، ފައްކާވެގެންދާނެ ކަމަށް.
އެހެންވީމާ، އެ އުފާވެރި ޚަބަރު އަދި އަޅުގަނޑުމެން މިކަން ގެންދާގޮތުގެ މަޢުލޫމާތު، އަޅުގަނޑު ހިތުން ހުރިހާ ރައްޔިތުންނަށް، މި އަތޮޅުގެ ހުރިހާ ރައްޔިތުންނަށް މުހިންމުވާނެ. މި ރަށަށްވެސް އަދި މި އަތޮޅުގެ ހުރިހާ ރަށަކަށްވެސް. އެހެންވީމާ، އަޅުގަނޑު އެކަން ފާހަގަކޮށްލީ. އަޅުގަނޑު ވަޢުދުވީގޮތަށް، މިކަމުގައި މި އަތޮޅުގައި ޓޫރިޒަމް ފައްކާކުރުމަށް މި ކުރާ މަސައްކަތް އަޅުގަނޑުމެން ވަރަށް އިސްކަންދީގެން އިރާދަކުރެއްވިއްޔާ ކުރިއަށް ގެންދާނަން. މީގެ ނަތީޖާއަކަށްވާނީ، ތިޔަބޭފުޅުންގެ ދަރިންނާއި، ތިޔަބޭފުޅުންގެ ތެރެއިން އެތައްބަޔަކު އެކި އަތޮޅުތަކުގެ އެކި ރަށްރަށުގައި، ރިޒޯޓުތަކުގައި މަސައްކަތްކުރަން ދުރުގައި އުޅުމުގެ ބަދަލުގައި، އަތޮޅުގެ ރިޒޯޓުތަކުގައި މަސައްކަތްކުރުމުގެ ފުރުޞަތު ލިބި، އޭގެ ހުރިހާ ފަސޭހަކަމެއް ލިބި، އަދި މި އަތޮޅަށް އިޤްތިޞާދީ ގޮތުން ކުރިއެރުން ލިބި، ތިޔަބޭފުޅުންނަށް އޭގެ ފައިދާ ލިބިގެންދިޔުން. އެހެންވީމާ، އަޅުގަނޑު ގަބޫލުކުރަނީ އިރާދަކުރެއްވިއްޔާ ކުރިއަށް އޮތީ އުފާވެރި އުންމީދީ ދުވަސްތަކެއް ކަމަށް. އެކަމުގައި ހަމަ އުފާވެރި ޚަބަރު ތިޔަބޭފުޅުންނާ ޙިއްޞާކުރުމުގެ އުފާ އަޅުގަނޑު ލިބިގަންނަން.
އެހެންވީމާ، ދެންމެ މި ދެންނެވި ގޮތަށް، މި ދެންނެވި ކޯޒްވޭ އެޅުމުގެ ކަންތަކުގައި މިވަނީ ފުރުޞަތު ހުޅުވާލާފައި. އެހެންވީމާ، ހަމަ މި ދެންނެވި ހުރިހާ ޑިސްކައުންޓެއް، އެ ޕްރޮޖެކްޓަށް އިންވެސްޓްކުރާ ފަރާތްތަކަށްވެސް ލިބޭނެ.
އާދެ، މިސްކިތް އެޅުމަށް އަޅުގަނޑުމެން ވާނީ މިހާރު ހަވާލުކޮށްފައި. ދެން މި މިސްކިތަކީ 500 މީހުންގެ ޖާގައިގެ ޒަމާނީ މިސްކިތެއް. މިހާރު އަޅުގަނޑުމެން މިސްކިތް އަޅަނީ ވަރަށް ޒަމާނީކޮށް. އޭސީ ކުރެވި، ސޯލަރ ޕަވަރއިން ރަންކުރާގޮތަށް. އަދި ކްލާސްރޫމްތައް، ލައިބްރަރީ ހުންނާނެ. ވަރަށް ޒަމާނީކޮށް ހަދާ މިސްކިތެއް. މިހާރު ހުރި މިސްކިތް ތަޅާލައި ނިމި، އެ ތަނުގައި އެ މިސްކިތް އެޅުމަށް މިހާރު އެއޮތީ ހަވާލުކުރެވިފައި. އެހެންވީމާ، އެކަންވެސް އެގޮތަށް އެބަ ކުރިއަށްދޭ.
މި ރަށުގައި ޤުރްއާނާބެހޭ މަރުކަޒުގެ ގޮތްޕެއް ހުޅުވުމަށްޓަކައި ވާންޖެހޭ ތައްޔާރީތައްވެސް ގާތްގަނޑަކަށް ނިމިއްޖެ. އެހެންވީމާ، އިރާދަކުރެއްވިއްޔާ އެއީވެސް ތިޔަބޭފުޅުންނަށް ވަރަށް ބޮޑު އުފާވެރިކަމެއް ލިބިގެންދާނެ ކަމެއްކަން އަޅުގަނޑު ޔަޤީންކުރަން. އެހެންވީމާ، އެކަމުގެ އުފާވެރި ޚަބަރު ތިޔަބޭފުޅުންނަށް ދެން.
ހަމައެފަދައިން، ދެންމެ އަޅުގަނޑުމެން މި ފެށި ޕާސްޕޯޓުގެ ޚިދުމަތަކީ، ހަމަ އެފަދަ ފަސޭހަކަމެއް ލިބިގެންދާނެ ކަމެއް. ކޮންމެ އަތޮޅެއްގައި މަދުވެގެން އެއްރަށުގައި އަޅުގަނޑުމެން ޕާސްޕޯޓުގެ ޚިދުމަތްދޭން މި ފެށީ. ބައެއް އަތޮޅުތަކުގައި ދޭއް، ތިނެއް، އަޅުގަނޑުމެން މި ޚިދުމަތް އެބަ ޤާއިމުކުރަން. ދެ ރަށުގައި، ނޫނީވިއްޔާ ތިން ރަށުގައި. މަދުވެގެން އެއް ރަށުގައި ޕާސްޕޯޓުގެ ޚިދުމަތް ޤާއިމުކުރަން. ހަމަ މިގޮތަށް، އައި.ޑީ. ކާޑު ދޫކުރުމުގެ ޚިދުމަތްވެސް. މިހާރު ގާތްގަނޑަކަށް މުޅި ރާއްޖެ ކަވަރކޮށް މި ނިމެނީ. މި އަންނަ މަހުގެ ތެރޭގައި އިރާދަކުރެއްވިއްޔާ އެކީގައި ނިމޭނެ. އަޅުގަނޑު ކުރިން އިޢުލާނުކުރީ، ނޫނީވިއްޔާ ޓާގެޓެއްގެ ގޮތުގައި ރިޔާސީ ބަޔާނުގައި އިޢުލާނުކުރީ، ޑިސެންބަރުގެ ނިޔަލަށް ކަމަށް. އެހެންނަމަވެސް، އޭގެ ދެމަހެއްހާ ދުވަހުގެ ކުރިން މިކަން އެބަ ހާސިލުވޭ. މިކަމަކީ އިރާދަކުރެއްވިއްޔާ ރައްޔިތުންނަށް ވަރަށް ބޮޑު ކުރިއެރުމެއް ލިބޭނެ ކަމެއް. އަޅުގަނޑުމެން ބޭނުންވަނީ، ރައްޔިތުން ތިބި ތަނަށް ސަރުކާރުން އައިސް ޚިދުމަތްތައް ޤާއިމުކުރަން. ބޮޑު އަގުގައި އަބަދު މާލެއަށް، ނޫނީވިއްޔާ އެހެން ދުރު ހިސާބަކަށް ގޮސްގެން ޚިދުމަތްހޯދަން، އެ އަޅުވެތިކަން ނިމުމަކަށް ގެންނަން. ރައްޔިތުންނަށް ފަސޭހަކަން، ރައްޔިތުންނާ ހިސާބަށް ގެނެސްދޭން. އޭ.ޓީ.އެމް.ވެސް ޤާއިމުކުރަނީ އެހެންވެގެން. މިފަދަ ޚިދުމަތްތައްވެސް ޤާއިމުކުރަނީ އެހެންވެގެން. މިއީ ޙަޤީޤަތުގައި އަޅުގަނޑު ހިތުން ރައްޔިތުން ބޭނުންވާ ގޮތަކީ.
