بِسْمِ ٱللّٰهِ ٱلرَّحْمٰنِ ٱلرَّحِيمِ
اَلْحَمْدُ للَّهِ رَبِّ الْعاَلَمِينْ، وَالصَّلاَة وَالسَّلاَمُ عَلَى رَسُولِ ٱللَّهِ، وَعَلَى آلهِ وَصَحْبِهِ أَجْمَعِينْ.
މަޑިފުށީގެ ލޮބުވެތި އެންމެހައި ރައްޔިތުން، ރަށުގެ ކައުންސިލްގެ ރައީސް، މި ދާއިރާގެ ޢިއްޒަތްތެރި މަޖިލިސް މެންބަރު، ކައުންސިލަރުންނާއި، މުއައްސަސާތަކުގެ ވެރިންނާއި، މި ރަށުގެ ޚިދުމަތްތެރި އިސް ރަށްވެހިން، ވަޑައިގެން ތިއްބެވި އެންމެހައި ޢިއްޒަތްތެރިން، އަދި މި ޖަލްސާ ދުރާއި ގާތުން އަޑުއައްސަވަމުން ގެންދަވާ އަދި ބައްލަވަމުން ގެންދަވާ، ލޮބުވެތި އެންމެހައި ރައްޔިތުން؛
السَّلامُ عَلَيْكُم ورَحْمَةُ اللهِ وَبَرَكاتُهُ.
އާދެ، އަޅުގަނޑުމެންނަށް މިއަދު މި ރަށަށް އާދެވުމުން، މަޑިފުށީގެ ލޮބުވެތި ރައްޔިތުން އަޅުގަނޑުމެންނަށް ވިދާޅުވި ހޫނު މަރުޙަބާއަށްޓަކައި، އަޅުގަނޑުގެ ހިތުގެ އެންމެ ފުންމިނުން، ތިޔަބޭފުޅުންނަށް ވަރަށް ބޮޑަށް ޝުކުރު ދަންނަވަން.
އާދެ، ރިޔާސީ އިންތިޚާބުގެ ކެމްޕެއިންގައި، ތިޔަބޭފުޅުންނަށް އަޅުގަނޑު ކަންތައްތަކަކަށް ވަޢުދުވިން. މި ކަންކަމަށް ވަޢުދުވީ، ނޫނީ ކޮށްދޭނެކަމަށް އަޅުގަނޑު ދެންނެވީ، ހަމަ ޙަޤީޤަތުގައިވެސް އެ ކަންކަން ކޮށްދިނުމުގެ ޢަޒުމްގައި. ނިޔަތުގައި. އަދި އެ ކަންކަން ސަރުކާރުން ކޮށްދެވޭނެ ކަމުގެ ޔަޤީންކަން އިރާދަކުރެއްވީތީ އޮތީމާ. އަދި ކުރެވޭނެ ގޮތް އަޅުގަނޑަށް ވިސްނޭތީ، ކަންކަން ކުރަންޖެހޭނެގޮތް އެނގޭތީ. އެނޫން ގޮތަކަށް ރާއްޖޭގެ އެއްވެސް ރަށެއްގައި، އެއްވެސް ތަނެއްގައި ވަޢުދެއް ނުވަން. އަދި މެނިފެސްޓޯގައިވެސް އެއްވެސް ކަމެއް ނުހިމަނަން.
މިއަދާ ހަމައަށް އައިއިރުގައި، ސަރުކާރުން އެގޮތަށް އަޅުގަނޑުވީ ވަޢުދުތައް ތަރުތީބުކޮށްގެން، އަޅުގަނޑުމެންނާ ހަވާލުވީއިރު ރާއްޖޭގެ އިޤްތިޞާދަށް ކުރިމަތިވެފައި އޮތް ދަތި އުނދަގޫ ހާލަތުން ރައްޔިތުންނަށް އިތުރު ދަތިތަކެއް ކުރިމަތިނުވެ، އިޤްތިޞާދު ރަނގަޅުކުރަމުން، ރާއްޖެއަށް ފާގަތިކަން ގެންނަމުން، ބޭރުގެ ދަރަނިތައް ދެއްކުމުގައި އެއްވެސްވަރަކަށް ޑިފޯލްޓްނުވެ، ކަންކަން ރަނގަޅުކުރަމުން، ތަރައްޤީގެ ކަންކަން، ވަޢުދުތައް ފުއްދަމުން، ފުއްދައިދެމުން، ފުއްދޭނެގޮތް ހަމަޖައްސަމުން މި އަންނަނީ. މި އައީ މިއަދާ ހަމައަށް. އެގޮތުގެ މަތިން މިއަދު މި ރަށުގައިވެސް އަޅުގަނޑުވީ ވަޢުދުތަކުގެ ތެރެއިން، ގިނަ ކަންތައްތަކެއް ހާސިލުކުރުމުގެ މަސައްކަތް ފެށިގެން މި ދިޔައީ.