އާދެ، ދެން ހަމަ މިފަދަ އެހެން މަޝްރޫޢުތަކަށް ބަލާއިރުގައި، ތަޢުލީމީ ދާއިރާއިން ހަމަ ވަރަށް މުހިންމު ވާހަކައެއް ދަންނަވަންޖެހޭ. ޙަޤީޤަތުގައި ވަރަށް ބޮޑަށް އިހުމާލުވެފައޭ ދަންނަވަންޖެހޭނީ، މި ރަށުގެ ސްކޫލް ކަންތަކުގައި. އަޅުގަނޑަށް މަޢުލޫމާތު ލިބުނީ، އަށެއްކަ އަހަރު ވެއްޖެކަމަށް މަލްޓި ޕާރޕަސް ހޯލެއް އަޅަން ފަށައިގެން ނުނިމިގެން އުޅޭތާ. އާދެ، މި ދެންނެވި ހޯލާއި، މި ތިން ބުރީގެ ޢިމާރާތާއި، މި މަޝްރޫޢުތައް އިރާދަކުރެއްވިއްޔާ މި އަހަރު ނިމި، ދެން ފެށޭ، ދިރާސީ އާ އަހަރުގައި، ބޭނުންކުރެވޭވަރަށް ނިންމައިދޭނެކަމުގެ ޔަޤީންކަން ތިޔަބޭފުޅުންނަށް ދެން. އެކަން ކުރުމަށްޓަކައި ކުރަންޖެހުނު ކޮންމެ ކަމެއް، ޤާނޫނީ ހަމަތަކުގެ މަތިން، އިރާދަކުރެއްވިއްޔާ އަޅުގަނޑުމެން ކުރާނަން. އަދި އޭގެ އިތުރަށްވެސް، ތަޢުލީމީ ދާއިރާއިން މި ރަށުގައި އިސްލާމިކް ޔުނިވަރސިޓީގެ ލާރނިންގ ސެންޓަރެއް، މި އަހަރުގެ ތެރޭގައި ޤާއިމުކުރުމުގެ މަސައްކަތް ފަށާނަން.
އާދެ، ކުޅިވަރުގެ ދާއިރާއިން ބަލާއިރުގައި، ފުޓްބޯޅަ ދަނޑެއް ނެތިވެސް އަށެއްކަ އަހަރު ވެއްޖެކަމަށްވަނީ. އަޅުގަނޑުމެން މިހާރުވާނެ އިޢުލާނުކޮށްފައި، މި ރަށުގައި ފުޓްބޯޅަ ދަނޑެއް އަޅަން. އިރާދަކުރެއްވިއްޔާ ރޮސްޓްރަމާއި، ހުރިހާ އެއްޗެހި ޤާއިމުކުރެވިފައިވާ، ފީފާ ސްޓޭންޑަޑްގެ ފުޓްބޯޅަ ދަނޑެއް އަޅުގަނޑުމެން އަޅައިދޭނަން.
ހަމަ އެގޮތަށް، މި އަންނަ އަހަރުގެ ބަޖެޓުގައި ހިމަނައިގެން، މި އަންނަ އަހަރު މި ރަށުގައި ސްޕޯޓްސް ކޮމްޕްލެކްސްއެއް ޤާއިމުކުރުމުގެ މަސައްކަތް ފަށާނަން. އެއީ، ބާރަސަތޭކަ މީހުންގެ ސީޓިންގ ކެޕޭސިޓީ ހުންނަ، އިންޑޯ ހުރިހާ ކުޅިވަރެއް ކުޅެވޭ، ސްޓޭޓް އޮފް ދި އާރޓް، ޒަމާނީ ސްޕޯޓްސް ކޮމްޕްލެކްސްއެއް. މި ސްޕޯޓްސް ކޮމްޕްލެކްސްގެ ޢަމަލީ މަސައްކަތްވެސް މި އަންނަ އަހަރުގެ ބަޖެޓުގައި ހިމަނައިގެން، އަހަރުގެ ކުރީކޮޅު ފެށިގެންދާނެ.
ޞިއްޙީ ދާއިރާއިން، އަތޮޅު ހޮސްޕިޓަލް ހުއްޓަސް ފެންވަރު އަދި އެހާ ރަނގަޅެއްނޫން. ޢިމާރާތުގެ ފެންވަރުވެސް، ޚިދުމަތްވެސް އިތުރުކުރަންޖެހޭ. މީގައި ދެ ކަމެއް އަޅުގަނޑު ދަންނަވާލަން ބޭނުންވަނީ. އެއްކަމަކީ، މުޅިން އަލަށް އަޅުގަނޑުމެން އަޅަން ނިންމާފައި އޮތް ހޮސްޕިޓަލް. އަޅުގަނޑު ވަޢުދުވީ ހޮސްޕިޓަލް. މިކަންތަކުގައި ބޭރުގެ ފަންޑެއް މިކަމަށް އަޅުގަނޑުމެންނަށް ހަމަޖެހިފައިވަނީ. ބޭރުގެ ހަމަ އަޅުގަނޑުމެންނާ ވަރަށް ގާތް، އަޅުގަނޑުމެންގެ ހަމަ އެންމެ އެކުވެރި މެދުއިރުމަތީގެ އެއް ޤައުމުން އަޅުގަނޑުމެންނަށް މިކަމުގެ ފަންޑު ހަމަޖެހިފައި އޮތް މަޝްރޫޢެއް މިއީ. 50 އެނދުގެ ހޮސްޕިޓަލެއް. އެހެންނަމަވެސް، މި ޕްރޮސީޖަރގައި ހުންނަ ކަންކަން ނިންމަންޖެހެނީ. އެކަން އެބަ ހިނގާ ހަމަ ރަނގަޅަށް، އެ އޮންނަ ޕްރޮސީޖަރއިން. އެ ފަންޑުގެ ޕްރޮސީޖަރ ތެރެއިން ގޮސްގެން އިމާރާތް އެޅޭނީ. އެހެންވީމާ، އެއްވެސް މައްސަލައެއް ނެތް ކަމަށް ދަންނަވާލަން، މި ވާހަކަ މި ދެންނެވީ. ފަންޑު ހަމަޖެހިފައި. އެކަމުގައި ސްޓެޕް ބައި ސްޓެޕް ކުރިއަށްދަނީ. އެހެންވީމާ، އިރާދަކުރެއްވިއްޔާ އެ މަރުޙަލާތައް ނިމި، ޢަމަލީ މަސައްކަތް ފެށޭނެ. އަޅުގަނޑަށް މިތާ ސީދާ ހަމަ ޑޭޓެއް ދަންނަވައެއްނުލެވޭނެ. އެކަމުގައި އޮންނަ ޕްރޮސީޖަރތައް ނިމިގެން ފެށޭނީ. އެހެންނަމަވެސް، އެ ޔަޤީންކަން މިދެނީ އިރާދަކުރެއްވިއްޔާ، 50 އެނދުގެ ހޮސްޕިޓަލެއް މިތާ އެޅުމަށް ހަމަޖެހިފައި އޮތްކަން. އެ ޔަޤީންކަން ތިޔަބޭފުޅުންނަށް ދެން.