އާދެ، ދާދި ދެންމެއަކު ތިޔަބޭފުޅުންގެ ކައުންސިލްގެ ރައީސާ އަޅުގަނޑުމެން މި ހަވާލުކުރި ލިޔުމަކީ ހަމައެކަނި ލިޔުމެއް ނޫން. އަޅުގަނޑު ގަބޫލުކުރާ ގޮތުގައި މި ރަށުގެ ބައެއްގެ ގޮތުގައި މި ރަށަށް، މި ރަށުގެ އިޚްތިޞާޞްގެ ތެރެއަށް އެ ދެ ފަޅުރަށް ހިމަނަން ތިޔަބޭފުޅުން ބޭނުންފުޅުވީ، ހަމައެކަނި ލިޔެކިޔުމުން އެކަން ބާއްވާކަށެއްނޫން. އެއަށްވުރެ މާބޮޑަށް ވިސްނަވާފައި، ދުރަށް ވިސްނަވާފައި. ދެމެހެއްޓެނިވި ތަރައްޤީއެއްގެ ތެރެއިން ތިޔަބޭފުޅުންނަށް ކަންތައްތަކެއް، ޚާއްޞަކޮށް، އިޤްތިޞާދީ ޕްލޭން އޮވެގެން، އެގޮތަށް މަސައްކަތް ކުރުމުގެ ގޮތުން މަސައްކަތްކުރުމަށްޓަކައި ކަން އަޅުގަނޑަށް އެނގޭ. އެހެންވީމާ، އެ ވަޢުދުވީ. އަދި އެ ވަޢުދު ފުއްދުމުގެ ގޮތުން މި ކަންކަން ކޮށްދީ މިއަދު މި ހަވާލުކުރީ. އަދި މިހާރުވާނީ ހަމަ ރަސްމީކޮށް ގެޒެޓުވެސް ކުރެވިފައި. އެހެންވީމާ، ރަސްމީކޮށް މިހާރު އެއީ، ތިޔަބޭފުޅުންގެ ތަންތަން. އެގޮތަށް ހަމަޖެހިގެން އެދިޔައީ.
އަޅުގަނޑު ޔަޤީންކުރަން، ރައްޔިތުންގެ އުފާފާގަތިކަމަށް، ހެވާއި ލާބައަށް، މުސްތަޤުބަލަށް މި ދެ ރަށުގެ ބޭނުން ހެޔޮގޮތުގައި ޕްލޭންކޮށްގެން ކުރައްވާނެ ކަމަށް. ސަރުކާރުގެ ތެރެއިން ދޭންޖެހޭ އެއްވެސްކަހަލަ ހުއްދައެއް މިސާލަކަށް، ތިޔަބޭފުޅުން އެތަނަށް ކުރައްވާ ޕްލޭންގައި، ކަންކަން ކުރުމުގައި ވަކިވަކިން އިންޑިވިޖުއަލީ ނަންގަވަންޖެހޭ ހުއްދަ ހުންނާނެ، ހުރެދާނެ. އެ ހުރިހާ ހުއްދައެއްވެސް ލިބޭނެ. އެހެންވީމާ، އިރާދަކުރެއްވިއްޔާ ތިޔަބޭފުޅުންގެ މަސައްކަތް ދެން ފަށްޓަވަންވީ. ކުރިއަށް ގެންދަވަންވީ. ސަރުކާރުން އޮންނާނީ ތިޔަބޭފުޅުންނާ އެކީގައި.
އާދެ، ހަމައެއާއެކީގައި، މިއަދު ދެން ކުރެވުނު، ނޫނީވިއްޔާ އިފްތިތާޙު ކުރެވުނު ކޮންމެ މަސައްކަތަކީވެސް ރައްޔިތުންނަށް މިފަދައިން ކުރިއެރުން ވަރަށް ލިބޭނެ ކަންކަންކަން ޔަޤީން. މަގުހެދުމަށް ވަރަށް ބޮޑަށް ބޭނުންވެފައި އޮތީ. ކުރީގައި އަޅުގަނޑު ހައުސިންގ މިނިސްޓްރީގައި ހުރިއިރުގައި، މަގެއް ހަދަން ފެށިން. ދެން ކަން ދިމާކުރިގޮތުން، އެ މަގު ނިންމުމަށާއި، އެހެން މަގުތައް ހަދަން ފަށަންވެސް އަޅުގަނޑަށް މި ޖެހުނީ. ދެން ކޮންމެއަކަސް، ހާލަތު މި ދިޔައީ ވަރަށް ދަށްކޮށް މިދިޔަ އަހަރުތަކުގައި. ވަރަށް ދެރަކޮށް އެކަން ގޮސްފައި އެ އޮތީ.
ނަމަވެސް، މިއަދު މިވަނީ އެ ހިތްދަތި ދުވަސްތައް އަދި ތިޔަބޭފުޅުންނަށް އޭގެ ސަބަބުން ލިބިފައިހުރި އެކިއެކި ދަތިކަމާއި އަދި ޖިސްމާނީގޮތުންވެސް ލިބިފައިހުރި އެކިކަހަލަ ގެއްލުންތަކާއި، މި ކަންކަން މާޒީއަށް ދޫކޮށްލައި، ރަނގަޅު ފެންވަރަކަށް ހެދިފައި ހުރި މަގުތަކެއް ލިބުމުގެ މަރުހަލާ ފެށިފައި. އެހެންވީމާ، މިއަދު މި ފެށުނު މަސައްކަތަކީ، ހަމަ ވަރަށް ވަރަށް ފުރިހަމަކަމާ އެކީގައި، ހަލުވި ދުވެލީގައި، ބާރު ސްޕީޑުގައި ދާނެ މަސައްކަތްތަކެއް ކަމުގެ ޔަޤީންކަން އަޅުގަނޑު ތިޔަބޭފުޅުންނަށް އަރުވަން. އެގޮތުގައި ކުރިއަށް ދާނީ.
ހަމަ އެގޮތަށް ދެން ހުރި މަޝްރޫޢުތައްވެސް. ސްކޫލް މަޝްރޫޢުވެސް. ސްކޫލަށް ވަރަށް ބޮޑަށް ޖާގަ ބޭނުންވޭ. ހަމަ އެ މަޝްރޫޢުވެސް ދާނީ އެގޮތުގައި. އެ މަޝްރޫޢު ނިމިގެންދިޔައިމާ، މި ރަށުގެ ތަޢުލީމީ ޙަޔާތް ވަރަށްބޮޑަށް އާ ހަރުފަތްތަކަކަށް، އުސްމިންތަކަކަށް، ކުރިއެރުންތަކަކަށް ދާނެ.
ހަމަ އެގޮތަށް، ކުޅިވަރުގެ ދާއިރާއިން، އަޅުގަނޑުމެން މި ފެށި ފިޓްނަސް އެންޑް ރިކްރިއޭޝަން މަރުކަޒު ކަމުގައިވިޔަސް، ޞިއްޙީ ދާއިރާއަށް އިތުރު ކުރިއެރުން ގެނައުމަށް މި އިތުރުކުރެވޭ އިމާރާތުގެ މަސައްކަތް ކަމުގައިވިޔަސް، އެއީ ހަމަ މިގޮތަށް ތިޔަބޭފުޅުންނަށް ކުރިއެރުން ލިބޭނެ ކަންކަން.
އޭ.ޓީ.އެމް. އެއް ހުޅުވިގެން އެދިޔައީ. އާދެ، އޭ.ޓީ.އެމް. ތަކަކީ ކުޑަކުޑަ ކަމެއްގެ ގޮތުގައި، ބައެއް މީހުން ދުށް ނަމަވެސް، އެއީ، އެކަމުގެ ނަފާ ލިބޭ ރަށްރަށުގައި ތިބޭ ރައްޔިތުންނަށް ވަރަށް ފަސޭހަވާ ކަމެއް. އަތުން ކުރިން ހިނގަމުންދިޔަ އެތައް ޚަރަދެއް ނިމުމަކަށް އަންނަ ކަމެއް. ޙަޤީޤީ މާނައިގައި، ރައްޔިތުން ބާރުވެރިކޮށްދޭ ކަމެއް. އިޤްތިޞާދަށް ކުރިއެރުން ލިބޭ ކަމެއް. ރައްޔިތުންނަށް ފަސޭހަކަން ލިބޭ ކަމެއް. އެހެންވީމާ، މިކަމުންވެސް ހަމަ ޔަޤީން، މި ރަށުގެ ރައްޔިތުންނަށް، ވަރަށް ބޮޑު ފަސޭހަތަކެއް ލިބިގެންދާނެ.