އެކަން ވަންދެންވެސް، މިހާރު ހުރި ހޮސްޕިޓަލްގައިވެސް ޚިދުމަތްދޭން ފެށުމަށްޓަކައި، ސައިކޭޓްރިސްޓަކާއި، ސްޕީޗް ތެރަޕިސްޓެއް ހޯދުމަށް ފިނޭންސް މިނިސްޓްރީން ދޭންޖެހޭ ހުއްދަ އިރާދަކުރެއްވިއްޔާ ވަގުތުން ހަމަޖެހިގެންދާނެ. މި އަންނަ ހަފުތާ ތެރޭގައި، އެ ހުއްދަ ލިބި، ތިޔަބޭފުޅުންނަށް އެ ދެ ދާއިރާއިން މީހަކު ހޯދުމަށް، އަޅުގަނޑުމެން ހޮސްޕިޓަލަށް ފުރުޞަތު ދޭނަން. ހޮސްޕިޓަލުން އެ ދާއިރާތަކުން، އަދި ފިޒިއޮތެރަޕީ ދިނުމަށްޓަކައިވެސް ބޭނުންވާ މީހުން ހޯދުމަށް، އިރާދަކުރެއްވިއްޔާ އަޅުގަނޑުމެން އެ ހުއްދަ ދޭނަން. އެހެންވީމާ، ހުއްދަ ލިބުނީމަ، ދެން ކުރަންޖެހޭ މަސައްކަތް ހޮސްޕިޓަލުން ކުރިއަށް ގެންދަންވީ. އެ ދާއިރާތަކުން މިތަނުގައި ޚިދުމަތްދޭން މީހުން ގެނައުމަށް. އާދެ އެހެންވީމާ، ހޮސްޕިޓަލް އެޅެންދެންވެސް، ދެންވެސް ހުރި ކަންކަން، އަޅުގަނޑުމެން ވީވަރަކުން ޖާގައޮތް މިންވަރަކުން، އިތުރުކުރުމަށް ކުރިއަށް ގެންދާނަން.
އާދެ، އަޅުގަނޑު މިރޭ ޞިއްޙީ ދާއިރާގެ ހުރިހާ ތަފުޞީލެއް، މުޅި ރާއްޖެއާ ބެހޭގޮތުން، ކަނޑައަޅާފައި އޮތް ކަންކަން އަޅުގަނޑު ނުއެއް ދަންނަވަން. މި ރަށުގެ ހޮސްޕިޓަލް ހިމެނޭހެން، ވަރަށް މުހިންމު ބައެއް ޓާގެޓްތައް އަޅުގަނޑުމެން ކަނޑައަޅާފައި އެބަހުރި. އަޅުގަނޑު އެ ތަފްޞީލުތައް އަދި ފަހުން ލޮބުވެތި ދިވެހި ރައްޔިތުންނާ ޙިއްޞާކުރާނަން. އަޅުގަނޑުމެންގެ ވަރަށް މުހިންމު ސިޔާސަތެއް، ޞިއްޙީ ދާއިރާ، ވަރަށް ވަރަށް ވަރަށް ބޮޑުތަނުން ކުރިއެރުވުން. ތިންފަހަރު "ވަރަށް" އަޅުގަނޑަށް ދެންނެވިއްޖެ. އެއީ، ހަމަ ގަސްދުގައި.
ވަރަށް ބޮޑުތަނުން، މިހާރަށްވުރެ އެތައް ގުނައެއް މައްޗަށް، އަޅުގަނޑުމެން ބޭނުން، ޞިއްޙީ ދާއިރާ ކުރިއަށް ގެންދަން. ދެގޮތަކުން، ބަލިޖެހުމުގެ ކުރިން ކުރަންޖެހޭ ކަންކަން ކުރުމާއި، ބަލިޖެހުމަށްފަހު، ދެން ދޭންޖެހޭ ފަރުވާ ދިނުމާ. ޕްރިވެންޓިވް ހެލްތް ކެއަރއާއި، ކިއުރޭޓިވް ހެލްތް ކެއަރއާ. މި ދެ ދާއިރާއަށް އަޅުގަނޑުމެން އެއްވަރަކަށް އިންވެސްޓް މި ކުރަނީ. އެއީ، ބަލިތަކުން ރައްކާތެރިކުރުމަށް. ބަލިޖެހުމުގެ ކުރިން، އެ ދޭންޖެހޭ ސަމާލުކަންވެސް، ސަރުކާރު ލެވެލްގައި ދީގެން ނޫނީވިއްޔާ، ޙަޤީޤަތުގައި ޞިއްޙީ ދާއިރާއިން ރައްޔިތުންނަކަށް ޚިދުމަތް ނުއެއްދެވޭ، ޙަޤީޤީ މާނައިގައެއް. މިއަދާ ހަމަޔަށް އައިއިރުގައި، ސަރުކާރުތަކަށް ބޮޑަށް ހަމަ ފޯކަސް ކުރެވިފައި އޮތީ، ބަލިވީމަ ކޮންމެވެސް ކަމެއް ކޮށްދޭން. ބަލިވުމުން ދުރުކުރުންވެސް އެއީ، މުހިންމު ކަމެއް. ޚާއްޞަކޮށް، ބަލިވުމުން ދުރުކުރުވުމަށް ކުރެވޭ ކަންކަމުން އެވޮއިޑް ކުރެވިދާނެ ކިތަންމެ ބަލިތަކެއް އެބަހުރި. އެހެންވީމާ، އަޅުގަނޑުމެން އެދެ ދާއިރާއިން މަސައްކަތް މި ކުރަނީ. މިސާލެއްގޮތުގައި، ދުންފަތުގެ އިސްތިޢުމާލު ކުރުމުން ރައްޔިތުން ދުރުކުރުވުމަށް ކުރެވޭ ކަންކަމަކީ، އެއިން އެއް ކަންތައް. ވޭޕް މަނާކުރުން، އޭގެތެރެއިން ހިމެނޭ އެއް ކަންތައް. ދެން، މިފަދަ އެތައް ކަމެއް.