އާދެ، މި ކަންކަމުގެ އިތުރަށްވެސް، މި ރަށުގެ ތަރައްޤީއަށް ކުރަންހުރި ވަރަށް ގިނަ ކަންކަން އެބަހުރި. މި ފެށުނު ކޮންމެ މަޝްރޫޢެއް، ރަނގަޅަށް ބާރު ސްޕީޑުގައި ކުރިއަށް ދިޔުމާއި، އަދި އޭގެއިތުރަށްވެސް، ކުރިއަށް އޮތް ދުވަސްތަކުގައި ބައެއް މުހިންމު ކަންކަންވެސް އެބަހުރި.
ނިމެމުންދާ މަޝްރޫޢުތަކަށް ބަލާއިރުގައި، އައިސް ޕްލާންޓެއްގެ މަސައްކަތް ގާތްގަނޑަކަށް ނިމުމުގެ މަރުޙަލާގައި އެހެރީ. މި މަސައްކަތަށް ވެގެންއުޅޭ ގޮތަކީ، މިއީ، ސަރުކާރުގެ ލޯކަލް ބަޖެޓުން ޚަރަދުކުރާ މަޝްރޫޢަކަށް ނުވުން. އެކަހަލަ މަޝްރޫޢެއް ނޫން. ބޭރުގެ ފަންޑަކުން ޚަރަދުކުރަނީ. ދެން، މިގޮތަށް ހަމަ ރާއްޖޭގެ އެކި ކަންކޮޅުގައި އެބަހުރި މަޝްރޫޢުތައް، ބޭރުގެ ފަންޑުތަކުން ޚަރަދުކުރާ. ދެން މިހާރު، ބޭރުގެ ފަންޑުތަކަށް ވާގޮތަކީ، އެ ފަންޑުދޭ ފަރާތުގެ އުޞޫލު ފޮލޯކުރަންޖެހޭ. ޕްރޮކިއުމަންޓް އުޞޫލު، ނޫނީވިއްޔާ ދެން އެ އޮންނަ ޕޭމަންޓް އުޞޫލުތައް. މީގެތެރެއިން ޑިލޭތަކެއް އެބަހުރި އައިސްފައި. ދެން، ސަރުކާރުން މަސައްކަތް މި ކުރަނީ، އެކަން އަވަސްކުރެވޭނެ ގޮތްތަކެއްވޭތޯ. ކޮންމެގޮތެއްވިޔަސް، އަޅުގަނޑަށް ހަމަ ޔަޤީން، އަޅުގަނޑުމެންނަށް މި މަޝްރޫޢު ވަރަށް އަވަހަށް އިރާދަކުރެއްވިއްޔާ ނިންމާލެވޭނެ. މިހާރު އެހެރީ ހަމަ ކަނެކްޝަނާ ހަމައަށް، ޕަވަރ ކަނެކްޝަނާ ހިސާބަށް ގޮސްފައި. ކޭބަލް ގުޅުމުގެ މަސައްކަތާ ހިސާބުގައި. އާދެ އެހެންވީމާ، އެކަންވެސް އޮތީ އެގޮތަށް.
އާދެ، މިރަށަކީ ފުލުހުންގެ ޚިދުމަތްދޭ ފުލުހުންގެ މަރުކަޒެއް ހުރި ރަށެއް. މިކަމުގައި، މި ރަށުގެ ރައްޔިތުންނަށް ވަރަށް ބޮޑެތި ތަކުލީފުތައް ދިމާވާ ކަމެއް އެބައޮތް. ފުލުހުންގެ ވެހިކަލެއް މި ރަށުގައި ނެތުން. އާދެ، މިކަން މި ރަށަށް ވަރަށް މުހިންމު. ދެން، ގިނަ ރަށްތަކުގައި އަދި އެހާ މުހިންމު ކަމަކަށް ނުއެއްވޭ. އެކަމަކު، މި ރަށުގައި މިއީ ވަރަށް ބޮޑަށް މުހިންމު ކަމެއް. އެހެންވީމާ، އިރާދަކުރެއްވިއްޔާ މި އަހަރު ނިމުމުގެ ކުރީގައި، މި ރަށަށް ފުލުހުންގެ ވެހިކަލެއް ފޯރުކޮށްދޭނަން. އެ ޔަޤީންކަން އަރުވަން.
އެންމެފަހު ކަމެއް ގޮތުގައި އަޅުގަނޑު މި ބޭއްވީ، އެންމެ ގިނަ ރައްޔިތުންނަށް ޚާއްޞަކޮށް، ޒުވާނުންނަށް އެންމެ މުހިންމު ކަންތައް. ގެދޮރުގެ ވާހަކަ. އާދެ، ގެދޮރުވެރިކަމަކީ، އަޅުގަނޑުމެންގެ އެންމެ މުހިންމު ސިޔާސަތު. ރިޔާސީ އިންތިޚާބުގައި އަޅުގަނޑު ރައްޔިތުންނަށް ވީ އެންމެ ބޮޑު ވަޢުދު. ހަމަ ޙަޤީޤަތުގައިވެސް، އަޅުގަނޑު އެ ދާއިރާއެއް ހިންގުމުގައި އެތައް އަހަރެއް އުޅުނީމައާ އެކީގައި، އަޅުގަނޑަށް އެނގޭ، ރާއްޖޭގެ ރައްޔިތުންނަށް ކިހާވަރެއްގެ މުހިންމު ކަމެއްކަން އެއީ. އެހެންވީމާ، އެ ވަޢުދު ވީ. މިކަން ޙައްލުކުރުމަށް، ވަރަށް ގިނަ މަސައްކަތްތަކެއް މިއަދާ ހަމައަށް އައިއިރުގައި މި ވަނީ ކުރެވިފައި، ކުރަން ފަށާފައި، ކުރެވެމުން އެބަދޭ.
ހައުސިންގ ލޯން ސްކީމެއް ތަޢާރުފު ކުރެވިފައި. އެކަމަކު، އަދި ހަމަ އެންމެ އަހަރެއް މިދިޔައީ. މި އަހަރުގެ ފުރަތަމަ މަރުޙަލާގައި އެޕްލައި ކުރި ފަރާތްތަކުގެ ތެރެއިން، ބައެއް ފަރާތްތައް ދާދި އަވަހަށް ބޭންކް ތްރޫކޮށް ސިލެކްޓް ކުރެވި، ލޯނު ހަމަޖެހޭނެ. އެހެންނަމަވެސް، އަދި ވަރަށް ގިނަ ފަރާތްތަކަށް ދޭންޖެހޭ. ތިޔަބޭފުޅުން ފަދައިން، ވަރަށް ގިނަ ރައްޔިތުން އެބަތިބި، މި 5 ޕަސެންޓުގެ ލުއިލޯނު ބޭނުންވާ، ލިބެންޖެހޭ. އެހެންވީމާ، އެއީ ކޮންމެ އަހަރަކު ކުރިއަށްދާނެ މަޝްރޫޢެއް. ކޮންމެ އަހަރަކު ސަރުކާރުގެ ބަޖެޓުން ވަކި އަދަދަކަށް ފައިސާ ކަނޑައަޅައިގެން، އަޅުގަނޑުމެން ކުރިއަށް ގެންދާ މަޝްރޫޢެއް.
އޭގެއިތުރަށް، ދެން މިކުރާ ކަމަކީ، ގެދޮރު ބިނާކޮށްދިނުން. ހައުސިންގ ޔުނިޓު އަޅައިދިނުން. ހައުސިންގ ޔުނިޓު އަޅުގަނޑުމެން އަޅަން ދެގޮތަކަށް. އެއްގޮތަކީ، ލޭންޑްޔޫސް ޕްލޭންގައި ކަނޑައަޅާ ވަކި ސަރަޙައްދެއްގައި، ހައުސިންގ މަޝްރޫޢެއް ގޮތުގައި މަޝްރޫޢެއް ހިންގުން. ވަކި އިމާރާތްތަކެއް އަޅާފައި، އެތަނުގައި ދެން ދިރިއުޅުން. ދެވަނަ ގޮތަކީ، އަމިއްލަ ގޯތީގައި ގެ އަޅައިދިނުން. އެގޮތަށް، ހައުސިންގ ޔުނިޓު ވަކިވަކިން، އެ މީހެއްގެ ގޯތީގައި ގެ އަޅައިދިނުން. މިގޮތަށް ބައެއް ރަށްރަށުގައި، މިހާރުވެސް ބައެއް މަޝްރޫޢުތައް ކުރިއަށް ގެންދެވިފައި ވަނީ. އަދި ނިންމިފައިވޭ.