އަޅުގަނޑުމެންގެ މި ކުޑަކުޑަ މުޖުތަމަޢަކީ، ފަސް ލައްކައެއްހާ މީހުންވެސް ނެތް މުޖުތަމަޢެއް. މި މުޖުތަމަޢަކީ، ބަލިތަކުން ދުރުވެފައިވާ، މި ކިޔާ ލައިފް ސްޓައިލް ޑިޒީޒްތަކުން ދުރުވެފައި އޮތް ޤައުމަކަށް ހަދަން، އަޅުގަނޑުމެން އަމިއްލައަށް ކުރެވިދާނެ ކަމެއް މިއީ. މާބޮޑު ކަމެއްނޫން. އަޅުގަނޑުމެން ދުންފަތުގެ އިސްތިޢުމާލު ކުރުމާއި، ދެން މިހެން ހުންނަ ނޭދެވޭ ޢަމަލުތަކުން ދުރުވާން ޢަޒުމު ކަނޑައަޅައިގެން ދުރުވީމަ، އެތައް ބައްޔަކުން އެބަ ސަލާމަތްވޭ. އެހެންވީމާ، އެކަމަށް ސަރުކާރުން އިންވެސްޓް ކުރާނެ. މި ސަރުކާރުން ކުރާނެ. އެއީ، އަޅުގަނޑުގެ ވަޢުދެއް. އަޅުގަނޑުގެ ސިޔާސަތެއް. މެނިފެސްޓޯގައި ކަނޑައަޅާފައިވާ، ޢަމަލުކުރަމުންދާ، ތަންފީޒު ކުރަމުންދާ ސިޔާސަތެއް. އެއީ، ރައްޔިތުންނަށްޓަކައި، ރައްޔިތުންގެ ދުޅަހެޔޮކަން ޔަޤީންކޮށްދިނުމަށްޓަކައި، އަޅުގަނޑުމެން ކަނޑައެޅި ސިޔާސަތެއް. އަޅުގަނޑަށް ހަމަ ޔަޤީން، ރައްޔިތުން ވަރަށް އުފަލާއެކީ ބަލައިގަންނަ ކަމެއް މިއީ. މިއިން ވާނީ ފައިދާ. ކުރިއަށް އޮތް ޖީލުތައް މިއިން އެބަ ސަލާމަތްކޮށްދޭ.
މި އަހަރު، ނޮވެންބަރު 1 ން ފެށިގެން ޖެނެރޭޝަނަލް ބޭން މި އިފެކްޓިވް ވަނީ، ޤާނޫނުގައި އޮތްގޮތުން. އެއީ، 2007 ޖަނަވަރީ 1 ވަނަ ދުވަހުން ފެށިގެން އުފަންވީ ހުރިހާ ކުދިންނާއި، ދެން އުފަންވާން ތިބި ހުރިހާ ކުދިން، ދުންފަތުގެ އިސްތިޢުމާލު ކުރުމުން މި މަނާވެގެންދަނީ. އެހެންވީމާ، ޖީލެއް އެބަ ސަލާމަތްކުރެވޭ. އަންނަން އޮތް ޖީލުތައްވެސް އިރާދަކުރެއްވިއްޔާ، ސަލާމަތް މި ކުރެވެނީ، ދުންފަތުގެ އިސްތިޢުމާލު ކުރުމުން. ދެން، އެއަށްވުރެ ކުރިން އުފަންވި މީހުން، އަޅުގަނޑުމެން ދެން އަމިއްލައަށް އެކަން ހުއްޓާލަމާ ހިނގާ. ދެން އެއީ، އަޅުގަނޑަށް ކުރެވޭނެ ކަމަކީ. މިހާރު އަގު ތަންކޮޅެއް ބޮޑުކޮށްފައި މިހިރީ. ދެން، އެކަމަކީވެސް، އެކަމުން އަޅުގަނޑުމެން ދުރުވާން ފިޔަވަޅެއް އެޅުމުގެ ގޮތުން ކުރި ކަމެއް. އަޅުގަނޑުމެން، އަޅުގަނޑުމެންނަށްޓަކައި ކުރި ކަމެއް އެއީ. ދެން، މި ސިނގިރޭޓު އެތެރެކުރާ ފަރާތްތަކުން އެތެރެކުރީމަ، ޤާނޫނު އޮންނަގޮތުން ނަގަންޖެހޭ ފައިސާއެއް ނަގާނެ. ނަގާ ފައިސާ އަޅުގަނޑުމެން މި ޚަރަދުކުރަނީ، ކުރިން އަޅުގަނޑު ދެންނެވި ޕްރިވެންޓިވް ހެލްތް ކެއަރއަށް، ޕްރޮޖެކްޓްސްތައް ހިންގަން. އެހެންވީމާ، މިގޮތަށް ޕްލޭން ކުރެވިފައި މިކަންކަން މިހިރީ. އަޅުގަނޑު ވަރަށް އުފާކުރަން. ރައްޔިތުން މި ސިޔާސަތުތަކަށް، މިކަންކަމަށް ދޭ އެއްބާރުލުމަށް. މިއީ، ވަރަށް ފަސޭހައިން ވިސްނާލީމާ، ވަރަށް ދެކޮޅުޖެހޭ، ވަރަށް ފީޒިބަލް ސިޔާސަތުތަކެއް.