އާދެ، މި އަންނަ އަހަރުގެ ބަޖެޓުގައި ހިމަނައިގެން، އިރާދަކުރެއްވިއްޔާ އަމިއްލަ ގޯތީގައި ގެ އެޅުމަށް އިސްކަންދީގެން، 50 ހައުސިންގ ޔުނިޓުގެ މަޝްރޫޢެއް، މި ރަށުގައި ކުރިއަށް ގެންދާނަން. އެ ޔަޤީންކަން ތިޔަބޭފުޅުންނަށް އަރުވަން. 50 ގޯތީގައި، 50 ޔުނިޓު، އެގޮތަށްވެސް އެޅިދާނެ. ވަކިން، ވަކި ސަރަޙައްދެއްގައިވެސް އެޅިދާނެ. ކައުންސިލް މެދުވެރިކޮށް ރައްޔިތުން ސަރުކާރަށް އެންގެވީމާ، އެގޮތަށް އެކަން ފައިނަލް ކުރާނަން. ވަކިވަކި ގޯތީގައިވެސް ހަމަ އެޅިދާނެ. އެހެންވީމާ، 50 ހައުސިންގ ޔުނިޓުގެ މަޝްރޫޢެއް މި އަންނަ އަހަރުގެ ބަޖެޓުގައި ހިމަނައިގެން، ވީހާވެސް އަވަހަކަށް އެ މަޝްރޫޢު ފެށޭނެގޮތް ހަމަޖައްސައިދޭނަން. އިރާދަކުރެއްވިއްޔާ މި އަންނަ އަހަރަށް ފާސްކުރާ ބަޖެޓު، މިހާރު ނިމުމަކާ ހަމައަށް އެދަނީ. އެއިން އިރާދަކުރެއްވިއްޔާ 50 ޢާއިލާއަށް، ޔަޤީނުންވެސް އެކަން ޙައްލުވާނެ. ދެން، ސަރުކާރުން މި އަޅާ ހައުސިންގ ޔުނިޓުތަކަކީ، ވަރަށް ކުޑަ އަގެއްގައި ލިބޭ ހައުސިންގ ޔުނިޓުތަކެއް. އެކި ރަށްރަށުގައި އެކި އަގު އެބަހުރި. -/2500 ރުފިޔާ، -/3333 ރުފިޔާ، މިކަހަލަ އަގުތަކެއް ހުންނަނީ. މި ދެންނެވި -/3333 ރުފިޔާއަށްވުރެ އަގުބޮޑުކޮށެއް ނުހުރޭ ރަށްރަށަކުއެއް އަދިއެއް، ސަރުކާރުންދޭ ހައުސިންގ ޔުނިޓުތަކެއް. އެހެންވީމާ، ވަރަށް ކުޑަ އަގެއްގައި މި ދެންނެވިހެން، 2000ން މި ދެންނެވި އަގާ ދޭތެރޭގައި، މަހަކު ދައްކަންޖެހޭވަރު މި ހުންނަނީ. މާލޭގައި، ދެން މާލެ ސަރަޙައްދުގައި ތަންކޮޅެއް އަގުބޮޑީ. އެހެންވީމާ، ވަރަށް ލުއި، އެފޯޑަބަލް މޮޑެލެއް އަޅުގަނޑުމެން މި ގެންގުޅެނީ. އެހެންވީމާ، 50 ހައުސިންގ ޔުނިޓު ހަމަޖެހިފައިވާ ކަމުގެ ޔަޤީންކަން ދެން. އެ މަޝްރޫޢު މި އަންނަ އަހަރު އިރާދަކުރެއްވިއްޔާ ކުރިއަށްދާނެ.