އާދެ އެހެންވީމާ، މިގޮތަށް މިހިރަ ކަންތައްތައް އަޅުގަނޑުމެން ކުރިއަށް ގެންދަން މިއޮތީ ނިންމާފައި. އާދެ، އޭގެއިތުރަށްވެސް، މި ރަށުގައި ތަރައްޤީއަށްޓަކައި، މުހިންމު ކަންކަން އެބަހުރި. ކުދި ކަންކަން ގޮތުގައި ފާހަގަވިޔަސް، ބޮޑެތި ކަންކަން. މިސާލަކަށް، ހުރިހާ ރަށެއްގައި ޤާއިމުކުރަން އަޅުގަނޑު ރިޔާސީ ބަޔާނުގައި ބަޔާންކުރި، ކުޑަކުދިންގެ ޕާކު. އަޅުގަނޑު ބަޔާނުގައި އިޢުލާނުކޮށްފައި އޮންނާނީ، މި އަހަރާއި، މި އަންނަ އަހަރާ ދެ އަހަރު ތެރެއަށް ބަހާލައިގެން، ހުރިހާ ރަށެއްގައި ޤާއިމުކުރާގޮތަށް. ކުޑަކުދިންގެ ޕާކާއި، އައުޓްޑޯ ޖިމާއި، ފިޓްނަސް އެންޑް ރިކްރިއޭޝަން ސެންޓަރާ، މިކަހަލަ ލިސްޓެއް އަޅުގަނޑު އިޢުލާނުކުރިން. ހުރިހާ ރަށެއްގައި ފުލުހުންގެ މަރުކަޒުތަކާ، މިހެންގޮސް ލިސްޓެއް. ކުޑަކުދިންގެ ޕާކަކީ ކުޑަކަމަކަށް ވެދާނެ ބައެއް ފަރާތްތަކަށް. އެކަމަކު، ހަމަ ޔަޤީނުންވެސް، ކުޑަކުދިންގެ ޕާކެއް ނެތް ރަށްރަށުގައި، މިއީ ވަރަށް މުހިންމު ކަމެއް. މި ރަށުގައި އެކަށިގެންވާވަރުގެ ޕާކެއް ނެތްކަމަށް އަޅުގަނޑަށް ޤަބޫލުކުރެވެނީ.
އެހެންވީމާ، މި ރަށުގެ އާބާދީއަށް ބޭނުންވާވަރުގެ ފުރިހަމަ، ބޮޑު، ކުޑަކުދިންގެ ޕާކެއް މި ރަށުގައި އަޅުގަނޑުމެން ޤާއިމުކުރާނަން. އެއީ، ޢާއިލާތަކުން ބޭނުންވާގޮތް. ޢާއިލާތަކުން ކުދިން ގޮވައިގެން ނުކުމެއުޅެލާނެ ޕާކެއް ބޭނުންވޭ. އެހެންވީމާ، އާބާދީއާއި، އަދި މި ދެންނެވިހެން، ދެމެހެއްޓެނިވި ތަރައްޤީގެ ސިޔާސަތުގެ ތެރެއިން، މި ކަނޑައެޅޭ ތަރުތީބުން، ރަށްރަށުގައި ޕާކުތަކާއި، މިހެން ހުންނަ ހުރިހާ ތަނެއްގެ ސައިޒާއި، ޑިޒައިނާ، ހުރިހާ އެއްޗެއްވެސް ހުންނާނީ ތަރުތީބުކުރެވިފައި. އެހެންވީމާ، އެގޮތަށް އިރާދަކުރެއްވިއްޔާ އެކަންވެސް އޮތީ ކުރިއަށްދާ ގޮތަށް.
ހަމަ އެގޮތަށް، ކުނި މެނޭޖްކުރުމުގެ މަރުކަޒު ޤާއިމުކުރުމާ، މި ހުރިހާ ކަމެއްވެސް ކުރިއަށް އެބައޮތް. އަޅުގަނޑަށް ހަމަ ހުރިހާ ކަމެއް ނުދަންނަވައިލެވުނަސް، ވަރަށް ގިނަ ކަންކަން އަޅުގަނޑު މި ފާހަގަކޮށްލައިދިނީ. އިރާދަކުރެއްވިއްޔާ، އެކަންކަން އަޅުގަނޑު ދެންނެވި ގޮތަށް، ކުރިއަށްދާނެ ކަމުގެ ފުރިހަމަ ޔަޤީންކަން ތިޔަބޭފުޅުންނަށް ދެން.
އާދެ، އަޅުގަނޑުމެން މި ހުރިހާ ކަމެއް ކުރާއިރުގައި، އަޅުގަނޑު އަބަދުވެސް ދައްކާ ވާހަކަ ހަމަ ދަންނަވާލާފައި، ވަކިވެލަން ގަސްދުކުރަނީ. އެއީ، އަތުން ހިފޭ ތަރައްޤީ އަޅުގަނޑުމެން ހޯދާއިރުގައި، އަތުން ނުހިފޭ ތަރައްޤީއަށް ހަމަ އެވަރުގެ ސަމާލުކަމެއް ދޭންޖެހޭނެއޭ. އަޅުގަނޑުމެންގެ ވިސްނުމާއި، އަޅުގަނޑުމެންގެ އުޅުމާއި، ގުޅުމާއި، އަޚްލާޤުގެ ތަރައްޤީ.
މިއަދަކީ، ރާއްޖެ އިސްލާމްވިތާ 899 އަހަރު ފުރުނު ދުވަސް. ލައްކަދުވަސް ވެއްޖެ. މި ހުރިހާ ދުވަހު އަޅުގަނޑުމެންނަށް މިހާ އެކުވެރިކޮށް، އެއްބައެއް ގޮތުގައި މި އުޅެވުނީ، މި މާތްވެގެންވާ އިސްލާމްދީނުގެ ސަބަބުން. އެހެންވީމާ، އަޅުގަނޑުމެންގެ ޢަޒުމަކަށްވާން އެބަޖެހޭ، އަންނަން އޮތް ޖީލުތަކަށް، އަޅުގަނޑުމެންގެ ކާބަފައިން، ޚާއްޞަކޮށް، އަޅުގަނޑުމެންގެ އަބުޠާލުން އެކުރި ޖިހާދުތަކުން، ބޮޑުތަކުރުފާނާއި އެތައް އަބުޠާލުންނެއް ކުރެއްވި ޖިހާދުތަކުން، އަޅުގަނޑުމެންނާ ހަމައަށް ގެނެސްދެއްވި އިސްލާމްދީން، ރައްކާތެރިކަމާއެކީގައި ފޯރުކޮށްދޭން. ރައްކާތެރިކަމާއެކީގައި ކިހިނެއްތޯ ފޯރުކޮށްދޭނީ، އަޅުގަނޑުމެން ސިކުނޑިތައް ހެޔޮގޮތުގައި ތަރައްޤީނުކޮށް.
އެހެންވީމާ، ދެންމެ މިކީ ލިސްޓުގައިވާ ހުރިހާ ތަނެއް މި ރަށުގައި ހެދިދާނެ. އެކަމަކު، އަޅުގަނޑުމެންގެ އަމިއްލަ ވިސްނުން ހެޔޮގޮތުގައި ބައްޓަން ނުކުރެވެންޏާ، އޭގެ ބޭނުމެއް ނެތް. ދުނިޔޭގައި ޖެހޭ ވަޔާއި، އޮޔާއި، މި ހުރިހާ ކަމެއްގެ ތެރޭގައި އަޅުގަނޑުމެންގެ ކުދިން ޣަރަޤުވާން ދޫކޮށްލައިފިއްޔާ ބޭނުމެއްނެތް، މިތާ ކިތަންމެވަރަކަށް ބިން ހިއްކައި، ހޮސްޕިޓަލް އަޅައި، އެތައް ކަމެއް ކުރިޔަސް. އެއީ، ދެން ދާންއޮތީ، ދާއިމަށް ދާ ބިމަށް. އެތަނަށް ދާންއޮތީ، މިތަނުގައި ކުރާ އިންވެސްޓްމަންޓެއް ހިފައިގެން. އެއީކީ، ފައިސާއެއް ނޫން. އެއީ، ހިތުގައި ކުރާ އިންވެސްޓްމަންޓެއް. އެހެންވީމާ، އިސްލާމްދީން އަޅުގަނޑުމެންގެ ސިކުނޑިއާއި ހިތުގައި ވަރުގަދަކޮށް ބިންވަޅުނަގައި، އަޅުގަނޑުމެންގެ ޤައުމު، އަޅުގަނޑުމެންގެ އެންމެ ފަޚުރުވެރި އެއްޗަކީ، އަޅުގަނޑުމެންގެ އިސްލާމްދީން ކަމުގައި ޤަބޫލުކޮށް، އަޅުގަނޑުމެން ދީނަށް ނަޞްރުދީ، އަންނަން އޮތް ޖީލުތަކަށް، އަޅުގަނޑުމެން ހެޔޮގޮތުގައި އެކަން ފޯރުކޮށްދިނުމަށް ޢަޒުމު ކަނޑައަޅަންޖެހޭ.
އާދެ، އަޅުގަނޑުމެންގެ ވަރަށް މުހިންމު ސިޔާސަތެއް، އިސްލާމްދީނަށް ނަޞްރުދިނުމަކީ. އިސްލާމްދީނަށް ޚިދުމަތް ކުރުމުގައި، އަޅުގަނޑުމެން މިދިޔަ ދެ އަހަރެއްހާ ދުވަހު އެތައް ކަމެއް އިރާދަކުރެއްވީތީ، ފަޚުރުވެރިކަމާއެކީގައި ކޮށްފިން. އެއީ، ރައްޔިތުންގެ ފުރިހަމަ އެއްބާރުލުމާ އެކީގައި. އަޅުގަނޑުމެން މެނިފެސްޓޯގައި ކަނޑައަޅައި، އިޢުލާނުކުރި ސިޔާސަތުތަކުގެ ތެރެއިން، އެތައް ކަމެއް ކުރެވިއްޖެ އިރާދަކުރެއްވީތީ. އަދި ކުރިއަށް އެތައް ކަމެއް ކުރަން އޮތީ.
ޙާފިޡުން ތަމްރީނުކުރުން އިތުރުކުރުމަށް ބަލާއިރުގައިވެސް، އިރާދަކުރެއްވީތީ، އަޅުގަނޑުމެން ވަރަށް ފަޚުރުވެރިވޭ މިކަމުގައިވެސް. އެއީ، މިދިޔަ އަހަރު އެކަނި، 24 ޙާފިޡުން އަޅުގަނޑުމެންނަށް ތަމްރީނު ކުރެވިއްޖެ. އުންމީދުކުރެވެނީ، އިތުރު 50 ޙާފިޡުން މި އަންނަ ރަމަޟާން މަހާ ހަމައަށްދާއިރު އިތުރުވެގެންދާނެ ކަމަށް. އެހެންވީމާ، 75 ވަރަކަށް ޙާފިޡުން، ދެ އަހަރު ނުވަނީސް ތަމްރީނު ކުރެވިއްޖެ. މިއީ، ކުރު މުއްދަތަކަށް ބަލާއިރުގައި، އެންމެ ގިނައިން ޙާފިޡުން ތަމްރީނު ކުރެވުނު މުއްދަތު.
ވަޤުފު މަޝްރޫޢުތަކަށް ބަލާއިރުގައި، މިއީ، ވަރަށް މުހިންމު އިންވެސްޓްމަންޓެއް. ވަޤުފު މަޝްރޫޢުތައްވެސް އަޅުގަނޑުމެން އެތައް ގުނައަކުން އެބަ އިތުރުކުރަން. އެތައް ގުނައަކުން. މެނިފެސްޓޯގައި އަޅުގަނޑުމެން ވަރަށް ބޮޑަށް އިސްކަންދީފައި އޮންނާނެ، އިސްލާމީ ސިޔާސަތުގެ ތެރޭގައި އެކަން. އެއީ، އެއިން ލިބޭ ފައިސާއަކީ، އިސްލާމްދީނަށް ހޭދަކުރަން ހޯދާ ފައިސާ. ދީން ކުރިއަރުވަން. އަޅުގަނޑުމެންގެ ޅަދަރިންނަށް ދީން ކިޔަވައިދީ، ޒަމާނާ ގުޅޭގޮތަށް، އަޅުގަނޑުމެންގެ އުޅުމާއި ގުޅުން ރަނގަޅުގޮތުގައި ބައްޓަންކުރުމުގައި، ކޮށްދޭންޖެހޭ ކަންކަމުގައި ހޭދަކުރަން. އެހެންވީމާ، ވަޤުފު މަޝްރޫޢުތައް ހިންގުމަށް ފުރަތަމަ ފިޔަވައްސެއް ގޮތުގައި، ހުރިހާ ސިޓީތަކެއްގައި ވަޤުފު އިމާރާތެއް އެޅުމުގެ ޕްރޮޖެކްޓެއް ފަށައިގެން މިއުޅެނީ. މި އަހަރާއި، މި އަންނަ އަހަރާ، ދެ އަހަރު ތެރެއަށް ބަހާލައިގެން، ހުރިހާ ސިޓީތަކެއްގައި އަޅުގަނޑުމެން ފުރަތަމަ ވަޤުފު އިމާރާތްތައް މި އަޅަނީ. މާލޭ ސިޓީގައި، ހުޅުމާލެ ހިމެނޭހެން. މާލެ ސިޓީގައި އެންމެ ގިނައިން. އަދި ދެންހުރި އެހެން ސިޓީތަކުގައާ އެކީގައި މި އަޅަނީ. އެހެންވީމާ، މި އިމާރާތްތައް އެޅިގެންދިޔައީމަ، މި އިންވެސްޓްމަންޓްތަކަކީ، އިސްލާމްދީނަށް ޚިދުމަތްކުރުމުގައި، އަޅުގަނޑުމެންނަށް ވަރަށް މުހިންމު ސޯސްތަކަކަށް ވާނެ. އެހެންވީމާ، މެދު އަދި ދުރު ރާސްތާއަށްޓަކައި، މި ކަންތައް އަޅުގަނޑުމެން ކުރަމުން މިދަނީ.