އާދެ އެއާއެކީގައި، ދެން މި ފެށިގެންދިޔަ މަޝްރޫޢުތަކާއި، މި ދެންނެވި ހުރިހާ ކަމެއް ވަރަށް ރަނގަޅަށް، އަޅުގަނޑުމެން ކުރިއަށް ގެންގޮސްދޭނަން. އިރާދަކުރެއްވިއްޔާ، އޭގެ ފުރިހަމަ ނަތީޖާ، ތިޔަބޭފުޅުންނަށް ލިބިވަޑައިގަންނަވާނެ. އެ ޔަޤީންކަން އަދިވެސް އެއްފަހަރު ތިޔަބޭފުޅުންނަށް އަރުވަމުން، އަޅުގަނޑު އަދިވެސް އެއްފަހަރު ތިޔަބޭފުޅުންނަށް ވަރަށް ބޮޑަށް ޝުކުރު ދަންނަވަމުން، ވަކިވެލާނަން. އަނެއްކާވެސް، ތިޔަބޭފުޅުންގެ އަރިހަށް އައުމުގެ އުންމީދުގައި. މީގެތެރެއިން ގިނަ މަޝްރޫޢުތަކެއް ނިމި، އެ އުފަލުގައި ތިޔަބޭފުޅުންނާ އެކީ ބައިވެރިވުމުގެ އުންމީދުގައި.
އަޅުގަނޑު ކަމެއް ހަނދާންނެތިގެން، ދަންނަވާލާނަން. މިއީ، އާންމުކޮށް ވާކަމެއް ނޫން. "ފަހުން ނަގާ ރާޅު ބޮޑުވާނެއޭ" ބުނޭތާ ދޮގެއްތޯ.
އަޅުގަނޑު ހަނދާން ނެތުނީ ކޯޒްވޭ ވާހަކަ ބުނެލަން. އާދެ، އަޅުގަނޑު ވަޢުދުވިން، ދިޔަމިގިލިން މަޑިފުށްޓަށް، މި ދޭތެރޭ ކޯޒްވޭ ހަދަން. އަދި މި ކޯޒްވޭ، އުފުރިޔާއާ ހަމައަށްވެސް ދާނެ. މި ކޯޒްވޭގައި އަޅުގަނޑުމެން ވަކި ޕްރޮސީޖަރއަކުން ކޮންމެ މަޝްރޫޢެއްވެސް ކުރިއަށް މި ގެންދަނީ. ދެން، މީގެ ޓެކްނިކަލް ހުރިހާ ކަމެއް ނިމި، ޓެންޑަރިންގ ޕްރޮސެސްވެސް މިހާރު ނިމިގެން އެދަނީ. މިރޭ ނިމެނީ. އަޅުގަނޑުމެން ކުރިން ބެލީ، މި ދަތުރުގައި ސޮއިކުރެވޭވަރަށް ނިންމާލެވޭނެ ކަމަށް. އެކަމަކު މިރެއަށް ނިމެނީ. ނިމުނީމާ، މާދަމާ އަޅުގަނޑުމެންނަށް ސޮއިކުރެވޭނީ. މާދަމާ އަޅުގަނޑުމެން ދިޔަމިގިލީގައި ސޮއިކުރާނީ. އެހެންނަމަވެސް، މިތާ އަޅުގަނޑު އިޢުލާނުކޮށްލަން ބޭނުން. އަޅުގަނޑު މި ރަށުގައި އެ ވަޢުދުވީ. އެހެންވީމާ، ދިޔަމިގިލިން މަޑިފުށްޓާ އަދި އުފުރިޔާއާ ގުޅޭ ކޯޒްވޭގެ ޢަމަލީ މަސައްކަތް ދާދި އަވަހަށް ފެށޭނެ. އެކަމަށްޓަކައި އެގްރީމަންޓުގައި ސޮއިކުރުން މާދަމާ އޮންނާނެ. އެކަން އަޅުގަނޑު ދަންނަވާލަން މިތަނުގައި. އަދިވެސް އެއްފަހަރު، ވަރަށް ބޮޑަށް ޝުކުރިއްޔާ!
އަޅުގަނޑުގެ ދުޢާއަކީ، އަޅުގަނޑުމެން މިކުރާ މަސައްކަތްތަކުގައި، اللهُ سُبْحَانَهُ وَتَعَالَى ބަރަކާތް ލެއްވުން. އާމީން.
وَمَا تَوْفِيقِي إِلَّا بِاللَّهِ عَلَيْهِ تَوَكَّلْتُ وَإِلَيْهِ أُنِيبُ.
وَالسَّلَامُ عَلَيْكُمْ وَرَحْمَةُ اللهِ وَبَرَكَاتُه.