ޒުވާނުން ޚުޠުބާކިޔާ އެބަ. ޒުވާން ޚަޠީބުން އުފެއްދުން އެއީ، އަޅުގަނޑުމެން ފަށައިގެން އުޅޭ ވަރަށް މުހިންމު ކަމެއް. އަޅުގަނޑުމެން ވަރަށް އުފާވާ ކަމެއް. މިހާރު ފެނިވަޑައިގަންނަވާނެ، ވަރަށް ޒުވާންކުދިން ޚުޠުބާދޭތަން. އިމާމުވެ ނަމާދުކުރާތަން. ތަރާވީޙު ނަމާދުކުރާތަން. މިހާތަނަށް، 500 ޒުވާން ޚަޠީބުން އުފެއްދިއްޖެ. 500 ޚަޠީބުން. މި އަންނަ އަހަރު، މި އަދަދު ޑަބަލްވާނެ އިރާދަކުރެއްވިއްޔާ. 1000 ޚަޠީބުންނަށްވާނެ އިރާދަކުރެއްވިއްޔާ. އެހެންވީމާ، މި ކުޑަކުޑަ ޤައުމުގައި، ޒުވާން 1000 ޚަޠީބުން. މިއީ، އަޅުގަނޑު ހިތުން، އަޅުގަނޑުމެންނަށް އިސްލާމްދީން ކުރިއެރުވުމުގައި އިރާދަކުރެއްވީތީ، ވަރަށް މުހިންމު މަސައްކަތަކަށް ވާނެ. އިންސާނީ ތަރައްޤީ.
ޒަކާތަކީ، އިސްލާމްދީނުގެ އެންމެ މުހިންމު އެއް ރުކުން. ޒަކާތު ހައުސް ޤާއިމުކުރެވި، އެތައް މަސައްކަތެއް އެބަ ކުރެވޭ. ޒަކާތާ ބެހޭ ބިލެއް މިހާރު ޤާނޫނަކަށް ހެދުމުގެ މަރުޙަލާގައި މިދަނީ. ޒަމާނަށް ފެތޭ، އިސްލާމްދީނުގައި އެކަން ކުރުމުގައި އޮންނަ ގޮތަށް، ޒަކާތާ ބެހޭ ޤާނޫނެއް ގެނައުމުގެ މަސައްކަތްވެސް މި ކުރަނީ، އެއީ، ވަރަށް މުހިންމު ކަމެއް ކަމުގައިވާތީ. ހަމަ އާދައިގެ ކަމަކަށް ހަދާލާފައި ވަރަށް ބޮޑަށް ދޫކޮށްލެވޭ ކަމެއް. އެހެންނަމަވެސް، އަޅުގަނޑުމެން ކޮންމެ މީހަކުވެސް ސަމާލުކަންދޭންޖެހޭ ކަމެއް މިއީ. އެހެންވީމާ، އެކަމަށްޓަކައި ޒަކާތު ޤާނޫނު ގެނައުމުގެ ކަންތައްވެސް އެބަ ކުރިއަށްދޭ.
ކުރިން އަޅުގަނޑު ދަންނަވާލިން، އިސްލާމިކް ޔުނިވަރސިޓީގެ ކެމްޕަސްތަކުގެ ވާހަކަ. ލަރނިންގ ސެންޓަރުތައް. މި ރަށުގައި އެއްތަން. އެގޮތަށް، އެކި ރަށްރަށުގައި މިހާރުވެސް އިސްލާމިކް ޔުނިވަރސިޓީގެ ކެމްޕަސް ތިނަދޫ އަދި އުނގޫފާރުގައި އެބަހުރި އަޅުގަނޑުމެންނަށް ޤާއިމުކުރެވިފައި. އަދި އެހެން ރަށްތަކުގައިވެސް ޤާއިމުކުރުމުގެ މަސައްކަތް ފެށިފައި މިވަނީ. އެކި ރަށްރަށުގައި، ޚާއްޞަކޮށް، އަރބަން ސެންޓަރުތަކާއި، ވެރިކަންކުރާ ރަށްތަކާއި، މިފަދަ ތަންތާނގައި ޤާއިމުކުރުމުގެ މަސައްކަތް މި ކުރަނީ، އިސްލާމިކް ލަރނިންގ އިތުރުކުރަން. ޒަމާނަށް ފެތޭގޮތަށް، އިސްލާމްދީން ވަރުގަދަޔަށް ކިޔަވައިދޭން އަޅުގަނޑުމެން ބޭނުން. އެހެން ދިމާއަކަށް ދާކަށް ބޭނުމެއްނޫން. އިސްލާމްދީން ޙައްލަކީ. ދީނުގައި އޮންނަ ގޮތަށް، ދީން ކިޔަވައިދިނުމަށް، މި ސަރުކާރުން ވަރަށް އިސްކަންދެން. އެހެންވީމާ، އިސްލާމިކް ޔުނިވަރސިޓީގެ ކެމްޕަސްތައް ވަރަށްފުޅާ ދާއިރާއެއްގައި ޤާއިމުކުރުމުގެ މަސައްކަތް ފެށިފައި މިއޮތީ.
ވަޤުފު އިމާރާތްތަކުގެ ވާހަކަ ދައްކާލިއިރު، އަޅުގަނޑު ވަކިން ފާހަގަކޮށްލަން ބޭނުން، ޤުރްއާނަށް ޚާއްޞަ ވަޤުފު އިމާރާތެއް ޤާއިމުކުރުމުގެ ވާހަކަ. މިހާރު މިކަމަށް، މާލޭގައި އެންމެ ޕްރައިމް އެއް ލޮކޭޝަނުން ވާނީ، އިސްލާމިކް ޔުނިވަރސިޓީއަށް ބިމެއް ރަޖިސްޓްރީވެސް ކޮށްދީ، ހަވާލުވެސްކޮށްފައި. ދާދި އަވަހަށް އެތަނަށް އިންވެސްޓްކޮށް، އެ އިމާރާތް އެޅުމުގެ މަސައްކަތް ފެށިގެންދާނެ. ސަރުކާރު ބަޖެޓުން އެއަށް އެހީތެރިކަންދޭނެ. ދީގެން، އެ އިމާރާތްވެސް އެޅިގެންދާނެ. އެވެސް ވެގެންދާނީ، ޤުރްއާނަށް، ޚާއްޞަކޮށް އަދި އިސްލާމްދީނަށް، އެތައް ޚިދުމަތެއް އޭގެ ސަބަބުން ކުރުމުގެ މަގުފަހިވެގެންދާނެ އިމާރާތަކަށް. މިފަދަ މުހިންމު ކަންތައްތައް މި ސައްތައިންސައްތަ އިސްލާމީ ޤައުމުގައި އަޅުގަނޑުމެން ކުރަންޖެހޭނެ. ދެން، މިއަދާ ހަމަޔަށް އައިއިރުގައި، އެކަންނުވެ އޮތުން އެއީ، އެހެން މައުޟޫޢެއް. އެހެންވީމާ، އަޅުގަނޑުމެން އިރާދަކުރެއްވީތީ، މިކަންކަމަށް ވަރަށް ސަމާލުކަންދެން. ޤުރްއާނާ ބެހޭ މަރުކަޒުގެ ގޮފިތައް މިދަނީ ޤާއިމުކުރަމުން. މި ރަށުގައި އެއްތަން ހުޅުވޭ ވާހަކަ މި ދެންނެވީ. އަޅުގަނޑުމެންގެ އަމާޒަކީ، މި އަހަރުގެ ބާކީއޮތް މަސްތަކުގައާއި، ދެންއޮތް ތިން އަހަރާ އެކީގައި ރާއްޖޭގެ ހުރިހާ ރަށެއްގައި، ހުރިހާ ރަށެއްގައި، ރާއްޖޭގެ ހުރިހާ ރަށެއްގައި، ޤުރްއާނާބެހޭ މަރުކަޒުގެ ގޮފިތައް ޤާއިމުކުރުން. އެ ރަށެއްގެ އާބާދީގެ ނިސްބަތުން. އެ ރަށެއްގެ ބިން އޮތް މިންވަރަކުން. އެ ރަށެއްގެ ފެސިލިޓީ ހުރިވަރަކުން އެ ރަށެއްގައި ޤާއިމުކުރާނީ. އެހެންވިޔަސް، ޤާއިމުކުރުން. އެބަހުރި ހަމަ ވަރަށް އާބާދީ ކުޑަ، ވަރަށް ޖާގަވެސް ނެތް ރަށްރަށް. އެހެންވީމާ، އެ ހުރިހާ ކަމެއް، އެ ޙަޤީޤަތްތަކުގެ މައްޗަށް ރިޢާޔަތްކޮށް، މި ވާހަކަ މި ދެންނެވީ.
އިސްލާމިކް ސެންޓަރުތައްވެސް އަޅަމުން އިރާދަކުރެއްވީތީ މިދަނީ. އެވެސް ގިނަވެގެންދާނެ. އިސްލާމިކް ސެންޓަރުތައް އެޅުމަކީވެސް، އަޅުގަނޑުމެން ވަރަށް އިސްކަންދޭ ކަމެއް. އެހެންވީމާ، މިކަހަލަ އެތައް ކަމެއް އަޅުގަނޑުމެން ކުރަމުން މިދަނީ. މިއީ އަޅުގަނޑުމެން ވަރަށް މުހިންމު ކަމެއްގެ ގޮތުގައި ދެކޭ ކަމެއް.
ދާދި އަވަހަށް، ސަރުކާރުގެ ފަރާތުން އިސްލާމިކް މިނިސްޓްރީން ފަށާނެ، ރާއްޖޭގެ މީހުން ދިރިއުޅޭ ހުރިހާ ރަށެއްގައި، ހުރިހާ ސިޓީތަކެއްގައި، މަގުތަކުގައާއި، އާންމު ސަރަޙައްދުތަކުގައި ޒިކުރު ބޯޑުތައް ބެހެއްޓުމަށް. ޒިކުރު ބޯޑުތައް، އިސްލާމްދީނުގައި ހުންނަ މުހިންމު ޝިޢާރުތަކާއި، ނަސޭޙަތްތަކާ ހިމެނޭގޮތަށް. މަގުމައްޗަށް ނުކުމެއުޅޭއިރުގައި، އާންމު ތަންތަނަށް، މަގުތަކަށް ނުކުމެއުޅޭއިރުގައި، އެ ކިޔައިލެވޭ. އޭގެ ސަބަބުން އީމާންތެރިކަން އިތުރުވެގެންދާނެ. އެހެންވީމާ، ރާއްޖޭގެ ހުރިހާ ރަށެއްގައި، އާންމުންނަށް އެކި ތަންތަނުން ފެންނާނެ ގޮތަށް، މި މަޝްރޫޢު އަޅުގަނޑުމެން އިރާދަކުރެއްވިއްޔާ، ވަރަށް އަވަހަށް އެބަ ފަށަން.
އާދެ، އަޅުގަނޑު މި ވާހަކަތައް މިއަދާ ގުޅުވައިގެން މި ދަންނަވާލީ، މިއަދުގެ މުނާސަބަތުގައި. މިއަދުގެ މި މުނާސަބަތު އާދެ، 899 އަހަރު ވުމުގެ މުނާސަބަތުގައި، ދިވެހި ލޮބުވެތި ހުރިހާ ރައްޔިތުންނަށް، އަޅުގަނޑު މަރުޙަބާ ދަންނަވަން. މި އަންނަ އަހަރަކީ، އިރާދަކުރެއްވިއްޔާ 900 އަހަރު ވާ އަހަރު، ރާއްޖެ އިސްލާމްވިތާ، ހިޖުރީގޮތުން. ހިޖުރީ ތާރީޚު މި ދަންނަވަނީ. މީލާދީ ތާރީޚަކުން ނޫން. ހިޖުރީ ތާރީޚުން 900 އަހަރު، މި އަންނަ އަހަރަށް މިވަނީ.
އެހެންވީމާ، އެއީ އަޅުގަނޑުމެން އުފާކުރަންޖެހޭ ކަމެއް. މިހާ ގިނަ ދުވަސް، އަޅުގަނޑުމެން އެއް ދީނެއްގައި، ހުރިހާ އެންމެން ތިބި ތިބުމަކީ، ﷲ ދެއްވި މަތިވެރި ނިޢުމަތެއް. އެހެންވީމާ، މި ނިޢުމަތަށް އަޅުގަނޑުމެން ޖެހޭނެ ޝުކުރުވެރިވާން. ޝުކުރުވެރިވާނީ، އެ ދީނަށް ޢަމަލުކޮށްގެން. އެއީ، ޝުކުރުވެރިވާން އޮތްގޮތަކީ. އެހެންގޮތަކަށް ކުރާ ކަމެއް ނޫން މިއީކީ. އަޅުގަނޑުމެން އަމިއްލައަށް ޢަމަލުކުރާނީ. އެހެން މީހަކަށް އަޅުގަނޑުމެންގެ ފަރާތަކުން ޢަމަލެއް ނުކުރެވޭނެ. އެހެންވީމާ، މި މައުޟޫޢަށް މާ ތަފުޞީލުކޮށް ނުގޮސް، އެހިސާބުން އަޅުގަނޑު ކުރުކޮށްލާނަން.
އަޅުގަނޑުގެ ދުޢާއަކީ، އަޅުގަނޑުމެންނަކީ، އަޅުގަނޑުމެންގެ ސިކުނޑިތައް ހެޔޮގޮތުގައި ބޭނުންކުރާ، ހެޔޮބަސްއަހާ، ހެޔޮބަސް ގަބޫލުކުރާ ބަޔެއް ކަމުގައި اللهُ سُبْحَانَهُ وَتَعَالَى މިންވަރު ކުރެއްވުން. އަޅުގަނޑުމެންގެ މި ޤައުމު، އިސްލާމްދީންމަތީ، ތާއަބަދަށް ލެހެއްޓެވުން. އަޅުގަނޑުމެންނަށް އުފާފާގަތިކަން މިންވަރު ކުރެއްވުން. އާމީން.
وَمَا تَوْفِيقِي إِلَّا بِاللَّهِ عَلَيْهِ تَوَكَّلْتُ وَإِلَيْهِ أُنِيبُ.
وَالسَّلَامُ عَلَيْكُمْ وَرَحْمَةُ اللهِ وَبَرَكَاتُه.